السيره النبويه بالعامية 💙

ويقول سيدنا عُمر: لكل أمرٍ يكتمل لابد له من نقصان ( وطبعا خلوا بالكم النقصان هنا هو موت رسول الله ﷺ .. الآية دى مرة واحد يهودى راح لعُمر بن الخطاب وقت ما كان أمير المؤمنين فقال له: "يا أمير المؤمنين لو أُنزلت هذة الآية فى كتب اليهود لجعلنا هذا اليوم عيداً " فقال له:" اليوم أكملت لكم دينكم وأتممت عليكم نعمتى"
فيرد سيدنا عُمر عليه و يقول: هى نزلت فى عيد أصلاً يوم عرفة وكمان يوم جمعة )

نكمل الحلقة الجاية إن شاء الله 🤍

سيرة_الرسول
الحلقة 207
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#حجة_الوداع (ج2)
يقول النبى ﷺ فى وصاياه لأمته: إنى مباهى بكم الأمم يوم القيامة فلا تسودوا وجهى يوم القيامة

نكمل سوا خطبة النبىﷺ .. بيخطب النبىﷺ فى المسلمين فى الحج و بيكمل الخطبة وبقول "أيها الناس استوصوا بالنساء خيراً فإنكم أخذتموهن بكلمة الله و استحللتم فروجهن بكلمة الله.."
النبىﷺ بيوصى على نساء المسلمين .. أن الرجل بياخد المرأة من بيت أبوها بكلمة.. تقول له زوجتك نفسى و يقول لها قبلت ، فاتقوا الله فى النساء ..إوعى تؤذيها لما تروح بيتك ده أنت أخذتها بأمان ربنا على كتاب الله و سنة رسول الله ..أنت شهدت ربنا بينكم !! و يشدد النبىﷺ و يقول: اتقوا الله فى النساء فإنهن عوان عندكم ..يعنى زوجتك بقت عندك و تحت أمرك ..ماينفعش تؤذيها اتقى الله فيها لأن عذاب ربنا شديد.. دى وصايا النبىﷺ الأخيرة يا جماعة خلاص النبى ﷺ قرب يموت .. و تخلص الخطبة و ينزل النبىﷺ و يكمل المسلمين مناسك الحج و بعد شوية يقف النبى ﷺ و يعمل خطبة كمان ..كأن النبىﷺ بيخطب كذا مرة عشان يحفظوا الوصية..

فتبدأ الناس تستغرب وتسأل هو النبىﷺ بيخطب كتير ليه !! و تتجمع الناس تانى والصحابة يقفوا عشان يكرروا للناس اللى واقفة بعيد كلام النبىﷺ علشان يسمعوا ..

فيقول النبىﷺ "أيها الناس أى يوم هذا ؟ " تانى !! فالناس قالت يمكن اسم اليوم اتغير و ده وارد لأن الوحى لسه بينزل فيمكن اتغير اسم اليوم فقالوا: " الله ورسوله أعلم .. " فقال: أليس اليوم الحرام ؟ قالوا : بلى ، فقال النبىﷺ : أى شهر هذا ؟ فقالوا: الله ورسوله أعلم .. فقال: أليس الشهر الحرام ؟ .. فقالوا: بلى ، فقال: أى بلد هذا ؟ قالوا: الله و رسوله أعلم ، فقال النبى: أليس البلد الحرام ؟؟ فقالوا: بلى .. فيقول النبىﷺ: أيها الناس إن أموالكم و دمائكم وأعراضكم عليكم حرام كحُرمة يومكم هذا فى بلدكم هذا فى شهركم هذا ..

كان عارف صل الله عليه و سلم اللى هيحصل ، كان عارف قد إيه المسلمين هيتفرقوا ويتشتتوا .. النبىﷺ بيقول فى الحديث: يوشك الأمم أن تداعى عليكم، كما تداعى الأكلة إلى قصعتها .. ( هييجى يوم من الأيام يا مسلمين الأعداء هييجوا ينهشوا فى لحمكم زى الناس الجعانة اللى بتقدمولها طبق أكل فيقطعوا بعض علشان ياكلوا حبة الأكل..كأن المسلمين هم طبق الأكل الصغير ده و اللى هياكلوه هم أعدائنا ) فواحد من الصحابة قال: لماذا يأكلونا يا رسول الله ..هل سيكون بسبب قلة عددنا يومئذ ؟ فقال النبىﷺ: "لا بل ستكونون كثير ولكنكم غثاء كغثاء السيل " ( يعنى هتبقوا كتير يا مسلمين بس مش هتكون لكم قيمة لأنكم هتكونوا مموتين بعض ومقطعين بعض ومتفرقين ) .

و يشدد النبىﷺ ويكرر تانى ويقول "إنما المؤمنون إخوة " ويقول : "أيها الناس إنه لا فضل على عربى على أعجمى ولا لأبيض على أسود إلا بالتقوى" و يبدأ يقول لهم "أيها الناس إنكم ستُسألون عنى يوم القيامة بين يدى الله فماذا أنتم قائلون يومها ؟ " (هتقولوا لربنا عنى إيه ؟)
فبدأ الصحابة يبكوا .. فقالوا: يا رسول الله سنقول أنك بلغت الرسالة و أديت الأمانة ونصحت الأمة وجاهدت فى سبيل دينك" فقال: الحمد لله ..

وينادى النبىﷺ الصحابة اللى بينقلوا كلامه ويقول لهم يعيدوا الكلام تانى على الناس علشان يردوا تانى و يُسمعونى صوتهم فيكرر الصحابة كلام النبىﷺ ويقولوا : أيها الناس ما تقولون لله عن رسول الله يوم القيامة ؟ فقالوا بصوت عالى : نقول أنه بلغ الرسالة وأدى الأمانة ونصح الأمة وكشف الله به الغُمة ..
فبدأ النبى ﷺ يبكى وقال لواحد من الصحابة اسمه ربيعة: يا ربيعة مر بينهم اسألهم ، فينزل ربيعة ويمر على صحابى صحابى يسأله ماذا تقول عن رسول الله يوم القيامة ؟ فيبكى الصحابى ويقول والناس تبكى ويشتد الألم ويشتد البكاء .. النبىﷺ عايز يطمن هيقولوا إيه عنه لربنا يوم القيامة .. بعد كل التعب ده يا رسول الله !! صل الله على محمد صل الله عليه وسلم ..

و يقف النبىﷺ و يقول "أيها الناس إِنِّي فَرَطُكُمْ (منتظركم) عَلَى الْحَوْض ِ.. مَنْ مَرَّ عَلَيَّ شَرِبَ ، وَمَنْ شَرِبَ لَمْ يَظْمَأْ أَبَدًا ، وسيأتينى بعض المسلمين منكم .. و ستأتى الملائكة فتدفعهم عنى ، فأقول: لِمَ تحجبون عنى أُمتى؟ فتقول الملائكة: إنك لا تدرى ما أحدثوا بعدك فأقول سُحقاً سُحقاً .. بُعداً بُعداً "

تعالوا يا جماعة نتخيل أننا فى حجة الوداع والنبىﷺ بيودعنا بيقول لنا الكلام ده .. يقف النبىﷺ ويقول "أيها الناس أنا فرطكم على الحوض و إنى مباهى بكم الأمم يوم القيامة .. فلا تُسودوا وجهى يوم القيامة" ( أنا هنتظركم عند الحوض وهتفاخر بيكم قدام الأنبياء يوم القيامة فماتكسفونيش وماتسودوش وشى قدامهم يوم القيامة ) ..

وييجى وقت الغروب يوم عرفة وتنزل آية "الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الإِسْلامَ دِيناً " [ سورة المائدة ] .. فيبكى سيدنا أبو بكر.

نرجع لخطبة النبىﷺ الخطبة .. يقول ﷺ : أيها الناس إنما المؤمنون إخوة .. (وقال فى حديث نبوى: مثل المؤمنين كمثل الجسد الواحد إذا اشتكى عضو تداعت له سائر الأعضاء بالحمى والسهر .. إحنا حاجة واحدة ماينفعش نخبط فى بعض) ويفضل يكرر الكلام ..وكمان يوصى المسلمين على النساء هيقول كلام جميل أوى.

نعرفه الحلقة الجاية إن شاء الله🤍

سيرة_الرسول
الحلقة 206
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#حجة_الوداع (ج1)
أول وآخر حجة لرسول الله ﷺ
بعد غزوة تبوك اللى اتعرف منها من المسلم الحق و من المسلم المنافق.. وفى شهر ذى الحجة هيطلع رسول اللهﷺ أول وآخر حجة لبيت الله الحرام .. النبيﷺ كان عامل عُمرة "عُمرة القضاء" لكن دلوقتى هيعمل "حجة" .. النبى ﷺ هيطلع ومعاه أكتر من 100 ألف مسلم .. يااه شايفين العزة .. قال تعالى: وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ ..

فاكرين يا جماعة زمان ؟ فاكرين غار حِراء لما سيدنا جبريل نزل على النبى ﷺ لأول مرة .. وكان النبىﷺ خايف جدا ً.. فاكرين لما كان فى غار ثور وأبو بكر قلقان جداً ويقول له : يا رسول الله لو نظر أحدهم تحت قدميه لرآنا، فالنبىﷺ يقول له يا أبا بكر ما ظنك بإثنين الله ثالثهما ..

فاكرين لما أسلم 3 من المسلمين وفضلوا يزيدوا شوية بشوية.. فاكرين لما بقوا مجموعة صغيرة بيتعذبوا فى مكة ، فاكرين سيدنا عمار بن ياسر لما من كتر التعذيب راح للنبى ﷺ وقال: يا رسول الله أهكذا الدهر ؟ ( يعنى هى الدنيا صعبة كده ليه ؟ ) .. فاكرين السيدة خديجة رضى الله عنها اللى ماتت من كتر التعب بعد حصار كفار قريش لقبيلة النبىﷺ فى الشِعب .. فاكرين النبىﷺ لما كان يبقى ساجد قدام الكعبة ويجيب الكفار أمعاء الإبل ويحطوها على ظهر النبىﷺ ورقبته .. فالنبىﷺ ما يقدرش يقوم من قذارة الحاجات اللى عليه .. ويفضل ساجد .. ومرة يرموا على النبيﷺ التراب فبنته رضى الله عنها تُزيل التراب عن كتفيه وتبكى فالنبىﷺ يقول لها: لا تبكى إن الله ناصر أباكى ..

فاكرين لما كان يقف النبىﷺ يصلى وييجى عُقبة بن أبى مَعيط اللئيم ويجيب عباية و يبرمها ويحطها على رقبة النبى ﷺ ويخنق النبى ﷺ فالنبى يقع على ركبتيه و يغمى عليه .. تعب أوى يا جماعة تعب أوى أوى علشانى و عشانك ..

دلوقتى رايح الحج مع النبيﷺ 100 ألف مسلم .. تعبك ما راحش هدر يا رسول الله .. صدق الله وعده ونصر عبده ..

دلوقتى هيخرج المسلمين من المدينة لمكة حوالين النبىﷺ من كل جانب و على فكرة ال 100 ألف دول المسلمين كلهم مش من سكان المدينة بس دول من القبائل كلها .. ويبدأ المسلمين يلبوا ويقولوا :لبيك اللهم لبيك .. لبيك لا شريك لك لبيك .. تأملوا كده كلمة لبيك معناها إيه ؟ يعنى إحنا جايين لك يا رب.. والنبىﷺ يقولها من كل قلبه لبيك اللهم لبيك ( 23 سنة تعب كان نفسى يارب من زمان أجيلك ) لبيك اللهم لبيك، لبيك لا شريك لك لبيك، إن الحمد والنعمة لك والمُلك لا شريك لك.

وينزل سيدنا جبريل ويقول: يا رسول الله إن الله يأمرك أن تأمر أصحابك أن يرفعوا أصواتهم بالتلبية ( علوا صوتكم ربنا يباهى بكم الملائكة ) فيبدأ الصحابة يعلوا صوتهم وتزداد الحماسة .. الصحابة بيحكوا ويقولوا: والله ظللنا نُلبى من المدينة إلى مكة حتى بُحت أصواتنا :) يوصل النبىﷺ لمكة ، ويحج ماشى على رجليه من مكة لمنى مشى من منى للمزدلفة من المزدلفة لعرفة كله مشى !! ليه يا رسول الله ؟ عايز أبذل كل طاقتى لله تبارك وتعالى ..

بس مش هيقدر يكمل كده لأن العدد كبير وبدأت الناس تيجى ناحية النبىﷺ ..تخيلوا 100 ألف على واحد .. ده عايز يبوس رجله والتاني إيديه.. ده عايز يسأله .. ده عايز يبص فى وشه .. ده عايز يقول له كلمة.

فبدأ النبى ﷺ يتعب فاضطر أنه يركب على ناقة وبدأ النبىﷺ يكمل مناسك الحج راكباً ويقول للصحابة جملته الشهيرة: أيها الناس خذوا عنى مناسككم ( يعنى قلدونى .. علشان فى ناس بتسأل تفاصيل الحج دى جبناها منين ؟ جبناها من حجة الوداع ).

ويقول النبى عليه الصلاة و السلام : خذوا عنى مناسككم لعلى لا ألقاكم بعد عامى هذا ( يمكن ماشوفكوش تانى ). ويبدأ النبىﷺ يطوف ويعرض مناسك الحج، ويبدأ النبىﷺ يقف شوية ويستريح ويكمل لحد ما يقف النبىﷺ و يخطب فى ال 100 ألف .. طيب إزاي الصوت هيوصل ؟ 100 ألف ومافيش ميكروفون ولا مكبرات صوتية ؟

أصل كان النبىﷺ هيقف فى مكان وبعد كام متر يقف صحابى تانى وهكذا .. فالنبىﷺ يقول الكلام فالصحابى يأخذ الجملة ويعيدها لأن ماكانش فى وسائل تانية ، ويقف النبىﷺ فالناس كلها تسكت عشان تسمع .. فيبدأ النبىﷺ يقول كلام عجيب أوى .. "أيها الناس أى يوم هذا ؟ فيقولون اليوم الحرام ، فيقول أيها الناس أى شهر هذا ؟ فيقولون الشهر الحرام ، فيقول أى بلد هذا ؟ فيقولون هذا البلد الحرام .. فيقول أيها الناس: إن أموالكم ودمائكم وأعراضكم عليكم حرام كحُرمة يومكم هذا فى بلدكم هذا فى شهركم هذا ..

ماينفعش يا مسلمين تموتوا بعض .. ماينفعش يا مسلمين تخوضوا فى عِرض بعض ... النبىﷺ كان بيقول فى الحديث: إذا التقى مسلمين بسيفيهما فالقاتل والمقتول فى النار .. تخيلوا يعنى القاتل والمقتول!! فالصحابة استغربوا.. فقال النبىﷺ: فإن المقتول كان يحرص على قتل أخيه .. يعنى المقتول كان فى نيته يقتل أخوه المسلم برده فعشان كده هما الاتنين هيدخلوا النار .

سيرة_الرسول
الحلقة 205
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

ماريا القبطية "أم إبراهيم بن النبى محمد صل الله عليه و سلم "(ج4)

ماريا بتولد وتروح لها بسرعة أختها سيرين .. المدينة كلها كانت فرحانة والنبى عرف الخبر فبسرعة راح لها .. وأول ما النبىﷺ دخل كان ابنه لسا مولود فأخده النبىﷺ وحضنه وسماه إبراهيم تيمناً بسيدنا إبراهيم عليه السلام، ويشاء الله انه يكون إبراهيم ده آية فى الجمال وكان شبه النبى محمد أوى .. النبىﷺ حبه حب غير طبيعى وكان يشيله وفرحان بيه أوى ..

ويبدأ إبراهيم يكبر ويبقى شبه النبىﷺ أكتر كل يوم و يعدى شهر وإتنين لحد ما يبقى إبراهيم عمره سنة و 8 شهور .. وقبل الفِطام بشهرين تيجي لإبراهيم حمى شديدة هيسخن وتجيله حمى شديدة ، وتبدء مارية تبكى وتيجى سيرين جرى وتلاقى شكل الولد متغير والسخونية مش بتروح فيبعتوا للنبىﷺ بسرعة .. فالنبىﷺ ييجى جرى فيدخل يبص على إبراهيم فيفهم .. فييجى ياخد إبراهيم من مارية .. مارية ماسكة فى إبراهيم حضناه وبتعيط .. فأخده النبىﷺ وبدء إبراهيم يحشرج الروح هيموت فى صدر النبىﷺ، فنظر النبىﷺ له وبكى وقال : يا بُنى أما إنى لا أملك لك من الله شيئا ( مقدرش أعملك حاجة ) ويبدء إبراهيم يحشرج فى صدر النبيﷺ والنبى يبكى ( ابنه بيموت )، فواحد من الصحابة جه جنب النبى فقال له: أتبكى يا رسول الله ؟ فقال النبى: نعم إنما هى رحمة يضعها الله فى قلوبنا ..
ويبدء جسد إبراهيم يرتعش وتخرج روحه رضى الله تعالى عنه وهو فى صدر النبيﷺ ويموت إبراهيم فتتقل راسه ويبرد جسمه فيعرف النبى انه مات فيبكى النبىﷺ ويقول: أما إن العين لتدمع وإن القلب ليحزن ولا نقول إلا ما يرضى ربنا وإنا على فِراقك يا إبراهيم لمحزونون .. النبىﷺ دفن أولاده كلهم إلا فاطمة لأنها ماتت بعديه ب6 شهور و وقت وفاته صل الله عليه و سلم هيقولها إنتى هتموتى بعدى.. فالنبىﷺ حتى كان عارف أنها ميتة .. فأد إيه استحمل و صبر صل الله على محمد .

و يقول النبى إن الله عز وجل يُنادى يوم القيامة على أطفال المسلمين الذين ماتوا قبل الحُلم ويقول: ادخلوا الجنة فيقولون: يا رب لا ندخلها حتى يدخلها أباؤنا وأمهاتنا فيقول الرب: ادخلوا الجنة أنتم و آبائكم وأمهاتكم .

أشد بلاء يا جماعة فقد الأولاد مهما كان اللى فقدته عزيز على قلبك لكن أشد فقد هو فقد الأولاد عشان كده أعظم أجر هو أجر فقد الأولاد ربنا يعافى أولادنا أجمعين ... فيبكى النبى ﷺ ويقول لإبراهيم وهو ميت فى حضنه كلمة عجيبة أوى يقول له : والله يا إبراهيم لولا أن وعد الله حق لكان حزننا غير هذا الحزن ( بيقول له لولا أن أنا واثق و متأكد من وعد ربنا أن قدر ربنا أكيد لمصلحتى و أن ربنا هيعوضنى فى الجنة لكان حزنى هيبقى حاجة تانية خالص .. حاولوا تقولوها لنفسكم فى البلاء لما يحصلكم بلاء شديد و تحسوا أن الدنيا ضيقة وأنكم لوحدكم وأنكم تعبانين قولوا كده.. لولا أن وعد الله حق لكان حزن غير هذا الحزن كنت هزعل أوى بس أنا عارفة يا رب أنك بتعمل كده علشان مصلحتى).

لما الطفل يموت يقول الله سبحانه و تعالى فى الحديث القدسى :" يا ملائكتى أقبضتم ولد عبدى ؟ وهو أعلم سبحانه وتعالى ، فتقول الملائكة: بلى يا رب .. يقول: يا ملائكتى أقبضتم فلذة فؤاد عبدى؟ فيقولون: نعم يارب..فيقول الرب عز وجل: يا ملائكتى ماذا قال عبدى ؟؟ قالوا: حمدك و استرجعك " قال إنا لله وإنا إليه راجعون" ..فيقول: ياملائكتي ابنوا له قصراً وسموه بيت الحمد".
مارية حزنت على وفاة إبراهيم حزن شديد .. والنبي عليه الصلاة والسلام قال : يُكمل إبراهيم الآن رضعته فى الجنة ..
ويموت إبراهيم و يتدفن فى البقيع .. و هيموت النبى بعد ابنه إبراهيم ب 6 شهور و مارية هتموت بعد النبى ب حوالى 5 سنين و من يوم ما هيموت ابنها مش هتخرج من بيتها أبداً إلا عشان تزور ابنها فى البقيع و بس و لما تموت هتُدفن بالبقيع رضى الله تعالى عنها وأرضاها ..
و زى ما قولنا أن بسبب السيدة ماريا.. مصر أخدت فضل و منزلة عند رسول الله ، فقال النبى عليه الصلاة والسلام: إذا فتحتم مصر فاستوصوا بأهلها خيراً فإن لهم نسباً وصهرا. ( مين النسب ؟ مارية، فلولا مارية أمنا العظيمة مكنش هيبقى لمصر فضل فى السنة النبوية، طبعاً القرآن مدح مصر بس إحنا بنتكلم عن السنة النبوية) .... فى موقف حصل بعد ما مات إبراهيم عليه السلام ان حصل كسوف للشمس فقالوا كسفت الشمس لموت إبراهيم ..فنفى النبى ذلك و قال: إن الشمس و القمر آيتان من آيات الله لا يخسفان لموت أحد .. فقال النبى ده حصل قدراً وصادف موت إبراهيم ابنه ..

نكمل بكرة إن شاء الله 🤍

سيرة_الرسول
الحلقة 204
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

ماريا القبطية "أم إبراهيم بن النبى محمد صل الله عليه وسلم" (ج3)

مارية فى بيت النبى عليه الصلاة و السلام ( وقلنا المرة اللى فاتت أن مارية كانت ملك يمين .. وزمان كان فى طريقتين شرعيتين للمعاشرة بين الرجل والمرأة ، واحدة منهم الزواج الشرعي والتانية ملك اليمين ، " وَالَّذِينَ هُمْ لِفُرُوجِهِمْ حَافِظُونَ * إِلَّا عَلَى أَزْوَاجِهِمْ أوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ" [سورة المؤمنون] .

وملك اليمين كان موجود زمان وانتهى دلوقتى مش موجود فى عصرنا الحالى فمفيش حاليا غير الزواج الشرعى بس و فى تفاصيل مهمة ارجعوا لآخر الحلقة اللى فاتت اقروها)

المهم يحصل موقف جميل جداً .. هتعيشى فين يا مارية؟ طب زوجات النبى عايشين فين ؟ فى حجرات جنب بعض حوالين المسجد النبوى.. بس مارية مش هتستقر جنبهم.. أصل مارية جاية من مصر من بيئة فيها نيل و هوا .. و كمان وحدانية ملهاش حد ، فهتعيش مارية فى " العوالى " دى منطقة فى المدينة يعنى زى الريف عندنا.. فيها مياه و زرع ..جوها شبه جو مصر شوية..
شايفين النبى بيحترم نفسية المرأة أد إيه.. و رغم كده ييجى حد فى زمنا ده يقول إن الإسلام مش بيحترم المرأة ..طب إزاى بس !! أقولكم حاجة جميلة فى الفقه إذا كانت المرأة مخدومة وجب على زوجها أن يخدمها وإن لم تكن فلن يجب عليه و لكن إحسانا لها يجيب خادم .. يعنى إيه ؟ يعنى لو كانت البنت فى بيت أبوها عندها دادة و اتجوزت يبقى واجب على زوجها انه يجيبلها دادة زى ما كانت فى بيت أبوها لو هو يقدر مادياً ..(لو هو مادياً ميقدرش ده موضوع تانى) طب لو ماكنتش مخدومة يعنى متربية فى بيت مافيهوش دادة ؟؟ يبقى مش واجب عليه بس إن كان مُحسناً و لطيف يبقى يجيب لها خادم يعنى فى الحالتين ياريت تجيبلها دادة ( ده الفقه فى الإسلام بيقول كده فشوفتوا أد إيه إكرام الشريعة للمرأة فى الإسلام).

المهم هتعيش مارية فى العوالى ، طيب البيت اللى فى العوالى ده النبى عليه الصلاة و السلام جابه منين هو النبى معاه فلوس يجيب بيت فى منطقة زى العوالى ؟ لأ طبعا ًو لكن فى غزوة أُحد فى واحد يهودى اسمه مُخيريق ده أسلم و حارب فى غزوة أحد و مات شهيد و مكنش لحق يصلى صلاة واحدة و لحظه موته فقال : إن مت فمالى كله لمحمد يفعل به ما يشاء.. و مات فعلاً شهيد..فالنبى قال: عمل قليلاً وأُجِرَ كثيراً ..لأنه مات و أسلم و فى نيته طاعة الله و رسوله و هيدخل الجنة من قبل ما يسجد سجدة واحدة.. فلما مات إيه التركة الى سابها ؟ حتة جنينة وأرض و بيت صغير فى العوالى هو ده اللى هتسكن فيه مارية ..
النبى ﷺ كان بيحبها.. و طبعاً كان بيحب عائشة أكتر بس عائشة كانت بتقول انها كانت بتحس بالغيرة من مارية لأن النبى كان بيزورها كتير.. و طبعا كان النبى بيقدر ان ماريه ملهاش حد.. المهم بعد كام شهر حصلت مفاجأة وهى ان مارية حامل ..

تخيلوا فرحة النبى ﷺ. النبى خلف من السيدة خديجة بس أما التسع زوجات التانين مخلفوش منه فهيخلف النبى عليه الصلاة السلام على كبر و دايماً تلاقوا اللى بيخلف على كبر بيبقى قلبه رقيق أوى و بيدلع الطفل أوى لأنه جاله على كبر،
فالنبى هيفرح فرحة شديدة وكأن ربنا بيعيد التاريخ من الأول .. زى ما هاجر زمان كانت جارية و تزوجها سيدنا إبراهيم و خلف منها سيدنا إسماعيل لما زوجته السيدة سارة كانت عقيم.. فبرده مارية الوحيدة اللى تخلف للنبى ﷺ .. فمارية تبقى حامل و كل المدينة تبقى فرحانة و مستنية المولود إلا واحدة بس .. السيدة عائشة ... لأن أى إمرأة بتحب زوجها بتبقى نفسها تخلف منه ..

إوعوا تفتكروا انها كانت سهلة على عائشة أنها ماتخلفش من النبى ﷺ لأنها كانت صغيرة و تقدر تخلف.. و كانت بتقعد تدعى ربنا أن ربنا يرزقها الولد و راحت مرة بتبكى تقوله يا رسول الله كل نسائك لهن كُنية و أنا معنديش لأنى معنديش أولاد (أصل زوجات النبى التانيين كانوا مخلفين من أزواج قبل النبى و كان عندهم أولاد و لهم كنية زى السيدة أم سلمة مثلا و السيدة أم حبيبة ) المهم فقال النبى لها: لا تبكى يا عائشة أنتى أم عبد الله (ابن أختها عبد الله بن الزبير) فكان نفسها تخلف.
طب إيه حكمة ان ربنا خلى عائشة متخلفش ؟ عائشة هتروى أكتر من 2000 حديث عن النبى وكلهم فى الفقه فمينفعش يا عائشة تنشغلى بأطفال فكان ده إصطفاء من ربنا للبشرية.. فزوجات النبى اللى بعد خديجة مخلفوش منه.. طب إشمعنا مارية تخلف ؟! عشان محدش يقول ان النبى مخلفش عشان ميقدرش يخلف .. لأ النبى يقدر يخلف بس إرادة ربنا أنه ما يخلفش لفترة .. المهم تحمل مارية و النبى يبقى طاير من الفرحة.. و يعدى شهر إتنين تلاتة لحد ما نوصل للشهر التاسع و تخلف إبراهيم بن محمد صل الله عليه وسلم.

نكمل الحلقة الجاية إن شاء الله 🤍

سيرة_الرسول
الحلقة 203
يلا بينا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

ماريا القبطية "أم إبراهيم بن النبى محمد صلى الله عليه وسلم" (ج2)

شوفنا امبارح المقوقس ملك مصر لما بعت هدايا للنبى و من ضمنهم جاريتين ماريا وأختها سيرين..
(و ده طبعا كان بيحصل فى العصور القديمة) المهم خرجت ماريا و سيرين مع سيدنا حاطب و كانوا فى طريقهم من مصر للمدينة، و كانوا بيعيطوا عشان سابوا بلدهم و رايحين بلد غريبة. فلما سيدنا حاطب شافهم بيعيطوا بالشكل ده .. هيعمل حاجة عظيمة جدا..هتعمل إيه يا سيدنا حاطب ؟ هيدعوها للإسلام بس بطريقة فى منتهى الذكاء (طبعاً لو حد فى وقتنا الحالى هيدعوا البنات دى للإسلام كنا هنقول لأى بنت فيهم بصى إنتى رايحة للنبى و ده رسول الله.. و الإسلام عندنا بنتوضى و نصلى خمس مرات فى اليوم و صلاة الفجر ميعادها الساعة 4 الصبح و لازم تصحى دى فرض .. و يا إما تتحجبى يا إما هتخشى النار !! و طبعا البنت هتطفش ... بصراحة معاها حق ماهو مش معقول كده أبداً !! ) .

هيدعوهم بقى سيدنا حاطب بطريقة غاية فى الرقة و الذكاء.. وهيبدأ حاطب يحكى لماريا أن الطريق اللى إنتى ماشية فيه ده مشت فيه السيدة هاجر زوجة سيدنا إبراهيم هى خرجت برده من مصر مع إبراهيم و كانت جارية برده و ربنا أمره يطلع بيها هى وابنها سيدنا إسماعيل من مصر لمكة .. ومشيوا من النفس الطريق اللى إنتى يا ماريا ماشية فيه ..ويبدأ سيدنا حاطب يحكى عن تاريخ مكة و بلاد الحجاز و ان سيدنا إبراهيم وصل بهاجر مكة..
ويمشى سيدنا إبراهيم و يسيبها و تسأله : هل الله أمرك بهذا .. فيقول سيدنا إبراهيم: نعم .. فتقول هاجر : إذن الله لن يضيعنا.. وتقعد هاجر لوحدها و تبدأ تطوف بين الصفا و المروة (زى ما إحنا بنعمل فى مناسك الحج ) وتطلع على الصفا تبص لأنها عايزة ماية و ابنها الرضيع بيعيط من العطش و بعدين تنزل المروة .. وتفضل بين الجبلين رايحة جاية سبع مرات .. وبعد كده ربنا يفجر لها بير زمزم و تبدأ تجرى هاجر عليها فتلاقى المياه بتجرى فى كل حتة فهاجر افتكرت ان المياه ممكن تخلص، فقعدت هاجر تحاوط الماية بإيديها و تقول زم زم "كلمة زم يعنى قرب من بعضك و ماتجريش" فبقت الماية محصورة جوه البئر .. بيقول النبى محمد عليه الصلاة والسلام : رحم الله هاجر لو لم تقل زم زم لظل النهر يجرى إلى يوم القيامة.

ويحكى سيدنا حاطب ويحكى ويحكى وتبدأ عينين مارية تلمع وتتغير والدموع وقفت وبدأت العينين تبتسم .. ويحكى حاطب إن يا مارية إسماعيل بن هاجر الولد الصغير ده هيكبر و هيبقى رسول وهيبقى جد سيدنا محمد اللى إنتى ريحاله دلوقتى صل الله عليه و سلم ..و بعد ما حاطب إداها المقدمة دى قال لها يا ماريا سيدنا محمد ده بقى أخلاقه كذا و حنيته كذا و طبعه كذا و طيبة قلبه كذا، فبدأت مارية قلبها يمتلئ شوقً لمقابلة رسول الله ﷺ .
و بدأت ماريا تفكر ان مش يمكن أنا كمان يحصل معايا كده زى ما حصل لأمى هاجر والتاريخ يعيد نفسه انها جارية برده ومن مصر واتجوزت نبى فممكن تخلف منه زيها .. فيلاقى سيدنا حاطب فى عيون مارية الشوق إلى رسول الله و يشوف فى عينيها الرغبة فى الإسلام.. فيقول يا مارية أتشهدين أن لا إله إلا الله ..قالت أشهد أنه لا إله إلا الله و أن محمداً رسول الله ..و أسلمت ماريا و أسلمت أختها سيرين قبل ما يوصلوا للمدينة.

شوفتوا الدعوة الرقيقة الجميلة دى..شوفتوا براعة سيدنا حاطب بن أبى بلتعة ، وصلت مارية لبيت النبى و كل قلب مارية شوق للنبى ﷺ دخلت عليه حيته بتحية الإسلام السلام عليك يا رسول الله و دخلت سيرين السلام عليك يا رسول الله .. و قرأ النبى الخطاب بتاع المقوقس ، هتعمل إيه يا رسول الله ؟ لأن المقوقس قايل لحاطب أن الجاريتان ليسا كالجوارى و مشدد أوى على الإهتمام بيهم .. فالنبى ﷺ عمل أقصى حاجة تبين للمقوقس انه فهم و قدر الهدية .. فهتبقى ماريا ملك يمين عند النبى وأختها سيرين للصحابى الجليل حسان بن ثابت وهتخلف منه عبد الرحمن بن حسان بن ثابت .. فمارية القبطية لم تكن زوجة النبى بل هى كانت ملك يمين ..

- طيب ليه النبى عنده ملك يمين؟ لأن ماريا جت المدينة بعد نزول التشريع اللى ربنا عزوجل حدد فيه زوجات النبى ليوم الدين.. قال تعالى :لَّا يَحِلُّ لَكَ النِّسَاءُ مِن بَعْدُ وَلَا أَن تَبَدَّلَ بِهِنَّ مِنْ أَزْوَاجٍ وَلَوْ أَعْجَبَكَ حُسْنُهُنَّ إِلَّا مَا مَلَكَتْ يَمِينُكَ ۗ وَكَانَ الله عَلَىٰ كُلِّ شَيْءٍ رَّقِيبًا ..
فعشان كده كان مُحرماً على النبي عليه السلام انه يتزوج بعد نزول الآية دى.. فكانت مارية مما ملكت يمينه صل الله عليه وسلم...

و دى طاعة لأمر الله عز وجل في الآية الكريمة بعد ما حرم الله على النبى عليه الصلاة و السلام انه يتزوج من نساء تانيين غير أمهات المؤمنين..و بالتالى مكنش ينفع ان النبي صل الله عليه وسلم يتزوج ماريا زى باقى زوجاته أمهات المؤمنين .. فاضطر النبى ان ماريا تبقى ملك يمين تكريماً لملك مصر المقوقس اللى وصاه بالجوارى اللى بعتهم له هدية زى ما حكينا فوق .. فمكنش ينفع النبى ان يتخلي عنهم و كان الحل ان ماريا تبقى أمة عند النبى و سيرين تبقى عند حد من الصحابة الكرام.. فكانت سيرين أمة لحسان بن ثابت..
طيب عارفين ان الآية اللى ذكرناها فوق دى نزلت بعد آية التخيير؟ فاكرين موضوع التخيير؟ طيب تعالوا نحكيه تانى عشان نفتكر سوا :
لما زوجات النبي صل الله عليه وسلم طلبوا منه مصروف زيادة وأثقلن عليه في النفقة رضي الله عنهن..حَزِن النبي صلوات الله عليه حُزناً شديداً.. واعتزلهن ..فأمر الله نبيه صل الله عليه وسلم أن يُخيِّرَ نساءه كما ورد في سورة الأحزاب بين الدنيا وبين الله ورسوله والآخرة..
فقال عزوجل: "يَا أَيُّهَا النَّبِيُّ قُل لِّأَزْوَاجِكَ إِن كُنتُنَّ تُرِدْنَ الْحَيَاةَ الدُّنْيَا وَزِينَتَهَا فَتَعَالَيْنَ أُمَتِّعْكُنَّ وَأُسَرِّحْكُنَّ سَرَاحًا جَمِيلًا (28)
فاختارت أمهات المؤمنين الله ورسوله والدار الآخرة. فربنا كافئهم الله عز وجل في سورة الأحزاب أيضاً فقال تعالى:
لَّا يَحِلُّ لَكَ النِّسَاءُ مِن بَعْدُ وَلَا أَن تَبَدَّلَ بِهِنَّ مِنْ أَزْوَاجٍ وَلَوْ أَعْجَبَكَ حُسْنُهُنَّ إِلَّا مَا مَلَكَتْ يَمِينُكَ ۗ وَكَانَ الله عَلَىٰ كُلِّ شَيْءٍ رَّقِيبًا
المهم مارية بناءا على ذلك اضطر النبى انها تبقى ملك يمين..
و ربنا عزوجل كافئ ماريا رضي الله عنها بأن خصها بلقب فريد ليها هي و بس.. ومكنش لحد من أمهات المؤمنين.. إيه هو اللقب ده؟ "أم الولد" أصل ماريا هتخلف ولد من النبى عليه الصلاة و السلام و هيسميه إبراهيم.. فخدت لقب أم الولد.. وعشان ماريا بقت أم ولد النبى بقى لا يجوز لها ان تتزوج بعد النبي عليه السلام أبدا..فأصبح حالها زى حال أمهات المؤمنين اللى ربنا شرعه فى الآية دى
قال تعالى: "وَمَا كَانَ لَكُمْ أنْ تُؤْذُوا رَسُولَ الله وَلا أنْ تَنْكِحُوا أَزْوَاجَهُ مِنْ بَعْدِهِ أَبَداً إن ذَلِكُمْ كَانَ عِنْدَ الله عَظِيماً " فأصبح حال ماريا زى حال أمهات المؤمنين لانها خلفت فمبقتش زى أى جارية عادية تنفصل عن سيدها و تتزوج غيره لو مات لان ماريا خلفت .
فشرّف الله زوجات النبي عليه السلام بلقب "أمهات المؤمنين" و شرّف ماريا بلقب "أم الولد".. فرضي الله عنهن جميعا وصل الله على أشرف الخلق وأطهرهم و أكثرهم طاعة لربه عز وجل .

نكمل بكرة إن شاء الله 🤍

سيرة_الرسول
الحلقة 202
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

ماريا القبطية "أم ابراهيم ابن النبى محمد صلى الله عليه وسلم"(ج1)

هنرجع بس سنتين عشان نحكى حدث مهم ..الحدث ده بالظبط كان سنة 7 هجرياً.. الأول مين هى مارية القبطية ؟ كلمة قبطى مش معناها نصرانى لكن معناها مصرى فالأقباط يعنى المصريين ، فمارية كانت مصرية مسيحية و عندها أخت اسمها سيرين، و كانوا عايشين فى مصر فى قصر المقوقس ملك مصر و كانت مارية جارية فى القصر ، هي و أختها جوارى بس مش أى جوارى كانت ليهم منزلة عظيمة فى قصر المقوقس والمقوقس بيعزهم جداً و بيقدرهم جداً ..
( فى سنة 7 هجرياً هفكركم بالحدث اللى حصل فى السنة دى اللى بسببه جت مارية من مصر للمدينة ).. سنة 7 هجرياً كانت بعد صلح الحُديبية بدأ النبى يبعت رسائل لملوك العالم .. من محمد رسول الله إلى هرقل عظيم الروم أسلم تسلم ، من محمد رسول الله إلى كسرى عظيم الفرس أسلم تسلم ، من محمد رسول الله الى المقوقس عظيم مصر أسلم تسلم، فالجوابات كلها راحت للملوك فى نفس اليوم 15 جواب مع 15 رسول ( عشان نعرف أن الصحابة ماكنوش طول النهار بيصلوا ويصوموا وبس .. لأ كانوا دبلوماسيين و سياسيين و خبراء عسكريين ) .
فمن ضمن الرسل كان حاطب بن أبى بلتعة و يطلع حاطب بالجواب بتاعه إلى مصر ، و يدخل على المقوقس بالرسالة: من محمد رسول الله إلى المقوقس عظيم مصر أسلِم تسلم يؤتيك الله أجرك مرتين و إن لم تُسلِم فعليك إثم القبط و السلام على من اتبع الهدى .. (يعنى لو ماأسلمتش يبقى أنا بلغت و أنت اللى مبلغتش قومك فهتشيل ذنبهم) ، و بعد ما المقوقس قرأ الرسالة قال كلام غريب أوى .. قال : والله كنت أعلم أنه نبى آخر الزمان و ما كنت أظن أنه من العرب و ظننت أنه سيخرج من الشام (زى اليهود برده كانوا متوقعين ان نبى آخر الزمان يكون من الشام زى باقى الأنبياء) إنى أراه قد خرج من العرب و إنى أُصدّقه و لكن أخشى من القبط (خايف من الشعب بتاعى) وأخشى على مُلكى .
بس كمان المقوقس كان راجل مؤدب ما غلطش فى النبى لما قرأ رسالته ..يعنى مثلاً كِسرى ملك الفرس لما قرأ رسالة النبى قطعها أما المقوقس قال لسيدنا حاطب إنى أبعث معك بهدية لرسول الله إكراماً له، و بعت للنبى عليه الصلاة و السلام كمان رسالة و قال له: قد جاءنى كتابك وإنى أُصدقك وما كنت أظن أنك تخرج من العرب ولكنى أراك خرجت منهم وقد بعثت إليك بهدية .. والمقوقس اترجى النبى ﷺ عشان يقبل الهدية .. إيه الهدية بقى ؟ إيه الهدية بقى ؟ جاريتين مارية و أختها سيرين و بعض المنسوجات والعطور اللى مصر مشهورة بيهم و بغلة عشان النبى ﷺ يركب عليها و النبى هيسميها دُلدُل النبى ﷺ كان بيحب يسمى مقتنياته..المهم مارية لقت نفسها فجأة بتتاخد من بلدها بالأمر كدة و رايحة لبلد تانى خالص ، و خرجت مارية و سيرين و رايحين مع حاطب من مصر للمدينة .. فى طريق طويل جداً بس و هم راجعين سيدنا حاطب بيقول بصيت على مارية و سيرين لقيتهم بيعيطوا ! (تخيلوا هى متربية طول حياتها فى مصر بتحب بلدها بتحب النيل و كانت عايشة فى قصر و هتسيب كل ده و هى مش عارفة هى رايحة فين و لا رايحة لمين و لا عارفة عيشتها هتبقى عاملة إزاى بس فى الآخر هى جارية لازم تنفذ الأوامر ) فهيعمل إيه سيدنا حاطب بعد ما شافهم بيعيطوا ؟

هنعرف المرة الجاية إن شاءالله 🤍

سيرة_الرسول
الحلقة 201
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

إشاعة و خبر غير صحيح فى المدينة: "طلق النبى ﷺ زوجاته" (ج2)

اعتزل النبى عليه الصلاة والسلام زوجاته و عرفنا السبب الحلقة اللى فاتت.. فطلعت إشاعة فى المدينة أن النبى ﷺ طلق نسائه و من كتر ما الإشاعة انتشرت جداً ف حتى أمهات المؤمنين نفسهم مابقوش عارفين هو فعلاً طلقنا ولا لأ ... عُمر بن الخطاب بيحكى و بيقول كنت قاعد فى بيتى و فجأة لقيت واحد صاحبى بيخبط جامد على الباب.. يا عُمر ؟ يا عُمر ؟
ف عُمر راح فاتح بسرعة و قال: ويحك !مالك ؟ قال ألحقنا يا عُمر؟ فقال عمر : أجاءت الغساسنة ؟ فقال الصحابى : بل أشد من ذلك.. لقد طلّق رسول الله نسائه .. طيب هى دى إزاى أشد من هجوم الغساسنة؟ لأن ده معناه أن النبى زعلان و زعل النبى أكبر من أن الغساسنة يهجموا على المدينة..
فيجرى عمر على بنته السيدة حفصة زوجة النبى.. فلاقاها بتبكى فسألها أطلقكى رسول الله ؟ فقالت: والله لا أدرى .. فقال عُمر : يا حفصة لا يغُرنّكِ جارتكى (ملكيش دعوة بعائشة و ماتقلديهاش لو عملت أى غلطة ) فإن رسول الله يحبها و إنما يُمسككى من أجلى (النبى بيحب عائشة فلو هى زعلته هتصالحه لكن انتى هو مش بيحبك زيها هو اتجوزك علشانى ) فقال عُمر فازدادت حفصة فى البُكاء( عُمر كلامه شديد بس عُمر خايف عليها و عايزها تفوق)..
المهم جرى عُمر على النبى ﷺ فلقى النبى قاعد لوحده فى الأوضة بتاعته و بلال واقف بيحرسه (بلال لقى النبى زعلان و عايز يبقى لوحده فقعد يحرسه علشان محدش يدخل عليه من غير إذنه ) فقال عُمر: يا بلال استأذن لعُمر . . فاستاذن بلال النبى..فالنبى ﷺ مردش (يبقى مش عايز حد يدخله حتى عُمر) فخرج بلال و قال: يا عُمر والله لم يأذن.. فعُمر ألح على بلال عشان يستأذن النبى تانى فبردو النبى مردش عشان عايز يقعد لوحده .. و فى تالت مرة أذن النبى لبلال ان عمر يدخل.. فدخل عمر على النبى ﷺ..
فبيقول عُمر: فدخلت فوجدت النبى يتكئ على جنبه و قد أثّر التراب على جنبه الشريف (المساجد والبيت زمان كانت الأرضية بتاعتهم تراب عليها حصير فالنبى ﷺ كان مريح على جنبه والتراب له أثر عليه) فقال عُمر: بأبى أنت وأمى يا رسول الله أطلقت نسائك ؟ فرفع رأسه، و قال: لا يا عُمر ..فقال عُمر: الحمد لله ..فسأل عُمر النبى و قاله إيه الى مزعلك يا رسول الله ؟ فقال النبى : يا عُمر أثقلنّ على فى النفقة و أنا لم أستطع .. فعُمر قعد يفكر إزاى يخرج النبى من مود الزعل ده.. فقال عُمر: فقلت فى نفسى والله لأضحكن رسول الله ..
هيهزر سيدنا عمر مع النبى و بصوا هيقول إيه .. الأول لازم نعرف أن المدينة ومكة بلدين مختلفين ..المدينة بلد زراعى ومكة بلد تجارى، ففى مكة الراجل بيشتغل تاجر و عادة التاجر حتى لحد النهاردة معروف أن التاجر تلاقى مراته قاعدة فى البيت مش بتشاركه غالباً و زمان كانت الست بتقعد فى البيت و تاخد المصروف و ملهاش رأى فده كان مجتمع مكة ، أما بقى مجتمع المدينة مختلف لأنه مجتمع زراعى فالراجل بيزرع فى الأرض طول النهار و مراته معاه فبتشاركه فى الشغل والقرار والفلوس.. بتشاركه فى كل حاجة ، فالست رأيها برأيه و كلمتها بكلمته غير المجتمع المكى..
فعُمر حب يضحك النبى فقال له : يا رسول الله أتذكر حينما كنا فى مكة ؟ كنت أقوم إلى إمرأتى فتسألنى النفقة (تطلب فلوس زيادة) فأقوم إليها لأجئ عنقها (أقطم رقبتها :) فجئنا المدينة يا رسول الله فخالطت نسائنا نساء المدينة فتعلمن منهن.. فصارت امرأتى تسألنى النفقة فأقوم اليها لأجئ عنقها فأجدها تقوم إلي و تجادلنى
فضحك النبى ﷺ.. فقال عُمر: أضحك الله سنك يا رسول الله.. ففضل عُمر مع النبى .. و على فكرة النبى ﷺ اعتزل زوجاته شهر .. و نزلت بعد كده آية التخيير .. دى اللى ربنا خير أمهات المؤمنين فيها بين طلب الدنيا و الآخرة .. لو عايزين زيادة نفقة يبقوا هم عايزين الدنيا .. قال تعالى: "يَا أَيُّهَا النَّبِيُّ قُل لِّأَزْوَاجِكَ إِن كُنتُنَّ تُرِدْنَ الْحَيَاةَ الدُّنْيَا وَزِينَتَهَا فَتَعَالَيْنَ أُمَتِّعْكُنَّ وَأُسَرِّحْكُنَّ سَرَاحاً جَمِيلاً (28) وَإِن كُنتُنَّ تُرِدْنَ اللَّهَ وَرَسُولَهُ وَالدَّارَ الْآخِرَةَ فَإِنَّ اللَّهَ أَعَدَّ لِلْمُحْسِنَاتِ مِنكُنَّ أَجْراً عَظِيماً (29)" (سورة الأحزاب)..
فراح النبى و قال الكلام ده لزوجاته عشان يختاروا و سألهم زوجة زوجة و طبعاً كلهم اختاروا الله و رسوله و الدار الآخرة ،و بدأ بعائشة و سألها فقال لها: يا عائشة تمهلى حتى تستشيرى أباكى.. فقالت من أستشير !!و في ماذا أستشير !! بل أختار الله ورسوله و الدار الآخرة يا رسول الله ..

و فى قصة تانية كمان و هى أن النبى طلّق السيدة حفصة .. بس احنا مش عارفين زمن الحدث بالظبط و سيدنا عمر عرف و خالها عرف.. لكن ردها النبى فى نفس اليوم.. اللى حصل أن كانت السيدة حفصة كانت قاعدة مع خالها و بتبكى فبمجرد ما دخل النبى عليها قامت غطت راسها و غطت نفسها مع انه كان لسه مطلقها يعنى هى كانت فى وقت العدة فينفع يشوفها لكن غطت نفسها وقالت خلاص مبقاش زوجى،
فدخل النبى ﷺ عليهم.. فخالها قال : يا رسول الله أطلقت حفصة ؟ فقال ﷺ: يا حفصة إن الله أمرنى من فوق سبع سماوات و قال: يا محمد رُدّ حفصة فإنها صوّامةٌ قوامة وهى زوجتك فى الجنة ..فردّ النبى السيدة حفصة فى نفس اليوم .. إيه بقى الحكمة ان النبى طلقها ؟ محدش يعرف العلم عند الله بس فى رأي و اجتهاد شخصى و هو أن يمكن ربنا خلى موقف الطلاق و البلاء ده يحصل لحفصة عشان تاخد حفصة المكانة العظيمة دى و هي أن ربنا يقول عنها من فوق سبع سماوات انها صوّامة قوامة وهى زوجتك فى الجنة..

نكمل بكرة إن شاء الله🤍

سيرة_الرسول
الحلقة 200
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

إشاعة و خبر غير صحيح فى المدينة:" طلق النبى ﷺ زوجاته" (ج1)

حاجتين حصلوا بعد غزوة تبوك على طول .. أول حاجة منهم ان فى واحد منافق يدّعى الإسلام اسمه أبو عامر الراهب (و لقبوه بالفاسق) ، قبل ما النبى ﷺ يطلع تبوك.. قام الراجل ده بنى مسجد وراح للنبى ﷺ وقال له يا رسول الله أنا بنيت مسجد جديد فمن فضلك تعالى صلي فيه ركعتين علشان يبقى فيه بركة يعنى (شئ طبيعى تخيل لو النبى عايش وانت بنيت مسجد فشئ طبيعى انك تطلب منه انه يصلى فيه ركعتين).
فالنبى بحسن نية وافق بس قال له: أنا دلوقتى طالع تبوك فأوعدك أول مارجع من تبوك هصلى فيه .. راح النبى و رجع من تبوك.. فالنبى يدوب لسه رايح يصلى فى المسجد ده فنزلت آية فى سورة التوبة " وَالَّذِينَ اتَّخَذُوا مَسْجِدًا ضِرَارًا وَكُفْرًا وَتَفْرِيقًا بَيْنَ الْمُؤْمِنِينَ وَإِرْصَادًا لِّمَنْ حَارَبَ اللَّهَ وَرَسُولَهُ مِن قَبْلُ ۚ وَلَيَحْلِفُنَّ إِنْ أَرَدْنَا إِلَّا الْحُسْنَىٰ ۖ وَالله يَشْهَدُ إِنَّهُمْ لَكَاذِبُونَ (107)" أتارى الراجل المنافق ده مابناش المسجد ده لله عز وجل ، طب بناه ليه ؟ بناه زى ما ربنا قال إرصاداً وكفراً وتفريقاً بين المسلمين .. بناه عشان يبقى وكر للتآمر على الإسلام والمسلمين..
و كان قاصد ان الوكر ده يبقى مسجد عشان الناس تروح بحسن نية تصلى ويتعملهم جوه المسجد ده غسيل مخ و ينقلبوا ضد النبى ﷺ فظاهرياً المبنى ده مسجد.. فأنت تبقى رايح مطمن لكن هو فى الحقيقة وكر للتآمر على النبى ﷺ. (عشان كده بنقول أن المنافقين أشد خطراً على المجتمع من الكفار لأن الكافر انت عارف انه كافر فمتوقع منه الغدر لكن اللى بيدّعى الإسلام و بيطعن فيه من جوه.. عامل زى السوس اللى بينخر فى الخشب و مش واخد حذرك منه.. لأن المنافق بيقول لا إله إلا الله زيى) و يتسمى المسجد مسجد الضِرار.. َ فربنا استحالة يسيب النبى يصلى فيه " لاَ تَقُمْ فِيهِ أَبَداً لَّمَسْجِدٌ أُسِّسَ عَلَى التَّقْوَى مِنْ أَوَّلِ يَوْمٍ أَحَقُّ أَن تَقُومَ فِيهِ فِيهِ رِجَالٌ يُحِبُّونَ أَن يَتَطَهَّرُواْ وَاللّهُ يُحِبُّ الْمُطَّهِّرِينَ (108) أَفَمَنْ أَسَّسَ بُنْيَانَهُ عَلَى تَقْوَى مِنَ اللّهِ وَرِضْوَانٍ خَيْرٌ أَم مَّنْ أَسَّسَ بُنْيَانَهُ عَلَىَ شَفَا جُرُفٍ هَارٍ فَانْهَارَ بِهِ فِي نَارِ جَهَنَّمَ وَاللّهُ لاَ يَهْدِي الْقَوْمَ الظَّالِمِينَ (109)" فالنبى ﷺ يصدر أوامر بهدم المسجد و فعلاً يتهدم.
طيب قصة تانية حصلت بعد رجوع النبى ﷺ من تبوك .. اللى حصل أن النبى زعل من زوجاته.. طب ليه ؟ أثقلنّ عليه فى النفقة (طلبوا طلبات كتير و كلهم فى نفس الوقت و النبى عنده 9 زوجات ) فطلبات كتير.. طب يعنى هي أمهات المؤمنين كانوا طماعين ؟؟ لأ طبعاً حاشاهم .. السيدة عائشة كانت مرة مع سيدنا عُروة بن الزبير "ابن أختها" فبيسألها :يا خالة ما كنتم تأكلون ؟ (كنتوا بتاكلوا إيه مع رسول الله). قالت: يا بُنى لقد كان يمر علينا الهلال تلو الهلال تلو الهلال (3 شهور يعنى) ولم يكن يُوقد فى بيت رسول الله ناراً (مش بنطبخ) فقالها: وما كان يُعيشكم يا خالة ؟ قالت: يا بُنى كنا نأكل الأسودان يعنى التمر والماء..
فدلوقتى لما تكون دى حياة أمهات المؤمنين فتفتكروا لما تطلب نفقة زيادة هتطلب إيه؟ أكيد مش حاجات فظيعة بس برده النبى ﷺ ماعندهوش..و مكنش المفروض يتجمعوا عليه بالشكل ده.. فزعل النبى ﷺ واعتزل نسائه و قعد فى حجرة لوحده و ما بيكلمش حد خالص.

نكمل المرة الجاية إن شاء الله🤍

سيرة_الرسول
الحلقة 199
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين🤍

#غزوة_تبوك (ج8 والأخير)
قال ﷺ : " يا كعب أبشر بخير يوم طلع عليك منذ ولدتك أمك..تاب الله عليك "

شفنا سيدنا كعب وهلال ومرارة وهم في انعزال عن كل الناس كعقوبة أمر بيها النبي وعرفنا ليه في الحلقة اللي فاتت. المهم بعد اليوم ال40 يخبط واحد من المسلمين على بيت كعب ويقول له:" يا كعب إن رسول الله يرسل إليك برسالة " فقال كعب: "خيرا"، فقال الرجل: "يقول لك، اعتزل زوجتك" (يعنى ما يقربش من زوجته) فراح كعب لزوجته وقال لها : "ارجعي لبيت أهلك حتى يقضي الله في أمري".
و يروح مرسال رسول الله لسيدنا "هلال بن أمية" ويقول له نفس الكلام.. بس زوجة هلال راحت للنبي واستئذنته إن يا رسول الله لو ينفع أقعد مع زوجي عشان بس أخدمه عشان هو تعبان وكبير فى السن فوافق النبي بشرط أن هلال ما يقربش منها.. فقالت له : يا رسول الله إن هلال لا يعمل شئ سوى البكاء الشديد والصلاة ..ووسط بكاء الصحابة التلاتة (كعب وهلال ومرارة) طول الليل والنهار ووسط استغفارهم وندمهم الشديد وبعد 50 يوم عذاب يجي فرج ربنا وعفوه عنهم ..
سيدنا كعب كان خايف يموت قبل ما العقوبة تنتهي ويموت وربنا وسيدنا النبي مش راضيين عنه .. ولحد ما جت الليلة ال 50.. كان سيدنا كعب على سطح منزله بيصلي قيام الليل فى وقت السحر ..وقت نزول الرحمات على العباد ربنا تبارك وتعالى بيقول كل ليلة: هل من سائل فأعطي؟ هل من مستغفر فأغفر له؟ هل من تائب فأتوب عليه؟ فخلي بالكم خليكوا حريصين إنكم تدعوا في الوقت ده..المهم كان واقف كعب يصلي ويبكي ويدعي قبل صلاة الفجر.
وتنزل الآية الكريمة دي من فوق سبع سماوات على النبي : "لَقَد تَّابَ الله عَلَى النَّبِيِّ وَالْمُهَاجِرِينَ وَالأَنصَارِ الَّذِينَ اتَّبَعُوهُ فِي سَاعَةِ الْعُسْرَةِ مِن بَعْدِ مَا كَادَ يَزِيغُ قُلُوبُ فَرِيقٍ مِّنْهُمْ ثُمَّ تَابَ عَلَيْهِمْ إِنَّهُ بِهِمْ رَؤُوفٌ رَّحِيمٌ. وَعَلَى الثَّلاثَةِ الَّذِينَ خُلِّفُواْ حَتَّى إِذَا ضَاقَتْ عَلَيْهِمُ الأَرْضُ بِمَا رَحُبَتْ وَضَاقَتْ عَلَيْهِمْ أَنفُسُهُمْ وَظَنُّواْ أَن لاَّ مَلْجَأَ مِنَ اللَّهِ إِلاَّ إِلَيْهِ ثُمَّ تَابَ عَلَيْهِمْ لِيَتُوبُواْ إِنَّ اللَّهَ هُوَ التَّوَّابُ الرَّحِيمُ"( سورة التوبة)
و يخرج النبي لصلاة الفجر ويصلي بالآيات الجديدة فالصحابة بيصلوا وبيسمعوا "وعلى الثلاثة الذين خلّفوا"، فبقى الصحابة هيطلعوا من الصلاة من الفرحة بعفو الله عنهم. ولما أنهى النبي الصلاة، التفت للصحابة وقال: " تاب الله على كعب بن مالك، تاب الله على هلال بن أمية، وعلى مرارة بن الربيع". وبسرعة خرج الصحابة يجروا يبشروا كعب وهلال ومرارة. ومنهم واحد ركب فرسه وجرى على بيت سيدنا كعب، فسبقه صحابي تانى ووقف على سطح جبل ونادى: "يا كعب بن مالك أبشر! يا كعب أبشر.".فبيقول كعب: "لما سمعت اسمي من سطح بيتي سجدت لله شاكراً"،
وبعدين وصل الصحابي اللي على الفرس لبيت سيدنا كعب، وقال: "أبشر يا كعب! تاب الله عليك"، فسجد كعب لله شكر ومن فرحته قلع عباءته وحطها على الصحابي كهدية وجرى على المسجد النبوي، فلما النبي شاف كعب تهلل وجهه الشريف صل الله عليه وسلم قال: "تعال يا كعب". يقول كعب: "فما رأيت وجه النبي أجمل ولا أضوأ ولا أنور من هذا اليوم"، فجلس كعب وقال له النبي:" أبشر يا كعب بخير يوم طلع عليك منذ ولدتك أمك، تاب الله عليك"، فيقول كعب: "فما كنت أدري ما أفعل. فقلت: " يا رسول الله، إني سأجعل كل مالي لله " فقال النبى: "لا يا كعب، أمسك عليك مالك هو أنفع لك"..
وتنزل الآية اللي بعدها : "يَا أَيُّهَا الَّذِينَ آمَنُواْ اتَّقُواْ اللَّهَ وَكُونُواْ مَعَ الصَّادِقِينَ".. اللي نجّا سيدنا كعب وسيدنا هلال ومرارة هو الصدق إنهم غلطوا وما كدبوش على النبي عليه الصلاة والسلام.. رضي الله عنهم وأرضاهم. لو تلاحظوا إن مدة البلاء كانت 50 يوم.. ومدة مشقة الغزوة على جيش تبوك كانت بردو 50 يوم.. فكأن التلات صحابة دول تحمّلوا نفس مشقة الجيش ولكن كانت أشد لأنهم ما كانوش عارفين مصيرهم. فكان الجزاء من جنس العمل .. يا ترى اللي اتأخر على النبي سنة واتنين محتاج أد إيه عشان تتوب وتصدق توبتك؟ طب واللي متأخر سنين؟ اللهم ردّنا إليك ردًا جميلا .
على فكرة سورة التوبة سميت بهذا الاسم لأنها توبة الثلاثة اللي تخلفوا عن رسول الله عليه الصلاة والسلام ... طيب خلصت أحداث تبوك وجه عام الوفود يعنى السنة اللي قبائل كتير كانوا حوالي 70 قبيلة جت عشان تسلم وتعاهد النبي على الإسلام، ومن ضمن القبائل دى قبيلة "ثقيف" من بلد الطائف. والطائف كان عندهم صنم اسمه "الربّة"، فلما أسلموا.. النبي قال لهم لما ترجعوا بلدكم هدوا الربّة، فقال لسيدنا "المغيرة بن شعبة" روح معاهم وكسر أنت الربّة. المهم قبيلة ثقيف طلبوا من النبي إنه يسيبلهم الصنم ده مع إنهم أسلموا! بس بردو مهزوزين شوية..

فالنبي رفض وبعت المغيرة للطائف، فلما وصل المغيرة للطائف قال لأصحابه: "أأضحككم على ثقيف؟" فقالوا: "بلى."، فراح المغيرة عند الربّة ومسك الفأس وقال: "بسم الله توكلت على الله"، وبدأ يكسر فى الربّة وبعدين عمل نفسه بيتألم، ووقع على الأرض كأنه اتشل.. فقالت ثقيف: "قتلته الربّة! قتلته الربّة! أصابته لعنة الربّة!"، فقام سيدنا المغيرة وقال: "يا معشر ثقيف، قاتلكم الله خسرتم. هذه حجارة لا تضر ولا تنفع. والله لأحطمنها حتى أحفر قبرها"، وفعلا عمل كدة، ولما سقطت، ثبت الإسلام فى قلوب قبيلة ثقيف وعرفوا إن فعلا لا إله إلا الله.

نكمل بكرة إن شاء الله🤍
👈هذة الحلقات نقلا عن أستاذة نورهان الشيخ

سيرة_الرسول
الحلقة 198
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين🤍

#غزوة_تبوك ( ج7)
فقال كعب : يا رسول الله لو كذبت عليك لأرضيك، يوشك الله أن يغضبك عليّ.

شفنا امبارح سيدنا كعب بن مالك كان من الصحابة التلاتة اللي مطلعوش مع النبي غزوة تبوك وماكنش عندهم أى عذر .. وقلنا إن الصحابة بشر ممكن يغلطوا بس الأهم إنهم كانوا بيتوبوا توبة صادقة وده اللي كان بيميز الصحابة عن أى بشر تانيين .

رجع النبي عليه الصلاة والسلام بجيش المسلمين المدينة وعرف سيدنا كعب أن النبي دخل المسجد النبوي وقعد فيه ينتظر الناس ومن يريد تقديم الأعذار له من المنافقين والتلات صحابة اللي منهم سيدنا كعب .. ففكر سيدنا كعب إنه يقدم عذر كاذب عشان النبي يعذره ومايزعلش منه، بس بعد كدة فكر في نفسه أن النبي ممكن يعرف الحقيقة بوحي من الله .. فقرر كعب إنه ما يكذبش على النبي .. بيقول سيدنا كعب : "فأجمعت نفسي وقررت الصدق، وذهبت إلى رسول الله فرأيت صفا طويلا من المنافقين أمامي. فانتظرت حتى جاء دوري، فنظر لي النبي عليه الصلاة والسلام ثم قال : تعال يا كعب .. فتقدمت حتى جلست بين يديه .. فقال النبي: يا كعب وأنت ما عذرك؟ ما الذى خلفك عن الغزوة؟، فقلت: يا رسول الله، والله لو كنت أمام أي أحد من أهل الدنيا لكذبت عليه بأي عذر، فإنى أعطيت جدلا (يعنى أنا لبق وبعرف أظبط الكلام وأطلع نفسي من أي المشكلة) ولكنك رسول الله فلو كذبت عليك لأرضيك، يوشك الله أن يغضبك عليّ، ولئن قلت لك الصدق قد تغضب مني .. ولكن بصدقي أرجو الله أن يعفو عني ويرضيك عني.

وبدأ كعب يكمل كلامه ويقول : يا رسول الله، والله ليس لى من عذر في تخلفي عنك، وما كان أحد حاله أيسر منى حين تخلفت عنك .. فبص له النبي وقال: أما هذا فقد صدق." ( يعنى ال 80 منافق اللي قبل سيدنا كعب كانوا كلهم كذابين إلا سيدنا كعب هو الوحيد اللي ماكذبش على النبي وقال له الحقيقة ) .

طيب النبي هيعمل إيه مع سيدنا كعب؟ طبعا هيعاقبه .. النبي قال : " قم يا كعب، حتى يحكم الله فيك."،ويمشى كعب و يجرى عليه شوية من المنافقين ويلوموه أنه قال الصدق .. ويقولوا : "ويحك يا كعب، ماذا فعلت فى نفسك؟ لما لم تكذب على النبي لينتهى الأمر"، فكعب اتهز من كلام المنافقين وبعدين رجع فكر وسألهم لو فى حد تاني قال الصدق زيه، فقالوا له : نعم اثنين كمان قالوا الصدق زيك وهم "هلال بن أمية" و"مرارة بن الربيع"، فبدأ سيدنا كعب يثبت بثبات أصحابه .. ( ومن هنا نعرف قيمة قول الحق يعني أنت ممكن تعمل الصح بتثبت وبتثبّت حد على الصح بسببك وربنا يجعله فى ميزان حسناتك.. )

طيب كعب قال الصدق يا ترى هيحصل معاه إيه ؟ هيأمر النبي المسلمين أن محدش يكلم كعب ولا الإتنين التانين .. يعنى البلد كلها هتخاصمهم ومحدش أبدا يتعامل معاهم .. طب لحد إمتى يا رسول الله ؟ النبي عليه الصلاة والسلام ما حددش مدة .. فيبدأ يعدي يوم ، يومين أسبوع وهكذا .. وعدم تحديد مدة العقاب ده عقاب لوحده فكان سيدنا كعب بيتعذب.

- تخيلوا يا جماعة بلد كاملة مخاصمة إنسان.. صعبة جدا.. محدش كان بيكلم كعب بن مالك ولا هلال بن أمية ولا مرارة بن ربيعة خالص .. بيحكى سيدنا كعب وبيقول : "لم يكلمني أحد أبدا من أهل المدينة، فحين أخرج إلى الصلاة، لا يكلمني أحد، وحين أدخل عليهم فى المسجد، لا يكلمنى أحد .. فأذهب إلى رسول الله وأسلم عليه، فيدير رأسه عني، فأقول في نفسي هل حرك شفتيه بالسلام؟! ثم أقف وأصلى قريبا منه فأسارقه النظر، فإذا أقبل على صلاته نظرت إليه، فإذا نظر إليّ أقبلت على صلاتي (أصل النبي بيحب كعب وكعب بيحبه بس كعب غلط أوي .. فكان النبي بيحب يبص على كعب من غير ما كعب يحس والعكس).

المهم التلات صحابة دول تعبوا جدا وبقوا طول الليل والنهار يبكوا ويصلوا ويستغفروا.. سيدنا كعب ابن عمه كان سيدنا "أبو قتادة"، وكان بيته حواليه سور، سيدنا كعب راح له وقال له من ورا سور البيت "السلام عليك يا بن عمي، افتح"، فماردش أبو قتادة عليه ويفضل كعب ينادى وبردو ميردش عليه فبيقول سيدنا كعب: "فتسلقت الجدار، ونزلت بالمنزل فوجدت أبا قتادة واقفا يسمعني، فسلمت عليه فأدار وجهه عني. فقلت له رد عليّ يا أبا قتادة .. ألم تعلم أني أحب الله ورسوله!! فيسكت أبو قتادة ومايردش على كعب، فيبكي كعب بكاء شديد ويقول: يا أبا قتادة، أقسمت عليك رد عليّ.. ألم تعلم أني أحب الله ورسوله؟ .. فيرد أبو قتادة ويقول : الله ورسوله أعلم .. ( يااا أنتوا متخيلين إحساس كعب.. أقرب الناس له فاكرينه بينافق ومش بيحب النبي ولا الجهاد فى سبيل الله.. بس بردو أصل سيدنا كعب غلط غلطة كبيرة ده ماطلعش الغزوة مع النبي بس هيتوب أحلى توبة ) فبيقول كعب: فبكيت ومشيت إلى السوق أبكي، حتى رأيت رجل من أهل الشام ينادي ويقول: من يدلني على كعب بن مالك؟ فأشار الصحابة على كعب..

فراح الرجل لكعب وقال : "يا كعب أبشر! فإن ملك الغساسنة سمع ما حدث بينك وبين صاحبك، وأن صاحبك قد جافاك (يقصد إن النبي عليه الصلاة والسلام مخاصمه ) ويكمل الراجل كلامه ويقول : وبعث ملك الغساسنة إليك بهذا الخطاب يقول لك تعال إلينا نواسيك ونرحب بك". فبيقول كعب: فأخذت الخطاب وبكيت وقلت فى نفسي ما هذا البلاء .. إن أعداء الإسلام يطمعون فيّ.. فمزقت الخطاب وقذفت به فى النار.. ( سيدنا كعب قطع الطريق اللي كان ممكن الشيطان يدخل له منه وده من ذكاء سيدنا كعب ودليل على صدق توبته ) .

المهم يعدى 40 يوم وكل المدينة مخاصمة التلات صحابة .. وفى اليوم ال40 يخبط ( يااه أكيد كعب فرح .. أخيرا حد هيكلمه ) فيفتح كعب فيلاقي واحد من المسلمين واقف بيقول له: يا كعب إن رسول الله يأمرك أمرا .
يا ترى إيه الأمر ده ؟

هنعرف فى الحلقة الجاية إن شاء الله 🤍

سيرة_الرسول
الحلقة 197
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

#غزوة تبوك (ج6)
فقال ﷺ : اللهم احفظ أبا قتادة كما بات يحفظ نبيك

دلوقتى المسلمين فى طريق رجوعهم للمدينة ، فالنبى عليه الصلاة و السلام كان راكب على الناقة بتاعته، و كان مرهق جدا من الطريق ومشقته، فتبدأ عينيه الشريفتين تقفل وينام ويميل من على الناقة.. فمين الصحابى اللى كان آخد باله ؟ "أبا قتادة"، فلما شاف النبى فى الوضع دة جرى عليه بسرعة فبيحكى أبا قتادة و يقول: "فأسرعت إليه، فوجدته سيسقط عن ناقته، فذهبت إليه فسندته بيدى دون أن أوقظه.. ومكثت معه طوال الليل، و بعد بضع أميال، وجدته يميل مرة أخرى، فكاد يسقط النبى عن ناقته فسندته الثانية دون أن أوقظه.
و حين جاء وقت الفجر مال النبى ميلة شديدة عن الناقة فكاد يسقط عنها، فسندته..فاستيقظ النبى.. فقلت: بأبى أنت وأمى يا رسول الله أنا أبو قتادة. فقال: منذ كم و أنت هنا يا أبا قتادة؟. فقلت: منذ أول الليل يا رسول الله.. فقال النبى: اللهم احفظ أبا قتادة كما بات يحفظ رسول الله" فبيقول الصحابة: "فكان أبو قتادة أكرم الصحابة عيشا، و أهنئهم و أسعدهم ببركة دعوة رسول الله" ... رضى الله عن أبا قتادة و أرضاه.

الحمدلله رجع النبى المدينة وفى مفاجأة حصلت . إيه هي؟ "عبد الله بن سلول" بيموت .. ده كبير المنافقين .. فيأتى ابن " عبد الله بن سلول" و يقول للنبى: "يا رسول الله أبى يحتضر"، فيروح النبى لبيت عبد الله.. ( معقولة يا رسول الله تروح!! ده سلول ده اللى اتهم زوجتك عائشة أم المؤمنين بالزنا!!.. آه النبى راح يا جماعة .. دى أخلاق النبى محمد عليه أفضل الصلوات والسلام) .. ويموت عبد الله .. فابن عبد الله بن أبى بن سلول طلب من رسول الله أنه يعطيه ثوبه عشان يكفن أبوه فيه ويغسله ويصلى عليه .. فيوافق النبى صل الله عليه وسلم .. وينفذ النبي عليه الصلاة والسلام اللى انطلب منه رغم كل الأذى اللى اتسبب له فيه .. مش بس أذى للنبي .. لا .. ده لأمة محمد كلها .. فالنبى يغسِّل عبد الله بن أبي بن سلول بيديه ويخلع ثوبه ويكفنه بيه .. وبعدين يقف ولسه هيبدأ يصلي عليه .. فييجي سيدنا عمر بن الخطاب وهو مش عاجبه اللى بيحصل ويقول : "يا رسول الله أتصلي على هذا المنافق ؟ " فالنبي ﷺ يقول :"دعني يا عمر" .. فيقول عمر : "يا رسول الله لقد قال في عائشة كذا وكذا.. " فيرد النبى عليه ويقول : "يا عمر، إن ربى قد خيرنى فقال استغفر له أو لا تستغفر له إن تستغفر لهم سبعين مرة فلن يغفر الله لهم، فسأزيد على السبعين لعل الله أن يغفر له"، وبالفعل صل النبى على سلول، وبعد الصلاة نزلت الآية: : وَلا تُصَلِّ عَلَى أَحَدٍ مِنْهُمْ مَاتَ أَبَدًا وَلا تَقُمْ عَلَى قَبْرِهِ إِنَّهُمْ كَفَرُوا بِالله وَرَسُولِهِ [سورة التوبة] بس شوفوا أد أيه النبى لآخر لحظة مهموم بالناس حتى اللى آذوه فى عرضه.. صل الله على محمد.

نحكى قصة جميلة جداً ..بعد ما رجع المسلمين من الغزوة بدأ النبى عليه الصلاة و السلام يجيله المنافقين و الصحابة اللى تخلفوا و مراحوش المعركة من غير أى عذر حقيقى! طيب ده صحابى إزاى يعمل كدة و إزاى يتأخر عن الجهاد؟!!.. الصحابة بشر مش ملائكة و طبيعى انهم يغلطوا و غلط كبير أوى كمان. إحنا كمان لو غلطنا و تخلفنا عن رسول الله ومدافعناش عنه، ممكن نتوب ونرجع ورا النبى تانى..
اللى تخلف من الصحابة كانوا 3 فقط منهم صاحبى اسمه سيدنا "كعب بن مالك".. بيحكى كعب بن مالك و يقول: " كنت فى المدينة، وتخلفت عن رسول الله، و والله ما كان عندى من عذر فى تخلفى عنه.. فقد كانت عندى ناقتين و معى أموال كثيرة .. فما كنت أغنى ولا أحسن حالا ولا أكثر مالا من يوم تبوك. و كانت ظروف المعركة صعبة، فكنت أقول فى نفسى أنا غنى و ناقتى سريعة، ففكرت أن أنتظر يوما ثم ألحق بالجيش. و بعد مرور اليوم الأول، دخلت بيتى و شربت الماء البارد حيث الجو الرطب، فأقول فى نفسى أنتظر يوما ثانيا ثم ألحق بهم. فجاء اليوم الثانى، فقلت فى نفسى ناقتى سريعة سأستطيع أن ألحق بهم".
و فضل سيدنا كعب يسوف و يأجل الخروج الى الجيش حتى اليوم الرابع "يوم الحصاد"، و فى اليوم ده ، جه الشيطان و وسوس له انه مش هيلحق الجيش أبدا فثبط عزيمته و فعلا مطلعش لأنه كان مستحيل انه يلحقهم و فضل كعب فى المدينة..و مطلعش الغزوة..فبيقول سيدنا كعب: "فمكثت فى المدينة ثم خرجت من بيتى أنظر فى وجوه الناس، فما أرى إلا منافقا مغموسا فى نفاقه، أو معذور قد عذره الله (يعنى مريض أو عجوز).. و بلغنى أن النبى قد سأل عنى فى تبوك، فرد عليه واحد من الصحابة بأنه منعه ماله والنظر فى عطفيه، فرد الصحابى سعد بن عبادة بأن كذبت والله فإننا لا علمنا عليه إلا كل الخير، فسكت النبى و معلقش على الكلام.. "

فبيقول كعب: فمكثت فى المدينة أنتظر اللحظة التى يدخل فيها النبى حتى جاءت الأخبار أنه قد وصل عند المدخل، فدب الرعب فى قلبى." طيب هيواجه سيدنا كعب النبى عليه الصلاة و السلام إزاى!!

هنعرف المرة الجاية إن شاء الله🤍

سيرة_الرسول
الحلقة 196
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_تبوك (ج5)
"غزوة تبوك رسالة لنا كلنا لازم نعرفها بتبين صدقنا مع الله"

شفنا الحلقة اللى فاتت جيش المسلمين وهو بيتحرك لحد منطقة تبوك و الجو حر أوى و الأكل قليل و الجيش عطشان.. و يوصل الجيش لتبوك ..و هنا يحصل مفاجأة.. إيه هي؟ مافيش رومان.. جيش الرومان مش موجود..أصل لما الرومان عرفوا أن النبى عليه الصلاة و السلام طلع لهم بجيشه فى عز الحر فى وسط ظروف صعبة أوى.. فالرومان خافوا و اترعبوا وانسحبوا و رجعوا لبلادهم ... و بكده خلاص مافيش معركة..

ياااه تخيلوا !! بعد كل المسافة اللى المسلمين قطعوها اللى كانت مدتها 50 يوم .. كل التعب ده حصل على الفاضى؟ لأ طبعا مش على الفاضى لأن الغزوة دى تعتبر إختبار للصحابة و دى آخر غزوة فى حياة النبىﷺ .. الغزوة دى حطت كل صحابى قدام نفسه، هل هتضحى علشان النبى عليه الصلاة والسلام ولا مش هتضحى! وأكيد الغزوة دى فى آخر حلقات السيرة إختبار لنا إحنا كمان..

طيب هو إحنا هنحارب علشان رسول الله؟ مش بنفس الطريقة بس إحنا بنجاهد بردو لكن جهاد عقلى و فكرى من خلال الدفاع عن رسول الله ﷺ ، و هنشوف فى زماننا ده حد هيتخلف و يسيب النبى ﷺ ؟ ولا هيقوم و يدافع عنه و يخلى كل الدنيا تعرف مين هو محمد نبى الإسلام ﷺ و إيه أخلاق الإسلام الحقيقية؟..

طيب دلوقتى جيش المسلمين راجع للمدينة و قبل ما يرجع حصلت حاجة لطيفة هى أن قبيلة فى منطقة "دومة الجندل" كانت قبيلة مشركة بالله و كان الملك بتاعهم اسمه " أكيدر "
القبيلة دى لما عرفت أن النبىﷺ وصل لحد تبوك ، خافوا و الملك أكيدر دخل استخبى فى الحصن بتاعه..المهم النبى عليه الصلاة والسلام لما وصل تبوك، فكر أنه يكسب صلح القبائل المجاورة لتبوك، بحيث أن القبائل دى ما تفكرش تحارب النبىﷺ أبداً.. ولو جيش الرومان فكر يحارب المسلمين، فمايلاقيش معاه أى مساعدة من القبائل بسبب تعاهدهم مع النبى ﷺ..

- و فعلا بدأ النبى ﷺ يبعت أصحابه للقبائل دى لحد ما وصلوا للقبيلة اللى فى منطقة "دومة الجندل"، عند الملك "أكيدر". طيب هتبعت مين لدومة الجندل يا رسول الله؟ هيبعت سيدنا "خالد بن الوليد".. و قال النبى عليه الصلاة و السلام لسيدنا خالد: "اذهب إلى دومة الجندل حيث الملك الذى يحتمى وراء حصنه، وخذ معك مائة فارس، وأتنى بأكيدر"..

فسيدنا خالد طلب من النبىﷺ أنه يوصف له شكل الملك، فرد النبىﷺ : "يا خالد..ستجده يصطاد البقر"، طيب معقول ممكن الملك هيخرج من حصنه علشان يصطاد البقر البرى؟ أصل مادام النبىﷺ قال كده يبقى أكيد الملك هيخرج و يصطاد ..المهم راح سيدنا خالد إلى دومة الجندل، و وقف يستنى خروج الملك من الحصن، و فضل مستنى الملك لحد اليوم الرابع، لحد ما فى يوم كان بقرة وقفت جنب باب الحصن و فضلت تحك راسها فيه.. فانفتحت البلكونة وخرج منها الملك أكيدر ..فقال لزوجته: أترين ما أرى؟ قالت: أجل. قال: نحن نجتهد طوال الشهر لهذا الصيد. فقالت له: ستخرج؟ فقال: أجل. إنها على باب الحصن. لا تخافى، الناس نيام، سأفتح الباب أسحبها للداخل ثم أغلق الباب سريعاً" .

و فعلا نزل أكيدر، و فتح باب الحصن، وأول ما فتح الباب، طلع البقر يجرى على سيدنا خالد .. تخيلوا !! سبحان الله، قال تعالى : "و ما يعلم جنود ربك إلا هو".. المهم البقر جرى والملك أكيدر جرى وراه، وسيدنا خالد واقف بيتفرج على المنظر ده، و مش مصدق..فقام خالد مسك أكيدر بكل سهولة و راح به للنبى عليه الصلاة والسلام. . فعلاً صدقت يا رسول الله..
المهم وصل أكيدر للنبىﷺ و فضل يتكلم معاه.. و أكيدر عرف أن النبىﷺ مش هدفه الحرب لكن هدفه السلام و اطمن و فرح و مضى مع النبىﷺ معاهدة سلام..

و أكيدر أهدى للنبىﷺ عباية من الحرير مرصعة بالأحجار الكريمة إكراماً له عليه الصلاة والسلام... بس طبعا النبىﷺ ماينفعش يلبس جبة حرير، ورغم كده النبى
ﷺ مردش الهدية وماقالش للملك أنها حرام و ماينفعش ألبسها ..
لأن طبعا من السنه أنك تقبل الهدية حتى لو مش عاجباك، و بعد ما تاخدها اعمل فيها اللى أنت عايزه البسها أو ما تلبسهاش براحتك.

نكمل بكرة إن شاء الله ❤

اللهُمَّ صَلِّ عَلى مُحمَد عَدد مَا ذَكركَ الذاكِرون
وصلِّ عَلى مُحمَد عَددَ مَا غَفلَ عَن ذِكركَ الغَافِلون

سيرة_الرسول
الحلقة 195
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_تبوك (ج4)
قال ﷺ : إن يكن فيه خيرا ألحقه الله بنا و إلا فقد أراحكم الله منه.

شفنا المرة اللى فاتت المنافقين وأفعالهم الخبيثة و محاولاتهم لتثبيط عزيمة المسلمين.. طيب دلوقتى النبى خارج خلاص للغزوة، و ولى أمير على المدينة هو: "على بن أبى طالب". فالنبى يروح لعلى ويقول له: "يا على، ابقى بالمدينة، واحفظها فى غيابى".. و فضل علي فى المدينة و خرج النبى مع الجيش.. لكن المنافقون قالوا: " ما ترك النبى علي إلا استثقالا منه لعلى" يعنى النبى ساب سيدنا على فى المدينة عشان تقيل على قلبه والنبى مش بيحبه!

فطبعا سيدنا علي سمع كلام المنافقين ، وبسرعة جرى وراء النبى و لحقه، وقال له: "يا رسول الله، يقولون أنك تركتنى استثقالا منك إلي"، فقال النبى: "كذبوا والله يا على، بل إنى تركتك على أهلى وأهلك. يا على، أما ترضى أن تكون منى كمنزلة هارون من موسى غير أنه لا نبى بعدى؟!"..فقال علي "رضيت يا رسول الله" ... و رجع سيدنا علي للمدينة رضى الله عنه وأرضاه.

وصل النبى عليه الصلاة و السلام لمنتصف الطريق، وطول السكة كان كل شوية يلقى نظرة على الجيش و يتمم على وجود الجميع فقال: "أين أبا ذر؟"، فالصحابة بصوا حواليهم فملاقوش أبوذر، فيقولوا للنبى انه مش موجود.. فيقول النبى: " إن يكن فيه خيرا يلحقه الله بنا، و إلا فقد أراحكم الله منه" ... يعنى كأن اللى بيدافع عن النبى لسه فيه خير، واللى تخلف عن النبى ومش بيدافع عن الدعوة، ده مفيهوش خير ...وقيسوا بقى الكلام ده علينا دلوقتى..

المهم بعد شوية يشوف النبى عليه الصلاة و السلام خيال جى من بعيد، فيقول النبى: "كن أبا ذر. كن أبا ذر". فلما اقترب الرجل قال المسلمون: "هو يا رسول الله"، فيفرح النبى به و يسأله: "أين كنت يا أبا ذر؟"، فيقول: "والله يا رسول الله، كان بعيرى بطئ، فقفزت من عليه وجئت سيرا على قدمى"، فيبتسم النبى ويقول: "يرحم الله أبا ذر. يعيش وحده ويموت وحده، ويبعث يوم القيامة وحده" ... و فعلا يوم ما هيموت أبو ذر هيكون وحيدا زى ما قال النبى.. صدق رسول الله ﷺ..

و بعد شوية يبص النبى حواليه تانى و يسأل عن "أبو خثيمة"، فيبص الصحابة فميلاقوش أبو خثيمة فيقول النبى: "" إن يكن فيه خيرا يلحقه الله بنا، و إلا فقد أراحكم الله منه"...طيب فين أبو خثيمة؟ أبو خثيمة يوم خروج الجيش دخل بيته و كان غنى أوى و عنده زوجتين..فلقى الماء البارد، والطعام حلو و الجو الرطب و جميل، فبصلهم و قال لنفسه: "سبحان الله. أيكون النبى فى الصحراء إلى تبوك وحده، وأكون أنا فى هذا النعيم!! والله لا يكون ذلك أبدا".

فكانت كل زوجة تروح له وتقدم له الشراب والطعام، فيقول: "والله، لا أذوق ذواقا حتى ألحق برسول الله". فعلا ركب أبو خثيمة فرسه و جرى عشان يلحق النبى ..و يشوف النبى خيال من بعيد فيقول : كن أبا خثيمة .. كن أبا خثيمة.. فيقرب أبو خثيمة فالصحابة يقولوا هو يا رسول الله.. فيفرح النبى به أوى صل الله عليه وسلم ..

نكمل الحلقة الجاية إن شاء الله 🤍

سيرة_الرسول
الحلقة 194
يلا صلوا على النبى
اللهم صل وسلم وبارك على سيدنا محمد وعلى آله وصحبه 🤍

#غزوة_تبوك (ج3)
فضيحة المنافقين

شفنا امبارح الأغنياء تصدقوا لتجهيز جيش الغزوة بأموالهم و ممتلكاتهم، طيب الفقراء عملوا إيه؟.. فى فقير راح للنبى عليه الصلاة و السلام و حط قدامه تمرة واحدة بس لانه مش معاه غيرها و ييجى فقير تانى و يحط قدام النبى بعض الشعير.. فالمنافقون استغلوا الموقف ده واستهزءوا بيهم، فينزل القرآن فى سورة التوبة: "الَّذِينَ يَلْمِزُونَ الْمُطَّوِّعِينَ مِنَ الْمُؤْمِنِينَ فِي الصَّدَقَاتِ وَالَّذِينَ لاَ يَجِدُونَ إِلاَّ جُهْدَهُمْ فَيَسْخَرُونَ مِنْهُمْ سَخِرَ الله مِنْهُمْ وَلَهُمْ عَذَابٌ أَلِيمٌ"

- وبدأ المنافقون يقدموا الأعذار لرسول الله عشان ميطلعوش معاه الغزوة. فمنهم من تحجج بمرض زوجته، و حجج كتير تانية، وينزل قول الله تعالى فيهم فى سورة التوبة: "وَجَاءَ الْمُعَذِّرُونَ مِنَ الأَعْرَابِ لِيُؤْذَنَ لَهُمْ وَقَعَدَ الَّذِينَ كَذَبُواْ اللَّهَ وَرَسُولَهُ سَيُصِيبُ الَّذِينَ كَفَرُواْ مِنْهُمْ عَذَابٌ أَلِيمٌ"

لما خرج النبى للغزوة، فرح المنافقون بمقعدهم خلاف رسول الله، يعنى بقعدتهم فى المدينة و مخرجوش مع النبى ..فينزل فيهم القرآن ويفضحهم: "فَرِحَ الْمُخَلَّفُونَ بِمَقْعَدِهِمْ خِلافَ رَسُولِ الله وَكَرِهُواْ أَن يُجَاهِدُواْ بِأَمْوَالِهِمْ وَأَنفُسِهِمْ فِي سَبِيلِ الله وَقَالُواْ لاَ تَنفِرُواْ فِي الْحَرِّ قُلْ نَارُ جَهَنَّمَ أَشَدُّ حَرًّا لَّوْ كَانُوا يَفْقَهُونَ. فَلْيَضْحَكُواْ قَلِيلاً وَلْيَبْكُواْ كَثِيرًا جَزَاء بِمَا كَانُواْ يَكْسِبُونَ"

و ييجى واحد اسمه: "الجد بن قيس" للنبى ويقول له: "يا رسول الله، لن أستطيع الخروج معك. ائذن لى ولا تفتنى" يعنى إيه؟ يعنى أنا ضعيف من ناحية البنات، ولو شفت بنات الرومان الحلوين هسيب المعركة و هتفتن بالبنات! ... فيحكى عنه الله تبارك و تعالى فى القرآن و يقول: "و َمِنْهُم مَّن يَقُولُ ائْذَن لِّي وَلاَ تَفْتِنِّي أَلاَ فِي الْفِتْنَةِ سَقَطُواْ وَإِنَّ جَهَنَّمَ لَمُحِيطَةٌ بِالْكَافِرِينَ"

و ييجى للنبى عليه الصلاة و السلام واحد من كبار المنافقين " عبد الله بن أبى بن سلول" ويعتذر للنبى و يقدم الحجج ويقول للنبى:" أصل المسافة بعيدة وأنا مش هقدر عليها"، فيفضحه القرآن: "لَوْ كَانَ عَرَضًا قَرِيبًا وَسَفَرًا قَاصِدًا لاَّتَّبَعُوكَ وَلَكِن بَعُدَتْ عَلَيْهِمُ الشُّقَّةُ وَسَيَحْلِفُونَ بِالله لَوِ اسْتَطَعْنَا لَخَرَجْنَا مَعَكُمْ يُهْلِكُونَ أَنفُسَهُمْ وَالله يَعْلَمُ إِنَّهُمْ لَكَاذِبُونَ"

- بعض المنافقين قالوا يا جماعة روحوا استئذنوا الرسول، فإن أذن لكم فاقعدوا، وان لم يأذن فاقعدوا ! فينزل فيهم قول الله تعالى فى سورة التوبة: "يَا أَيُّهَا الَّذِينَ آمَنُواْ مَا لَكُمْ إِذَا قِيلَ لَكُمُ انفِرُواْ فِي سَبِيلِ الله اثَّاقَلْتُمْ إِلَى الأَرْضِ أَرَضِيتُم بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلاَّ قَلِيلٌ".
وتنزل آية صعبة جدا: "قُلْ إِن كَانَ آبَاؤُكُمْ وَأَبْنَاؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ الله وَرَسُولِهِ وَجِهَادٍ فِي سَبِيلِهِ فَتَرَبَّصُواْ حَتَّى يَأْتِيَ الله بِأَمْرِهِ وَالله لاَ يَهْدِي الْقَوْمَ الْفَاسِقِينَ" ..
اللهم نسألك أن تجعل حبنا لك و لنبيك أحب إلينا من كل ما يشغلنا عنك

نكمل بكرة إن شاء الله 🤍

سيرة_الرسول
الحلقة 193
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_تبوك (ج2)
فقال ﷺ: أبشر إن الله عزوجل قد قبل صدقتك ♡

شفنا المرة اللى فاتت النبى عليه الصلاة و السلام وهو بيجهز جيش غزوة تبوك أو العسرة و وقف على المنبر و قال: من يجهز جيش العسرة؟و يقول: أيها الناس تصدقوا.. فيسمع سيدنا عمر بن الخطاب نداء النبى.. فيقول فى نفسه : " اليوم أسبق أبا بكر"..(بيتنافس معاه على طاعة الله عزوجل) فدخل سيدنا عمر بيته و قسِّم كل حاجة يمتلكها بالنص..تخيلوا!! و خلى نصها لله و ساب نصها له و لأهله..طبعا صعب جدا ان حد بسهولة يتصدق بكل ده.. يعنى قسم أكله وشربه و فلوسه و كله.

المهم جمع سيدنا عمر نص حاجته كلها و حطها أمام النبى، فالنبى بص عليهم لقاهم كتير أوى، فقال له: "يا عمر، ماذا تركت لأهل بيتك؟"، فقال: "يا رسول الله، تركت نصفهم"، فيفرح النبى أوى. المهم راح سيدنا عمر يستخبى بعيد عشان يشوف سيدنا أبو بكر هيقدم إيه للنبى، و ييجى سيدنا أبو بكر و يقدم الصدقة بتاعته قدام النبى.. فالنبى يحس انها كتير فيقول له: "ماذا تركت لأهل بيتك يا أبا بكر؟"، فقال أبو بكر "تركت لهم الله ورسوله" .. تخيلوااا!!(يعنى مسبش لأهله حاجة خالص )".. فبيحكى سيدنا عمر و يقول انه ساعة ماشاف كده قال فى نفسه: "ما بالك يا أبا بكر لا أحد يسبقك أبدا"..

و يسمع صحابى نداء النبى : تصدقوا.. و كان صحابى صغير فى السن عمره أقل من عشرين سنة و كان شديد الفقر و كان اسمه "علبة"، ففضل يبكى لانه معندوش حاجة يتصدق بيها. بس بعد كده جت لعلبة فكرة فقام و صلى ركعتين و دعا ربنا و قال : يارب إنى أتصدق بعرضى على المسلمين.. طب ده معناه إيه ؟ يعنى الحسنات اللى كنت هاخدها يوم القيامة بسبب حد غلط فيا أو اغتابنى فأنا مش عايزها و هتصدق بيها للمسلمين ... ودى من أشرف الصدقات..لأن بسببك هتخلى ميزان حسنات المسلمين يزيد فممكن بسببك حد ينجو و يدخل الجنة.. المهم دعا علبة و دخل نام ..و مكنش متخيل ان ممكن ربنا يقبل الصدقة دى..قال تعالى: وَلْيَعْفُوا وَلْيَصْفَحُوا ۗ أَلَا تُحِبُّونَ أَن يَغْفِرَ الله لكم [سورة النور]

و المفاجأة أن فى صلاة الفجر، وقف النبى عليه الصلاة و السلام على باب المسجد و قال: "أين المتصدق بعرضه البارحة؟"، فسمع علبة النداء و جرى بسرعة على النبى وقال : "أنا يا رسول الله"، فالنبى قال له: "أبشر، فإن الله عزوجل قد قبل صدقتك".. تخيلوا ربنا أوحى للنبى عشان يفرح قلب علبة بقبول الصدقة دى :) شايفين أد إيه صدقة العرض غالية على ربنا.. لان دى بتحقق الآية الكريمة .

طيب دلوقتى النبى بيجهز الجيش فهتيجى مجموعة اسمها الأشعريون" و دول قبيلة "أبو موسى الأشعرى"، و قالوا للنبى :"احملنا"، يعنى اعطينا ناقة أو بعير نركب عليها عشان نطلع الغزوة و ندافع عنك يا رسول الله.. إحنا معناش فلوس نشترى.. فالنبى قال لهم ان عدد البعير صغير و انه مش معاه..

فمشوا و بكوا :(.. عشان كان نفسهم يطلعوا مع النبى عليه الصلاة والسلام ... فينزل قول الله تبارك وتعالى فيهم: لَّيْسَ عَلَى الضُّعَفَاء وَلاَ عَلَى الْمَرْضَى وَلاَ عَلَى الَّذِينَ لاَ يَجِدُونَ مَا يُنفِقُونَ حَرَجٌ إِذَا نَصَحُواْ لِلَّهِ وَرَسُولِهِ مَا عَلَى الْمُحْسِنِينَ مِن سَبِيلٍ وَاللَّهُ غَفُورٌ رَّحِيمٌ.
وَلاَ عَلَى الَّذِينَ إِذَا مَا أَتَوْكَ لِتَحْمِلَهُمْ قُلْتَ لاَ أَجِدُ مَا أَحْمِلُكُمْ عَلَيْهِ تَوَلَّوْا وَّأَعْيُنُهُمْ تَفِيضُ مِنَ الدَّمْعِ حَزَنًا أَلاَّ يَجِدُواْ مَا يُنفِقُونَ"[سورة التوبة]

بس ربنا هيجبر بخاطر الأشعريين ، و هيزيد عدد البعير واحد و هيناديهم و هعطيهم البعير و فرحوا جدا جدا انهم هيقدروا يخرجوا مع رسول الله.

نكمل الحلقة الجايه إن شاء الله 🤍
هذة الحلقات نقلا عن أستاذة نورهان الشيخ "

سيرة_الرسول
الحلقة 192
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

#غزوة_تبوك (ج1)
هنتكلم سوا النهاردة عن آخر غزوة فى حياة رسول الله :(خلاص الوفاة قربت.. صل الله عليك يا سيدى يا رسول الله..)
غزوة تبوك كانت فى سنة 9 هجريا من شهر رجب.. و اتسمت بالاسم ده لأنها كانت فى منطقة تبوك.. و كمان ليها اسم تانى فى القرآن فى سورة التوبة و هو غزوة العسرة و ده بسبب صعوبة الغزوة دى و مشقتها و كمان اتسمت فى السنة "بالفاضحة" لأنها فضحت المنافقين..
طب إيه قصتها الغزوة دى؟ فاكرين غزوة مؤتة لما انتصرنا على الرومان..فدلوقتى الرومان عايزين ينتقموا فهيجهزوا جيش من 40 ألف مقاتل ..

و هتوصل الأخبار للنبى صل الله عليه و سلم و هيخرج طبعا لمواجهتهم و هيكون معاه 30 ألف مقاتل من المسلمين و مش هيستنى لحظة.. و هيخرج بسرعة عشان الرومان مايهجموش على المسلمين فى المدينة ..
الغزوة دى كانت صعبة جدا ..لأن كانت المسافة بين المدينة و تبوك حوالى 1000 كيلو .. المسلمين كان معاهم بعير بس كان عددهم قليل فكان كل تلاتة من المسلمين بيتعاقبوا على بعير واحد .. كل واحد يركب شوية .. كمان كانت الغزوة فى أغسطس فى عز حر الصحراء..

و كمان يوم خروج المسلمين لغزوة تبوك كان قبل موسم الحصاد فى المدينة ب 4 أيام بس .. والمدينة بلد زراعى يعنى معتمدين على الزرع فكان خروج الصحابة للغزوة إختبار من ربنا كبير لأن هيبقى عندهم صراع داخلى مابين انى أطيع النبى و أخرج للغزوة قبل الحصاد ب4 أيام .. ولا أتخلف عن النبى و مطلعش الغزوة دى و أستنى موسم الحصاد عشان أجمع فلوس وأجيب أكل لعيالى؟
و طبعا مينفعش النبى يستنى لمدة 4 أيام و يخرج بعد موسم الحصاد .. عشان كده ممكن الرومان يدخلوا المدينة فى أى لحظة و يقضوا على المسلمين بكل سهولة فكان لازم النبى يخرج بجيشه برا المدينة..

فالمسلمين هيخرجوا مع النبى و من غير طعام ..يدوب كل واحد هيخرج و فى جيبه شوية تمر .. لدرجة ان الصحابى كان يمص التمرة عشان تفضل معاه فترة أطول و كان يشرب حبة ماية و بس .. شايفين أد إيه الصحابة تعبوا !! كل ده عشان أنا وإنتو نعرف ربنا ونقدر نعيش فى سلام نفسى ..

طيب نكمل كلامنا عن النبى عليه الصلاة و السلام انه قرر يستعد لمواجهة جيش الرومان ..فبدأ يجهز جيش المسلمين ..فيقف النبى عليه الصلاة و السلام على المنبر ويقول "من يجهز جيش العسرة"؟ و تبدأ روعة الصحابة تظهر و مواقفهم الرائعة ماهم طبعا تربية النبى عليه الصلاة و السلام.. فيرد على النبى سيدنا عثمان و يقف و يقول: أنا أمد الجيش ب100 بعير بأحلاسها وأقطابها (يعنى بالأكل والسلاح بتاعها) فالنبى يبتسم و يهز راسه و يشكر عثمان..

و يقف النبى من تانى ويسأل "من يجهز جيش العسرة" ويقف سيدنا عثمان من تانى و يقول أمد الجيش ب200 بعير بأحلاسها وأقطابها.. فالنبى يبتسم لسيدنا عثمان و يشكره.. وللمرة التالتة يقف النبى ويسأل.. فيقف سيدنا عثمان ويقول أمد الجيش ب300 بعير بأحلاسها وأقطابها.. فيبتسم النبى ويقول : ما ضر عثمان ما فعله (يعنى مهما عمل سيدنا عثمان مغفور له.. بسبب العمل الصالح ده .. يعنى خلاص وجبت له الجنة رضى الله عنه وأرضاه ) ..

نكمل بكرة إن شاء الله🤍

سيرة_الرسول
الحلقة 191
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

تلخيص غزوة تبوك ...

عشان نقدر نستوعب الغزوات سوا.. فإحنا اتفقنا أننا هننزل بوست يبقى فيها تفاصيل كل غزوة فى نقاط مختصرة و كمان أسبابها .. و بعدين هننزل يوميا بتفاصيل الغزوة كلها على حلقات بإذن الله
#غزوة_تبوك
1- التوقيت : سنة 9 هجريا من شهر رجب
2- سميت بهذا الاسم:
كانت فى موقعة تبوك.. و ليها اسم تانى اتذكر فى القرآن "غزوة العسرة" و ده لصعوبة ظروفها و مشقتها...و كمان الناس سموها بغزوة "الفاضحة" لأنها فضحت المنافقين و هنعرف إزاى بعد كده..
3- طرفى القتال : الرومان و المسلمين
4- أسباب الغزوة :
وصلت أخبار للمسلمين أن الرومان حضروا عدد كبير جدا من الجنود وهو 40,000 مقاتل للقضاء على المسلمين.

5- أحداث الغزوة :
- النبى عليه الصلاة و السلام هيخرج للقتال لانه لو مخرجش هم هيهاجموه جوه المدينة. النبى خرج بالفعل ومعاه 30,000 مقاتل ..

- المسافة بين المدينة و تبوك حوالى 1000 كيلو، والمسلمين كان معاهم بعير للركوب، وكل 3 يتعاقبون على بعير.. وقتها كانوا فى شهر أغسطس فى عز الحر فى الصحرا.

- هيخرج المسلمين بلا طعام، يدوب التمر و الماء لانهم خرجوا قبل موسم الحصاد فمكنش فيه أكل..لدرجة ان كان الصحابى يمص التمرة عشان تفضل معاه فترة أطول.

- هيتخلف عن المعركة بعض الصحابة عن رسول الله و لكن ربنا هيتوب عليهم و هيكرمهم بنزول الآيات عشانهم.

-هيتخلف المنافقين عن المعركة و هيقدموا الأعذار.

-وصل المسلمين لمنطقة تبوك بعد مسافة طويلة قطعوها فى 50 يوم فى عز الحر و العطش .. و ملاقوش جيش الرومان .. لأن الرومان لما عرفوا ان المسلمين استعدوا بسرعة للقتال فخافوا وانسحبوا.. وبكدة خلاص مفيش معركة.

- غزوة تبوك كانت آخر غزوة فى حياة النبى عليه الصلاة و السلام.. و دى تعتبر إختبار للصحابة و لتصفية جيش المسلمين من المنافقين.

و التفاصيل فى الحلقات الجاية إن شاء الله 🤍

سيرة_الرسول
الحلقة 190
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

#غزوة_حُنين (ج6 و الأخير)
قال ﷺ يا معشر الأنصار والله لو سَلَك الأنصار طريقا و سلك الناس طريقا لسلكت طريق الأنصار ♡

شفنا امبارح النبى عليه الصلاة و السلام و هو بيوزع الغنائم و شفنا الأنصار وهم زعلانين جداً ان النبى مداهمش حاجة.. فيروح سعد بن عبادة "واحد من الأنصار" للنبى و يقول له : يا رسول الله الأنصار بيقولوا كذا وكذا.. فالنبى يرد عليه و يقول: و ما رأيك فيما يقولون يا سعد؟ فيقول له: أنا واحد من قومى.. فيطلب النبى عليه الصلاة و السلام من سعد أنه يجمع الأنصار.. كأنه إجتماع مغلق مش هيكون فيه أى حد غير الأنصار وبس..

تعالوا بقى كده نشوف سوا جمال النبى .. النبى هيدخل و يقول لهم : " يا معشر الأنصار بلغنى أنكم تقولوا وجد رسول الله أهله !! أحقا قلتم ذلك يا معشر الأنصار ؟! "فالأنصار خفضوا رؤسهم و قالوا: نعم يا رسول الله ..فالنبى سألهم : يامعشر الانصار أفلم تكونوا غير مسلمين فهداكم الله بى ؟ فردوا و قالوا: لله و لرسوله المنَّة والفضل..و يسألهم النبى تانى: ألم تكونوا متفرقين فألَّف الله بين قلوبكم بى ؟؟ فيرد الأنصار: نعم لله و لرسوله المنة والفضل .. و يقول لهم النبى: ألم تكونوا فى مرض و شفاكم الله بى؟ ألم تكونوا فقراء فأغناكم الله بى ؟ فقالوا: لله ولرسوله المنة والفضل ..

فالنبى يروح قايل: أيها الانصار إن شئتم لرددتم علي ما أقول(يعنى قولوا فضلكم عليا ) فقالوا له :و ما نقول يا رسول الله ؟ فقال النبى : قولوا و أنت أيضا جئتنا طريدا فآويناك .. جئتنا فقيرا فأغنيناك .. وجئتنا مكذبا فصدقناك وجئتنا حزينا فواسيناك.. فبكى الأنصار و بسرعة قالوا: لا لن نقول أبدا بل لله و لرسوله المنة والفضل .. فقال النبى: يا معشر الأنصار أغضبتم أن ألفت قلوب قوما أسلموا حديثا بالمال!! أيها الأنصار أما ترضون أن يرجع الناس إلى ديارهم بالشاة والبعير و الأموال والإبل وترجعون أيها الأنصار بالله و رسوله؟!

فيبكى الأنصار و فى نفس واحد يقولوا: رضينا برسول الله قسما و نصيبا .. فقال النبى عليه الصلاة و السلام: يا معشر الأنصار والله لو سلك الأنصار طريقا و سلك الناس طريقا لسلكت طريق الأنصار .. الأنصار شعار و الناس دثار (الدثار هو الرداء الخارجى أما الشعار هو البطانة بتاعت الهدوم يعنى يقصد انهم ستره ..هم أهله الحقيقين و الأقرب له من أى حد) ..

و يكمل النبى كلامه و يقول : ولولا إنى مهاجرى لوددت أن أكون من الأنصار .. فاللهم من أحب الأنصار فقد أحبنى و من أبغض الانصار فقد أبغضنى .. صل الله على محمد .. صل الله عليه وسلم .. جميل يا رسول الله و بكده قدر النبى يراضى الأنصار ..

خلصت أحداث غروة حنين و بعدها هيجى واحد يسلم بين إيد النبى.. مين ده ؟؟ ده كعب بن زهير .. كعب كان شاعر و كان بيهجو زمان النبى .. وأول ما يدخل على النبى فيحط النبى إيده فى إيده كأنه عارفه .. فكعب بن زهير يقول له : يا رسول الله أنا كعب بن زهير جئتك تائبا فهل أنت قابل منى .. فالنبى يقوله : نعم .. فينطق كعب الشهادتين ويسلم ويقول قصيدة جميلة للنبى .. آخر بيت فيها بيقول..إنَّ الرَّسُولَ لَنورٌ يُسْتَضاءُ بِهِ، مُهَنَّدٌ مِنْ سُيوفِ اللهِ مَسْلُولُ.. والنبى يفرح بيه و يشاور للصحابة عشان يسمعوه..

طيب بعد غزوة حنين تيجى قبيلة اسمها طيئ .. القبيلة دى كانت عايزة تحارب النبى عليه الصلاة و السلام و القائد بتاعها اسمه عدى بن حاتم و هو كان نصرانى ..فالنبى يبعت لهم سرية (يعنى جيش صغير مش بقيادة النبى) و بعت النبى السرية عشان ما ميهجموش على المدينة ، فخاف عدى و هرب و ساب اخته اسمها "سفّانة بنت حاتِم " و تبقى من ضمن أسرى المسلمين و من معاملة المسلمين هتسلم.. و النبى هيعتقها و تمشى سفانة.. و تقابل أخوها عدى و تحكى له عن النبى و عن المسلمين وأخلاقهم فهيشرح الله صدر عدى و هيسلم..

بعد كده بدأ النبى يبعت الصحابة للبلاد اللى لسه فيها أصنام.. زى اليمن كان فيها قبيلة اسمها دوس و عندهم صنم اسمه" ذات الكفين" فالنبى يبعت لهم الطفيل بن عمرو و ده كان مسلم و كان هو و أهله من قبيلة دوس برده فيروح و يهد الصنم..

نكمل المرة الجاية إن شاء الله🤍

@

سيرة_الرسول
الحلقة 189
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_حُنين (ج5)
الحمد لله انتصر المسلمين .. صحيح النصر ماكنش سهل .. بس الحمد لله ربنا نصرهم و فى نفس الوقت إدى المسلمين درس عمرهم ما هينسوه .. بس قائد المسلمين تعبان .. مين ؟ سيدنا خالد بن الوليد .. فيسأل النبى عليه ويعرف أنه تعبان وفى خيمته فالنبى عليه الصلاة و السلام يروح له ويمسح على جرحه و يدعى له .. فيقول سيدنا خالد : ففتحت عينى وبمجرد ما النبى وقف دعاء .. قمت ركبت فرسى وكأن مفيش حاجه حصلت ..سبحان الله.

وقلنا المرة اللى فاتت أن هوازن وثقيف هربوا من أرض المعركة .. وراحوا على منطقة الطائف يتحصنوا فى حصن هناك .. فهيبدأ النبى يتوجه بجيشه للطائف.. عشان يحاصر هوازن و ثقيف.. عشان يتفادى انهم يحاربوا المسلمين تانى.. و يستمر الحصار لمدة 40 يوم.. و يفك النبى الحصار..و يرجع النبى عليه الصلاة و السلام لمكان اسمه الجعرانة ..ده جنب حنين ..و فيه اتحطت كل غنائم غزوة حنين.. و يبدأ النبى عليه الصلاة و السلام بتوزيع الغنائم.. هتتوزع الغنائم إزاى ؟

النبى عليه الصلاة و السلام هيعطى مسلمين قريش الجدد اللى أسلموا بعد الفتح و دول اتسموا بالمؤلفة قلوبهم لأنهم كانوا من سادات قريش ..فالنبى كان عايز يفهمهم ان مش معنى انكم أسلمتم يبقى هتروح مكانتكم.. لا بالعكس هعطيكم أموال و هتفضلوا معززين مكرمين.. فالنبى عليه الصلاة و السلام أعطى لهم غنائم بسخاء عشان يألف قلبهم..

خلص رسول الله توزيع الغنائم.. بس فى مجموعة ما أخدتش.. مين دول؟؟ الأنصار.. الأنصار مش هياخدوا غنائم.. و هيزعلوا أوى بس ده مش طمع فى الغنائم أبدا.. الأنصار تاريخهم معروف.. لكن هيحسوا ان النبى بيوزع على ناس كتير من مكة و بيعطيهم بسخاء و هيقوم واحد منهم يقول : وجد رسول الله أهله... (عشان النبى من مكة ) و يحزن الأنصار حزن شديد و ياخدوا بعضهم و يروحوا يقعدوا فى حتة بعيدة .. زعلانين.. مش عايزين يكلموا حد.. طب و بعدين ؟ هيحصل إيه ؟

هنعرف المرة الجاية إن شاء الله🤍

سيرة_الرسول
الحلقة 188
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_حنين (ج4)
قال تعالى: " سَأُلْقِي فِي قُلُوبِ الَّذِينَ كَفَرُوا الرُّعبْ "

شفنا المرة اللي فاتت الكارثة اللي اتعرض لها المسلمين .. وحصل فزع وجري فى أرض المعركة ويقف النبي عليه الصلاة والسلام لوحده وينادي عشان يجمع المسلمين وينادي معاه العباس ويقولوا: يا أصحاب الشجرة يا أصحاب الحديبية.. وفعلًا هيبدأ الصحابة يتجمعوا حوالين النبي من تاني .. حوالي 1000 ويزيدوا لحد ما يتجمع 3000 .. طب وبعدين ؟؟ هيبدأ القتال بثبات لدرجة إن السيوف بقت تتكسر من قوة القتال وفي وسط الدوشة دي كلها.. يحصل خيانة .. إزاي؟
يجي واحد من المسلمين الجدد اللي لسة مش ثابتين على دينهم اسمه شيبة بن عثمان بن أبى طلحة.. ويقوم جاي من ورا النبي بخنجر ولسة هيقتله.. يقوم النبي لافف له وطبعا إحنا عارفين إن من خواص النبي إنه كان بيشوف من ضهره (معجزة).. فيلف له النبي ويقول له: ما بك يا شيبة ؟!! فشيبة يتخض والخنجر يقع من إيده.. والنبي يقول له: يا شيبة أريد بك الخير وتريد لنفسك الشر.. لا تفعل يا شيبة.. اتق الله يا شيبة.. (حبيبي يا رسول الله حتى فى عز القتال يا رسول الله ..بتصبر على الناس تنصحهم وترحمهم؟! أيوة لأن هي دي رسالة النبي وهي دي أخلاقه صل الله عليه وسلم ) .
فيقول شيبة : والله قبل هذه الكلمات كان محمد أبغض أهل الأرض إليّ ولكن بعدها أصبح أحب أهل الأرض إليّ.. ويتوب شيبة وينطق الشهادة من قلبه.. طيب دلوقتي المسلمين لسة بيحاربوا بقوة ..و تبدأ بشرى النصر ..وينزل قول الله تعالى : " ثُمَّ أَنزَلَ اللَّهُ سَكِينَتَهُ عَلَىٰ رَسُولِهِ وَعَلَى الْمُؤْمِنِينَ وَأَنزَلَ جُنُودًا لَّمْ تَرَوْهَا وَعَذَّبَ الَّذِينَ كَفَرُوا ۚ وَذَٰلِكَ جَزَاءُ الْكَافِرِينَ " [سورة التوبة]ْ.
ويبدأ المشركين يشوفوا سيوف بتطاير.. أصل الملائكة بتحارب.. ويتفزع المشركين.. وفى لحظات يهرب المشركين من أرض المعركة .. طب ده معقول دول 25 ألف مقاتل من الكفار.. معقول يهربوا!! بعد ما كانوا منتصرين!! بصوا ما تسألوش عن الأسباب المادية.. قال تعالى : " وَمَا النَّصْرُ إِلَّا مِنْ عِندِ اللَّهِ الْعَزِيزِ الْحَكِيم " [سورة الِ عمران ] .. وقال تعالى: " سَأُلْقِي فِي قُلُوبِ الَّذِينَ كَفَرُوا الرُّعب " [ سورة الأنفال ]ْ

ويهرب قائد الكفار اللي اسمه مالك بن عوف ويبعت النبي عليه الصلاة والسلام سريّة بقيادة صحابي اسمه أبو عامر الأشعرى .. ومعاه ابن أخوه الصحابي أبو موسى الأشعري عشان يتتبعوا الكفار اللى هربوا .. لكن واحد من جيش الكفار ضرب الصحابي أبو عامر بسهم فى رجله وبدأ ينزف للأسف .. ويجري أبو موسى الأشعري ورا الكافر ده ويبارزه ويقتله..

و يرجع تاني ل أبو عامر بس للأسف يلاقيه خلاص بيموت فيطلب من أبو موسى أن يبلغ النبي منه السلام ويطلب أن النبي يستغفر له.. ويموت أبو عامر شهيد.. ويرجع أبو موسى الأشعري ويحكى للنبي اللي حصل... ويبكي النبي ويدعي لأبو عامر ويستغفر له.. وانتصر المسلمون والحمد لله.

نكمل الحلقة الجاية إن شاء الله🤍

سيرة_الرسول
الحلقة 187
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_حُنين (ج3)
يقول ﷺ حين يصبح و يمسى: ربنا لا تكلني إلى نفسي طَرفة عين.

شفنا المرة اللى فاتت خطأ فادح حصل من المسلمين و هو إعجابهم بنفسهم.. و وثقوا بزيادة فى تجهيزات المعركة و عددهم الكبير.. و لكن نسوا أن من لم يتوكل على الله، أوكله الله إلى نفسه..يعنى مدام انت شايف نفسك انك قوى ..إذن خلاص واجه الحياة بقوتك..لكن طبعا مين يقدر على كده!!! الإنسان ضعيف أوى.. فاللهم ربنا لا تكلنا إلى أنفسنا طرفة عين.. ده دعاء النبى عليه الصلاة والسلام علمهولنا .. المهم ان بسبب إعجاب المسلمين بنفسهم حصل تراخى فى مواجهة العدو.. ودخلوا على منطقة حنين.. وبدأ المسلمين يعدو على دفعات زى ما النبى عليه الصلاة والسلام أمر عشان لو فى كمين الكفار عاملينه .. يبان مع أول دفعة..

فعدت كتيبة المسلمين الأولى وإيه اللى هيحصل؟ بدأت تخرج كمائن العدو من كل مكان و اتفزع الصحابة وجيش الكفار بدأ يقتل بعنف و بقسوة غير طبيعية.. والصحابة ارتبكوا فبقوا عايزين يرجعوا و يطلعوا على منحدر صغير.. لكن ناس من المسلمين كانوا نازلين لسة و مش عارفين اللى بيحصل .. فدول طالعين و دول نازلين و وسط الإرتباك و فزع الخيول.. الكل داس على بعضه ..

و سيدنا خالد بن الوليد أصيب بجروح شديدة من كتر القتال و كان ده لازم يحصل عشان يبقى درس يزلزل المسلمين.. عشان يعلمهم نتيجة الإعجاب بالنفس و نسيان ان التوفيق من عند الله و بس.. درس مكنش ينفع ياخدوه فى خطبة أو بكلمة من النبى عليه الصلاة و السلام.. كان لازم تحصل كارثة تفوقكم يا مسلمين و ينزل قول الله تعالى: " لَقَدْ نَصَرَكُمُ اللَّهُ فِي مَوَاطِنَ كَثِيرَةٍ ۙ وَيَوْمَ حُنَيْنٍ ۙ إِذْ أَعْجَبَتْكُمْ كَثْرَتُكُمْ فَلَمْ تُغْنِ عَنكُمْ شَيْئًا وَضَاقَتْ عَلَيْكُمُ الْأَرْضُ بِمَا رَحُبَتْ ثُمَّ وَلَّيْتُم مُّدْبِرِينَ .. " [ سورة التوبة ]

المسلمين بدأوا يجروا و يسيبوا أرض المعركة.. و مسلمين تانيين مش عارفين يلاحقوا على القتال من هنا و من هنا.. و فجأة النبى عليه الصلاة و السلام يلاقى نفسه لوحده فى أرض المعركة ..فبقى النبى عليه الصلاة و السلام عايز يجمع المسلمين من تانى.. فيقوم النبى بمنتهى الشجاعة يقول : "أيها الناس.. أنا النبى لا كذب.. أنا ابن عبد المطلب " .. طبعا ده شئ خطير جدا و مجازفة كبيرة لأن النبى كده حدد مكانه فى أرض المعركة.. فالكفار كده هيعرفوا مكانه و هيهجموا عليه و يقتلوه.. بس الموقف كان شديد و النبى شجاع ..قرر يعلن عن نفسه عشان يثبت المسلمين..

و يسمعه سيدنا العباس و يجرى عليه و يقول له: لبيك لبيك ..بأبى أنت وأمى يا رسول الله.. و يبدأ النبى يطلب من العباس انه يجمع الناس .. طب هتخلى العباس ينادى على 12 ألف جندى؟ لا النبى هيخص النداء لناس معينة .. فيبدأ العباس ينادى و يقول :يا أصحاب الشجرة.. يا أصحاب بيعة الرضوان.. يا أصحاب صلح الحديبية .. ( بيفكرهم بوعودهم و المواقف اللى ثبتوا فيها زمان و نصروا النبى).. طب الناس اللى حضرت المواقف دى كتير؟ لأ.. اللى حضروا الأحداث دى زمان كانوا 1400 مسلم تقريبا .. لكن الواحد منهم ب100 مقاتل ولو ثبتوا الباقى هيثبت.. عارفين ليه.. عشان ربنا قال عنهم .. قال تعالى: " لَّقَدْ رَضِيَ اللَّهُ عَنِ الْمُؤْمِنِينَ إِذْ يُبَايِعُونَكَ تَحْتَ الشَّجَرَةِ فَعَلِمَ مَا فِي قُلُوبِهِمْ فَأَنزَلَ السَّكِينَةَ عَلَيْهِمْ وَأَثَابَهُمْ فَتْحًا قَرِيبًا.." [ سورة الفتح ] ..
طيب هيستجيب المسلمين للنداءات ؟ طبعا ♡

هنعرف التفاصيل بكرة إن شاء الله🤍

سيرة_الرسول
الحلقة 186
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_حُنين (ج2)
مهما كانت شطارتك.. اعرف أنك ولا حاجة من غير توفيق ربنا

عرفنا المرة اللى فاتت ان قبيلة هوازن وثقيف جهزوا نفسهم لقتال المسلمين .. والنبى عليه الصلاة والسلام وصلت له الأخبار و جهز جيش ب 12 ألف مقاتل و كمان بدأ يجهز الجيش على أعلى مستوى من السلاح و هيأجر أسلحة من صفوان بن أمية و نوفل بن الحارث و كمان هياخدهم معاه عشان يحرسوا أسلحتهم .. اهتم النبى كمان بالحراسة الليلية و حط عليها صحابى اسمه أنس بن أبى مرثد..

و من قيادات جيش المسلمين فى الغزوة دى كان خالد بن الوليد و الزبير بن العوام و سعد بن أبى و قاص.. و دول قيادات على مستوى عالى من الخبرة الحربية..فالنبى عليه الصلاة و السلام مجهز الجيش تجهيز تام.. بس للأسف هتبدأ تحصل مشكلة كبيرة لجيش المسلمين... هى الإعجاب بالنفس.. إزاى؟

أصل أثناء مسيرة جيش المسلمين ..قام طلع واحد من المسلمين من اللى هم حديثى الإسلام اللى أسلموا بعد فتح مكة و قال " لن نغلب اليوم من قلة" يعنى إيه ؟؟ يعنى إحنا عددنا كبير استحالة نتهزم.. و لسه مكة مفتوحة و معانا سلاح كتير... و للأسف بسرعة الجملة دى انتشرت فى الجيش و انتشرت معاها حالة الثقة بالنفس و التعلق بالأسباب..و نسيوا يستشعروا ان التوفيق من عند الله..أصل مهما كانت قوتك و شطارتك إوعى تعتمد عليهم.. لان أنت من غير توفيق ربنا ..اعرف إنك ولا حاجة.

المهم كانت نتيجة إعجاب بعض المسلمين بنفسهم .. ان حصل تراخى فى جيش المسلمين و المسافة اللى المفروض تتقطع فى يوم مثلا .. قطعوها للأسف فى أكتر من كذا يوم .. فوصل جيش المسلمين وكانت النتيجة الأسوأ ان جيش الكفار عسكر فى مكان اختاروه بمنتهى الخبث .. إيه المكان ده ؟ المكان اسمه حنين.. و ده مكان سىء جدا مليان وديان و منحدرات و أرضه مش مستوية و مليان أماكن مستخبية ورا الجبال و دى طبعا هيستغلها العدو عشان تبقى كمائن له.
فبعت النبى واحد من الصحابة عشان يشوف فى كمائن ولا لأ بس للأسف رجع الصحابى للنبى وقال له : مفيش كمائن ..و كان ده طبعا مش صح.. بس النبى كان قلقان.. فبعد ما وصل الجيش و عسكر فى حنين.. بدأ النبى عليه الصلاة و السلام يديهم تعليمات انهم ينزلوا على دفعات عشان لو فى كمين فيقدروا يتكشفوه .. وفعلا تعدى أول دفعه بقيادة خالد بن الوليد.
وللأسف هيطلع الكفار من الكمائن وهيهجم عليهم .. بس يا ترى المسلمين هيواجهوا ده إزاى ؟

هنعرف المرة الجاية إن شاء الله 🤍

سيرة_الرسول
الحلقة 185
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

#غزوة_حُنين (ج1)

خلاص فتح النبى مكة ..إحنا دلوقتى سنة 8 هجريا، يعني بقالك يا رسول الله 21 سنة جهاد يا رسول الله.. و بعد فتح مكة فضل النبى فى مكة لمدة 19 يوم بالظبط.. هيحصل إيه؟ هيحصل.. غزوة حُنين.. هتيجى قبيلة هوازن و قبيلة ثقيف ومعاها عدد كبير من القبائل عشان يحاربوا المسلمين و يقتلوا النبى .. فالقبائل الكافرة دى هتجمع 20 ألف مقاتل بقيادة واحد اسمه مالك بن عوف وبدأ يستعد للخروج لمحاربة المسلمين ..

بس مالك بن عوف هيعمل خطة فى منتهى الخبث لكن ماكنش يعرف ان الخطة دى هتبقى فى مصلحة المسلمين ..
إيه الخطة؟ جمع جيشه من الرجال وأمرهم أنهم يخرجوا بنسائهم وأطفالهم و أموالهم و ممتلكاتهم حتى الإبل و الخيول .. طب ليه عمل كده ؟ أصل مالك متأكد من قوة جيش المسلمين .. و بخطته دى كأنه بيقول لجيشه لو هربتوا هتسيبوا أموالكم ونساءكم و أطفالكم وخيولكم للمسلمين فالأحسن ما تهربوش..و اثبتوا.. بس سبحان الله كانت النتيجة فى صالح المسلمين.. لأن المسلمين هينتصروا و كأن مالك جهز للمسلمين غنائم المعركة على طبق من دهب.. و بسهولة..

بدأت الأخبار توصل للنبى عليه الصلاة و السلام بتجهيزات هوازن وثقيف للقتال .. فبدأ النبى يجهز جيش المسلمين لمواجهة العدو ده.. هيخرج النبى ب12000 جندى منهم 10 آلاف مقاتل اللى كانوا معاه فى فتح مكة و كمان 2000 من المسلمين الجدد اللى أسلموا جديد بعد فتح مكة.. طب ليه يا رسول الله هتاخد معاك من المسلمين الجدد ؟؟ لأنهم ممكن لو كان سابهم فى مكة .. كانوا يرجعوا تانى للكفر بإن حد يهز دينهم.. طيب هيخرج النبى بسرعة من مكة و هيحارب العدو بره مكة ؟ طب ليه؟ لأن ممكن المسلمين الجدد اللى لسه إسلامهم ما تثبتش يتفقوا مع هوازن وثقيف و يحاوطوا النبى جوة مكة فالأمان الأكتر ان الحرب تبقى برة مكة ....

طب إيه التجهيزات اللى النبى هيجهز بيها جيش المسلمين ..ويا ترى النصر هيكون سهل ولا صعب؟؟

هنعرف المرة الجاية إن شاء الله 🤍
هذة الحلقات نقلا عن أستاذة نورهان الشيخ "

سيرة_الرسول
الحلقة 184
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

تلخيص غزوة حنين

عشان نقدر نستوعب الغزوات سوا.. فاحنا اتفقنا اننا هننزل بوست يبقى فيها تفاصيل كل غزوة فى نقاط مختصرة و كمان أسبابها .. و بعدين هننزل يوميا بتفاصيل الغزوة كلها على حلقات بإذن الله♡

#غزوة_حُنَين
1- التوقيت: حدثت سنة 8 هجريا..
2- سميت بهذا الاسم :
لأن المعركة كانت فى منطقة اسمها حنين.

3- طرفي القتال :
الطرف الأول..قبيلة هوازن و ثقيف الكافرة 25 ألف مقاتل..
الطرف التانى..المسلمين 12 ألف جندى.

4- أسباب الغزوة :
اتجمعت قبيلة هوازن و ثقيف الكافرة عشان يحاربوا النبى عليه الصلاة و السلام بعد انتصاره فى فتح مكة ..

أحداث الغزوة :
- اتجمعت قبيلة هوازن وقبيلة ثقيف بجيش قوى من 25 ألف مقاتل .

- وصلت الأخبار للنبى صل الله عليه و سلم
و كان لسة فى مكة.. و هيخرج معاه 12 ألف مقاتل.. 10 آلاف مسلم من اللى فتحوا معاه مكة و معاهم 2000 مقاتل من مسلمين مكة الجدد..

- هيجهز النبى عليه الصلاة و السلام الجيش ماديا بعدد كبير و أسلحة كتيرة و هيأجر سلاح من واحد اسمه صفوان بن أُمية ..

- بسبب التجهيزات المتميزة لجيش المسلمين.. هيحصل شئ مؤسف جدا و هو ان بعض المسلمين اتغروا بالأسلحة و العدد الكبير.. و هيحصل إعجاب بالنفس..و بسبب ده هيحصل تقصير فى حماس الجيش فى مواجهة العدو..

- دخل المسلمين أرض المعركة و كان العدو أخد مواقع القتال و عمل كمائن و عملوا خطة فى منتهى الخبث و هجموا على المسلمين..

- اشتد القتال و الذعر و النبى وقف فى نص المعركة ينادى بصوت عالى عشان يلم المسلمين من تانى و يقول " أنا محمد لا كذب ..أنا ابن عبد المطلب " و يتلم الجيش حوالين النبى و يتحمس من جديد و يجتهد فى القتال..

- اتقلبت الموازين و تظهر بشاير إنتصار المسلمين و ينزل الله الملائكة و تحارب مع المسلمين.. و تحصل أحداث مهمة و مؤثرة جدا فى نص المعركة.

هنعرفها بالتفصيل المرات الجايه إن شاء الله🤍

سيرة_الرسول
الحلقة 183
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة(ج12والأخير)
فى قصة جميلة حصلت وقت فتح مكة ناس كتير أسلمت و ناس النبى عليه الصلاة و السلام عفا عنها..و وسط ما النبىﷺ مشغول كده.. فيشوف من بعيد سيدة عجوزة أوى بتتعكز كده على عصاية فابتسم لها النبى عليه الصلاة والسلام وبدأ يشاور لها يعنى بيقول لها تعالي تعالي، و جت المرأة و كان النبى ﷺ لابس وشاح على كتفه ،قام فارشه على الأرض.. و قعد يتكلم معاها و يسألها عن أحوالها.. طيب هى مين الست دي؟ دي صاحبة السيدة خديجة رضي الله عنها. تخيلوا يا جماعة دي خديجة ماتت من 10 سنين و لسه فاكرها..النبى عليه الصلاة والسلام هو اللي علم البشرية الوفاء ♡

فالنبى كان قاعد مع المرأة العجوز و بيتكلم معاها بس مين كانت واقفة و متضايقة ؟ السيدة عائشة طبعاً.. فبعد ما النبى ﷺ رجع قالت له: من هذه السيدة يا رسول الله؟ فقال النبىﷺ : يا عائشة هذه السيدة صاحبة خديجة..فقالت له: و فيم كنتم تتكلمون؟ فقال: يا عائشة كنا نتذكر أيام خديجة ..شوفتوا وفاء النبى صل الله عليه وسلم !!.. سنين و لسه النبى ﷺ فاكرها..

فى واحد كمان من كفار مكة اسمه هبار بن الأسود فاكرينه ؟ ده اللى خرج وراء السيدة زينب (بنت النبىﷺ ) لما خرجت فى عز النهار علشان تهاجر للنبىﷺ من مكة للمدينة .. فمشى وراها هبار بن الأسود و لحقها و فضل يضرب ناقة زينب كذا مرة علشان يوقع زينب .. أصل عيب عند العرب أن الرجل يقتل امرأة فعلشان كده هبار لجأ لفكرة ضرب الناقة دى.. و فضل يضرب لحد ما الناقة خافت و جريت بسرعة شديدة فوقعت السيدة زينب من فوق الناقة و كانت زينب حامل و جالها نزيف جامد جدا و حصل إجهاض.. و مين لحقتها؟ هند بنت عتبة و كانت ساعتها كافرة.. بس كان عندها إنسانية..
فالنبى ﷺ بعت لحد يجيب زينب من مكة.. و لما النبىﷺ شافها بكى بكاء شديد على حالة زينب .. و بعدين فضل الجرح مأثر على زينب لمدة كذا شهر و بعدين ماتت..و حزن الرسول عليه الصلاة والسلام عليها وقال: من رأى هبار بن الأسود فليحرقنه بالنار بس النبى ﷺ قال كده من حرقة قلبه على بنته.. بس لما هدى عليه الصلاة والسلام قام قايل " أيها الناس إنى أمرتكم أنه من رأى هبار بن الأسود فليحرقه بالنار، وإنه لا يحرق بالنار إلا رب النار، ولكن من رأى منكم هبار بن الأسود فليقتله" ( و ده طبعا قصاص ) .

فلما فتح النبى عليه الصلاة و السلام مكة .. فهبار بن الأسود كان عارف أن المسلمين هيقتصوا منه ..فحاول يتخفى .. بس فضل هبار يدور على النبى عليه الصلاة والسلام لحد ما عرف مكانه و وراح له، و أول ما وقف قدامه كشف اللثام عن وجهه ..فقال هبار :يا محمد! أنا هبار بن الأسود..فالنبىﷺ اتخض و افتكره و افتكر اللى قتل زينب بنته حبيبته رضى الله عنها..فبسرعة قال هبار: اعف عني يا رسول الله فيرد النبي صل الله عليه وسلم: عفوت عنك ..و من عفو و سماحة النبىﷺ أسلم هبار بن الأسود ..ويتحول هبار من كافر لصحابى و بقى يروى أحاديث كمان ♡

نكمل بكرة إن شاء الله 🤍

سيرة_الرسول
الحلقة 182
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة (ج11)
فأسلم صفوان و قال لقومه: إن محمداً يعطى عطاء من لا يخشى الفقر.

نكمل كلامنا النهاردة بعد ما اتفتحت مكة و شفنا عفو النبى عليه الصلاة و السلام عن كفار مكة و شفنا نماذج من بعض الكفار اللى أسلموا .. و شفنا إن فى 6 أشخاص بس النبىﷺ أهدر دمهم لأنهم مجرمين حرب..و ده بيحصل على فكرة عالمياً لحد دلوقتى. المهم من 6 دول فى ناس طلبوا الأمان من النبىﷺ و النبى أمنهم.. و منهم اتنين كانوا من قرايب واحدة اسمها أم هانيء بنت أبى طالب.. دى تبقى أخت سيدنا علي بن أبى طالب..
المهم خبطوا على بيت أم هانئ علشان يدخلوا فى حمايتها و ماحدش يتعرض لهم..فالمهم دخلتهم بيتها و خرجت و قالت : هم فى حمايتى.. فسيدنا علي قال لها أن ما ينفعش الست يدخل فى حمايتها حد ،و قال منذ متى تجير النساء!! الست ماعندهاش الحق ده ( كان زمان فى حاجة اسمها حق الإجارة .. يعنى تقول فلان فى حمايتى بالظبط زى حق اللجوء السياسى بس ماكانش من حق النساء ) بس لما أم هانئ سمعت كده قامت رايحة للنبى عليه الصلاة و السلام و قالت هذان الرجلان فى حمايتى يا رسول الله ... فقال النبىﷺ : أجرنا من أجرتي يا أم هانئ، ومن هنا أعطى النبى للمرأة حق اللجوء السياسى .. شايفين بقى حقوق المرأة.. اللى أصلاً حق اللجوء ده مش من حقها دلوقتى.. الإسلام هو اللى عمل للمرأة حقوق..و لكن بيتوه الدين وسط جهل الناس بالدين الإسلامى الصحيح..دين سيدنا محمد صل الله عليه و سلم..
مين كمان أسلم من كفار قريش واحد اسمه سهيل بن عمرو.. فاكرينه؟ ده اللى فى صلح الحديبية زمان رفض أن يتكتب جنب اسم سيدنا محمد ﷺ كلمة رسول الله و النبى ﷺ مسالم وافق و مسح الكلمة بيده الشريفة صل الله عليه و سلم .. أسلم سهيل و اتعرف عنه أنه كان عابد و زاهد ، صوام ، قوام.

هنختم كلامنا عن فتح مكة بإسلام واحد من كفار قريش اسمه صفوان كان أكبر تاجر سلاح و مجرم حرب ، فاكرين زمان بعد غزوة بدر لما قعد واحد اسمه عمير مع صفوان ... و عمير قال: لولا إنى خايف على أولادى لذهبت إلى المدينة و قتلت محمد..فصفوان قال له : عيالك عيالى هتكفل بهم و أربيهم.. بس أنت روح اقتل محمد .. و فعلاً أخذ عمير فرسه و راح المدينة و أول ما وقف قدام النبى ﷺ بدأ النبى يحكى له عن تفاصيل الحوار اللى دار بين عمير و صفوان و اتفاقهم على قتل النبىﷺ..فعمير استغرب أن النبىﷺ عرف كل الحوار و عرف أن ربنا اللى أخبره.. فأسلم عمير و رجع لصفوان و حكى له.. بس صفوان رفض أنه يسلم .. و كمان شارك ضد المسلمين فى غزوة أحد و الأحزاب.
بس بعد فتح مكة صفوان خاف جداً أنه يتقتل.. فكان أهون عليه أنه يموت نفسه بدل ما المسلمين يقتصوا منه.. فيروح فى اتجاه البحر علشان ينتحر.. فيلاقى واحد جاى من بعيد..مين؟ عمير بن وهب..صاحبه القديم ..فعمير لاقى صفوان هيرمى نفسه، فقال له: ويحك ..قد أمّنَك رسول اللهﷺ.. جئتك من عند أبر الناس و أرحم الناس و قد قلت له : يا رسول الله، سيد قومي خرج هاربًا ليقذف نفسه في البحر، و خاف ألّا تُؤَمِّنه، فأمِّنْهُ فداك أبي وأمي. فقال لى رسول الله: "قَدْ أَمَّنْتُهُ" . فخاف صفوان، وقال: لا والله لا أرجع معك حتى تأتيني بعلامةٍ أعرفها..فرجع عمير للنبىﷺ فالنبى قال له : "خُذْ عِمَامَتِي إِلَيْهِ".. و قال: قل لصفوان أنى أدعوه للإسلام و هو فى أمان لمده شهرين حتى يفكر
فلما صفوان بن أمية عرف كده .. وافق يروح للنبى ﷺ مع عمير بن وهب و لاقى النبىﷺ بيصلى بالمسلمين صلاة العصر، وصفوان بدأ يسأل عمير : كم تصلون في اليوم والليلة؟ قال: خمس صلوات. فلما خلص النبى عليه الصلاة و السلام صلاته، فوقف صفوان يكلم النبى ﷺ من فوق الفرس.. و طبعاً ده فيه سوء أدب بس النبىﷺ عند حلم و صبر و تقدير أن صفوان خايف و عايز يدى لنفسه فرصة للهرب .فقال له بهدوء و لين : "انْزِلْ يا صفوان " فقال صفوان: لا والله حتى تبين لي أنى بأمان لمدة شهرين كما أخبرني عمير ..فقام النبى ﷺ قال له "بَلْ لمدة أَرْبَعَةَ أَشْهُرٍ يا صفوان.. و مد النبى ﷺ لصفوان المدة لشهرين زيادة كمان و من حسن معاملة النبى ﷺ و أخلاقه.. هيسلم صفوان فى وقت قصير جداً.. طب إزاي ؟
فى غزوة حنين اللى هنتكلم عنها بالتفصيل الحلقات الجاية .. هيتعرض المسلمين لحرب هتقوم بها قبيلتين ثقيف و هوازن و دول عدد الجيش بتاعهم كان 20 ألف مقاتل ..فالنبى عليه الصلاة و السلام كان محتاج سلاح.. و طبعاً زى ما قلنا أن صفوان تاجر سلاح.. فراح له النبى عليه الصلاة و السلام و قال له : أعطنى سلاح.. بس تفتكروا بقى النبى ﷺ هيقول يا صفوان هات سلاح مقابل انى أديتك الأمان؟ لا طبعا حاشاه صل الله عليه و سلم أنه يبقى بالأخلاق دى..

فيروح النبى ﷺ و يطلب من صفوان السلاح، فقال صفوان : تريده غصباً يا محمد؟ فقال النبىﷺ : لا والله .. إنما أريد أن أستعيره مقابل أجر.. النبى ﷺ هيأجر السلاح.. هنا نشوف أن مافيش مشكلة أنك تتعامل مع كافر فى التجارة.. الإسلام مش بيضطهد حد .. الإسلام بيتقبل كل الناس.. المهم وافق صفوان بشرط أنه يحضر الغزوة مع المسلمين علشان يراقب سلاحه ،، بس صفوان فى الحقيقة عاوز يحضر علشان يشوف أخلاق المسلمين،،
المهم طلع صفوان و أنتصر المسلمون و بدأت تتوزع الغنائم على الجيش.. فصفوان بقى باصص على الغنائم .. و يعدي صفوان على وادي بين جبلين فيه حوالى 600 ناقة فيبص صفوان ،فالنبي ﷺ يقول أيعجبك هذا الوادي ؟ فقال نعم . فقال النبىﷺ : إذاً هو لك ،،فبكي صفوان وقال والله ما نفس تنفق و تهب بهذا العطاء إلا نفس نبي..و أسلم صفوان و راح لقبيلته يقول : إن محمد عليه الصلاة و السلام يعطي عطاء من لا يخشي الفقر..

نكمل المرة الجاية إن شاء الله 🤍

سيرة_الرسول
الحلقة 181
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة (ج10)
فقال حين أسلم : والله فما إن وضع النبىﷺ يده على صدرى ودعا لى فأصبح أحب أهل الأرض إلي ♡.

نبدأ حلقتنا النهاردة الحمد لله أن اتكسرت الأصنام حوالين الكعبة.. و يطوف النبىﷺ حوالين الكعبة و يردد وَيَقُولُ {جَاءَ الْحَقّ وَزَهَقَ الْبَاطِلُ إِنّ الْبَاطِلَ كَانَ زَهُوقًا} [الْإِسْرَاءَ: 81] ..

و بقى النبى عليه الصلاة و السلام عايز يصلى فى الكعبة بس مفاتيح الكعبة مع واحد اسمه عثمان بن طلحة و كان من بنى شيبة ، ( فاكرين زمان لما النبىﷺ طلب المفتاح من عثمان علشان يصلى فى الكعبة و كان ساعتها عثمان كافر فرفض عثمان فالنبىﷺ قال له:َ يَا عُثْمَانُ لَعَلّك سَتَرَى هَذَا الْمِفْتَاحَ يَوْمًا بِيَدِي أَضَعُهُ حَيْثُ شِئْت فقال عثمان:ُ لَقَدْ هَلَكَتْ قُرَيْشٌ يَوْمَئِذٍ و َذَلّتْ فَقَالَ النبىﷺ: بَلْ.عَمَرَتْ وَعَزّتْ يَوْمَئِذٍ بالإسلام ) .

فلما طلب النبىﷺ منه المفتاح، ..و جاب عثمان المفتاح و أخذه النبىﷺ و فتح الكعبة و بعد ما النبىﷺ خلص صلاة ،قام سيدنا العباس (عم النبى) فقال: "يا رسول الله لا تعطى المفتاح لعثمان و اجعله مع قبيلتك بنى هاشم "، فرفض النبىﷺ و قال : لا، اليوم يوم بر و وفاء ، و وقتها نزلت الآية، قال الله عز وجل : "إِنَّ اللَّهَ يَأْمُرُكُمْ أَنْ تُؤَدُّوا الأمانَاتِ إِلَى أَهْلِهَا" و رجع النبى المفتاح لبنى شيبة و فضل المفتاح قبل و بعد الإسلام مع نفس الناس..و أخذ عثمان المفتاح من تانى ..و بعدين النبىﷺ نادى عليه و قال له أن اتحقق كلامى اللى قلتهولك زمان يا عثمان ..
يااا يا جماعة ..اللهم إنا نشهد أن محمد رسول الله..
طيب هو إزاى بني شيبة بقى معاها المفتاح أيام الكفر؟! زمان حصلت مشكلة فى قريش ، و حصل إتفاق أن المفتاح يبقى مع بني شيبة ، فأصبح من تقاليد البلد ، فالنبى ﷺ جه مكة و لاقى العادة دى و دى مش ضد الدين فمش حرام فساب النبى ﷺ المفتاح مع كفار بنى شيبة ، يعنى التزم باللى كان كفار مكة متفقين عليه مع نفسهم..فأعطى النبى عليه الصلاة و السلام المفتاح لعثمان و يقول لبنى شيبة : خذوه فلا يأخذه منكم إلا ظالم إلى يوم القيامة..و لحد دلوقتى ما حدش يقدر يدخل الكعبة مهما كانت مكانته إلا لما يأخذ المفتاح من سلالة بني شيبة و هيفضل ده ليوم القيامة....

فى قصص مهمة حصلت برده لازم نعرفها و هى أن النبى عليه الصلاة و السلام اتعرض للإغتيال ..كان فى شاب اسمه فضالة ادعى أنه أسلم ، و خطط أنه يقتل النبى غدر.. فكان النبى ﷺ بيطوف حوالين الكعبة، ففضالة طاف وراه ..فالنبي عليه الصلاة و السلام كان عنده خاصية إنه يري من خلفه كما يرى من أمامه ، فوقف النبىﷺ ، فوقف فضالة ،فاستدار النبى ﷺ، وقال: ما بك يا فضالة ..بماذا تحدثك نفسك؟ فقال: لا شئ إنى أذكر الله ، فقال النبىﷺ: اتق الله يا فضالة ، استغفر الله يا فضالة و رفع النبىﷺ كفه و حطها على صدر فضالة و قال: يغفر الله لك يا فضالة! (( تخيلوا النبىﷺ يدعى لواحد كان هيقتله!! ).
المهم قال فضالة : والله قبل أن يضع النبىﷺ يده على صدرى كان أبغض أهل الأرض إلي ، وما أن رفع يده حتى صار أحب أهل الأرض إلي ... و مشى فضالة و أسلم من كل قلبه ..و بعد كده فضالة قابل بنت كان بينه و بينها زمان علاقة حرام.. فشافته فقالت: هلم للحديث يا فضالة.. تعالى عندى شوية ، فبيحكى فضالة الموقف فى أبيات شعر و يقول : قالت هَلُمّ إلَى الْحَدِيثِ فَقُلْتُ لا * يَأْبَى عَلَيْك اللّهُ وَالإِسْلامُ * لوْ قَدْ رَأَيْتِ مُحَمّدًا وَقَبِيلَهُ * بِالْفَتْحِ يَوْمَ تُكَسّرُ الأَصْنَام ُ*لَرَأَيْتِ دِينَ اللّهِ أَضْحَى بَيّنًا *** وَالشّرْكُ يَغْشَى وَجْهَهُ الإِظْلامُ ..

نكمل الحلقة الجاية إن شاء الله 🤍

سيرة_الرسول
الحلقة 180
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة (ج9)
قال ﷺ لنساء كفار قريش حديثات الإسلام : أبايعكن على ألا تزنين.. فقاطعت هند النبى ﷺ وقالت: أتزنى الحرة !!

نبدأ حلقتنا مع كفار قريش اللى بدأوا يدخلوا الإسلام زى هند بنت عتبة ..دى زوجة أبو سفيان.. و لما أسلم أبو سفيان فضلت تزعق و تقول: لا تتبعوه إنه مجنون، بس بعد ما الإسلام دخل مكة جلس النبي ﷺ فى مجلس و قعد مع مجموعة من السيدات بيبايعوه على الإسلام.. فلبست هند النقاب و قعدت وسطهم ، فالنبي ﷺ بدأ يقول للنساء :أبايعكن على ألا تشركوا بالله شيئا .. و يقول: أبايعكن على ألا تزنين.. فقاطعت هند النبى عليه الصلاة و السلام و قالت : أتزنى الحرة !! (هند مستغربة لأن أيام الكفر العلاقات اللى بدون جواز كان اللى بيعملها العبيد.. فهند كأنها عايزة تقول أننا ما بنعملش ده أصلاً.. لكن النبىﷺ عارف اللى هيحصل بعد مئات السنين بين شباب و بنات المسلمين..فبص النبىﷺ لهند و سكت).
و يكمل النبي ﷺ كلامه فيقول النبي ﷺ : أبايعكن على ألا تسرقن، فقالت هند من غير ما تركز : يا رسول الله إن أبا سفيان رجل بخيل ، أترى إن أخذت من ماله.. أهذه سرقة؟.. فلما سمع النبى ﷺ كده عرف أنها هند زوجة أبو سفيان، فقال لها : أنتِ هند بنت عتبة !! (هى اللى مثلت بجثة عم النبى ﷺ سيدنا حمزة.. و النبى ﷺ بكى كتير على عمه و كان قلبه محروق)، فالمهم بسرعة قالت هند :أقسمت عليك أن تعفو عني ، عفا الله عما سلف، فقال النبيﷺ عفوت عنكي .. تخيلوا بعد كل ده عفا عنها !! صل الله على حبيبنا محمد
فالنبي كمل كلامه و قال: ولا تقتلن أولادكم، فقالت هند: ربيناهم صغاراً و قتلتهم أنت فى غزوة بدر كبارا، فعمر بن الخطاب ضحك لحد ما كان هيقع على ظهره من الضحك.. فرحان بعزة المسلمين و أصلا غزوة بدر كفار قريش هم اللى اتسببوا فيها و ربنا نصر المسلمين... المهم يكمل النبىﷺ كلامه و يقول : و لا تعصون رسول الله فى معروف.. فترد هند و تقول: والله جئنا نبايعك و ليس فى أنفسنا إلا أن نطيعك... و أسلمت هند و باقى النساء.
و هتشارك هند فى معركة من معارك جيش المسلمين.. و كان فى مجموعة من جيش المسلمين راجعة بسبب شدة المعركة فتقوم تقف هند مع السيدات المسلمات صف و تخليهم يمسكوا السيوف و وصتهم أن اللي تلاقي جوزها راجع بسبب شدة المعركة تهوشه بالسيف و تشجعه أنه يرجع.. أسلم كمان أبو قحافة و ده يبقى أبو سيدنا أبو بكر الصديق.. فجه يُسلِم بين يدي رسول الله، و بكى سيدنا أبو بكر فسأله النبيﷺ عليه الصلاة و السلام : لماذا تبكي يا أبا بكر؟.. فقال: تمنيت لو كان أسلم عمك أبو طالب بدلاً من أبى لأن هذا سيسعدك أكثر يا رسول الله..

دلوقتى المسلمين فى مكة و يطلع سيدنا بلال بن رباح و يأذن .. يااا أخيرا بعد سنين صوت الآذان بيجلجل فى أنحاء مكة، و بعد ما خلص الآذان فى واحد واقف على جنب و عمال يخطط.. مين؟ أبو سفيان.. رغم أنه أسلم بس قلنا قبل كده أن النبى ﷺ حس أنه ماقالش الشهادة من كل قلبه و ما زال مش قادر يخضع أن محمد رسول الله بعد كل سنين الحرب دى..

المهم سيدنا بلال أذِّن و كان قاعد على جنب أبو سفيان و معاه واحد اسمه عتاب بن أسيد و كانوا قاعدين لوحدهم و مامعهمش حد.. فيقول عتاب: الحمد لله الذي أمات أبي أُسيد قبل أن يسمع من بلال ما يغيظه.. فقال أبو سفيان: يا عتاب أخشى إن تكلمت أن تخبر الحصى محمد بما نقول!
فبعد شوية جه النبيﷺ و قال : يا عتاب الحمد لله الذي أمات أباك قبل أن يسمع شرف بلال فوق الكعبة، و يا أبو سفيان لو تكلمت لأخبرني الحصى!! فقال عتاب: نشهد أنك رسول الله..

و فى مرة تانية كان أبو سفيان قاعد لوحده بيخطط أنه يحارب المسلمين علشان يخرجهم من مكة ..فكان قاعد سرحان و هو بيفكر فى كده فى سره.. فمين يعدى من جنبه؟ سيدنا النبي عليه الصلاة و السلام .. فبص له النبي ﷺ و قال له: إذاً يخزيك الله يا أبا سفيان! فقال أبو سفيان: أشهد أن لا إله إلا الله و أنك رسول الله..( ربنا أوحى للنبى ﷺ كل اللى بيفكر فيه أبو سفيان) و على فكرة أبو سفيان كان مسلم بس بلسانه لكن بعد كده هيسلم من كل قلبه و هتروح عيونه فى سبيل الله فى معركة اليرموك هنحكيها فى خلافة أبو بكر الصديق بعد كده ..

نكمل بكرة إن شاء الله 🤍
هذة الحلقات نقلا عن أستاذة نورهان الشيخ

سيرة_الرسول
الحلقة 179
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة (ج8)
فقال أحدهم :اليوم يوم الملحمة يذل الله قريش، فغضب النبى ﷺو قال: بل اليوم يوم المرحمة يعز الله قريش بالإسلام ♡

نبدأ حلقتنا النهاردة و أبو سفيان مبهور بمنظر جيش المسلمين.. و بسرعة يتحرك أبو سفيان علشان يبلغ أهل مكة بقدوم المسلمين.. يقوم سامع سعد بن عبادة الأنصاري و هو يقول :اليوم يوم الملحمة،اليوم يذل الله قريش.. فالنبيﷺ يزعل جدا فيقول النبىﷺ : بل اليوم يوم المرحمة ، اليوم يعز الله قريش ..يعزها بدخول الإسلام فيها..
طب دي قريش اللي آذتك و عذبتك يا رسول الله .. مع أنك ماكنتش زمان عايز حاجة غير أنهم يسيبوك تبلغ الدعوة للناس و من شاء فليؤمن و من شاء فليكفر .. فيأخذ النبى ﷺ من سعد الراية علشان كده نفسية سعد مش هادية للسلام.. بس هيديها لواحد تانى من الأنصار.. هو مين؟ لابنه.. قيس بن سعد بن عبادة... ابن سعد .. فقال سعد : فحين أخذ الراية منى و أعطاها لأبنى فكنت لا أدري أأضحك أم أبكي!
خلاص جيش المسلمين على أبواب مكة فيجرى أبو سفيان و يدخل مكة و يصرخ بصوت عالى و يقول : هذا محمد جاءكم فيما لا قِبَل لكم به، (يعنى بجيش كبير من المسلمين) فمن دخل دار أبو سفيان فهو آمن و من دخل الحرم فهو آمن و من أغلق عليه بابه فهو آمن..
و يدخل النبيﷺ في منظر مهيب ..قائد منتصر راكب الناقة بتاعته، موطى راسه لله عز وجل .. فى قمة التواضع، و يقرأ سورة الفتح " إنا فتحنا لك فتحا مبينا " لحد ما يوصل لآخر آية " محمد رسول الله والذين معه أشداء على الكفار رحماء بينهم" .. و يدخل الجيش .. أنتم متخيلين.. سيدنا بلال بيعدي على المكان اللى كان بيتعذب فيه زمان ، و هنا استشهدت سُمية فى سبيل الله..هنا استشهد جوزها أبو عمار من التعذيب.. و هنا كان أبو لهب بيرمى على النبى ﷺ طوب لدرجة أن رجل النبىﷺ تنزل دم .. و النبى ﷺ يصبر رغم أنه فى قوة أربعين رجل.. و يوصلوا الحرم و الحرم حواليه ثلاثمائة و ستين صنم .. فالنبىﷺ كان فى إيده عصاية .. فكل ما يشاور على صنم يقع و يتكسر ..معجزة.. و يقف النبىﷺ و الكفار فى الحرم..لأن النبى ﷺ مديهم الآمان .. و هم مش خايفين هم مصدقينه.. هم اللى سموه زمان الصادق الأمين.
و يبدأ النبىﷺ يبص لهم و يقول : يا معشر قريش ما تظنون أني فاعل بكم؟ فقالوا: أخ كريم و ابن أخ كريم ..فقال النبيﷺ: يغفر الله لكم و هو أرحم الراحمين...اذهبوا فأنتم الطلقاء.. ( فى أعظم مشهد عرفته البشرية و بيحكى عنه الغير مسلم قبل المسلم.. عفو النبى الكريمﷺ .. رغم العذاب و الأذى اللى اتعرض له هو و أصحابه و باقى المسلمين)،
بس هيقف النبي ﷺ و يهدر دم أشخاص معينة.. طب إشمعنى دول؟ لأنهم مجرمين حرب.. كان منهم واحد اسمه عكرمة بن أبى جهل.. عكرمة ده اللى شارك فى قتل المسلمين غدراً و هم فى العمرة ساجدين قدام الكعبة.
عكرمة عرف أن النبىﷺ أهدر دمه ، فبسرعة ركب سفينة و هرب للحبشة، بس مراته "أم حكيم " كانت قلقانة عليه جدا بس هي أسلمت.. فراحت للنبى ﷺو قالت إن زوجي عكرمة قد أهدرت دمه يا رسول الله و هو خائف و كان سيد فى قومه هل ممكن أن تعطيه الأمان يا رسول الله؟ فوافق النبىﷺ من غير شروط .. و لا حتى اشترط عليها أنه يسلم الأول.
فالمهم طلعت" أم حكيم" أيام تدور على جوزها و للأسف ملحقتهوش، كان خلاص ركب السفينة، فواحد من الركاب قال: أخلص! قال : أى شئ أقول؟ قال: قل لا إله إلا الله ، قال عكرمة: ما هربت إلا من هذا ..فالموج هدى، فجاءت أم حكيم وفضلت تنادى وتلح عليه وتقول: يا ابن عم، جئتك من عند أوصل الناس و أبر الناس و خير الناس، لا تهلك نفسك .. فوقف لها .. فقالت له : إنى قد استأمنت لك محمدا رسول الله - صل الله عليه وسلم- قال:أنت فعلت؟ قالت: نعم أنا كلمته فأمنك ، فرجع معها، فقبل ما يوصل عكرمة للنبىﷺ .. فيقوم النبىﷺ قايل للصحابة: يأتيكم الآن عكرمة بن أبى جهل مسلما مخلصا .. فلا يسب أباه أحد.. ( تخيلوا !! طيب ده أبو جهل كتير آذاك يا رسول الله ده من كبار الكفار..) بس النبيﷺ قال أن سب الميت لا يصل للميت ولكنه يؤذى الحي.. و فعلا ماحدش جاب سيرة أبو جهل بسوء ، و دخل عكرمة على النبي ﷺ فوجد النبيﷺ فاتح له ذراعيه، فاحتضنه النبيﷺ ، فسأل عكرمة النبى ﷺ و قال له: بمَ يدعو دينك؟ فقال النبي ﷺ: يدعو إلى مكارم الأخلاق،صلة الأرحام، الصلاة، فبكى عكرمة و قال: الشهادة.. و يأخذ عكرمة عهد على نفسه أنه على قد ما وقفت للصد عن سبيل الله هيقف للدعوة إلى الله، و كل مال أنفقه للصد عن الله هينفق أضعافه فى سبيل الله..
و فعلاً هيشارك عكرمة فى حروب المرتدين بعد وفاة النبى عليه الصلاة و السلام ، هيشارك فى معركة اليرموك كان المسلمين هينهزموا فقال عكرمة من يبايعني على الموت، فالناس روحها المعنوية ارتفعت..و بعد المعركة لاقوا عكرمة واقع فى الأرض و فيه اتنين و سبعين طعنة.. يعنى فضل يقاتل لآخر لحظة فى حياته و ثابت قدام اللى بيحاربه..

رضى الله عن عكرمة بن أبى جهل ♡

نكمل المرة الجاية إن شاء الله 🤍

سيرة_الرسول
الحلقة 178
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

#فتح_مكة (ج7)
فقال العباس :هو ليس بملك بل هو رسول الله 🤍

شفنا إمبارح أبو سفيان وهو مخضوض إن المسلمين جايين يفتحوا مكة..و إن سيدنا محمد ﷺ مش هيسكت على غدرهم بالمسلمين ..فعرض العباس على أبو سفيان إنه يسلم مكة للنبيﷺ ووافق أبو سفيان و ركب ورا العباس فى طريقهم للنبى عليه الصلاة و السلام .. من قائد معسكر اللى فيه النبى ﷺ ؟ سيدنا عمر بن الخطاب.. جه العباس للمعسكر فقال عمر بن الخطاب: و من معك ؟.. فبص لاقى أبو سفيان!! فقال عمر: انتظر هذا أبو سفيان! فبسرعة جرى عمر على النبىﷺ علشان يسبقهم..لأنه حس إن سيدنا العباس هيخلى أبو سفيان فى حمايته...

فيدخل سيدنا عمر على النبى عليه الصلاة و السلام و يقول : هذا أبو سفيان اعطني رقبته أقتله يا رسول الله! (عمر منفعل لأن اللى عملته كفار مكة مش شوية) فقال العباس: مهلاََ يا عمر والله يا عمر لو كان من "بني عدي" من قومك لمهلته و لكنك تفعل ذلك لأنه من بني عبد مناف!! فبكي عمر و قال : سامحك الله يا عباس، ف يوم إسلامك يا عباس كان أحب الأيام إليّ من إسلام "الخطاب" لو أسلم (أبو سيدنا عمر ).

فالنبى ﷺ باصص لأبى سفيان و طبعاً النبىﷺ مش ناسى إن من أيام قليلة كان أبو سفيان جاى يخدعه فى موضوع مد مدة العهد زى ما حكينا.. فبسرعة قال أبو سفيان: تَاللَّهِ لَقَدْ آثَرَكَ اللَّهُ عَلَيْنَا وَإِن كُنَّا لَخَاطِئِينَ...فيرد النبى العظيم ﷺعليه و يقول: لا تثريب عليكم اليوم يغفر الله لكم و هو أرحم الراحمين.. و النبي سامحه !! تخيلوا !! المهم قال أبو سفيان أنه هيسلم مكة ..بس فى شئ أهم من كده عند النبىﷺ.. إيه هو ؟
هو إن أبو سفيان يسلم و يهتدى لله :)..

فيقول النبى ﷺ: أما آن لك أن تسلم يا أبا سفيان؟ فقال أبو سفيان: ما أحلمك و ما أرحمك و ما أوفاك، حقاً لو كانت الأصنام آلهة لأغنت عنا اليوم!! و قال: أشهد أنه لا إله إلا الله، فقال النبيﷺ: أتشهد يا أبا سفيان إني رسول الله؟! فقال أبو سفيان : و لكن فى القلب منها شئ ! (برده بقى له سنين ضد النبىﷺ .. مش قادر فجأة يتقبل إنه يخضع للحقيقة و إن النبىﷺ رسول الله) ، فقال له العباس: قلها يا أبا سفيان.. فقال: أشهد أن محمد رسول الله، بس مش طالعة من قلبه ! والنبي ﷺ عارف كده ، بس النبى ﷺ صبر عليه.. و راح العباس وأخد النبى ﷺ و قال له: إن أبا سفيان رجل يحب الفخر فهو سيد قريش.. فأعطه شئ..

فالنبي مرن جداً فوافق و قال لأبو سفيان : أخبر أهل مكة أنه من دخل دار أبو سفيان فهو آمن (يعني أنت لسه سيد قريش) .. و قال النبىﷺ : و من أغلق عليه بابه فهو آمن.. (كأن النبىﷺ عايز يعمل حظر تجوال.. عشان ما يحصلش أى تصادم بين الكفار و المسلمين.. )
و قال : و من دخل الحرم فهو آمن..

ففرح أبو سفيان و بسرعة خرج علشان يروح لمكة .. بس النبيﷺ قلقان أن يكون أبو سفيان خاف و أول ما يدخل مكة ممكن يرجع فى كلامه و يغدر، أصل النبي ﷺ فطن جداً.. النبي ﷺ بياخد بالأسباب، فقال للعباس إنه يروح ورا أبا سفيان و ما يخليهوش يدخل مكة .. و شوف أى حجة و خده و اطلع على قمة الجبل.. و جيش المسلمين هيعمل إستعراض عسكري ، علشان لو أبو سفيان فكر يغدر تانى..فيكون شاف الجيش و عرف حجمه فيتراجع و يخاف..

و بسرعة جرى العباس ورا أبو سفيان و أقنعه إنه يبات معاه على الجبل لحد ما كتائب جيش المسلمين تعدى ، وأبا سفيان مافيهوش حيل يكمل الطريق لمكة فوافق، فطلعوا الجبل و بدأ يعدي جيش المسلمين .. الجيش متقسم قبائل وكل ما قبيلة تعدي من تحت الجبل تقول الله أكبر.. طيب ليه يا رسول الله ؟ علشان نهز أبو سفيان لأن ثباته من ثبات قريش.. المهم أبو سفيان واقف يتفرج فى ذهول و بدأ يسأل : قبيلة من هذه ؟ فيقول العباس: أشجع.. فيقول أبو سفيان : أسلمت أشجع!!.. و يفضل يسأل كده مع كل قبيلة تعدي، فيسأل أبو سفيان إمتى هتعدى كتيبة النبيﷺ ؟

فعدت كتيبة ضخمة ماسكة رايات خضر، يلبسون الحديد، قائد المقدمة" النبى عليه الصلاة و السلام " ، و قائد الميمنة "خالد بن الوليد "، و الميسرة "الزبير بن العوام " و كتيبة قائدها أبو عبيدة بن الجراح .. و حامل اللواء فى مقدمة الجيش مين؟! سعد بن عبادة الأنصاري! و كانت الكتيبة بتاعته فيها المهاجرين و الأنصار..طب ليه اخترت قائد أنصارى يا رسول الله ؟ ليه ما اختارتش من مسلمي مكة اللى هاجروا للمدينة ..علشان النبى ﷺ عايز يقول أن آه هفتح مكة لكن يا أهل المدينة يا أنصار النبىﷺ ماتفتكروش إني هرجع لأهلي و أنساكم.
و مين المشرف على الكتيبة دى؟ عمر بن الخطاب .. و فى نص كل ده مكان سيدنا رسول الله صل الله عليه وسلم.. حاجة فى منتهى القوة و الهيبة و العظمة ..فقال أبوسفيان للعباس: لقد أصبح ابن أخيك ملكاً عظيم (أبو سفيان مصمم إن النبى ﷺ ملك).. فيرد العباس و يقول : هو ليس بملك بل هو رسول الله.

نكمل بكرة إن شاء الله 🤍

سيرة_الرسول
الحلقة 177
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة (ج6)
جيش المسلمين فى طريقه لمكة .. 10 آلاف جندى مسلم .. طبعاً كفار قريش لا يمكن تتصور إن كل العدد ده على بعد أربع أميال من مكة.. طيب مين طالع مش قادر يصبر و عايز يعرف الأخبار؟ سيدنا العباس عم رسول الله.. و ده كان مسلم و كاتم إسلامه علشان يساعد المسلمين و يبقى زى المخابرات وسط كفار قريش ..
بس مابقاش قادر يقعد كل ده بعيد عن النبى عليه الصلاة و السلام فخرج من مكة و جمع ولاده و مراته و هاجر للمدينة فقابل النبي ﷺ فى الطريق. . و حضنه النبى عليه الصلاة و السلام و قال له : يا عمى أنت آخر مهاجر .. فلا هجرة بعد فتح مكة ..سبحان الله لو سيدنا العباس كان اتأخر شوية ماكانش هيتكتب من المهاجرين.. هو آه صحابي بس ماكانش هيبقي مهاجر،،
قال تعالى :{ لاَ يَسْتَوِي مِنْكُمْ مَنْ أَنْفَقَ مِنْ قَبْلِ الْفَتْحِ وَقَاتَلَ أُولَئِكَ أَعْظَمُ دَرَجَةً مِنَ الَّذِينَ أَنْفَقُوا مِنْ بَعْدُ وَقَاتَلُوا وَكُلاًّ وَعَدَ اللهُ الْحُسْنَى وَاللهُ بِمَا تَعْمَلُونَ خَبِيرٌ} [الحديد: 10]
علشان كده لازم ما نتأخرش على الطاعة عشان ثوابها ما يقلش أو يضيع ثوابها الكبير مننا..

دلوقتى خلاص انضم العباس لجيش النبىﷺ.. و النبى ﷺقرب أوى من مكة .
هتعمل إيه يا رسول الله؟ هعمل حرب نفسية.. طب إزاى؟.. هيأمر النبى ﷺ الجيش.. اشعلوا النيران ،،عشرة آلاف شعلة نار فى إيدهم..منورة بالليل .. النبىﷺ ليه عمل كده؟ علشان أهل مكة يخافوا و يستسلموا.. و ده أكبر دليل على إن النبى ﷺ عايز يفتح مكة بسلام بدون نقطة دم واحدة..

فالعباس ركب بغلة النبىﷺ و راح يفهم أهل قريش الوضع عشان ما يقلبوهاش حرب .. فيقابل مين؟ أبو سفيان .. أصل الأخبار انقطعت عن مكة ..فطلع بنفسه يشوف فى إيه ! و طبعاً ميعرفش إن النبيﷺ على أبواب مكة..المهم طالع أبو سفيان و معاه حكيم بن حزام ، فشاف النيران فدب الفزع جواه فقال أبو سفيان: ما هذه النيران!!، فقال حكيم: لا أدري لعلها قبيلة خزاعة.. فقال أبو سفيان : خبت و خسرت فإن خزاعة أقل من ذلك وأذل، فقال: لعلها قبيلة هوازن ، قال :خبت وخسرت هوازن أقل من ذلك و أذل ..

فيسمعهم العباس رضى الله عنه و يقول: يا أبا حنظلة (دى كنية أبو سفيان) فقال أبو سفيان: من الصوت ؟ فقال: أنا العباس.. فقال أبو سفيان :..لمن هذه النيران؟ فقال: هذا رسول الله و معه عشرة آلاف مسلم من العرب لفتح مكة، و والله لو فتحها عنوة لهلكت قريش... يا أبا سفيان بيدك الأمر ،فقال: ماذا أفعل ؟ قال العباس: سلم مكة للنبى محمد الآن!..
فقال: سأفعل!!
((ياه .. إنتم متخيلين ..شايفين كام صحابى اتقتل و اتعذب فى قريش.. قد إيه الرسولﷺ اتأذى من قريش..دلوقتى جه يوم النصر للمسلمين و جبر الخاطر )) فرد العباس على أبو سفيان و قال: إذاً تعالى معي..

أبو سفيان كان خايف أنه يتقتل فعلي بن أبي طالب.. يقول له : يا أبا سفيان لا تخف اذهب إلى رسول الله ، فقل له كما قال إخوة يوسف ليوسف: {قَالُوا تَاللَّهِ لَقَدْ آَثَرَكَ اللَّهُ عَلَيْنَا وَإِنْ كُنَّا لَخَاطِئِينَ} [يوسف: 91]. فإنَّه لا يرضى أن يكون أحد أحسن منه قولاً..

وافق أبو سفيان إنه يسلم مكة و ركب ورا العباس .. مين قائد المعسكر اللى فيه النبىﷺ ؟ سيدنا عمر بن الخطاب.. طب و هيعمل إيه لما يشوف أبو سفيان ؟

هنعرف المرة الجاية إن شاء الله 🤍

👈هذة الحلقات نقلا عن أستاذة نورهان الشيخ

سيرة_الرسول
الحلقة 176
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

#فتح_مكة (ج5)
لعل الله اطلع إلى أهل بدر فقال:اعملوا ما شئتم..قد غفرت لكم

شفنا الحلقة اللى فاتت استعداد جيش المسلمين للخروج لمكة و قلنا إن النبى عليه الصلاة و السلام حاول يخفى خبر فتح مكة و ماقالش حتى لغالبية الجيش إنهم خارجين لمكة أصلاً،
لكن هتحصل حاجة مش فى الحسبان و هي إن يوم ما عمرو بن سالم قال للنبى ﷺعلى خبر غدر مكة بمسلمي قبيلة خزاعة ... كان موجود صحابى اسمه حاطب بن أبى بلتعة.. فلما عرف حاطب بغدر قريش.. ففهم إن النبى ﷺ هينوى فتح مكة .. فقام باعت رسالة لأبو سفيان و قال فيها إن رسول الله يجهز جيشاً لقتالكم و معه 10 آلاف جندى من العرب.

و يبعت حاطب الجواب مع إمرأة و قال لها خبى الجواب فى هدومك لحد ما توصليه لأبو سفيان.. بس تفتكروا هتقدر توصل بالجواب لمكة؟ لأ الحمدلله مش هتوصل.. بس إزاى.. نزل سيدنا جبريل على النبى ﷺ و بلغه باللى عمله حاطب بن أبى بلتعة.. و قال له إن الجواب مع الست و أخبره بمكانها.. فبسرعة يبعت النبىﷺ سيدنا على بن أبى طالب و سيدنا الزبير عند مكان المرأة و فعلاََ يروحوا فيلاقوها .. فيقولوا لها : أعطنا الرسالة.

فقالت : ليست معى رسالة.. فقالوا : كذبتى.. و والله ما كذب رسول الله ..فاعطنا الرسالة أو سنأخذها منك بالقوة .. فخافت و قامت مطلعة الجواب .. و بسرعة راح علي للنبى ﷺ و بدأ يقرأ الجواب للنبى ..ﷺو يقف حاطب و حواليه بعض المسلمين بيسمعوا الجواب.. و حاطب ده مش مسلم عادى.. ده مجاهد حارب فى غزوة بدر و الخندق و خيبر.. فيسمع النبىﷺ الرسالة و يبص له و يقول : ما هذا يا حاطب؟ ..فيقول حاطب : يا رسول الله لا تعجل و اسمع منى..فيقول النبىﷺ : تكلم يا حاطب..

فقال حاطب : يا رسول الله إنى لى قرابة من الأهل يعيشون فى مكة و خشيت عليهم أن تقتلهم قريش فأردت أن أفعل معروف يتذكروه لى.. و علمت أن الله سيحميك يا رسول الله و لن يخزيك أبداً و لكنى أردت أن أحمى قرابتى .. ( و ده ذنب ضعف مش خيانة ).

فسيدنا عمر بن الخطاب مضايق جداً فقال : يا رسول الله دعنى أضرب عنقه.. فراح النبىﷺ قايل : مهلاً يا عمر فهو ممن حارب فى غزوة بدر.. فلعل الله اطلع إلى أهل بدر فقال : اعملوا ما شئتم فقد غفرت لكم .. (يعنى ذنب حاطب ممكن يكون مغفور بسبب تعبه مع المسلمين فى جهاده فى غزوة بدر ) فاتأثر سيدنا عمر أوى بمغفرة و رحمة ربنا الواسعة.. شايفين كأن حاطب له عند ربنا رصيد من الأعمال الحسنة بترفعه عند ربه. قال تعالى : إن الحسنات يذهبن السيئات.. و عدت المشكلة و الناس بقت تتعامل مع حاطب عادى .. و نشوف هنا جمال المجتمع المسلم وهو بيحتوى اللى بيغلط و يسامحه..

هيخرج الجيش من المدينة بس النبى ﷺ هيوجّه سرية بإتجاه منطقة ذى مروة ..عشان لو مكة بتراقب النبى ...تتشتت و تتلخبط.. و ينخدعوا أن النبى ﷺ مش رايح ناحية مكة و يفكر أهل مكة و المنافقين اللى فى جيش المسلمين أن النبىﷺ هدفه منطقة عند ذى مروة.. و فى طريق النبى لمكة بقى يريح الجيش و بيفطروا و يرتاحوا فترات طويلة.. و يبدأ النبىﷺ يتوجّه لمكة فى جيش من 10 آلاف جندى .. و تحصل حاجة جميلة أوى ..

هنعرفها بكرة إن شاء الله🤍

سيرة_الرسول
الحلقة 175
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة (ج4)
شفنا المرة اللي فاتت أبو سفيان قبل إسلامه و هو بيحاول يخدع النبي عليه الصلاة والسلام بأنه يقنعه يمد صلح الحديبية لعشرين سنة وعرفنا ليه.. المهم النبي ما وافقش و راح أبو سفيان لأصحاب النبيﷺ و ماحدش وافق إنه يتوسط له.. لحد ما راح لآخر واحد يرجوه وهو سيدنا "علي بن أبى طالب". مين فى بيت سيدنا علي دلوقتي ؟ سيدنا علي وفاطمة والحسن كان بيلعب ما بينهم. المهم دخل أبو سفيان وسلم على سيدنا علي، وقال له: "والله يا علي، لقد أصابني أمرا شديدا. وجئت إليك يا علي لأنك أقرب الناس إليّ فى المدينة" و حكى له اللي حصل مع النبيﷺ وأبو بكر وعمر.
فقال علي: " يا أبا سفيان، إنى لا أملك أن أراجع رسول الله أبدا". - فبص أبو سفيان لفاطمة وقال لها: "يا فاطمة.. هل يمكنك أن تأمري الحسن أن أكون فى حمايته؟!" (عشان عايز يضمن إن المسلمين ما يحاربوش أهل مكة بعد ما يعرفوا خبر الغدر بخزاعة) فقالت: "هو طفل ولا يجير بين الناس!" ...فقال أبو سفيان: "يا علي، إنى والله فى كرب شديد!". ففكر سيدنا علي وقال: "وجدت لك حلا. اذهب الآن إلى المسجد، وقف وقل " أنا أبو سفيان بن حرب، سيد قريش، قد أجرت بين الناس، لا يعتدي أحد على أحد، ولا يقاتل أحد أحدا ". فقال أبو سفيان: "أأقول ذلك ؟! وهل تنفع إجارتى يا علي؟". فقال علي: "لا!"، قال: "ولِم تأمرنى بها؟!" . فقال علي: "لأنى لا أجد لك غيرها".
و فعلا دخل أبو سفيان المسجد النبوي و قدام الناس كلها قال: "أيها الناس، أنا أبو سفيان بن حرب، سيد قريش، قد أجرت بين الناس، لا يعتدي أحد على أحد، و لا يقاتل أحد أحدا". فالناس بصوا له و ماحدش اهتم بكلامه ..

خرج أبو سفيان من المدينة و رجع لمكة فلاقى كبراء قريش مستنيينه على الباب، فحكى لهم اللي حصل، فقالوا له: "خبت وخسرت! إن علي بن أبى طالب يلعب بك ..وفهموا أن طبعا كل اللي حصل مش هيأثر فى حاجة وإن أكيد النبي ﷺمش هيسكت لما يوصل له خبر الغدر ..(أصل قريش فاكرة إن النبي ﷺ ماوصلتلوش لسة أخبار الغدر عشان كانوا حاولوا يخبوا على المسلمين الخبر ) .

طيب بيحصل إيه فى المدينة دلوقتي؟ النبي بيجهز جيش كبير و في قبائل كتيرة أسلمت و انضمت لجيش المسلمين.. فاكرين قبيلة غِفَار، لما بايعوا النبيﷺ فقال لهم : "جاءت غفار غفر الله لها"،و تأتى قبيلة أسلم، فيدعو لها النبي: "جاءت أسلم سالمها الله".. و كل القبائل دى كانت منضمة لحلف النبي..النبي ﷺ هدفه إنه يوصل بالجيش لمكة و يفاجئ قريش .. فبردو عمل تعتيم شديد على خبر فتح مكة.. لدرجة أن أثناء تجهيز الجيش.. النبي عليه الصلاة والسلام مش هيقول لحد إنه خارج لفتح مكة إلا المقربين منه فبعض الصحابة عملوا قصيدة مدح النبي وفي آخرها بيسألوه إلى أين يا رسول الله؟ فيسمع النبي ﷺ القصيدة و يبتسم و يسكت... أصل النبي قلقان من المنافقين اللي فى المدينة إنهم يسربوا الخبر.. لكن هتحصل حاجة مش فى الحسبان.

هنعرفها المرة الجاية إن شاء الله🤍

سيرة_الرسول
الحلقة 174
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة (ج3)
شوفنا المرة اللي فاتت كفار قريش و هم خايفين من عواقب غدرهم بالنبي عليه الصلاة و السلام و نقضهم لصلح الحديبية و مشاركتهم في قتل مسلمين خزاعة .. فبسرعة عملوا إجتماع قبل ما خبر الغدر يوصل للنبي... و اقترح أبو سفيان فكرة و هي إنه يروح للنبي المدينة و يقترح عليه إنه يمد صلح الحديبية ل20 سنة.. طيب هيستفيدوا إيه من مد الصلح ؟ هيستفيدوا أن لما يتفقوا مع النبي على إتفاق جديد فى المعاهدة الجديدة، فالمعاهدة الجديدة هتلغى المعاهدة القديمة، فبالتالي لما يوصل للنبى خبر غدر قريش..ساعتها هيكون اتفق إتفاق جديد فمش هيقدر يحاربهم بناءا على نص الإتفاق الجديد..

المهم انبسطت قريش بالإقتراح ده و وافقوا عليه.. بس طبعا هم مايعرفوش إن خلاص خبر غدرهم وصل للنبي من بدري ..

المهم فعلا طلع أبو سفيان من مكة و وصل للمدينة و لما كان فى الطريق .. شافوه المسلمين .. بس محدش ضايقه بكلمة عشان العهد اللي بين المسلمين و بين قريش، عشان فى معاهدة سلام بينهم، و كمان كان الخبر بتاع قتل مسلمين خزاعة لسه موصلش لكل المسلمين .. المهم دخل أبو سفيان المدينة و راح لابنته "رملة" دى زوجة النبي وكان بقاله سنين ماشفش بنته.. المهم دخل أبو سفيان بيتها فلقى فرش على الأرض ولسة جاي أبوسفيان يقعد ..
جريت رملة بنته بسرعة وسحبت الفراش من تحته! فغضب أبو سفيان و قال: "يا بنية، ما بك؟ أرغبتي بي عن الفراش أم رغبتي بالفراش عني؟"، فقالت: "بل رغبت به عنك.. لأنك مشرك و هذا فراش رسول الله صل الله عليه و سلم". ( يعنى خايفة من أنك تؤذى الفراش و ده فراش طاهر)، فيرد أبو سفيان و يقول لها: "يا بنية، لقد أصابك بعدي شر "، فقالت: "لا والله، ما أصابني بعدك مع رسول الله إلا كل الخير".

و يخرج أبو سفيان و يروح على المسجد النبوي، و كان قاعد فيه النبي عليه الصلاة و السلام، و قبل ما يدخل أبو سفيان، قام النبي للصحابة: "يأتيكم الآن أبو سفيان، يريد أن يشدّ فى العهد و يزيد فى المدة"، فقال الصحابة: "نشهد أنك رسول الله".

و بعدين دخل أبو سفيان المسجد و سلم على النبي أصل النبي عارف كل الخدعة بتاعة أبو سفيان بوحي من الله .. فقال أبو سفيان: "يا رسول الله، لم أحضر صلح الحديبية، و قد بدا لي أنه صلح خير.. فإنى أتيتك لنزيد فى المدة"، فسكت النبي و مردش .. و فضل أبو سفيان يحاول.. و بردو النبي ساكت و مردش.. لأنه عارف إن أبو سفيان جي يخدعه..
- النبي بيلعب بأعصاب أبو سفيان و مرضيش يمد العهد.. فأبو سفيان مكنش عارف يعمل إيه ..فمشى و راح لأبو بكر لعله ينقذه.. و لكن سيدنا أبو بكر رفض .. فأبو سفيان فقد الأمل فى سيدنا أبو بكر، فسابه و راح لسيدنا عمر بن الخطاب رضي الله عنه و أرضاه ... ففتح سيدنا عمر لأبو سفيان وقال له: "أبو سفيان! ماذا تريد ؟!"، فقال: "يا عمر، جئتك فى خير" و يحكى له القصة و إن النبي لم يقبل عرضه و أنه عايز يتوسط له عند النبي. فردّ سيدنا عمر و قال: " ألم تجد غيري؟! والله لو لم أجد إلا الذر (أصغر حاجة) لقاتلتكم به! "
أبوسفيان فقد الأمل من سيدنا عمر، فيروح لسيدنا "علي بن أبى طالب".. طب يا ترى علي هيعمل إيه ؟

نكمل بكرة إن شاء الله🤍

سيرة_الرسول
الحلقة 173
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين 🤍

#فتح_مكة (ج2)
وقفنا المرة اللي فاتت عند الغدر اللي شاركت فيه قريش مع قبيلة بني بكر لقتل المسلمين من قبيلة خزاعة في وقت أدائهم للعمرة فى الحرم عند الكعبة و قتلوهم ساجدين .. و كان ده نقض لكفار مكة لصلح الحديبية اللي كان بين النبي وكفار مكة و كانت مدة الصلح 10 سنين و قريش خانت العهد بعد سنتين..
اتملى الحرم بالدماء وجرى واحد اسمه عمرو بن سالم على المدينة عشان يبلغ النبي عليه الصلاة والسلام بالمجزرة اللي حصلت.. ووقف وهو بيتقطع قدام النبي وقال الخبر بطريقة عجيبة.. قال له من خلال أبيات شعر ألفها..(الشعر هو أعلى وسيلة للتعبير عن أعمق الأحاسيس) قال عمرو: يا ربي إنى ناشد محمدا.. حلف أبيه وأبينا الأتلدا... قد كنت ولدا وكنا والدا ... ثم أسلمنا ولم ننزع يدا ... ولكن قريش أخلفوك الموعدا ... ونقضوا ميثاقك المؤكدا ... هم قتلونا بالوتير سجدا ... وذبحونا ركعا سجدا... فانصرنا هداك الله نصرا أيدا ... وادعوا عباد الله يأتوك مددا.

بيسمع النبي كلام عمرو، و بيحمر وجهه الشريف من الغضب وقال: "نصرت يا عمرو بن سالم " لو تلاحظوا طول السيرة، النبي عليه الصلاة والسلام بيتماسك ويصطبر على أى أذى إلا الغدر، دايما رد فعله بيكون شديد جدا، عشان محدش يفكر يغدر بالمسلمين تاني، وعشان محدش يتجرأ ويستحل دماء ولا أعراض المسلمين تاني... طيب هتعمل إيه يا رسول الله؟ هفتح مكة ...

طيب تعالوا نشوف بيحصل إيه دلوقتي عند قريش. بعد ما قبيلة بني بكر قتلت مسلمين قبيلة خزاعة.. فاقت قريش على الكارثة اللي حصلت وأدركوا أنهم خانوا العهد مع النبي وإن أكيد النبي هيحاربهم، وقالوا اللي ورطنا فى الكارثة دي "عكرمة" ، فبسرعة عملوا إجتماع طارئ وكان رئيس الإجتماع "أبو سفيان"، فقال لهم: "أيها الناس، ويحكم! محمد لن يتركنا، أسمعوني آراءكم".
فقال الأول: " يا أبا سفيان، انى أرى أن ندفع الديّة لمحمد"، فقالوا: "والله ليست معنا حقها". وقال الثانى: "إذًا، ندفع القتلة لمحمد يقتص منهم ونسلم بني بكر له"، فقالوا : "مستحيل، فبهذا لن يدخل فى حلفنا أحد بعد اليوم". فقال الثالث: "إذًا محمد لن يترككم وسيحاربكم لا محالة"، فردّ أبو سفيان وقال : "ولكنى عندي حل، اتركوني أذهب إلى المدينة، وأقابل محمد وأطلب منه أن يمد الصلح لعشرين عاما، وبالتأكيد سيقبل محمد لأنه يحب السلام!"... طيب دلوقتي إيه استفادة قريش من فكرة من مد المعاهدة (صلح الحديبية)؟

هنعرف المرة الجاية إن شاء الله .🤍

سيرة_الرسول
الحلقة 172
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

فتح_مكة (ج1)
طبعاً إحنا عارفين المعاهدة (صلح الحديبية) اللي بين النبي عليه الصلاة و السلام و كفار قريش و كان من شروطها أن لا تقاتلونا و لا نقاتلكم و لا تساعدوا أحداً على قتالنا.. و كانت مدتها 10 سنوات.. دلوقتى عدى سنتين على المعاهدة دي.. يعنى باقى على وفاة النبي 3 سنين عليه أفضل الصلاة والسلام.. فربنا هيسبب الأسباب عشان مكة تتفتح (8 هجرياً) و بسبب كفر و غدر أهل مكة.. طيب إيه إللي هيحصل؟
اللي هيحصل إن بعد معركة ذات السلاسل أسلمت قبيلة خُزاعة و انضمت لحلف سيدنا محمد صل الله عليه وسلم، و كان فى قبيلة تانية اسمها "بنى بكر"، دي رفضت الإسلام عشان تتحدى قبيلة خزاعة لأن هم دايماً فى خلاف معاهم و يعتبروا أعداء.. فلما انضمت خزاعة لحلف النبي و بقت تدافع عن الله و رسوله.. اشتد كفر قبيلة بنى بكر و انضمت كمان لحلف قريش.
- وفى يوم ذهبت قبيلة خزاعة للنبي تطلب إذنه عشان يطلعوا عمرة، و فعلاً طلعت خزاعة العمرة، و أثناء الطواف بالكعبة عرفت بني بكر بوجود خزاعة في مكة.. و فى نص الليل.. قائد قبيلة بني بكر اسمه "نوفل بن معاوية" راح لواحد من كبراء قريش اسمه "عكرمة بن أبى جهل".. يطلب الإذن للهجوم على خزاعة فى مكة و قتلهم.. فخلوا بالكم لو قريش وافقت على القتل ده، هيبقى ده نقض للمعاهدة (لأن من شروطها زى ما قلنا أن لا تقاتلونا ولا تعينوا على قتالنا).. و خزاعة أسلمت فبقت تبع النبيﷺ ..
فالمفاجأة إن قريش وافقت!! و أخد نوفل الإذن و مش بس كده دي أمدتهم بالسلاح كمان.. و هيأت لبني بكر الطرق عشان تهجم على خزاعة .. و وسط ما قبيلة خزاعة بيصلوا فى الحرم و منهم اللي راكع و إللي ساجد.. يدخل عليهم فجأة نوفل بقيبلته بالسلاح فى الحرم و يقتلوا و يذبحوا خزاعة واحد ورا التانى.. ذبح و قتل غير عادى و غدر للمسلمين..
فبدأت خزاعة تجرى ناحية الكعبة عشان تتحامى فيها لأن القتل فى الحرم محرم برده عند الكفار.. لكن نوفل كمل جرى وراهم جوه الحرم! فنادته قبيلته بني بكر و قالت له: "يا نوفل، إلهك إلهك! الحرم الحرم!" ( يعنى قوانين الآلهة بتحرم القتل عند الكعبة).
فقال نوفل: "أيها الناس، إنكم تسرقون فى الحرم، أفلا تقتلون فيه؟! " ( شوفوا بني بكر كانوا الأول بيسرقوا فى الحرم ودلوقتى هيقتلوا فيه .. فماحدش يحقر أي ذنب بيعمله لأن ممكن بعد كده الذنب ده يوصله لذنب أكبر. زي الكذب قال صل الله عليه و سلم: الكذب يهدي إلى الفجور. و فعلاً دخلت بني بكر الحرم و ذبحت خزاعة، فبسرعة جرى ناس من خزاعة ..قدروا يهربوا من القتل.. و هتوصل أخبار غدر قريش بالمسلمين للنبي عليه الصلاة و السلام.. و هتحاول قريش تخدع النبى عشان تخفي جريمة إتفاقها مع بنى بكر.. بس يا ترى إزاى؟

هنعرف التفاصيل بكرة إن شاء الله 🤍

سيرة_الرسول
الحلقة 171
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

تلخيص #فتح_مكة
عشان نقدر نستوعب الغزوات و الفتوحات سوا.. فإحنا اتفقنا إننا هنزل بوست يبقى فيها تفاصيل كل غزوة فى نقاط مختصرة و كمان أسبابها .. و بعدين هننزل يومياً بتفاصيل الغزوة كلها على حلقات بإذن الله.

#فتح_مكة ♡
الأسباب : - نقض كفار قريش لصلح الحديبية اللي كان بينها و بين النبي صل الله عليه و سلم و كان مدته 10 سنين و كانت من شروطه: ألا تقاتلونا و لا نقاتلكم و لا تعينوا أحد على قتالنا.
الأحداث : - أسلمت قبيلة خزاعة و انضمت للمسلمين و كان يوجد خلاف بينها و بين قبيلة اسمها بني بكر فلما أسلمت خزاعة، رفضت بني بكر الإسلام و اشتد كفرها و تحالفت مع قريش..
-خرجت قبيلة خزاعة لأداء العمرة. فلما بني بكر عرفت ده.. فراحت لعكرمة بن أبي جهل من كبار قريش و طلبت منه الإذن لقتال قبيلة خزاعة.. و وافق عكرمة و كان ده معناه إن قريش نقضت معاهدة "صلح الحديبية" اللي بينها و بين المسلمين.
- أمدت قريش قبيلة بني بكر بالسلاح و هجمت بني بكر على مسلمي بني خزاعة و قتلوهم في الحرم و هم راكعين و ساجدين و انتهكوا حرمة الحرم.. (و كان دين الكفر بينهى عن القتل فى الحرم زي الإسلام).
- ذهب عمرو بن سالم إلى رسول الله و أخبره إن قريش غدرت و نقضت العهد و بعد ما سمع النبي ﷺكلام عمرو، غضب غضباً شديداً و احمر وجهه الشريف، وقال: "نُصِرت يا عمرو بن سالم".
- هيأخذ النبي عليه الصلاة و السلام قرار بفتح مكة و ده هيحصل من غير نقطة دم واحدة.. و هيخرج النبيﷺ ب 10 اَلاف مسلم.
-و اجتمعت قريش عشان بسرعة يفكروا فى حل، قبل ما يعرف النبيﷺ خبر غدر قريش، فقال أبو سفيان نطلب من محمد أن يمد الصلح إلى عشرين عاماً بحيث تنتهي المعاهدة الأولى و تبدأ معاهدة تانية بتاريخها الجديد فساعتها الغدر هيبقى قبل المعاهدة الجديدة فيخدعوا النبي ﷺ أنه بعد ما يعرف القتل اللى حصل فساعتها مش هيقدر يقتص منهم.. لكن فشلت الخطة لأن النبي ﷺوصلت له أخبار الغدر و القتل من بدري.
- اتحرك جيش المسلمين و كان فى تعتيم جامد على خبر فتح مكة لدرجة إن النبىﷺ خرج بالجيش و ماقالش إنهم رايحين على مكة.. و أمرهم إنهم يتجهوا إلى منطقة ذي مُرٌة.. و بعد أيام أمر الجيش بالإنتقال فجأة فى إتجاه مكة.. فتضاربت الأخبار على جواسيس قريش لدرجة إن قريش عرفت بقدوم النبي ﷺ بعد قربه مسافة أميال من مكة ..
- طلع أبو سفيان بره مكة عشان يشوف الأخبار، فوجئ بجيش المسلمين باستعداده المهيب و قرر أبو سفيان إنه يعلن استسلام مكة و فعلاً سلم مكة للنبي ﷺو قال النبي صل الله عليه و سلم للكفار: من دخل بيته و أغلق عليه بابه فهو آمن و بسرعة راح أبوسفيان على مكة ينقل الكلام.. إن النبىﷺ جي بالسلام.
وصل المسلمون فى هيبة و استعداد عسكرى كبير هز قلوب قريش و تتكسر الأصنام حول الكعبة و يقف النبي فوق جبل الصفا و يكلم كفار مكة و يقول: ما تظنون أني فاعل بكم؟ قالوا: أخٌ كريم و ابن أخٌ كريم.. فقال صلوات ربي عليه و سلامه: اذهبوا فأنتم الطلقاء.. فى أعظم حدث شاهدته البشرية من أعظم البشر.. صل الله عليه سيدنا محمد 🤍

#السيرة_النبوية_بالعامية_لنورهان الشيخ

سيرة_الرسول
الحلقة 170
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

سرية ذات السلاسل (ج2 و الأخير)
انتصر المسلمين فى معركة ذات السلاسل بس حصل موقف عجيب أوى.. لما الجيش كان فى طريق رجوعه من المعركة، كانت الدنيا برد جداً ..بس كل ما الجيش يحاول يشعل نار عشان يدفوا.. يغضب سيدنا عمرو و يأمرهم إنهم يطفوها.. فالصحابة يطيعوه بس و هم مضايقين.. و تانى يوم لقوا سيدنا عمرو كان بيدور على ماء عشان يتوضأ بس ملقاش، بعدها بشوية سمعوه و هو بيقيم الصلاة، و هيقف بالناس إمام فافتكروا إنه بيصلى بيهم من غير وضوء، فقالوا: "لنشكونه إلى رسول الله" و فعلاً وصل المسلمون المدينة و بسرعة حكوا للنبي، فاستدعى النبي عليه الصلاة و السلام سيدنا عمرو بن العاص وقال له: "يا عمرو، أمنعتهم أن يشعلوا نيرانا فى البرد؟"، فرد سيدنا عمرو: "يا رسول الله، إنا انتصرنا على العدو، و كانوا أضعاف أضعاف أعدادنا، وأنا لا آمن مكرهم، ولا آمن الكمائن. فإني خشيت أن يكونوا متربصين بنا فيعرفون مكاننا من النيران"، فقال النبي: "أحسنت يا عمرو. ولكن هل صليت بدون وضوء؟"، فقال سيدنا عمرو: "لا والله يا رسول الله. ولكني رأيت الماء قد تجمد، و رأيت أنني لو توضأت به سأصيب بأذى، فتيممت و صليت بالناس " فقال النبي:"أحسنت يا عمرو".
المسلمين شافوا سيدنا عمرو و هو بيدور على الماء ولكن مشفهوش وهو بيتيمم... شفتوا بقى فقه سيدنا عمرو بن العاص رضي الله عنه وأرضاه، مع إنه أسلم من فترة قصيرة، تعرفوا إن العلماء أخذوا منه أنه يجوز للمتيمم أن يكون إمام المسلمين في صلاة الجماعة لأن النبي أقر بالفعل ده
- من نتائج إنتصار المسلمين أن زادت الهيبة للمسلمين، وأسلمت و هتسلم قبائل ضخمة جداً منها قبيلة: خزاعة، بني مرية، بني ذبيان، أشجع، غفار،.. و في حدث تانى مهم جداً هيحصل.. دلوقتى عدى على صلح الحديبية سنتين، رسول الله بقى عنده كام سنة؟ 60 سنة... يعنى باقى على وفاته 3 سنين عليه أفضل الصلاة والسلام.. ربنا هيسبب الأسباب عشان مكة تفتح سنة 8 هجريا.. طيب إيه إللي هيحصل؟

هنعرف المرة الجاية بإذن الله 🤍

سيرة_الرسول
الحلقة 169
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

سرية ذات السلاسل (ج1)
- انهاردة إحنا سنة 8 هجريا. السنة دى عندنا فى حدث مهم حصل فيها و هو خروج المسلمين فى سرية اسمها "ذات السلاسل" سبب الغزوة دى ان فيه قبيلة اسمها قضاعة غدرت بالمسلمين و هجمت على 15 صحابى و قتلتهم.. و لما وصلت الأخبار للنبى عليه الصلاة و السلام قام مجهز جيش لردع قبيلة قضاعة ...
خرجت سرية (يعنى جيش صغير بقيادة واحد من الصحابة.. و زى ما قلنا السرايا مش بيخرج فيها النبى) مين القائد بتاعها ؟ القائد كان عمرو بن العاص .. و كان يدوب عدى على إسلامه شهور.. و على فكرة مكنش الجيش كبير لأن المسلمين راجعين من مؤتة فكانوا تعبانين ..

فالمهم كون النبى جيش صغير و بعت لسيدنا عمرو و قال له : "يا عمرو، إني أريد أن أبعثك بجيش إلى قضاعة ،و إنى أرجو الله أن ينصرك عليهم و تأخذ غنائم من الحرب".
فحزن سيدنا عمرو و افتكر أن النبى فاكر ان عمرو هيرضى يطلع عشان مكاسب مادية ..فقال عمرو: "والله يا رسول الله ما على هذا أسلمت معك و إنما أسلمت لله عزوجل". فقال النبى: "أعلم هذا يا عمرو، ولكن يا عمرو نعم المال الصالح للرجل الصالح" .. طيب ليه النبى اختار عمرو بالذات؟ لأن عمرو كان من دهاة العرب و ذكى جدا فالنبى واثق فى قدراته.. و كمان لأن أم عمرو من قبيلة قضاعة..فلما الناس تلاقى ان عمرو قائد على المسلمين و فى بينه و بينهم قرابة فده هيألف قلوبهم للإسلام..
و فعلا خرج سيدنا عمرو بن العاص و معاه 300 فارس، و وصل عند أطراف منطقة المعركة و لقى أن أعداد الأعداء كبيرة جدا.. فبعت سيدنا عمرو إلى رسول الله يطلب المدد، فبعث النبى مدد ب200 فارس و على رأسهم سيدنا "عبيدة بن الجراح".و بدأ القتال، ووقت القتال كان قصير جدا وانتهى بانتصار حاسم للمسلمين بفضل الله عز وجل ..
و اتسمت المعركة بذات السلاسل لأن كان موجود فى موقع المعركة بئر اسمه السلاسل.. و كمان اتقال من كتر خوف الأعداء من المسلمين .. فجيش العدو عمل حاجة عجيبة أوى هى أن كل عشرة ربطوا نفسهم فى سلسلة حديد، عشان لو واحد هرب، التسعة يشدوه و يثبت فى المعركة.. طيب والنتيجة كانت إيه؟ نتيجة اللى عملوه كانت أن لما المسلمين يقتلوا واحد، كان يقع و يشد معاه التسعة اللى مربوطين فى السلسلة.. فعشان كده اتسمت بذات السلاسل.

نكمل الحلقة الجاية إن شاء الله 🤍

سيرة_الرسول
الحلقة 168
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_مؤتة (ج8 و الأخير)
أعظم خطة عرفتها البشرية 🤍

شفنا امبارح جيش المسلمين من 3000 جندى بعد ما حقق انتصارات و ثبات فى قتال شديد مع 200 ألف جندى من الغساسنة لمدة أكثر من 7 أيام.. بس الأكل بدأ يخلص و جيش المسلمين مش بيرتاح.. و لو الجيش كمل هتبقى إبادة للمسلمين..و لو المسلمين انسحبوا هيحاوطهم جيش الغساسنة فى الصحراء و برضو هلاك للمسلمين..

فبدأ خالد بن الوليد يفكر فى خطة يقدر بها ينقذ انتصار المسلمين فى الأيام اللى فاتت . و كانت أعظم خطة انسحاب عرفتها البشرية .. الخطة هدفها هى أن المسلمين ينسحبوا من غير ما الغساسنة يتبعوهم و يحاوطوهم.. فجمع خالد الجيش.. و خلى الفرقة اللى فى ميمنة الجيش تبدل مكانها مع ميسرة الجيش و الفرقة اللى فى مقدمة الجيش تتبدل مع مؤخرة الجيش. و وصى كل الجيش انه ينظف ملابسه و يهندم شكله و يسرح شعره .. عشان الغساسنة يفتكروا أن النبى عليه الصلاة و السلام بعت مدد يعنى جيش جديد يساعد باقى جيش المسلمين..

أصل الميمنة في جيش الغساسنة..حفظت شكل الجنود اللى فى ميمنة جيش المسلمين .. و الميسرة نفس الحكاية..لأنهم بقالهم 10 أيام بيحاربوا بعض فحفظوا بعض .. و باقى الخطة هى أن خالد سحب 300 فارس من جيش المسلمين و قسمهم لفرق كل فرقة منهم تقف بعيد على تلال كده صغيرة و وصاهم يفضلوا يتحركوا كتير عشان يحصل غبار فالغساسنة يحسوا أن عدد المسلمين كبير و ان فى مدد وصل..و فعلا تانى يوم جه جيش الغساسنة و بصوت عالى ينادى خالد على المسلمين: الله أكبر الله أكبر.. و تبدأ الكتائب تتحرك و تعمل غبار .. فارتبك جيش الغساسنة و لاقى شكل الناس متغير و شكلهم مدد جديد.. فانخفضت الروح المعنوية عندهم جامد و خافوا جدا .

و بدأت المعركة فى قتال شديد و قوة من المسلمين و فجأة نادى خالد فى المسلمين تانى و قال : يا عباد الله انسحبوا... عودوا عودوا.. فوقف قادة الغساسنة يقولون: لا تتبعوا المسلمين ( كمين..كمين )، أصل الغساسنة شايفين ان مادام المسلمين جابوا جيش جديد فيبقى القديم اللى بيحارب بقالوا أسبوع.. راح فين!! يبقى أكيد مستخبى و الانسحاب ده مكيدة هدفها اننا نروح ورا المسلمين فيزنقونا فى كمين ..
و بكده نجحت خطة خالد رضى الله عنه لأن الحقيقة أن مفيش جيش جديد و لا حتى فى كمين و رجع جيش المسلمين فى أمان للمدينة و فضلت الغساسنة مكانها..مستنيا الكمين
، طيب الانسحاب ده انتصار ؟ أيوة لأن النبى قال على خالد لما خد الراية : أخذ الراية سيف من سيوف الله يفتح الله على يديه .. يعنى ده يدل أن الانسحاب ده نصرة و فتح و خطوة للمسلمين فى سبيل الله و كانت بداية فتح بلاد الروم ..

و بكده خلصت غزوة مؤتة
نكمل المرة الجاية إن شاء الله🤍

سيرة_الرسول
الحلقة 167
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_مؤتة (ج7)
شفنا المرة اللى فاتت ثبات المسلمين بعددهم القليل قدام الغساسنة بعددهم الكبير أوى و اتقتل القادة اللى النبى عليه الصلاة و السلام وصى أنهم يحملوا راية الإسلام ..مات سيدنا زيد و مات بعده سيدنا جعفر و بيحكى سيدنا عبد الله بن عمر انه لقى 50 طعنة فى جسم سيدنا جعفر و مفيش ولا واحدة فيهم فى ضهره ..و ده دليل إنه مافكرش لحظة أن يرجع لكن فضل يواجه القتال.. و يكمل النبى و ينقل أحداث المعركة بمعجزة زى ما قلنا للمسلمين اللى معاه فى المدينة و يقول: مات جعفر و سقطت الراية فحملها عبد الله بن رواحة و قاتل فوقع شهيداً و سقطت الراية و سكت النبى..
فالمسلمين مستنيين .. و بيسمعوا الكلام فى ذهول و خوف خايفين الجيش ينهزم..و فجأة قال النبى : و قد حمل الراية سيف من سيوف الإسلام .. يا ترى النبى يقصد مين؟ أصل لما مات عبد الله بن رواحة، محدش عارف مين اللى هيبقى القائد بعد كده ..فطلع واحد اسمه ثابت بن أقرم و قام شايل الراية و قال لجيش المسلمين: اختاروا رجل منكم يحمل الراية .. فالمسلمين قالوا: أنت يا ثابت.. فماوافقش ثابت.. و جرى بالراية على خالد بن الوليد و قال له: كن علينا قائد و خذ الراية، فقال خالد: لا والله أنا لا أستحقها، فقال ثابت: لماذا؟
فقال خالد : أنت أسلمت قبلى و حاربت مع رسول الله فى غزوة بدر و أنا كنت كافر مشرك ، أقاتلكم و أصد عن سبيل الله، أنا لا أستحقها، خذها أنت يا أخى..(أصل خالد أسلم يدوب من 3 شهور و هو مش إنسان عادى ده محارب عظيم قبل و بعد الإسلام لكن شوفوا تربية النبي.. النبى مرضاش يخليه قائد من أول المعركة عشان مايدخلش فى قلب خالد الكبرياء و عشان خالد يربط الإنتصار بالله لكن مش بمهارة القائد).. فالمهم كل المسلمين أصروا ان خالد ياخد الراية و خدها خالد.
فحمل خالد الراية و قال الله أكبر، فقال النبي في المدينة أخذ الراية الآن سيف من سيوف الله ، يفتح الله على يديه،فقد أخذ الراية الآن خالد بن الوليد.. و من هنا النبى لقب خالد بسيف الله المسلول.
و كان تكريم جميل.. وكان من قوة القتال وطول المعركة بيحكى خالد و يقول : تكسرت فى يدى 9 سيوف (تخيلوا !! يعنى يحارب به كتير كتير و يتكسر و ياخد غيره)
شايفين جيش المسلمين ثابت قوى لكن بذل مجهود كبير و كمان الأكل بدأ يخلص.. و لو المسلمين كملوا المعركة هيبقى شئ مش حكيم أبدا ..و لو انسحبوا ..هيدخلوا الصحراء و يدوب بعد لحظات هيحاوطهم الغساسنة و هم 200000 و المسلمين 3000 فبكده هتحصل إبادة للمسلمين.. فضل خالد يفكر لحد ما وضع خطة بتدرس لحد دلوقتى في أوروبا..

هنعرفها المرة الجاية إن شاء الله 🤍

سيرة_الرسول
الحلقة 166
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_مؤتة (ج6)
شفنا المرة اللى فاتت ان المسلمين عددهم 3000 و عسكروا فى مكان ضيق عشان تتضطر الغساسنة تحاربهم بنفس العدد و قسمت الغساسنة جنودها لمجموعات كل مجموعة منهم 3000 ..و بيحاربوا المسلمين و بيبدلوا مع بعض عشان يرتاحوا ، لكن المسلمين هيثبتوا أد إيه قدام العدد الكبير ده ؟ هيثبتوا لمدة 6 أيام فى انتصار على جيش الغساسنة .. خسائر الأرواح عند المسلمين بالعشرات و عند الغساسنة بالآلاف ..
فبعد كل المدة دى الغساسنة لقوا إن كده مش نافع، المسلمين ثابتين زي الجبال..كأنهم مبيتعبوش.. فقال قائد الغساسنة: عليكم بصاحب هذه الراية.. يقصد مين؟

زيد بن حارثة ، لأن القائد لما بيموت بتتهز الروح المعنوية لجيشه فبتنتهى المعركة لكن النبى حبيبنا عليه الصلاة و السلام عامل حسابه و قال إن لو زيد مات يتولى جعفر القيادة و هكذا زى ما قلنا الحلقات اللى فات.
و فى اليوم السابع للمعركة كل جيش الغساسنة هدفهم قتل زيد بن حارثة.. و فى اللحظة دى النبى عليه الصلاة و السلام فى المدينة قلقان عليهم و نفسه يعرف أخبارهم..

فتحصل معجزة بأن يبدأ النبى ينقل للناس أحداث الغزوة و كأن ربنا رفع له أرض المعركة فبقى شايف اللى بيحصل فيها و هى فى أرض الشام.. و دى كانت من المعجزات الدالة على أنه رسول الله ـ صل الله عليه وسلم..فقال صل الله عليه وسلم : أخذ زيد الراية و قاتل و وقع شهيدا.. سقطت الراية..فأخذ الراية جعفر بن أبي طالب، و أراه يقاتل و يقاتلونه.. فاجتمعوا عليه ..ضربوا يده اليمنى فقطعوا ذراعه الأيمن، فسقطت الراية، فنزل جعفر أخذ الراية بيده اليسرى، قطعوا ذراعه الأيسر، فما تبقى من ذراعيه إلا العضدين ( المنطقة اللى فوق الكوع ) ، فانحنى جعفر و أخذ الراية بعضديه، فضربوه بالسيف..

و بدأ النبي يبكي على جعفر. و قال صل الله عليه وسلم: قتلوه و مات شهيدا، و أراه الآن في الجنة، و أبدله الله جناحين يطير بهما في الجنة حيث يشاء.. ( ربنا بدل الذراعين اللى اتقطعوا بجناحين فى الجنة ).. الصحابة لما عرفوا كده سموه بجعفر الطيار.. و كانوا بينادوا ابنه و يقولوله يا ابن ذى الجناحين.

نكمل الحلقة الجاية إن شاء الله 🤍

سيرة_الرسول
الحلقة 165
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_مؤتة (ج5)
علمنا رسول الله أن نتوكل على الله مع الأخذ بالأسباب و لكن دون التعلق بالأسباب ♡

خرج المسلمين للغزوة و عددهم 3000 جندى فقط بقيادة زيد بن حارثة و وصلت لهم أخبار أن الغساسنة و الرومان هيحاربوا ب200 ألف مقاتل.. فوقف زيد بن حارثة و جمع الجيش و قال " أشيروا عليَّ أيها الناس" ، فقال واحد منهم: أيها الأمير أرى أن المعركة غير متكافئة و أرى أن ننسحب، فقام رجل تانى قايل: ويحك ما تقول؟! أنعود إلى رسول الله ..ونقول تركنا أمرك؟! فوقف واحد كمان و قال: نبعث إلى رسول الله رسالة و نسأله مدد (بس طبعا ده صعب لأن عدد المسلمين كلهم أصلا قليل )، فوقف عبد الله بن رواحة و قال: أيها الناس ما بكم! إنكم خرجتم من أجل الشهادة .. أيها الناس نحن معاشر المسلمين لا نقاتل بعدد و لا بعدة ولا بجيش و إنما نقاتل بالله و بهذا الدين (يعني لو أنتم صادقين مع الله تعالى ربنا هيساعدكم) ..فقالوا " صدقت يا ابن رواحة " و بكده عبد الله بن رواحة ثبّت المسلمين فى أرض المعركة و قرروا يكملوا بس بخطة و نظام ..فالصحابة هيتوكلوا على الله أوي و كمان هيعملوا اللى عليهم و ياخدوا بالأسباب زى ما كان بيعلمهم النبى عليه الصلاة و السلام.
استعد المسلمون و من آداب الحرب أن اللى يوصل الأول من الجيوش هو اللي هيختار مكان المعركة .. فوصل المسلمين قبل الغساسنة و اختاروا مكان ضيق للقتال بحيث ما يقدرش كل جيش الغساسنة الدخول فيه لقتال المسلمين.. فساعتها ما ينفعش يدخل إلا عدد مساوى لعدد المسلمين وده كان ذكاء و حسن تخطيط من المسلمين لأنهم لو حاربوا الغساسنة بعددهم الكبير ده فى الصحراء الواسعة فهيكون معناه هلاك المسلمين لأن العدد غير متكافئ..
فجه جيش الغساسنة لاقى المسلمين سبقوا واختاروا المكان.. و فعلا اضطر الغساسنة يقسموا جيشهم على مجموعات كل مجموعة 3000 مقاتل و لكن فى صفوف ورا بعض..و نجحت خطة المسلمين بس في مشكلة أن ال 3000 مقاتل الأولانيين بتوع الغساسنة .. وراهم 3000 تانيين ..فكل ما 3000 يتعبوا.. يطلع بدالهم المجموعة اللى وراهم و هكذا، أما جيش المسلمين ما بيرتاحوش و لا بيتغيروا ..هم 3000 فقط من بداية المعركة لآخرها..
يا ترى هيقدر المسلمين يكملوا؟ طبعا هيقدروا بعون الله .

نكمل المرة الجاية إن شاء الله 🤍

سيرة_الرسول
الحلقة 164
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_مؤتة (ج4)
شُفنا النبى عليه الصلاة و السلام و هو بيوصى الجيش و كان الجيش 3000 جندى، و قال النبىﷺ أن القائد هو زيد بن حارثة.. فإن مات زيد فيتولى القيادة جعفر بن أبى طالب.. و إن مات جعفر فيتولى القيادة عبد الله بن رواحة ..و إن مات عبد الله بن رواحة فلازم المسلمين يختاروا واحد منهم يكون القائد عليهم.

ففى واحد من اليهود اسمه نعمان سمع كلام النبىﷺ و راح قال له: يا محمد أنت حددت أسماء تلات أشخاص وقلت إنهم ممكن يموتوا فى المعركة و عندنا فى التوراة أن لو أنت فعلاََ نبى يبقى التلاتة دول هيموتوا.. فالنبى ﷺ ماردش عليه.. فراح نعمان لزيد و قال له : يا زيد إن كان محمد نبياََ إذاً فأنت ميت لا محالة و إلا فإن نبيك كذاب، فقال زيد : والله إنى أشهد أن محمد رسول الله و أنه صادق و أنى سأموت لا محالة.. و خرج زيد فى الغزوة بسرعة و هو نفسه يموت علشان يخلى الناس تشوف صِدق النبى عليه الصلاة و السلام .. قال تعالى فى النبى محمدﷺ فى القرآن: "وَمَا يَنطِقُ عَنِ الْهَوَى* إِنْ هُوَ إِلَّا وَحْيٌ يُوحَى" [ سورة النجم ].

خرج المسلمين للمعركة و دلوقتى جت الأخبار بأن الغساسنة عددهم 100 ألف و كانوا خايفين من المسلمين لأن النبى ﷺ بيحقق إنتصارات ، فطلبوا مساعدات من حُلفائهم الرومان فأمدوهم ب 100 ألف تانية ،فبقى عدد جيش العدو 200 ألف مقاتل.. قصاد 3000 مسلم بس..و المعركة دي كانت مليانة صعوبات على المسلمين و هي أن المسافة اللى عسكر فيها المسلمين كانت بعيدة و كمان الأكل كان قليل معاهم و كانت الغزوة دى فى حر شهر أغسطس.
و فوق كل ده المعركة مش متكافئة و أعداد الغساسنة كبيرة جداً .. و ده هيخلى المسلمين يفكروا فى الرجوع للمدينة لكن فى واحد هيثبتهم فى أرض المعركة.

هنعرفه المرة الجاية إن شاء الله 🤍

سيرة_الرسول
الحلقة 163
يلا بينا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_مؤتة (ج3)
بدأ الجيش يستعد و وقف النبي صل الله عليه و سلم يوصى الجيش ويقول لهم : " أوصيكم بتقوى الله وبمن معكم من المسلمين خيراً، اغزوا باسم الله في سبيل الله ..ولاتغدروا ولاتقتلوا طفلاً ولا امرأة ولا عجوزاً ولا تقطعوا زرعاً ولا تهدموا بيتاً .. ستجدون رجالاً فى الصوامع ( رهبان مسيحيين و أحبار يهود) تفرغوا للعبادة دعوهم و ما هم فيه.. ولا تهجموا علي عدو ليلاً..
فقال المسلمين: لماذا يا رسول الله؟ فقال: "حتى لا تفزعوا النساء و الأطفال" ..شايفين أخلاق النبى ﷺ فى الحرب ..مافيش حد عرفها فى العالم قبل سيدنا محمد صل الله عليه وسلم ..و بعد ما النبىﷺ وصي الجيش..بدأ يقول إن قائد الجيش هو زيد بن حارثة ( فاكرينه؟ ده كان ابن النبى ﷺ بالتبنى و كان زمان اسمه إيه " زيد بن محمد " و بعد تحريم التبنى رجع تاني بقى اسمه زيد بن حارثة.. )

و كان من كتر حب النبى ﷺ لزيد كانوا يسموه " الحِبّ " و لما زيد خلف أسامة بن زيد بقى أسامة اسمه " الحِبّ ابن الحِبّ "
طيب دلوقتى زيد بن حارثة هو القائد .. طيب ليه؟ هو النبى ﷺ مش هيطلع مع الجيش؟ أيوة..أصل النبي عليه الصلاة والسلام يوم وفاته قرب فالنبى ﷺ عايز يهيئ الصحابة نفسياً إنهم يقدروا يكملوا من غير ما يكون النبىﷺ معاهم.. علشان يعرفوا يعيشوا من بعده.
وفعلاً بعد وفاة النبى ﷺ هنشوف مواقف الصحابة و خصوصاً عمر بن الخطاب.. عمر اللى كان زى الجبل .. اللى النبي عليه الصلاة و السلام قال عنه " لو كان بعدي نبياً لكان عمر بن الخطاب" و الصحابة كانوا بيقولوا : لما أسلم عمر ظهر الإسلام ودعا إليه علانية، وجلسنا حول البيت، وطفنا بالبيت لا نخاف من قريش ..

تعرفوا أن عمر يوم وفاة النبي ﷺ هيتهز..و هيبكي و يصرخ و يرفع سيفه و يقول " كذبتم..و من سيقول أن محمد قد مات سأقطع رأسه.. "
فالنبي عليه الصلاة والسلام عايز الصحابة يتهيئوا لموته فما خرجش معاهم فى الغزوة دى..

نكمل الحلقة الجاية تفاصيل الغزوة إن شاء الله 🤍

@

سيرة_الرسول
الحلقة 162
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_مؤتة (ج2)
استعد المسلمون لمحاربة الغساسنة و كلهم سمعوا كلام النبى و مصلوش الجمعة وراه و وقفوا على باب المدينة ماعدا عبد الله بن رواحة فكر يحضر الصلاة و يجرى بعدها يلحق الجيش .. فللأسف النبى عليه الصلاة و السلام وصل للجيش قبله و عرف أن عبدالله مش موجود .

و بعد دقايق وصل عبدالله و النبى زعل منه جداً و قال له: لو أنفقت ما فى الأرض جميعاً ما أدركت ما أدركه أصحابك .. (يعنى الغزو في سبيل الله خير من الدنيا و ما فيها و هم سبقوك للغزو) ..فبكى عبد الله و بيحكى و يقول : علمت أن رسول الله صل الله عليه وسلم غاضب عليا.. فقلت في نفسي والله ما يكفر عني هذه الخطيئة إلا أن أموت شهيداً..

فى بيت شعر جميل أوي لعبد الله بن رواحة : " لكنني أسأل الرحمن مغفرة و ضربة ذات قرع تقذف الزبدا .. أو طعنة بيدي حرّان مجهرة بحربة تنفد الأحشاء والكبدا .. حتى يقال إذا مرّوا على جدثى(قبرى) ،أرشده الله من غاز و قد رشدا "

ومرة عبد الله بن رواحة افتكر آية قرآنية فبكى ..
فسألوه لماذا تبكي يا عبد الله بن رواحة ،فقال لهم.. قال ربكم { وَإِنْ مِنْكُمْ إِلاَّ وَارِدُهَا كَانَ عَلَى رَبِّكَ حَتْماً مَقْضِيّاً } فقالوا له: أكمل باقي الآيات ،يقول الله فيها :{ ثُمَّ نُنَجِّي الَّذِينَ اتَّقَوْا وَنَذَرُ الظَّالِمِينَ فِيهَا جِثِيّاً }.

طيب الزوجات قبل الغزوات كانوا يودعوا الأزواج فيوقفوا يقولوا لأزواجهم حاجة حلوة أوي ..قالوا " حفظكم الله.. أيدكم الله.. نصركم الله.. وردكم الله بعز وجل إلينا صالحين " .. لاحظوا أنهم قالوا صالحين مش سالمين.. لأن الشخص ممكن يرجع من الحرب سالم يعنى سليم معافى لكن مش شرط يكون صالح ..أما الصالح ممكن يكون راجع مجروح بس الأكيد أنه ما أغضبش الله سبحانه وتعالى.. فدعت الزوجات بدعاء فعلاً جميل أوى .

نكمل بكرة إن شاء الله 🤍

سيرة_الرسول
الحلقة 161
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

#غزوة_مؤتة (ج1)

بعد ما اتقتل الحارث بن عمير "مرسال النبى صل الله عليه و سلم" على إيد الغساسنة .. وقف النبى ﷺ على المنبر بعد صلاة العشاء وقال: "من كان يؤمن بالله واليوم الآخر، فليتجهز عند الفجر لقتال الغساسنة".

والنبى ﷺ وصى الصحابة أنهم يستنوه على باب المدينة لحد ما يخطب خطبة الجمعة و بعدين هيروح لهم على باب المدينة ، و أكد عليهم أنهم يجهزوا حاجاتهم و ماحدش فيهم يصلى معاه الجمعة لأن ده هياخد وقت كتير و هيأخرهم و فى الحالة دى ممكن الغساسنة يغدروا بالمسلمين.

استعد الصحابة على باب المدينة و كان عددهم 3000 جندى، و وقفوا منتظرين رسول اللهﷺ ، ما عدا صحابى واحد هو "عبد الله بن رواحة"..طيب ليه؟ أصل عبد الله قعد يفكر و قال طب ما أحاول ألحق صلاة الجمعة و أول ما النبى ﷺ يخلص هجرى بسرعة و ألحق الجيش.. ف بكده كسبت الإتنين..

و فعلا راح عبد الله و صلى الجمعة، ولكن للأسف النبى عليه الصلاة و السلام بعد صلاة الجمعة سبقه و وصل للجيش قبله. فلما وصل النبى ﷺ للجيش، مالقاش عبدالله، فسأل عنه و قال: أين عبد الله بن رواحة؟ و بعد دقايق وصل عبد الله بن رواحة للجيش والنبىﷺ زعل منه و بص له بنظرة حزينة..

طيب رسول الله هيعمل إيه مع عبد الله؟
هنعرف المرة الجاية إن شاء الله.🤍

سيرة_الرسول
الحلقة 160
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

"تلخيص غزوة مؤتة .."

علشان نقدر نستوعب الغزوات سوا.. فإحنا اتفقنا إننا هنزل بوست يبقى فيها تفاصيل كل غزوة فى نقاط مختصرة و كمان أسبابها .. و بعدين هننزل يومياً بتفاصيل الغزوة كلها على حلقات بإذن الله.

#غزوة_مؤتة

1- سميت بهذا الاسم: لأنها حصلت فى منطقة فى الشام اسمها " مؤتة".

2- طرفي القتال :الطرف الأول... الغساسنة (و عددهم 100,000 مقاتل و طلبوا مدد 100,000 مقاتل من الرومان)
و الطرف التانى..المسلمين و عددهم (3000 جندى فقط).

3- أسباب الغزوة :
ردع غدر الغساسنة بعد قتلهم لمرسال رسول الله "عمير بن الحارث" اللى أرسله النبىﷺ برسالة يدعو فيها ملك بصرى للإسلام ..و قطع الطريق واحد اسمه شرحبيل الغسانى و قتل عمير و كان زمان قتل المرسال معناه إعلان للحرب و بداية لها..

4- أحداث الغزوة:
** دعا النبى عليه الصلاة والسلام المسلمين للخروج لقتال الغساسنة لردع هذا الغدر..

** كانت الغزوة فى حر شمس شهر أغسطس.. و كان الأكل قليل مع المسلمين..

** لم يخرج رسول الله فى المعركة.. و كان قائد المعركة زيد بن حارثة ..

** بعد ما شاف المسلمين أعداد الغساسنة الكبيرة..فكروا فى الانسحاب لأن المعركة غير متكافئة و لكن سيدنا عبد الله بن رواحة ثبتهم فى أرض المعركة و قال :ادخلوا إلى المعركة إننا لا نقاتل الناس بعدد ولا عدة و لا كثرة، و إنما النصر من عند الله عز و جل (يعنى لو أنتم صادقين مع الله ربنا هيساعدكم).

** اصطف المسلمين و ابتدت معركة حاسمة و لكن وقف المسلمين زى الأسود و مات العشرات من المسلمين و المئات من الغساسنة و الرومان.

** حمل الراية زيد و استشهد ثم جعفر بن أبى طالب و استشهد ثم عبد الله بن رواحة و استشهد و بعد وفاة حاملى الراية.. حملها خالد بن الوليد.

** ثبت ال3000 مسلم أمام 200000 من العدو..و بعد أيام بدأ جيش المسلمين يتعب لأنه مش بيرتاح أما جيش العدو بيبدل مع بعضه.. حبة يرتاح و حبة بدالهم بيحاربوا .. فكان رأى خالد ابن الوليد هو سرعة إيقاف المعركة ولكن لو انسحب المسلمون هيحاوطهم الغساسنة و الرومان فى الصحراء ،فكان الحل خطة عبقرية هيحطها خالد ابن الوليد و كانت نتيجتها أن جيش المسلمين قدر يخرج من المعركة بعد تحقيق انتصار مناسب لظروف المعركة الغير متكافئة..

** وصل الجيش المدينة هم اه انسحبوا لكن الانسحاب ده انتصار بدليل أن النبى ﷺ قال على خالد لما أخد الراية : أخذ الراية سيف من سيوف الله يفتح الله على يديه .. يعنى ده يدل أن الانسحاب ده نصرة و فتح و خطوة للمسلمين فى سبيل الله.

هنكمل تفاصيل الغزوة المرة الجاية إن شاءالله 🤍

سيرة_الرسول
الحلقة 159
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

الدعوة العالمية لدين الإسلام و إرسال رسائل إلى ملوك العالم (ج4)

النبى عليه الصلاة و السلام بيبعت رسائل لملوك العالم يدعوهم للإسلام و بعت رسالة لكسرى ملك الفرس.. و أرسل النبىﷺ الرسالة مع مرسال اسمه عبد الله بن حذافة السهمي ..فلما وصلت لكسرى الرسالة قرأها و قام مقطعها.

و أرسل النبى ﷺ رسالة لملك بُصرى مع مرسال اسمه الحارث بن عمير.. فقطع الطريق عليه واحد اسمه شراحبيل الغسانى و قتله .. و مملكة الغساسنة دى كانت مملكة نصرانية على حدود الشام تتحدث العربية و كانت عبارة عن 200 ألف شخص.. و كان قتل المرسال يعتبر إشارة أن هيحصل حرب ..و لما وصلت الأخبار للنبىﷺ أن الحارث اتقتل..بدأ النبى عليه الصلاة و السلام يجهز جيش للتصدى للغساسنة

و يقف النبىﷺ بعد صلاة العشاء، على المنبر و يقول: "من كان يؤمن بالله واليوم الآخر، فليتجهز عند الفجر لقتال الغساسنة"...طيب ليه القرار السريع ده يا رسول الله؟ النبى ﷺ حنين جداً و عطوف و رقيق، بس ساعة الغدر هتلاقيه قوى و شديد و حاسم جداً. لأنهم غدروا بالمسلمين و قتلوا المرسال ..و بكده النبىﷺ تغلب على نار القصاص اللى فى قلب الصحابة و زوجة الحارث بن عمير .. و كمان العالم كله هيعرف إن دم المسلم غالى أوى فمحدش هيتجرأ أنه يقتل أى مرسال يبعته النبىﷺ للبلاد التانية.. المهم هيخرج المسلمين فى غزوة اسمها غزوة مؤتة .

هنعرف تفاصيلها بكرة إن شاء الله🤍

سيرة_الرسول
الحلقة 158
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

الدعوة العالمية لدين الإسلام و إرسال رسائل إلى ملوك العالم (ج3)

شفنا إمبارح النبى عليه الصلاة و السلام لما بعت رسالة لهرقل يدعوه للإسلام، و طلب هرقل ناس من قوم النبىﷺ.. علشان يسألهم عليه.. و كان أبو سفيان سيد قريش فى رحلة تجارة فسأله هرقل شوية أسئلة ..تعالوا نعرفها سوا ..جاب هرقل مترجم و بدأ يسأل عن النبى ﷺ و يقول : ما نسب النبى محمد فيكم؟ قال أبو سفيان : هو فينا ذو نسب..فقال هرقل: هل ما يقوله محمد قاله أحد قبلَه؟ قال : لا.. فقال : هل يتبعه أشراف الناس أم ضعفاؤهم؟ فقال: بل ضعفاؤهم..( أصل كل الأنبياء كان بيتبعهم الضعفاء زى قوم نوح و قوم موسى ).

فقال: أتباعه يزيدون أم ينقصون؟ قال: بل يزيدون.. فقال: فهل يرتد أحدٌ منهم عن دين محمد بعد أن يدخل فيه؟ قال: لا .. فقال: هل كنتم تتهمونه بالكذب قبل أن يقول أنه نبى ؟ قال: لا..فقال: هل يغدِر؟ قال : لا، و لكن بيننا و بينه صُلح "صُلح الحديبية" و لا ندرى ما سيفعل فيها .. ( و بيحكى أبو سفيان و يقول :أنى ما لاقتش فرصة أنتهزها بأنى أقول كلام يشكك فى محمد إلا الكلمة دى).

و يكمل هرقل أسئلته ويقول: فهل حاربتوه؟ قال: نعم .. فقال: و كيف كان قتالكم إياه ؟ .. قال: تارة ننتصر عليه و تارة ينتصر علينا.. فقال: بماذا يأمركم ؟ قال أبو سفيان : "يأمرنا أن اعبدوا الله وحده ولا تشركوا به شيئاً، واتركوا ما يقول آباؤكم، ويأمرنا بالصلاة، والزكاة، والصدق، والعفاف و صلة الرحم " ..

و خلصت الأسئلة .. و بعدين هرقل قال لأبي سفيان : لو كان ما تقول عن محمد صحيح ،فإن محمد سوف يملك موضع قدميَّ هاتين (يعنى هيحقق إنتصارات و هينتشر فى العالم ) و إنى علمت بنبى آخر الزمان و لكنى لم أكن أعلم أنه سيخرج من جزيرة العرب .. و لو أستطيع أن أذهب إلي محمد لتحملت كل المشقة لأقابله و لو كنت عند محمد لجلست لأغسل قدميه ..

(طيب هل ده معناه إن هرقل أسلم؟ لأ.. لأن هرقل قال :" والله إني لأعلم أنه نبي مرسل، ولكني أخاف من الروم على نفسي، ولولا ذلك لاتبعته" فهرقل اختار الملك و النفوذ و رفض الإيمان .. و كمان هرقل هيدخل فى قتال ضد المسلمين فى غزوة مؤتة ).

هنحكى تفاصيلها فى الحلقات الجاية ان شاء الله🤍
سيرة_الرسول
الحلقة 159
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

الدعوة العالمية لدين الإسلام و إرسال رسائل إلى ملوك العالم (ج4)

النبى عليه الصلاة و السلام بيبعت رسائل لملوك العالم يدعوهم للإسلام و بعت رسالة لكسرى ملك الفرس.. و أرسل النبىﷺ الرسالة مع مرسال اسمه عبد الله بن حذافة السهمي ..فلما وصلت لكسرى الرسالة قرأها و قام مقطعها.

و أرسل النبى ﷺ رسالة لملك بُصرى مع مرسال اسمه الحارث بن عمير.. فقطع الطريق عليه واحد اسمه شراحبيل الغسانى و قتله .. و مملكة الغساسنة دى كانت مملكة نصرانية على حدود الشام تتحدث العربية و كانت عبارة عن 200 ألف شخص.. و كان قتل المرسال يعتبر إشارة أن هيحصل حرب ..و لما وصلت الأخبار للنبىﷺ أن الحارث اتقتل..بدأ النبى عليه الصلاة و السلام يجهز جيش للتصدى للغساسنة

و يقف النبىﷺ بعد صلاة العشاء، على المنبر و يقول: "من كان يؤمن بالله واليوم الآخر، فليتجهز عند الفجر لقتال الغساسنة"...طيب ليه القرار السريع ده يا رسول الله؟ النبى ﷺ حنين جداً و عطوف و رقيق، بس ساعة الغدر هتلاقيه قوى و شديد و حاسم جداً. لأنهم غدروا بالمسلمين و قتلوا المرسال ..و بكده النبىﷺ تغلب على نار القصاص اللى فى قلب الصحابة و زوجة الحارث بن عمير .. و كمان العالم كله هيعرف إن دم المسلم غالى أوى فمحدش هيتجرأ أنه يقتل أى مرسال يبعته النبىﷺ للبلاد التانية.. المهم هيخرج المسلمين فى غزوة اسمها غزوة مؤتة .

هنعرف تفاصيلها بكرة إن شاء الله🤍

سيرة_الرسول
الحلقة 155
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

رجوع أصحاب رسول الله من الحبشة (ج2)
و زواج النبىﷺ من رملة بنت أبى سفيان

نكمل سوا قصص الصحابة اللى رجعوا من الحبشة.. هنحكى قصة رملة بنت أبي سفيان رضى الله عنها ، و السيدة رملة هتبقى زوجة لرسول الله بعد كده .. و قصتها من البداية أنها كانت بنت أبو سفيان "سيد قريش" ، و أسلمت و هاجرت مع زوجها و مع الصحابة للحبشة بعد معاداة قريش لهم..

و حكينا قبل كده أن النبى عليه الصلاة و السلام هو اللى اختار الصحابة اللى هيهاجروا.. فاختار مسلمين فقراء و كمان اختار مسلمين أصحاب مكانة كبيرة.. و زى ما قلنا قبل كده إن رملة و رقية بنت رسول الله و زوجها عثمان بن عفان كانوا من الناس اللى مش محتاجة أنها تهاجر لأنهم ما اتعرضوش للتعذيب لأنهم من قبائل كبيرة فى مكة..

المهم فى وقت الهجرة من مكة للحبشة كانت السيدة رملة زوجة لواحد اسمه عبيد الله بن جحش و كان مسلم و هو اللى دعى رملة للإسلام.. و بعد زواجها منه هاجرت معاه للحبشة خلفت هناك بنت سموها حبيبة، و كانت كنيتها " أم حبيبة "..
و فى يوم السيدة رملة كانت نايمة و شافت رؤية فى المنام و اتفزعت منها . شافت زوجها عبيد الله فى أوحش صورة..فقامت من الحلم و فسرته أن شكله الوحش فى الحلم ده معناه أن حال زوجها هيبقى وحش ..

و فعلاً بعد فترة زوجها قال لها أنه عايز يسيب الإسلام و يدخل فى الدين النصرانى..يعنى ارتد عن الإسلام.. و زى ما إحنا عارفين إن الديانة الرسمية فى الحبشة كانت النصرانية..و حاول زوجها يقنعها أنها ترتد عن الإسلام لكن ثبتت السيدة رملة على الإسلام و أدمن عبيد الله بن جحش الخمر و مات.. و عاشت السيدة رملة هى و بنتها فى وحدة و إحنا عارفين إن أهلها كانوا كفار قريش فانقطعت عنها كل الأسباب اللى تطمنها على حياتها فى المستقبل هي و بنتها و مرت بظروف نفسية صعبة جداً..

لكن دايماً الأمل فى ربنا عز وجل .. و تشوف رملة فى المنام أن حد جاي عليها و بيقول لها " يا أم المؤمنين" فقامت من النوم مستبشرة و فسرت الحلم إن دى بشرى زواجها من رسول الله .. فيعرف النبى عليه الصلاة و السلام المعاناة و الألم اللى مرت به و بخبر عبيد إنه مات على دين النصرانية.. و إن رملة ثبتت و إنها مالهاش سند ..فيبدأ يعرض النبى ﷺ عليها الزواج..

النبى عليه الصلاة والسلام فى المدينة بس رغم كده النبىﷺ ماسابش الصحابة فى الحبشة بعيد من غير ما يعرف أحوالهم و أخبارهم..لكن بالعكس كان حاسس بهم و متابع كل أحوالهم.. فيبعت النبىﷺ مرسال لنجاشى الحبشة "ملك الحبشة" و طلب منه أن يخطب له رملة و يكون هو وكيل رملة (يعنى وكيل للعروسة كده زى ما بيحصل دلوقتى إن بنت يتكتب كتابها على خطيبها لو مسافر)..
بسرعة بعت النجاشى جارية تبلغ رملة بالخبر ..و تروح الجارية و تشوف رملة حزينة فتصرخ الجارية و تقول: معى بشارة لكى أرسلنى سيدى لأخبرك بأن رسول الله يريد الزواج منك .. فالجارية بتقول إن رملة فرحت أوووى أوى و قامت قالعة أسورتين من إيديها و إديتهم هدية للجارية جزاء البشرى الحلوة دى.. و فضلت الجارية مستغربة فرحة رملة و كأن الروح اتردت فيها.. فرحة الفرج بعد الكرب :) . و أسلمت الجارية .. و أظن أن أثر فيها سؤال اتردد جواها بإن مين محمد اللى الناس بتفرح و تحبه كل الحب ده ..اللهم صًّلِ على أجمل و أكمل خلقك .

نكمل بكرة إن شاء الله 🤍

سيرة_الرسول
الحلقة 154
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

رجوع أصحاب رسول الله من الحبشة (ج1)
حكينا فى حلقات فاتت أن النبى عليه الصلاة والسلام بعت جواب لنجاشى الحبشة و بيطلب منه أن الصحابة يرجعوا للمدينة ..(فاكرين الصحابة اللى هاجروا من تعذيب قريش و راحوا الحبشة؟! دول بقى لهم سنين فى الحبشة .. و أخيراً هيرجعوا دلوقتى لحضن النبى عليه الصلاة و السلام بعد ما اتحرموا منه ١٤ سنة) .

فيدخل الصحابة المدينة و يقابلهم النبىﷺ بكل لهفة و حب .. و كان من الصحابة دول، سيدنا جعفر بن أبى طالب" و ده يبقى ابن عم النبىﷺ " فيحضنه النبىﷺ و يقول مقولته الشهيرة: بأيهما أفرح بفتح خيبر أم بقدوم جعفر ..

و هنحكى قصص عنهم و هنبدأ بقصة : أسماء بنت عميس، أسماء كانت صاحبة السيدة " حفصة بنت عمر بن الخطاب" و لما دخلت المدينة راحت زارت حفصة و قعدت كل واحدة تحكى للتانية عن أحوالها .. فعدى سيدنا عمر فقال لحفصة: مين معاكى، فقالت: أسماء، فقال عمر : الحبشية (يعنى اللى رجعت من الحبشة) فقالت حفصة: نعم، و هنا بقى سيدنا عمر قال كلام هزار، بس أسماء هتاخد الكلام جد ..

قال لها عمر: أنتم لم تهاجروا مع رسول الله من مكة للمدينة و نحن أحق برسول الله منكم .. فأسماء ماضحكتش و أخدتها جد و قالت : لا لستم أحق برسول الله منا فأنتم كنتم في صحبته يطعم جائعكم و ينصح جاهلكم و يحنو عليكم ، أما نحن فكنا هناك في البعداء البغضاء و حُرمنا مصاحبته و كان كل ذلك فى سبيل الله و رسوله، فلستم أحق برسول الله منا.. و بكت أسماء و قالت لعمر: لأشكونك إلى رسول الله دون أن أزيد أو أنقص شيئا، و فعلا راحت أسماء للنبى ﷺ و حكت له كلام عمر ..
فرد النبى ﷺ عليها و قال: نعم ليسوا أحق بى منكم فإن عمر و أصحابه هم أصحاب هجرة واحدة، و لكم أنتم أهل السفينة، هجرتان " ( علشان هم هاجروا فى سبيل الله مرتين .. مرة من مكة للحبشة فأطلق عليهم اسم "أهل السفينة" لأنهم هاجروا بالسفينة .. و الهجرة التانية هجرتهم من الحبشة للمدينة و كل ده فى سبيل الثبات على دين الله فبالتالى هم أولى برسول الله ) .

بس أنا و أنتم برضو محرومين من رسول الله و ماشفناهوش بس هقول لكم حديث هيفرحكم أوى أوى، النبى عليه الصلاة و السلام قال: " عبادة في الهرج كهجرة إليّ " يعنى وقت ثباتك على طاعة الله و حواليك ناس مش بتعملها و بتعصى ربنا.. فأنت بثباتك بتبقى هجرت معصية..و بقيت فى هجرة فى سبيل الله و رسوله ..فياترى كام هجرة هاجرتها للنبىﷺ ؟!.. كل ما تثبت على طاعة وسط معاصى كتير بيعملها اللى حواليك، بتزيد هجرة لرسول الله و بتكون أولى برسول الله ﷺ .

المهم فرحت أسماء بنت عميس برد النبى جداً ..و قالت : والله ما فرحت بشئ بعد دخولى الإسلام أكثر من فرحتى بهذا الحديث .. و كل الصحابة اللى كانوا راجعين معاها من الحبشة فرحوا جداً .. و إحنا و أنتم أكيد كمان فرحانين جداً

نكمل المرة الجاية إن شاء الله 🤍

سيرة_الرسول
الحلقة 153
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

غزوة خيبر (ج8 و الأخير )
تزوج النبىﷺ من السيدة صفية و شاف أن نص وشها وارم و لونه أخضر من أثر ضرب عنيف !! فقال النبىﷺ : ما بكِ يا صفية ؟ فقالت له: يا رسول الله رأيت يوماً فى المنام رؤية .. رأيت كأن القمر سقط من السماء و نزل فى حجرى (الرؤية دى معناها أنها بتتمنى الزواج من النبى ﷺ و أنها هتتزوجه )، فصفية بمنتهى التلقائية حكت لزوجها الحلم و زوجها كان من أحبار اليهود (يعنى رجل دين يهودى) فقال لها: أتتمنين ملك يثرب و ضربها لحد ما وشها بقى أخضر و وارم ..

و كمان النبىﷺ أشفق على صفية علشان كانت زعلانة أن أهلها ماتوا فى المعركة لكن النبى ﷺ حكى لصفية عن اليهود و اللى عملوه فى المسلمين من غدر و خيانة فبتقول صفية فضل النبىﷺ يطيب خاطرها مع أنه ماعملهاش حاجة .. و اليهود هم اللى معتدين .. بس النبىﷺ فضل يطيب خاطر صفية .. شايفين حنين قد إيه؟ اللهم صل على سيدنا محمد .

وتعرفوا أن بعد زواج السيدة صفية من النبىﷺ .. فلما خرج النبى ﷺ تانى يوم الصبح ،لاقى سيدنا أبو أيوب الأنصارى رايح جاى قدام البيت و ماسك سيفه !! فالنبى ﷺ قال له: ما بك يا أبا أيوب ؟ فقال: بتُ الليلة كلها على الباب يا رسول الله لأحرسك.. فقال :مِمن ؟ فقال: خِفتُ عليك من تلك اليهودية ، قُتل أبوها و زوجها ، فخِفت أن تحاول أن تُؤذيكَ .. فوقفت عند الباب فلو سمعت إيذاءً منها لك ..دخلت فضربت عُنقها يا رسول الله !!..
فضحك النبىﷺ و قال: اللهم احفظ أبا أيوب كما بات يحفظنى..

السيدة عائشة لما عرفت خبر الزواج .. غارت جداً (و لها حق هي دى مشاعر حب و غيرة برده بشر..و كانت تقول فى الآخر استغفر لى يا رسول الله) فمرة راحت للنبى ﷺ و قالت: يا رسول الله أتزوجت صفية!! حسبك صفية !! ( و شاورت بإيديها كده، عايزة تقول له أنها قصيرة و فعلاً السيدة صفية كانت قصيرة جداََ ) فقال النبىﷺ: يا عائشة لقد قلتى كلمة لو مُزجت بماء البحر لمزجتهُ..(لو الكلمة دى قلبناها فى البحر.. لون البحر هيتغير و يتعكر.. لأن دى غَيبة) ..

فى حاجة كمان جميلة أوى.. الغرب بيتكلموا دايماً عن الإتيكيت و معاملة الزوج لزوجته و أن الزوج بيفتح لزوجته باب العربية.. تعالوا بقى اتفرجوا عندنا فى السُنة النبوية كان النبىﷺ بيعامل زوجاته إزاى .. كل الإتيكت و كل ده كان عندنا من 1400 سنة.. السيدة صفية كانت قصيرة أوى ما تعرفش تطلع على الناقة.. فكان النبىﷺ يعمل إيه؟ يحط ركبته على الأرض وينصب الأخرى و يشاور لصفية علشان تطلع على رجله كأن رجله سلمة من السلالم..فصفية تستحى أن تضع قدمها على فخذ رسول الله بس تسمع كلامه و تحط رجليها على ركبة النبىﷺ و تطلع .. شايفين الرقى فى التعامل.. صل الله على محمد، صل الله عليه و على آله وسلم ..

كانت السيدة صفية بتحب النبى جداً لدرجة أن يوم وفاته كانت كل الزوجات مجتمعين عنده و هى كانت متأخرة فكانت عمالة تجرى و تبكى.. خايفة يموت و ما تلحقش تكلمه.. فدخلت عليه و هى بتبكى فقعدت على ركبتها و قالت: يا رسول الله والله وددت لو أن ما بك بى و تكون أنت سليماً معافى (عارفين لما حد يقول لحد: ياريت اللى فيك يكون فيا) .. فالسيدة عائشة كانت واقفة و طبعاً غارت.. فزوجات النبىﷺ اتغامزوا ( كأن كل واحدة بتقول للتانية شايفة صفية بتقول إيه !!) فشافهم النبى ﷺ فقال:تتغامزان عليها ووالله إنها صادقة ..

و كانت برده السيدة صفية بتحاول تتودد للنبىﷺ فراحت جابت هدية جميلة جداً لفاطمة بنت محمد علشان تتودد للنبىﷺ .
فى قصة تانية حصلت لما النبى ﷺ كان خلاص طالع من خيبر ..جت ست يهودية اسمها زينب و بعتت للنبى ﷺ صينية كبيرة فيها شاة مشوية هدية و النبى ﷺ كان بيقبل الهدية.. كان يأكل الهدية ولا يأكل الصدقة و كانت الست دى حاطة في الأكل سم .. و سألت أى حتة من الشاة بيحبها رسول الله ﷺ؟ فقالوا الكتف.. فحقنت الكتف بسم كتير.. فالنبى ﷺ أخد الهدية عادى و يدوب هيبدأ ياكل هو و الصحابة (عمره ما يأكل لوحده ) فحط النبىﷺ إيده وأخد أول لقمة حطها فى بقه و قفل عليها شفايفه بس كان لسه ما أكلهاش ، و كان قاعد قدامه صحابى اسمه بشر بن البراء فبشر مد إيده أخد لقمة حطها جوه بقهُ.. بس بشر بيقول: حسيت بحاجة (فى حاجة فى الشاة مش طبيعية) بس بصيت للنبى ﷺ لقيته قفل شفايفه و هيبدأ يمضغ.. فقفلت شفايفى و بدأت أمضغ و بعدين فجأة النبىﷺ بصق الأكل من فمه و قال: ارفعوا أيديكم ارفعوا أيديكم إن الشاة تُحدثنى أنها مسمومة !! ..دى معجزة .. أصل ربنا بيحمى النبىﷺ..قال تعالى: وَاللَّهُ يَعْصِمُكَ مِنَ النَّاس [سورة المائدة -67].. بس كان فى اللحظة اللى قال النبىﷺ فيها ارفعوا أيديكم .. كان بشر خلاص بلع اللقمة اللى أكلها للأسف.. فدمعت عيون بشر و قال: أكلتها يا رسول الله ، و والله وجدت الذى تقول (أنا حسيت بالسم) وأحسست به فى الطعام ولكن نظرتُ إليك فوجدتك تأكل، فما كنت لأنغُص طعامك يا رسول الله..

و رجوت ألا يكون فيها بأس (قلت يا رب مايكونش فيها سم) .

فحزن النبى ﷺ واستدعى زينب دى بسرعة و قال لها: لماذا فعلت هذا ؟ فقالت: قلتُ إن كنت رسول الله حقاً فإن الله سيُنجيك و إن كنت كذاباً استرحنا منك .. عارفين النبىﷺ قال لها إيه ؟ قال: امضى ( النبى ﷺسابها تمشى و مش هيعاقبها و سامح فى حقه) بس بعد ساعات مات بشر بن البراء ،فلما مات بٍشر أمر النبى ﷺ بقتل اليهودية .. و ده علشان حكم القصاص " وَلَكُمْ فِي الْقِصَاصِ حَيَاةٌ يَاْ أُولِيْ الأَلْبَابِ لَعَلَّكُمْ تَتَّقُونَ " (سورة البقرة) لأن لازم من قتل يُقتل .. فخلوا بالكم علشان بعد كده لو سمعتوا أن النبىﷺ قتل ست يهودية .. اعرفوا أنه قتلها علشان قتلت بنى آدم..

آخر قصة هنختم بها هى قصة جميلة.. قصة صحابى اسمه الحجاج بن عِلاط .. خلاص النبى ﷺخرج من خيبر و قرب من المدينة.. بس سؤال هو إيه حال قُريش دلوقتى ؟؟ أهل قُريش فى مكة بيتمنوا ليل نهار أن يهود خيبر ينتصروا على النبى ﷺ فبيدعوا اللات والعزى ليل نهار أن خيبر تنتصر فقاعدين على باب مكة مستنيين أى أخبار من خيبر .. الحجاج بن عِلاط ده أسلم بس قُريش ماتعرفش بإسلامه و كان له فلوس فى مكة ، فراح للنبى ﷺ و قال له : يا رسول الله أنا ليّ فلوسى فى مكة فممكن تأذن لى قبل ما مكة تعرف إنى أسلمت .. فينفع أروح أخد فلوسى منهم الأول وأجيب مراتى و أرجع لك ؟ فالنبىﷺ وافق ..
فوصل الحجاج لمكة..فسألوه: جئتنا من خيبر يا حجاج فبشرنا..ما فعلت يهود خيبر؟ فقال: أُبشركم و لكن أأتونى بأموالى ؟ فقالوا: سنؤتيك بكل ما تريد و لكن بشرنا ، فقال: الخبر على ما تُحِبوا (افرحوا اللى نفسكم فيه حصل) بس أعطونى أموالى أولاً ، فجمعوا له كل أمواله .. و سألوه ما حدث؟ فقال الحجاج : أبشروا يا معشر قُريش هُزم و أُسر محمد و انتصرت خيبر وأخذنا الغنائم منهم و اتقتل المسلمون وأنا ذاهب إليهم لأشترى من غنائم أخذوها من جيش محمد (الحرب خدعة و المسلمين فى حرب فعلشان كده ماقالش الحقيقة).

ففرحت قُريش و عملت حفلة كبيرة و ذبحت الذبائح و شربوا الخمر و غنت المُغنيات ... بس فى حد ما استحملش الخبر ..عارفين مين ؟ سيدنا العباس عم رسول الله..ده كان يخفى إسلامه.. فأُقعِد لما سمع الخبر ( مابقاش قادر يتحرك ) ،الخبر كان شديد عليه أوى وكان عنده ولد من أولاده اسمه قُثم كان شبه النبى ﷺ أوى، فخده فى حضنه وقعد يبكى و يقول: حبى قثم شبيهُ ذى الأنفِ الأشم (يعنى حبيبى قثم اللى أنفك شبه أنف محمد )..و فضل يبكى و يقول أبيات شعر و يبكى و كان عنده غلام بيشتغل عنده فقال له: يا بُنى اذهب إلى السوق و قل للحجاج بن عِلاط يُقسم عليك العباس بأن تنظر إلى ما تقول (يعنى بجد كلامك ده حصل؟ ) .

فجرى الغلام و قال للحجاج أن العباس مش قادر يتحرك من شدة الخبر .. فقال الحجاج : يا بُنى اذهب إلى العباس و بشره و قل له أن الأمر على ما يُحب و لكن ليُخلى لىّ إحدى بيوته..( يعنى خليه يشوف مكان فاضى و أنا هقابله و أحكي له )، فالولد طلع يجرى فمن فرحته و هو على باب البيت قبل ما يدخل قال: يا سيدى العباس أبشر ..بس الحمد لله ماحدش سمعه فالعباس عارفين لما سمع كلمة أبشر،، عمل إيه ؟ قام وقف و طلع يجرى يفتح له الباب (الشلل راح ) و حضن الولد و كان العباس لابس عباية فقام حاطيتها على كتاف الولد و قال له أنت عتيق من اليوم و مش هتبقى عبد عندى من النهاردة.

و بعد شوية جه الحجاج و قال: يا عباس أبشر انتصر رسول الله و هزم الله اليهود و قعد يحكي له و حصل كذا وكذا بس أنا عملت كده علشان أخد فلوسى منهم ، فاكتم عنى ثلاثة (ماتجيبش سيرة و بعد 3 أيام اعمل اللى أنت عايزه ... علشان بس أكون وصلت للمدينة) فقال : سأفعل و فعلاً بعد 3 ليالى خرج العباس فلاقى كفار قريش عمالين يهزروا ويضحكوا (هم مهيصين بقالهم 3 أيام أصلاً ) فقالوا له: لا نأتيك فى بأسٍ أبداً يعنى منجيلكش فى حاجة وحشة..(أصلهم شمتانين فى العباس لأنه عم النبى ﷺ و عارفين إنه زعلان أن النبى ﷺ اتأسر .. لكن مش عارفين إن العباس مسلم ).. فقال العباس: والله ما أصابنى بأس ..قالوا كيف ؟ فقال: نصر اللهُ محمد و هزم الله خيبر وحصل وحصل ... فغضبوا جداً و قالوا إذاً فعلها الحجاج ليأخذ ماله .. و عرفوا بانتصار المسلمين .. و بكده خلصت أحداث خيبر خلاص..

نكمل المرة الجاية إن شاء الله 🤍

ما بالك بعد ما أسلمت) وتم الزواج المبارك ، ولما تزوجها النبىﷺ و شاف أن نص وشها وارم و لونه أخضر من أثر ضرب عنيف !! فقال النبى ﷺ: ما بكِ يا صفية ؟؟ فقالت .....

هنعرف المرة الجاية إن شاء الله 🤍

سيرة_الرسول
الحلقة 152
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة خيبر (ج7)
فتح المسلمين الحصن الأول وهرب اليهود للحصن التانى و اتفتح برده ..رغم أن عدد اليهود 10000 و عدد المسلمين 2000..ويوصل جيش المسلمين للحصن التالت بس كان دخوله صعب جداً ..، فربنا عز وجل سَخَّر إنسان من اليهود و ألقى فى قلبه الرعب بسبب إنتصارات المسلمين من حصن لحصن.. فراح للنبى عليه الصلاة و السلام و طلب منه الأمان و قال : يا أبا القاسم لو حاصرتم هذا الحصن عام كامل لن يخرج منه اليهود !! لأن هناك بئر يصل منه الماء إلى داخل الحصن .. فإن قطعت طريق الماء عليهم خرجوا من الحصن.. و فعلاً المسلمين سمعوا كلامه و استسلم اليهود و اتفتح الحصن التالت..

و بدأ جيش المسلمين يتحرك على الحصن الرابع و اتفتح و كان من الغنائم سلاح اسمه المنجنيق ( المنجنيق ده .. إنك تجيب كرة مشتعلة نار و تحطها فى مجرى السلاح و فى حبل ، أول ما تشده ح
هتخرج الكرة دى بإندفاع و تقع على العدو و ده من الآلات الحربية القديمة) فلما دخل المسلمين الحصن الرابع لاقوا أن المنجنيق كان جاهز للضرب .. يعنى كان اليهود هيحدفوا الكرة المشتعلة على المسلمين !!

بس رغم كده النبى ﷺ برده مش عايز يأذى اليهود ،فلما أخد المسلمين المنجنيق، أمر النبى ﷺ المسلمين يضربوا بالمنجنيق فى الهوا لكن مش فى إتجاه اليهود علشان الهدف إنهم يخافوا بس فيستسلموا (و ده علشان النبىﷺ مش بيسعى لحرب هو بس بيردع اليهود علشان الحروب اللى تسببوا لنا فيها زمان.. "ارجعوا للأجزاء اللى فاتت و اعرفوا أسباب الغزوة ") فيتفتح الحصن الخامس و السادس و السابع و التامن.. و يستسلم اليهود.. و ده انتصار حاسم للمسلمين ..

اليهود عرضوا على النبىﷺ أنهم يستمروا فى خدمة أرض خيبر و يزرعوها .. فوافق النبىﷺ و عمل صلح معاهم و قرر يعطيهم نصف ثمار خيبر سنويا مقابل نزع السلاح منهم ( طيب ليه الشروط دى يا رسول الله ؟ علشان طبع يهود خيبر كان الغدر فلازم ننزع منهم السلاح ..و اللى بيوجع اليهود الفلوس فلازم النبى ﷺ يعمل شئ يأثر فيهم علشان يفكروا ألف مرة قبل ما يغدروا تانى فأعطاهم نصف الثمار ) .

فيوافق اليهود و تحصل المعاهدة.. و يرجع المسلمين للمدينة و يبعت النبىﷺ، الصحابى عبد الله بن رواحة كل فترة علشان ياخد المحصول من اليهود ،فأول مرة أعطوا له نصف الثمار زى ما عاهدوا النبى ﷺو تانى و تالت و رابع مرة.. أما خامس مرة قالوا يا عبد الله ممكن تقول للنبى ﷺ أنك جيت المرة دى فلاقيت المحصول قل شوية ..و جمعوا له دهب من بتاع زوجاتهم و قالوا له خد الدهب ده لك و قول لمحمد إن الثمار كانت قليلة المرة دى (يعنى رشوة و دى إهانة جامدة خصوصاً لو هدفها أنك تكذب على النبى عليه الصلاة و السلام) عارفين عبد الله بن رواحة عمل إيه ؟

قال: أترشوننى !! يا معشر اليهود جئتكم من عند أحب الخلق إليَّ، ولأنتم عندي أبغض خلق الله ، ومع ذلك لا يحملني هذا أن أحيف عليكم(يعنى أنا مش طايقكم و نفسي بعد ما عرضتم عليَّ الرشوة دي أؤذيكم جامد...لكن كرهي لكم ده مش هيخلينى أظلمكم .. يعنى مش هكبر الموضوع و هعديها لكم) و يكمل عبد الله بن رواحة كلامه و يقول : يا معشر اليهود فالذى عرضتم علي من رشوة فإنها سُحت وإنّا لا نأكلها .. فرد اليهود و قالوا: بهذا العدل قامت السماوات والأرض وبهذا غلبتمونا.

ده اللى حصل فى غزوة خيبر ..بس فى شوية أحداث حصلت وقت رجوع جيش المسلمين للمدينة أول حدث هو زواج السيدة صفية بنت حُيَيّ بن أخطب من النبى ﷺ.. صفية كانت بنت سيد اليهود "حيي بن أخطب" اللى اتقتل فى غزوة خيبر و كمان زوجها هو " ابن أبى حقيق " و ده برده اتقتل فى المبارزة بين اليهود و المسلمين اللى حصلت بين الطرفين وأسلمت صفية بس ماكانتش قادرة تفضل قاعدة فى خيبر لأن اليهود هيقتلوها لو عرفوا أنها أسلمت..

فتزوجها النبى ﷺ و عاشت فى بلاد المسلمين .. طيب هل النبى ﷺ عايز يتجوزها لمجرد الجواز ؟ لأ طبعاً .. أولاً رأفةً بحالها (مات أبوها و جوزها و كمان دى بنت سيد القبيلة يعنى مش هتقدر تتزوج و تعيش مع أى شخص عادى .. و لو النبى ﷺ طلب أى حد من الصحابة إنه يتجوزها كده بيحطهم فى موقف محرج لأن الصحابى هيضطر ينفذ طلب النبىﷺ) .

و السبب التانى و الأهم أن دى بنت سيد خيبر ..فالنبىﷺ هيصد آذاهم بزواجه من صفية لأن هيحصل مصاهرة و نسب بين يهود خيبر و بين المسلمين.. فصعب إن اليهود ينقضوا العهد لأن لما تحارب أصهارك دا عيب أوى فى مجتمعهم زمان ..فكان زواج النبىﷺ من صفية له ثمرة كبيرة أوى.. فالنبى عليه الصلاة و السلام يعرض عليها الزواج..فترد صفية و تقول : والله يا رسول الله كنت أتمناها فى الجاهلية ،فكيف فى الإسلام ! (يعنى ده أنا كنت بدعى ربنا إنى أتزوجك و أنا كافرة..

لا طبعاً ماتخافوش خالص لأن خلى بالكم من كلمة "فيما يبدو للناس" اللى فى الحديث ..يعنى دا معناه إن الشخص ده منافق مش بيعمل الطاعات دى علشان ربنا.. و الحقيقة إنه بيتمنظر بها علشان الناس تقول عليه إنه طائع ، فربنا يُخزي الشخص ده و يخليه يموت على معصية فيدخل النار .. و العكس واحد أنت شايفه بيعمل معصية بس لما بيرجع بيته بيعيط طول الليل مثلاً وأنت مش شايفه فده عند ربنا أحسن من الطائع المُرائى اللى بيعمل الطاعة علشان الناس تشوفه.. فييجى العاصى ده ربنا يموته على توبة و طاعة فيدخل الجنة.. ( فالعبرة مش بالظاهر ،العبرة باللى بينك و بين الله و إن شاء الله كلنا بنجاهد و نسعى للعمل لإبتغاء رضا الله وحده) .

نكمل بكرة فتح باقى حصون خيبر إن شاء الله 🤍

سيرة_الرسول
الحلقة 151
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة خيبر (ج6)
خلاص بدأ المسلمين يفتحوا الحصن الأول بس قبل فتح الحصن حصلت شوية قصص منها أن كان فى شاب " عبد" يهودى كان أسمر ..و كان معدى بالغنم بتاع الناس اللى بيشتغل عندهم، فربنا سبحانه و تعالى ألقى فى قلبه الإسلام ، فَرَاح للنبىﷺ و قال : يا رسول الله أنا عبد من اليهود وأشهد أن لا إله إلا الله وأنك رسول الله .. ففرح النبى ﷺ به جداً جداً ، و بعدين الشاب قال : يا رسول الله إن معى هذه الغنم لسيدى و ليست من حقى فأريد أن أرد الغنم إليه و أعود إليك و لكنى أخاف أن يقتلونى بسبب إسلامى.

فالنبىﷺ فرح لأنه حس أن الشاب عنده أمانة ،فقال النبى ﷺ: يا بنى أحصب فى وجهها ،ترجع الغنم إلى أهلها (يعنى خد حبة رمل و ارميها عليهم فهترجع الغنم لأصحابها على طول ) طبعاً دى معجزة.. و فعلاً أخد الراعى شوية رمل و رماها على الغنم ، فجريت الغنم و دخلت الحصن و اتقفل وراهم باب الحصن ، فالشاب قال: يا رسول الله أرأيت إن قاتلت معك اليوم فقُتلت، هل سأدخل الجنة ؟ فقال النبى ﷺ :نعم.. فقال الولد : يا رسول أمثلى يدخل الجنة ؟! يا رسول الله أنا أسود اللون و عبد فقير قبيح الخلقة، هل أدخل الجنة ؟

فقال النبىﷺ : نعم و يُبيض الله وجهك و يُجمل صورتك و يُزوجك من الحور العين..فبكى العبد و فى فتح الحصن دخل الشاب فقاتل و بعد ساعات قليلة وقع شهيد فقال النبى عليه الصلاة و السلام : أشهد أنه من أهل الجنة ..

فى قصة تانية برده ،أن واحد أعرابى أسلم فراح للنبى ﷺ وقال له : يا رسول الله أنا من الأعراب ( من الصحراء و طبعهم كان صعب شوية..بس النبى ﷺكان بيستوعبهم ) و بيقول الأعرابى للنبىﷺ : أرأيت إن اتبعتك اليوم و قاتلت معك، فقُتلت فأين أكون؟ فقال النبى ﷺ : فى الجنة ، فرد و قال: أكون فى الجنة !! فقال له النبىﷺ : نعم ،فقال الأعرابى: أشهد أن لا إله إلا الله وأنك رسول الله..

و بعد ما حصل القتال فى الحصن الأول ..و الأعرابى ما ماتش و اتفتح الحصن الأول و أخد المسلمين الغنائم فقسم النبىﷺ الغنائم و بعت للأعرابى نصيبه ، فغضب الأعرابى و رجع للنبى صلى الله عليه و سلم و قال له : ما هذا يا رسول الله ؟ فقال النبى ﷺ : هذا نصيبك من الغنائم .. فقال الأعرابى : أعلى هذا اتبعتك ؟ (ده كان الإتفاق بينا؟! ) والله ما اتبعتك على هذا يا رسول الله و إنما اتبعتك على سهم أُضرب به ها هنا (و شاور على رقبته ) فأموت فأدخل الجنة ، فقال النبىﷺ: اصدُق الله يصدقك .

و فعلاً تانى يوم يموت الأعرابي و الصحابة يحملوه للنبىﷺ.. فالنبى ﷺ يقول: أهو .. هو ؟! فقالوا: نعم .. ( والسهم فى المكان الذى أشار إليه) فقال النبىﷺ : صدق الله فصدقه الله .. و رفع النبى ﷺ يديه و قال: اللهم إن عبدك هذا خرج مجاهداً فى سبيلك فقتل شهيداً و أنا شهيدٌ عليه .. ( شايفين جمال الصدق مع الله سبحانه وتعالى.. لما الأعرابى صدق فى نيته ربنا حقق له اللى اتمناه)

و كمان العكس حصل ..كان فيه فارس عمال يقاتل قتال ممتاز جداً و مميز جداً جداً ، فواحد من الصحابة قال: هنيئاً لهذا الفارس فإن مات فهو من أهل الجنة ، فقال النبىﷺ : لا هو من أهل النار !! .. ففزع الصحابة (لأنه قدامهم بيحارب معاهم فإزاى يدخل النار) ففى صحابى ما قدرش يتحمل فقال: فخرجت فتابعت الرجل (مشيت وراه علشان أشوف هيعمل إيه ؟) فبيقول: ففضلت مراقبه لحد ما وقع فى وسط القتال و كان مجروح جرج جامد جداً فقام غرس سيفه فى الرملة و خلى طرف السيف لفوق و سند على السيف ببطنه و ضغط و قتل نفسه !! يعنى انتحر ..

فبكى الصحابى و جرى على النبى ﷺ و قال: أشهد أنك رسول الله ، ما أطلعك على هذا إلا الله (ماحدش قالك إن ده هيحصل غير ربنا.. أكيد) أشهد أنك رسول الله ، و بدأ يحكى الصحابى على اللى شافه بإن فعلاً الفارس انتحر و فعلاً بقى من أهل النار .. فيقوم النبىﷺ يقول حديث شديد أوى :" إن الرجل ليعمل بعمل أهل الجنة فيما يبدو للناس حتى ما يكون بينه وبينها إلا ذراع فيسبق عليه الكتاب، فيعمل بعمل أهل النار..فيدخلها، و إن الرجل ليعمل بعمل أهل النار فيما يبدو للناس حتى ما يكون بينه وبينها إلا ذراع، فيسبق عليه الكتاب، فيعمل بعمل أهل الجنة، فيدخلها" ..

يعنى ممكن واحد كان طول عمره طائع لله و قريب من ربنا فالناس تفتكر إنه خلاص من أهل الجنة و فى يوم يعمل معصية فيموت عليها فيدخل النار و العكس ممكن واحد يكون عاصى وبيعمل ذنوب كتير و بعيد عن ربنا فالناس تفتكر إنه أكيد من أهل النار .. و بعدين يتوب قبل ما يموت بأيام و يصلى فيموت ساجد بحسن خاتمة كمان و يدخل الجنة .. طيب ده كده كل الناس الطائعة لله تترعب و تخاف أنها ممكن قبل ما تموت تعمل معصية فتخش النار فى الآخر؟

سيرة_الرسول
الحلقة 150
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة خيبر (ج5)
شفنا الحلقة اللى فاتت النبى عليه الصلاة و السلام و هو بيحمس الصحابة و يقول لهم سأعطى الراية غداً لرجل يحبه الله و رسوله..و كل الصحابة باتوا متشوقين و كل واحد فيهم نفسه ياخد الراية.. و وقت صلاة الفجر خرج النبى ﷺ للصلاة فبيحكى الصحابة و بيقولوا : فتقاتلنا على الصف الأول (كل واحد عايز يقف فى الصف الأول علشان أول ما النبى ﷺ يخلص صلاة و يلف لهم ،فيكون هو أول واحد يشوفه النبى ﷺ ، فيقوم يعطيه الراية) .

فمجرد ما النبىﷺ خلص الصلاة فالتفت فقال: أين علىّ بن أبى طالب؟ فقالوا : يشتكى عينه .. و يطلب النبى ﷺ أنه يشوف سيدنا علىّ فيقول له: ما بك يا علىّ ؟ ما بك أبا تُراب .. (( عارفين سيدنا علىّ كانت كُنيته أبا تُراب و كان بيحب الكُنية دى أوى لأن النبى ﷺ هو اللى سماه بها ، مرة النبى ﷺ راح يزور فاطمة رضى الله عنها فدخل.. فلاقى علىّ مش موجود، فقال لفاطمة: أين ابن عمك ؟ فقالت: يا رسول الله غاضبنى فخرج و لم ينم القيلولة عندى "خرج و سابنى و مانامش الظهر عندى " فقال لواحد من الصحابة يشوف له فين علىّ، فعرف النبى ﷺ أن علىّ فى المسجد،( شوفوا بقى دلوقتى لما واحد حماه يروح يطيب خاطره ).

فيروح النبى صل الله عليه وسلم لسيدنا علىّ فلاقاه نايم على الآخر، فدخل النبى ﷺ و قعد على ركبه و بدأ ينفض التراب من على جنب سيدنا علىّ و من على شعره و يقول له: قم أبا تُراب فضحك علىّ و قام فقال النبى ﷺ له: قم أبا تُراب معى إلى فاطمة .. فكان علىّ لو حد عايز يفرحه يناديه و يقول له: يا أبا تُراب.

المهم طلب النبىﷺ أنه يشوف عليّ ( على فكرة النبى كانﷺ تعبان كان عنده صداع مزمن بيجي له كل فتره اسمه الشقيقة ).

فشاف النبى ﷺ سيدنا علي و قال له: مِمَ تشتكى يا علي ؟ فقال: عينى يا رسول الله ( علي كان عنده رمد .. ماكانش بيشوف بعينه و ممكن يقعد يوم أو يومين مش شايف )

فيقول النبىﷺ لعليّ: يا علي ضع رأسك فى حجرى، فحط علىّ رأسه فى حجر النبىﷺ فبدأ النبى يتفل و يمسح على عين علىّ و يدعو و يتفل و يدعو ( وزى ما قلنا إن النبىﷺ له خصائص غيرنا..حتى عرقه كان مسك).. فبيحكى علي و يقول: فقال لى النبىﷺ قم يا علىّ.. فقمت فوالله أصبحت أُبصر بعينى حتى أنى أكاد لا أذكر أيهما كانت المُصابة و ما شكوت الرمد بعد ذلك أبداً..

فقال النبىﷺ : يا علىّ خُذ الراية و اذهب يفتح الله على يديك ولا تلتفت (ماتبصش وراك) .. فقال: سأفعل يا رسول الله ، وفعلاً انطلق علىّ بس بعد ما بعد عن النبى ﷺ شوية ..

فافتكر إن فى سؤال ما سألهوش للنبى ﷺ و هو هل أدعوهم للإسلام أولاً أم أحاربهم على الفور؟( علشان إحنا عارفين إن اليهود هم اللى بدأوا بالغدر) فعليّ عايز يرجع يسأل النبىﷺ بس النبى ﷺ قال له لا تلتفت.. عارفين عليّ هيعمل إيه ؟ هيرجع بظهره علشان ما يكسرش كلام النبى ﷺ تخيلوا!! رضى الله عن علىّ ، فبدأ عليّ يرجع بظهره لحد ما حس أن النبى قريب فقال: يا رسول الله .. فضحك النبىﷺ و قال: ما بك يا علىّ ؟ فقال: يا رسول الله ..أريد أن أسألك أأدعو أهل خيبر للإسلام أولاً ؟ فالنبى ﷺ يقول له : "يا علىّ ادعُهم أولاً .. لئن يهدى الله بك رجلاً واحداً خيرٌ لك من الدنيا و ما فيها " ( لو تحب تفتكر معانا أسباب الغزوة، ارجع للحلقات اللى فاتت).

فانطلق علىّ بن أبى طالب و وصل عند حصن الناعم .. فغرس عليّ الراية ( ودى جرأة كبيرة من سيدنا عليّ ) فخرج واحد من اليهود ، فقال: من أنت ؟ و كيف تفعل هذا ؟ فقال: أنا علىّ بن أبى طالب .. فاتخض اليهودى و جرى بسرعة على اليهود اللى جوه الحصن وعمال يصرخ و يقول: هُزمتم و حق ما أنزل على موسى .. ( أصل اليهود مكتوب عندهم أن أول هزيمة هتكون على يد رجل اسمه علىّ بن أبى طالب ) .

فبدأ اليهود يحصل لهم هزيمة نفسية، فخرج فارس يهودى مابيتهزمش أبداً اسمه مرحب و كان عايز يستفز المسلمينّ علشان يدخلوا معاه فى مبارزة، فخرج مرحب وقال: هل من مبارز ؟ فطلع له سيدنا عامر بن الأكوع .. فاتقتل الأكوع و استشهد.. وكان مرحب بيقول أبيات شعر علشان يستفز المسلمين و قال :قد علمت خيبر أني مرحب .. شاكي السلاح بطل مجرب .. إذا الحروب أقبلت تلهب ..

فيرد عليه سيدنا عليّ رضى الله عنه فى ساعتها و يقول له : " أنا الذي سمتني أمي حيدرة .. كليث غابات كريه المنظرَ .. أكيلكم بالصاع كيل السندرة "
وبدأت المبارزة و بعد لحظات يقع مرحب اليهودى قتيلاً فطلع ياسر (أخو مرحب) فسيدنا الزبير بن العوام قام طالع له .. و يدخل الزبير فيلاقي ياسر طويل ..

فالنبى ﷺ كان بيتفرج فقال: سبحان الله ما أطوله !! فجت أم الزبير بسرعة فقالت: يا رسول الله سيقتل ابنى !! فقال النبى عليه الصلاة و السلام : لا تخافى بل ابنك سيقتله إن شاء الله. و بدأت المبارزة و فعلاً بعد لحظات اتقتل ياسر اليهودى على يد الزبير..

نكمل المرة الجاية إن شاء الله 🤍

سيرة_الرسول
الحلقة 149
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة خيبر (ج4)
الْمُؤْمِنُ مَأْلَفَةٌ ، وَلا خَيْرَ فِيمَنْ لا يَأْلَفُ وَلا يُؤْلَفُ

وصل المسلمين لمنطقة خيبر و قلنا أسباب الغزوة دى فى الحلقات اللى فاتت.. و على فكرة يقال إن اسم خيبر معناه الحصون باللغة السريانية.. علشان كده المنطقة اللى فيها يهود خيبر اتسمت بالاسم ده لأنها كانت فيها 8 حصون ..و هم متقسمين.. ل 5 حصون ورا بعض و بعدين مسافة وأرض فاضية و بعدين 3 حصون ورا بعض و كلهم كأنهم خط مستقيم ...

فالنبى عليه الصلاة و السلام هيعسكر بالجيش قدام أول حصن علشان يعرف يحاصر .. فييجي صحابى و يقول: يا رسول الله هناك مكان أفضل منه ، و هو أن جيش المسلمين يعسكر فى الأرض الفاضية اللى بين ال 5 وال 3 حصون.. لكن مش هيعسكر فى النص بينهم بالظبط و لكن هيعسكر بزاوية بحيث أن الجيش يبقى شايف ال 8 حصون .. فغَير النبى ﷺ مكانه و أخد برأى الصحابى و الصحابى ده كان اسمه الحُباب بن المنذر ..( شايفين جمال سيدنا النبى ﷺ و هو بياخد بالمشورة ) .

و وقف النبى ﷺ علشان يوصى الجيش بالتوصيات الأخيرة بأخلاقه الحربية النبيلة اللى مافيش زيها فى الدنيا .. فقال صل الله عليه و سلم : " أيها الناس اغزوا فى سبيل الله و قاتلوا فى سبيل الله ولا تقتلوا شيخاً ولا تقتلوا إمرأةً ولا تقتلوا طفلاً ولا تهدموا بيتاً ولا تحرقوا زرعاً ..ستجدون رهباناً فى الصوامع تفرغوا للعبادة دعوهم و ما هم فيه و لا تهجموا ليلاً .. فقالوا: لماذا يا رسول الله ؟ فقال النبى ﷺ: "حتى لا تُفزعِوا النساء والأطفال" .. أصلنا مسلمين و مش عدوانيين..

النبى ﷺ له حديث جميل أوى بيقول : " الْمُؤْمِنُ مَأْلَفَةٌ ، وَلا خَيْرَ فِيمَنْ لا يَأْلَفُ وَلا يُؤْلَفُ " يعنى المؤمن بيحب الناس و الناس بتحبه و بيبقى طيب و حنين لكن وقت القتال هيقاتل بس على حق و فى سبيل الله .. و يقف المسلمين عند الحصن الأول و اسمه حصن ناعم و تم حصاره حوالى 10 أيام و كان صعب جداً و اشتد الجوع و الأكل بدأ يخلص من المسلمين..أصل زى ما قلنا أن يهود خيبر واخدين الأكل و الشرب جوه الحصن .

و بيحكى واحد من الصحابة اسمه عبد الله بن المُغفل و بيقول : كنت جائعا بشدة فوجدت جِراباً به شحم (حتة جلد اتبقت من غنم) ففرحت بها و أخذتها و قلت بصوت واطى "والله لا أُعطى أحداً منها أبداً " (هاكلها لوحدى .. أنا جعان أوى ) فبيقول: فالتفتُ فوجدت رسول الله أمامى.. فابتسم ﷺ إبتسامة رقيقة و تركنى.. (النبىﷺ ماقالش لعبد الله حاجة لكن ابتسم و كأنه بيقول : كده بردو تاكل من غير إخوانك ..من غير الصحابة !!) فبيقول عبد الله : فاستحييتُ من نفسى و والله ما ذقتها و قسمتها على خمسة من أصحابى..( شوفوا النبى عليه و السلام كان بيربى الصحابة من نظرة عنيه.. تحسوا أن فى تفاهم عالى بين الصحابة و بين النبىﷺ ، يبص بصة لعبد الله بن المُغفل يفهم هو عايز إيه ).

و دلوقتى هتحصل مشكلة للنبى ﷺ.. النبى ﷺ هيتعب .. هتجي له حاجة اسمها الشقيقة (فاكرين فى غزوة أُحد لما ابن قمئة ضرب النبى ﷺ بالسيف فى نص راسه فدخل الحديد اللى فى الخوذة فى وجه النبىﷺ و نزف كتير أوى .. من اليوم ده و النبىﷺ بقى بيجى له صداع نصفى مزمن. يعنى كل فترة يهاجمه الصداع ده من قوة الضربة و لما كان بيجى له ماكانش بيعرف يقوم من السرير) فيسلم النبى ﷺ الراية لأبو بكر الصديق لكن برده الحصن لسه ما اتفتحش..و بعدين لعمر بن الخطاب و برده الحصن ما يتفتحش.. و بدأت الصحابة نفسيتهم تتعب و معنوياتهم تقل... بس شوفوا بقى حبيبكم النبىﷺ هيعمل إيه .. هيخلى معنويات الصحابة تتغير تماما..

فيقوم النبى ﷺ و يتسند على الصحابة و يقف يصلى العشاء و بعد الصلاة يبص لهم و يقول: "أيها الناس والله لأعطين الراية غداً لرجل يُحب الله و رسوله و يُحبه الله و رسوله ليس بفرّار (مش جبان) يفتح الله على يديه (ربنا هينصره)" .. فبات الناس مشتاقين يا ترى مين مننا هياخد الراية؟ .. فبيحكى سيدنا عُمر بن الخطاب بعد كده و بيقول: والله إنى كنت أكره الإمارة و ما تمنيتها إلا فى هذا اليوم..( لأنى هبقى ضامن أن ربنا بيحبنى و الرسول بيحبنى )..
فى ناس من بعض أعداء الإسلام قالوا أن القصة دى بتبين أن سيدنا عمر رضى الله عنه شخص بيطمع فى السلطة .. لكن حاشاه رضى الله عنه.. النبى صل الله عليه و سلم قال: من سب أصحابي فعليه لعنة الله والملائكة والناس أجمعين .

فالدليل أن عُمر بن الخطاب ماكانش بيطمع فى الولاية هو أنه كان رافض أنه يتولى الخلافة بعد أبو بكر الصديق.. أصل بعد وفاة النبى ﷺ تولى الخلافة أبو بكر الصديق .. و وقت تعب سيدنا أبو بكر قبل وفاته عمل شورى فالناس اختارت عمر بن الخطاب من بعده.. و أبو بكر على فراش الموت، استدعى عُمر ..فقال له: يا ابن الخطاب اجلس ف جلس، فقال: يا ابن الخطاب اختارك الناس و اخترتك لتكون خليفتى من بعدى .. فقال عمر : لا حاجة لى في الخلافة..

فيلح أبو بكر عليه فيرفض عمر بشدة و يقوم يمشى ، فقام أبو بكر وهو فى عز تعبه و انفعل جداً و رفع سيفه و قال: والله يا ابن الخطاب لئن لم تقبل الخلافة لضربتُ عنقك .. فعمر يتخض على أبو بكر علشان قام من سريره وهو عيان .. فقال له : لا عليك، قبلت يا أبا بكر قبلت قبلت ..

سيدنا عُمر و هو على فراش الموت كان بيبكى و يقول ليت أم عُمر لم تلد عُمر، ليتنى أخرج من الدنيا لا لى و لا علىّ ولا وُليت من أمر المسلمين شيئاً ، سيدنا عُمر ده اللى اتقال عنه "حكمت فعدلت فأمنت فنمت يا عُمر " .. فعُمر ماكانش بيحب الإمارة أبداً ولا تمناها إلا يوم خيبر علشان النبىﷺ قال: سأعطى الراية لرجل يحبه الله ورسوله ..و ربنا عز و جل قال: وَفِي ذَلِكَ فَلْيَتَنَافَسِ الْمُتَنَافِسُونَ ..

المهم بات المسلمين اليوم ده يفكروا .. و بقى كل واحد منهم يعرض نفسه على رسول الله ﷺ ( يعنى كل ما النبى ﷺ يطلع من خيمته، و بقوا يبينوا نفسهم للنبى ﷺو يعدوا من قدامه لعله يختار حد فيهم و يديهم الراية ) لحد ما بات كل الجيش و كل واحد طمعان فى أن يكون الأمير ( شايفين قد إيه النبى ﷺ مش شخصية عادية .. كان بيعاملهم سيكيولوجياً و بيعاملهم بالتنمية النفسية و بيعاملهم بالمنطق و بيعاملهم بالحب) .. صل الله على محمد، صل الله عليه وسلم.

نكمل بكرة إن شاء الله 🤍

سيرة_الرسول
الحلقة 148
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة خيبر (ج3)
خرج جيش المسلمين و قربنا من خيبر ، و فى نص المسافة يحصل مفاجأة !! .. فاكرين قبيلة غطفان اللى شاركت فى غزوة الأحزاب.. فيهود خيبر اللى عددهم 10000 اتحالفوا مع غطفان علشان هم عايزين لما النبىﷺ يقرب من خيبر تقوم غطفان هاجمة على جيش المسلمين من الخلف و يخرج يهود خيبر من الأمام و بكده جيش المسلمين يبقى محاصر و دى طبعاً كارثة للمسلمين ، المهم غطفان وافقت على التحالف مع يهود خيبر مقابل إن خيبر تديها ثمارها لمدة عام كامل ..

و عن طريق مخابرات جيش المسلمين عرف النبى ﷺ بالتحالف ده ..فقرر يعمل مفاوضات مع غطفان (شايفين النبىﷺ مش متهور.. ما انفعلش و حاربهم.. لأن الحل الأصح هنا هو التفاوض) فيروح النبى ﷺ بنفسه لغطفان .. و يقول : يا معشر غطفان عودوا ، فقالوا: لا نعود .. فقال النبىﷺ : يا معشر غطفان عودوا و لكم عندى نصف ثمار خيبر لمدة عام..(النبى ﷺ واثق أنه هينتصر على يهود خيبر بإذن الله ) فقالوا: وعدتنا خيبر بثمارها كلها لمدة عام..فقال النبىﷺ : إذاً سأعطيها لكم لمدة عام ..فقالوا: ثمار اليهود أحبُ إلينا من ثمارك .. و بكده رفضت غطفان التفاوض.
فيرجع النبى ﷺ ،و تقوم المخابرات الإسلامية تدس واحد يخفى إسلامه وسط غطفان ..و بعد وصول جيش غطفان لنص الطريق، فيطلع إشاعة و يقول :
يا معشر غطفان أدركونا !! (ألحقونا ..) فقالوا: ما الأمر؟ فقال : "مُحمد !! خرج بجيش إلى خيبر و بجيش إلى غطفان فسيأخذ أموالكم و يأسر نسائكم و يقتل أبنائكم ". و صدقوا و فعلاً رجع الجيش بسرعة علشان يحموا أموالهم و نسائهم وأبنائهم لأن ده أهم من خيبر طبعاً .

و أول ما دخلوا البلد لقوا الدنيا هادية و مافيش أى حاجة.. و كان النبى ﷺ خلاص قرب جداً من خيبر .. صدق الله تعالى : " إِنَّ اللَّهَ يُدَافِعُ عَنِ الَّذِينَ آمَنُوا " [ الحج-38] وصل جيش المسلمين لخيبر.. بس الصحابة تعبوا لأن الطريق كان طويل.. فالنبىﷺ كان عايز يرفع روحهم المعنوية ..فوقف صحابى اسمه عامر بن الأكوع و بدأ يردد أبيات حفر الخندق اللى كان بيقولها المسلمين فى غزوة الأحزاب ..اللهم لولا أنت ما اهتدينا * ولا تصدقنا ولا صلينا.. أنزل سكينة علينا * وثبت الأقدام إن لاقينا.. إن الطغاةَ قد بغوا علينا * إذا أرادوا فتنةً أبينا.. فالجيش تحمس جداً .

و وصل المسلمون لحد خيبر.. فالنبىﷺ يقول لهم يقفوا !! طيب ليه يا رسول الله ؟ علشان نقول دعاء دخول القرية ..( أى بلد جديدة تروحوها قولوا الدعاء ده ... مرة كان فى حد كان داخل مكان معين مليان معاصى فالشخص ده داخل البلد و هو على الباب.. قام قايل لنفسه أقول دعاء دخول القرية ، عارفين كانت النتيجة إيه ؟؟ أن وسط كل المعاصى اللى كانت فى البلد دى قدر يختم كتاب أحاديث كامل حفظ الأحاديث و قرأ شرحها .. و هو ماكانش يعتقد أبداً أنه ممكن يعمل أى طاعة فى البلد اللى داخلها دى ..و دى كانت بركة طاعة النبى عليه الصلاة و السلام ).

أصل النبى ﷺ عارف اللى ينفعنا و أدرى بنا قال تعالى :"النَّبِيُّ أَوْلَى بِالْمُؤْمِنِينَ مِنْ أَنْفُسِهِمْ" [ الأحزاب -6 ] افتكروا دايماً كلمة أبو بكر الصديق: يا رسول الله أنت مبارك .. فطاعة النبى ﷺ بركة ..طيب يلا نحفظ دعاء دخول القرية سوا ..يقول النبىﷺ : " اللَّهُمَّ رَبَّ السَّمَوَاتِ السَّبْعِ وَمَا أَظْلَلْنَ ، وَرَبَّ الأَرَضِينِ السَّبْعِ وَمَا أَقْلَلْنَ ، وَرَبَّ الشَّيَاطِينِ وَمَا أَضْلَلْنَ ، وَرَبَّ الرِّيَاحِ وَمَا ذَرَيْنَ ، فَإِنَّا نَسْأَلُكَ خَيْرَ هَذِهِ الْقَرْيَةِ وَ خَيْرَ أَهْلِهَا ، وَنَعُوذُ بِكَ مِنْ شَرِّهَا وَشَرِّ أَهْلِهَا وَشَرِّ مَا فِيهَا " ... شايفين يستحيل واحد داخل يسفك الدماء و يقتل و ينتقم يقول دعاء زى ده.. لأن الدعاء كله سلام ..ده أكبر دليل أن النبى ﷺ نبى السلام.

نكمل المرة الجاية إن شاء الله🤍

فتقول فأعطيته رأسى فألبسنى القلادة ..ووالله منذ أن وضعها فى رقبتى فلم تفارق صدرى أبداً طوال حياتى وأمرت أن يدفنوا القلادة معى فى قبرى و أمرت أن يُجعل فى غُسلى حين أموت ماءً و ملحاً
و كنت أريد أن تكون القلادة معى فى قبرى حتى إذا انشق عنى القبر يوم القيامة فأخرج منه ومعى القلادة فأبحث عن النبى ﷺفى أرض المحشر وأقول يا رسول الله أتذكرنى !! أنا جارية خيبر..خذنى وأدخلنى معك الجنة يا رسول الله. (شوفتوا القصة جميلة إزاى..شوفتوا حنية النبى ﷺ.. أى بنت فى الوقت ده بتبقى محتاجة لأمها..فتخيلوا النبىﷺ بلغ من الحنان اللى يغنيها عن أمها ، أحن الخلق ﷺ زى ما ربنا قال:"لَقَدْ جَاءَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَءُوفٌ رَّحِيم "[سورة التوبة]
صل الله على محمد وعلى آله وسلم .

نكمل بكرة إن شاء الله🤍

سيرة_الرسول
الحلقة 147
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة خيبر (ج2)
شفنا المرة اللى فاتت جيش المسلمين وهو بيستعد لردع يهود خيبر بعد غدرهم و تحريضهم للفرس والروم للهجوم على المسلمين فى المدينة وكان الصحابى أبو حدرد بيستعد للخروج فجاله واحد يهودى عشان يسترد الدين منه قبل الميعاد اللى كانوا متفقين عليه ،لأن اليهودى قال له: ماذا لو مت فى الغزوة يا أبا حدرد ، رد لى مالى..
و يروح اليهودى و أبو حدرد للنبى ..فالنبى ﷺ حكم على أبو حدرد إنه مش هيطلع الغزوة إلا لو سدد الدين..فيبكى أبو حدرد ويقعد على الأرض يفكر لأنه معاهوش فلوس ..وماكانش معاه إلا العمامة اللى على رأسه اللى بتحميه من حر الشمس وكان لابس عبايتين علشان العباية التانية خفيفة تكاد تكشف عورته و ماينفعش يخرج بها قدام الناس فراح السوق باع عبايته وفك عمامته وباعها فماتبقاش غير العباية البسيطة بتاعته فاستحى من نفسه جداً ..
فراح و أعطى لليهودى فلوسه بس قعد فى الطريق حزين بيفكر (هيخرج للغزوة إزاى بالمنظر ده) فمرت عليه إمرأة عجوز من الأنصار، فقالت له: لماذا تبكى يا صاحب رسول الله؟ فقال: يا أمى حدث كذا وكذا وبعت ثيابى ولا أدرى كيف أخرج مع رسول اللهﷺ بملابسى هذه.. فقالت: لا تبكى يا بُنى، خذ بُردتى (عبايتى) و قامت جابت له العباية بتاعتها ..وقالت: حتى أكون معكم فى القتال وأشارككم فى الأجر بعبائتى. ( مجتمع جميل فعلا وزى ما النبى ﷺ قال: مثل المؤمن للمؤمن كالبُنيان يشد بعضه بعضاً، و قال تعالى: إِنَّمَا الْمُؤْمِنُونَ إِخْوَةٌ [الحجرات] علشان كده كان مجتمع ناجح جداً) و فعلاً أخد أبو حدرد عبايتها و خرج بها مع النبى ﷺ.
فى قصة تانية حصلت.. قصة جميييلة أوى هتوريكم قد إيه النبى ﷺ كان بيراعى حقوق الطفل ..( كل الكلام بتاع حقوق الإنسان والطفل والحيوان ، كان النبىﷺ بيراعي الحقوق دى وحاطط قوانينها من 1400 سنة) جيش المسلمين وهو خارج للغزوة ، راحت بنت صغيرة "لم تبلغ" خرجت فى الجيش و استخبت علشان ماحدش يشوفها عشان عايزة تطلع مع النبىﷺ..
و فى نص الطريق النبى ﷺ بيعسكر كل فترة عشان الجيش يرتاح ،فلقى حاجة قصيرة كده بتجرى فالنبىﷺ قال: من هى؟ فجابوها ..فقال النبىﷺ: من أنتِ يا بُنية ؟ فقالت خرجت معكم ، فقال :كيف خرجتى و لِمَ خرجتى؟ قالت: أريد أن أدافع عنك حتى لا يؤذيك أحد يا رسول الله (شوفوا النبىﷺ هيتصرف إزاى.. خدوا بالكم لو أى حد كان مكان النبى ﷺ كان هيتصرف غير كده.. أنت قائد الدولة يا رسول الله ، أنت قائد الجيش أكيد مش فاضى لطفلة زيها .. على الأقل هتقول خذيها يا عائشة أو خذيها يا أم سلمة واتصرفوا معها .. وماكانش هيبقى غلطان على فكرة )... عارفين النبىﷺ عمل إيه ؟؟ قال لها: يا بُنية ابقى معى ..
بتحكى البنت بقى لما كبرت و بتقول: فبرك ناقته وأردفنى خلفه (ركبنى وراه) وسار بى ولم يتركنى لحظة و كان كلما أراد أن يستريح برك بالناقة وأنزلنى أولاً ثم نزل هو وقال: يا بُنيتى اذهبى فاقضى ما تريدين وعودى إلى هنا (فبتقول كنت أروح ألعب وأعمل اللى أنا عايزاه وأرجع ألاقيه مستنينى) وكان لا يركب حتى أركب أنا أولاً ولا ينزل حتى أنزل أولاً. (شوفوا حنية النبى ﷺ).
فبتقول فى نص الطريق نزلنا نستريح فببص على الحقيبة (الحقيبة هى قماشة بتتحط على الجمل علشان نقعد عليها ) فبتقول فنظرت إلى الحقيبة فوجدت مكانى بقعة دم !! (حاضت.. أول حيضة فى حياتها ) فبتقول فارتعد بدنى وبكيت وجريت أختبئ .. (راحت استخبت ورا نخلة) فالنبى ﷺ رجع ، فبتقول : فنظر فرأى الدم ، فبكيت وارتعد بدنى ثم ظل يبحث بعينيه عنى..
فالنبى ﷺ فى لحظة لاحظ البنت ورا الشجرة بتبص عليه.. فناداها النبى عليه الصلاة والسلام وقال: يا بُنية تعالى .. فبتقول: فذهبت إليه وأنا أبكى من الخوف ..فوقفت أمامه.. فقال: يا بُنية لا عليكى لعلك نَفُستى (كلمة نفاس فى الفقه ممكن تتقال على الحيض) فبتقول فهدأت..فقال يا بُنية إذا حدث هذا فاغسلى بماءٍ وملح (اغسلى هدومك بماء وملح لأن وقتها ماكانش فيه المطهرات بتاعت دلوقتى) وضعى شيئاً من الكُرسف (بيعلمها تعمل إيه ..الكُرسف هو القطن) و اغسلى الحقيبة بماءٍ وملح .. وعودى إلى مركبك (قال لها اعملى ده وارجعى مكانك معايا.. أنتم متخيلين !! ..دا مكسفهاش ولا بعتها لأى زوجة من زوجاته و قال أنا مش فاضى للكلام ده)
المهم فبتقول البنت : ففعلت كما قال وعدت إلى مركبى ، فما إن وصلنا إلى خيبر .. وفتح الله عليه فى خيبر و انتصر المسلمون وغنِمَ النبىﷺ من الغنائم (كان فى غنائم كتير فمن ضمن الغنائم كان فى قلادة ثمينة جداً) فمسك النبىﷺ القلادة وقال : أين البُنية ؟ قلت: أنا يا رسول الله ، فقال: تعالى هذا نصيبك.. فبتقول فجئت إليه فهممت أن آخذ منه القلادة ..فقال: لا أنا أُلبسكى القلادة ..

(خدوا بالكم أن يهود بنى قريظة اللى غدروا واختاروا أن يكون عقابهم حكم الإعدام ..الحكم اتنفذ على اللى غدروا بس.. أما اللى ماشاركوش فى الغدر دول موجودين وسط المسلمين وعايشين معاهم.. فعلشان كده لسه فى معانا يهود فى المدينة) المهم الصحابى واليهودى أتخانقوا فاليهودى طلب إن حد يحكم بينهم، واختار أن اللى يحكم بينهم النبى عليه الصلاة و السلام.. (أصل اليهودى عارف أن مافيش حد فى عدل النبى ﷺ )
فراحوا للنبى ﷺ وحكوا له القصة فقال النبىﷺ يا أبا حدرد: اليهودى على حق ...فقال أبو حدرد: يا رسول الله لم يأتِ موعد السداد !! فقال النبىﷺ: وكيف إن مت!! يا أبا حدرد لا تخرج معى إلى خيبر حتى تعطي الرجل ماله..فبكى أبو حدرد لأن مش معاه فلوس ..وخايف أن لو ما سددش الفلوس ،مش هيقدر يطلع مع النبىﷺ ،فخرج أبو حدرد فى الطرقات يبكى وجلس على الأرض يفكر هيعمل إيه..طيب يا ترى هتتحل مشكلته و لّا لأ..؟

هنعرف المرة الجاية إن شاء الله🤍

سيرة_الرسول
الحلقة 146
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة خيبر (ج1)

قبل ما ندخل فى غزوة خيبر عايزة أرتب معاكم الأحداث بتاعت السيرة من بعد صلح الحديبية
1- صلح الحديبية..
2- رسائل النبىﷺ لملوك العالم..
3- غزوة خيبر..
4- رجوع الصحابة من الحبشة..
5- عمرة القضاء ..
6- إسلام سيدنا خالد بن الوليد و سيدنا عمرو بن العاص..
7- غزوة مؤتة..
ده المفروض ترتيب الأحداث .. و لكن إحنا بنغير فى التسلسل علشان فى أحداث مترابطة ببعض لكن ما حصلتش مع بعض فى نفس السنة الهجرية .. فأحنا هنغير تسلسل الأحداث علشان ما تفصلوش مننا و تفهموا كويس السيرة النبوية .
و هنبدأ نحكى عن غزوة خيبر قبل رسائل النبى ﷺ لملوك العالم .. يلا بينا نبدأ سوا غزوة خيبر :
يهود خيبر اتسببوا فى مشاكل كتير وغدروا بالنبى عليه الصلاة والسلام وحاولوا قتله ( فاكرين بنى نضير لما عزموا النبى ﷺ على الأكل وحاولوا يرموا فوق رأسه حجر كبير من فوق سطح البيت.. بس ربنا أرسل سيدنا جبريل و أخبر النبى ﷺ وقام النبى ﷺ بسرعة ومشى وتم إجلاء يهود بنى نضير من المدينة وراحوا فى منطقة خيبر )
من المشاكل اللى اتسبب فيها يهود خيبر، هى أنهم بدأوا يعملوا أشعار وقصائد بيسبوا فيها أعراض أُمهات المؤمنين(زوجات النبى).. تانى مشكلة هى أن يهود خيبر كانوا الرأس المدبرة لإتحاد الكفار فى غزوة الأحزاب.. تالت مشكلة أن يهود خيبر بيعملوا مراسلات مع الفرس والروم للتحريض على محاربة النبى ﷺ ..
فأصبح النبىﷺ دلوقتى لازم يخرج يفتح خيبر وإلا هيلاقى الفرس والروم قدامه فى المدينة.. والنبى ﷺ هو نبى السلام ويوم ما يحارب بيبقى عايز يوصل للسلام وشفنا ده فى صلح الحديبية.. فالنبى ﷺ هيخرج لخيبر يقاتلهم علشان يردعهم ويضطرهم للصلح و اللى يثبت ده هو أن هينتصر المسلمين فى الآخر ورغم كده هيعمل النبى ﷺصلح و عهد بينه وبين يهود خيبر..
طيب النبى ﷺ عايز يردع يهود خيبر بس قدامه مشكلة و هى أن عدد المقاتلين فى خيبر 10000 مقاتل و المسلمين عددهم 2000 مقاتل بس .. وفى مشكلة تانية وهى أن خيبر غنية جداً عندهم 40 ألف نخلة .. و المشكلة التالتة أن خيبر ماكانتش عبارة عن مدينة عادية و بيوت سكنية.. خيبر كانت عبارة عن حصون و الحصن عبارة عن أرض كبيرة جواها خيام وبيوت ومحلات وفيه كل إحتياجتهم الأساسية للحياة فممكن مايخرجوش منه لمدة سنة..هيبقوا ضاغطين على نفسهم طبعاً بس أحتياجاتهم الأساسية للحياة موجودة و الحصن بيبقى متحوط بسور عالى وحافرين آبار تحتهم عشان المياه تدخل جوا كل حصن ...
فمشكلة النبى ﷺ هى أن اليهود عاملين الحصون دى علشان يقعدوا فيها.. ووقت ما يغدروا وتيجى تحاربهم.. هيحموا نفسهم جوا الحصن والحصن ده كان جواه أسلحه كتيرة جداً.. فمهما تحاصرهم مش هتقدر تضغط عليهم علشان إحتياجاتهم الأساسية متوفرة جوة الحصن.. فبكده يهود خيبر هيفضلوا خطر بيهدد المسلمين..
بس النبى ﷺ كان عنده خطة بديلة .. النبى ﷺ معتمد أن الصحابة قوة صبرهم عالية جداً لأنهم فى الآخر عايزين الجنة فهيصبروا لكن اليهود هيزهقوا بسرعة، ماعندهمش صبر علشان ما عندهمش هدف فى الآخر يوصلوا له .. قال تعالى : " إِن تَكُونُوا تَأْلَمُونَ فَإِنَّهُمْ يَأْلَمُونَ كَمَا تَأْلَمُونَ وَتَرْجُونَ مِنَ اللَّهِ مَا لَا يَرْجُونَ " ( سورة النساء-104)
طيب فى سؤال مهم قوى ..دلوقتى اليهود عددهم 10000 مقاتل والمسلمين 2000 بس .. طيب إيه اللى يضطر اليهود فى أنهم يدخلوا الحصن!!.. طيب ما يحاربوا المسلمين، بعددهم الكبير هينتصروا فى ساعة واحدة بس ..؟؟ الإجابة هى أن يهود خيبر عندهم جُبن .. ربنا بيقول " لَا يُقَاتِلُونَكُمْ جَمِيعًا إِلَّا فِي قُرًى مُحَصَّنَةٍ أَوْ مِنْ وَرَاءِ جُدُرٍ ۚ بَأْسُهُمْ بَيْنَهُمْ شَدِيدٌ ۚ تَحْسَبُهُمْ جَمِيعًا وَقُلُوبُهُمْ شَتَّىٰ ۚ ذَٰلِكَ بِأَنَّهُمْ قَوْمٌ لَا يَعْقِلُونَ " [ سورة-الحشر[
فالنبى عليه الصلاة والسلام عارفهم كويس...فخلاص النبىﷺ بيجهز الجيش وطالع به فيحصل موقف جميل جداً مع صحابى اسمه عبد الله بن أبى حدرد الأسلمى كان عبد الله بيلبس ويتجهز علشان خارج مع النبىﷺ.. بس أبو حدرد كان مستلف من رجل يهودى 4 دراهم و كان ميعاد سداده لهم لسه ماجاش (يعنى كان متفق على ميعاد علشان يرجع فيه الفلوس لليهودى ولسه الميعاد ماجاش) فلما اليهودى عرف أن أبو حدرد خارج للقتال ، فراح قال له :يا أبا حدرد لا تخرج حتى تعطينى مالى ..
فقال أبو حدرد: ولكن موعد السداد لم يأتِ بعد ! فقال اليهودى لن تخرج حتى تعطينى مالى؟ فقال أبو حدرد ولكن موعد السداد لم يأتِ !! فقال اليهودى: أتظن أنك ستعود يا أبا حدرد.. إنك ميتٌ لا محالة .. أتظنون يا معاشر المسلمين أن قتال الخيابرة كقتال العرب ؟!! ستنهزمون شر هزيمة..فأعطنى مالى قبل أن تخرج ..

سيرة_الرسول
الحلقة 145
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

تلخيص غزوة خيبر

علشان نقدر نستوعب الغزوات سوا.. فإحنا اتفقنا أننا هننزل بوست يبقى فيها تفاصيل كل غزوة فى نقاط مختصرة و كمان أسبابها .. و بعدين هننزل يومياً بتفاصيل الغزوة كلها على حلقات بإذن الله
غزوة خيبر
1-سميت بهذا الأسم: لأنها حصلت فى منطقة اسمها خيبر " ويقال أن خيبر بمعنى حصون باللغة السريانية"
2-طرفي القتال :الطرف الأول: يهود خيبر (وعددهم 10,000 مقاتل) والطرف التانى..المسلمين فى المدينة وعددهم (1400 جندى)
3-أسباب الغزوة : ردع يهود خيبر لأن يهود خبير هم الرأس المدبرة لإتحاد الكفار فى غزوة الأحزاب، و يهود خيبر كانوا بيحرضوا لغزو المسلمين..(على فكرة خيبر دى المنطقة اللى اتجمع فيها اليهود اللى غدروا بالمسلمين بمحاولة قتل النبىﷺ وهم يهود بنى نضير.. وبدل ما يأمر النبى ﷺ بقتلهم .. كان أعطاهم مهلة للخروج من المدينة )
4-أحداث الغزوة:
** خرج المسلمين فى جيش إلى حصون اليهود والهدف هو ردع اليهود بمعاهدة سلام بين المسلمين و اليهود.. والدليل هو أن الغزوة هتنتهى بعدم أسر اليهود رغم أن المسلمين كانوا منتصرين.. والنبى عليه الصلاة و السلام هيعمل صلح.
** تحالف يهود خيبر مع يهود غطفان والخطة هى أن غطفان تهاجم جيش المسلمين من ظهره وتطلع يهود خيبر من الحصون فيواجهوا الجيش من قدام و بكده هيبقى جيش المسلمين أتحاصر فى النص..
** إسلام أحد يهود بنى غطفان وربنا جعل إسلامه سبب فشل تحالف يهود غطفان ويهود خيبر
**حصار المسلمين لحصون خيبر ( حصون خيبر مليانة بالأكل والشرب فحصار المسلمين ماكانش ضغط عليهم ).
** تكليف عليّ بن أبى طالب بالذهاب إلى حصن من حصون خيبر ..
** هروب اليهود للحصن التانى ثم التالت رغم أن عددهم أضعاف المسلمين ولكن فيهم جبن وخوف لأن طبع يهود خيبر هو الغدر..
** بعد فتح الحصون كان من الغنائم سلاح اسمه "المنجنيق " ده عبارة عن كرة مشتعلة من النار بتتحدف على العدو( يعنى ده كان عند اليهود علشان يقتلوا المسلمين به).. فأخذه المسلمين وأمر النبىﷺ إن المنجنيق ينضرب ف الهواء لتخويف اليهود بس مش لقتلهم..
** يخاف اليهود و يستسلموا و ينتصر المسلمين انتصار حاسم..واليهود يسألوا النبىﷺ : هل ستأسرنا ؟ فيقول النبىﷺ : لا ولكن أريد الصلح بينى وبينكم.. وعلشان طبعهم الغدر "هيشترط النبى ﷺ نزع السلاح منهم"..

هنكمل الغزوة بالتفصيل المرة الجاية إن شاءالله 🤍

سيرة_الرسول
الحلقة 144
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين 🤍

إسلام" عمرو بن العاص"

شفنا إمبارح خالد بن الوليد و عثمان بن طلحة و هما خارجين من مكة و رايحين على المدينة لمبايعة النبى عليه الصلاة و السلام على الإسلام .. فلاقوا رجل فى نص الطريق.. من الرجل ده؟ ده عمرو بن العاص (قبل إسلامه) .. طيب كان جاى منين؟ جاى من الحبشة. أصل من سنة ، بعد ما أتمضى صلح الحديبية بين كفار قريش و النبى صل الله عليه و سلم.. عمرو بن العاص غضب جدا و رفض جدا الصلح ده و قال: هلكت قريش .. و قال: لئن أبقى تحت حكم أى ملك من ملوك الأرض، أحب إلي من أن أبقى تحت حكم محمد .

و قرر سيدنا عمرو بن العاص أنه يروح على الحبشة و ملك الحبشة (نجاشي الحبشة) كان فى الوقت ده مسلم بس كاتم إسلامه.. فعمرو بن العاص راح الحبشة و النجاشى رحب به جداً.. فوصل مرسال اسمه عمرو بن أُميه الضمرى، كان مبعوت بجواب من رسول الله صل الله عليه و سلم للنجاشى و بيقول النبى ﷺ فيه :" السلام عليك أيها الملك جزاك الله عنا خيراً أسالك أن ترد إلي أصحابى ". (فاكرين الصحابة اللى هاجروا من تعذيب قريش و راحوا الحبشة؟! دول بقى لهم سنين فى الحبشة ودلوقتى بس هيروحوا على المدينة بس هنكمل قصتهم بعدين)
فالمهم النجاشى أستلم الجواب .. فلما عمرو بن أُمية مرسال النبى ﷺ خرج .. فراح عمرو بن العاص قايل : أيها الملك أهذا الرجل مرسال من عدوي محمد،؟! أيها الملك إن لم يكن لك به حاجة فأتركنى أقطع عنقه و أقتله .. فغضب النجاشى و قال : ويحك يا عمرو.. أتريد أن أعطيك مرسال رسول الله ﷺ !! فعمرو أتخض أن الملك أعترف بإن النبى ﷺ هو رسول من عند الله..

فعمرو بن العاص عرف ان النجاشى أسلم..فقال الملك: يا عمرو أعطنى يديك و بايعنى على الإسلام.. صدقنى هو رسول الله.. فبدأ عمرو يتأثر و يقول : يا أيها الملك أقسم عليك أحقا هو رسول الله ؟ فقال الملك :والله هو رسول الله فبايعنى يا عمرو.. فعمرو حط أيده فى أيد ملك الحبشة و قال: أشهد ان لا إله إلا الله وأن محمد رسول الله .. (و إحنا عارفين أن الكفار كانوا عارفين إن محمد هو نبى من عند الله ولكن استكبروا ولكن فى منهم اهتدوا للإسلام..)
وأسلم عمرو بن العاص و قال: لا حاجة لى فى فراق رسول اللهﷺ بعد الآن.. و قرر يروح المدينة و قابل فى السكة خالد بن الوليد و عثمان بن طلحة .. فخالد قال له : ما الذى أتى بك إلى هنا؟.. قال عمرو : ما الذى جاء بك أنت إلى هنا ؟ فقال خالد: والله ذاهب أنا و عثمان لنبايع رسول اللهﷺ ، فقال: عمرو و أنا ايضاً.

و التلاتة دخلوا على أبواب المدينة .. و الصحابة شافوهم و جرى الوليد بن الوليد بن المغيرة (أخو خالد بن الوليد) و قال للنبىﷺ ..فالنبىﷺ فرح جداً و قام رايح الوليد لخالد و قال له : أسرع يا خالد، ينتظرك رسول الله ﷺ..فخالد بيقول: من شدة فرحتى أنطلقت إلى بيت أخى أولاً كى أتطهر و أتطيب و أبدلت ثوبى ثم خرجت إلي رسول الله أنا و عمرو و عثمان.. فرأينا النبى على باب المسجد و وجهه كقطعة قمر و فاتح ذراعيه و يقول: هلم إلي يا خالد..
فخالد بيقول: فجعلت أجرى و أجرى و أجرى و كلما نظرت فى عينيه أمتلأ قلبى حباً له حتى وصلت إليه و عانقنى.. و الصحابة بيقولوا: والله ما فرحنا بشىء بعد دخول النبىﷺ إلى المدينة كفرحتنا بدخول هؤلاء الثلاثة.. فيحط خالد إيده فى إيد النبىﷺ و يقول: أشهد أن لا إله إلا الله و أنك رسول الله .. فيفرح النبى ﷺ .. و يجى الدور على عمرو بن العاص فعانق النبىﷺ و لسه هيبايع النبى. ﷺ فوقف عمرو و بص للنبى و قال:
يا رسول الله، إني أبايعك على أن يغفر لي ما تقدم من ذنبي..فقال النبىﷺ : يا عمرو بايع .. فإن الإسلام يمحى كل ما قبله من ذنوب .. و جه الدور علي :) عثمان فحضنه النبىﷺ و دعا له و الحمدلله رب العالمين ..

نكمل المره الجايه إن شاء الله🤍

سيرة_الرسول
الحلقة 143
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

إسلام "خالد بن الوليد.."

خلصت العمرة و المسلمين خارجين من مكة .. بس و هم خارجين ، قام سيدنا عليّ قايل للنبى ﷺ : لن نترك بنت عمنا يتيمة بين المشركين..دى بنت مين؟ بنت سيدنا حمزة بن عبد المطلب .. ده عم النبى عليه الصلاة والسلام و حبيب النبىﷺ و أسد الله سيدنا حمزة ده اللى حزن عليه النبى ﷺ و بكى لحد ما نزل سيدنا جبريل من فوق سبع سماوات و قال : يا رسول الله إن ربك يخبرك أن فى السماء السابعة مكتوب "حمزة بن عبد المطلب أسد الله و أسد رسوله".. فالبنت دى بنت حمزة فالنبى ﷺ فرح بها أوى و لازم تبقى وسطهم..فاختصم فيها تلاتة من الصحابة ، أصل كل واحد فيهم عايز يربيها عنده..مين التلاتة دول ؟
جعفر بن عبد المطلب و علي بن أبى طالب و زيد بن حارثة ، جعفر قال: زوجتى تبقى خالتها و علي قال : دى بنت عمى .. و زيد قال : أنا مولاك يا رسول الله يعنى أنا حتة منك .. فقال النبىﷺ إذاً يأخذها جعفر، لأن الخالة بمنزلة الأم .. فده مناسب للبنت أوى .. و يحصل حدث تانى و هو واحد مسلم اسمه الوليد بن الوليد بن المغيرة (ده أخو خالد بن الوليد) فالنبى عليه الصلاة والسلام وهو خارج من مكة وقف و قال: أين الوليد بن الوليد بن المغيرة.. فييجى الوليد و يقول: لبيك يا رسول الله ، فقال له النبىﷺ : أين خالد؟ (فــالوليد استغرب لأن خالد لسه على الكفر يعنى ده عدوك يا رسول الله) فالوليد قال: يأتيك الله به يا رسول الله ،فقال النبىﷺ : "و الله تأخر علينا خالد( النبى ﷺ يقصد أن خالد تأخر فى دخوله الإسلام)..و يكمل النبىﷺ كلامه و يقول: فلا أدرى كيف يجهل الإسلام وعقله راجح، و الله لو جاءنا خالد لقدمناه على من سواه ".. ومشى النبىﷺ..

فالوليد بعت جواب لخالد بن الوليد و كتب فيه : من الوليد بن الوليد بن المغيرة إلى خالد بن الوليد ، يا أخى والله ما رأيت أعجب من تأخرك على الإسلام و لقد سأل عنك رسول الله ﷺ (دى هتأثر فى قلب خالد أوى) و قال النبىﷺ : أين خالد! فلا يوجد رجل عقله راجح مثله يجهل الإسلام.. و والله لو جاءنا لقدمناه على من سواه .. و يقول الوليد: يا أخى ألحق بنا و لا تتأخر .. والله لقد فاتتك مواطن صالحة .. والسلام عليكم (الجواب ده هيأثر في قلب خالد بشكل غير عادى) و وصل الجواب لخالد ، فبيقول سيدنا خالد: أخذت أقرأ و يقع الإسلام فى قلبى و أقرأ و يقع الإسلام فى قلبى و كان أكثر ما وقع فى قلبى أن سأل عنى رسول اللهﷺ ، فسهرت الليل أفكر ..هل أُسلِم بعد كل هذه العداوات و الغزوات.. و ظللت أفكر وأفكر حتى غلبتنى عينى فرأيت رؤيا " و كأنى فى أرض ضيقة جرداء ثم خرجت منها إلى أرض واسعة خضراء" فقمت من منامى وقد وقع فى قلبى الإسلام و اتفسر الحلم على أن الأرض الضيقة هى الكفر والأرض الواسعة هى الإسلام..

و يقول خالد : " بعد أن وقع فى قلبى الإسلام لم أعد أطيق فراق رسول الله ﷺ فقلت فى نفسى: من آخذه معى من أصحابى إلى رسول الله ؟! فقلت: سأذهب إلى صفوان بن أمية .. وخرج خالد بن الوليد وراح لصفوان وقال له : يا صفوان انطلق معى إلى رسول الله، فاتخض صفوان وقال: أأسلمت يا خالد؟! فقال خالد: يا صفوان إنك تعلم و أنا أعلم أن محمد على الحق ، فقال صفوان : لو لم يبق على وجه الأرض غير محمد، ما اتبعته..
مشى خالد و قرر يروح لعكرمة بن أبى جهل ..وللأسف كان رد عكرمة زى صفوان ..فقرر خالد يروح لعثمان بن طلحة وقال : يا عثمان انطلق معى لرسول الله نبايعه على الإسلام ،فقال: عثمان و الله خرجت لأجل ذلك فمعى راحلتان ، ناقة لك وناقة لي (عارفين مين عثمان بن طلحة ده اللى معاه مفتاح الكعبة ..عثمان ده زمان قبل الهجرة.. راح النبى ﷺ له وقال: يا عثمان افتح لى الكعبة أصلى بها.. فرفض عثمان وقال: لا لن أفعل أبدا و لن تصلى فى الكعبة يا محمد، فقال النبىﷺ : يا عثمان أعطنى المفتاح قبل أن يكون معى يوماً من الأيام، فقال عثمان : لئن جاء هذا اليوم، لبطن الأرض أحب إلي من ظاهرها..)

و فى موقف جميل زمان حصل من عثمان فى يوم هجرة السيدة أم سلمة رضى الله عنها لوحدها من مكة للمدينة .. فشافها عثمان و أخدها على الناقة بتاعته ووصلها لحد المدينة وبعد ما وصلت للمدينة قالت : والله ما رأيت صاحب فى السفر أكرم من عثمان بن طلحة وقالت : والله أظن أن الله سيشكره عليها. ( أصل ربنا الشكور.. بيشكرك على عمل الخير ..فيمكن ربنا الشكور شكر عثمان على الموقف الشهم ده.. بأن ربنا هيهدى عثمان للإسلام بعد سنين من الموقف ده و فعلاً هيسلم عثمان ) دلوقتى خرج عثمان و خالد كل واحد منهم على ناقة و متجهين للمدينة لمبايعة رسول الله على الإسلام.. ففى السكة هيقابلوا مين؟

هنعرف بكرة إن شاء الله🤍

سيرة_الرسول
الحلقة 142
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

عمرة القضاء (ج5)
شفنا امبارح السيدة ميمونة لما طلبت إنها تتزوج النبىﷺ.. والنبىﷺ وافق و شرحنا الحلقة اللى فاتت الموضوع ده و قلنا إن دى حالة خاصة بالنبى عليه الصلاة و السلام و أن لم يقبل النبىﷺ الزواج بالطريقة دى إلا من السيدة ميمونة لسبب... إيه هو؟ أول حاجة هى أن ميمونة من قريش . فميمونة قرشية أصيلة.. إيه ده يا رسول الله؟ هتوافق على الزواج من ميمونة؟

أيوه لأن هيبقى في نسب بينى و بين قريش و هيطلب النبى ﷺ ان الفرح يبقى فى مكة.. النبىﷺ عايز يشيل الخلافات اللي ما بين النبى ﷺ و بين قريش.. و الأفراح زمان ماكنتش زي بتاعة النهاردة.. الفرح زمان يعني وليمة كبيرة وييجى الناس ياكلوا و يشربوا و يمشوا..

فالمهم كفار قريش رفضوا ..و واحد منهم قال : اخرج من أرضنا يا محمد.. فكان واقف صحابى اسمه سعد بن عبادة الأنصارى فزعل وقال : كذبت ياعدو الله ليست أرضك ولا أرض أبيك ولكن أرض رسول الله.. فقال النبىﷺ : دعه يا سعد .. و بص النبىﷺ للرجل و قال : لك ما أردت .. ثم قال يا معشر المسلمين لا تغرب الشمس على رأس أحد منكم فى مكة ..و خرج النبى ﷺ من مكة ومعه ميمونة رضى الله عنها(وعلى فكرة السيدة ميمونة لم تتزوج النبىﷺ وهو محرم.. هو دخل بها بعد خروجه من مكة بعد ما تحلل من إحرامه).

وعلى فكرة السيدة ميمونة رضى الله عنها كان اسمها " بُرَة" أي الحلقة الحديد اللى بتتحط فى أنف البعير أو فى أنف المرأة للزينة.. فالنبيﷺ غير اسمها وقال لها لستِ بُرَة بل أنت ميمونة.. و إشمعنى اختار النبىﷺ اسم ميمونة ؟ لأنه من اليُمْن يعنى البركة.. يعنى يا ميمونة أنتِ بركة لحاجات حلوة كتير.. ...اسم ميمونة من اليُمن.. واللي يطلق اسم ميمونة على قرد أو ما شابه ده خطأ لأنه بيشبه اسم أم المؤمنين بكائن .. و ده اسم جميل جداً من الخير واليُمْن و البركة..
و بالمناسبة للسيدة ميمونة رضى الله عنها هتعيش بعد وفاة النبى ب 40 سنة .. وهتنقل لنا أحاديث كتير قالها النبى عليه الصلاة والسلام ..هتموت وهى عندها 80 سنة.. و هتحب النبى ﷺ حب شديد لدرجة إنها قبل ما تموت كتبت وصية إنها تدفن فى المكان اللى اتزفت فيه كعروسة لرسول الله ..طيب دلوقتى المسلمين خلاص خارجين من مكة ،بس في بنت صغيرة يتيمة هتروح مع المسلمين.. مين البنت دى؟

هنعرف المرة الجاية إن شاء الله🤍

سيرة_الرسول
الحلقة 141
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

عمرة القضاء (ج4)
و زواج النبىﷺ من ميمونة بنت الحارث

اعتمر المسلمون و قبل خروجهم من مكة، قبل المغرب بشوية ..يحصل موقف غريب كان هيقلب الموازين بس ما اتقلبتش .. من سيدة اسمها ميمونة بنت الحارث، دى تبقى أخت أم الفضل زوجة العباس عم الرسول ، فميمونة راحت لأختها أم الفضل و قالت : يا أم الفضل إن لي حاجة في الزواج من محمد صل الله عليه وسلم ..( ميمونة طلبت أنها تتزوج النبى عليه الصلاة و السلام ).

طيب و ده يقلل من السيدات فى الزمن ده ؟ طبعاً لأ.. لأن لو عيشتوا الفتره الزمنية دى هتقدروا تستوعبوا أن ده عادى جداً .. بالظبط زى المثل " اخطب لبنتك و متخطبش لابنك " و فى بعض المجتمعات بتتقبل الفكرة دى عادى جداً.. فما بالكم بقى من 1400 سنة.. فالوضع ده مقبول جداً ..

هقول لكم حاجة تانية .. هو ينفع بنت توهب نفسها لأى حد من المسلمين حالياً ؟ الإجابة لأ طبعاً ما ينفعش..ما ينفعش حالياً و لا حتى زمان .. طيب ليه؟ علشان ده شئ خاص بالنبى عليه الصلاة و السلام بس.. قال تعالى : "وَامْرَأَةً مُّؤْمِنَةً إِن وَهَبَتْ نَفْسَهَا لِلنَّبِيِّ إِنْ أَرَادَ النَّبِيُّ أَن يَسْتَنكِحَهَا خَالِصَةً لَّكَ مِن دُونِ الْمُؤْمِنِين قَدْ عَلِمْنَا مَا فَرَضْنَا عَلَيْهِمْ فِي أَزْوَاجِهِم " [سورة الأحزاب-50] يعني دي حالة خاصة بالنبيﷺ و هى أن واحدة عايزة توهب نفسها للنبي ﷺ و ساعتها من حقه يقبل و من حقه يرفض.

فلما قالت السيدة ميمونة لأختها الكلام ده.. فردت أم الفضل و قالت : سأخبر زوجى العباس.. فلما عرف العباس قال أنه هيقول للنبىﷺ.. فراح سيدنا العباس رضى الله عنه و قال للنبي ﷺ أن ميمونة تريد أن تتزوجك .. فوافق النبىﷺ .. ( طب هي دي أول واحدة توهب نفسها للنبيﷺ؟ لا طبعا..سيدات كتير أوي وهبوا نفسهم لرسول اللهﷺ، أصل من أسباب رغبة السيدات فى الزواج من النبى ﷺ هى نصرة الدين و الرسالة خصوصاً زى ما إحنا عارفين أن السيدة عائشة روت أكتر من 3000 حديث .. يعنى لولا أنها روتهم عن النبىﷺ، كان زمان المسلمين مش قادرين يفهموا فقه دينهم اللى هيساعدهم فى حياتهم).

طيب ليه يا رسول الله رفضت تتجوز السيدات اللى وهبوا نفسهم لك قبل السيدة ميمونة؟ ده لأن النبىﷺ كان زواجه مش لأجل الزواج و لكن كان يتزوج لسبب و هدف و دليل ده هو أن بعض زوجات النبى ﷺ كان زواجهم بأمر من الله عزوجل.. فممكن حد يسأل و يقول أن فى حديث بيقول فيه النبىﷺ : حبب إليَّ من دنياكم الطِيب (العطر ) والنساء، و جعلت قرة عيني في الصلاة ...فهل ده معناه أن النبىﷺ بيحب النساء و بيرغب في الزواج منهم ؟ الإجابة : لأ طبعا النبىﷺ مش بيحب كل النساء .. أصل مين النساء اللى يقصدهم النبى ﷺ فى الحديث؟
المقصود بالنساء هنا "هم زوجات النبى عليه الصلاة والسلام" لكن مش النساء كلهم.. فكان النبى ﷺ زى ما قلنا كان لا يرغب بالزواج لأجل الزواج و لكن لسبب و هدف و فى دليل كمان هو أن كان بييجي للنبىﷺ ، ناس في المسجد يقولوا : يا رسول الله وهبت لك فلانة نفسها.. فيستحي النبى ﷺ جداً و وشه يحمر.. الصحابة بيقولوا: كان النبيﷺ شديد الحياء .. كان أشد حياء من العذراء في خدرها.. يعنى البنت اللى تستحى و تحط وشها فى الأرض.. ..طيب تعرفوا ان مرة واحدة راحت للنبى ﷺ و مسكت بنتها في إيدها و قالت في المسجد قدام الناس : يا رسول الله وهبتك ابنتي هذه.. فاستحى النبى ﷺ جداً و وشه احمر و تصبب عرقاً.. فالست افتكرته مش سامع، فقالت : يا رسول الله وهبتك ابنتي هذه .. فسكت برده النبى ﷺ و ما ردش..

فالست فكرت أن بنتها مش عاجباه .. فقالت له : يا رسول الله والله ابنتي هذه لم تصدع قط ( عمرها ما جالها صداع يعني بنت جميلة و ما فيهاش عيب / طيب هي الست دى عايزة تجوز بنتها من النبىﷺ بلهفة كده ليه؟ يا جماعة دا النبى ﷺ يعنى جمال و أخلاق و نسب و حسب و دين.. زى لما يبقى فى حد مشهور و محترم و متدين و طيب و جميل فتلاقى البنات معجبة به أوى و تتمنى و تدعى أنها تتجوزه و ساعات تحس انه مستحيل .. فتدعى تتجوز واحد زيه).

فالمهم كان واحد من الصحابة واقف، و متابع موقف النبى مع السيدة و بنتها فقال له : يا رسول الله إن لم ترد أن تتزوجها ، فأريد أنا أن أتزوجها..فالنبي ﷺ فرح أنه طلع من الموضوع فقال للست: أتقبليه؟ فقالت: نعم ... و بعد كده يسأل النبى ﷺ عن تمن الصداق و المهر للبنت و يتم الزواج..(طبعا ماحدش يستغرب طريقة الجواز بالشكل ده لأن ده بيحصل زيه لحد دلوقتى فى القرى و الريف فى بلادنا).

فكان النبي ﷺ دايما يحصل له المواقف الصعبة دى .. و كانت مين بقى اللي كانت دايما بتغير و تضايق؟ السيدة عائشة طبعا .. عائشة رضى الله عنها مرة اتعصبت و خرجت و قالت : يا معشر النساء .. أما تستحي إحداكن أن تعرض نفسها على رجل؟ فماحدش رد عليها علشان ده النبي محمدﷺ .. فعائشة كانت دايما بتنفعل و بتغير..

حتى لما النبي ﷺتزوج من السيدة زينب بنت جحش. فراح النبيﷺ يراضى عائشة و قال لها : والله زوجني بها ربي .. و قال تعالى : فَلَمَّا قَضَىٰ زَيْدٌ مِّنْهَا وَطَرًا زَوَّجنَاكَهَا (الأحزاب-37)
و مرة من كتر زعلها قامت رايحة للسيدة حفصة رضى الله عنها زوجة النبىﷺ و قالت : أعلمتي أن النبيﷺ تزوج فلانة ؟..فحفصة حست ان عائشة زعلانة أوي.. فقالت حفصة:" يا عائشة لا تفعلي ذلك.. إنه يزوجه ربه " ..

حاجة كمان مهمة لازم نعرفها و هى أن النبىﷺ كان ربنا محلل له أنه يتأخر عن بعض زوجاته..و أنه يفضل مع بعض زوجاته أكتر من التانيين.. طب ليييييه؟ عشان النبى ﷺ ما اختارهمش فمن رحمة ربنا أتاح للنبىﷺ أنه يبقى براحته.. قال تعالى :" تُرْجِي مَن تَشَاء مِنْهُنَّ وَتُؤْوِي إِلَيْكَ مَن تَشَاء وَمَنِ ابْتَغَيْتَ مِمَّنْ عَزَلْتَ فَلا جُنَاحَ عَلَيْكَ" (الأحزاب- 51)
يعنى براحتك يا رسول الله قرب للى تحب و ابعد براحتك ، فبعد نزول الآية دى :السيدة عائشة راحت له و قالت: يا رسول الله نزل اليوم عليك كذا و كذا؟ فقال :نعم..فقالت : والله إني أرى ربك يسارع في هواك (ربنا بيحب يرضيك ) فابتسم النبي صل الله عليه وسلم..

فالمهم النبى ﷺ ما وافقش على السيدات اللى وهبوا نفسهم له إلا السيدة ميمونة..طيب ليه هيوافق على ميمونة؟

هنعرف بكرة إن شاء الله 🤍

سيرة_الرسول
الحلقة 140
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

عمرة القضاء (ج3)
بعد ما قريش طلعت إشاعة على المسلمين انهم عندهم مرض فبلاش حد يقرب منهم و كان هدف الإشاعة إن قريش تسيطر على فضول أهل مكة فى إنهم يتفرجوا على الصحابة و هم بيعتمروا فى جمال و هيبة.. و ده علشان قريش خايفة إن حد يعجبه الإسلام. فلما النبىﷺ عرف بالإشاعة دى.. فأمر النبي ﷺ الصحابة بالإضطباع فكشف عن ذراعه اليمين و مرر الرداء من تحت ذراعه و الكل عمل زيه .. و دى سُنة الإضطباع.. طب ليه عملت كدة يا رسول الله ؟

علشان كل قريش تشوف.. إن المسلمين جلدهم باين أهو و مافيش عندهم مرض جلدى ولا أى حاجة.. و علشان تبان قوة الصحابة و صحتهم لأن الصحابة فعلاً كانوا ممشوقين القوام و رياضيين، سيدنا عمر بن الخطاب وقت خلافته بعد وفاة النبىﷺ..كان سيدنا عمر معاه درة ..( الدرة دى عصاية حاجة بسيطة كده و مش بتوجع.. يعنى الضربة بها ما بتسيبش أثر يعنى حاجة مش جامدة.. هدفه بها التنبيه بس ) فالمهم سيدنا عمر كان ماشى فى الطريق فيلاقى رجل ماشى و عنده كرش فيقوم ضاربه على بطنه بالدرة.. و يقول له: ما هذا أعذاب من الله!.. فضحك الرجل و قال: بل بركة من الله يا أمير المؤمنين 😄 .. رضى الله عن عمر وأرضاه ..

فالصحابة كانوا ممشوقين القوام حتى في معركة من المعارك كان اسمها معركة القادسية حصلت فى وقت خلافة سيدنا عمر برده و كانت المعركة ضد الفرس فقائد الفرس بعت جاسوس يتجسس على جيش المسلمين و يرجع يبلغه.. فلما رجع الجاسوس للقائد قال : أيها القائد لقد رأيت أناس رهباناً بالليل فرساناً بالنهار.. بالليل يعبدون ربهم وبالنهار يتسابقون ويتدربون على القتال والله ما نغلبهم أبداً .. لهم دوي كدوي النحل وبالنهار من أمهر الفرسان.."

دوى النحل ده صوتهم فى التسبيح والصلاة.. بالليل بيصلوا وبيذكروا الله وبيتعبدوا وبيبكوا من خشية الله وبالنهار رياضة وتدريب وجهاد.. وفعلاً انتهت معركة القادسية بانتصارالمسلمين و هزيمة ساحقة للفرس. نرجع تاني للنبي.. النبىﷺ قال للصحابة اضطبعوا فكله اتبع سنة النبيﷺ..طب ليه بقى النبىﷺ خلاهم يبينوا الذراع اليمين مش الشمال ؟ لأن و أنت بتطوف ذراعك الشمال بيبقى ناحية الكعبة.. والذراع اليمين النبىﷺ عايزه مكشوف علشان حيبقى لناحية الناس اللي برة، علشان الناس تشوف إن المسلمين ماعندهمش مرض ..

بس النبىﷺ ما اكتفاش بكدة .. النبىﷺ كمان أمر الصحابة إن أول 3 أشواط يجروا فيها لكن بخطوات متقاربة وجرى منتظم وطبعاً ده صعب قوى على الرملة فبكده الناس هتتأكد إن المسلمين فى منتهى الصحة والقوة..فتخيلوا بقى 2000 صحابي.. نفس القوة، أدب، شجاعة، تواضع، خشوع، حب للنبيﷺ.. كل ده قدام الكفار فبقوا مبهورين، الحركة منتظمة ومع بعض وما حدش بيسبق التاني .. طيب اشمعنى أول 3 اشواط بس هى اللى هيجروا فيها؟

لأن الكفار كانوا واقفين أول 3 أشواط وبعد كدة أول ما الكفار مشيوا..النبيﷺ قال للمسلمين امشوا عادي وماتجروش..أحلى حاجة بقى إن قبل وفاة النبي صل الله عليه وسلم في حجة الوداع .. النبي عليه الصلاة والسلام في حجة الوداع اضطبع وكشف ذراعه اليمين و بدأ هو والمسلمين يجروا فى الأشواط فعمر بن الخطاب قال : يا رسول الله ما في حاجة لذلك!! يعنى خلاص ده كان زمان عملناه عشان الكفار كانوا بيتفرجوا.. فقال النبىﷺ: يا عمر هذه سنتي إلى يوم القيامة.. فالرجال تضطبع إلى يوم القيامة وتجرى فى الأشواط أما النساء ماتجريش ..

طيب المهم دلوقتى الصحابة بيجروا 3 أشواط والذراع مكشوف.. قوة وشباب وشجاعة ..فلما شباب قريش وسيداتها وأطفالها شافوا كده.. راحوا لقادة قريش وقالوا :من هؤلاء الذين يعانون من الأمراض!! لقد رأيناهم أقوى منا ومنكم.. وبكدة فشلت الخطة بتاعت قريش..وخلصت العمرة واعتمر المسلمين.. المسلمين بقي لهم 3 أيام فى مكة والنهاردة اليوم التالت.. وقبل المغرب بشوية هيحصل موقف غريب كان هيقلب الموازين بس ما اتقلبتش.. إيه اللي حصل؟

هنعرف المرة الجاية إن شاء الله 🤍

سيرة_الرسول
الحلقة 139
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

عمرة القضاء (ج2)
وصل المسلمين على باب مكة بكل عزة و هيبة لقضاء العمرة زى ما نصت معاهدة صلح الحديبية.. و يدخل النبى صل الله عليه وسلم مكة وحواليه الصحابة من كل جانب و هو فى النص ..و كأنه القمر بدر منير فى وسط النجوم يتلألأون من حوله .. شكلهم جميل و مبهر ..و قريش مخضوضة.. دخل المسلمين و معاهم الشاعر الجميل الصحابى عبد الله بن رواحة .. و كان عايز يهز قريش ..

فيدخل و هو عمال يقول خلوا عن سبيله يعنى وسعوا وسعوا عايز يعمل هيبة للنبىﷺ أكتر و هو داخل..و فضل عبد الله بن رواحة يقول أبيات شعر : خلوا بنى الكفار عن سبيله .. خلوا اليوم نضربكم على تنزيله .. ضرباً يزيل الهام عن مقيله ..و يذهب الخليل عن خليله ".. بس مين مش عاجبه الشعر ده ؟؟ سيدنا عمر بن الخطاب.. فقال ما هذا يا ابن رواحة .. شعر !! بين يدى رسول الله و فى حرم الله ؟؟! .. فقام النبى عليه الصلاة و السلام قال : "اسكت يا عمر.. دعه يا عمر إن كلمات ابن رواحة فى صدور قريش لهى أسرع فيهم من نضح النبل .. (كلام ابن رواحة زى الرصاص فى قلب قريش )

فالنبىﷺ عارف إن أكتر حاجة بتأثر فى المجتمع الإعلام و الإعلام أيام قريش كان الشعر .. و ده بيوصل جداً و بيأثر فى العرب جداً.. قريش دلوقتى مخضوضة جداً ..و خايفة أن أهل قريش يسلموا بسبب منظر النبىﷺ و الصحابة المهيب الجميل .. فتقرر قريش أنها تمنع خروج أهل مكة.. كأنه حظر تجول..
علشان ماحدش يتفرج و يعجبه شكل المسلمين و يتعلم منهم الإسلام...
و كأن ربنا أراد أن أدخل يا رسول الله بلدك و أستمتع و اتبسط و خد راحتك..فدخل النبي عليه الصلاة و السلام لاقى الحرم فاضي .بس في حاجة مهمة ..إيه هى؟ النبى عليه الصلاة والسلام لما هاجر من مكة زمان ، كان في أطفال صغيرين عندهم ٥ سنين و ١٠ سنين و النهاردة بقوا.12 و ١٧ سنه . فالشباب دول لم يعاصروا النبي ﷺ لأنهم كانوا أطفال لما النبيﷺ هاجر، فإيه اللى بيحصل دلوقتي؟

دلوقتى الشباب دول عندهم حب استطلاع مش طبيعى .. و عايزين يشوفوا مين محمد اللى قريش خايفة منه و مين اللي بقى لنا سنين بنحاربه.. مين ده اللي بيقولوا عليه نبي آخر الزمان..مين ده اللي معاه حوالى ٢٠٠٠ إنسان بيحاوطوا عليه و خايفين عليه ..فكان جواهم حب إستطلاع مش عادى..

فكل شباب قريش من سن ١٧ ل ٢٠ و أطفال صغيرين أتولدوا بعد هجرة النبىﷺ و نساء من قريش عندهم حب استطلاع.. فهيعملوا إيه؟ هيطلعوا فوق الأسطح يتفرجوا على النبيﷺ و المسلمين بشكلهم الجميل المنظم المبهج

و هيدخل النبيﷺ الحرم و هيبدأ يطوف ..و قريش تبدأ تطلع إشاعة علشان ماحدش يروح ناحية المسلمين و ينبهر بهم.. إيه هي الإشاعة؟ قريش قالت أن المسلمين عندهم أمراض جلدية معدية و مميتة فأى حد هيقرب من المسلمين هيتعدى.. و انتشرت الإشاعة بسرعة في كل أنحاء مكة ..و ينزل سيدنا جبريل من فوق سبع سموات ويقول : يا رسول الله قالت عنك قريش كذا و كذا و ربك يأمرك أن تجعل أصحابك يرون الكفار من أنفسهم قوة ..(يعنى عايزين الكفار يشوفوا قوة من الصحابة) فهتعمل إيه يا رسول الله.. دلوقتى كل الناس فاكرة إن المسلمين عندهم مرض جلدى.. هتتصرف إزاى يا رسول الله؟

هيقف النبىﷺ و يفك الرداء بتاعه من على كتفه ويطلع دراعه اليمين و يمرر الرداء من تحت ذراعه.. و دى أول مرة النبىﷺ يعملها واسمها الإضطباع و دى هتبقى سنة ليوم القيامة كل اللى بيعتمر هيعملها.. و النبى ﷺ قال للصحابة اعملوا زيي كلكم ،فالكل يكشف ذراعه اليمين و يمرر الرداء من تحت الذراع .. دى سنة الإضطباع.. طب ليه عملت كده و اشمعنى الدراع اليمين يا رسول الله ؟

هنعرف بكرة إن شاء لله 🤍

سيرة_الرسول
الحلقة 138
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

عمرة القضاء (ج1)
فى شهر ذي القعدة .. فى نفس اليوم وفى نفس الشهر اللى اتحرم المسلمين فيه من إنهم يعتمروا، هيعتمر المسلمين بعد سنة من صلح الحديبية زى ما اشترطت قريش ..(إحنا عدينا حبة أحداث حصلت بعد الحديبية علشان نحكى لكم عمرة القضاء ) ويقوم النبى عليه الصلاة والسلام ويقول: " أيها الناس إنى مرتحل بالعمرة فارتحلوا ".. و يبدأ النبىﷺ يقول: لبيك اللهم لبيك .. أنتم متخيلين نفسية الصحابة عاملة إزاى !.. الصحابة طايرين من الفرحة .. كله عمال يجرى.. ده يجهز نفسه .. ده يجهز الناقة بتاعته .. سعادة مفيش بعدها سعادة !!..مهاجرين من مكة بقالهم 7 سنين..

فاكرين النبى عليه الصلاة و السلام وهو مهاجر .. قد إيه كان قلبه بيتقطع .. ووقف قدام مكة و قال :والله إنك أحب بلاد الأرض إلى قلبى و لولا أن قومك أخرجونى منكِ ما خرجت ..و يخرج المسلمين من المدينة و يرددوا طول الطريق: لبيك اللهم لبيك..و كانوا 2000 معتمر .. فى الحديبية السنة اللى فاتت كان المسلمين 1400 .. ال600 اللى زادوا دول مسلمين جدد..دول فتح من عند ربنا ببركة السلام والهدنة اللى بين النبىﷺ و بين أهل مكة.. و ينزل قول الله تبارك و تعالى " لَقَدْ صَدَقَ اللَّهُ رَسُولَهُ الرُّؤْيَا بِالْحَقِّ ۖ لَتَدْخُلُنَّ الْمَسْجِدَ الْحَرَامَ إِنْ شَاءَ اللَّهُ آمِنِينَ مُحَلِّقِينَ رُءُوسَكُمْ وَمُقَصِّرِينَ لَا تَخَافُونَ ۖ فَعَلِمَ مَا لَمْ تَعْلَمُوا فَجَعَلَ مِنْ دُونِ ذَٰلِكَ فَتْحًا قَرِيبًا " ..سورة الفتح27 .

تعالوا نفتكر شروط صلح الحديبية : قالت قريش أن لا تعتمروا إلا بعد عام ولا تدخلوا علينا بسلاح .. طيب دلوقتى عدت سنة و المسلمين جايين يعتمروا بس النبى عليه الصلاة و السلام لا يأمن غدر قريش فهيعمل كتيبة من 200 صحابى و يلبسهم لبس حرب كامل ..و سلاح كامل.. ويخلى عليهم أمير (يعنى قائد) و هيكون اسمه محمد بن مسلمة وهتمشى الكتبية دى أمام المعتمرين ..
فأبو بكر استغرب لما لاقى النبىﷺ أمر بتسليح 200 شخص، فقال: يا رسول الله ألم يشترطوا عليك أن لا تدخل مكة بسلاح !! فقال النبى ﷺ : يا أبا بكر إنا لن ندخلها بسلاح ولكنى لا آمن مكر قريش ..فيا أبا بكر سنأخذ معنا السلاح و نترك الكتيبة عند باب مكة فإن غدرت قريش أدخلنا السلاح وإن وفُّوا خرجنا بعد العمرة وأخذنا معنا السلاح .. (شايفين .. تفكير راقى جداً .. و شخصية متوازنة يارسول الله.. فلا أنت طيب لدرجة إن حد يخدعك.. ولا أنت شديد لدرجة أنك تؤذى حد و تظلمه.. صلي الله عليه و سلم ..).

طيب طلع المسلمين للعمرة ..و طول السكة الصحابة بيلبوا لبيك اللهم لبيك .. وفى نص الطريق قريش عرفت إن النبىﷺ و المسلمين جايين على مكة يعتمروا ، أصل قريش زارعة عيون لمراقبة المسلمين من المدينة لمكة.. شايفين سبحان الله الدنيا اتقلبت .. زمان كان المسلمين هم اللى قلقانين من قريش..فاكرين قد إيه الصحابة عانوا و تعبوا.. فاكرين خباب رضى الله عنه لما كانوا بينيموه على حجر مولع ( زى الفحم كده لما يبقى سخن جدا) و كان بيحكى و يقول ان ماكانش بيطفى النار دى إلا شحم ظهرى (يعنى جلده اللى ساح ) ..بس خلاص ده كان زمان، دلوقتى قريش هى اللى مرعوبة من المسلمين.. والمسلمين ربنا أعزهم
قال تعالى : وَلِلَّهِ الْعِزَّةُ وَلِرَسُولِهِ وَلِلْمُؤْمِنِين [المنافقون- 8].

فالمخابرات اللى تبع قريش عرفت بقدوم المسلمين .. فبسرعة بلغوا قادة قريش إن محمد جاى ومعاه سلاح.. فدب الرعب فى مكة .. فبعتوا للنبىﷺ واحد اسمه مكرز بن حفص عشان يتفاوض معاه.. فجرى مكرز على النبى ﷺ و قال : يا محمد ما عرفناك بالغدر .. يا محمد لقد اشترطنا أن لا تدخل مكة بسلاح .. فابتسم النبى ﷺ وقال: يا مكرز إنا لن ندخلها بسلاح .. فجرى مكرز على مكة وقال : يا معشر قريش أبشروا "محمد على العهد .. محمد على العهد.."(طبعاً صدق النبى ﷺبالكلام .. حبيبكم الصادق الأمين ).
النبى صل الله عليه وسلم قرب من مكة..و بدأ النبىﷺ يشوف ناس تبع قريش و واضح أنهم متابعينه وبيراقبوه. فهتعمل إيه يا رسول الله ؟

النبىﷺ بقى يرفع السلاح وأول ما يجروا يبلغوا قريش وهم مرعوبين ينزل السلاح ويرتاح الفرسان .. هو النبى ﷺ بيعمل كده ليه ؟ النبى ﷺ عايز يوصل رسالة لقريش أنه يقدر يحاربهم لكن هو مش عايز نقطة دم واحدة.. المهم وصل النبى عليه الصلاة والسلام على باب مكة ..و قريش مرعوبة هنعمل إيه دلوقتى يا رسول الله؟

هنعرف المرة الجاية إن شاء الله 🤍

سيرة_اارسول
الحلقة 137
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

صلح الحديبية (ج8 و الأخير)

رجع المسلمين المدينة بعد صلح الحديبية اللى كان من شروطه : من جاءك يا محمد مسلماً من مكة فرده إلينا ومن جاءنا كافراً من عندك لن نرده إليك.. ووافق النبى عليه الصلاة والسلام و تمت المعاهدة..و ييجى واحد اسمه أبو بصير.. وده مسلم هربان من مكة و جاى عشان يحتمى فى المدينة و وراه 2 حراس بيجروا .. فيدخل و يصرخ و يقول يا رسول الله أدركنى.. يضربوننى و يعذبونى ، جئتك مهاجرا .

فقال النبىﷺ: يا أبا بصير عُد .. بيننا و بين القوم معاهدة .. إن الله جاعل لك فرجاً و مخرجاً .. و أخذ الحراس أبا بصير و راجعين به على مكة .. و فى وسط الطريق أبو بصير خدع الحراس و أظهر لهم الود و بعدين قال لواحد منهم سيفك عظيم..أرنى إياه، فالحارس أعطى له السيف.. فأخذه و قام هاجم علي الحارس الأولانى و قتله..
فالحارس التانى خاف من أبى بصير.. فجرى على المدينة و وراه أبو بصير ..،فقال الحارس الكافر للنبى عليه الصلاة و السلام : كذب عليَّ أبو بصير و قتل صاحبى .. فقال النبىﷺ : قد سلمت لك أبو بصير كما طلبت و لا دخل لى فيما يحدث معك..

فيرجع الحارس إلى مكة ..فأبو بصير يقول للنبىﷺ يا رسول الله .. إنى أسلمت لله .. و إنى سأرحل لأفعل ما تريد .. فخرج أبو بصير من المدينة .. فقال النبىﷺ : ويح أمه لو كان معه أحد !! (النبى بيتمنى أن أبو بصير يبقى معاه حد و فعلا ربنا هيبعت له ناس تساعده).

هيروح أبو بصير لمنطقة سيف البحر بين مكة و المدينة .. فالمستضعفين من مكة و منهم أبا جندل هيهربوا من تعذيب مكة و يروحوا على منطقة سيف البحر.. و يعملوا مستوطنة و يقطعوا الطريق على قوافل قريش.

فتبدأ قريش تتعرض لأضرار كبيرة.. فيكتب سهيل بن عمرو جواب للنبى عليه الصلاة و السلام و يقول : من سهيل بن عمرو إلى محمد بن عبد الله.. أريد أن أقوم بتعديلات فى نص المعاهدة و هو أن من جاءك من قريش مسلماً فلا ترده إلينا ..فقرأ النبىﷺ الجواب و فرح أوى.. بعت جواب لأبو بصير و قال له يا أبا بصير إلحق بى فى المدينة فإنى منتظرك ..لكن المرسال اللى بعته النبى ﷺ علشان يوصل الجواب لأبو بصير ،لاقى أبو بصير بيموت و جنبه أبو جندل بيبكى ..

فيقول له: يا أبو بصير معى لك جواب من رسول الله .. فيفتح أبو بصير الجواب و يبكى و يشهق من الفرح ..و يقرأ الجواب و يموت .. و يُدفن أبو بصير، و يأخذ أبو جندل المستضعفين و يطلع بهم على المدينة .. عظيم يا رسول الله !! يعنى قبلت الشرط الظالم ده عشان تتم المعاهدة وتقدر تدعو لدين الله.. و قريش أهو رجعت فى كلامها و أنصفت فى المعاهدة ..

كدة حكينا كل أحداث صلح الحديبية.. و المسلمين بعدها بسنة فى نفس اليوم والشهر وفى نفس التوقيت .. هيخرج النبى ﷺ و يقول : أيها الناس إنى مرتحل للعمرة و يبدأ كله يهلل للعمرة ويلبى وتنزل الآية : "لَقَدْ صَدَقَ اللَّهُ رَسُولَهُ الرُّؤْيَا بِالْحَقِّ ۖ لَتَدْخُلُنَّ الْمَسْجِدَ الْحَرَامَ إِنْ شَاءَ اللَّهُ آمِنِينَ مُحَلِّقِينَ رُءُوسَكُمْ وَمُقَصِّرِينَ لَا تَخَافُونَ ۖ فَعَلِمَ مَا لَمْ تَعْلَمُوا فَجَعَلَ مِنْ دُونِ ذَٰلِكَ فَتْحًا قَرِيبًا (سورة الفتح -27) فكله يستعد للعمرة و هتتسمى عمرة القضاء هنبدأ فيها من الحلقة الجاية و هنعدى حبة أحداث علشان نحكى لكم عن عمرة القضاء و بعدين هنرجع نعرف سوا الأحداث اللى عدينها.

نكمل بكرة بإذن الله
لا تنسوني من صالح دعائكم 🤍

سيرة_الرسول
الحلقة 136
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

صلح الحديبية (ج7)
شفنا امبارح سيدنا عمر بن الخطاب و هو فى شدة الغضب بعد ما تمت المعاهدة بين النبى عليه الصلاة والسلام و بين سهيل بن عمرو.. فجرى عمر على النبى عليه الصلاة والسلام وكان عمر متعصب أوى فقال : يا رسول الله أليسوا بمشركين ؟؟ قال: بلى. فقال: ألسنا المسلمين؟؟ .. قال بلى .. فقال :ألست رسول الله .. قال: بلى يا عمر أنا رسول الله والله ناصرى .. فقال عمر : إذاً فلماذا نعطى الدنية فى ديننا (ليه نذل نفسنا كدة) فقال النبىﷺ : يا عمر إنى رسول الله وإنه لناصرى .. فقال عمر: ألم تعدنا أننا سنعتمر .. فقال النبىﷺ : وهل قلت لكم هذا العام ؟؟ فقال عمر : لا .. فقال النبىﷺ: إذاً سنعتمر يا عمر إن شاء الله..

فقام عمر رايح لأبو بكر وقال: يا أبا بكر.. أليسوا المشركين؟ فقال: بلى.. قال: ألسنا المسلمين؟ .. قال: بلى ..قال: أليس هو رسول الله ؟ قال: بلى يا عمر ويحك يا ابن الخطاب .. قال: فلماذا يا أبو بكر نعطى الدنية فى ديننا ؟؟ فقال يا ابن الخطاب هو رسول الله و هو ناصره، فقال عمر: أولم يعدنا أننا سنعتمر؟ فقال أبو بكر: أوقال لك هذا العام ؟؟ قال: لا .. فقال أبو بكر: إذاً ستعتمر يا عمر إن شاء الله ..
( واخدين بالكم من أن النبى عليه الصلاة و السلام و صاحبه أبو بكر الصديق كلامهم واحد ..أصل دى من موافقات النبىﷺ و أبو بكر ♡ )

المهم سيدنا عمر بعد ما سمع كلام أبو بكر فبيحكى عمر و يقول: والله ندمت و أعددت صياماً و قياماً و عمرة و حج و عتق و صدقة ليُكفِّر الله عنى ماقلته لرسول الله يوم الحديبية .

طيب دلوقتى المسلمين مش هيعتمروا و خلاص راجعين المدينة .. فيقول النبى: أيها الناس قوموا فاحلقوا و انحروا ..(عشان الكفار منعوهم من العمرة.. قال تعالى: "وَأَتِمُّواْ الْحَجَّ وَالْعُمْرَةَ لِلّهِ فَإِنْ أُحْصِرْتُمْ فَمَا اسْتَيْسَرَ مِنَ الْهَدْيِ" [سورة البقرة 196]..الْهَدْيِ (دا خروف / معزة/ بقرة /إبل ) فالمهم ماحدش قام من المسلمين. فيكرر النبىﷺ : أيها الناس قوموا فاحلقوا وانحروا .. فماحدش قام بردو.. الصحابة تعبانين نفسياً.. تعبوا أوى أصلهم يفرحوا أوووى و يطلعوا لسابع سما وبعدين يحصل مشاكل تنزلهم لسابع أرض .. هم مش قادرين يصدقوا أن خلاص فرحتهم راحت هدر ومش هيعتمروا..فــهم زعلانين أوى..فدخل النبى على زوجته أم سلمة وهو حزين .. فقالت: مالك بأبى أنت وأمى يا رسول الله؟. فقال: يا أم سلمة هلك المسلمون .. قالت : لماذا يا رسول الله ..؟

فقال النبى عليه الصلاة والسلام حصل كذا وكذا وحكى لها كل حاجة وإنهم مش بيسمعوا كلامه.. فقالت: يا رسول الله هون عليك .. يا رسول الله اخرج عليهم ولا تكلم منهم إنساناً، و اعمد إلى هديك حيث كان فانحره، واحلق فلو قد فعلت ذلك، فعل الناس ذلك، يعنى هيقلدوك..و فعلاً خرج رسول الله صل الله عليه وسلم و ما اتكلمش مع حد من الصحابة ومسك الهدى بتاعه وذبحه وقعد حلق شعره ولما الصحابة شافوا كده قاموا مقلدين النبىﷺ و ذبحوا الخرفان وكل واحد قعد وحلق شعره.. (شفتوا السيدة أم سلمة و حكمة أم سلمة ..الإسلام بيعز المرأة ..والنبى ﷺ أخد رأيها و مشورتها و بسببها اتحلت مشكلة كبيرة كان هيقع فيها المسلمين) .

طيب دلوقتى بدأ المسلمين يتحركوا للمدينة وهتنزل سورة الفتح ..قال تعالى : إِنَّا فَتَحْنَا لَكَ فَتْحًا مُّبِينًا .. و يحصل موقف عظيم جداً يبين الفتح ده .. أول ما اتمضت المعاهدة ، بدأت القبائل العربية تدخل الإسلام أفواج أفواج .. كله يسلم بين يدى النبىﷺ وهيسلم ناس كتييير جداً جداً وزى ما أنتم عارفين إن المعاهدة بتسمح أن أى حد يقدر يسلم و يروح للنبىﷺ ماعدا قبائل مكة بس هيحصل موقف هينقل المعاهدة لسكة تانية خالص ..

هنعرفه إن شاء الله 🤍

سيرة_الرسول
الحلقة 135
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

صلح الحديبية (ج6)
شفنا امبارح المفاوضات اللى حصلت بين سهيل بن عمرو و بين النبى عليه الصلاة والسلام و اتفق سهيل مع النبى ﷺ على إن المسلمين ما يعتمروش السنة دى و يعتمروا السنة الجاية مقابل هدنة و معاهدة سلام بين قريش والنبىﷺ مدتها ١٠ سنوات و أى حد هُيسلِم من قريش و يروح للنبى ،لازم النبىﷺ يرجعه لهم و أى حد هيكفر من المسلمين و يروح لقريش ، قريش مش هترجعه..و النبى ﷺوافق على ده.. و تتكتب الوثيقة و ينادى النبىﷺ على سيدنا علي بن أبى طالب عشان يكتبها و سهيل قاعد و النبىﷺ قاعد و بتتكتب المعاهدة ..

فيكتب علي رضى الله عنه: " بسم الله الرحمن الرحيم " فيقول سهيل: انتظر! من الرحمن الرحيم ؟ والله ما ندرى من الرحمن الرحيم .. اكتب ما كتبه آبائك من قبلك .. اكتب "باسمك اللهم " فقال النبىﷺ: يا علي اكتب باسمك اللهم (خلوا بالكم النبىﷺ يعرف يتنازل عن إيه و مايتنازلش عن إيه) و يبدأ علي يكتب إن دى معاهدة بين قريش و محمد رسول الله.. فيقول سهيل انتظر! من قال أنك رسول الله ؟؟ لو كنت رسول الله حقاً ما قاتلناك و لكن اكتب محمد بن عبد الله .. فابتسم النبى ﷺو قال : والله إنى رسول الله مهما كذبتمونى و كذبنى الناس و لكن سأمحها وقال : امحها يا علي و اكتب محمد بن عبد الله ..

فقال علي : والله لا أمحها أبداً.(.لن أستطيع.. لن أمحوك أبداً يا رسول الله) ..فقال النبى :امحها يا على ..لعلك تضطر إلى مثل ذلك يوماً ( يعنى هييجي لك يوم هتضطر تمحى لقب لما تتعرض لموقف شبهه.. و فعلاً فى يوم من الأيام بعد 40 سنة هيتعرض سيدنا علي لنفس الموقف و هيتنازل عن إنه يتكتب " أمير المؤمنين "..وقت الفتنة اللى هتحصل بعد إنتهاء خلافة سيدنا عثمان بن عفان ثالث الخلفاء الراشدين بمقتله.. طبعاً النبىﷺ عارف كل ده بوحى من الله و سيدنا على هيفهم قصد النبى بعد ٤٠ سنة من وفاته صل الله عليه و سلم ).

المهم قال علي: لا أستطيع يا رسول الله .. لن أمحها.. فقال النبى أرينيها يا على (أصل النبى لا يقرأ ولا يكتب فمحتاج يعرف مكان الكلمة).. فشاور له علي عليها فحك النبى صلوات الله عليه على كلمة رسول الله بإصبعه و اتمحت و اتكتب محمد بن عبد الله .. و اتكتبت شروط المعاهدة .. و يدوب سهيل لسة هيختم .. فتحصل مفاجأة !! رجل جاى من بعييد و الحديد فى إيديه و رجليه و عمال يجري و كله دم من آثار التعذيب و بيصرخ : يا معشر المسلمين أدركونى أدركونى ..تفتنى قريش فى دينى ( قريش عيزانى أكفر بعد ما أسلمت) طيب مين الرجل ده ؟
ده ابن سهيل بن عمرو و بينادوه بأبى جندل.. كان جاى يستنجد بالنبى عليه الصلاة و السلام و الصحابة عشان ينقذوه من عذاب قريش..فقال النبىﷺ : تعالى معنا يا أبا جندل تعالى .. فقال سهيل: هذا أول العهد !! لئن أخذته لا عهد بينى و بينك يا محمد .. فقال النبى ﷺ :بل يا سهيل أعطه لنا.. فقال سهيل :أبداً والله لن تأخذوه ،بيننا و بينك عهد.. فقال النبىﷺ : يا سهيل أعطه لنا فإننا لم نفض الكتاب بعد (يعنى لسه المعاهدة ما اتختمتش ..فعادى نقدر ما نلتزمش لسه بها) .. فقال سهيل : أبداً والله لئن أخذته لا صلح بيننا وبينك يا محمد.. فالنبىﷺ سكت و بعدين قال : عد يا أبا جندل .. فيقول أبا جندل : يا رسول الله..تردنى إليهم!! إنهم يفتنونى فى دينى .. فقال النبى ﷺ: عد يا أبا جندل إن الله عز وجل جاعل لك فرجاً و مخرجا ..فأبو جندل مش مستوعب إنه هيرجع لعذاب قريش تانى . فالحراس كتفوا أبا جندل تانى جروه و قعدوه جنب سهيل بن عمرو..أبوه.. و قعد أبا جندل يبكى ..
بس مين قاعد مضايق من المعاهدة دى ؟ عمر بن الخطاب.. فقام عمر رايح و قاعد جنب أبا جندل ..و حاول يوجه له رسالة فى وسط الكلام و يقول له : يا أبا جندل إنما دم المشرك دم نجس .. إن الرجل ليقتل أباه فى سبيل الله !! فما ردش أبا جندل ..(هو عمر عايز إيه؟ عمر عايز أبا جندل يقتل سهيل أبوه عشان يخلصوا منه عشان ما تتمش المعاهدة خصوصا أن الكفار عذبوا و قتلوا مسلمين كتير ) فبيحكى عمر و يقول : فظللت أهز سيفى بجانبه حتى يأخذ السيف ليقتل أباه .. فقال أبا جندل: يا عمر لم لا تقتله أنت؟ .. فقال عمر : ما كنت لأعصى أمر رسول الله فقال أبا جندل : و أنا ما كنت لأعصى أمر رسول الله..(أصل النبى ﷺ مش عايز حرب .. وحكينا أن قريش حاولت تفتعل حرب بس النبى ﷺما اداهمش فرصة).

اتمضت المعاهدة .. وأبا جندل اتشد من شعره و بقى سهيل و الحراس يشدوه من شعره و على ظهره .. فبكى الصحابة .. فجرى عمر على النبى عليه الصلاة و السلام و كان عمر متعصب أوى فقال .....

هنعرف إن شاء الله 🤍

سيرة_الرسول
الحلقة 134
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

صلح الحديبية (ج5)
شفنا المرة اللى فاتت محاولات قريش إنها تتفاوض مع النبى عند منطقة الحديبية ووصل عروة بن مسعود من قريش و شفناه وهو بيحاول يستفز النبى ﷺو الصحابة.. و انتهى كلامه مع النبىﷺ بدون أى نتيجة .. بس وقف عروة يبص على أصحاب النبي صل الله عليه وسلم و هم بيتعاملوا مع النبىﷺ، فاستغرب أوى وقال عروة : فوالله ما تنخم محمد نخامة إلا وقعت في كف رجل منهم فدلك بها وجهه وجلده ( أى شئ حتى الوضوء اللى ينزل من أنفه.. قلنا قبل كدة إن النبىﷺ له صفات مش زينا و كان عرقه مسك).

و يكمل عروة كلامه عن الصحابة و يقول : وإذا أمرهم نبيهم ابتدروا أمره ، وإذا توضأ كادوا يقتتلون على وضوئه ، وإذا تكلموا خفضوا أصواتهم عنده ، وما يحدون إليه النظر تعظيماً له .. و يحكى عروة لأصحابه من قريش ويقول : يا قوم ! والله لقد وفدت على الملوك و وفدت على قيصر و كسرى و النجاشى ، فوالله ما رأيت ملكاً يعظمه أصحابه كما يعظم أصحاب محمد محمداً.. طيب دلوقتى هيبدأ النبىﷺ يكون هو المبادر فيحاول يبعت مراسيل لمكة عشان يأكد لهم على فكرة "ماجئنا لقتال" ..فيقول النبى عليه الصلاة و السلام : قُم يا عمر بن الخطاب و قل لهم إننا ماجئنا لقتال .. فيرد عمر و يقول "يا رسول الله لست أنا الرجل المناسب .. يا رسول الله هم يهابوننى و قبيلتى ليست من القبائل القوية فى مكة .. و لكن يا رسول الله عليك بعثمان " و عثمان من قبيلة بنى عبد شمس و دى قبيلة محبوبة جداً فى قريش.

عارفين عمر عنده حق أوى فى الكلام ده.. أصل أهل قريش كانوا بيحبوا سيدنا عثمان حب عجيب .. لدرجة إن لما كانت المرأة تلد كانت تغنى لمولودها و تقول: أحبك و الرحمن حب قريش لعثمان ♡

عثمان كان إنسان محبوب أوى قبل الإسلام و بعد الإسلام .. فيقول النبىﷺ : صدقت يا عمر .. و يقول: قم يا عثمان ..و عثمان يقول: حاضر يا رسول الله ..

و يدخل عثمان قريش و أول ما يدخل يجرى عليه واحد اسمه أبان بن سعيد من سادة قريش و ياخد عثمان فى حضنه و يقول يا معشر قريش دخل عثمان مكة وعثمان فى جوارى لا يؤذيه أحد و لا يسبه أحد و لا يمسه أحد فكل قريش تقول قد أجبنا ما قلت يا أبان ..و لما عثمان يروح مكة فيقول واحد من الصحابة عند رسول اللهﷺ: هنيئاً لعثمان الآن يدخل و يطوف بالبيت .. فيرد النبى ﷺ و يقول : لا والله ما كان لعثمان أن يفعلها أبداً !! و فعلاً يدخل عثمان مكة و هو داخل عيونه على الكعبة فييجي له واحد من كبراء قريش و يقول له: يا عثمان اذهب فطف بالبيت.. فيرد عثمان: " لا والله !! ما كان لى أن أطوف بها و يشتاق إليها رسول الله ".

فيدخل عثمان بن عفان و يبدأوا المفاوضات.. تقوم قريش عاملة لعبة شديدة جداً .. يأخروا عثمان و يعطلوه و يقولوا له طب استنى هنفكر.. و بعدين قامت قريش مطلعة إشاعة عند الحديبية إن عثمان قُتل .. عشان النبىﷺ يحاربهم .. فساعتها يظهر قدام العرب إن محمد جى للحرب .. فقريش عطلت عثمان و طلعت إشاعة أن عثمان اتقتل.. و كله إلا الغدر عند رسول اللهﷺ .. فاكرين بنى قريظة ؟! فاكرين بئر معونة ؟! كله إلا الغدر عند رسول الله ..

فالنبى ﷺ يعرف بمقتل عثمان .. فيجمع الصحابة و يقول :"أيها الناس قُتل عثمان !! قُتل أخاكم عثمان بن عفان !! من يبايع على الموت ؟! فالنبىﷺ يحط إيده و يتكالب كل الصحابة على يد رسول الله و يرفع الرسول يده اليمنى و يحطها فوق إيد المسلمين و يقول " اللهم إنه قتل عثمان و هذه يد عثمان "..بس خلوا بالكوا يا جماعة مش ملاحظين حاجة .. الحالة النفسية و الظروف اللى بيمر بها الصحابة .. فى البداية فرح بالعمرة و بعد كدة هنحارب و نرجع تانى للعمرة و نكمل الطريق و بعد كدة نقف عند الحديبية هنتفاوض .. و بعدين إشاعة ان عثمان اتقتل فخلاص هنحارب.. فالصحابة مع كل التقلبات الرهيبة فى الظروف دى بيقولوا للنبىﷺ سمعنا وأطعنا .. طاعة غير عادية لرسول الله ..

المهم بايع الصحابة النبى ﷺ على الموت بس بعد شوية المسلمين لاقوا سيدنا عثمان رجع .. فأول ما عثمان رجع.. فعرف المسلمين إن مقتله كان إشاعة.. فالنبىﷺ خلاص قال مش هنحارب.. فالصحابة يستجيبوا..طب و بعدين قريش هتعمل إيه؟؟ هتبدأ تتنازل فى المفاوضات .. فتختار قريش سهيل بن عمرو و يروح للنبىﷺ.. فالنبى يشوف سهيل جى من بعيد .. فيقول: أيها الناس جاء سهيل بن عمرو.. سهل الله لكم .. فيدخل سهيل فى منتهى الهدوء و يقعد و يتكلم مع النبى ﷺ و يقول: " يا محمد ماتريد ؟؟ " فقال النبى عليه الصلاة والسلام: "جئنا لعمرة وإن أرادت قريش أن تماددنا مدة سنقبل" .. فقال سهيل أوافق .. و لكن بشروط أولاً لا تدخلوا علينا هذا العام .. حتى لا تتحدث العرب أنكم دخلتم علينا مكة عنوة و رغماً عنا .. و لكن عودوا و أتونا العام القادم و حينها سنسمح لكم بالدخول و لكن بشرط أن تبقوا في مكة ثلاثة أيام فقط و لا تغرب شمس اليوم الثالث و رجل منكم فى مكة .

فالنبى ﷺ يقول له: لك ذلك ..يعنى موافق..

و أول ما النبىﷺ قال كدة الصحابة استغربوا.. مش مصدقين..إيه ده.. مش هنعمل عمرة السنة دى!! مش مصدقين أن النبى ﷺ هيوافق على المفاوضات دى.. فيسألوا النبىﷺ .. فيسكت.. و يطلب النبى من سهيل إنه يكمل كلامه فيقول سهيل الشرط الثانى : من جاءكم يا محمد من قريش مسلماً ترده إلينا و من جاءنا منكم مرتداً لا نرده إليك .. فقال النبىﷺ : أجل يا سهيل .. فالصحابة يقولوا يا رسول الله أتقبل هذا ؟!! ..

فيسكت النبىﷺ و ما يردش و يكمل كلام مع سهيل و يقول : وما فى المقابل يا سهيل.. فيقول سهيل : هدنة بيننا و بينكم عشر سنوات..فقال النبىﷺ : قبلت و لكن بشرط "من أراد أن يدخل فى حلفكم يدخل و من أراد من العرب أن يسلم و يدخل فى حلفى يدخل .. يعنى إيه؟ يعنى ماتمنعوش العرب من دخول الإسلام.. فاللى هيجي لى مسلم من قريش هو ده بس اللى هرجعه لكم زى ما طلبتم أما باقى القبائل لا .. فقال سهيل: قبلت ..

الصحابة طبعاً مش مصدقين إن المعاهدة تمت و أن فرحتهم راحت و مش هيعتمروا .. و خلاص هيرجعوا المدينة ..فقال عمر : يا رسول الله أقبلت !.. فقال النبىﷺ : نعم يا عمر.. فسيدنا عمر بيغلى بس مين اللى قاعد هادى؟ سيدنا أبو بكر الصديق.. و ينادى النبى على سيدنا علي عشان يكتب الوثيقة بينه و بين قريش.. هتتكتب الوثيقة و سهيل هيشترط أن الوثيقة تتكتب بشكل مستفز جداً.. يا ترى النبىﷺ هيتعامل معاه إزاى؟

هنعرف الحلقة الجاية ان شاء الله 🤍

سيرة_الرسول
الحلقة 133
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

صلح الحديبية (ج4)
قولنا المرة اللى فاتت إن القصواء ناقة الرسول بركت عند الحديبية و عرف النبى إن دى رسالة من ربنا.. فوقف عند الحديبية و هتحصل معجزة بدايتها إن المياه اللى مع المسلمين خلصت.. فالنبى يسأل هل هناك بئر؟ فيقول واحد منهم إن في بئر لكن جف .. فتحصل المعجزة و ده حديث أخرجه الإمام البخارى بيحكى سيدنا جابر بن عبد الله بيقول: كنا فى الحديبية و أصابنا عطش شديد و كان فى يد النبى إناء، فقالوا: يا رسول الله إنا عطشي..فبيقول جابر: فوضع النبى كفه فى الإناء ،فوالله رأيت الماء ينفجر من بين أصابع النبى و كنا نشرب و نغتسل منه و والله لو كنا مائة ألف لكفانا..صل الله على محمد صل الله عليه و سلم..

طيب بعد ما عرفت قريش إن النبى عليه الصلاة و السلام وصل للحديبية بدأت تفكر فى طريقة يمنعوا بيها النبى عليه الصلاة و السلام من دخول مكة.. فاستقروا على التفاوض مع النبى، بس هيبعتوا واحد اسمه بشر بن سفيان الكعبى عشان يخوف المسلمين و يهددهم.. فيقول : يا محمد ماالذى جاء بك إلى هنا !! ويحك !!.. فالنبى يقول له :خيراً يا بشر .. فيقول له:" يا محمد، إن قريشاً قد لبست لك جلود النمور فانصرف يا محمد. " (يعنى هتحط نفسك فى حرب شديدة جداً.. بيهدد النبى) فالنبى يقول حديث والله يا جماعة لو مكنش فى السيرة كلها دليل على إن النبى نبى السلام إلا الحديث ده لكفى..

هيقول النبى عليه الصلاة و السلام: " يا ويحى قريش !! لقد أكلتهم الحرب ،مالهم لو خلوا بينى و بين الناس !!..فإن حاربنى الناس و قتلونى كان الذى أرادته قريش و استراحت قريش منى.. و إن أطاعنى الناس دخلت قريش فيما دخل فيه الناس ..و إن رفض الناس كان ذلك لقريش راحة (يعنى ساعتها الرفض هيجى من الناس نفسها ).. فلماذا تعد قريش جيش لقتالى!! فمالهم !! والله لئن قاتلونى لأقاتلنهم على هذا الأمر حتى تنفرد سالفتى (تتقطع رقبتى) حتى يتم الله ما يريد ..
فيرد بشر بن سفيان و يقول : يا محمد قد وعيت ما قلت.. و يمشى..

فتبدأ قريش تبعت رسل للمفاوضات و شوفوا بقى حبيبكوا صل الله عليه وسلم أكبر وأعظم وأشرف وأصدق مفاوض عرفته البشرية عليه الصلاة والسلام .. طيب هتبعت قريش سفير من عندها.. اسم أول سفير هو قائد خزاعة" بديل بن ورقاء".. بديل رجل عاقل .. فقال دعونى أكلم محمد.. فراح للنبى .. فيدخل بديل و يسلم على النبى و يقول : يا محمد ما الذى جاء بك وتعلم الذي بينك و بيننا من خصوم .

فالنبى يرد عليه رد فى منتهى الأدب و منتهى البلاغة فيقول : يا بديل والله ما جئنا لقتال و لكن جئنا لعمرة وما جئنا إلا لنعتمر فإن دخلنا و اعتمرنا فإنا سنخرج بعد عمرتنا مباشرة وإن قريشاً أنهكتها الحرب و أضرت بها و ماجئنا لقتال فإن شئتم أدخلتمونا نعتمر و ننصرف و إن أرادت قريش أن تماددنى مدة قبلت ، و إن أرادت قتالى والله لأقاتلنهم على دين الله حتى تنفرد سالفتى " فيقول بديل يا محمد قد وعيت ما قلت .. سأبلغ القوم .. فيمشى بديل و يقول لقريش: والله يا معشر قريش إنى أرى أنكم تعجلون على محمد.. لمَ تعجلون عليه ؟ دعوه يعتمر و يمضى ..فغضبت قريش منه و قالت: ما لهذا أرسلناك !! فقال: يا معشر قريش إن منعتم هذا الرجل هلكت قريش .. فلا أرى أن تصدوه عن البيت أبداً فما جاء بسلاح فقالوا: والله لن نفعل والله لن يدخلها علينا أبداً .. و اتهموا بديل بالتحيز للمسلمين.

المهم بدأت قريش تتشتت لإن فيه جزء بيمشى .. فيطلع سيد ثقيف عروة بن مسعود .. و عروة ده مش عادى .. فقال: دعونى أنا أكلم محمد .. فراح للنبى وسلم عليه والنبى كان واقف عن يمينه أبوبكر الصديق وعن شماله المغيرة بن شعبة وكان لابس حديد من فوقه لتحته مش باين هو مين (ده الحارس الخاص للنبى) وكان المغيرة قريب عروة بن مسعود.. عروة يبقى عمه..فيجي عروة ويقف ويقول يا محمد ماهذا الذي تفعل ؟؟ والله ما رأيت أحداً جاء على قومه بشر مما جئت أنت به وما أراك جمعت إلا أوباش ( و راح مشاور على الصحابة ) وكمل كلام وقال : هؤلاء والله لئن قاتلتك قريش.. يفروا عنك وتتركك وحيداً "..

فأبو بكر مستحملش الكلام فقال " أنحن نفر عنه ونتركه!! وقام أبوبكر شتم عروة بكلمة جامدة أوى .. فاشتد غيظ عروة وقال : والله يا أبا بكر لولا يداً كانت لك عليَّ فى قريش لرددت عليك ..(أصل كان زمان عروة وقع فى ضائقة مادية وكان عليه فلوس.. فأبو بكر هو اللى سدد عنه الفلوس فكان له فضل على عروة) فيبدأ عروة وهو بيكمل كلام مع النبى يرفع إيده ويشد لحية النبى وكانت دى حركة بتدل على عدم توقير الشخص عند العرب .. فكان عروة عايز يهز صورة النبى عند الصحابة فيبدأ عروة يعمل كدة..و كان سيدنا المغيرة واقف على شمال النبى و مغطى وجهه..

فلما كان المغيرة بيشوف عروة بيعمل كدة فيقوم المغيرة خابط عروة خبطة على إيده.. أول واحدة كانت جامدة فعروة راح منزل إيده بعيد عن النبى.. فعملها تانى..فضربه المغيرة فيبعد عروة إيده عن لحية النبى ..و كان عروة بيحاول يتعمد إن المغيرة مايشوفهوش ففى المرة التالتة راح المغيرة ضاربه ضربة جامدة فقام عروة قايل : آآآه أوجعتنى !! من هذا يا محمد ؟؟ فتبسم النبى و قال : هذا المغيرة ابن أخيك .. فكشف المغيرة عن وجهه .. فقال عروة: أنت المغيرة، أى غُدر (يعنى يا غدار) و قال: ما زلت أسعى في غدرتك، و هل قد غسلت سوأتك إلا بالأمس؟ (يعنى إيه؟)

أصل المغيرة أيام الجاهلية كان خارج مع 12 شاب و كانوا بيشربوا الخمر فلما سكروا.. قام المغيرة قاتلهم كلهم و أخد فلوسهم.. فلما أسلم المغيرة .. قام رايح للنبى مسلم و أعطى له المال.. فقال النبي صل الله عليه وسلم: ( أما الإسلام فأقبله منك، وأما المال فلن أقبل منه شيء، إنك أخذته غدراً ) شايفين حتى لو كان من كافر، و رفض النبى أن يأخذ المال، فلما وصل إلى القبائل أن المغيرة قتل رجالها كانت هتقوم حربٌ بين القبائل، فقام عروة بن مسعود عم المغيرة قايل: أنا هدفع دية هؤلاء، فمحصلش حرب.. لحد فترة قريبة عروة لسه بيدفع فى الدية دى .. عشان كدة عروة قال للمغيرة: مازلت أسعى فى غدرتك.. فالمهم يرد المغيرة و يقول: إن الإسلام قد بدل القلوب .. إياك أن تمس لحية رسول الله !!.. و فضل عروة واقف يراقب الصحابة و طريقة تعاملهم مع النبى ..و هيستعجب أوى...

هنعرف ليه المرة الجاية إن شاء الله 🤍

سيرة_الرسول
الحلقة 132
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

صلح الحديبية (ج3)
شفنا المسلمين امبارح و هم طالعين يعتمروا لمكة و كانوا فى منتهى السعادة لأنهم هيدخلوا مكة بعد ٦ سنين غربة و هجرة.. بس النبى هو الوحيد اللى عارف كويس إن قريش ممكن تمنع دخوله لمكة .. و وصلت الأخبار لقريش إن المسلمين جايين يعملوا عمرة فاتخضوا جداً و طبعا قرروا إن المسلمين ميدخلوش مكة.. فبسرعة بدأوا يخططوا فى طريقة يمنعوا بيها المسلمين قبل وصولهم على باب مكة عشان ميبانش قدام العرب إن قريش تمنع الناس عن البيت الحرام.. فتهتز صورة قريش قدامهم، و تقرر قريش تطلع جيش لمنع المسلمين..

و توصل الأخبار للنبى ﷺأن قريش طلعت بجيش .. فيقف النبى ﷺو يجمع الصحابة و يقول لهم: أشيروا علي أيها الناس ، فيقول أبو بكر الصديق: يا رسول الله ما خرجنا إلا لعمرة و لكن إذا قاتلونا قاتلناهم و لكننا لا نريد الحرب.. فيأخذ النبى ﷺبرأي سيدنا أبو بكر.. و كمل النبى ﷺو الصحابة طريقهم للعمرة..

و لما قربت خيل المشركين من المسلمين.. صلى النبىﷺ بالمسلمين صلاة الخوف.. و ساعتها كان خالد بن الوليد مراقب المسلمين فيشوف المسلمين واقفين بيصلوا .. فينبهر خالد بصلاة الخوف و يقول أن الصلاة دي مش ممكن تكون اخترعها بني آدم إنما هي من رب العالمين .. و يحس خالد ان المسلمين فى معية الله.. و دي كانت أول حاجة من الإسلام تأثر فى قلب خالد بن الوليد .. [طريقه صلاة الخوف فى اللينك ده : https://islamqa.info/ar/36896 ]..

فلما النبى عرف أن قريش عملاله كمين بمجموعة مسلحة من ٢٠٠ فارس بقيادة خالد بن الوليد "قبل إسلامه" و كان هدفهم أنهم يستفزوا النبىﷺ.. عشان يبدأ بالخناق و تتقلب حرب .. عشان قريش تقول للعرب أن محمد جى للحرب مش للعمرة..

فبسرعة قرر النبى ﷺ أنه يغير مسار المسلمين.. و يقف النبي ﷺ و يقول: أيها الناس من يدلني على طريق أتجنب به خالد.. فيقول أحدهم: أنا يا رسول الله و لكنه طريق وعر و طويل فيقول الرسول لا حرج..فيبدأ الصحابة يطلعوا الطريق الوعر الطويل ده..

و روي في بعض الآثار أن الصحابة وجدوا فى طريقهم كلبة والدة و بترضع أبناءها.. فلما شافها النبيﷺ قام قايل: أيها الناس ابعدوا عنها ..أصل النبىﷺ خاف إن فوج المسلمين يدوس عليها (صل الله على سيدنا محمد أرحم الخلق بالخلق ..غيّر مسار فوج كامل عشان مايفزعش الكلبة وهي بترضع أولادها). و يفضل الصحابة مكملين طريقهم لحد ما يصلوا إلى الحديبية ( ده مكان بينه وبين مكة ٩ ميل بس) .. فقريش عرفت أن محمد على الباب فاتجننت..

طيب ليه النبي ﷺوقف عند الحديبية و مادخلش مكة؟ أصل بعد ما النبيﷺ دخل الحديبية كان ماشي متجه لمكة بس فجأة بركت القصواء ناقة النبي ﷺو رفضت إنها تمشي ، فالصحابة قالوا: عصت القصواء.. عصت القصواء (يقصدوا إنها عصت أمر النبىﷺ) فيغضب النبي منهم عشان قالوا كدة و يقول: لا والله ما عصت القصواء و ما ذلك لها بخُلُق ♡.. و إنما حبسها حابس الفيل (فيل أبرهة.. فاكرين قصة سورة الفيل لما كان داخل على الحرم فبرك من هيبة الكعبة و رفض يتحرك) و لما القصواء بطلت تتحرك كأن ربنا بيقول للنبي قف يا رسول الله و خليك في الحديبية ...فيفهم النبي ﷺ الرسالة و يقول للصحابة هنستنى هنا .

عيزاكوا تشوفوا معايا نفسية الصحابة ..هم طالعين فى الأول على أنها عمرة و في نص الطريق خالد جى و هتقلب بحرب و بعدها كملوا الطريق و رجعت تتقلب تانى إنها عمرة .. و وصلوا الحديبية فقام النبىﷺ قايل لهم استنوا شوية .. الصحابة في منتهى الطاعة لرسول الله رضي الله عنهم و أرضاهم ..طيب إيه أخبار قريش دلوقتى؟ قريش مش قادرة تتحمل قرار لوحدها.. فهتبدأ تعمل اجتماع (زي بالظبط لما يبقى في مشكلة كبيرة قوى تمس المنطقة كلها فرؤساء الدول يعملوا اجتماع عشان يبحثوا المشكلة).

و استدعت قريش رؤساء القبائل و استدعوا بديل بن ورقاء قائد خزاعة، و عروة بن مسعود الثقفي سيد ثقيف (اللي طردت النبي ﷺ يوم الطائف ) ، و الحليس بن علقمة سيد الأحابيش ، و مكرز بن حفص من قادة قريش.. فيجتمعوا كلهم مع قادة قريش بإن لازم نلاقي حل للكارثة دي. فيقترح واحد إنهم يغصبوا النبى على الرجوع ، فمايعجبهمش الحل ده لأن لو رجعنا محمد هنخسر المكانة وسط العرب و هننهار .. فيقترح واحد تانى إن محمد يدخل مكة ، فرفضوا بردو.. لحد ما قرروا يعملوا مفاوضات مع النبى ، طيب
هتحصل إزاى المفاوضات دى؟

هنعرف إن شاء الله 🤍

سيرة_الرسول
الحلقة 131
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

صلح الحديبية (ج2)
شفنا امبارح إن قريش كانت عائق كبير بين النبى ﷺ و الدعوة .. و كانت قريش بتمنع باقى القبائل فى إنها تسمع للنبى عليه الصلاة و السلام.. و رغم كدة النبىﷺ مش هيحارب قريش و لكن هيسعى لمعاهدة سلام بينه و بينهم ..

النبىﷺ هيشوف رؤية فى المنام .. إيه تفاصيلها ؟ النبىﷺ شاف نفسه لابس لبس الإحرام و رايح مكة يعمل عمرة ♡.. و بيقول: لبيك اللهم لبيك..( يا جماعة إحنا دلوقتي فى سنة 6 هجرية و داخلين على 7، يعني النبيﷺ بقاله 6 سنين محروم من مكة.. فتخيلوا السعادة اللي النبي و الصحابة هيكونوا فيها لما النبى عليه الصلاة و السلام يبشرهم بالرؤية دى )

فى بقية الرؤية النبى بيشوف إن كل الصحابة وراه و بيطوفوا حوالين الكعبة .. فيصحى النبى ﷺمن النوم و يفهم الرسالة .. و زى ما إحنا عارفين إن رؤيا الأنبياء حق..
فيروح النبىﷺ و يقول للصحابة: " أيها الناس إني رأيت في المنام أني مرتحل للعمرة فارتحلوا..إنتم متخيلين قلب الصحابة؟ ياا.. معقول هنطلع عمرة ؟!

يا جماعة ده اللي راح مننا الكعبة و عمل عمرة واحدة بيرجع منها و قلبه متعلق بها هناك.. و نفتح التلفزيون و نتفرج على الكعبة و ندعى و نقول: يارب رجعني... فما بالكم بالصحابة اللي كانوا عايشين هناك و كانت مكة دى هى بلدهم !! فتخيلوا قد إيه هم كانوا مكسورين من الحزن و تخيلوا فرحتهم هتكون إزاى لما النبىﷺ يقول لهم يلا كله يجهز إحنا طالعين عمرة ..

المهم الصحابة روحهم المعنوية ارتفعت جداً.. فيبدأوا يقولوا لبيك اللهم لبيك.. و يبدأوا يجهزوا نفسهم للعمرة.. و يحصل حاجة عجيبة جداً ، الصحابة هيلاقوا النبىﷺ بياخد معاه خرفان.. فالصحابة مش فاهمين هو النبيﷺ واخد معاه خرفان ليه، إيه علاقة العمرة بمعاهدة السلام مع مكة؟ و ليه النبى واخد خرفان؟.. قال تعالى : " وأَتِمُّوا الْحَجَّ وَالْعُمْرَةَ لِلَّهِ فَإِنْ أُحْصِرْتُمْ فَمَا اسْتَيْسَرَ مِنَ الْهَدْي " (البقرة - 196) يعني لو اتمنعتوا و ما قدرتوش تعملوا عمرة فاذبحوا الهدى ..يعنى الخرفان فداء.. فالرسول ﷺحاطط إحتمال أن ممكن قريش تمنعه هو و الصحابة من الدخول للحرم..

هياخد النبى ﷺو الصحابة الخرفان و كمان هيطلعوا من غير سلاح .. طيب ليه؟ أصل النبىﷺ عايز يحط قريش فى موقف محرج .. بحيث أن لو قريش حاولت تقاومهم فساعتها تبقى قريش بتتعرض لناس مسالمين بدون سلاح..

طيب خرج النبىﷺ و المسلمين لمكة.. يا ترى هيقدر النبى عليه الصلاة و السلام يعمل معاهدة سلام مع قريش؟
بصوا النبيﷺ وضع احتمالات لرد فعل قريش، الإحتمال الأول : إن قريش تمنع المسلمين من العمرة و ده الغالب ، و ده اللى سيدنا محمد عايزه ..طيب ليه؟ أصل قريش واخدة زعامة و مكانة وسط القبائل، فلما تصد حد عن بيت الله الحرام فكدة قريش هتبقي عنصرية و باقى العرب هيتضايقوا من موقف قريش لأن المسلمين مش معاهم سلاح.. و الصحابة اللي طالعين العمرة 1400 صحابي فالعرب كلها هتتفرج ، و هيشوفوا قريش و هيَّ بتمنع محمد بن عبد الله بن عبد المطلب اللي جده حفر بئر زمزم .. فمعقول قريش تمنعه من دخول الحرم !! فبكده قريش هتفقد زعامتها وسط قبائل العرب و ساعتها يمكن العرب يتعاطفوا مع المسلمين و هيبدأوا يسمعوا الدعوة بتاعة النبىﷺ ،و هو ده المطلوب .

الإحتمال التاني: إن قريش توافق على دخول النبى لأداء العمرة.. و لو ده حصل فساعتها باقى قبائل العرب هيقولوا ان خلاص محمد و قريش اتصالحوا فبالتالى مش هيخافوا من قريش و هيسمعوا دعوة النبىﷺ.. و ده المطلوب.

الإحتمال الثالث: إن قريش لما تلاقى أن المسلمين جايين فتحاربهم ، فساعتها العرب كلها هتشوف أن قريش طالعة تحارب ناس جاية تعتمر و كمان مش معاهم سلاح ،فهيتعاطفوا مع النبى ﷺو يمكن يتحالفوا معاه ضد قريش..

الإحتمال الرابع: إن قريش تتحط فى موقف محرج و تشوف إن الحل هو رجوع المسلمين بهدوء و ساعتها بقى المسلمين يشترطوا إن قريش تعمل معاهم معاهدة سلام .. فبكل الإحتمالات اللى قلناها دى هنشوف ان النبىﷺ كسبان جداً و بيحقق هدفه من غير نقطة دم واحدة ..بس خدوا بالكوا الصحابة لحد دلوقتي مش فاهمين القصة دي و مش عارفين النبىﷺ ناوى على إيه، هم بس فرحانين جداً بالعمرة ♡ وإنهم هيشوفوا بلدهم بعد 6 سنين هجرة..

طيب خرج النبىﷺ و الصحابة برة المدينة و بدأوا في التلبية (لبيك اللهم لبيك..لبيك لا شريك لك لبيك ) المسلمين ماشين ماشين.. و في نص الطريق قريش عرفت إن المسلمين جايين على مكة ... فاتخضوا جداً و قالوا إن لو محمد وصل لحد باب مكة ساعتها مش هينفع نمنعه من الدخول لأن ده هيدمر زعامتنا قدام القبائل.. فقريش فكرت و قالت أن الحل الوحيد إن يتمنع محمد من نص الطريق .. من قبل ما يوصل لمكة أصلاً.. شايفين قريش ذكية قد إيه .. طيب هيعملوا إيه ؟

هنعرف بكرة إن شاء الله 🤍

بس رغم كل ده النبىﷺ مش هيحاربهم ولا هينتقم منهم مع إنهم فى ضعف دلوقتى ولو حاربهم هينتصر بس النبي ﷺ مش عايز يحارب قريش، أصل أنا مش نبي الحرب، أنا نبي السلام هيختار النبى الحل التانى.. هيختار السلام ..

إزاي يا جماعة بعد كل ده حد دلوقتى يقول إن النبىﷺ كان نبى حرب.. أبداً والله ده نبي السلام ♡.. بعد كل اللى شافه ده اختار السلام مع أهل مكة ..طيب اخترت السلام .. هتعمل إيه دلوقتى يا رسول الله؟ هتروح تخبط على أهل مكة و تقول احنا جايين نمضي معاهدة سلام؟ أكيد لأ طبعاً.. لأنهم أكيد مش هيقبلوا.. طيب النبى ﷺ هيعمل إيه ؟

هنعرف الحلقة الجاية إن شاء الله 🤍

سيرة_الرسول
الحلقة 130
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

صلح الحديبية (ج1)

خلصنا كل الغزوات أو المناورات اللي ردعنا بيهم آلاف المشركين بتوع غزوة الأحزاب. دلوقتي وضع المدينة بقى ممتاز، المدينة آمنة داخلياً و خارجياً. داخلياً بقت آمنة بأن ما بقاش فيها يهود بيغدروا بس لسة موجود فى المدينة اليهود لكن اليهود المسالمين طبعاً.. آه اتحكم بالإعدام على اليهود الخونة لكن المسالمين ماحدش قرب منهم .. و لما حصل جلاء أو طرد ليهود بني النضير، بسبب غدرهم.. برده ده كان حكم على اللى غدروا بس.. و بني قينقاع اتحكم برده على اللي غدروا بس.. أما باقى اليهود فضلوا موجودين .. و الدليل إن النبي عليه الصلاة والسلام مات و درعه مرهون عند رجل يهودي..

بس في الآخر أمر النبيﷺ بإجلاء اليهود تماماً من المدينة و ده أمر من الله عزوجل بإن لا يبقى في المدينة دينان.. و النبي ﷺحتى ما لحقش ينفذه ..لأن النبيﷺ قال على ده و هو بيموت فنفذه أبو بكر الصديق و عمر بن الخطاب.. و حكمة ربنا فى ده هى حفظ مكة والمدينة من أي دين تاني و إلا كان اختلط على المسلمين دينهم.. فمكة و المدينة هم الحرمين، مافيهمش كفار و مافيهمش أي دين غير الإسلام..

طيب المدينة آمنة داخلياً و خارجياً. داخلياً إن مافيش يهود و خارجياً آمنة بعد انتصار المسلمين على آلاف المشركين بتوع غزوة الأحزاب ..طب هتعمل إيه دلوقتى يا رسول الله. خلاص ارتاح بقى يا رسول الله! هتعيش و تاكل و تشرب و تنام و تقول للناس.. اعبدوا ربنا و احفظوا القرآن و موتوا و خشوا الجنة.. طب ده صح؟ لا طبعاً النبى مش فيهيرتاح ..لأن لازم نشر الإسلام و نشر الدعوة.. طب ليه؟ عشانى و عشانك ..عشان الدين يوصل ليا و لكم عشان أقدر أفهم الحياة و أعيش و أعرف إن ربنا موجود فأدعيه.. و أعرف المنهج اللى فى صالحى اللى ربنا خلقنى عشان أختار ان أمشى عليه ..
أصل هل ربنا بعث النبى لأهل المدينة و مكة بس ؟ لأ طبعاً ربنا بعث النبى محمد ﷺرحمة للعالمين لكل الدنيا كافة.. النبي عليه الصلاة والسلام بيقول: بعث كل نبي لقومه خاصة و بعثت للعالمين كافة.. فالنبىﷺ مش هيرتاح لأنه لازم يبلغ الدعوة.. أصل مفيش راحة في الدنيا...الإمام أحمد رحمه الله سئل: قيل يا إمام متى الراحة؟ قال: "مع أول قدم تضعها في الجنة " مفيش راحة في الدنيا..الدنيا كلها تحديات لازم تواجهها.. طيب دلوقتى قلنا إن النبىﷺ هيبلغ الدعوة عشان احنا نيجي بعده مسلمين. طب يطلع النبى ﷺ يروح فين؟ للقبائل المحيطة و يدعو إلى الله؟ لأ .. ما ينفعش طبعا لأن كل قبيلة من دول عملت تحالف مع قريش لأن قريش سيدة العرب .. فمفيش و لا قبيلة سامحة للنبيﷺ أنه يكلمها نص كلمة ..لأن لو قريش عرفت إن بقى فيه بين القبائل دى و بين النبى ﷺ اتصال فساعتها هتنقض قريش التحالف معاهم و تعزل القبائل دى و تقطع كل العلاقات الإقتصادية و القبائل تجوع.. و بكدة يا جماعة قريش مقيدة النبي ﷺ.. و النبى مش قادر يدعو إلى الله .. فكل ما يروح لقبيلة تقوم القبيلة مانعة الدعوة فى بلدها.. فبقت قريش هى العائق قدام رسول الله.. فكان الحل هو إن النبى ﷺ يفتح مكة .. هتعمل إيه يا رسول الله؟ لازم أفتح مكة.

طيب النبىﷺ كدة قدامه حلين.. يا إما أطلع دلوقتي و أفتح مكة و أحارب، و قريش تعبانة عالآخر فأكيد هنتصر.. يا إما أحاول أوصل لمعاهدة سلام بيني و بين قريش..تعالوا كدة ناخد الإختيار الأول إن هو يحارب.. ده اختيار منطقي جداً على فكرة ده حق المسلمين لأن اللى اتعمل فى الصحابة و فى رسول الله ﷺ قبل و بعد الهجرة ماكانش قليل .فاكرين ياجماعة السيدة سمية لما انضربت بالحربة في مكان عفتها، و قتلوا زوجها ياسر أبو عمار بن ياسر.

فاكرين لما حرقوا ظهر سيدنا خباب لحد ما جلد ظهره ساح و بقى الشحم اللي بيدوب من ظهره هو اللي بيطفي الفحم. فاكرين لما كانوا بيعذبوا بلال في الصحراء.. فاكرين لما كانوا بيغطسوا وش عمار بن ياسر في الماء الساخن..
فاكرين حصار بنى هاشم فى الشِعب، سعد بن أبي وقاص من كتر الجوع بيقول كنت أتبول فسمعت طأطأة لبولي ..أصله تبول على شحم بعير..حتة دهن ..فياخدها ويطهرها فى النار لحد ما بقت رماد فبقى يسف الرماد بتاعها و يشرب عليها حبة ماية ويقول بقيت عليها 3 أيام ..

فاكرين عقبة بن أبي معيط لما كان يخلي النبيﷺ واقف يصلي و يجيب الرداء بتاعه و يبرمه و ييجي على رقبة النبي ﷺويخنقه و يسقط النبي صل الله عليه و سلم على ركبتيه عشان مش قادر يتنفس..و مرة النبىﷺ فضل يلف على القبائل يقول من يأويني حتى أبلغ كلام ربي فإن قريشاً منعتني أن أبلغ كلام ربي.

و فضل النبى ﷺيطوف على القبائل و آخر اليوم يروح بيته يرتاح شوية و يحط قصاد إيده طبق و كان لسة هياكل لقمة منه .. ومفيش فى البيت أكل تانى، فيخشوا عليه كفار قريش و يكسروا عليه باب البيت و يجيبوا نجاسة ناقة و يرموهاله في الطبق بتاعه اللي مفيش أكل غيره ..فماياكلش صل الله عليه و سلم..

سيرة_الرسول
الحلقة 129
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

ردع النبي ﷺ لقبائل الكفار الغادرة (ج3)

نكمل سوا السرايا(يعنى عدد صغير من الجنود يخرج لقتال العدو لكن ميكنش معاهم رسول الله) دى اللى خرجت لردع الكفار وصد عدوانهم.. وللرد على اعتدائاتهم وقتلهم لصحابة رسول الله.. خرجت سرية دومة الجندل بقيادة عبد الرحمن بن عوف ، دعاهم عبد الرحمن بن عوف للإسلام و أسلموا.. وحصل موقف لطيف إن عبد الرحمن بن عوف وهو طالع السرية دي كان طالع عمامته كانت مش مظبوطة شوية مش مهتم أوي بنفسه، حرب بقى ..

فالنبي عليه الصلاة والسلاة قال له تعالى يا عبد الرحمن، ارجع، أصل النبي بيحب الجمال.. و الإهتمام بالنفس..فقال: ما هذا يا عبد الرحمن ؟(إيه اللي إنت لابسه ده ؟ مش حلو كده ) اجلس، فأجلسه أمامه، فقعد عبد الرحمن على ركبته قدام النبي، فوقف له النبي عليه الصلاة والسلام و فك له العمامة..و بدأ يعلمه إزاي يعتم بنفس الطريقة اللي هو شخصياً عليه الصلاة والسلام بيعتم بيها..

على فكرة النبي يا جماعة عمامته مش زي اللي بنشوفه دلوقتي احنا بنشوف في التلفزيون الغطرة البيضا و دى عمر ما النبي لبسها.. و العقال الأسود عمره ما لبسه برده.. وحاجات كتير بيلبسوها الشيوخ ودي ما كانتش سنة النبي.. مش حرام طبعاً إنهم يلبسوها ..بس النبي مكانش بيلبس كده..طب تعالوا نشوف عمامة النبى، أولاً النبي شعره ناعم جداً فأي حاجة هيلبسها هتتزحلق .

فكان بيحط قطعة قماش مستديرة على راسه كده، و بتكون راسه كلها متغطية، و بعدين يجيب قماشة و يطبقها مستطيل كأنها شريطة طويلة كده، و يجيبها من قدام من على جبينه و يلفها على راسه مرة او اتنين و يعقدها على ورا عقدة او اتنين عشان متتفكش و تنزل باقى القماشة بين كتفيه، يعني تبقى طويلة و واصلة كدة بين كتافه، دي عمامة النبي صل الله عليه وسلم. سهلة جداً ..هي كل حاجته سهلة عليه الصلاة والسلام ♡ .وكانت العمامة بتاعته ممكن يلبسها بيضا و ممكن سودا و المشهورعنه إنه كان بيلبسها أبيض.

بس لما كان بيلبس العمامة اللى لونها أسود.. الصحابة كانوا بيحبوا شكلها عليه أوى عشان هو أبيض و شعره أسود فكان بيزداد حسناً و جمالاً..

المهم قام النبي لف العمامة لعبد الرحمن و قال له: هكذا تعتم العمامة..و قال له : يا عبد الرحمن اغزو في سبيل الله ولا تغدروا ولا تمثلوا ولا تحرقوا شجراً..دى وصايا النبي العظيمة الحربية صل الله عليه وسلم..

الغزوة اللى بعدها كانت لقبيلة لازم يحصل ردع ليها و هي قبيلة بنو لحيان و دول من الناس اللي اشتركوا في قتل خبيب بن عدي ،( فاكرين؟ حادثة الرجيع اللى اتقتل فيها حوالى7 من الصحابة من حفاظ القرآن :')) المهم هتحصل حبة مناوشات بس هينتصر النبي. فالنبي و هو راجع هيعمل حركة في منتهى العظمة.. فى طريق رجوع المسلمين للمدينة يضطروا يعدوا على مكة.. فبعت النبى سيدنا أبو بكر الصديق و معاه عشر فرسان فقط مش أكتر ، و كانت مهمتم إنهم يروحوا على باب مكة، و يعملوا حبة مناورات عسكرية بس من غير ما يتعرضوا لأى حد من كفار قريش.. طب بتعمل إيه يا رسول الله؟

بيردعهم عشان ميفكروش يهجموا مرة تانية على المدينة..عارفين يا جماعة لما راح أبو بكر الصديق بالعشر فرسان دول إيه اللي حصل بعد كدة؟ دب الرعب في أرجاء مكة. تخيلوا بعد ما خرج الكفار بجيش الأحزاب بعشرة آلاف مقاتل للمدينة خافوا من عشر مسلمين.! سبحان الله.. هم خافوا جداً لأنهم مش حمل حرب دلوقتي..

و أصلا الهدف مكنش الحرب.. لأ خالص.. الهدف بس الردع .. بس مع كل الردع ده برده فى كفار هجموا على المدينة.. راح واحد اسمه عيينة بن حصن بعدد من الجنود للمدينة و دخلوها بالليل و حرقوا بيت.. و قتلوا ذر بن أبي ذر الصحابي ابن سيدنا أبو ذر و أسروا إمرأة من الأنصار و سرقوا ناقة النبي .. "دى ناقة كان النبى مسميها العضباء"..(طب تخيلوا كل العدوان ده حصل!! .. أمال لو مكنتش رادعتهم بإرسال السرايا يا رسول الله كان هيحصل إيه).

المهم اتخض المسلمين من الهجوم ده وحاولوا يطلعوا ورا الجنود الكفار بس مقدروش يلحقوهم .. والكفار كتفوا المرأة و حبسوها .. فالمرأة دى بتحكى وبتقول : كنت وحدى خائفة، فجعلت أتحلل من القيد، فتحللت.. فتقول فانطلقت إلى النوق التي حولي، (المسروقين) فذهبت لأركب الأولى فوالله ما إن اقتربت منها حتى هاجت و ماجت و صاحت!!! فتركتها كى لا يكشف أحد أمرى..فذهبت للناقة الأخرى فهاجت فتركتها كى لا يستيقظ أحد و وصلت إلى العضباء ناقة النبي (دي مجرد ناقة بس شوفوا هيعمل إيه) فبتقول فوالله فأناخت إلي حتى أركب عليها وما أصدرت صوت..، صل الله عليه وسلم.

إنتو عارفين كان عند النبى برده ناقة اسمها القصواء. القصواء دي كانت ناقة عجيبة أوى .. كانت بتفهم النبى عليه الصلاة والسلام.. عارفين لما النبي مات، امتنعت القصواء عن الطعام و الشراب، كان الصحابة بيحاولوا يأكلوها و يشربوها، فحفرت حفرة في الأرض و دفنت رأسها فيها وماتت حزناً على رسول الله. حتى الناقة بتحبه صل الله عليه وسلم..
المهم أناخت العضباء للمرأة فركبتها ودخلت على المدينة الحمدلله و ربنا نجاها وقابلت النبي في نص الطريق هو والجيش لما طارد المعتدين ورجعوا كلهم مع بعض. من فرحة المرأة قامت ندرت و قالت : يا رب لئن أنجيتني ووصلت إلى المدينة، والله لأنحر هذه الناقة و قسم لحمها على الفقراء.. فلما وصلت للمدينة، فتاني يوم راحت للنبي، فقالت: يا رسول الله من فضلك هات الناقة عشان أدبحها. فقال لها هتدبحيها ليه ؟! فقالت يا رسول الله أنا مكنتش عارفة إنها بتاعتك، و أنا قلت إن أنا لو ربنا نجاني هدبح الناقة دي عشان أقسمها على الفقراء.
عارفين النبى قال لها ايه؟ قال: بئس ما جزيتها..( معقولة ده جزائها..يعني تشيلك لحد هنا و تقومي دبحاها!!) شوفوا رقة النبي مع الناقة، صل الله عليه وسلم. وبدأ يفهم المرأة ويقول : لا نذر في معصية الله ولا فيما لا تملكين..النذر في معصية الله زي لو واحد قال لو حصل كذا مش هكلم أخويا..

ده نذر في معصية الله وكفارة النذر زي كفارة اليمين وهى (إطعام عشرة مساكين من أوسط ما تطعمون أهليكم أو كسوتهم أو تحرير رقبة..فمن لم يجد فصيام ثلاثة أيام) والنذر لازم يوفى إلا لو في معصية الله ولو نذر فى شئ مش ملكك، فده مينفعش يتنفذ ولازم كفارة للنذر...

كدة خلصنا كل المناورات اللي ردعنا بيهم العشر آلاف كافر اللى هجموا على المدينة.. و المدينة دلوقتى آمنة داخلياً و خارجياً.

نكمل المرة الجاية إن شاء الله 🤍

سيرة_الرسول
الحلقة 128
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

ردع النبي ﷺ لقبائل الكفار الغادرة (ج2)

شفنا المرة اللى فاتت حكمة النبى عليه الصلاة والسلام بأنه يعفو عن ثمامة بن أثال فيسلم لله تعالى .. بصوا بقى ثمامة هيعمل إيه بعد إسلامه .. أسلم ثمامة وقال: يا رسول الله نفسي أروح أعمل عمرة، أتأذن لي؟ فأذن له النبى.. أتاري ثمامة كان في نيته حاجة تانية... وصل ثمامة مكة ودخل الحرم، و طاف وعمل عمرة، وبعدين وقف يكلم قريش .. أصل قوم ثمامة "بنى حنيفة" بينهم وبين قريش اقتصاد، فلوس، وتجارة ..فقبيلة ثمامة هي اللي بتورد (الحبوب / القمح) لقريش ..وقريش بتشتريه من هناك.. فكدة قريش روحها في إيد بنى حنيفة..

المهم هيقف ثمامة و يقول لهم: يا معشر قريش، أتؤذون رسول الله؟ فقالوا: ما بك يا ثمامة ؟ (هم مستغربين كلامه أوى .. مش فاهمين هيقول إيه) فقال ثمامة: والله لا تأتيكم من بلادى حبة من حبها حتى يأذن فيها رسول الله ..فقريش اتجننت ..مش مصدقة اللى بتسمعه، فيرجع بلده ويمنع التجارة لقريش.. وتبدأ قريش تعانى..مفيش أكل لمدة شهر، والتانى والتالت.. بقت مجاعة.. طيب هيعملوا ايه؟ هيستنجدوا.. طب بمين ؟ بمحمد صل الله عليه وسلم.. انجدنا..انقذنا يا محمد!! ويقولوا له يا محمد أنقذ قومك.. (دلوقتى بقيتوا قومه.. طب والحصار اللى استمر شهرين للنبى و المسلمين فى غزوة الأحزاب!! )

المهم بعتوا وقالوا :أنقذ قومك يامحمد قد أحلت بهم المجاعة وأمر صاحبك فليخلي بيننا وبين الحنطة (يعنى الحبوب)..فالنبي هيعمل إيه؟ ياترى هيذلهم؟ ماهم خلاص روحهم فى إيده ؟ لا والله مش هيعمل كدة صل الله عليه وسلم ..ده بسرعة هيبعت لثمامة جواب ويقول له: يا ثمامة خلي بين قومي وبين تجارتهم (ويسميهم قومه.. يااا بتعمل كدة رغم كل اللى عملوه فيك يا رسول الله ) فثمامة يقول إيه؟ سمعاً وطاعة يا رسول الله، فيفتح التجارة تاني وتنتهى المجاعة فى قريش صل الله على محمد، شوفتوا ياجماعة أخلاقه..كان ممكن يختار حاجة تانية، كان ممكن يفاوضهم.. لكن أبداً .. مرضيش يسيبهم جعانين ..صل الله على محمد.

و يبعت النبى سرية تانية ، عشان يأدب قبيلة تانية بعد ما غدرت بيه، سرية إلى سيف البحر و دى منطقة ساحلية، ويطلع فيها سيدنا أبو عبيدة بن الجراح ومحصلش فيها أحداث كتير.. بس المسافة ليها كانت طويلة ، فالأكل اللي مع السرية خلص ومبقاش معاهم غير تمر ومن كتر الجوع بيحكى الصحابة وبيقولوا : كان أحدنا يأخذ التمرة فيمصها كما يمصها الصبي ثم يخرجها من فمه ويشرب عليها الماء (ياخد من التمرة السكر كأنه جلوكوز يعني عشان محدش يغمى عليه ، وفى نفس الوقت يفضل فيه تمر يتاكل)

بس اشتد بالسرية الجوع .. لكن المنطقة ساحلية زى ما قلنا، وهم ماشيين لاقوا سمكة عنبر اترمت على الشط فبيقول الصحابة : فقلنا نأكل (طبعا مكنتش لسة نزلت آية بتقول إن ميتة البحر حلال ، لحد الوقت ده كانوا فاكرين إن ميتة البحر حرام لأن ربنا قال : حُرِّمَتْ عَلَيْكُمُ الْمَيْتَةُ وَالدَّمُ وَلَحْمُ الْخِنزِيرِ [ المائدة-3] فالسمكة دي طالعة من البحر ميتة، فقالوا: ميتة ..لا تأكلوها.. فقال أبو عبيدة: ميتة !! فقالوا :ولكننا سنموت من الجوع.. فبدأوا يشوفوا إنهم كدة في حكم المضطرين.. فأخدوا السمكة و شووها وكلوا منها حتتين عشان يسدوا جوعهم وبعد كدة خافوا يكملوا..

و زعلوا أوى انهم أكلوا .. فخدوا بقيت السمكة معاهم إلى النبي علية الصلاة والسلام وأبو عبيدة خايف.. أصله حاسس إنهم عملوا حاجة حرام، فيبدأ أبو عبيدة يحكى للنبى اللى حصل فتنزل إكراماً ليهم الآية دى ، قال تعالى : أُحِلَّ لَكُمْ صَيْدُ الْبَحْرِ وَطَعَامُهُ مَتَاعاً لَكُمْ وَلِلسَّيَّارَةِ وَحُرِّمَ عَلَيْكُمْ صَيْدُ الْبَرِّ مَا دُمْتُمْ حُرُماً وَاتَّقُوا اللَّهَ الَّذِي إِلَيْهِ تُحْشَرُونَ [المائدة:96] .. ففرحوا جداً جداً ..

بس أبو عبيدة و الصحابة كانوا برده مضايقين لأنهم عملوا حاجة مش مألوفة.. فالنبى عشان يطمنهم قالهم : أمعكم منه شئ؟ معاكوا من السمك لسه؟ فقالوا نعم. فقال هاتوا. فأكل النبى حتة منها عشان يأكد لهم إن يحسوا إنها مش حرام و يستريحوا.. ودي من أعظم طرق التعليم عند النبي صل الله عليه وسلم.. على فكرة يا جماعة ممكن النبي يعمل حاجة هو مش عايز يعملها لكن بيعملها بس عشان يبين حكمها الشرعي و يعلمنا..فممكن ييجى على نفسه في حاجة هو مش نفسه يعملها خالص، بس بيعملها عشان يقوينا عليها بالذات لو حاجة تقيلة على قلبك أو حاجة أنت مش قادر تتقبلها بسهولة..عارفين زي إيه برده؟

زى العرب زمان كانوا مش قادرين يتقبلوا فكره تحريم الله عزوجل للتبنى.. أصل كان التبنى منتشر ..

و كان النبى عليه الصلاة و السلام متبنى زيد بن محمد اللى أصلا اسمه كان زيد بن حارثة بس النبى كان مسميه على اسمه فلما نزل تحريم التبني ، قال تعالى : ادْعُوهُمْ لِآبَائِهِمْ هُوَ أَقْسَطُ عِنْدَ اللَّهِ [سورة الأحزاب -5] فرجع زيد لاسمه الحقيقى " زيد بن حارثة".. ف بكده خلاص مبقاش ابن النبى ..بس برده العرب والصحابة كانوا لسه شايفين إن زيد ابن النبى ومراته تبقى هي مرات ابن النبى ، فربنا عاوزهم يبطلوا العادة دي و ميخلطوش الأمور.. فربنا قال للنبي صل الله عليه وسلم فى القرآن الكريم، قال تعالى : فَلَمَّا قَضَىٰ زَيْدٌ مِّنْهَا وَطَرًا زَوَّجْنَاكَهَا لِكَيْ لَا يَكُونَ عَلَى الْمُؤْمِنِينَ حَرَجٌ فِي أَزْوَاجِ أَدْعِيَائِهِمْ إِذَا قَضَوْا مِنْهُنَّ وَطَرًا ۚ وَكَانَ أَمْرُ اللَّهِ مَفْعُولًا (سورة الأحزاب -37)

الآية دى بتحكى ان سيدنا زيد حصل بينه و بين زوجته زينب خلافات فقرروا الطلاق و انفصلوا.. فربنا أمر النبى عليه الصلاه و السلام بالزواج من زينب عشان النبى يأكد للناس أن زينب مش محرمة عليا لأن زيد أصبح مش ابنى و التبنى خلاص تم تحريمه..و الدليل إنى أقدر أتجوز طليقة زيد .. و بكده كمان النبى بيأكد لأى حد له ابن بالتبنى أن خلاص الابن ده مش ابنك و خلاص التبنى اتحرم و التشريع النبى أكده بطريقة عملية بأمر من الله عشان الناس تتقبل الفكرة.. و من هنا نفهم أن زواج النبى من زينب كان أمر من الله و مش برغبة النبى و إرادته ..

عشان كده لازم نعرف أن النبى فى حاجات بيعملها عشان بس يعلمنا ..مش عشان له رغبة فيها.. دي تحل بعض الشبهات في الأحاديث وبالذات في البخاري، إن ممكن يعدي عليك حديث ، فتقول ليه النبي عمل الحاجة الفلانية دى؟! فخلي دايماً عندك الإحتمال بإنه صل الله عليه وسلم بيكون مضطر يعمل حاجات عشان يثبّت حكم معين وشايف إنه تقيل على الصحابة، فبيعمله عملياً عشان يأكد لهم إن ده مش حرام..

نكمل الحلقة الجاية إن شاء الله🤍

شوفتوا يا جماعة المعاملة الطيبة فى الأسرى اللى أمر بها الإسلام آخرتها إيه؟ أسلم ثمامة . النبى لما اختار إنه يتصرف تصرف حكيم وهو إن ثمامه يسلم.. بس أحياناً بتقتضي الحكمة، إن لازم قصاص، زي بني قريظة.. بس برده ما ننساش إن النبى عرض عليهم الإسلام الأول ..لكن رفضوا.. ولما قرر يحكم عليهم رفضوا حكمه برده.. وطلبوا أن اللى يحكم سعد بن معاذ.. يعنى لو كانوا اختاروا حكم النبى كان ممكن يختار حكم أرحم.. فده يدل إن الأصل في الإسلام إنى أدعوك عشان تدخل الجنة..

نكمل سوا إن شاء الله
هذة الحلقات نقلا عن استاذة نورهان الشيخ "🤍

سيرة_الرسول
الحلقة 127
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

ردع النبي ﷺ لقبائل الكفار الغادرة (ج1)

خلصت غزوة الأحزاب 10000 مشرك من قبائل مختلفة ضد النبى عليه الصلاة والسلام و المسلمين.. ونصر الله تعالى المسلمين و قال صل الله عليه و سلم : اليوم نغزوهم ولا يغزوننا.. أصل الأحزاب اللي كانوا محاصرين المسلمين كانوا لازم يتأدبوا.. دول اتفقوا مع بنى قريظة اللى جوه المدينة و أقنعوهم يغدروا و ينقضوا العهد مع رسول اللهﷺ ..يعني مش بس جايين يحاربوا النبى ﷺ ..لأ دول بيدبروا خطط لضياع أمن واستقرار المسلمين..و يعرضوهم للقتل..

فالقبائل دي محتاجة ردع عشان ما يفكروش يتحدوا ضد النبى ﷺ والمسلمين تانى..لأن غزوة الأحزاب كانت هتبقى حرب خطيرة.. لأنها إتحاد لكل القبائل، بس الحمد لله..ربنا بكرمه نصر المسلمين . فالأحزاب محتاجة ردع وإلا هنلاقيهم بعد أسابيع هاجمين على المدينة من تانى...والنبى ﷺ داعى سلام مش داعى حرب ولا يبدأ العدوان أبداً.. بس هيصد العدوان بإنه هيبدأ يبعت سرايا للقبائل اللي غدرت بالمسلمين .. و كمان هيبعت سرايا للقبيلة اللى غدرت و قتلت السبعين صحابى اللى كانوا من قراء القرآن..

دلوقتى هيقدر النبىﷺ يجيب حقهم.. أصل دم المسلم غالي أوي، فهتعمل إيه يا رسول الله ، هبعت سرية (مش جيش، لإنها مش غزوة .. الغزوة بيطلع فيها النبى ﷺ.. أما السرية دى بيطلع فيها الصحابة) .. فهيبعت سرية بقيادة محمد بن مسلمة للقبائل اللى شاركت فى دبح السبعين صحابى غدراً.. فيوصل محمد بن مسلمة لقبيلة نجد و ينتصر و من بنى حنيفة يتأسر واحد اسمه " ثمامة بن أثال" و يوصلوا به للمدينة، و يتربط فى سارية (عمود) المسجد النبوى..

أصل لما يبقى مربوط عند المسجد..ده هيخليه يتفرج على الصلاة و يسمع خطبة الجمعة و يسمع الدروس و يسمع المواعظ و يسمع صوت النبي عليه الصلاة و السلام في قراءة القرآن في الصلاة .. الصحابة بيقولوا والله ما سمعنا لا أحلى ولا أطيب ولا أندى صوتاً في القرآن من صوت رسول الله عليه الصلاة والسلام (إن شاء الله نسمع صوته في الجنة) صوته في القرآن جميل.. المهم ثمامة مربوط .. و كل يوم يعدي النبي ﷺ من قدامه و يقول له: سلام عليك يا ثمامة.. كيف حالك؟.. فيقول له: كويس. ..فيمشي النبي ﷺ . فينادى ثمامة ويقول : يا محمد.. (حاف كده) بس هيرجع له النبي ﷺ و يقول له :لبيك ( يعنى تحت أمرك)..

طب ده أسير يا رسول الله ..بتتكلم معاه كده ؟!! أيوه ..عشان أنا مش هدفي إنى أهينه !! فقال ثمامة أنا جائع، رغم إن الصحابة أكلوه.. فقال النبى ﷺ : حسناً ..تخيلوا النبى ﷺ هيعمل إيه.. هيقول حد يا جماعة يديله أي أكل، أنا مش فاضى ؟.. لأ.. النبى ﷺ هيروح بنفسه ويرجع بيته يحضر قصعة من الطعام ويروح يحطها بين إيدين ثمامة بن أثال.. و يقول للصحابة فكوه عشان يعرف ياكل براحته لحد ما يخلص أكل.. و تانى يوم النبيﷺ معدي ، فينادى عليه ثمامة ويقول: يا محمد، فيرجع له ويقول : نعم يا ثمامة ؟ فيقول ثمامة : عطشان.

فالنبي ﷺ يروح يجيب له مياه، فيبدأ ثمامة قلبه يحصل له إيه؟ يبدأ يتغير.. فبعدها بيوم يعدي النبي.. فالنبي ﷺ عايز يعرف ثمامة قلبه حصل له إيه.. فيقول له: ما عندك يا ثمامة؟ في حاجة عايز تقولها لي؟ فقال ثمامة : نعم ..اعف عن شاكر و إن تقتل تقتل ذي دم (لو عفيت عني هفضل أشكرك و مش هنسى لك الجميل ده..و لو هتقتلني هتبقى معذور، أنا في إيديا دم أصحابك و شاركت في قتلهم) فالنبى ﷺ يسيبه ويمشى عشان النبىﷺ مش عايز يقتله.. لكن عايزه يسلم..

طيب ممكن حد يسأل: هو مش المفروض إنهم يقتلوا ثمامة عشان القصاص؟ بصوا خلي بالكم إن ثمامة مش هو لوحده اللي قتل ده أولاً.. ثانياً ده سيد القبيلة فالنبى مخير بين أمرين، يا إما أقتله و آخد القصاص و ده من حقي.. يا إما لو أسلم هتسلم القبيلة بتاعته كلها معاه.. فأنهى اختيار فيهم فيه الخير الأكبر؟ إني أقتله و هيكون قصاص وده مش حرام وللا يسلم وتسلم قبيلته كلها .؟؟ النبىﷺ رحمة الله للعالمين هيشوف إن من الحكمة إنه هيختار إن يسيب ثمامة يسلم. فيعدى النبىﷺ عليه تاني، و يقول له: ما عندك يا ثمامة؟ (عايز تقول حاجة؟)

فقال : نعم.. إن تقتل تقتل ذي دم و إن تعفو تعفو عن شاكر..وثالث يوم يكرر ثمامة نفس الحاجة.. فقال النبي صل الله عليه وسلم : حِلوا وثاقه..(فكوه) فيتحل ثمامة. كان فيه نهر ورا المسجد، عارفين ثمامة عمل إيه؟ جري على النهر اللي ورا المسجد و أخد جردل و بقى يكب على راسه المياه.. هو بيعمل إيه؟ ثمامة بيغتسل عاوز يتطهر من نجس الكفر. و يملي الجردل و يكب و يملي و يكب لحد ما اغتسل تماماً ورجع للنبى ﷺ و قال : يا رسول الله أشهد أنه لا إله إلا الله وأنك رسول الله.. أصل المعاملة دي مش ممكن تكون غير من نبي، الأخلاق دي مش ممكن تكون غير من دين اختاره رب العالمين سبحانه وتعالى..

بعد غزوة الخندق يحصل تحول رهيب لمكانة المسلمين و هنشوف براعة النبى السياسية سوا

بكرة إن شاء الله 🤍

سيرة_الرسول
الحلقه 126
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة الأحزاب أو الخندق (ج8 و الأخير)

شفنا المرة اللى فاتت بعد ما انسحب جيش الأحزاب ، توجه النبى ﷺ بالمسلمين لجنوب المدينة لمحاربة يهود بنى قريظة بعد غدرهم و خيانتهم للعهد اللى كان بينهم و بين رسول الله .. و لما عرف يهود بنى قريظة أن المسلمين جايين فقرروا يعملوا حصن حواليهم و لما وصل النبى عليه الصلاة و السلام بجيش المسلمين لبنى قريظة .. تم حصارهم لمدة 25 يوم ..
لحد ما حصلت معجزة إلهية .. ألقى الله تعالى الرعب في قلوب اليهود من دون قتال.. فيخرج اليهود من الحصن فيقول لهم النبىﷺ :يا بني قريظة أتريدون أن أحكم بينكم ؟ فاليهود اشترطوا أنهم هيستسلموا بشرط أن يحكم فيهم سعد بن معاذ .. طب اشمعنا ؟ عشان سعد زمان كان زعيم الأوس و حليف بنى قريظة .. فقالوا يا محمد لا نرضى بحكمك و لا نقبل إلا حكم سعد بن معاذ ،فالنبى وافق و جاب سعد بن معاذ و طلب النبى منه أنه يحكم ..
فحكم سعد على اليهود بأنهم يقتلوا كل من شارك فى الغدر بالمسلمين.. وده حكم مالوش علاقة بنساء و أطفال اليهود و لا اليهود اللى ماشاركوش فى الغدر..و على فكرة فى التوراة حكم اليهود على الخائن هو الإعدام..( يعنى لو كان اليهود سابوا النبى ﷺهو اللى يحكم فيهم كان أكيد حكمه هيبقى أخف .. زى ما طرد يهود قبل كدة بسبب غدرهم..بس بنى قريظة اختارت ان سعد اللى يحكم) ..
بتحكى السيدة عائشة عن واحدة من يهود بنى قريظة قتلت واحد من المسلمين غدراً فبتقول السيدة عائشة : كانت عندى تضحك معى فنودى اسمها ،فقالت عائشة: لماذا ينادوا باسمك؟ فردت اليهودية عليها و قالت : بسبب حادثة فعلتها ... إيه تفاصيل الحادثة؟ قتلت واحد من الصحابة بطريقة عنيفة جدا .. طلعت فوق سطح بيتها و أسقطت الرحا فوق رأس الصحابى و ماكانش أذاها فى أى حاجة وكان اسم الصحابى خلاد بن سويد ( الرحا دى آلة عبارة عن حجرتين حجمهم كبير عشان يطحنوا القمح) ..
ومن بين اللى هيتعدموا كمان كان كعب بن أسد ... فالنبى ﷺقال له : يا كعب، ألم يأن لك أن تشهد أن لا إله إلا الله ؟! فقال : لا...فقال النبى: يا كعب، ألا تذكر قول ابن فراش ( ده كان يهودى و أسلم و دعا اليهود إلى الإسلام فقتلوه وقبل موته طلب منهم أن يوصلوا للنبى منه السلام فطبعا ماحدش من اليهود اهتم انه يوصل للنبى السلام ده ). فيقول النبى لكعب : أما انتفعتم من نصح ابن فراش ..ألم يقل لكم إذا لقيتم محمد فتقرؤه منى السلام (النبى ﷺعرف منين ؟ أصل ربنا أوحى له ).
فكعب اتخض أن النبى ﷺعرف فقال له : أنت صادق يا أبا القاسم و فقد طلب منا ابن فراش ذلك ..فقال النبى : إذن أتؤمن يا كعب؟ ، فقال كعب : يا محمد إنى أعلم بأنك صادق، و لكن لولا خوفى أن اليهود تقول عنى أنى اتبعتك خوفا من السيف لكنت اتبعتك.. فسأظل على دين اليهود " فقال النبى : يا كعب أسلم يا كعب ، فرد كعب : لا.. إنى على دين اليهود ..( طبعا ده استكبار من كعب زى ما استكبر أبو طالب و فرعون )..
طيب سعد بن معاذ اللى اليهود اختارته عشان يحكم عليهم .. كنا قلنا انه اتصاب بسهم لما كان واقف عند الخندق و نزف كتير أوى و دعا و قال : اللهم لا تميتنى قبل أن أشفى صدرى من بنى قريظة لأنهم غدروا.. فربنا استجاب له و التئم الجرح بمعجزة و فعلاً حكم على بنى قريظة و ارتاح..فتخيلوا يحصل إيه؟ انفجر جرحه بالدماء من تانى ،فالنبىﷺ حضن سعد و الصحابة بقوا يبعدوه عن النبى عشان الدماء ماتجيش على النبىﷺ.. فبقى النبى ﷺ يقول: دعوه فى حضنى و يقول: جزاك الله خيرا يا سعد ..فيقول سعد : يا رسول الله سلام عليك جزاك الله خير ما جزى نبيا عن أمته و رسولا عن قومه أشهد أن لا إله إلا الله و أنك رسول الله. و يموت سعد فى حضن النبىﷺ :') .. وفى جنازة سعد يلم النبى عبايته من كثرة الملائكة و يقول: إن حولى ملائكة لم تنزل الأرض من قبل و نزلت لتشهد جنازة سعد ..
و كان جسم سعد ضخم لكن الصحابة حسوا أن سعد خفيف أوى و هم شايلينه، فقال النبىﷺ: أنزل الله سبعون ألف من الملائكة يحملون معكم جسد سعد ، ولم ينزلوا الأرض من قبل و لن ينزلوا من بعد، و أن عرش الرحمن قد اهتز لموت سعد بن معاذ.. طب إزاى؟ دى من كثرة الملائكة اللى طالعة نازلة . أصل فى ضجة فرح فى السماء لاستقبال سعد بن معاذ .. اوعى تستهين بعمل صالح ربنا قدرك انك تعمله أو عمل لنصرة النبى ﷺقال تعالى :" وَلِكُلٍّ دَرَجَاتٌ مِّمَّا عَمِلُوا وَمَا رَبُّكَ بِغَافِلٍ عَمَّا يَعْمَلُون" .الأنعام 132
فى حاجة جميلة حصلت بعد كدة ان جاءت للنبى ﷺ عباية حرير هدية.. فالصحابة استعجبوا من نعومة ملمس الحرير فبقوا يلمسوا العباية و يمسكوها بيديهم.. فالنبىﷺ حس أنها عجباهم أوى و خاف قلبهم يتفتن بالدنيا فراح قايل : إن مناديل سعد بن معاذ فى الجنة أطيب و ألين و أنعم و أحلى من العباية اللى عجباكم دى .. اللهم صل على النبى سيد الخلق و مُعلم البشر

سيرة_الرسول
الحلقة 125
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة الأحزاب أو الخندق (ج7)

شفنا تعب الصحابة و النبىﷺ و شفنا دعاء النبى عليه الصلاة و السلام، و استجابة ربنا عز و جل لما أرسل على جيش قريش ريح شديدة اقتعلت خيامهم و أطفأت النيران، و لم تصب الريح دى المسلمين بسوء، و لكن أصابهم برد قارس.. فكان النبى ﷺ عايز يعرف إيه اللى بيحصل على الضفة التانية عند جيش الأحزاب فبدأ ينادى على المسلمين و يقول من منكم يأتينى بخبر القوم ؟ فماحدش رد لأن الجو كان صعب جدا جدا لدرجة أنهم كان بيدفنوا جسمهم فى الرمل..
و يكرر النبى السؤال تانى و يقول: من منكم يذهب و يأتى بخبر القوم و أضمن له المجئ ؟ فبرده ماحدش رد .. فقال السؤال مرة تالتة : من منكم يذهب و يأتينى بخبر القوم و ... هو رفيقى فى الجنة .. لكن برده ماحدش رد ( الصحابة بشر و اللى شافوه متعب جدا جدا و الوضع واضح أنه كان صعب أوى ) فبدأ النبىﷺ يختار بنفسه فقال : قم يا حذيفة بن اليمان ،فبيقول حذيفة :والله ما إن نادانى النبى ﷺ باسمى حتى وضعت يدى على رأسى و ما قمت إلا حياء منه ..فقال حذيفة: نعم يا رسول الله .
فقال رسول الله ﷺ:اذهب يا حذيفة و آتنى بخبر القوم و لكن لا تذعرهم علي ( يعنى خلى بالك ما تعملش أى غلطة فتخليهم يهجموا علينا) فبيحكى حذيفة و يقول : خرجت و أنا أرتجف من البرد و أتالم من الجوع و فى قلبى خوف.. ربنا عز و جل بيقول :" الَّذِينَ اسْتَجَابُوا لِلَّهِ وَالرَّسُولِ مِن بَعْدِ مَا أَصَابَهُمُ الْقَرْحُ لِلَّذِينَ أَحْسَنُوا مِنْهُمْ وَاتَّقَوْا أَجْرٌ عَظِيم " آل عمران 172
و بيكمل حذيفة كلامه و بيقول: خرجت أرتجف و ما إن مررت بالخندق حتى ذهب عنى البرد و كأنى فى حمام (مكان دافئ) حتى وصلت للمشركين فوجدتهم فى فزع شديد..
الخيام بتتشال من مكانها و بتترمى فى وشوش الكفار و بقت تتقلب القدور بتاعت الأكل .. أصل ربنا أرسل كمان الملايكة و شاركوا فى غزوة الأحزاب.. و بيقول حذيفة : ثم رأيت أبو سفيان أمامى و ليس معه حراس.. فكنت أقدر أن أقتله فوضعت يدى على سيفى ولكن تذكرت كلمة رسول الله :" إياك أن تذعرهم علي ".. فتركته ..ثم رأيت أبى سفيان يصيح فى الناس و يقول : اجتمعوا ..فاجتمعوا حوله.. فجلست أسمع ما سيقوله.. فقال أبو سفيان : فيلنظر كل منكم من يجلس بجواره فإنى لا آمن جواسيس محمد..
فحذيفة خاف جدا بس عمل حركة ذكية أوى .. بدأ يسأل هو الناس اللى جنبه قبل ما حد يسأله فبيقول حذيفة : فقلت عن يمينى من الرجل؟! فرد اللى جانبه و قال : معاوية بن أبى سفيان .. ثم قلت عن يسارى من الرجل ؟! فرد: عمرو بن العاص. و طبعا ماحدش منهم فكر يسأله .. عمرو بن العاص و معاوية هيسلموا بعد كدة و هيحكي لهم حذيفة الموقف ده و بيحكى الصحابة و بيقولوا فظل عمرو بن العاص "بعد إسلامه" يضحك كلما سمع تلك القصة )
فالمهم بعد ما كل واحد اطمن مين اللى قاعد جنبه .. قام بدأ أبو سفيان فى الكلام و قال: يا قوم غدرت بكم يهود بنى قريظة و اجتمع عليكم الجوع و البرد و إنى أرى أن الحصار لن ينتهى فإنى مرتحل فارتحلوا .. يعنى الحرب كدة خلاص انتهت.. فسمع حذيفة الكلام ده ففرح فرحا شديدا و بدأ يمشى واحدة واحدة عشان ما حدش يحس بيه عايز يرجع بسرعة عشان يبلغ النبى ﷺ( شفتوا أن صدق رسول الله لما قال لحذيفة : لا تذعرهم علي .. أصل لو كان حذيفة اتسرع و قتل أبو سفيان كانت الحرب هتستمر ).
المهم عدى حذيفة الخندق و هو سقعان و بمجرد انه بيعدى جوه الخندق فيلاقى نفسه حاسس بدفا جامد و بعدين عدى و رجع يرتعش تانى و وصل عند المسلمين فبسرعة راح على النبى ﷺ فلاقاه واقف بيصلى و عليه عباية عشان البرد فوقف حذيفة جنبه و فضل مستنيه و بيترعش فالنبى ﷺحس بيه .. فتخيلوا النبى صلى الله عليه و سلم عمل إيه ؟ مد يده و ضم حذيفة له و هو بيصلى ♡ عشان يدفيه.. فبيقول حذيفة " إن الرسول جعل يصلى و إننى لفيه (محتضنه الرسول داخل العباية) حتى أنهى النبى صلاته ثم نظر إليه النبى و قال : بشرنى بشرك الله يا حذيفة...
فقال حذيفة : لقد انتصرنا .. نصرنا الله وحكى له حذيفة كل اللى سمعه لكن حذيفة بقى عايز ينام أوى من شدة التعب فنام و هو مع النبى.. فالنبى غطاه بعبايته و مشى بالراحة لحد ما جه ميعاد صلاة الفجر قام رايح النبى و نزل على ركبه عشان يصحيه و قال له : قم يا نومان ..فصحى حذيفة ولاقى النبى فى وشه فبيقول حذيفة : والله ما رأيت أجمل من وجه رسول الله..ﷺ
تعرفوا ان مرة بعد وفاة النبى عليه الصلاة و السلام فى شاب من التابعين قعد مع حذيفة صاحب رسول الله و سأله : يا سيدى حذيفة أرأيتم رسول الله؟ فقال حذيفة : نعم .. فقال الشاب: أكنتم تجالسونه و يجلس أمامكم؟ ..فقال: نعم يا بنى.. فقال الشاب : فوالله طوبى لهاتين العينين التى رأتا رسول الله ،فوالله لو رأيناه،ما تركناه يمشى على الأرض و لحملناه فوق ظهورنا..فرد عليه حذيفة و قال: هون عليك يا بنى ..

إنا كنا نجهد (أى نتعب في عهد النبى) ثم حكى له يوم الخندق و ما حدث فيه ..
طيب دلوقتى حذيفة طمن النبىﷺ ، فبسرعة راح النبى عليه الصلاة و السلام يجرى على الصحابة عشان يطمنهم .. و النبى أدرك أن معركة الأحزاب دى هتبقى آخر مرة هيتجرأ علينا المشركين و يحاربوا المسلمين .. فقال صل الله عليه و سلم : اليوم نغزوهم و لا يغزونا.. و يفرح المسلمين بنصر ربنا و يبدأوا يلموا حاجتهم و يرجعوا لبيوتهم و الصحابة كانوا فى شدة التعب لدرجة إن كان اللى يتعب منهم بقى بينام على أى جنب فى الطريق..

و بعد ما المسلمين وصلوا للمدينة .. جاء سيدنا جبريل عليه السلام و هو مستنكر لكل اللى بيحصل فقال لرسول صل الله عليه و سلم : يا رسول الله أوضع المسلمون أسلحتهم ؟!.. فقال النبىﷺ : نعم .. فرد جبريل و قال : و لكن أنا و الملائكة فلم نضع السلاح بعد.. سنحارب بنو قريظة ..إن الله لا يحب الخائنين ..يا محمد انطلق معى فإنى ذاهب إليهم فمزلزل بهم..(يعنى لسة هنحارب بنى قريظة لأنها غدرت و خانت و نقضت عهدها مع النبى).
فبسرعة يخرج النبى عليه الصلاة السلام للصحابة عشان يبلغهم و ده حصل وقت الظهر .. و يأمر سيدنا بلال انه ينادى فى المسلمين و يقول: " أيها الناس يقول لكم رسول الله " من كان منكم يؤمن بالله و اليوم الآخر فلا يصلين العصر إلا في بنى قريظة " (يعنى إيه ؟ يعنى الحرب ما انتهتش .. فبعض الصحابة فهموا كلام النبى ﷺ ان مش هنصلى العصر إلا فى بنو قريظة حتى لو هيأخروا الصلاة و فى ناس تانية من الصحابة فهمت كلام النبى ﷺ ان هدفه الحركة السريعة و ليس تأخير الصلاة لحد ما يوصلوا لبنى قريظة.. فبعضهم صلى العصر متأخر فى بنو قريظة و بعضهم صلى العصر فى الطريق و لما الرسول عرف ده ماقالش إن حد فيهم اتصرف غلط.. و الصحابة رغم اختلافهم إلا أن ما حدش منهم اتخانق مع التانى..)

أما اليهود فى الوقت ده ..كان كعب بن أسد " قائد يهود بنى قريظة" باعت جواب لحيي بن أخطب قائد يهود خيبر فى جيش الأحزاب و قال : أرأيت يا حيي إن انتصر محمد .. فماذا ستفعل؟ فقال حيي : أكون معك.. بس لما المسلمين انتصروا و توجه النبىﷺ للمدينة عشان يحارب بنى قريظة.. طبعا حيي اختفى هو و قبيلته . و ساب كعب بن أسد لوحده فى مواجهة المسلمين .. المهم خرج واحد من اليهود يقول والله إنكم تعلمون أن محمد على حق ولو لم يكن على حق ما نصره الله .. فأرى أن نسلم مع محمد..
فغضبت بنى قريظة و قالوا : لا لن نتبعه أبدا.. فخرج واحد و راح قايل : نقتل أبناءنا و نساءنا بأيدينا قبل أن يقتلهم المسلمين ثم نخرج لقتال المسلمين ثم نعود ...بس ماحدش عجبه الإقتراح ده.. فخرج واحد تانى و قال: نتحصن فى الحصن حتى يأتى محمد و ننظر ماذا سيفعل. و اتفقوا على الرأى ده و فعلا عملوا حصن حواليهم..

نكمل المرة الجاية إن شاء الله 🤍

سيرة_الرسول
الحلقة 124
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين 🤍

غزوة الأحزاب أو الخندق (ج6)

شفنا امبارح المسلمين تعبوا من حصار الأحزاب لهم عند الخندق اللى استمر لمدة 23 يوم.. و بقوا قاعدين وسط جوع و عطش و تعب.. و ربنا بعت للمسلمين هدية جميلة و هي إسلام واحد من جيش الكفار اسمه "نُعيم بن مسعود" من قبيلة أشجع، فيروح لرسول الله ﷺ و يقول له : يا رسول الله جئتك مسلماً، أشهد أن لا إله إلا الله، وأشهد أنك رسول الله، ولكن يا رسول الله قومى لا يعرفون أنى أسلمت، فاطلب منى ما شئت..
فيفرح النبي عليه الصلاة و السلام جدا و يقول له : " يا نعيم إنما أنت رجل فينا (زدت علينا فرد) و إن الحرب خدعة (الكدب فيها مسموح ) فخذٌِل عنا يا نُعيم إن استطعت " فقال نعيم : سأفعل يا رسول الله.. و يخرج نعيم من عند النبي ﷺو يبدأ يفكر في فكرة.. و هيعمل خطة من أروع ما يكون..
هيروح نعيم دلوقتى لبني قريظة في جنوب المدينة و يقول لهم : يا بني قريظة تعلمون حبي لكم ، فقالوا : نعم أنت عندنا لست بمتهم.. فقال : أتشكون في نصحي لكم ..فقالوا : لا أبدا ..فقال نعيم: يا بني قريظة إني أخشى عليكم .. يا بني قريظة ألا تعلمون أن قريش قد تمل الحصار ..فكيف بكم إذا نفذ منهم الزاد و الطعام و ملت قريش الحصار و رجعت إلى مكة و تركتكم لمحمد!!؟ فانظروا حينها ماذا سيفعل بكم بعد أن غدرتم به.. فقالوا : يقتلنا شر قتلة!! ، فرد نعيم و قال: نعم لو ظفر بكم محمد ما ترككم و قتلكم شر قتلة. فقالوا :أصبت يا نعيم ، و ما ترى ؟
فقال نعيم : أرى أنكم تذهبون لأبو سفيان و تقولوا له أن بكم أمراً في الجنود و أنكم فى حاجة إلى زيادة الجنود و اطلبوا من أبى سفيان خمسين قُرشيٌ من الفرسان الماهرين.. فيا بني قريظة إن قَبِل أبو سفيان و أعطاكم من جنوده فاعلموا حينها و اطمئنوا أن ليس لقريش أي نية لترك الحرب و إن امتنع عنكم إذاً فهو ينوى كف القتال و سيترككم لمحمد.. و يمشي نعيم و بنى قريظة مقتنعة جداً بكلامه و يعدى الضفة التانية من الخندق و يدخل على جيش الأحزاب و يروح لأبو سفيان و أعوانه و يقول : أتعلمون حبي لكم..
قالوا : نعم أنت عندنا لست بمتهم .. فقال : أتشكون في وفائي لكم.. فقالوا : لا أبداً..فقال نعيم : إني سمعت أن بني قريظة قد اصطلحوا مع محمد و سألوه الود و طلبوا منه أن يعفو عنهم فامتنع ،فقالت بنى قريظة أرأيت يا محمد إن أتيناك بخمسين رجلا من قريش تضرب أعناقهم.. أحينها تعفو عنا فقال محمد : نعم أعفو عنكم.. و يكمل نعيم و يقول: يا أبا سفيان إن طلبت منك بنو قريظة خمسين رجلاً فلا تعطهم.. فقال أبو سفيان : نعم سأفعل يا نعيم..
و فعلا هتنجح الخطة هيطلب كعب بن أسد قائد بني قريظة من أبو سفيان خمسين فارس زي ما نعيم قال لهم.. و أول ما يعرف أبو سفيان الطلب ده هيتأكد إن كلام نعيم كان صح بأن بني قريظة عايزة الفرسان عشان تقتلهم لإرضاء محمد.. فيقول أبو سفيان : والله يا بني قريظة لن نعطيكم جندي واحد..لقد صدق نعيم بن مسعود .. و بكده اتأكدت بني قريظة ان برده صدق نعيم ..و تنجح الخطة و بكده اتكسر جيش التحالف بين بني قريظة مع قريش و كان ده أول النصر للمسلمين..
الصحابة تعبانين أوى فيروحوا للنبي و يقولوا : يا رسول الله "هل من دعاء نقوله؟".. فقال النبي: نعم قولوا اللهم استر عوراتنا و آمن روعاتنا " و فضل الصحابة يرددوا الدعاء ده و وقف النبي يدعي و يقول : " اللهم يا مجري السحاب يا منزل الكتاب ، اهزم الأحزاب.. اهزمهم و زلزلهم " و فضل النبي يدعي و يدعي و يبكي و ينتهي النبي من الدعاء فييجي فتح ربنا عزوجل .. أرسل الله تعالى ريح قوية ، قال تعالى : "يَا أَيُّهَا الَّذِينَ آمَنُوا اذْكُرُوا نِعْمَةَ اللَّهِ عَلَيْكُمْ إِذْ جَاءَتْكُمْ جُنُودٌ فَأَرْسَلْنَا عَلَيْهِمْ رِيحًا وَجُنُودًا لَّمْ تَرَوْهَا " (سورة الاحزاب -9)
الريح كانت قاسية جدا اقتلعت خيام المشركين و أطفأت النيران.. فالمشركين أصابهم الرعب و بدأوا يجروا في كل مكان .. أما معسكر المسلمين لم تصبهم الريح و لكن أصابهم برد شديد ..و بقى رسول الله عايز يعرف إيه اللي بيحصل على جبهة المشركين و كان الصحابة من شدة البرد عندهم رعشة و بقوا يحفروا و يدفنوا جسمهم جوه الرمال عشان يدفوا.. فبص لهم النبي و قال : أيها الناس من منكم يذهب و يأتي بخبر القوم... فماحدش رد أصل الجو برد جدااا.. و يكرر النبي الكلام تاني: و برده ماحدش رد .. فيكرر النبي الكلام تالت مرة و يزود عليه جملة جميييلة جداً

هنعرفها سوا إن شاء الله 🤍

سيرة_الرسول
الحلقة 123
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين 🤍

غزوة الأحزاب أو الخندق (ج5)

يهود بني قريظة في جنوب المدينة نقضوا العهد مع رسول الله و غدروا ، بنى قريظة بدأوا انهم يخططوا للهجوم على حصن نساء و أطفال المسلمين.. و المعروف ان اليهودى جبان حتى لو ظهرت من بره عليه الشجاعة ربنا قال عليهم: "لَا يُقَاتِلُونَكُمْ جَمِيعًا إِلَّا فِي قُرًى مُّحَصَّنَةٍ أَوْ مِن وَرَاءِ جُدُرٍ ۚ بَأْسُهُم بَيْنَهُمْ شَدِيدٌ ۚ تَحْسَبُهُمْ جَمِيعًا وَقُلُوبُهُمْ شَتَّىٰ ۚ ذَٰلِكَ بِأَنَّهُمْ قَوْمٌ لَّا يَعْقِلُونَ " الحشر 14.

فأرسل كعب بن أسد جندي من عنده يتفقد حصن النساء، يشوفوا عليه حراسة و لا إيه عشان يهجموا..اللي حصل بالظبط، ان الجندى راح معسكر النساء يتفقد المكان، وماكانش على الحصن أى رجل يحميه، شافت صفية عمة النبي ان الجندى اليهودى بيلف حوالين الحصن فضربته بالقوس، وراحت قطعت راسه و رمتها ناحية اليهود عشان يكون ردع لهم، طيب ممكن حد فيكم يشوف الموقف شديد.. بس لازم تعرفوا ان لولا الحركة دى كان زمان يهود بني قريظة هجمت على النساء واستباحوا أعراضهم وقتلوا الأطفال، ف صفية أنقذت نساء المسلمين كلهم .. و فعلا بني قريظة مش هيهاجموا حصن النساء تاني.. والصحابة مش هيوصل لهم الأحداث اللي حصلت من بني قريظة طول مواجهتهم لجيش الأحزاب عند الخندق..

حصل موقف بعد كده، إن سعد بن معاذ كان واقف عند الخندق ففوجىء بسهم في كتفه جاي من الضفة التانية، فنزف سعد دم كتيير، وقال دعاء حلو أوى، طلب من ربنا ان يا رب لو دي كانت آخر حرب بين رسول الله وقريش فاقبضني إليك شهيد، لكن لو فيه حروب تانية فأنا أحب أن أحارب و أدافع عن رسول الله، و يارب لا تُمِتنى حتى تشفى قلبي من بني قريظة... و بعد ما خلص سعد الدعاء و كل ده و هو عمال ينزف تخيلوا يحصل إيه؟ التأمت الجراح، والنزيف وقف تماما، سبحان الله المجيب..

دلوقتي المسلمين عند الخندق و حصار الأحزاب للمسلمين قعد مدة طويلة ، وبدأت تحصل محاولات تعدي على المسلمين ، فنزل مقاتل من الكفار اسمه عمرو بن عبد ود وهو من أقوى و أعرق جنود قريش فكان لا يُهزم أبداً، فوقف عند الخندق ورفع سيفه و جاي ولابس الدرع بتاعه و بدأ يكلم المسلمين و يقول : أريد مبارزة، هل من مبارز؟ هل من مبارز؟ مَن مِن المسلمين هيتجنن و يبارز عمرو ؟ علىَّ بن أبى طالب رضى الله عنه و النبى جنبه بيقول له: لا تذهب يا علىَّ .. أصل النبي عارف ان عمرو قوى و خايف على علىَّ.
فعمرو بن عبد ود فضل ينادي.. هل من مبارز؟ و راح قايل بيت شعر قوي عشان يستفز المسلمين .. قال : " ولقد بححت من النداء بجمعكم، هل من مبارز.. و وقفت إذ جبن الشجاع بموقف البطل المناجز.. إنّي كذلك لم أزل متسرّعاً نحو الهزاهز..إنّ الشجاعة والسماحة في الفتى خير الغرائز "..

فعلىَّ بن أبى طالب هيتجن فبدأ يستأذن النبيﷺ.. أرجوك يا رسول الله أرجوك، فسمح له النبي ﷺ و قال له: انزل يا علىَّ..فنزل علىَّ بن أبى طالب، و فضل النبي عليه الصلاة و السلام يدعي له و يقول : اللهم احفظ علىَّ، اللهم احفظ علىَّ..
المهم علىَّ و هو رايح عشان يحارب عمرو بن عبد ود فألف بيت شعر جميل أوي يرد بِه على شعر عمرو ..و قال: " لا تعجلنّ فإني أجيب صوتك غير عاجز.. ذو نية وبصيرة والصبر منجي كلّ فائز..إنّي لأرجو أن أقيم عليك نائحة الجنائز..من ضربةٍ بالسيف يبقى ذكرها عند الهزاهز ".. فيقف عمرو بن عبد ود، و هو مبهور و مستغرب من الشاب ده، فسأله: من أنت يا بني؟ فرد: علىَّ بن أبى طالب، فعمرو اتفاجىء وقال: ابن أبى طالب..!! يا بني كان أباك صاحبي، ارجع فإني لا أحب أن أقتلك، فرد عليه علىَّ بن أبى طالب و قال : عجيب، مع إني أحب أن أقتلك. وبدأ علىَّ بن أبى طالب يضرب حصان عمرو عشان يستفزه و ابتدت المبارزة وارتفع التراب و الغبار و ماحدش بقى شايف أى حاجة، والرسول بقى قلقان وواقف يدعي، وفجأة هبط التراب وبدء السكون، وسمع النبي صوت بيظهر و بيعلى و بيقول: الله أكبر، ففرح النبي وقال: الله أكبر، وشاف علىَّ واقف وحاطط رجله على بطن عمرو بن عبد ود، وجرت العادة ان المنتصر بياخد درع المهزوم، فوطى علىَّ بن أبى طالب عشان ياخد الدرع .. و لسه بيشده، فانكشفت عورة عمرو بن عبد ود، فاضايق سيدنا علىَّ، وخبى عينيه وساب الدرع عشان يغطي عورة عمرو بن عبد ود .( شايفين أخلاق المسلم .. أخلاق صحابة رسول الله .. دي قمة الانسانية من سيدنا علىَّ، آه عدوه كافر لكنه إنسان)..طيب وصل لقبيلة "عمرو بن عبد ود" خبر موته فبعتوا للنبي طلب ، انه أرجوك يا محمد لا تمثل بجثة عمرو بن عبد ود، وهنشترى جثته ب 10000 درهم.. طبعاً دي فرصة للمسلمين، لكن رفض النبي وقال: هو لكم بغير ثمن. ( شايفين النبي عزيز قوي والمسلمين كمان إزاي )

الحصار مدته طولت والمسلمين تعبوا أوي، بس ربنا هيبعت لهم هدية..إيه الهدية دى؟ إسلام واحد من جيش الأحزاب اسمه "نُعيم بن مسعود" من قبيلة أشجع، فيعدي نُعيم الضفة التانية و يروح لرسول الله و يقول له : يا رسول الله جئتك مسلماً، أشهد أن لا إله إلا الله، وأشهد أنك رسول الله، ولكن يا رسول الله قومي لا يعرفون أني أسلمت، فاطلب مني ما شئت... فيفرح النبي جدا جدا و يقول له :

هنعرف بكره إن شاء الله 🤍

سيرة_الرسول
الحلقة 122
يلا صلوا على للنبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة الأحزاب أو الخندق (ج4)

بعد ما نجحت خطة حيي بن أخطب " قائد اليهود فى خيبر" فى إنه يقنع يهود بنى قريظة بإنهم ينقضوا العهد اللى بينهم و بين النبى صل الله عليه و سلم..عشان يقدر جيش الكفار " جيش الأحزاب" فى إنه يهجم على المسلمين من الجنوب .. فلما وصلت الأخبار دى للنبى فقرر إنه يتأكد من خبر نقض العهد ده..فكلف سعد بن عبادة و سعد بن معاذ إنهم يوصلوا لبنى قريظة و يسألوهم هل الخبر ده حقيقى وللا لأ؟ ..

وطلب منهم لو اتأكدوا إن الكلام ده صح يكتموا السر وما يقولوش قدام جيش المسلمين، و يفكروا فى طريقة يقولوا الخبر بها للنبى من غير ما حد غيره يفهم.. أما لو الخبر ده طلع إشاعة ومش حقيقى فخلاص يقولوا قدام جيش المسلمين كله عادى جداََ إن بنى قريظة على العهد..

فالمهم وصل سعد بن عبادة وسعد بن معاذ لبيت كعب بن أسد، و سألوه : يا كعب، هل حقاً غدرتم برسول الله؟ فيرد كعب: من رسول الله؟ فيقول سعد بن معاذ : أحقاً غدرتم؟! نقضتهم المعاهدة الذى بينكم وبين رسول الله؟ فرد كعب بكل تجاهل : أى معاهدة ؟ (طبعا نفهم من ده إن كعب خلاص نسى النبى و نسى العهد).

فسعد بن معاذ شخصيته شديدة جداً فمقدرش يمسك أعصابه و بدأ يشتم كعب بن أسد.. و بدأ كعب يشتم.. فسعد بن عبادة أخد سعد بن معاذ و رجعوا للنبى عليه الصلاة و السلام و هما فى إحباط جامد ، و كان النبى واقف على جبل سلع مستنى رجوعهم، فوصلوا لرسول الله و بيحاولوا يفكروا فى طريقة يقولوا بها الخبر من غير ما حد يفهم غير النبى فقالوا له : يا رسول الله عضل وقارة .. يعنى إيه؟

يعنى عايزين يقولوا له أيوه اليهود نقضوا العهد و غدروا، زى ما غدرت قبيلتى عضل و قارة و قتلت المسلمين زمان.. فالنبى ﷺ فهم بس قال: الله أكبر ..يا معشر المسلمين أبشروا سينصرنا بإذن الله، ( النبى عليه الصلاة و السلام قال كده عشان يثبت المسلمين و ما يتخضوش على أطفالهم و نسائهم .. لحد ما يفكر فى حل للمشكلة) المهم نزل النبى من على الجبل و دخل خيمته و قعد و غطى راسه لا يكلم أحد..و انتشر الخبر بين المسلمين ونفسيتهم ضعفت جداً، و المنافقين بدأوا يروحوا لرسول الله ويقولوا إنهم مضطرين ينسحبوا و طبعاََ بحجة إنهم يحموا نسائهم وأطفالهم من غدر اليهود.

و سورة الأحزاب بتجسد أحداث الغزوة بالظبط زى ما جسدت سورة الأنفال غزوة أُحد..ربنا بيقول عن المنافقين: وَإِذْ يَقُولُ الْمُنَافِقُونَ وَالَّذِينَ فِي قُلُوبِهِم مَّرَضٌ مَّا وَعَدَنَا اللَّهُ وَرَسُولُهُ إِلَّا غُرُورًا** وَإِذْ قالَتْ طائِفَةٌ مِنْهُمْ يا أَهْلَ يَثْرِبَ لا مُقامَ لَكُم فَارجِعُوا وَيَستَأذِنُ فَريقٌ مِنْهُمُ النَّبِيَّ يَقُولُونَ إِنَّ بُيُوتَنا عَوْرَةٌ وَمَا هِيَ بِعَوْرَة إِنْ يُرِيدُونَ إِلاّ فراراً .
الاحزاب 12-13
..طيب ده حال المنافقين، طيب إيه أخبار المؤمنين؟

خايفين جداً طبعاً لإنهم بشر، قدامهم 10000 مقاتل مشرك يعنى جيش ضخم، وفى ضهرهم قبيلة بنى قريظة من السهل جداً إنها تضربهم.ربنا صور المشهد ده وقال: إِذْ جَاؤُوكُم مِّن فَوْقِكُمْ وَمِنْ أَسْفَلَ مِنكُمْ وَإِذْ زَاغَتْ الْأَبْصَارُ وَبَلَغَتِ الْقُلُوبُ الْحَنَاجِرَ وَتَظُنُّونَ بِاللَّهِ الظُّنُونَا (10) هُنَالِكَ ابْتُلِيَ الْمُؤْمِنُونَ وَزُلْزِلُوا زِلْزَالاً شَدِيداً ... (11) الأحزاب

فبدأ النبى يفكر فى حل..ففكر النبى يروح للضفة التانية عند الأحزاب، ويدخل لقائد قبيلة غطفان ، طيب إشمعنى اختار القبيلة دى؟ لأن النبى كان عارف إن قبيلة غطفان مش متمسكة بعقيدتها على قد ما هى مادية جداً، كمان القبيلة دى لوحدها عددهم 6000، وفعلاً وصل للقبيلة وقالهم إنه جاى يعمل معاهم إتفاقية، و هى إنهم ينسحبوا و فى المقابل هيكون ليهم ثلث ثمار المدينة لمدة سنة، فرفضوا و طلبوا نصف ثمار المدينة .

فالنبى تاجر فمش سهل حد يضحك عليه، فرفض و صمم على ثلث الثمار بس...فوافقوا ، فطلب النبى عليه الصلاة و السلام منهم إنه يرجع للمسلمين عشان يستأذنهم فى العرض ده، ( شايفين يا جماعة رغم النبى هو قائد المسلمين إلا انه هيستأذنهم لأن الأرض أرضهم و الثمار ثمارهم.. شايفين جمال حرص سيدنا النبى ♡) .. المهم عدى النبى للضفة التانية و يرجع للمسلمين و يستأذن سعد بن معاذ قائد المدينة قبل رسول الله، فسعد قال : يا رسول الله..أهذا وحى من الله أم من عندك و خوفاً علينا؟

فقال النبى ﷺ : بل خوفاً عليكم، فقال سعد: يا رسول الله، بما أنه ليس بوحى، فلا يا رسول الله، لماذا نعطيهم الثمار !.. فهم لم يأخذوا منا ثمرة واحدة فى أيام الجاهلية إذاً فلن نعطيهم أبداََ رغماََ عنا (غصب عننا )بعد أن أعزنا الله بالإسلام ..و إن أرادوا أن يأخذوا الثمار فبالبيع و الشراء و إلا ليس لهم عندنا إلا السيف..فقال الرسول: لك ما أردت يا سعد.. و بلغ النبى عليه الصلاة و السلام قبيلة غطفان ان المسلمين رفضوا الاتفاق ده ..

طيب إيه أخبار بنى قريظة اللى غدرت و نقضت العهد مع النبى ؟؟

نكمل المرة الجاية إن شاء الله 🤍

الباب.. فتربس الباب و بقى مش عايز يفتح.. طيب ليه عمل كده؟

لأن كعب عارف كويس هدف حيي بن أخطب و كعب مش عايز يضعف و ينقض العهد مع النبى و تحصل مشاكل..المهم فضل حيي يخبط على باب كعب بن أسد.. و كعب مش راضى يفتح ..فقاله: جئتك يا كعب بعز الدهر، فقال كعب: بل جئتنى بذل الدهر. فقال حيي: افتح، وفضل وراه لحد ما فتح كعب ..و قال له: ماذا تريد؟ فشرح له حيى بن أخطب الخطة، وعشان يقنعه قاله إنهم جايين يقتلوا محمد وساعتها هتكون المدينة كلها ملك ليك يا كعب، فقال كعب :" بس أنا عمرى ما شفت من محمد إلا الوفاء" لكن حيي فضل ورا كعب لحد ما اقتنع للأسف و قرر ينقض العهد مع النبى و طبعاً دى كارثة.

ورجع حيي بن أخطب لجيشه.. فالمخابرات اللى تبع جيش المسلمين عرفت الخطة اللى هينفذها حيي مع اليهود وراحوا يبلغوا النبى بيها بسرعة ، طب لما النبى يعرف هيعمل إيه؟

نكمل بكرة إن شاء الله 🤍

سيرة_الرسول
الحلقة 121
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة الأحزاب أو الخندق (ج3)

المسلمين بيحفروا الخندق .. الموضوع متعب و صعب.. بتحكى السيدة عائشة، إن في يوم من أيام حفر الخندق رجع النبى بيته الفجر تعبان أوى أوى ، فبتقول: فما إن جلس إلى جوارى حتى مالت رأسه عليَّ، وسقطت رأسه فى حجرى، وسمعت له غطيط (شخير بصوت واطى)، وما كنت أسمع له غطيط قبل الخندق، و بتقول : بعد شوية سمعت صوت عند الباب و حد بيقول السلام عليكم ، ففزع النبى ورأيته قام فزعاً ، افتكر إن العدو وصل.. أصل مين هييجى لبيت النبى بالليل كدة إلا إذا كان فى مصيبة حصلت !!
فقال النبى: من؟ فرد عليه: سعد بن أبى وقاص يا رسول الله ، فقال: ما بك يا سعد؟ أجاء القوم (العدو)؟ فقال: لا، ولكنى جئت لأطمئن عليك يا رسول الله، أتأمرنى بشىء؟.. فبتقول عائشة: والله لا أنساها لسعد، لأنه صحى النبى من غير سبب، وأنا كنت ما صدقت إنه نايم شوية عشان يرتاح ..

فى يوم تانى من أيام الحفر، رجع النبى لبيته يرتاح، ووصل له خبر إن فيه مشكلة كبيرة فى الخندق، ظهرت صخرة كبيرة أوى وضخمة واصلة بين الضفتين ، ومحدش قادر يكسرها أبداً، و الصخرة دى هتبقى نقطة ضعف فى الخندق و جيش الكفار كدة هيقدر يعدى للمدينة ، فرجع النبى للخندق، وأخد الفأس وضرب ضربة قوية و قال: الله أكبر، فمن شدة قوة الصخرة مع ضربة النبى حصلت شرارة، فتشققت شوية ، فقال النبى : أُعطيت مفاتيح الشام، يعنى بيبشرهم إن المسلمين هيفتحوا الشام فى يوم من الأيام، و رفع الفأس تانى وضرب ضربة تانية وقال الله أكبر، فتشققت الصخرة أكتر، فقال النبى : أُعطيت مفاتيح فارس، يعنى هنفتح بلاد فارس بإذن الله.

وفى الضربة التالتة اتكسرت الصخرة تماماً فقال النبى: أُعطيت مفاتيح الروم. فالصحابة واقفين مش مصدقين نفسهم.. إحنا هنفتح كل دول!! (و فعلاً صدق رسول الله .. هتتفتح كل البلاد دى و هينتشر الإسلام و من شاء فليؤمن و من شاء فليكفر) .. طيب مين واقف وسامع كل كلام النبى ده ؟ المنافقين، طبعاً مش عاجبهم الكلام فأخبرنا الله تعالى أنهم قالوا :ما يعدُنا الله ورسوله إلا غروراً، و يبدأوا يعملوا مشاكل..
و انسحب شوية منهم و نزلت فيهم الآية القرآنية:
"وَإِذْ قَالَتْ طَائِفَةٌ مِنْهُمْ يَا أَهْلَ يَثْرِبَ لَا مُقَامَ لَكُمْ فَارْجِعُوا وَيَسْتَأْذِنُ فَرِيقٌ مِنْهُمُ النَّبِيَّ يَقُولُونَ إِنَّ بُيُوتَنَا عَوْرَةٌ وَمَا هِيَ بِعَوْرَةٍ إِنْ يُرِيدُونَ إِلَّا فِرَارًا "

وصلنا لفجر اليوم العاشر من حفر الخندق، انتهى الحفر و بقى جاهز لمجىء " الأحزاب"، وفعلاً مفيش ساعة ووصل جيش الأحزاب، ونلاحظ هنا إن جيش الأحزاب مهتمش إنه يبعت مخابرات تكشف لهم المسلمين بيجهزوا إيه لصد العدوان..وده لأنهم اتغروا فى عددهم الكبير فبقوا واثقين من انتصارهم دول كانوا 10.000 طب و المسلمين كام ؟ المسلمين 3000 بس. فكان جيش الأحزاب واثق من الانتصار لدرجة أنهم مأخدوش معاهم أكل كتير لإنهم فاكرين إنهم مش هيحتاجوا يحاصروا المسلمين.. كل تفكيرهم إنهم هيدخلوا يقتلوا المسلمين فى دقايق ويمشوا..

وصل الأحزاب للخندق واتخضوا لما شافوه، وقالوا: إن العرب لا تعرف هذه المكيدة، يعنى حفر خندق مش من إستراتيجيات حرب العرب أصلاً، و وقفوا على الضفة التانية مش عارفين هيعدوا إزاى.. و الناحية التانية المسلمين واقفين ، هل هيناموا و يرتاحوا بعد أيام الحفر الصعبة دى؟ طبعا لأ.. دول هيعملوا مناوبات.. كل مجموعة هتصحى تحرس الجيش و تراقب... و أبو سفيان و حيي بن أخطب وخالد بن الوليد وعمرو بن العاص و كل قيادات جيش الأحزاب، كانوا عارفين إن الحصار ده مش هيجيب نتيجة لأنهم مش معاهم أكل كفاية ..(على فكرة القيادات دى فى منهم هيسلم بعد كدة ).

فحيى بن أخطب اليهودى وصل لفكرة، و فكر فى اليهود اللى لسة جوه المدينة، اللى هم بنى قريظة، و دول كانوا عايشين فى جنوب المدينة، ففكر حيي بن أخطب إنه يتخفى و يعدى الضفة التانية للمسلمين بدون سلاح و يوصل لبنى قريظة ويقابل " كعب بن أسد " سيد قبيلة بنى قريظة، طيب هو ليه أصلاً يهود بنى قريظة لسة قاعدين فى المدينة ؟ لأن كان بينهم وبين النبى معاهدة سلام إن لا المسلمين يؤذوهم ولا اليهود يؤذوا المسلمين.. و بنى قريظة فضلت على العهد.. فكانت خطة حيي بن أخطب إنه يحاول يوصل لكعب بن أسد ويقنعه إنه ينقض العهد اللى بينه وبين محمد.

فساعتها يهود بنى قريظة يهجموا على نساء المسلمين و أطفالهم ، فلما جيش المسلمين يسمع إن معسكر النساء والأطفال بينضرب .. فيرجع جيش المسلمين لداخل المدينة ، فالخندق متبقاش عليه حراسة وهنا بقى يدخل جيش الأحزاب..فكانت خطة رهيبة ضد المسلمين ..طيب هيعدى إزاى حيي بن أخطب للضفة التانية ويدخل المدينة عشان ينفذ الخطة ؟ هيعدى متلثم و من غير سلاح وفعلاً عدى حيي بن أخطب وكانت فيه حكمة إن ربنا يسيبه يعدى ويوصل لكعب بن أسد، و يخبط حيي على بابه فلما عرف " كعب بن أسد " أن حيي على

سيرة_الرسول
الحلقة 120
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة الأحزاب أو الخندق (ج2)

شفنا المرة اللى فاتت المسلمين و هم بيحاولوا صد العدوان ..النساء والأطفال هيتعمل لهم حصن فى المدينة عشان يحتموا فيه و على أطراف المدينة هيبدأ المسلمين بحفر خندق فى شمال المدينة.. و شفنا على مدار السيرة رحمة النبى و رأفته مع الأطفال ومع زوجاته ومعاملته للصحابة، تعالوا نشوفه عسكرياً كان عظيم إزاى..إيه فكرة الرسول فى الحفر؟

أول حاجه لازم نخلى بالنا إن حفر الخندق مش سهل، مفيش أى أدوات غير الفاس، فهيقسم النبى حفر الخندق لمجموعات ، كل 10 مسلمين هيحفروا 40 ذراع، ومحدش يتدخل فى شغل التانى، ويحفروا 40 ذراع بالظبط مش 39 ولا 41، ومحتاجين ناس تشرف و يكون مراقب على الحفر، وطبعاً النبى عليه الصلاة و السلام اختار عمر بن الخطاب لقوة شخصيته و معاه أبو بكر الصديق، ومين يراقب على أبو بكر وعمر؟
النبى عليه الصلاة والسلام.. فى جبل اسمه "جبل سلع"، وده قمته عالية فى المدينة.

فكان بيقف النبى عليه الصلاة و السلام على الجبل كل يوم وقت المغرب، عشان يراقب الحفر اللى كان بيبدء من الفجر وينتهى المغرب. وكان لازم الحفر يخلص فى خلال 10 أيام لأنهم ظبطوا الوقت على حسب المعلومات اللى وصلت عن وقت خروج جيش الكفار للهجوم على المدينة .. فلازم الحفر يخلص قبل وصول العدو. بس هل النبى هيشتغل مراقب بس؟ أكيد لأ..النبى كان بيعدى على مجموعة مجموعة و يضحك معاهم و يرفع من روحهم المعنوية و هيبدأ يشتغل معاهم و يشيل التراب معاهم على ضهره ويرفعه لبرا الخندق وده أصعب من الحفر نفسه..

الصحابة بيقولوا كنا ننظر إلى رسول الله و كان يملأه التراب صلوات الله عليه.. طيب هيبدأ الصحابة يتعبوا و يجوعوا بس مفيش أكل، فكان أحياناً بعض الصحابة يروحوا لرسول الله رابطين على بطونهم حجر عشان يقولوله إنهم تعبوا و جعانين، فيرفع رسول الله رداءه ، فيلاقوه حاطط 3 أحجار على بطنه من شدة الجوع ، فطلع صحابى جميل اسمه "عبد الله بن رواحة" و ألف بيت شعر حلو أوى و فضل المسلمين يغنوا بيه طول الحفر عشان يتحمسوا و تترفع روحهم المعنوية.. كان بيت الشعر بيقول:اللهم لولا أنت ما اهتدينا ولا تصدقنا ولا صلينا، فأنزلن سكينةً علينا وثبت الأقدام إن لاقينا، إن الطغاة قد بغوا علينا ** وإن أرادوا الفتنة أبينا ..

و بدأ يقول عبد الله الأبيات ويكررها لحد ما الصحابة حفظوها، وقالوها معاه ، و عجبت النبى عليه الصلاة والسلام، فبدأ يرد عليهم على آخر بيت و يقول : أبينا..أبينا.... أصل النبى مبيعرفش يقول شعر لسانه مش بيعرف ينطق شعر، ربنا بيقول: وما علمناه الشعر وما ينبغى له، وده كان فى مصلحة الإسلام عشان الكفار دايما كانوا بيتهموه إنه شاعر، بس كان النبى عايز يشاركهم فكانوا أول ما يوصلوا لحد آخر بيت، كان يرد عليهم و يقول: أبينا أبينا، فالصحابة ينبسطوا جداً.. ممكن نكون إحنا شايفنها حاجات بسيطة، بس فعلاً مشاركة النبى معاهم فى أبسط حاجة كانت بترفع من روحهم المعنوية جداً لإنهم كانوا بيحبوه أوى، وبيعتبروه جبران خاطر ليهم، وهو فعلاً كان دايماً يجبر بخاطرهم عليه الصلاة والسلام...

المهم من فرحة الصحابة.. ألفوا بيت شعر تانى رائع: نحن الذين بايعوا محمدا على الجهاد ما حيينا أبدا، نحن الذين بايعوا على الهدى نحن دعاة الله أبطال الفدا .. فيفرح النبى أوى، فرد عليهم و يقول : "اللهم لا عيش إلا عيش الآخرة** فأكرم الأنصار و المهاجرة "..( ودى كلمات مش على أوزان الشعر ) طيب النبى رد عليهم بالجملة دى كأنه عايز يقولهم أنا عارف إنكوا تعبتوا من غزوة لغزوة وإن شاء الله الجزاء هو الجنة .

فيفرح الصحابة جداً و يألفوا أبيات شعر و يشتغلوا أكتر و أكتر..و من ضمن الشعر اللى ألفوه شعر عن صحابى، كان صحابى اسمه "جعيل" هو اسمه وحش أوى معناه حشرة، وكان زمان لما النبى عرف اسمه زعل أوى فنهى النبى عن تسمية الأبناء بأسماء قبيحة زى دى، فالنبى قال له : أنت لست جعيلاً، وإنما أنت عمرو"، فألفوا بيت شعر و قالوا : سمّــاه من بعد جعيل عمرا** وكان للبائس يـوم ظـهـرا.
فبيت الشعر ده عجب النبى أوى و بقى يردد بردو آخر كلمة منه..طبعاً جعيل ساعتها فرح أوى وكان بيحفر وهو مبسوط وسعيد. فدى كانت الحالة النفسية والروح الموجودة طول ما الحفر شغال.

كمان حصلت قصة حلوة أوى من أروع قصص الخندق لأنها معجزة. كان فيه صحابى اسمه "جابر بن عبد الله" ، جابر بيقول وأنا بحفر وشايف النبى بيحفر قدامى ، فعباءة النبى سقطت من كتفه وكشفت بطنه، والنبى كان بيستحى و مش بيكشف جسمه للناس، فغطاها بسرعة بس جابر بيقول: إنى رأيت بطن النبى ضمرت ضموراً شديداً من قلة الطعام فلم أتحمل ما رأيت، فراح جابر للنبى يستأذنه بإنه يجي عنده البيت عشان يأكله..فالنبى وافق ..

فبسرعة جابر رجع بيته و دخل يجرى على زوجته، وقال لها : أدركينى أدركينى، قالت له : مالك يا جابر؟ قال لها : والله رأيت على رسول الله ما ليس لى به صبر، رأيت الجوع فى وجه رسول الله، (شايفين الجوع فى وجه رسول الله يعتبر عند جابر مصيبة ..رضى الله عن صحابة رسول الله ) ، فسأل لها: هل عندك طعام؟ قالت: نعم، شىء من شعير و عناق صغيرة للأولاد ( العناق هو الجدى.. عندها حتة لحمة منه) ، فقال جابر: الحمد لله، لا تطعمى الأولاد و نيميهم، و سآتى برسول الله ليأكل ..

فيروح جابر يجيب النبى و قبل ما يمشى أكددت مراته عليه، أنه يجيب النبى بس ، وقالت له: إياك أن تفضحنى، يعنى إياك تجيب حد كمان ..لأن الأكل مش هيكفى.. فقال لها اطمئنى لن أفعل..و يرجع جابر للخندق، كان الرسول واقف على جبل سلع، فراح له جابر وقال له: يا رسول الله، عندى فى بيتى شىء من شعير وعناق، هيا يا رسول الله لتأكل. فابتسم النبى وقال: وحدى يا جابر؟ فاتكسف جابر و قاله جيب اللى تحبه .. على أساس إن النبى هيجيب أبو بكر وعمر بس فتمام يعنى ، فابتسم النبى .. بس جابر اتخض.. يدوب وافق من هنا.. و بص لاقى النبى وقف على جبل سلع و نادى على الناس و قال: يا أهل الخندق يدعوكم جابر لبيته، طبعاً كل الناس فرحت وقامت تجرى، فجابر هيتجنن فقال: يا رسول الله إنها شىء من شعير وشىء من عناق، فابتسم النبى وقاله: لا تخف يا جابر، ولكن قل لامرأتك أن تترك الطعام و تنتظرنى حتى آتى..(يعنى متحطش الأكل ..و تستنى النبى يجي الأول) فبسرعة يرجع جابر لبيته، فسألته زوجته: أين رسول الله؟ فحكى لها جابر اللى حصل، فمراته اضايقت جداً ،وقالت له: ألم أقل لك لا تفضحنى أمام رسول الله؟ و قالت: أخبرته أن الطعام قليل؟ قال لها: نعم و قال لى لا تخف يا جابر، فاطمأنت مراته و هديت.. (شايفين الإيمان و الثقة فى رسول الله )

و بعد شوية وصل رسول الله والجيش وراه، فدخل النبى البيت و سأل على الإناء اللى فيه الأكل، فكشف الغطاء و بدا يظبط الأكل .. أصل يا جماعة النبى ﷺ مبارك.. و الأكل ده هيكفى الجيش كله.. و يبدأ النبى ينظم دخول العدد الكبير ده للبيت إزاى؟ النبى قال لجابر يقف على باب البيت ويدخل الناس 10 ورا 10، فجابر مستغرب مش متخيل إن الأكل هيكفى كل دول.. فيبدأ الناس يدخلوا و ويطلعوا و يدخل عشرة غيرهم.. فبيقول جابر: والله كنت بشوف الصحابة بيقوموا من على الأكل و الأكل لسه موجود ، فيسألهم أشبعتم؟ فيقولوا له: نعم يا جابر جزاك الله عنا خيرا ،شبعنا الحمد لله.

وكل 10 يسألهم فيطمنوه إنهم شبعوا ، لحد ما كل الجيش أكل ،و يخش آخر حد عشان ياكل و هو رسول الله صلى الله عليه و سلم وبعد ما يخلص فيقول : يا جابر بارك الله لك فى أهلك وفى طعامك ، و الآن اجلس لتأكل أنت و أولادك..فبيقول جابر والله نظرت إلى الطعام فوالله وجدته كما هو..ودى من أجمل معجزات الخندق، طيب ..فيه سؤال؟ ليه الصحابة اتعذبوا و تعبوا طول الوقت طالما فيه معجزات زى دى ممكن تحصل؟ لأن الصحابة دول قدوة لكل المسلمين، فربنا مخلاش حياتهم كلها معجزات عشان نقدر نشوفهم قدوة و نقلدهم و نصبر على البلاء زى ما صبروا عليه .

نكمل الحلقة الجاية إن شاء الله 🤍

طيب ليه هنحفر ونعمل خندق أصلاً ؟ عشان لما العدو ييجى يتفاجئ بالخندق وأصلاً عرض الخندق كخمسة كيلو فاستحالة يقدر حصان ينط للناحية التانية ، فساعتها هيضطر العدو ينزل يمشى فى الخندق عشان يطلع يوصل الناحية التانية ويدخل المدينة، وده هيعمل فرصة للمسلمين إنهم يسيطروا على العدو فهيتحول الخندق لمقبرة جماعية. و حتى لو العدو قدر يطلع من الخندق برده لا يمكن يقدر يعدى من السهام اللى المسلمين هيضربوها عليهم..طيب الخندق هيتحفر إزاى ؟ أحنا شوفنا رحمة النبى و رأفته مع الأطفال ومع زوجاته ومعاملته للصحابة، تعالى نشوفه عسكرياً كان عظيم إزاى..إيه فكرة الرسول فى تنفيذ الحفر؟

هنعرف سوا بكرة إن شاء الله 🤍

سيرة_الرسول
الحلقة 119
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة الأحزاب أو الخندق (ج1)

إحنا دلوقتى فى سنة 5 هجرية..الكفار بدأوا يلاحظوا إن كل قبيلة منهم لو بتحارب النبى لوحدها مش بتقدر على النبى، مثلاً أبو سفيان سيد قريش أيقن أنه لوحده مش هيقدر يعمل حاجة، وكمان "حيي بن أخطب- قائد اليهود" تيقن إنه لوحده مش هيقدر على محمد، وكمان قبيلة " أشجع" و قبيلة "غطفان" وكل دى قبائل عرفت إنها لوحدها مش هتقدر على المسلمين، طيب إيه الحل ؟ هيقرروا كلهم أنهم يتجمعوا ضد محمد عليه الصلاة و السلام.. و صاحب الفكرة دى كان "حيي بن أخطب" ، و حيي بن أخطب هو قائد اليهود فى مستوطنة اسمها خيبر، و المستوطنة دى نشأت بعد ما نقض اليهود المعاهدات مع النبى فى المدينة و غدروا وحاولوا يقتلوا رسول الله و أمر رسول الله بطردهم من المدينة فاجتمعوا فى خيبر .. كان حيي بن أخطب نفسه ينتقم من النبي ويقتله، فجمع قوى عربية ضخمة جداً ، جمع كل قبائل اليهود من أشجع وغطفان وبنى سُليم وكمان أبو سفيان سيد قريش ضد النبى.. هقول لكم قصة عن حيي بن أخطب عشان تعرفوه كويس .. أصل حيي مش يهودى عادى.. ده واحد من كبار أحبار اليهود ( حبر يعنى عالم دين يهودى ) و حافظ التوراة، و زمان أوى سمع حيي عن النبى محمد، فحيي بن أخطب خد أخوه و راح للنبى.. أصل سبحان الله ربنا عز و جل قال فى القرآن :{الَّذِينَ آتَيْنَاهُمُ الْكِتَابَ يَعْرِفُونَهُ كَمَا يَعْرِفُونَ أَبْنَاءهُمْ وَإِنَّ فَرِيقاً مِّنْهُمْ لَيَكْتُمُونَ الْحَقَّ وَهُمْ يَعْلَمُونَ} سوره البقره 146... "يَعْرِفُونَهُ" المقصود بها: سيدنا محمد لأن ربنا ذكر مواصفاته كلها فى التوراة ..وفعلاً راح حيي بن أخطب للنبى فعرفه، فأخو حيي قال : يا حيي ..هو نبى..فماذا تنوى الآن؟ فقال حيي بن أخطب: نويت عداوته ما بقيت.. ( ياااه شايفين الكبر و الإستكبار.. و هو ده معنى الكفر .. كفر يعنى ستر و غطى .. الكافر هو شخص عرف الحق و ستره و مشى ورا الباطل.. )

طيب نرجع للغزوة، حيي بن أخطب عايز ينتقم من النبى و هيبدأ يجمع القبائل .. فراح لأبى سفيان فى مكة، و دعاه للتحالف معاه ضد سيدنا محمد، فوافق أبو سفيان طبعاََ.. و يروح حيي بن أخطب بعد كده لقبيلة غطفان ، وعرض نفس العرض و وافقوا ، و بعدها راح لقبيلة أشجع ووافقوا ، وبعدها لقبيلة بنى سُليم ووافقوا. وجمعت قريش كل حلفائها و بقى عددهم 4000 مقاتل و جمعت قبيلة غطفان حلفائها و بقى عددهم 6000المهم وصل عدد جيش الكفار فى الآخر ل10.000 مقاتل، طبعاً دى كارثة، ووصل الخبر لرسول الله .. طبعا إنتو عارفين إن كان فى أيام رسول الله حاجات شبه المخابرات دلوقتى، طب هتعمل إيه يا رسول الله بعد ما عرفت الأخبار دى؟ طيب هترد العدوان؟ لأ.. مش هاخد قرار غير بالمشورة .. فيجمع المسلمين ويقول لهم : أشيروا علي أيها الناس، (رغم اللى حصل فى غزوة أُحد من خساير كتير بعد المشورة فى الخروج لمقابلة جيش قريش بس برده ربنا قال: "فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ۖ فَإِذَا عَزَمْتَ فَتَوَكَّلْ عَلَى اللَّهِ ۚ"" سورة آل عمران 159 ..فالمهم بدأ كل واحد من الصحابة يقول رأيه، بس النبى لسة موصلش لحل مناسب، لحد ما يقوم صحابى جميل جداً اسمه "سلمان الفارسي"، وكان من بلاد فارس، حكينا عن قصة إسلامه الرائعة قبل كده.. المهم قال فكرة حلوة أوى،فقال سلمان: «يا رسول الله كنا بفارس إذا حوصرنا خندقنا علينا» ..يعنى إيه؟ يعنى لما ييجى عندنا جيش أضعاف أضعافنا كنا بنحفر خندق حوالينا يعنى حفرة فبالتالى محدش يقدر يوصل لنا..ودى فكرة فارسية ، و النبى عجبته الفكرة، بالرغم إنها فكرة من أفكار بلاد كفار، لكن عجبت النبى وده يدل على إن النبى عليه الصلاة والسلام كانت شخصيته مرنة، طالما الفكرة مش ضد شريعة الإسلام ولا ضد منهجه ومفيهاش حاجة حرام فخلاص مفيش مشكلة لو نعملها، طيب المدينة كلها كانت محاطة بحاجة اسمها "الحارَّة" ربنا سبحانه وتعالى أحاط المدينة بحصون طبيعية من الشرق والغرب والجنوب .. المدينة محاطة بأرض صخرية جداً ومدببة و دى كانت لونها أسود و محدش يعرف يعدى من عليها لا خيول ولا حتى دبابات ، ومينفعش غير الطيران ووقتها مكانش فيه طيران.فكده كأن المدينة محاطة بمربع ناقص منه ضلع واحد وهو شمال و هنا بقى هنحتاج ننفذ فكرة سلمان الفارسي عشان نقدر نحمى المدينة من الشمال، فهيحفر المسلمين خندق بطول المدينة من الشمال و الحفرة هتكون عمقها 5 متر وعرضها 5 متر و طول الخندق 5 كيلو متر ..إنتو متخيلين إن وسيلة الحفر الوحيدة اللى فى إيد المسلمين هتكون الفاس !! تخيلتوا ؟ رضى الله عنهم و أرضاهم ..

سيرة_الرسول
الحلقة 118
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

"تلخيص غزوة الأحزاب أو الخندق "
عشان نقدر نستوعب الغزوات سوا.. فاحنا اتفقنا اننا هنزل بوست يبقى فيها تفاصيل كل غزوة فى نقاط مختصرة و كمان أسبابها .. و بعدين هننزل يوميا بتفاصيل الغزوة كلها على حلقات بإذن الله

#غزوة_الاحزاب
1- سميت باسم غزوة الأحزاب لأن فيها اتجمع كل حزب من أحزاب الكفار واتفقوا على محاربة المسلمين.. و سميت أيضًا بغزوة الخندق لأن قام المسلمين بحفر خندق يصد العدوان من شمال المدينة و كانت خطة لم يعتاد عليها العرب فهى خطة فارسية.
2- طرفي القتال :الطرف الأول... اتحاد الكفار من قبائل مختلفة منها (قريش / غطفان / بنى سليم /أشجع) و عددهم 10,000 مقاتل.
و الطرف التانى..المسلمين فى المدينة و عددهم 3000 جندى.
3- أسباب الغزوة :
بعد محاولات الكفار فى الاعتداء على المدينة من بعض القبائل و هزيمتهم على يد جيش المسلمين.. الكفار بدأوا يلاحظوا أن كل قبيلة منهم لو بتحارب النبى لوحدها مش هتقدر تنتصر عليه و على جيش المسلمين..فقرروا يتحدوا ضد المسلمين
4- أحداث الغزوة:
**بادر حيي بن أخطب قائد مستوطنة اليهود فى خيبر بانه يجمع الكفار لمحاربة محمد و بدأ يعرض الفكرة على كل قبيلة و كلهم وافقوا على الإتحاد ضد محمد.
**علم النبى عليه الصلاة و السلام أن الكفار بيستعدوا للإعتداء على المدينة فأخذ بمشورة المسلمين، و كان فى صحابى اسمه سلمان الفارسى اقترح فكرة حفر الخندق لحماية المدينة من الشمال (لأن ربنا أنعم على المدينة بحصون طبيعية و تضاريس تحميها من الشرق و الغرب و الجنوب) و تم أيضًا عمل حصن لحماية النساء و الأطفال جوه المدينة.

** اتفاجئ الكفار بالخندق و قرروا يفكروا فى حل لدخول المدينة فقرروا يتفقوا مع يهود بنى قريظة و يحاولوا يقنعوهم بأنهم ينقضوا العهد بينهم و بين رسول الله (بنى قريظة عايشين فى جنوب المدينة و بينهم و بين رسول الله معاهدة سلام).
** نقض اليهود العهد و كانت نكبة كبيرة فى وسط الغزوة و حاول اليهود فى التخطيط للهجوم على نساء و أطفال المسلمين .
** أنعم الله على المسلمين بإسلام نعيم بن مسعود فراح للنبى و قال الشهادة :) .. فالنبى ﷺ قال له يحاول يصد العدوان عن المسلمين و إن الحرب خدعة (يعنى يخفى إسلامه و يحاول يكون وسط الكفار و يعمل أي شئ يصد العدوان).
** استطاع نعيم انه يفكك جيش الأحزاب و يوقع بينهم و بين يهود بنى قريظة بطريقة فى منتهى الذكاء.
** أرسل الله تعالى الرياح على جيش الكفار فكانت تقتلع خيامهم.
** قررت بعض القوى فى جيش الأحزاب أنها تنسحب بعد حصار طويل على المسلمين و بكدة اتفكك جيش الكفار.
** نصر الله تعالى المسلمين و كفاهم القتال فبدأ جيش المسلمين فى وضع السلاح..فنزل جبريل على رسول الله يقول : إن الملائكة لم تضع أسلحتها بعد ،" بنو قريظة غدرت إن الله لا يحب الخائنين" فيروح النبى لجيش المسلمين و يأمرهم بقتال بنى قريظة بعد غدرهم بالمسلمين و يتم حصار بنى قريظة لحد ما هيستسلموا ..

هنكمل إن شاءالله 🤍

فبكى أبو بكر وقال : بل أحب أن تغفر لى يا رب ،فرجع أبو بكر الصديق وبقى بيصرف على مسطح أضعاف ما كان بيصرفه قبل كدة ..عارفين الإمام الشافعى بيقول بيت جميل أوى عن العفو .. بيقول : "من نال مني أو علقت بذمتـــــه، أبرأتــــه لله شاكـــرا منتـــــه، أأُرَانى معَوِقَ مؤمن يوم الجزاء، أو أن أسوء محمدا في أمته"

اللى شتمنى أو علقت فى ذمته يعنى هاخد منه حسنات يوم القيامة ، أبرئته إلى الله .. مش عايز منه حاجة ، معقولة أنا أأخر مؤمن يخش الجنة ؟؟ أو أن أسوء محمدا فى أمته .. مش النبى هيزعل لو حد دخل النار فمعقولة أنا أسوؤه فى أمته؟؟.. والله يا جماعة لو أخدنا النية دى .. إننا هنسامح عشان ربنا يعفو عنا وعشان ميزعلش النبى .. هنسامح الناس كلها.
و بكدة خلصت حادثة الإفك رضى الله عن عائشةو أرضاها.

ميعادنا المرة الجاية إن شاء الله🤍
لا تنسوني من صالح دعائكم 🤍

و ينزل تشريع حد قذف المحصنات، قال تعالى: " وَالَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاءَ فَاجْلِدُوهُمْ ثَمَانِينَ جَلْدَةً وَلَا تَقْبَلُوا لَهُمْ شَهَادَةً أَبَدًا وَأُولَـئِكَ هُمُ الْفَاسِقُونَ ﴿٤﴾" فبعد ما تتحمل عائشة كل البلاء دة و تدفع التمن دة و تتعذب نفسياً عشان بعد كدة كل بنت مسلمة تعيش بكرامة.. وربنا يحميها إن حد يقول عليها ربع كلمة.. نزل تشريع يحمى الأعراض بإن اللى يتكلم على أى واحدة أو واحد من غير أربع شهود فهيبقى جزاؤه انه يتجلد 80 جلدة (ومن لم يُجلد فى الدنيا هيجُلد يوم القيامة) .. طيب وبعد التشريع ده فى ناس هتتجلد فعلاً ؟ اه زى حسان بن ثابت الصحابى الكريم هيتجلد (الحق عند ربنا ما بيتقسمش مش علشان ده صحابى مش هجلده لا الحق حق ..و الحق أحق أن يُتبع).

و يُجلد مسطح بن أثاثة (اللى حارب فى بدر) وتًجلد حِمنة بنت جحش دى أخت زينب بنت جحش زوجة النبى ﷺ... طب واحدة ست تتجلد ؟؟ أه .مدام غلطت.. إحنا ماعندناش فى الإسلام ست و راجل..طب ليه الحد اتطبق عليهم وهم لما اتكلموا مكنش لسة الحد نزل وماكنوش يعرفوا ؟؟ لأن حادثة الإفك دى تطبيق عملى دى قصة عملية علشان تفضل ليوم القيامة لأى حد اتكلم على واحدة فكان لازم ينزل الحكم ويتطبق وكمان دى الحادثة الوحيدة فى حياة النبى ، علشان لما نيجى بعدها نقول أن ربنا بيقول : و لكم فى رسول الله أسوةٌ حسنة ..

فتبقى كل حاجة فى حياتنا هنلاقيها فى سيرة النبى عليه الصلاة والسلام ، فلو كان الحكم ماتطبقش ، يبقى ساعتها كان هيبقى عندنا كدة حاجة ناقصة ، فالإفك حادثة عملية مكتملة ، حصلت الإشاعة والناس اتكلمت ونزل الحد و تم تطبيق الحد وربنا سامح فى الآخر ، حسان بعد ما اتجلد كان ندمان وعايز يعتذر لعائشة فيقول لها بيت شعر جميل فإن كان قد بلغوكمُ أننى كنت أهجوكمُ فلا رفعت صوتى إلىّ أناملى .. طيب حسان ومسطح وحِمنة ، الناس شهدت عليهم وهم كمان اعترفوا على نفسهم علشان كده اتجلدوا ، لكن عبد الله بن أبى بن سلول معترفش، ولا حد شهد عليه فما اتجلدش (إحنا دينا دين عدل مطلق .. بس عارفين حاجة الحد فى الإسلام بيكفر ويطهر فحسان ومسطح وحِمنة اتطهروا من الذنب لكن سلول ربنا أعطى له فرصة بس برده أصر على الذنب..و كأن ذنب عائشة لازم يشيله سلول يوم القيامة )..طيب ليه استمر الإفك والإفتراء ده لمدة شهر كامل و منزلش الوحى بسرعة ؟ فى حكمة جميلة أوى من ده ..فى مستشرق(عالم أجنبى بيهتم بعلوم الشرق) بيقول كلما أردت أن أُكذب محمد واجهتنى حادثة الإفك أقول هو صادق (كل ما أقرأ عن الإسلام و أقول إن محمد مش نبى و أكيد بيكذب ألاقى نفسى بفكر فى حادثة الإفك.. طب ليه؟ أصل لو محمد هو اللى مألف القرآن .. كان ألف بسرعة آية تبرأ عائشة وخلاص و يحمى شرفه و عرضه لكن يفضل شهر مافيش قرآن بينزل .. فدة أكبر دليل أن القرأن من عند الله تبارك وتعالى
أجمع العلماء على كفر من سب و شتم عائشة وكفر من سب أبو بكر الصديق و فسق من سب الصحابة ..لأن سب عائشة والصديق تكذيب للقرآن..طب ليه ؟ لأن سب عائشة تكذيب بالإفك أما سب أبو بكر فربنا قال "إِذْ يَقُولُ لِصَاحِبِهِ لا تَحْزَنْ إِنَّ اللَّهَ مَعَنَا " فربنا أثبت للصديق الصُحبة لرسول الله. فاللى يسبهم و يشتم فيهم يبقى بيفترى على الله .. شوفتوا ربنا كرم عائشة ازاى! رضى الله عنها.

فى قصة جميلة عن عفو عائشة .. مرة كانت ماشية مع عُروة بن الزبير" ابن أختها" وكان بعد وفاة النبى .. و كان حسان بن ثابت جى من بعيد فشافته فانفعل عُروة وافتكر اللى حصل أيام الإفك.. فراح و بقى عايز يتخانق مع حسان فمسكته عائشة وسألته: إلى أين يا عُروة ؟ قال :تذكرت ما قاله يا خالة ، فقالت: يا بنى دعه فإنه كان يدافع عن رسول الله أما سمعت آخر بيت فقد قال: إن أبى وأخى وعمى وعرضى لعرض محمد منكم فداء .. (عرض أبويا وعرض عمى وعرض خالى وعرضى لعرض محمد منكم فداء ، أفديه بعرضى).
آخر حاجة هنحكى عنها هي مسطح بن أثاثة .. مسطح بقى كان أبو بكر بيصرف عليه (تخيلوا.. قال كدة على عائشة وأبو بكر بيصرف عليه) فلما نزلت الآيات واتأكد أبو بكر أن مسطح متورط .. فأقسم بالله أنه ميصرفش على مسطح أبداً .. اسمعوا بقى رحمة ربنا وعفو الله عز وجل " ولا يَأْتَلِ أُولُو الْفَضْلِ مِنْكُمْ وَالسَّعَةِ أَنْ يُؤْتُوا أُولِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيم " (سوره النور- آية 22)ٌ
الآية دى نزلت فى أبو بكر والمهاجرين فى سبيل الله دى المقصود بيها مسطح ربنا ما نزعش منه لفظ المهاجر مخدش منه اللقب ..و فى الآيات ربنا بيقول إن أبوبكر الأحسن إنه يعفى عن مسطح و يصرف عليه وربنا وعد ان اللى يعفى عن حد ظلمه .. ربنا هيعفى عنه..

سيرة_الرسول
الحلقة 117
يلا صلوا على النبي
اللهم صل وسلم وبارك على سيدنا محمد وعلى آله وصحبه أجمعين 🤍

"حادثة الإفك " الإفتراء على أم المؤمنين عائشة زوجة رسول الله(ج6)

شفنا امبارح إن مفيش وحى بآيات تنزل تحل موضوع كذب و إفتراء بن سلول.. و حاول النبى عليه الصلاة والسلام يعمل رأى عام بس مش هينفع بسبب الخناقة اللى كانت هتحصل بين الأوس و الخزرج .. و شفنا عائشة بتبكى فى بيت والدها و بتبكى أمها و يبكى أبو بكر الصديق أبوها و يدخل عليهم النبى صل الله عليه وسلم فبتقول عائشة فسلم عليّ ونظر إلىّ (وأول مرة يبص لعائشة عينه فى عينها و يكلمها كلام مباشر و يتفتح الموضوع بينهم).

فقال النبى : يا عائشة علمتِ ما قيل ؟ فقالت: نعم يا رسول الله ، فقال: يا عائشة إن كنتى بريئة فسيبرأك الله تعالى وإن كنتى قد ألممتى بذنب فاستغفرى الله وتوبى إليه فإن العبد إذا أذنب وتاب غفر الله له ..(هو فيه إيه؟ شاكك فيها ؟ لأ .. أومال في إيه ؟ فى مشكلة .. إحنا عايزين دليل نواجه بيه المجتمع..الحادثة و التهمة دى مش سهلة و كفاية إنها حصلت فى مجتمع مغلق.. يعنى لو فى مجتمعنا دلوقتى واحدة رجعت مع واحد بالليل هتبقى كارثة خصوصا لو فى منطقة ريفية . فمابالك إن ده يحصل فى مجتمع بعاداته اللى من 1400 سنة).

فبتقول عائشة فنظرت إليه وجف دمعى (عايزة تقول هو فى احتمال!! ) فقلت : ما تقول يا رسول الله !! فلم يرد .. فراحت لأمها فقالت: ياأمى أجيبى عنى رسول الله ،فقالت: والله يا بُنية لا أدرى ما أقول .. يا أبتى أجب عنى رسول الله ، فقال: يا بُنية لا أدرى ما أقول لرسول الله، فحست عائشة أنها لوحدها و مفيش فى اللحظة دى ملجأ ولا منجا من الله إلا إليه سبحانه وتعالى.. فبصتلهم وبكت وقالت والله إنى أرى فيكم أنكم سمعتم أمراً وصدقتموه حتى استقر فى أنفسكم .. ووالله لو قلت لكم أنى بريئة والله يعلم أنى بريئة ، ما صدقتمونى ...ولو اعترفت على نفسى بذنبٍ لم أفعله ،صدقتمونى والله يعلم أنى منه بريئة.. فوالله لا أجد لكم إلا كما قال أبو يوسف ( تقصد سيدنا يعقوب) و قالت : فصبرٌ جميل والله المستعان على ما تصفون.

فبتقول عائشة : فتركتهم و ذهبت إلى فراشى وأعطيتهم ظهرى واضطجعت وغطيت رأسى و ظللت أبكى وأبكى وأبكى ووالله ما قام أحد ولا دخل أحد ولا خرج أحد .. فنظرت إلى رسول الله فإذا تلبسه الوحى فارتجفت أطرافه و تصبب عرقاً كما كان يحدث حين يتنزل به الوحى، فعلمنا أنه يُوحى إليه .. فظل النبى يتصبب عرقاً و يوحى إليه.. يوحى إليه .. يوحى إليه (آيات كتيرة ) حتى إذا سُرى عنه ( جبريل مشى) رأيته يضحك وما ضحك منذ ثلاثين يوماً (تعبان و مضغوط من موضوع الإفك) فقال : يا عائش أبشرى أبشرى لقد أنزل الله برائتك .

بتقول عائشة فقالت: أمى قومى إلى رسول الله .. وقال أبى: قومى إلى رسول الله .. فقلت: والله لن أقوم إلا لربى الذى برأنى فسجدت شكر لله عز وجل ..طيب إيه الآيات اللى نزلت فى عائشة ؟ تأملوا الآيات الجميلة قال تعالى : " إِنَّ الَّذِينَ جَاءُوا بِالْإِفْكِ عُصْبَةٌ مِّنكُمْ لَا تَحْسَبُوهُ شَرًّا لَّكُم بَلْ هُوَ خَيْرٌ لَّكُمْ لِكُلِّ امْرِئٍ مِّنْهُم مَّا اكْتَسَبَ مِنَ الْإِثْمِ وَالَّذِي تَوَلَّى كِبْرَهُ مِنْهُمْ لَهُ عَذَابٌ عَظِيمٌ ﴿١١﴾ لَّوْلَا إِذْ سَمِعْتُمُوهُ ظَنَّ الْمُؤْمِنُونَ وَالْمُؤْمِنَاتُ بِأَنفُسِهِمْ خَيْرًا وَقَالُوا هَـذَا إِفْكٌ مُّبِينٌ ﴿١٢﴾ لَّوْلَا جَاءُوا عَلَيْهِ بِأَرْبَعَةِ شُهَدَاءَ فَإِذْ لَمْ يَأْتُوا بِالشُّهَدَاءِ فَأُولَـئِكَ عِندَ اللَّـهِ هُمُ الْكَاذِبُونَ ﴿١٣﴾وَلَوْلَا فَضْلُ اللَّـهِ عَلَيْكُمْ وَرَحْمَتُهُ فِي الدُّنْيَا وَالْآخِرَةِ لَمَسَّكُمْ فِي مَا أَفَضْتُمْ فِيهِ عَذَابٌ عَظِيمٌ ﴿١٤﴾ إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّـهِ عَظِيمٌ ﴿١٥﴾ وَلَوْلَا إِذْ سَمِعْتُمُوهُ قُلْتُم مَّا يَكُونُ لَنَا أَن نَّتَكَلَّمَ بِهَـذَا سُبْحَانَكَ هَـذَا بُهْتَانٌ عَظِيمٌ ﴿١٦﴾ يَعِظُكُمُ اللَّـهُ أَن تَعُودُوا لِمِثْلِهِ أَبَدًا إِن كُنتُم مُّؤْمِنِينَ ﴿١٧﴾ وَيُبَيِّنُ اللَّـهُ لَكُمُ الْآيَاتِ وَاللَّـهُ عَلِيمٌ حَكِيمٌ ﴿١٨﴾" (سوره النور).

والذى تولى كبره منهم .. المقصود بيها عبد الله بن أبى بن سلول "المنافق " فربنا بيتوعده بعذاب عظيم ، و الآية اللى بتقول لولا إذ سمعتموه ظن المؤمنون والمؤمنات بأنفسهم خيراً...دى المقصود بيها الناس اللى زى أبو أيوب الأنصارى وأم أيوب .. فاكرين لما قالوا إن مستحيل ده يحصل من صفوان وعائشة.. و أما الآية : لولا إذ سمعتموه قلتم ما يكون لنا أن نتكلم بهذا سبحانك هذا بهتان عظيم .... يعنى زى زينب لما قالت إن ده محصلش و مشفناش من عائشة غير كل خير، و قالت عايزة أحفظ ودنى من الكلام ده..

سيرة_الرسول
الحلقة 116
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

"حادثة الإفك " الإفتراء على أم المؤمنين عائشة زوجة رسول الله(ج5)

شفنا إمبارح النبى عليه الصلاة و السلام و هو بيحاول يعمل رأى عام عشان يقدر يعاقب سلول المنافق ، و بدأ يسأل أكتر من حد عشان يضمن ان فى ناس مأيداه فى تبرئة عائشة.. النبى محمد و حبيبته عائشة فى معاناة و أزمة و جرح كبير النبى ﷺ حزين ان حد مس حبيبته بكلمة و عائشة ميتة من العياط عشان مش قادرة تتخيل ان ممكن حد يفكر انها تعمل شئ يمس حبها لرسول الله.. و مش مصدقة انها حطته فى موقف صعب بالشكل ده..

و انقطع الوحى و مفيش وحى بينزل على رسول الله بالآيات.. و الأزمة دى هتستمر لمدة شهر ..طيب النبى عمل رأى عام و هيقف دلوقتى على المنبر و يبدأ يواجه الناس بالآراء اللى معاه ويحاول أنه يكسب الناس فى صفه و يقف النبى على المنبر و يقول : أيها الناس إن هناك رجلاً بلغ أذاه إلى أهل بيتى ووالله ما علمت عن عائشة إلا خيرا (هو بنفسه بيبرأها فده أكبر دليل أنه مكنش مصدق الكلام ده) ولقد ذكروا لى رجلاً من أصحابى (يقصد صفوان بن المعطل) وما علمت على صفوان إلا خيراً (وكمان برأ صفوان ، يعنى النبى مش مصدق أن هما الاتنين يعملوا كده وبرأهم الاتنين) .

و يكمل النبى كلامه و يقول : أيها الناس والله إن صفوان كان لا يدخل البيت إلا معى (بيقولهم كده علشان الكلام اللى اتقال أن صفوان كان بييجى لعائشة البيت والنبى مش موجود .. شوفتوا الموقف الصعب الى اتحط فيه النبى.. اضطره انه يتكلم لحد تفاصيل صعبه ازاى!! )
فسيدنا سعد بن معاذ مش قادر يستحمل الكلام ده فقام وقال: يا رسول الله فداك أبى وأمى وعِرضى إن كان هذا الرجل من الأوس (لأن سعد أوسى) مُرنى آتيك برأسه وإن كان من إخواننا من الخزرج فمرنى أفعل ما تشاء.

(أصل المنافق بن سلول يبقى خزرجى ..فسعد نسب الأمر للنبى .. عشان يبان ان سعد قتل بن سلول الخزرجى تنفيذ لأمر النبى فبتالى مش هتحصل مشاكل بين الأوس و الخزرج ) فقام واحد تانى اسمه سيدنا سعد بن عُبادة ( وكان خزرجى بس هو هيحصل منه تصرف مش صح عشان خدته النعرة القبلية فهيقوم يرد على سعد بن معاذ و يقول : كذبت يا سعد بن معاذ ، فأنت لا تستطيع أن تقتل رجلاً منا فأنا سيد الخزرج .. فيقوم واحد تالت اسمه أُسيد بن حضير (صاحب سعد بن معاذ .. وكان أوسى برده) فقال يا سعد بن عُبادة : كذبت أنت منافق تدافع عن منافق (أسيد يقصد ان مدام بتدافع عن سلول يبقى أنت أكيد زيه !) و كلمة من هنا و كلمة تانية من هنا فقامت خناقة ... والنبى مش ناقص ﷺ.. فنظر إليهم النبى ودمعت عيناه.

و راح قايل: أبدعوى الجاهلية وأنا بين أظهركم ؟ (هترجعوا للجاهلية وأنا فى وسطكم) اسكتوا اسكتوا ما لهذا جئت.. ما لهذا جئت.. فسكتوا ونزل من على المنبر يبكى ، و دخل إلى بيته ... و فى حاجة مهمة حصلت هي ان صفوان بن المُعطل " اللى اتهموه مع عائشة رضى الله عنها" لما عرف أن حسان بن ثابت نقل كلام عليه ،مقدرش يمسك أعصابه فأخد القوس بتاعه وراح ضرب حسان ،فراح حسان اشتكى للنبى، فجاب النبى صفوان و قال له : يا صفوان.. هل ضربته؟

فقال : نعم يا رسول الله ، فقال له: و لماذا يا صفوان؟ (شوفوا رد صفوان وأخلاقه وأخلاق الصحابة مع النبى ) وطى صفوان وشه فى الأرض وقال يا رسول الله لقد اتهمنى فى عِرضى (مش قادر يقوله فى عِرضك !!) فقاله شتمنى فى عِرضى أنا ، فقام النبى قال له : عليك دية يا صفوان، بس النبى هو اللى هيتحمل الدية و هيدفعها لحسان بن ثابت.. شايفين أد إيه النبى بيشق على نفسه و بيتحكم فى أعصابه..

طيب دلوقتى النبى ﷺ تعبان .. و فى بيته لا بياكل و لا بينام .. طيب فين عائشة بقى ؟ عائشة فى بيت والدها أبو بكر الصديق و بتقول : والله ظللتُ ثلاثة أيام لا يرقأ دمعى ولا أكتحل بنوم ولا آكل طعاماً ولا أشرب شراباً.. كنت أبكى ليلا و نهارا حتى ظن أهلى أن البكاء فالق كبدى .. فبتقول حتى إن كان فى اليوم الثلاثين دخلت عليا صاحبتى من الأنصار (واحدة صاحبتى) فرأت حالى فأشفقت علي.. فلم تتكلم و جلست تبكى معى فجلسنا نبكى سوياً وأبى يبكى وأمى تبكى..

حتى دخل علينا رسول الله ( و دلوقتى أول مواجهة فى الموضوع ده هتحصل بين عائشة و رسول الله)

و هنعرف تفاصيلها الحلقة الجاية إن شاء الله🤍

فما تقول يا عُمر (رأيك إيه؟ ) (فعُمر يرد رد مبهر جداً عُمر ) .

فيرد عُمر و يقول : يا رسول الله من الذى زوجك عائشة ؟ فيقول له : الله ... فيبتسم عُمر (يعنى إيه ؟ يعنى بيقول له اللى جوزك عائشة هو ربنا. فاستحالة يجوزك واحدة مش كويسة) فالنبى يقول له: قل لهم يا عُمر (يبقى أهو النبى متأكد من براءة عائشة)يروح النبى لأسامة بن زيد ويقول له: يا أسامة أسمعت ما قيل ؟ نعم يا رسول الله ، فيقول له: و ما قولك يا أسامة ؟ قال: يا رسول الله أهلك وما علمنا عنهم إلا الخير ..فيفرح النبى كدة بقى معايا عُمر وأسامة..

و يروح النبى لمين كمان ؟لعلىّ بن أبى طالب ..(بس لازم نستوعب رد علىّ صح و لو عرفنا على بيفكر إزاى ،ساعتها هنفهم قصده كويس ) سيدنا علىّ كل اللى شاغل باله أن النبى يبقى كويس، أى حاجة تعكر مزاج النبى ،نمحيها أحسن.. يعنى دلوقتى عندنا هدف يا رسول الله و هو أن الرسالة تكمل و الدعوة للإسلام تنتشر، فأياً كان التمن ممكن ندفعه علشان الإسلام .. ندفعه..(ودى فى حد ذاتها وجهة نظر مش وحشة، يعنى لو حطينا نفسنا مكان سيدنا علىّ بإنى أقعد أفكر فى الموضوع ده والإسلام يقف ...وللا نكمل ؟ إحنا عايزين نفتح مكة، عايزين الإسلام يستقر .. فسيدنا علىّ له وجهة نظر ).

فالنبى يروح لعلىّ و يقول له: يا علىّ أسمعت ما قيل ؟ فقال: نعم يا رسول الله ، فيقوله: فما قولك يا علىّ ؟فيقول على:" يا رسول الله أهلك وما علمنا عنهم إلا خيراً وإن الله لم يضيق عليك ..طلقها وتزوج غيرها " سيدنا علىّ متأكد أن عائشة ما عملتش كدة وعارف أن ربنا أكيد مش هيسيبها وهيتولاها بس علىّ بيوازن بين أمرين.. الأسوأ أن الدعوة تتوقف والسئ أن عائشة تتظلم.. فإحنا ممكن نيجى على عائشة علشان الدعوة تستمر .. فعلىّ مش قصده أنه مابيحبش عائشة..حاشاه بالعكس علىّ كان بيحبها جداً وعائشة كانت دايماً تقول على علىّ كل الخير وهما الاتنين أهل بيت النبى هو ابن عم النبى وهى زوجة النبى ... بس كأن النبى مكنش عايز الإجابة دى فقام راح لبريرة.. مين دى؟

دى خادمة عائشة .. فسألها: يا بريرة أسمعتى ما قيل ؟ فقالت : نعم يا رسول الله ،فقال: وما تقولين ؟ فتقول بريرة: يا رسول الله أهلك وما علمنا عنهم إلا الخير ، فقال لها : هل رأيتى شئ رابك من عائشة ؟؟ (يعنى شفتى أى تصرف منها خلاكى تستغربى .. طيب بتسأل ليه يا رسول الله ؟ علشان يثبت أن حتى اللى عايشة معاها و اللى هى أدرى بيها بتقول كذا يا جماعة ..فالنبى لما بيسألها مش معنى ده أنه شاكك لكن هو عايز رد مقنع للناس) فقالت نعم (فى حاجة استغربتها ) .. فقال: خير يا بريرة ؟ فقالت: كنت كلما عجنت العجين آتى به لعائشة وأقول يا عائشة احفظى العجين (لحد ما يخمر علشان نخبزه ونعمله عيش) فكانت عائشة لا تهتم وتنام وتأتى الدواجن فتأكله،،فابتسم النبى و قال :أرأيتى شئ غير ذلك يا بريرة؟ فقالت : لا..

و بعدين راح النبى إلى زينب بنت جحش "زوجة النبى" ودى اللى بتنافس عائشة على قلب النبى (شوفوا أخلاق زينب ) فقال النبى: يا زينب أسمعتى ما قيل ؟؟ فقالت : نعم يا رسول الله ، فقال : وما تقولين يا زينب ؟ فقالت: أصون سمعى وبصرى (أنا مش هأذى ودانى بالكلام ده يا رسول الله ) أهلك ، وما علمنا عنها إلا الخير والله ما رأيت من عائشة إلا كل الخير والدين والتقوى والعفاف ..و دلوقتى هيروح النبى و يقف على المنبر ويبدأ يواجه الناس و يحاول أنه يكسب الناس فى صفه.. علشان يعاقب ابن سلول المنافق..طيب هيقول إيه صل الله عليه و سلم ؟

هنعرف بكرة إن شاء الله🤍

سيرة_الرسول
الحلقة 115
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

"حادثة الإفك " الإفتراء على أم المؤمنين عائشة زوجة رسول الله(ج4)

شفنا الحلقة اللي فاتت عائشة بعد ما استأذنت النبى عليه الصلاة و السلام انها تروح لبيت أبوها و هناك فضلت بتبكى و مش قادرة تصدق أن اللى اتقال عليها ده صحيح ..طب النبى كان بيعمل إيه دلوقتى ؟ يا ترى كنت مصدق يا رسول الله ؟ .. استحالة.. طبعا مكنش مصدق..اوعوا تصدقوا أن النبى كان مصدق الكلام ده .. فى ناس بتحكى حادثة الإفك دى وتقول أن النبى صدق وأنه بشر فوقع فى قلبه ما يقع للبشر !! .. أبدا أبدا ..طبعا مكنش مصدق.. استحالة.. أومال مالك يا رسول الله ؟؟ شوفوا بقى عظمة محمد اللى كل مرة بتبان أكتر ، محمد الزوج مصدق جداً أن عائشة ماعملتش كدة ، محمد الزوج يقدر دلوقتى يعاقب كل اللى بيتكلم فى مراته لكن محمد القائد ، قائد الدولة لازم يكون عنده دليل علشان يحكم حكم ، عندك دليل يا رسول الله ؟ لا معنديش دليل ... فهو ﷺ ماكنش حاكم ديكتاتورى ..حاشاه ﷺ .

أى حاكم ديكتاتورى دلوقتى لو حد اتكلم عن مراته كلمة ، أبسط حاجة يعملها يدخل الحد ده السجن و يوقف الفتنة دى .. سواء دخل الشخص ده ظلم أو لا مش مهم .. القائد له وضع سياسى.. زى قصة سيدنا يوسف عليه السلام لما اتسجن ظلم لمجرد أن الناس بدأت تتكلم عن حب امرأة العزيز له ..مع أنها هى اللى كانت غلطانة.. و رغم كدة اتسجن سيدنا يوسف رغم أنه برئ .. "قَالَ هِيَ رَاوَدَتْنِي عَن نَّفْسِي ۚ وَشَهِدَ شَاهِدٌ مِّنْ أَهْلِهَا إِن كَانَ قَمِيصُهُ قُدَّ مِن قُبُلٍ فَصَدَقَتْ وَهُوَ مِنَ الْكَاذِبِينَ (26) وَإِن كَانَ قَمِيصُهُ قُدَّ مِن دُبُرٍ فَكَذَبَتْ وَهُوَ مِنَ الصَّادِقِينَ (27) فَلَمَّا رَأَىٰ قَمِيصَهُ قُدَّ مِن دُبُرٍ قَالَ إِنَّهُ مِن كَيْدِكُنَّ ۖ إِنَّ كَيْدَكُنَّ عَظِيمٌ (28) يُوسُفُ أَعْرِضْ عَنْ هَٰذَا ۚ وَاسْتَغْفِرِي لِذَنبِكِ ۖ إِنَّكِ كُنتِ مِنَ الْخَاطِئِينَ (29)" و بعدين سجنوووه
"ثُمَّ بَدَا لَهُمْ مِنْ بَعْدِ مَا رَأَوُا الآيَات ِلَيَسْجُنُنَّهُ حَتَّى حِينٍ (35)" (سوره يوسف)

فالعزيز كان مصدق سيدنا يوسف ومع ذلك سجنه وظلمه علشان كرامته و وضعه السياسى .. فكان النبى يقدر يعمل كده.. صح؟ أه يقدر بس هل النبى ديكتاتور ؟ لا أبدا.. صل الله على محمد هو اللى بيعلم البشرية العدل.. فإزاى ما يبقاش عادل .. طيب معاك دليل يا رسول الله ؟ معاك دليل أن حد سمع سلول بيقول الكلام ده فنعاقبه ؟ للأسف لا ..أصل سلول حكى الكلام ده للمنافقين و محدش منهم هيقول عليه وهم بسرعة نشروا الكلام، فالنبى بقى متكتف ، النبى الزوج يقدر ياخد رد فعل عنيف لكن النبى القائد لازم يبقى محايد لأنك يا رسول الله قائد الدولة لازم يكون معاك دليل وبناءً عليه تحكم ..

طيب إيه الحلول اللى قدامك يا رسول الله ؟؟ دلوقتى النبى قصاده 3 حلول .. الحل الأول أنه يطلقها (مش فى سياسيين بيعملوا كده؟ ..لو حد اتكلم عن مراته يطلقها ويريح نفسه ويبعد عن وجع الدماغ.. سواء كانت مظلومة أو لا) بس النبى مش هيظلم عائشة أبدا، طيب و الحل التانى هو أنه بكل عنف و قوة يحاسب أى حد يجيب سيرة مراته، بس أنت مش معاك دليل يا رسول الله ولو عملت كدة تبقى أنت ديكتاتور.. وحاشاه صل الله عليه وسلم... طيب الحل التالت إيه ؟ انه يكون على الحياد لحد ما يبقى فى يده دليل يثبت بيه براءة عائشة وده اللى النبى هيختاره ﷺ (شوفتوا عظمة قائد أعظم من محمد ﷺ..مفيش أعظم منه صل الله عليه وسلم ) .. هيفكر النبى فى فكرة جميلة أوى ..

هو دلوقتى محتاج يثبت براءة عائشة طيب هيثبتها إزاى ؟النبى عايز المجتمع نفسه هو اللى يثبت براءة عائشة ..فهيحاول النبى صل الله عليه و سلم يعمل رأى عام ، شريحة من المجتمع تأيده وتبقى فى صفه وهم اللى يحفزوا باقى الناس أنهم يثبتوا براءة عائشة.. طيب فى اتنين جمال أوى قاعدين بيتكلموا مع بعض الاتنين دول هما أبو أيوب الأنصارى وأم أيوب (فاكرينهم اللى استضافوا النبى لما هاجر للمدينة ) أبو أيوب بيقول لأم أيوب: أسمعتى ما قيل يا أم أيوب ؟ قالت نعم ، وقالت يا أبا أيوب أتصدق ما قيل فى عائشة ؟؟ قال لا والله ، فقال : يا أم أيوب لو كنتى مكان عائشة أتفعلين ما قيل فى عائشة ؟ قالت لا والله حاشى لله، فقال : وعائشة خيرٌ منكِ عند الله .. قالت أعلم.. وأنت يا أبا أيوب أكنت تفعل الذى قيل فى صفوان ؟؟ قال : لا والله وصفوان خيرٌ منى عند الله (يبقى لو أنا وأنتى اللى أقل منهم.. عمرنا ما نعمل كده .. يبقى إزاى عائشة وصفوان يعملوها !!) طيب قلنا أن النبى ﷺ عايز يعمل رأى عام و الناس هى اللى تبرأ عائشة.. طيب هيسأل مين؟ عُمر بن الخطاب (خلوا بالكم لحد اللحظة دى محصلش مواجهة بين الصحابة والنبى فى الموضوع ده .. الموضوع محرج جدا ) هيقول النبى لعُمر: يا عُمر أسمعت ما قيل ؟ فيقوله نعم يا رسول الله ..

فبتقول عائشة : فخرجت حتى وصلت إلى بيت أبى فمكنش فى البيت، كان فوق السطح بيصلى ويبكى، فقلت: يا أماه (فأمها لقيتها بتبكى ففهمت أن عائشة عرفت) فقالت: هونى عليكى يا بُنية ، قلت: يا أمى أحقاً ما يقوله الناس ؟؟ فقالت: نعم يا بُنية ، قالت: أو عَلِم ذلك رسول الله ؟؟ قالت: نعم يا بُنية، يا بُنية هونى عليكى ، فما من إمراةٍ وضيئة (حلوة) عندها زوج يحبها ولها ضرائر إلا وأكثرن عليها ( طبعا هى بس بتقول أى حاجة، كانت عايزة تلاقى مخرج تهون بيه على عائشة) فقالت عائشة : ولِمَ لم تخبرينى ؟؟ فقالت: ما استطعت (مش قادرة أقولك ، خفت عليكى، أنتى مريضة)،، فدخل أبو بكر الصديق (وكان سمع كلامهم) .

فقالت عائشة :يا أبتى أو حقاً ما يقوله الناس ؟؟ أوعَلِم رسول الله ؟ قال: نعم .. فبتقول عائشة : فظللت أبكى وأبكى حتى كاد لا يرقأ دمعى ولا أكتحل بنوم ولا آكل طعاماً ولا أشرب شراباً.. كنت أبكى ليل نهار حتى ظن أهلى أن البكاء فالق كبدى (هموت من كتر البكاء) ..ده كان وضع عائشة ،طب النبى كان بيعمل إيه دلوقتى ؟

هنعرف المرة الجاية إن شاء الله 🤍

سيرة_الرسول
الحلقة 114
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

"حادثة الإفك " الإفتراء على أم المؤمنين عائشة زوجة رسول الله(ج3)

نكمل سوا حادثة الإفك ، على فكرة حادثة الإفك من أشد المواقف على رسول الله (وكلمة إفك معناها غير كلمة كذب ، كذب يعنى حاجة موجودة واتحورت لكن إفك يعنى حاجة مالهاش أى وجود ..حاجة حد ألفها و اخترعها تماماً يعنى مالهاش أى أساس من الصحة) ، العلماء بيقولوا أيهم أشد على النبى .. غزوة أُحد أم تعذيب الطائف أم الإفك ؟؟عائشة سألت النبى مرة و قالت يا رسول الله هل مر عليك يوم أشد من أُحد ؟ فقال لها : نعم يوم لقيت القوم بالطائف فخرجت أهيم على وجهى و يكمل النبى كلامه لآخر الحديث إنه تعب أوى ... فنقدر نقول أن يمكن لو كان النبى اتسأل أيام الإفك نفس السؤال ده ؟ كان قال: أن حادثة الإفك كانت أشد حاجة عليه .. عارفين فى ناس بتقول أن إيذاء سلول للنبى كان أشد من أبى جهل لأن أبو جهل أذاه راجل لراجل فى حرب لكن سلول أذاه فى شرفه وعِرضه وأن التعب النفسى اللى مر بيه النبى فى حادثة الإفك كان أشد من تعب غزوة أُحد لأن الوجع البدنى أهون من الوجع النفسى و عائشة دى كانت مراته حبيبته و الموضوع استمر شهر كامل.. يعنى معاناة كبيرة ..و أكتر شئ بيوجع كسرة القلب .. أصل ربنا سمى نفسه الجبار عشان القلوب المجروحة المكسورة محتاجة جبر .. تعالوا نفتكر سوا أد إيه النبى كان بيحب عائشة وأد إيه عائشة كانت بتحب النبى علشان نحس أد إيه النبى اتعذب واتأذى فى مشاعره ، و أد إيه عائشة اتألمت لدرجة أنها قالت : كاد البكاء فالق كبدى :'( ..يبقى مرة النبى عند عائشة فى البيت وعايز يقوم يصلى فيستأذنها قبل ما يقوم يصلى (صلاة السنة مش الفريضة، طبعاً الفريضة مافيهاش استئذان ..طب إيه المشكلة ليه استأذنها فى صلاة السنة !! طب ما يقوم يصلى على طول ؟
النبى صل الله عليه وسلم استأذن احتراما لوجود زوجته.. شوفتوا أدب مع الزوجة أكتر من كدة !! )

فهيقولها يا عائش أتأذنين لى أن أقوم أصلى لربى ساعة ؟ فتقوله: يا رسول الله إنى لأحبُ قربك وأكره فراقك ولكنى أُحب الذى تحب ، قم بأبى أنت وأمى يا رسول الله.. فيقوم يصلى ويصلى، فهى شيفاه طول الصلاة بيبكى فبعد الصلاة بتسأله و تقول : يا رسول الله بتبكى ليه ؟ أنت معندكش ذنوب و قد غفر لك الله ما تقدم من ذنبك وما تأخر ؟؟ فقال لها: يا عائش أفلا أكون عبداً شكوراً ♡ .. ويوم وفاة النبى هنحكيه بالتفصيل بعد كدة..هيبقى بيموت صل الله عليه و سلم و كان يتصبب عرقاً ويغمى عليه ويفوق ويغمى عليه ويفوق فعائشة قاعدة جمبه و وخداه فى حضنها و عمالة تبكى و تمسح العرق و تدعى له فيفتح عينيه ويقول لها : والله يا عائش إنه ليهون علىّ الموت أنك زوجتى فى الآخرة ( بيحبها لآخر لحظة فى حياته .. و بيراعى مشاعرها و بيصبرها على فراقه رغم تعبه الشديد و يطمنها بأنهم هيبقوا سوا فى الجنة ) .

و بعد وفاته صل الله عليه و سلم هتقول السيدة عائشة : والله مات رسول الله وهو بين سحرى ونحرى (بين صدرى ورقبتى يعنى كانت حضناه ) و تحكى عائشة و تقول أن قبل ما النبى ما يموت بلحظات دخل عليهم عبد الرحمن بن أبى بكر (أخوها) وفى يده السواك فأخدته عائشة و قطمته ولينته ببقها وبعدها إدته للنبى فاستاك (غسل سنانه) وكانت آخر حاجة تدخل فمه.. فتقول عائشة : من كرم الله علىّ أن النبى مات فى حجرتى وفى ليلتى بين سحرى ونحرى وأن الله جمع بين ريقى وريقه قبل أن يموت (آخر حاجة دخلت فى جوف النبى كانت ريق عائشة لما لينت السواك ببقها).. ..شايفين أد إيه كان حبه لعائشة و تخيلوا الجرح الكبير اللى هيتعرضوا له بعد ما يتقال أن عائشة زنت مع صحابى (حاشاها رضى الله عنها وأرضاها) .

طيب دلوقتى امبارح اتكلمنا على أن النبى مصدقش اللى اتقال فى عائشة.. بس هو كان تعبان و مهموم.. شايل هم كبير .. مراته حبيبته حد اتجرأ يمسها بسوء ، السيدة عائشة بتقول: كنت أجد فى عينيه صل الله عليه و سلم الحزن والهم.. ولا أدرى ما الذى به ؟ وأرى الدموع فى عينيه ولا أدرى ما به ؟ (مارضيش ﷺ حتى يقولها علشان هى كانت عندها حمى و تعبانة فخايف لما تعرف تتعب أكتر ) ...

ف يوم ما عرفت من أم مسطح اللى اتقال عليها.. استنت النبى يرجع البيت فقالت له: يا رسول الله أتأذن لى أن أُمرض فى بيت أبى ؟ (عايزة تروح بيت أبوها .. عايزة تتأكد من أبوها وأمها يمكن أم مسطح غلطانة ..عائشة مش قادرة تصدق) فقال النبى :نعم يا عائشة (مقلهاش لا مش هتخرجى غير لما أعرف حقيقة الكلام ده إيه.. شايفين اهو أنه سمح لها بالخروج ده دليل أن النبى متأكد أنها بريئة ♡) ..