ذبل ورد الغرام إللي نما عوده على ساقيك
ولا بيّن ضماه وكن مشروهه وسط جوفه
كتمه ألين فاض من العتب وخاب ظنه فيك
يموت بعزه أهون له ولا يشكي لك ظروفه
تيّسر جعل دربٍ سقت رجلك فيه ما يشقيك
عسى إللي جنبك عني يجنب عنك صدوفه
هنا ننهي مسيرة ماضي أيامي معَ ماضيك
رغم لذّة بدايتها جعل ماهيب مخلوفه
شواهدها عن دروب الردى والعيب والتشكيك
سلومٍ خلت أنفسنا عن الزلات مصروفه
قبل وصلك جوارحنا ليا طروك تستهويك
وعقب فرقاك لا طرو حديثٍ حولك أطوفه
ولكن السؤال إللي جوابه عجّز محاكيك
لا عيّن جواب ولا قدر ينساه من خوفه
يا كيف أنسى وأنا حتى الهبوب يجيب لي طاريك
أشوفه ينبش جروحي وأنا يديّ مكتوفه
ذبحت أجمل ليالي عمري إللي عشتها بيديك
مثل ما يذبح المعروف من سولف بمعروفه
- فهد بن فلاح