ҚАЙТАР ДҮНЬЯ
Бир талаба айтып берди. Әдеттегидей жумыс ислеп жүргенде бир киси келип тәкаббырлық пенен:
– Гүл егиў керек, – деп қалды.
Оның тәкаббырлығы мәлел келсе де, пул ушын разы болдық. Машинаға шығып үйине бардық, егилетуғын жерлер көп екен, жумыс басында бай:
– Гүлди толық егип болсаңыз пулды аласыз, болмаса бир сом да бермеймен!
Ҳәммемиз жумысқа қатты киристик. Ис аўыр, жер қатты. Жумыс қураллары да саз емес. Оның үстине басымызға бир жигитти қойып кетти. Өлердей жумыс ислеп, шамға жақын болдық. Ҳәммемиз ҳарып қалдық. Әсиресе арамыздағы жасы үлкенирек аға сырттан билдирмесе де, тәўирек шаршап қалды.
Жумысты таўысып, бет-қолларымызды жуўып, кийимлеримизди алмастырдық. Бизлерди жаллаған киси үйине кирип кетти. Үйден пул алып шығар деп көп күттик, арадан бир саат шамасы ўақыт өтсе де шықпады. Ақыры әдептен болмаса да ишке кирдим. Ол сыпада жатып телевизор көрип атыр екен. Маған қарап:
– Еле қайтпадыңызлар ма? Пулларыңызды ертең беремен.
– Ертең және келемиз бе?
– Басымды аўыртпа! Ашыўымды шығарғанларға бир сом да бермеймен! Қәне, үйимнен жоқ бол!
Оның бул гәпине аўызымыз ашылып қалды. Оны инсапқа да шақырдық. Бирақ ол тек үстимизден күлип тура берди. Сонда арамыздағы жасы үлкенимиз оны Қудайға салды, үшинши жигит те шыдай алмай:
– Иләҳим, бизлердиң ҳақымыз жаназаңа буйырсын! – деп жиберди.
Бул гәпти байдың ҳаялы еситип:
– Аўзыңа қарап сөйле!, деп бақырып қалды изимизден.
Үйден шыққанымызда түн болып қалған еди, жолда автобус түгил машинаның қарасы көринбейди. Бәрибир ҳеш биримиздиң қалтамызда таксиге жететуғындай пул да жоқ еди. Әстен пиядалап кете бердик. Жолда кетип баратырсақ, бир жеңил машина келип қасымызда тоқтады:
- Отырың, апарып қояман.
Бизлер:
- Яқ, рахмет, пияда кете беремиз, дедик.
- Түнниң ярымында қаяққа барасыз
Мәнзилди айттық.
- Ол қаланың арғы шети ғо. Отырың, мен таксис емеспен, бийпул апарып қояман, деди.
Машинаға шыққанымыздан кейин кеште не қылып жүргенимизди сорады. Болған ўақыяны айтып бердик. Оның қатты ашыўы келди, кейин бизлерге:
– Бүгин мен ушын қуўанышлы күн. Перзентли болдым. Сол туўылған балам ушын иҳсан бережақ едим, Аллаҳтың Өзи сизлерди жеткерди, - деп бир талай пулды қалтасынан шығарып берди.
Яқ, деўимизге қарамай, мәжбүрий услатты. Көп пул берипти ҳәттеки бүгинги келискен пулымыздан да көбирек.
Арадан бир ҳәпте ўақыт өтип және сол көшеге жумысқа барып қалдық. Сол байдың үйи қасынан өтип баратырып, үйине қарағымыз да келмеди. Бирақ оның дәрўазасының алдында көп адам бар еди.
– Той болып атырған шығар, – деп айтты арамыздағы бир жигит.
– Той емес, жаназа – деди бизлерди апаратырған такси меңгериўши.
– Бир ҳәпте алдын бул үйдиң ийеси жети жасар баласы менен бирге машинасында аўдарылып кетипти, кеше жаны үзилди...
💎 Ҳәй инсанлар..., қырағы болың! Ҳәр бир ҳәрекетимизге қайсы бир күн жуўап аламыз
Бул дүнья қайтар дүнья...
Бизди социаллық тармақларда бақлап барың!
🧿alberuniy.uz 🟥youtube
🌐instagram 🌐facebook
Каналға ағза болың !
✈️alberuniyuz