KUN BUGUNDIRTong otgach, tunni kutmagin, yaxshi-yomon o‘tgan kechagi kunni emas, hali kelib ulgurmagan ertani ham emas, yashayotgan buguningni o‘ylagin.
Quyoshi charaqlagan bu kun - sening kuning, bir kunlik umr... Go‘yo bu kunda tug‘ilib, shu kunda o‘ladigandek, bugungi hayotingni bugun uchun bag‘ishlagin. Shundagina sening hayoting o‘tmish g‘am-tashvishlari, kelajakning xatarnok sharpalariga to‘qnash kelmaydi.
Barcha ijod, mehnatlaringni buguning uchun sarflagin.
Bu kunda xushu’ bilan namoz o‘qigin, tadabbur bilan Qur’on tilovat qil, buguning haqida mushohada yurit, husni xulqli bo‘lgin, qazoyi qadarga rozi bo‘l, o‘zgalarga manfaat yetkaz.
Bu kunda soat, daqiqalarni yillarga, soniyalarni oylarga aylantirgin, bu kunda yaxshilikni ekib, go‘zallik hosilini yig‘ib olgin, gunohlardan mag‘firat so‘ra, Parvardigorni zikr qil, rihlat tadorigini ko‘r, bu kunni xursandchilik bilan o‘tkazgin, rizqu ro‘zga, Olloh taolo senga bergan ne’matlarga rozi bo‘lgin.
«Bas, senga ato etgan narsamni olgin va shukr qilguvchilardan bo‘lgin!».
Bu kunni qayg‘u hasratsiz, gina-hasadsiz o‘tkazgin.. Ushbu so‘zlarni qalbing oynasiga yozib qo‘ygin:
KUN BUGUNINGDIR!
Agar sen shu narsalarni jiddiy, qat’iy iroda bilan tasdiqlasang, o‘z nafsingni «men faqat shu kun uchun yashayman» iborasiga buysundirasan va o‘sha paytda o‘z borligingni bino qilishga, iqtidoringni rivojlantirishga bu kuningni har bir lahzasidan foydalanasan va deysan: Bu kunda so‘zimni o‘nglayman, yomon, fahsh so‘zlarni so‘zlamayman, g‘iybat qilmayman, bu kun o‘z uyimni tartibga keltiraman, bu kunda jismim tozaligiga, yurish-turishimga e’tibor beraman.
Bu kunda qalbimga fazilat urug‘ini ekaman, unibo‘sgach, undan kibr-havo, hasad, riyo, yomon gumondan iborat yomon ildizlarni tikonli shoxlari bilan birga yulib tashlayman.
Bu kunda boshqalarga manfaat yetkazish umidida bo‘laman, o‘zgalarga yaxshilik qilaman, kasal holidan xabar olaman, muhtoj, mazlumlarga yordam beraman, olimni siylayman, kichikni izzat, kattani hurmat qilaman.
O‘tgan narsa o‘tib ketdi, quyosh kabi botdi. Ey o‘tmish, endi sen uchun ko‘zyoshi to‘kib qayg‘urayotganimni ko‘rmaysan, chunki sen bizni tark etding, bizlardan uzoqlashding va abadul-abad qaytib kelmaysan.
Ey kelajak, sen g‘ayb olamidasan, bas, men havoyi orzular bilan hamkorlik qilmasman va hayotdagi bugunimni xayoldagi ertaga alishmayman, o‘z nafsimni tasavvurga sotmayman, kelajak uchun shoshilmayman, chunki ertangi kun hali yo‘qdir, hali yaratilmagan, hali tilga olgulik bir narsa emasdir.
Kun buguningdir, bu so‘z hayotni go‘zal suratda ko‘rishni istagan inson uchun saodat lug‘atida eng go‘zal so‘zdir.
📖 "Maxzun boʻlma"kitobidan
