___
هيبة الإسلام يمتى اِتعُودها ؟
اِبْـيُـومك الموعود يا موعودها
ضاعت اَحكام الشرِع و اتحوِّلَت
و الحياة ابعين حاسِدكم حِلَت
او مُعظم أنصارك عليك اتبدِّلَت
او مِن عصت أمرك عِصَت معبودها
مثل أوَّل يوم رد دينك غريب
اِيْـنادي هل من ناصرِ او لا مِن مُجيب
يا نبي اِبراهيم عصرك .. من تغيب
ابياهو غيرك ينغِلب نمرودها ؟
او ياهو غيرك بِـيـهْ دمكم يندِرِك
و آنه أدري الثار بِعْظامَك يِرِك
يمته يبْـن العسكري احصون الشِرِك
اتْهِد مبانيها او تِـفِـلِّ اِحدودها ؟
او من عگب ما عاشت ابْـشِرها او سِعَـتْ
و الضغينه اللي ابضمايرها اِزْرَعَـتْ
خضِّرَت الارواح و الرُوس اَيْنَعَتْ
او سيفك اِلرُوس الكفر حاصودها
گوم و ابحدِّ البواتِر يا عِجيد
طوِّگ اِرگابِ العِده ابطوگ العبيد
سيِّدي يالعِشت كل عمرك طِريد
اسأل اِليمتى تظل مطرودها ؟
و انته ربّك واعدَك لمّن تِرِد
ابقبضّه من النار و اعليهم تِـهِـد
تحرگ او كلما نِضَج منهم جلِد
لجلك الباري يبدْل اِجلودها
سيَّدي او لا ياخذك بيهم رَحَم
حتى عالطفل الجنين الـ بالرَّحَم
إنصب المحكمه , او خل سيفك حَكم
و اِحكم اعليها ابحُكم داوودها
سيِّدي او مطلوب لِحدودك تِجيم
و آنا بيك أدري يمن گلبك رحيم
لاچن الموْتور بطْفال او حريم
من يُلومه لو فتِك بِحْشُودها ؟!
او من يحين الحين و السيفك تِسِل
سيّدي حاشاك تسِرف بالچتِل
بس أذكرك عمِّتك فوگ الهِزل
اِلهسّه دمْعتها اِتْحَـفـر بخدودها
بعد ما وصّيك يالغايب بعد
ترد ثار ابيوم صَوَّت بِن سَعد
ها يخيل الله , و العسكر لِكد
و بْخِدِر زينب غده فرهودها
هذا شبِّ النّار ببْـيُـوت الأمان
او ذاك يوكِز طفله بطْراف السِّنان
او بين نار او زِلم و اخْـيُـول او دُخَان
اِطلعت زينب و النهر مگصودها
طلْعت امن الخيمه مدهوشة فِكِر
تركض او بالسُّوط يلحگها شِمِر
ابچف تشاگف ضربته او چف للسِّتِر
اهناك گامت تنتخي ابمفگودها
ميرزا عادل أشكناني
قناة الرجوع الى الله @h_ameer1
قصائد منبريه مكتوبه @h_ameer2
قصائد منبريه مكتوبه @h_ameer3
قصائد نسائية مكتوبه @h_ameer4