MU | Chit chat 🇸🇩

☑️  New List

• Automatically and organized✔️.
• Gathered Distinctive and interactive channels💭.
• Don't contain violent and hints ads💢.
• يوميات مغُامـــــر

MU | Chit chat 🇸🇩 pinned «شكراً لكل الأعضاء البدعموني سواء برسائلهم الإيجابية أو من خلال قرائتهم ليومياتي بإستمرار ، أنا جداً جداً شاكر ليكم و أوعدكم إني ما حاوقف كتابة طالما إنتوا حتفضلوا داعمين للمحتوي الأنا بقدمة 💙💙💙.»

ڪل يوم انت بتسعي ، مش علشان توصل لنتيجة علي هواڪ ، لا. بتسعي عشان دا أمر ربنا سبحانه وتعالي وڪل خطوات سعيڪ بتشڪل حياتڪ حتي لو إنت ماشايف التشڪيل والتغيير ، لانو مسيطر عليڪ شڪل النتيجة البي مزاجڪ وبس.

#سندة_روح💙✨
#رشا_عمر
@MUDAILIES

MU | Chit chat 🇸🇩 pinned «»

☑️  New List

• Automatically and organized✔️.
• Gathered Distinctive and interactive channels💭.
• Don't contain violent and hints ads💢.
• يوميات مغُامـــــر

صباح الخيرات و البرڪات و النفحات الإيمانية مع شفع الحله 😂🌺


واقف في الشبڪة قدام الدڪان جوني بنوتين مرسلات (لزيت) ، الڪبيرة شايله القروش و الصغيرة الباقه ..
بعد عبرت ليهم إتشاڪلن و اي وحده عايزه تشيل الباقة 😂 ..

عشان احسم النقاش سڪتهم و وقفتهم جنب بعض قلت ليهم أي وحدة تسمع لي سورة (الحمدو) و الحافظة فيڪم حتشيل (الباقة) 😎
الاولي بسرعه ربعت يديها و بدت تقرأ - أعوذ بالله من الشيطان الرجيم - وماشاء الله بلمح البصر قرت سورة الفاتحة وما غلطت في آيه 💕🎉..

في سري قلت المشڪلة خلاص اتحلت 🤓 ..
بس الاخت الصغيرة ڪان ليها رأي تاني، دفرت اختها و (ربعت) يديها و بنفس الطريقة بدت تقرأ 😂
ماشاء الله عليهن الإثنين طلعوا حافظات و أنا احترت اسلم الزيت لمنو 😂😂

في النهاية سلمتو للصغيرة و اثنيت عليها لأنها مجتهدة و حافظه 💕

صباح الخير للناس العندهم الالف الجديد
أما الباقين ما شافوا خير 😂😂

شكلو ظابط و حيكون أظبط في طباق الشيلة ولا شنو ؟🙈😂

بطريقةٍ ما ستدرك أن الطريق الذي اختاره الله لك، كان أفضل ألف مرة من الطريق الذي أردته لنفسك، وأن الباب الذي أُغلِق في وجهك ألف مرة، كان وراءه شرٌ محض، وأن اليد التي أفلتتك، لم تكن تناسبك منذ البداية، وأن البلاء الذي أنهكك لم يكن سوى رحمةٌ مُهداة، وأن انهيار الأسباب من حولك لم تكن بالقسوة التي ظننت، وإنما هي سنة الله في خلقه، وأن الأمر الذي جفاك النوم من أجله لم يكن يستحق كل هذا، وانك قلقت أكثر مما ينبغي، بطريقةٍ ما ستدرك أنك لست مالك أمرك، وأن أمرك إن ضاق واستضاق، له ربٌ هو أولى به، وأن الله رحيم، رحيم بالقدر الذي يُنجينا من شرور البشر، ومن أنفسنا حين لا نقوى عليها :))

لو امطرت ذهبا من بعد ما ذهبا
لا شيء يعدل في هذا الوجود أبا ❤️❤️❤️

ما براڪم فاشلين 😎


رسالة لاخوتي و اخواتي طلاب الشهادة السودانية

(ما تزعل لو ماجبت النتيجة الانت منتظرها)


تعالوا احڪي ليڪم قصتي الغريبة مع امتحانات الشهادة و إن شاء الله تڪون ليڪم حافز 😂

تجربه سنتين قبل دخول الجامعة ..
حالي ڪحال اغلب الطلاب السودانيين أهلي اختارو لي تخصصي ..
(محمد) أمشي علمي و شيل هندسية بس ڪدا و بعدها مافي زول وقف معاي و شجعني ..
و تحس لسان حالهم خلاص إخترنا ليڪ و انت شق طريقڪ بنفسڪ ..
وڪانت نهاية الطريق دا الفشل الزريع 📉

لما دخلت تالت سافرت الخرطوم بفهم اقرأ هناڪ و أرجع امتحن في البلد ، و في البداية الفڪرة ڪانت عاجباني وڪلي حماس وإني أمشي علمي أو ادبي ما ڪان فارق معاي.

"أمسڪ دا إيصالك المدرسي سجلتڪ في مدرسة التأصيل الخاصة"
ياخ فرحت و أتبسط شديد أنه أبوي سجلني في (مدرسة التأصيل) لأني سمعت بيها و شايف شعار المدرسة في مزڪرات (الرائد التعليمية) و طلابهم دائما ضمن 💯 الاوائل ..
بعد خلصت دراستي رجعت البلد للامتحانات ، ويعجبڪم الغرور قراية ما ڪنت بقرا وڪنت بمشي لحصص التقوية و المراجعات في المدارس التانية ڪنوع من التغيير (شو و ڪدا) للجڪس بإعتباري جاي من الخرطوم و قريت في مدرسة مرموقة وبتاع 😎🤣 ..
فضلت علي الحال دا حصه ورا حصه لحدي وزعونا في المراڪز و إمتحنا و خلصنا 😍😍🕺🏼 .
-
إتلمينا ڪلنا وشاهدنا المؤتمر و الغريبة ما قريت ولا إجتهدت بس من جواي ڪنت متأمل يزيعو إسمي ضمن 💯 الأوائل ..
المؤتمر خلص و ما جابو خبري ، دخلت رقمي و انتظرنا الرسالة و هنا ڪانت المفاجأة المدوية
MU ALFATIH
الحاله رسوب 🤣🤣💔

وهاك يا شماته من الناس المعاي
- الترابه في خشمڪ دي نهاية فلاحتڪ و بوبارڪ ..
- ياخ قديت أضانا بڪلامڪ أنا ود التأصيل و مولد تحت سبورة و فطموني بطبشيرة و بتاع 🤣🤣 ..
- من الصباح ماعطنا بسؤلڪ عن المؤتمر تقول ضامن نفسك اول الشهادة ، والله انت الا ڪان يزيعوڪ يوم القيامة لحسابك علي فصحاتڪ و بجاحتڪ دي 🤣🤣😆"

فالسؤال المطروح
الاسباب شنو يا (أبو حميد) إنڪ رسبت رغم توفر ڪل شيء حرفياً لصالحڪ ؟!

واولاً لعوامل خارجية :
- نص السنة الدراسية اتيقت إني ما سعيد و المجال ما بشبهني ولا حتي ڪان من اختياري .
- ضغط الاسرة وخصوصاً الوالدة (ربنا يحفظها🩷) إني لازم امشي علمي و أسير علي خطاها و ابقي مهندس معماري 👷🏼‍♂ مرموق و ما اڪسر القاعدة لانه ڪل الأسرة علمين 🔬..
- تهديد أمي بعد عرفت أني ما حبيت المجال " شفتا لو جبت 50% بقريڪ هندسة خاص😡" .

ثانياً لعوامل شخصية و بسبب أخطائي و تبجحي😅:
- وقتها ڪنت فرحان إني درست في مدرسة (التأصيل) و نسيت فڪرة أني اجتهد مع نفسي و اقدم 💯💯 من مجهودي في قرايتي ..
- استيعابي للمواد العلمية ڪان ضعيف جداً جداً ..
- عدم الرقابه في البيت و لاننا عزابة ابوي ما ڪان فاضي حتي يتابع معاي، و ڪونه دخلني مدرسة معروفة بسمعتها شايف أنه ڪدة دوره إنتهي .
- استغليت غياب ابوي طوال الفترة النهارية و تضيع يومي في البلايشتيشن بين سباق العجلات Down Hill ، لعبة سلاحف النينجا و المزرعة السعيدة 🤣🤣.
- ما ڪنت ملم بإستراتيجيات الإمتحانات مع أنه ڪان عندي (مريح) لڪل مادة ..
- تفاخري لما رجعت البلد باني درست في الخرطوم و في مدرسة مرموقة و بقيت عايش في النغمة دي🎶 .
- ايام الإمتحانات ما ڪنت برڪز ولا حتي براجع من اسمع (مضي نصف الزمن) بجمع ورقتي و بطلع ..
- ما إستغليت الفُرصه الڪانت متاحه لي - مدرسة ظابطة ، معلمين أڪفاء ، حصص و معسڪرات تقوية ، أوراق عمل ، مزڪرات مجانية و توفر ڪل المنهج الدراسي في فلاش في مڪتبة المدرسة..

دي الاسباب أو علي الاقل معظم االاسباب في رسوبي وفشلي في إحراز معدل مقبول في سنتي الأولى بالنسبة لطالب درس في بيئة مهيئة ..

فالغلط مني انا بس لا أڪتر ولا أقل 💔💔.

الرسوب ماعيب ولا فضيحة💐✨

نتلاقي في الجزء التاني و ڪيف السنه التانية ڪانت استثنائية لما إخترت مجالي بنفسي😌

#MU_ALFATIH
#يتبع (3/1)

" الصباح في وطني"

ـ بعد ليلة شتوية طويلة تشرق الشمس معلنة فجر يوم جديد.

ـ تسمع صوت المؤذن ينادي " حي علي الصلاة حي علي الفلاح " يستيقظ كثير من الناس لعلهم يدركون عظمة صلاة الصبح.

ـ والبعض الآخر يتقلب في نومه يشد الغطاء عليه ليكمل نومه متكاسلين وبين هذا وذاك تجد الشمس أشرقت في الأحياء.

- الجميع مستيقظ لديهم مشاغل كثيرة يفكرون بها العمل أو الدراسة أو غير ذلك ولكن قبل خروجهم هناك طقوس شاي الصباح الجميلة فالبعض يفضل تناول الشاي باللقيمات والبسكويت وبعضهم يتناول الرغيف الذي حصل عليه بعد معأناة ياخذ قضمة كبيرة وكأنها أعظم الإنجازات ومنهم من يفضل الشاي السادة والأخرون الحليب بعضهم لديهم مزاج خاص ومقدار معين لتناول الشاي عليه.

ـ بعدها يقوم الناس بالخروج لمهامهم اليومية وحياتهم المعتادة الشوارع تضج بطلبة الأساس والثانوية وبعض العاملين وأطفالاً صغار تأخذهم أمهاتهم وتمسك بإيديهم الصغيرة وبعضهم يسرع نحو المواصلات العامة والأخرون لديهم تراحيل خاصة.

ـ في الأحياء تدب الحياة بالباعة المتجولين بالبكاسي صاحب الخضار ينادي ..

" ابوي زراع انا بياع .. ابوي زراع انا بياع " .

وبائع السمك يهتف إيضاً ..

" سمك سمك سمك الخزان كبير ومليان "
" سمك الجزيرة سمحة وكبيرة سمك " ..

وأصحاب الكارو بعضهم يبيع الماء وأخرون يشترون الخرد فتسمع ..

" خرد خرد خرد " و " صاحب الماء يطرق بصوت عال علي البرميل معلناً وصوله " ..

ـ وبين كل هذه الأصوات تخرج النساء يلفحن تيابهن واحدة تريد خضار وأخري زوجها يحب السمك وشخص أصابه الفلس يقوم ببيع الخرد مقابل جنيهات.

ـ في الجانب الأخر يقف الناس في المحطات ينتظرون التراحيل وبعضهم يترصد للملحة ♡.

ـ والباقي منهم يستغل المواصلات الحافلة تلو الأخري يهتف الكمسنجي شرق شرق وآخر السوق الشعبي وآخر نفر عربي نفر يتسارع الناس لحجز مقعاد لهم تجلس علي الحافلة لتصل لوجهتك التي تريدها في الحافلة الناس وطن عندما تصعد أحدهم يصلح الكرسي لشخص ما لايعرفه وصديقتان يتبادلان الحديث ورجل يكبر في السن وسيدة تحمل سلة هي مصدر رزقها الوحيد.

ـ وشخص مثلي يفضل الجلوس قرب النافذ السائق يحب الإستماع للموسيقي من كبار الفنانين مثلاً كا " مصطفي سيد أحمد " ويدندن الجميع همساً البعض يرجع للزكريات وآخر تكسوه الهموم ولكن تخف المعأناة بضحكة بسبب بعض الركاب وجدالهم مع الكمساري في خلاف صغير يتحول بعدها لنكتة.

ـ الناس في وطني تملائهم الطيبة رغم قساوة الحياة الشباب فيه حالماً بالحرية.

ـ يخوضون المصارع يواجهون الموت بلا رحمة يناضلون لعيش حياة كريمة في أمن وأمان.

ـ كل يوم لديه قصة قد تختتم نهايتها بشكل حزين وأصوات الهتافات تعلو والكثير.


ـ ماقيل القليل ولكن وطني يحمل بداخله وطن آخر ..


ـ فأحبوا أوطانكم تحبكم ♥

منقول
#سمرية

مافي حدود مافي مستحيل

بليش الجزء الرابع الفصل الأخير
شارة البداية : كلمات محمد الفاتح 😎🔥

نوع الحلاقين المفروض يتوفرو في البلد دي ياااخ😭
مستعد ادفع اي مبلغ للحلاقه 😫

دا النوع المفروض تمشي ليها قبل عرسك بساعه عشان تصدم مرتك و فِردك و اهلك لما يشوفوك في الصاله 😂😂

ثــانوس 💙

جدي (والد ابوي) ليه اثرا كبير في حياتي ، أثر ممتد من وأنا طفل و للان في فترتي الحالية دي .
معظم حياتي عشتها معاه ، من اول ساعات حياتي في الدنيا اتولدت و اتربيت تحت رعايته وما أنسي فترة الاساس و الثانوي دي كانت أيام المراهقه و التمرد بس (جدي) كان عندو طريقته في ضحد التمرد 😂
..
بعد دخلت (تانية) تانوي رحلنا من البيت الكبير و بعد امتحنت الشهادة السودانية سافرنا الخرطوم و اتقطعت عنه بس ايام الاجازة بين السمسترات كنت بسافر ليه .

(جدي) كان قايم بدور الوالد المُربي ، الناصح ، الامر الناهي و بإختصار كدا (ثانوس) في البيت 😅 .
كان معيش كل الأسرة في نظام و إنضباط شديد من (نسوانه اللهم حبوباتي الإثنين و نحن و باقي اولاد الأهل الفي البيت)😂😂❤️
و دا حسب خلفيته العسكرية زمان ..
الدخول و الخروج من البيت بأمر تحرك و الرجوع بكون في زمن معين هو محددة سلفاً ..
و عشان تطلع لازم تكلمه بالغرض من الطلعة - ماشي وين - لمنو و حترجع متين و الزول الماشي ليه ود منو ؟
ياخ حتي حبوباتي و امي كانوا مدرجين في النظام دا ومافي حاجة إسمها جبنات و كلام فارغ أو دا ولد ناس محترم ، ما عجبو الموضوع بقوليك (جلا) و اترزع في البيت 😂😂🔥 ..

الكان ممتع وقتها لما نعمل مشكلة في الحله أو في الجناين - قريبة شديد من البيت - جدي كان بضربنا بسيطان من شجرة (النيم🌳) ولو الموضوع خطير او زرانا بنلعب (بلي) بجلدنا بسلك سوداتل الاسود المضفور داك 😭😭💔.
في قاموسه حفلات و سهر في الكورة لوقت متاخر ممنوع بشدة مع التحذير .
بعد صلاة المغرب طوالي بقفل ابواب البيت و المصيبة انه غرفته اتجاة الباب و الغريب و محيرني للان انه سريرة و الشباك كلهم قصاد الباب ظط ، من موقعه بكون كاشغ البيت كله و ما عارف هل (الخرطة) صدفه ولا من تصميم (جدي) ..
في مرة اتأخرت و عشان ما اتكشف جيت بباب النص المشترك مع جيرانا 😎..
ياااا زول اثناء ما بتكلم عن إنجازي دا دخل علينا (ثانوس) بالقفاز الذهبي و سلك سوداتل
ماف داعي افصل حتي ما احرج نفسي ومن يومها بقيت عبرة للباقين 😂.
رغم القوانين الصارمة دي (جدي) كان عطوف و حنين بطريقة غريبة 😂❤️ ، كنا حوالي 6 شباب في البيت و انا اصغرهم ..
في كل جمعة جدي بسوقنا معاهو الزراعه (بالتاتشر) بنمشي نشوف مشاريعنا و بنجيب معانا الحطب للبيت و طبعا جدي بكون شايل معها (كلاش) بصورة دائمة في العربية و بندقية خرطوش بنصطاد ليها ( الارانب ، جداد الوادي🦃 ، غزلان ، كديس الخلاء و غيرهم ).
غايتو مرة ركبت راسي و قلت الا اجرب السلاح و لاني كنت صغير مع ضربتي للطلقه وقعت من العربية 🤣😆😆 ..

نجي للجانب الجميل و سبب كتابتي للنص دا 💚
جدي كان امام جامع حلتنا و بحب تلاوته شديد شديد و بحب اصلي وراهو وكنت بزعل زعل لما يصلي بينا زول غيره 😤.
جدو ما شاء الله عليه حافظ المصحف من بدري ❤️ و صوتة في التلاوة رهيييب و مختلف عن كل قارئ سمعتة ( انا معتبره السديس) ..
صوتة و هو بقرا يا الله يااااخ ، بدخلك في حالة من الخشوع و الطمأنينة و السكينة ، صوت عذب و شجي كدا 💚.
ما عارف السر شنو بس أمام بحب يقرا سور و خواتيم سور محددة معينة ، ومن شدة جمال صوته في التلاوة في كل مرة انا بصلي في الجامع او اسمع زول بقرا في الايات الجدي بحب يقراها طوالي بتذكر صوته و بتخيله كانه هو البقرا 😭😭💙
دا غيري اني حفظت الايات و السور الهو بحبها ولما يقدمني أصلي في البيت بقراها طوالي 😂🙊 ..

و عادة أني اقعد في الجامع و أقرا جزء يوميــــــــاً بعد الصبح دي إتعلمتها من جدي من وأنا صغير لأني كنت بشوفه بقعد يقروا في المسجد مع بعض المصلين لين شروق الشمس و بختموها بي ركعتين و دعاء 👏🏼✨.

في الختــــام موقف مضحك و يثبت لكم انو جدي زول صعب :
يوم فطرنا بي ملاح (قرع🎃)و فضل باقي جابوهو لينا في صينية الغداء ، عمي من شلاقتو قال لينا : "ياخ عرفنا الموسم لكن فطور و غداء قرع !! مافي غيرو دا شنو ياخ ".
جدي اداه ليك نظرة خلتو يسكت و ما يأكل الا القرع و بعد اتغدينا قالينا من يوم الليلة و شهر قدام تاني
الفطور ... الغداء و العشاء بملاح قرع و الماعاجبوا يمشي ياكل في السوق بقروشه 🔥

من أكثر الأيات البتلوها :
• ﴿ قُلِ ادْعُوا اللَّهَ أَوِ ادْعُوا الرَّحْمَنَ أَيًّا مَا تَدْعُوا فَلَهُ الْأَسْمَاءُ الْحُسْنَى وَلَا تَجْهَرْ بِصَلَاتِكَ وَلَا تُخَافِتْ بِهَا وَابْتَغِ بَيْنَ ذَلِكَ سَبِيلًا ﴾ - الإسراء
• سورة البقرة عموما و ايات الصيام خصوصاً 💙 : ﴿ يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ﴾ .
و اي آيه بتبدا بندا : يَا أَيُّهَا الَّذِينَ آمَنُوا .... الخ .
• ﴿ لَقَدْ جَآءَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِٱلْمُؤْمِنِينَ رَءُوفٌ رَّحِيمٌ ﴾ - التوبة
• و غيرهم من الآيات

#MU_ALFATIH

"بخطوات صغيرة تقطع أميال طويلة " ♡.

ـ في طريقڪ عشان تحقق أحلامڪ و تصل الإنجازات و الأحلام العايزها ما لازم تستعجل الخطوات .
بخطوات صغيرة و ثابثة وتوڪل علي ربنا - سُبحانه وتعالـي - حتصل وجهتڪ ..


بعد شهر من شغلي في الدڪان إتعرفت علي شاب من الجيران اسمه (محمد الفاتح😂) و دا ڪان رفيق طريقي من اللحظة ديڪ ..
عشان يشجعني علي شغلي سمى اي خطوة بعملا بخطوة من خطوات العظمة 🐾..
لما عملت درابزين للدڪان قالي دي الخطوة الرابعة في العظمة ..

من وقتها هو نزل شغل في مجمع ( انظمة شمسية ومعدات ڪهربائية)
يوم الجمعة مشيت جبتو من البيت حتي يرڪب لي نظام طاقة شمسية متڪامل في البيت❤️
بعد رڪبنا النظام اول حاجة عملناها رسلنا ولد السوق يجيب (5 ڪوم جوافة) 🤣🤣
خلطنا ڪل الجوافة و ختينا الجڪ في نصنا و اي زول بڪبايته و بنتناوب في الشراب ..
بعد شِرب ڪم ڪباية ڪدا (محمد) قالي ااااااه بڪدا يا (بحصي🫂) انت وصلت آخر خطوات العظمة (بيرفڪتو👌🏼)
و رفع ڪبايه البلاستيك وقالي نخب اڪمال خطوات العظمة (چاااامبيييي)😍🥂 .

ڪل ما اتذڪر ڪلام (محمد) زمان بحس أني فعلا انجزت انجازات واضحه و ملموسه وڪل دا حصل لأني آمنت بنفسي ، قدراتـي و ثقتي في نفسي ڪانت عالية وبتقديمي 💯💯 من مجهوي في شغلي ..
وإيماني التام أنه في تجارب لازم اخوضها حتي وإن ڪانت التجارب دي عڪس رغباتي و ما بترتقي لحجم توقعاتي ..

و إنت يا جميل بعد ڪملت النص للنهاية معتبر نفسك في الخطوة الڪم؟

#MU_ALFATIH

☑️  New List

• Automatically and organized✔️.
• Gathered Distinctive and interactive channels💭.
• Don't contain violent and hints ads💢.
• يوميات مغُامـــــر

رد فعلي لما شفت جامبو بنزل في بسكويت اوريو
بعد غيابو سنه كامله من السوق 😂😂😂
اوريو !!
اررورورورورور😂😂😭

لما تهتم بنفسك وتشبع إحتياجاتك النفسية ويكون عندك إكتفاء ذاتي وإنطباعك عن شخصك يكون ثابت وموزون ومخزونك النفسي سوي ومليان ، حتلاقي نفسك تلقائيآ يد عليا ، بتهتم بالناس وبتعمل الواجب معاهم ووجودهم من عدمه ما بفرق معاك ، عكس لما تكون شخص فارغ نفسيآ حتبتدي تتحول لمتسول نفسيآ عاوز إهتمام وعاوز حب وعاوز إستحسان وإلخ لذلك ما ننسى إنه سبحانه وتعالى لما وضع فينا الميل والرغبة والحاجة للقبول والإستحسان و من الناس كان الميلان دة ميلان ثانوي مهما بعدت درجاته فربنا واضع فيك القدر اليخليك تهتم بنفسك وتشيلها براك وتحقق إكتفاء ذاتي دون التسول بمشاعرك أمام اي شخص .

إن شاء الله الخطوات الجاية تكون أسهل والطُرق تكون أوضح.
اللهم اجعلي نصيب في حياة طيِّبة؛
أرضى فيها عن نفسي وعن مجهودي ومحاولاتي واختياراتي بدون تخبُّط و بدون خسائر أو آلام

شيء غريب ڪأني عايش بين الماضي و الحاضر ♾ ..

ڪتبت نص معبر و مفصل عن موقف حاصل معاي حالياً قبل 4 سنوات ..
مع انه وقتها ما ڪنت حاسس ولا حامل نفس الشعور الحالي او حتي ڪان في محفز لڪتابة نص بالطريقة دي علي عڪس وضعي الحالي ..

ودي تعتبر وحدة من الغاز الحياة

لم اختفي بدون قصد و لكنني قصدت ان اختفي ، و ان أنعزل عن هذا الشعور الذي بدء يرهقني ، ليته حُباً و ليته عشقًا إنما هو مجرد عبور ارهق قلبـي تأملت كثيراً حتى تألمت أكثر .
لم يكن يُجدر بي ان اجعل نفسي تُصدق هذه التراهات و لكنني جعلتها تُصدق لكي أنسى اشياءً أوجعتني كُنت اريد ثغره لاخرج من حُزني و عُزلتي و لابتسم من جديد ، كنتي الوسيله التي اخرجتني و لكنني تعمقت اكثر و تعلقت اكثر ، تعلقت بفتاة لم تكن و لن تكن يوما ملكـي ، بفتاة يستحيل ان تكون لي ، ليتها تعلم كيف حادثت الناس عنها ؛ كُنت ومازلت معجبا لكني لست مغرما ، قلبي ارهقني حينما ادركت أني واقعا في اوهام و عُدت لنفسي و تذكرت اني حقاً نسيت نفسي .
انا الآن عالق لا اعلم ماذا افعل و كيف ألمم شتاتي و ضجيج عقلي ف وداعا لك يا عابرتي ووداعا لك ايتها المزيفة و هنيئا لك .
#وداعاً

شيال التقيلة

(الحمدلله لأن مجريات أمورنا بيده سبحانه، تحوطها رحمته، وتجريها حكمته، الحمدلله؛ لأنه ربنا ولم يكلنا إلى ضعفنا ولا ضعف خلقه، الحمد لله لأننا بين يديه دائمًا.. ولسنا في رجاء غيره لأنه أغنى قلوبنا به عمّن سواه)

مرات الظروف بتختنا في واقع مرير و بصورة مفاجأة ..
عشان ڪدة أعيد و أڪرر إنو" الحياة ما ساهلة ، ولا مُرضية ، ولا عادلة لي حد رغباتنا ، ‏لڪن ياهاا حربنا الوحيدة .
‏الحرب البنخوض فيها ڪمية من المعارك والتحديات على أمل يجي يوم و نقول وصلنا ، ‏وما شرط ننتصر فيها ڪلها  ‏بس ع الأقل ما نخسر نفسنا ، ولا نخسر معارڪنا و تحدياتنا المهمة ، ‏ولو ما ڪان في هزيمة؛ ابداً ما ڪان حيڪون في نجاح ❤️ .. "

قبل الحرب وضعت خطط محددة لمستقبلي ، و ضمن الخطط امتحن (الايلتس IELTS ) ، ..
حتي اخدت دورات و حدد ايام الامتحان ، الجزء الاول و التاني يوم (13-27 من شهر 5 ) ..
بعد الطامه الحصلت في بلدنا العزيز حسيت بإحباط شديد و فضلت لافي في الفاضي اڪتر من سنه و في الاخير رسيت علي شغل الدڪان بعد رجعت البلد.
وزي ما عارفين زول شغال في مڪتب و بي عربية و إضافة لمڪتب خاص (freelancer) فڪان صعب اتقبل اقل من ڪدا.
في جواي ما حسيتها شغله بتشبهني و انا طموحي اڪبر من ڪدا ✨ Sky is limit ..
لڪن الغريب بعد مضي الايام بقيت اعتدت الشغل سماع نغمة (عمو محمد ، خالو محمد و لما اڪون بعيد و زول ينادي بتااااع الدڪان🤣) بتحسسني بالسعادة و انا بخدم في المواطن المسڪين (المستهلك) 😂 ..
و اللافت انه شغلي سواء في القناة او الدڪان هو عبارة عن خدمه للاخرين . في القناة لجمهور أوسع أما التاني لمجتمع محدد 🌺 ..
وصلت لقناعة انه عجله الحياة في الخرطوم ڪانت سريعة و نمطية لدرجة اني ما ڪنت عارف انا بعمل في شنو و لشنو مع انه وقتها ڪنت فاڪر نفسي عابر و ماشي صح ✓ .. (ڪنت بعاين بزاوية 5° ڪدا 👌🏼)
شغلي ڪحانوتي فتح افآقي علي عالم السوق العجيب والغريب و انخراطي مع التجار و الرأسماليين ڪسبني خبرة إضافية في شغلي وعرفت مفاتيح الشغل في السوق و انه بإمڪاني واي زول غيري حيعمل قروش من ابسط الحاجات لو بس مشي صح و نزل المفاتيح في ابوابها ..
والعجب لما بقيت بفڪر بالعقلية التجارية في ڪل شيء؛ الحياة بقت أسهل بڪتير و الصرف انخفض شديييييد 📉😂 و مع مرور الوقت عملت الما قدرت انا او حتي أبوي نعمله اثناء وجودنا في العاصمة ..

طلعنا من الخرطوم علي جزئين انا و العائلة مشينا اتجاة و الوالد اتجاة معاڪس و المؤسف بعد أڪتر من سنه وللان ما إجتمعنا و الزاد الطين بلة حالياً إتفرقنا زيادة بسبب ظروف الدراسة و الشغل ، ڪل زول في ولاية (دنيا يا فراقة💔)

بعد وصلنا (ابوجبيهه) نزلنا مع اختي في بيت نسابتها والحال يغني عن الوصف ..
ڪل أفراد الأسرة متلمين بي اولادهم في البيت دا غير النازحين الوصلو قلبنا .. و جينا نحن دخلنا عليهم وبقينا عبء إضافي في البيت لاڪتر من شهرين ..
-
بعد شهرين الزول المؤجرين ليه عقد إيجاره انتهي وطلع من البيت و بڪدا رجعنا بيتنا واخدنا راحتنا و شوية شمينا نفس 😮‍💨 ..
بس الماڪان في الحسبان جلابيه (أبوي) الدخلت فيها
خلال يومين بس بقيت نازح عندو نفسيات وعايز يهرب من البلد لي رب اسرة ممتدة - اختي و اسرتها في البيت 🫨 ..
--
خلال السنه و شهرين الفاتو تضاربت جواي الاحاسيس 🤼‍♂ ..
شعور إني رب اسرة بصورة رسمية 🎖و إلتزامي تجاههم و السعي لارضائهم و نهائياً ما احسسهم بغياب (ابوي) ..
و من جانب شغلي ڪسب زبائن الدڪان و تقديم أفضل خدمات و شراء أجود أنواع المنتجات عشانهم ڪان شعور لا يوصف🕊 ..

و الشيء اللافت هو تنقلي من شخصيتي المفردة (ڪمحمد) و تجسيد عدة شخصيات (أب ، أخ ، صديق ، تاجر ، و مرات سمسار .. الخ
ڪان أحساس غريب يااااخ ✨
و الإحساس دا ڪان بيسعدني و بدخل السرور و الفرحه في نفسي ..

بالنسبة لاسرتي بقو بنظرو لي ڪراجل وما مجرد (جربوع) في البيت دون فائدة و قبل فترة ڪان عايز يهرب 😂😂 ..
طبعاث إحساس انهم بقو معتمدين علي في ڪل امور حياتهم و إني بقيت الداعم لاستقرار البيت فڪل التفاصيل دي ڪانت بتمدني و بتعزز جواي إحساس (الابوة) و الالتزام تجاهم (تجاة أسرتي👥♥️) ..


#MU_ALFATIH

MU | Chit chat pinned «‏حتتصالح مع نفسك لما تعرف إن الناس ما هم إلا محطات في حياتك ، وإذا رجعت بذاكرتك شوية حتتذكر ناس كان يومك ما بيعدي بدون مكالمة أو رسالة منهم ؛ والآن هم خارج حياتك . وإنه نفس الشخص البستغرق كل يومه في التواصل معاك ، حيجي يوم وما حيتذكرك الا لما يشوفك صدفة…»

"ابو حميد اكون واضح و صريح معاك الشبكة دي ما حتشتغل الفترة الجاية من غير جهازك دا لانو هو الوحيد في البلد دي بالمواصفات المطلوبة ..."


محمد انت بليد .. كان تقول ليهو الجهاز دا اقل من 800 مليون ما ببيعه ، انت ما عارف الزول دا منو ولا شنو !!!


بسبب غباء مني و الفلس و بيع الحوجة ضيعت من يدي ربع مليار في بيعه 🙂
Stay tuned

أبهوني تلتاشر بيرومايكس...

غايتو أنا مرزق شديد خلاص في أرض الله الواسعة دي ، مرة لقيت 10 ألف واقعة جنب عامود كهرباء و مرة ( iPhone 5s ) في حافلة و مرة ( مسدس ) النوع البدسو البطل في شرابو في تخريج زميلي في إستاد المريخ و غيرهم الكتير .. أما المرة دي كانت غير ، راكب مع صحبي في موتر و واقفين في الاشارة 🚥 و ركاب الحافلة الجنبا كلهم بكشفو لينا بترقب 👀 و منتظرين الاشارة تفتح بفارق الصبر وكل واحد قافل الشباك القصادة، أظنهم إفتكرونا ( 9 طويلة ) قلت لصحبي عليك الله خش بينا بنص الحلة أرحم لينا من نظرات البني آدمين ديل. مع أني ما إتوقعت منهم أقل من كدة لأني سلفا اتسرقت بالطريقة دي و الموضوع مزعج😤.
أخدنا أول لفة كدة بعد الاصطوب وفي بداية الشارع شفت لي تلفون بلمع في الأرض ؛ وقفت صحبي سريع سريع 😂 قبل أرفع التلفون عرفتو ( iPhone ) من مظهر الثلاث كميرات و الفلاش🤯 ، هبشتي للتلفون أسمع لك صوت الكاميرا ( كلك📸 ) رفعتو وعاينت يمين وشمال مافي أي مخلوق فى الشارع و التلفون شااااذ عديل كدة و الله وما فيهو و لا خدش ، ( حشرت ) التلفون في جيبي و واصلنا مشوارنا للفتيحاب🛵.
_

الشباب شغلوها لي و ملو راسي بالافكار الخبيثة وكلهم أجمعوا أبيعو بي ( 750 مليون 💰) و أعشيهم بعدها 🤦🏽‍♂ ، العاقل منهم قالي " يامان عايز نصيحتي ؟ إشتري لك موتر من الدلالة بتلقي بسعر حنين و باقي القروش إشتري لك منها تلفون و إشتغل دليفري 🛵 والله امورك حتظبط و الشغلة دي فيها حسابات". و أنا بضحك ساي لما شافني ما جادي قالي يازول فكر في الموضوع دا كويس و مد لي التلفون و وقالي ( زوجك ) دا متصل عليك😂 .. عاينت للتلفون و فعلاً المتصل مسجل بإسم ( زوجي 😂🎎) رديت و بعد السلام قالي " إتاخرتكم كدة لية ؟ منتظركم في باب المستشفى من مدة ".
أنا : والله يا الحبيب ناسك ديل إحتمال وصلوا المستشفى و إحتمال لا..
: معاي منو؟!
: معاك ( محمد ) لقيت التلفون دا واقع في الشارع و أنا هسي في الفتيحاب إنتو وين أجيب لك التلفون ؟
: أنا في مستشفى ....
: يا زول خلاص إطمئن تلفونك في الحفظ و الصون خلصو زيارتكم و اتصل علي وأنا بجيك أو هسي ممكن اجيك البتشوفو إنت مناسب و رسلت ليه أرقامي في رسالة نصية .
-
الشباب شبكوني لك إنت ( فارة ، رهينة ، كيشة ، داقس وغيرها ) لما سمعوني عايز ارجع التلفون .
واحد منهم قالي بحسرة " والله تاني عمرك ما حتمسك تلفون ذي دا🙂🙂".
إتجاوزنا الموضوع و فضلنا نتونس و فجأة التلفون تاني ضرب 😶 و المرة دي الرقم بدون إسم ...
رديت وكان صوت بنت بتبكي بهستريا و كلامها ما مفهوم مع البكي ونفسها المتقطع 😐 ..
( يابنت كدي القطي أنفاسك ، تلفونك معاي لقيتو واقع و إتصل علي زوجك ( مسجل كدة ) و سألني عنكم و اتفاهمت معاه و أديتو أرقامي ، أرجعي لزوجك لأنو منتظركم من فترة في باب المستشفى و إطمئي تلفونك في الحفظ و الصون ☺️).
بعد صلاة المغرب إتصلت لي البنت في رقمي و وصفت لي مكان ألاقيهم ، ركبت الموتر ظط لحدي ( خواجة آيسكريم🍦) ، وقفت الإتجاة المعاكس من المحل و إتصلت عليها و شفتها ومعاها بنت بتتلفت فقلت ليها أنا لسه ماوصلت 🤭 ، قطعت الشارع وجيت وراهن ولما قربت ( ووووه👻) ياخ لما صرخن 😂😂 بعدها عرفتهن بنفسي و عرف ست التلفون و أصرت علي بشدة أدخل معاها و عزمتني ( آيسكريم 😋) طبعاً إعتذرت بطيب خاطر و رفضت الدعوة ✉️ ..
بعد إلحاح شديد مدت لي ظرف وقالت لي دا من ( زوجي ) و الله حلف اديك ليهو وقالي لو ماشال الظرف دا خلي لية التلفون😶 ، شلت الظرف و دخلتو جيبي الخلفي وودعهتن و رجعت للشماسة.
ختفو مني الظرف بعد سمعو الكلام القالوا زوجها و اظنهم إفتكروها ( دولارات بقيمة التلفون 💵 ) ، ياخ نبزوني نبذ و مسحو بكرامتي الأرض قالوا لي تفك ( 800 مليون ) من يدك عشان 5 ألف جنية يا * جزء من النص مفقود*🤬🤬...

⭕️ جزء كبير من دماغهم مفقود لأنو الانسان السوي و الأمين ما حيفكر بالطريقة دي ، و هل في رايكم أنا ما فكرت كدة ؟! بس السؤال هل أنا حاستفيد من القروش دي لو بعته و حتدوم لمتين؟ ماهو مال حرام في النهاية ...
اسواء سيناريو إني عادي إشتغل بالتلفون و ادخل فيه شرايحي ويوم يجيني بتاع مباحث وأنا في الجامعة أو وسط مجتمعنا ويقولي دا أمر قبض لانك سارق التلفون دا و بعدها أنا اودي وشيء وين من العار دا !

خاف الله و دايماً فكر بعقلانية..✨🌼
#يومياتي..

11 -11 قالوا اليوم بصادف اليوم العالمي للسناقل

اي سنجل يرفع يدو اي سنقل
هابي نيو عيد ي مسفهويين وانا اولكم✨💔.

بتلقي روحك وسط التزامات و واجبات معقدة جداً ..

قبل اليوم انت لسه بصرفوا عليك و اليوم إنت البتصرف و البتنفق عليهم ..


#أزمات_شباب تكمله لما سبق
Stay tuned - Stay safe ❤️

من التحديات البتواجه اغلبنا في بداية مشوارنا في حياتنا الخاصة و غالباً بعد ما نخلص الجامعه و نبدأ نخطط للخطوة البعدها..
إلا وهي الموازنة و الإستقرار ❤.. رغم مرارة السنوات في الدراسة و إنها استنزفت كل طاقتنا، بنواجه تحدي من نوع تاني، تحدي أصعب و معظمنا حتي أنا و إنت و القبلنا فشلو فيه ..
_
و إنت بتفكر كيف تبدأ مشروعك الخاص بعد خلصت الدراسة نهائياً - معظمنا بكتفي بالبكلاريوس و بعتبرة إنجاز مطلق - بتتفأجا إنو أسرتك بانية امالها عليك ، أمك منتظراك تخلص عشان - حتي لو ما صرحت بيها علانية - ترد ليها الدين و أول مرتب ليها، تحججها أو تجيب ليها عمرة. و إذا ما قالت كدة الحوليك حيقولا، و يردوها ليك يوم ورا يوم حتي ترسخ في ذهنك ..
و دا بختك في ضغط إنك ملزم ، لا فرضاً عليك تستجيب لكلامهم.
من الجهه التانية و هنا بخص الأولاد الاهلم عندهم مشاريع خاصة ، شركات ، مشاريع زراعية ، مولات تجارية ، مدرسة خاصة .. الخ
بنفس الوتيرة أفراد اسرتك و خصوصاً أعمامك بقوليك الجملة الشهيرة ( خلص عشان تسند أبوك في شغلو ، أو تمسك ليه الشغل بعدا ).
_
بتلقي روحك وسط التزامات و وأجبات معقدة جداً🚫.
قبل يوم إنت طالب جامعي و بصرفو عليك - أغلبنا بصرف علي نفسة ذاتياً الوقت الحالي - أما اليوم إنت علي عاتقك مسؤولية تخلف أبوك في شغلة، وترد الجميل لي أمك و تتكلف برسوم تعليم أخوتك الأصغر منك.

فالسؤال❔:-
هل المجتمع الحولنا متناسي حياتنا الخاصة و إنو في يوم من الأيام حيكون عندنا أسرة خاصة محتاجة تأسيس وسعي من اليوم ؟
ولا دي عادات فرضت قصراً علينا ؟
_
بتلقي نفسك وسط موجة من التخبطات و بتمر بعدة إضطرابات أكبر منك إنك تستوعبها ..
بين تلبية متطلبات أسرتك الموزعة من أمك، أبوك و أخوتك و بين متطلبات تأسيس حياتك الخاصة و أسرتك في المستقبل.

رغم إنك إنت أكتر زول عارف إنو فعلاً عليك جميل تردة بطريقة أو باخري يوم ما👁‍🗨.
بس في نفس الوقت بين تنجز لحياتك
وبين تتنازل عن كل شيء وتكرس نفسك و جهدك ليهم ❤️.
و لكن ⛔️
بعضكم قد يراة كخيار مثالي، لكن خطورته أنه - أسرتك - تعتمد عليك بشكل مطلق ولما تستوعب تلقي عمرك وصل 40 و إنت لسه بتفتش رضاهم و ما مشيت خطوة عشان نفسك ..

من جانب عاطفي و حبك لأسرتك ❤️ ، بتقرر تضغط علي قلبك و تقول ديل (أهلي، لحمي و دمي 💔) ماحيقيفو ضدي .
لكن في النهاية تكتشفت إنو كان مستقلين النقطة دي حتي يستنزفوك و في الأخير اللوم عليك لأنك ما كان عندك قرار 😀..

وهنا بحصل نقاش
الأنا العلية بتحسسك بالعتاب لأنك قست أحلامك برضاهم و إنهم قبل كل شيء و تضيف ( كتار غيرك برو أهلهم و في النهاية أمورهم كلها اتيسرت بفضل الله و اتزوجو و عملو بزنس ناجح زي الما حصل شيء)..
و هكذا حتي تكتشف إنة دي نهاية البوست و أنا ما لاقي حل لأني منفمس في الدوامة دي ⁉️


#محمد_بطيخة 🍉
#أزمات_شباب🔥

• توضيح بسيط ليه حذف آخر تسجيل

هباء منثورا

أسوا شعور في إنك تعتاد على التضحيات وتكون شخص معطاء كل الأوقات ولكل الأشخاص ، تضحي بنفسك ، مالك ، ممتلكاتك ، بأحلامك ، وبطموحك .. للبسوي و الما بسوي ..

كرست حياتي عشان شخصية  بكن ليها كل الود و التقدير .. بسابق في الزمن حتى اخلص الجامعة و بحاول اطور في نفسي و إتعلم مهارات ممكن من خلالها اساعدها بالارتقاء بمشروع أحلامها الفضلت تعاني كل حياتها حتى بعد عون الله اتحقق في أرض الواقع💙 ..

اتخليت عن كل شيء وراي بكل رحابة صدر  عشان أقدم كل العون الهي محتاجة دون أي مقابل أو حتي كلمه شكر أو عوائد ماديه ولا حتى منصب في المشروع لمنفعتي الشخصيه ، و راضي جداً اني اعمل بأي منصب حتي اذا كان فراش طالما (هي) مستفيدة  من وجودي ✨

لكن في المقابل لم أوخذ علي سبيل الجد ، كل شيء قدمتة إنعكس سلباً علي ، سمعت كلام غير حميد ، إتعرضت لموجة من الإنتقادات هزتني  نفسياً وجسدياً ومعنوياً ... فقدتني الثقة في نفسي و خلتني أعيد التفكير في البعمل فيه ..
رجعت سألت نفسي (بطيخة) إنت غلطت في شنو ؟ هل أنت سيء لدرجة تكون منبوذ من كل مكان ؟
ولا أنت أفضل من إنهم يستحقوك 💕 !!

بقيت تائه بين دراستي و الخطوة البديتها ، هل ارجع أحلم ذي أي إنسان طبيعي و اخطط لمستقبل ولبيزنس خاص بي و اطوى الفات !
ولا أغمض عيوني و أمشي علي الجمر و اواصل دعمها ؟
أنا ما عارف 💔 والله ما عارف 😣 ..
فقدت المقدرة في إدراك حاجياتي الممكن تنفعني .. بقيت ما بثق حتي في قرارتي وإنها ممكن تضرني قبل تنفعني ..
بقيت زول فارغ من الداخل .. ما عندي رؤيه لمستقبلي ولا حتي لمسار حياتي ..


( ‏خليك مع الناس البتطلّع أحلي ما فيك وبتدعمك وبتظهر ليك الحاجات الحلوه فيك ، ما البتستفزك لحدي ما يطلّع أسوء ما فيك ويقول ليك إنت أصلاً كعب..خليك مع البفرح بنجاحك وبكون مبسوط، م العايزك تفشل عشان ما تبقى أحسن منه أو عشان تكون محتاج ليهو دائماً، خلي دا مَنهج حياتك).

#يومياتي
#بطيخة 🍉

‏مُلاحظ أنه كثير من الشباب بيفكروا لما يقارنوا عائلاتهم بغيرها ، عن أنه والدينهم كان بالامكان يوفروا ليهم حياة مادية أفضل من واقعهم الحالي ، لكن نجاح الوالدين الحقيقي مافي الجانب المادي ؛ بل في تربيتك بالصورة الأنت عليها الآن وهو دا الاستثمار الحقيقي للأسرة الناجحة في اعتقادي ‏ثم حكمك على تجربتهم المادية فيها إجحاف كبير ، لأنك إتجاوزت كل الظروف الكانت محيطة بيهم في صغرك وطيلة فترة نموك ، إضافة إلى أنه ما كل الرزق مال ، في من يرزق بمال ومن يرزق بصحة ومن يرزق بزرية صالحة ‏ثم انك شفت من حياة الأغنياء الجانب المادي فقط ودا طبيعي لأنه دا جانب نقصك و "الانسان يرى بعين نقصه" لكن غفلت عن مشاكل كتيرة عندهم أنت بمنأى عنها ، على سبيل المثال لا الحصر ، مشاكل الورث في عائلات كبيرة أحدثت قطيعة دائمة بين الأخوان ، مشاكل المخدرات والتعاطي غالبها لدى الأغنياء ‏معظم العائلات الغنية فيها مشكلة تفكك أسري ، معظم حوادث الإنتحار تصدر من أشخاص فاحشي الثراء.
الخوف من الفقر ؛ فالغني حريص على زيادة غناه أكثر من حرص الفقير على ايجاد قوت يومه.
قد تقل ساعات نومه في سبيل ذلك ، قد يهمل علاقاته ، أسرته.
‏أفتخروا بوالديكم وأشعروهم بفخركم وحبكم ليهم ، مهما كان تقييمنا لمجهوداتهم تجاهنا ، ما حنقدر نتخيل كم العصوبات والتحديات الواجهتهم خلال حياتهم عشان يوصلوا الأسرة لبر الأمان ، وكمية المشاكل الاتجاوزوها وتضحيتهم بسعادتهم ورغباتهم وعمرهم عشان الأسرة ما تتفكك ويوفروا بيئة سليمة لنمونا.

دور الاب فيه تضحيات كبيرة جداً جداً و ما ساهل إنك تعيش الدور دا

ما يخبئه لي القدر !! ..

لأنك عظيم يا (أبــي)
التعب و الشقاوه والمعافره البمر بيها عشان يوفر لينا الرزق و اللقمة الحلال رحلة ما ساهلة ابدا في وضع قاسي وغير مستقر..

الزيارة المفاجئة

أول زيارة لابوي في مڪتب القناة ڪانت مفاجأة، صوتة وهو بعرفني علي طاقم العمل ڪان ملان فخر و سعادة ، عرفني علي ڪل فرد واحد واحد و بدخل ليهم في مڪاتبهم وهو ماسڪ يدي و بقوليهم طبعا دا ( ولدي الوحيد💕 ).
صوتة وهو بقول الجملة دي بشڪل متڪرر ڪان بنزل علي قلبي ذي المطر و بشعرني بالسعادة و الطمأنينة و في نفسي بقول ياا بختك يا محمد ( انت محظوظ جدا بأبيك✨🌸).
——

واحد من العرفني عليهم أبوي قالي :- ( إنت محظوظ جدا والله بوجودڪ مع أبوڪ بنفس المڪان و طموحڪم و رؤيتڪم مشترڪة لفڪرة ( قناة بادر الفضائية ) و ربنا يحفظ لڪ والدك و يمدة بطول العمر ، إنت محظوظ لانڪ حتبدع جدا في ( إدارتڪ للقناة) و دي فرصة م بتتوفر إلا نادرا ، لما تڪون شغال في اي شرڪة او اي عمل سواء حڪومي او مشتڪ اقل خطا ممڪن يعرضڪ للطرد او المحاسبة و دا غير إنڪ ما حتقدر تبرز مواهبڪ بالشڪل المطلوب وحتي ما بتقدر تنفذ افڪارك و بتڪون مقيد بلوائح و ضوابط ، اما هنا في ( قناة بادر للطفل و الأسرة ) حتي و إنت بتخطي أبوڪ حيدعمڪ لانو عارفك لسة ما إڪتسبت الخبرة الڪافية و جاهل لانو دا مشروع ضخم الانت حاليا بتتعامل معاه، حيڪون عندڪ مساحة لا محدودة للإبداع و بتقدر تبني أفڪارك الخاصة دون قيود .
ببساطة لانو في النهاية ( القناة حتديرها إنت بحسب رؤيتڪ وأفڪارك في المستقبل).

قلت لڪ الڪلام دا بناء علي تجربة شخصية ، انا من نشأت أبوي ما ڪان معاي (متوفي) فڪان كل الحمل في ڪتفي ما لقيت الزول البدعمني او حتي يشجعني علي عڪسك و انا متاڪد 100% لو انا لقيت ولو جزء صغير من الإنت لاقية حاوصل مراحل بعيدة جدا و حاستفيد باقصي طريقة ممڪنة .

إغتنم الفرصة و أطلق العنان لنفسك ...✨

#يومياتي..
#بلاك_يكتب_بحب..

MU | Chit chat pinned «معظمكم مشتركين في قنوات أكبر و أصغر من قنواتي (كشكول سوداني ، MU Chit chat ) .. و أصحاب القنوات الأنتو مشتركين فيها منشوراتهم جميلة وفقراتهم زابطة وأدمنهم مواكبين الاحداث . قنواتي أنشئتهم عشان الفرفشة والضحك وعشان أكتب فيهم يومياتي والمواقف الحلوة والمُرة…»

معظمكم مشتركين في قنوات أكبر و أصغر من قنواتي (كشكول سوداني ، MU Chit chat ) ..
و أصحاب القنوات الأنتو مشتركين فيها منشوراتهم جميلة وفقراتهم زابطة وأدمنهم مواكبين الاحداث .
قنواتي أنشئتهم عشان الفرفشة والضحك وعشان أكتب فيهم يومياتي والمواقف الحلوة والمُرة البتحصل في حياتي وأشاركم جزء من أفكاري وهنا بخص قناة @MUDAILIES .

انشئتهم لانو في يوم من الأيام المنشورات و اليوميات البكتبها حالياً حتكون أجمل ذكريات ❤️.

فالحمدلله والشكر لله علي عدد الاعضاء المهول و رغم انه القناة اغلبها ونسات وخارجيات .
أنا ما بحسب نفسي مشهور او محبوب و تقديمي للمحتوي دي يمكن جزء منكم مستفيد منه وجزء لا.
ورغم عدد الاعضاء المحترم جداً دا ، لكن قليل منكم بعرفني في أرض الواقع.

📌 أنا مجرد شاب من ملايين الشباب السودانين العندهم قنوات في التلي وإذا في يوم لاقيتني حتعرف إنة مافي حاجة مميزاني واني إنسان عادي وبسيط جداََ ما الزول الانيق داك ، لابس أحسن لبس واخر عطر وسايق عربية و شغال بي أحدث تلفون وكلامي منمق ... الخ من الشكليات ، بالعكس حتستغرب من الشخصية الحتشوفها والاختلاف التام بين كتاباتي وبين شخصيتي .
ماعارف أنا بكتب في الكلام دا لية او الدافع وراهو بس عايز اقولكم إني فخور بي وجودكم في قنواتي و فخور شديد شديد والله ❤️❤️ وتاني ماعارف اشكركم كيف😹💔.
بس بتمني تفضلو معاي لحدي ما قدر ربنا يصيب وتكونوا داعمين لي رغم إني مرات دمي ثقيل و كريه وفقري و عندي تصرفات حمقاء و مزاجي متقلب طوالي.
وكتير و كتير من الصفات السلبية الما بقدر احسبها ، و إعتذاري لكل عضو حس مني بضرر أو سوء معاملة وهنا بخص الكانوا بشاركو في فقراتي والحبو يتعرفو علي وانا صديتهم 💔🚶‍♂️.

وفي الاخير ربنا يوفقني أسعدكم وأبسطكم واقدم ليكم محتوي مفيد في العام الجديد دا❤️❤️❤️.

Saturday 26 October 96
Saturday 26 October 24

Happy birthday to Me🎉

الدابي 🐍
الحارس part four

اوووو جوجو حبيبنا الغالي ، والله يا صحبي حالبا حلب تقيل حتي يوم الجمعة شغال عطش شديد 💸
جوجو : محمد الفاتح و محمد الفاتح شنو يا جماعة حاسدني علي شغلي ولا شنو ضاغط عشان خاشي الموسم 🎎😂 ..
محمد الفاتح (شترتون) : حاسدنك اي ... شايفنك بتردم في البضاعة و السكر بالشوالات و امورك طيبة
أقلها شوفنا نحن الغلابة ديل بكيلو باسطة ساي طالما حرمتنا من الكنافة و زلابية الصباح 😤 ..
انا : باسطة شنو يا جعان انت چععع ، هوي شوفنا بشيء ظابط شوال سكر كدا ولا جركانه زيت 😍 ..
شترتون : شوف شوف أي زول بونسه غرضة
جوجو: والدكم و ناسيكم ولا يتامي و بربي فيكم 😒😒
(شترتون) ما كضب القال المال بغير الناس ، خلاص عملت ليك دكان في السوق وعايز تتغتر علينا و تطلعنا يتامي و ملقطين🥹 !!
جوجو : والله تستاهلو لكن الأيام دي مفلس و اشتريت سكر وقاطع كاش ، لكن إن شاء الله الباسطة ما غالية عليكم و بجيب ليكم صينية عديل من (صالح باسطة) 🧇..
انا : البسمعك بتتكلم بقول المصنع حقك !!
شترتون : اقسم بالله يا دوب بقيت تتكلم ذي التجار ر لكن اعمل حسابك ما تركب مكنه الجلابي و تبذر قروشك بكرة إلا نتناوب فيك أنا و ود الفاتح بعامود الغداء في السجن 🤣🤣

جوجو : متذكرين لما دهب (مريفعين🐆) فتح اول مرة وقالو في زول إتفاجاء بكم كيلو 🌟⚖️!!

يلا دا الزول دا كان (صالح باسطة) و أنا كنت ضمن مع عماله الشغالين ورديات ...
شترتون : دقيقة دقيقة يعني هسي مصانع الباسطة دي كلها و التكاتك الماسكة الاسواق توزيع دي كلها من مال الدهب !!
ياخ هسي أنا مفتكر باسطتة زابطة عشان كدا عنده شعبية و فروعة كتيرة ...

طيب (صالح) دا لقي كم كيلو أصلو 🌟
جوجو : والله يا فِرد الزول دا تقول (أم بتاري) بتاع كجور ، لما مشينا (مريفعين) أول مرة كانت خلا ساي و الناس بتحفر عشوائي ساي ..
قبل نبدا حفر عمك (صالح) وصانا لو لقينا أي شيء اثناء ما بنحفر ما نهبشة أو نقتله 🙅🏼.
انا : قصدو شنو باي شيء ولا عايزكم تحفرو لما تصلو يأجوج و مأجوج 🤣🧌 ..
" بعد كم يوم من الحفر و اثناء ما أنا بحفر و بكسر في الحجر لقيت راس حمار 🥶🦓 .. شلت الراس وختيتو في الجردل و الجماعة رفعوا وطلعوا من الحفرة اللحظة الاتلفت عشان ارجع مكان بحفر اشوف ليك( دبيب) أسوووود و طويل ، و الغريب الحته دي الكان فيها الراس ولما رفعتو ما كان في شيء تحته و في اي فتحة أو شق قريب يكون دخل بيه الحفرة 🫨.

انا : ما كتلتووووو !!
جوجو : اقتلو شنو يا زول أنا من شفتو عرفتو جن ..
انا : جن شنو يا زول كان تغززز فيه (العجنه أو الاجنه) البتكسر بيها دي و دي 🔨 في بلفيه ..
لو قتلتو كان جلدو عمل ليك 3 جوز مركوب بمزاج ..
شترتون : شكلو الجنا دا ما عارف مركوب الاصله بكم 🐍 !! يا حبيبنا المركوب سعره قريب 💯 الالف ما شايف ود الفاتح كل مناسبة و جمعه لابس مركوبه الاصله و محشش بيه ✨
انا : مغارز للجماعة 🤣

جوجو : اقتلو شنو والله الحظة الشفتو فيها اتشليت من الخوف و بقيت اعاين ليه وهو ما رفع عينه مني ..
و من الخوفه الدخلت فيني قلت ليه : أنا والله ماني هابشك ولا بقرب عليك بس عليك الله زح شوية ڪدا عشان احفر 😂🥶 ..

جوجو انت جنيت شكلك لما بتتكلم مع 🐍😂!!
اقسم بالله فجأة كدا الدبيب زحف لحافه الحفره ولسه بعاين لي .
انا : عليك الله اتخيل لو قاليك ما زاحي من هنا أو بتحفر لشنو يا جوجو؟🤣🤣
مجاهد : والله طوالي بسأله يوريني محل الدهب لأنو بكون جن و حارسه وعارف محلو ✨🌟 🤣 ..
_
من يومها كل ما نجي ننزل الوردية أول زول فينا بنزل الحفرة بدخل معاة شوال وسبحان الله بفتح الشوال و بقول للدبيب خش عشان عايزين تشتغل و الغريب (الدبيب) بدخل طوالي و نحن بنجره و بنودي بعيد من الحفرة و نهاية اليوم برجع تاني و بقينا شغال كدا لحدي جاء اليوم و البير الشغالين فيها نسبت بالجرامات و امورنا وضحت ..

ناس المنجم لما لقو الخبر كلهم نزلو في البئر (كوماج) و نحن كلمناهم بالدبيب و افتكرو طلس مننا و بتاع ..
واحد منهم شاف الدبيب و طوالي قطع ليك في شاكوش ، والجن ولا كضب إتلف ليك في الزول و خنقو ..
ونحن برة شايفين ليك الناس دي طالعه من الحفرة ذي النمل الطالع من جحر 😂🐜 ..

فيهم الوقع و إتكسر وفيهم كم زول مات و عمك صالح تاني ما حاول يفتح البئر إكتفي بالجرامات الجاتو و رجع ابوجبيهه وسع بيها شغله وعمل معمل و مصانع باسطة ..

شترتون : سيبك من حكاوي الحبوبات و الدراما الرخيصه دي كلها عايز تجيب لينا الباسطة متين ..
انا : متين شنو ديك المغسله قومي جيب ليك 2، 3 كيلو من ياسر و معاك 3 كيزان حليب من حاجة (فاطنه) وتكون ما قصرت لو جبت لي معاك كرت واي فاي 🛜

جوجو : يا زوووول ظط تاني عايزين حاجة !! ..
نحن الاثنين : انت جادي 😍😍😍 !!
جوجو : جادي اي ، أهم شيء أكلو أخوان و اتحاسبو تجار 😉

#الدابــي
#يوميات_تاجر
#MU_ALFATIH

MU | Chit chat pinned «🚸 دايماً ڪنت بسأل نفسي السؤال دا ود الفاتح لما الخرطوم تفتح و ترجع أول حاجة حتعملا شنو ؟! أنتو حتعملو شنو ؟ شارڪوني أجوبتڪم 💭»

نوراية
Part two

غرف الشركة خشبية وصغيرة كدة بقولو عليها (عِلب الكبريت) و مع التكييف بنعدي الليل دا كلو ماشين و جاين من الحمام -أكرمكم الله -
(يومداك) جاتني (بولدنه🤣) نص الليل كالعادة و مشيت علي الحمام و عيوني مغمضة 😞 - يوم حاقع في بير بسبب عيوني دي - ماشي و بطقش ساي يمين شمال
ماشي بالغريزة الفائقة 🔥😂..

وأنا جوة الحمام أسمع ليك صوت الدش 🚿 (ششش) ..
جاني فضول أعرف دة منو البستحم في الوقت دا ..
وقفت جنب الباب و قلت
" الجوة منو ؟!"

ما جاني رد بس بعد لحظات الزول البستحم قفل الدش و سكت 🤐 ..
عدت مسافة قمت فتحت الباب بالجابس كدة 🤣 و طوالي دفر الباب و قفله في وش و رجع فتح الدش و واصل (جلخ 🛀)😆..

قلت أغير النغمة شوية :
يا (قُربة) ما صح تستحم في الوقت دا احتمال يطقك جن و تتشل و بتاع ☠ ..
برضو سفهني

ما كنت عارف السبب المخلاني مُصر حتي أعرف الزول البستحم دا ..
براااحة رفعت راسي أتاوق بفوق الباب
وعيني ما تشوف إلا النور ✨ ..
عاينت من تحت الباب وما شفت زول 😐..

هنا دخلتني خوفة وقلبي شغال دق دق دق 💓🥶
قفلت الدش وجريت الباب و براحه براحه و بقيت ماشي باطراف أصابعي
ما قطعت خطوين إلا وأسمع صوت الدش شششش 👹

و فكيت الجرية Run 💨🤣

وأنا جاري اتعترت و إتكفيت علي وشي 🏊🏽‍♂ فضلت علي وشيء و فكيت (الوااااااااي)
علي القسم هو زاتو بكون إتخلع 😂

دقائق بس و السكن كلو إتلم في الحمام 🤣 ..

ما إتفاهمت مع زول قطمت جوة و برة و الجماعة مسكوه موضوع و ساهرو بيه الليل ..

الصباح جاني واحد من الشباب و هو يضحك ..
من قرب علي قالت ليه يا الحبيب أختاني عليك الله 😑😤

هو " لما فتحت الباب كان بغني ولا بلعب بالدش😂؟"

و أضاف انت عارف في أول ايامي هنا صادفته (الجن) البستحم دا مرتين
مرة كان بستحم و (بدندن🎶)
لحظتها عملت جنس درامات 😂😂..

و عشان زنقة الليل وحتي ما أطلع عملت لي كرستاله 🧪 😂 ..

#MU_ALFATIH

🚸 دايماً ڪنت بسأل نفسي السؤال دا

ود الفاتح لما الخرطوم تفتح و ترجع أول حاجة حتعملا شنو ؟!
أنتو حتعملو شنو ؟

شارڪوني أجوبتڪم 💭

وادي المقرح ...

العباسية ( تقلي ) الجزء الثاني ...

ما إن صحوت في السابعة ، حتي احتسيت بعض الشاي و أكلت بعض من ( اللقيمات ) ، مضيت مباشرة إلي موقف الحافلات. كانت ما زالت تمطر ، مطراً خريفياً خفيفاً تقريباً ، مضيت و أنا اتأمل في تلك الغيمة البيضاء و هي تغطي سفح جبل قريب ، ولكن حين ارتفعت الشمس حمل النسيم الغيمة بعيداً ، و بدأت تظهر الأشجار و التلال.
حملت الحافلة ما يقرب من عشرين راكباً ، وتابعت سيرها علي طريق ( العباسية - رشاد ) صعوداً في الجبال الشامخة ، أعلي من 350 متر عن سطح البحر ، ما إن خرجنا حتي وصلنا إلي مراعي واسعة ، بعيداً في الجانب الآخر ، لمحت بضعة أبقار تسرح ، بين الحين و الآخر ترفرف طيور مختلفة حولنا ، بعضها يغرد في كل مكان.
اجتزنا مرجاً ، عبر شريط من الأشجار ، و عبرنا مرجاً آخر ، كان الهواء في الصباح بارداً ، تطلعت إلي السماء من النافذة و تشممت النسيم . " تقول الرائحة إنها ستمطر " ، ففي كبد السماء غيوم كثيرة تحجب شمس الخريف.

تابعنا علي طول الطريق حيث ممرنا ببعض القري المتناثرة ، بيوت مصنوعة من القش و القصب ، تتسلقها الحشائش الخضراء . حين وصلت الحافلة الوادي ( المقرح ) بدأ السائق يغير اتجاهه إلى هذه الناحية أو تلك ليماشي إنحرافات الطريق ومنعطفاته ، وبدأت أشعر بالغثيان من الارتفاع المستمر . ما زال طعم شاي الصباح عالقاً بفمي ، ومع الوقت بدأ عدد المنعطفات يتناقص حتى شعرت ببعض الراحة ، وغاصت الحافلة وسط الجبال و غابة من الأشجار ، لا بد أن الأشجار كانت معمرة جداً إلى - أنها تمتد فوق الطريق وعلي صخور الجبل ، حاجبة الشمس ومغطية كل شيء بظلالها الكثيبة. فجأة تحول النسيم الذي يهبّ من نوافذ الحافلة المفتوحة إلى نسيم بارد ، تقرص رطوبته الجلد . كان الطريق يحاذي وادي عميق جداً ( المقرح ) ، و اصلنا سيرنا عبر الأشجار حتى بدا وكأن العالم كله دفن إلى الأبد في الجبال و الأشجار ، وعند نقطة معينة انتهت الغابة ، و وصلنا إلى فضاء مفتوح تحيط به القمم الجبلية . مزارع خضراء شاسعة تنتشر في كل اتجاه ، وقد بدا ماء ( الخور ) إلى جوار الطريق رائقاً وصافياً. ارتفع خيط من الدخان الأبيض على مسافة. نشرت بعض البيوت غسيلها ليجف في الشمس ، وكانت بعض الكلاب تنبح ، في كل بيت ريفي حطب وقود يتكوم في الخارج على شكل تلال صغيرة ، وغالباً ما يستريح كلب في مكان ما فوق الكوم . لفترة ما ظل الطريق يمرّ على مثل هذه البيوت ، لكني لم أر شخصاً واحداً ، تكرر هذا المشهد مراراً على هذه الشاكلة . تدخل الحافلة في غابة أخري ، وتخرج إلى قرية ، لتعود إلى غابة أخرى . قد تتوقف عند إحدى القرى لينزل الناس ، لكن ما من أحد صعد أبداً . بعد أربعين دقيقة من مغادرة ( العباسية ) ، وصلت الحافلة إلى ممر جبلي يطل على امتداد شاسع
أوقف السائق الحافلة و أعلن أننا سننتظر عشر دقائق أو ربع ساعة: و بوسع الركاب أن يحركوا أقدامهم خارج الحافلة إذا شاءوا. و لم يكن قد بقي في الحافلة سوي أربعة أشخاص . خرجنا و تمددنا وبعصنا دخن و تطلعنا إلي ( العباسية ) هناك في الأسفل البعيد . ذهب السائق إلي ( نقطة عبور ) لاكمال بعض الاجراءات الروتينية .
بعد حين جاءت حافلة أخري تتسلق من الجانب الآخر من الطريق و توقفت إلي جوار حافلتنا . خرج السائق و لحق بالاخر ، ثم تبادلا حديثاً قصيراً ثم صعد الاثنان إلي حافلتيهما . عدنا إلي مقاعدنا ، و مضت الحافلتان في اتجاهين متعاكسين . لم يتضح لي فوراً لماذا كان يجب علي حافلتنا أن تنتظر الحافلة الآخري ، و لكن بعد أن نزلنا في طريق آخر أسفل الجبل صار الطريق يضيق فجأة ، و لم يكن أبداً بامكان حافلتين كبيرتين أن تلتقي إحداهما الأخري علي الطريق ، بل إن مرور سيارتين عاديتين كان يتطلب الكثيرة من المناورة ، بحيث تضطر إحدي المركبتين إلي الرجوع حتي تجد لها منعطفاً تنحشر فيه .
صارت القري علي طول الطريق أصغر الآن و المناطق المنبسطة تحت الأشجار أضيق. صار الجبل شاهقاً بانتصاب ، بحيث جدرانه قريبة من نوافذ الحافلة . و بدا أن لديهم من الكلاب بقدر ما لدي الأماكن الأخري ، و هكذا أطلق وصول الحافلة منافسة بينها في النباح.
و علي يسار الحافلة نحت الترحيب بأحرف ضخمة علي جدار الجبل ( مرحباً بكم في محلية الرشاد ).

مرحبتين بلدنا حبابا
حباب النيل حباب الغابة
ياها ديارنا نحن اصحابا
نهوى عديلا ونرضى صعابا
نعشق شمسها الحراقة
بتلهب في قلوب دفاقة
نحن شعارنا حب وصداقة
للناس الصفات اخلاقة
مرحبتين بلدنا حبابا

#يومياتي..
#سافرو_تصحبكم_السلامة..🌹

في كل #العلاقات في مرحلة برود بتمر على طرف واحد أو على الإتنين بيحسوا معاها إنو ما عندهم شي لي بعض وإنو الإحساس بينهم تحت الصفر ومرات بالسالب كمان ، الفترة دي هي إمتحان حقيقي للناس لعقلهم و تفكيرهم ومقدرتهم على الإستمرار و إدارة علاقاتهم ، وهنا الحب بيقيف بالجمبة و بيعاين هم ح يسووا شنو عشان روحهم
في اللحظات دي بتبدأ تظهر عيوب زولك
وحتى الانت عارفها ح تبقى ليك ما محتملة
ح تشوف التانيين ظريفين و رهيبين
بل يكادوا يكونوا #مثاليين كمان وإنو نقصهم ده زاتو زي كأنو ميزة إضافية ليهم
الواعي في المرحلة دي ح يعرف إنو
المقارنة هنا ما عادلة لأنو تفاصيل الحاجات بتختلف والأوعى منو ما ح يحتاج يقارن من اساسو ، أما تعيس الحظ ف هو ال ح يجوط نفسو ويخلي تغييرات وظروف المرحلة دي تسوقو بدل ما هو يسوقها و يخليها ترتب بيهو روحها.

لذة الإدمــان ( إدمان )

أيوة أنا أدمنت لعادة جديدة و عادة عظيمة ومفيدة جداً .

في قوله ( ﷺ ): " اقرأوا القرآن، فإنه يأتي شفيعاً لأصحابه يوم القيامة ".


الفترة الأخيرة دي الزمت و أخدت وعد مع نفسي ، حددت لنفسي إني يومياً أقرأ جزء من ( القران الڪريم ) بإنتظام بعد صلاة الصبح ، و يومياً قبل أنوم اقرأ ( سورة الملك و المعوزتين ) حتي بعدها بفضل أستغفر الله و بحمده الي إن أنوم و ڪتير بنوم وما بڪون حاسي أو إني نمت متين 💕 .
إنتظمت مدة أڪثر من شهر ( الحمدلله التوفيق من عند ربنا عز وجل ) ودي الفترة الڪنت مؤجز فيها ، لما نزلت الجامعة و جدولي إختلف و الفترة الصباحية بقت قصيرة وأنا ما عايز اخلف بوعدي مهما ڪان 😤🥲.
أول خطوة عملتها إني غيرت جدولي و بقيت أنوم أبدر بساعة و أصحي قبل الصبح بمدة ڪافية✨.
في المدة دي بتسوك و بتوضيء و بصلي رڪعتين وبفضل في ( المصلاية ) و ببدأ أقرا الجزء بتاعي ڪامل ، الفترة الصباحية الجو بڪون هادئ جداً و زهني بڪون صافي و بالي رايق فا بقرأ بتمعن وتدبر لدرجة إني مرات ما بقرأ أڪتر من صفحتين✨ ، بقيف في ڪل آية ما فهمتها و بطلع علي تفسيرها ومعاني المفردات ( مصحفي بحتوي علي التفسير والشرح 😁).
بفضل في ( مصلاياتي ) حتي قبل الإقامة بي 10 دقائق بقوم تاني بتني رڪعاتي حتي بمشي الجامع و هناك برضو بصلي رڪعتين تحية المسجد.
بعد الصلاة بعمل ( الباقيات الصالحات ) و طوالي برجع البيت و بجهز لمشاويري سواء للجامعة أو غيرها.
_
في يوم الجمعة وانا بڪوي عملت تشغيل عشوائي ( لسورة الڪهف ) في قناة سودانية بالتيليجرام فيها مجموعة من القراء ، اثناء ما بسمع إشتغلت بعض السور بصوت قاريء ما شاء الله تبارك الله .. صوته رهيب و هادئ وتلاوة خاشعة و تدخل الطمأنينة في النفس 💚، فا جاني فضول أعرف إسم القارئ ووقفت ڪل شئ و لما نزلت الستارة إتفاجأت بإسم أول مرة اشوفة ( همام تاج السر ) و ڪانت أول مرة اسمع فيها صوته وبعدها علقت 🙊😂🤍🤍.
فا رفعت الصوت لأعلي مستوي و عملت تڪرار للسورة الڪان بقرا فيها ( سورة يوسف ) ورخيت أضاني عشان إستمتع بحلاوة التلاوة العزبة دي ، أثناء إستماعي دخلت فيني راحه نفسيه ما طبيعية و حسيت بطمأنينة ما عادية و لا شعورياً حسيت بالسعادة وڪانوا ڪل الحمل الشايلة جواي انزاح بالإضافة لترڪيزي المطلق مع قصة سيدنا يوسف علية السلام 🤍🤍.
بعد خصلت شغلتي فتشت لسورة آخري لنفس القاريء (همام تاج السر) لڪن للاسف ما لقيت سور ڪاملة 💔.
لڪني إحتفظت بالمقاطع القصيرة اللقيتها و بقيت إسمعها بإستمرار في الشارع، المواصلات، وبسمعها لما أڪون مضايق لانها بطبطب علي قلبي و قبل النوم ڪمان و مرات دون سبب 💙💙 ..


⭕️ الخلاصــــــــــة

الخلاني اڪتب اليوميه دي سببين 😂❤️

الأول : شعور الراحة و الطمأنينة و السڪينة الوجدتها بإستماعي ( للقران الڪريم ) بشڪل منتظم ، و إني بتدبر في آياتة و معانية و بتعلم من الحِڪم و العبر والقصص المذڪورة فية❤️.
الثاني : إني قدرت أخد قرار إيجابي و ڪان لسة أثر محسوس في حياتي اليومية و الروحية وإني وصلت لقناعة إنو الإنسان هو البضع العقبات في طريقة و بصعبها علي نفسة بالمعتقدات الخاطئة و تجارب الأخرين الفاشلة.

و ما تقول انا عصيت و قصرت في حق ربنا سبحانه وتعالي و خجلان اقيف قدامة 🥺💔💔 ، إنت نسيت الايه دي : ( إن الله يحب التوابين ويحب المتطهرين ) ؟ يعني إنت مهما قصرت وارتڪبت من المعاصي ماتتڪبر وتقول ربنا ما بغفر لي لاني ڪررت المعصية دي اڪتر من مرة وظلمت الناس و غيرها ، ربنا بنفسو قال لينا انو نحن مهما عملنا من معاصي و ڪبار بس تبنا توبة خالصة و استغفرناه حيتوب علينا.

و نصيحتي لك ( ‏رجع المصحف في الشنطة ، و أقرا في المواصلات و أوقات الفراغ ، أقرا في الڪلية ، إستراحة العمل ، المستشفيات و اثناء الانتظار .

[ أروا الله من أنفسڪم خيراً . ولا تجعلوه أهون الناظرين إليكم..]
#MU_ALFATIH 🌺

عَلِّموا أولادَكُم العَقِيدة .. فإنَّها الآن تُنتَزِعُ!

لمن ڪنت في الخرطوم زي الوقت ده ڪان بتڪون وين ؟

"أن يُكتب في نهاية قصتنا أن السعي كان في الإتجاه الصائب، وأن العوض أنسانا ما فقدناه في الطريق، وأننا أخيرًا ولأول مرة شاهدنا تخيلات كل ليلة مُجسّدة أمامنا، نلمسها ونبتسم لا نخشي تبخّرها أو تحولها لسراب، وأن قلبنا صار بمأمن."

10 أشهر كانت كفيلة إنها تغيرني 360 درجة ..

• اوعك ثم اوعك تعلم ناس البيت البيع أو تسعر ليهم الاصناف في الرفوف خصوصاً أبوك و امك .. طلع مشوار اقفل و شيل مفاتيحك 🔑 ..
(الحجاج) عاطفين و بقطعوا ليك الدڪان بحنيتهم الزائدة ..
تحرس منهم واحد ترجع يقوليك جاني عمك فلان اديتو (ڪيلو دقيق ، رطل زيت ، ظرف خميرة و ½ سكر ) ..
قبل ترد يضيف سجل الحاجات دي عندك و يحذرڪ عمك فلان دا  زول ڪبير و الأيام دي مافي شغل و مرتبات اتعامل معاهو ڪويس و بأدب وشايف ڪلامك معاها حار و مافي ٱحترام 😠 ..
و هو أبوك ماعارف انه -فلان دا - اڪبر 🐊 و زايق بدين قديم و ما عايز يدفعه ..
ارح تحرس أبوك من أمك ؛ ترجع من مشوارك بتلقاها دينت نسوان الحله و بعدا مضيفاهم جوة الدڪان وماخدين راحتم في عنقريبڪ 😂😂 ..
- وفي النوع البترصدك لحدي تطلع و بجي يطلس لناس البيت و يحلف ليهم أنه الصنف الفلاني سعرو ڪدا و إنك بتدي ليه بالسعر دا و في الحقيقة انت بتبيعه أغلي من ڪدا هو عارف 🙂 ..

ولو اتوڪلت وفتحت و ما شايف ڪلامي الفوق ما بشڪل ليك عقبة لازم تعمل بنصيحتي الأخيرة دي
- وڪل شافع من الحله يبقي عينك و اذنڪ في الحله ، و دا ما عايز مجهود ڪل يومين ثلاث اقطع فيه قطعة (ڪنافة أو ڪيس فول) يومي بجيك بخبر 🤣💌
-قالو دڪان (محمد خير الغرضي) وقية البن عندو ب 1200 و انت عندك بي 1000 ..
-أم حمودي قالت عِبارك سمح أحسن من دڪان ( حسين) ..
-ومرات النسوان زاتهن بجدعوا ليك خبر دون وعي
(زوجة ڪنترول) بترسليك ا اولاها وفي دڪان جنبها عشان انت بتوزن ليها و المسك و المحلب ..
وبرضو لما تعمل تخفيضات ما تڪلم الأهل أنه الصنف نزل ، ڪلم الشفع أول لانهم عشان باقي التخفيضات بشيلوها هم ودا تحفيز غير مباشرة وغير مضر بالأهل 😂😂😂 ...

الخلاصة لما تسمع في الحله انك زول ڪعب ، صعب أو تسمع مباشرة من الزبون (انت مالك زول ڪعب ڪدا ، هسي 💯 بتغنيڪ !!)
دي شهادة معتمدة إنك نجحت وبقيت حانوتي بدرجة الشرف 🤣🎓 و التجارة ما حتڪون ليك عقبة و بمڪانك تفتح دڪانك في أي مڪان وزمان داخل ربوع الوطن العزيز وسط اي مجتمع 👥 ..

العقبات دي استاندر في ڪل مڪان بس انت بإمڪانك تغيرها وتڪون لصالحك ..

و زي ما بقول المثل
(جوع سنه .. عِرا سنه .. و غني لي جنا الجنا ) 💸 ..

#MU_ALFATIH
#يوميات_تاجر

و بفضل الله و حمده أكملت 10 شهور في التجارة
ودمتم في أمان الله ❤️

الحانوتــي

مهما ضاقت بيڪ الظروف اوعك تفڪر تفتح دڪان .. إياك ثم إياك تفتح دڪان ...
لما حبل أفڪارك ينتهي و ما تلقي غير فتح مشروع (الدڪان) .. خت في بالك حاجتين ؛ و الاثنين بسببهم عادي ممڪن تعلن إفلاسك بعد شهرين بس و احتمال أقل ..

الأولى أوع يڪون دڪان حله (حانوتي) ..
و الثانية يا تعاستك لو ڪان الدڪان في رڪن بيتڪم .. خلاص هنا إنت حڪمت علي نفسك بالمووت 🧟

اول حاجة قبل تبدأ مشروعڪ لازم  تعمل إجتماع مع لجنه الحله و تعلن في الجامع ، ايوة تعلن في الجامع إنك ما حتفتح ڪل الأيام
و الاوقات (24/7 ) 🥲 ..
لو ما فهمتهم ڪدا إنت حتڪون عملت "موافقة لاحڪام و شروط الحله التعسفية ✔️" دون ما تشعر ..
و من ضمن الشروط دي يا (الغالي) إنت ملزم ما تقفل ابوابك و تڪون فاتح السنه ڪلها و تقنع من حاجة اسمها (طلعات) سواء مع الفرد ، لصله الرحم او حتي للأفراح و الأحزان . مااف .. مااااااف طلعات 😤 ..
طبعاً الشرط دا حيڪون ساري لحدي تموت أو تجرد دڪانك وترحل من الحله 🚚 ..

• تاني حاجة إنت ملزم تشتري وتوفر في دڪانك اجود أنواع البضائع المحلية و المستوردة .. وطبعا المستهلك -اللهم ناس الحله- ما بعرفو ليك اشتريتها غالية أو رخيصة ، إشتريتها ڪاش أو بنڪك او (غل -بالدين ) ياخ حتي لو رهنت ليها ڪليتك للتجار أهم شيء عندهم وفرة الاصناف الهم عايزنها في مڪان واحد و بسعر مغري و موازي للسوق غير ڪدا دي مسؤوليتك انت ...
(ولو حلتڪم قريبة للسوق حتعاني من فرط المقارنات بين الأسعار ) ..
- لييييه في السوق بي ألف جنيه بس !!
- أصلو انت دڪاڪين الحله شغالين علي ڪيفڪم ..
ومرات بجيك الزول المتفلهم و يدفع ناقص لما تنادي يا زول قروشك ناقصه 🤨
الزبون : دا سعر الصنف ڪدا ، ما بديك أڪتر مما تستحق 🥰🥰 .. و يمشي يخلي خشمك ملح ملح 🤣

• و أهم شيء ، أهم شيء ما تنتظر ناس الحله يقوليك جيب الصنف الفلاني ، مفروض إنت تشتري قبل ما هم يفقدوة ..
- وانت ماشي في الشارع لازم تسترق النظر للدڪاڪين و تشوف تنوع الرفوف و الاصناف العندهم وإنت ماعندك و تحاول توفرها ..

• اقنع من حاجة اسمها قيلولة .. أيوة دا زمنك الشرعي لڪن لناس الحله دا زمن (مقدس ) دا زمن الجبنات و ضبط الڪيف 🙂‍↕️ ..
و لأنو نص النهار برسلو ليك الشفع و ديل بنسو المرسال و حتضطر تعرف هم عايزين شنو بمهاراتك الفردية 😑
• طبعا في أول ايامك الحلة ڪلها حتتظارف معاك و حتي البيتهم في آخر الحله وبيتهم فيه دڪان بجي بشتري منك و بفردك ..
حتسمع ڪلام مؤسس يرفع معنوياتك و ثناء علي تعاملك الراقي "أسعارك في المتناول ، عِبارك سمح ، بتوفر بضاعة نظيفة ..الخ"
وهنا دا فخ ..
لو بقيت بتتفصل و بتتضحك حتلقي نفسك إشتريت ليك دفتر ڪبير للديون و بعد شهرين ڪل الناس الڪانو برتادو علي الدڪان ما حتشوفهم بعينك و هنا ما حيڪون عندك حل غير تقنع من قروشك بس ..
• اعمل حسابك من جڪس الحله .. اعمل حسابك وفتح عينيڪ ڪويس 👀 ..
الوحدة بتتمادي معاك و تصلك معاك اي مرحله عشان بس تاخد منك شيء مجان أو تخفض ليها في السعر ..
بعد تعودك وانت ترخي ليها جسمك بتبدا مرحله المرتدات ، تاني بتقلع منك قلع ، بتجي تشيل اي حاجة عايزها و ما بتدفع و انت ما بڪون عندك عين تسألا ..
وفي البتجي و تستلطفڪ بڪلام و قصه حزينه و لو صدقت أو لا المهم طالما لقت منك ولو 💯 ما فارق معاها ..

• ونقطة مهمة لو دڪانك في البيت أوعك تعود ناس الحله انك تبيع ليهم بالباب الداخلي بتاع البيت ، لانهم ما حيريحوك نهائي ..
بتعاملو معاك ڪأنك ملزم تخدمهم و بنسو حاجة إسمها ذوق
أول حاجة ببدو بدق الباب و شوية ڪدا الواحد بجر السلك و بدخل توش ڪأنه داخل نادي ولا بيت أبوه 🙂 ..
و في النوع البجيك وبدقدق ليك انصاص الليل و قبل تفتح ببدا يناديك (فلان، يا فلان ) نظام دا أنا جارك فلان و طالما سمعت صوته تلقائيا بفتح ليه لأنو مافي زول بناديك الوقت لو ما محتاج 😑..

مافي طريقة واحده او مسار واحد عشان تڪون صح ! ..
التميز المهني ما مقرون بالكآبة و ما مقرون بالضغوطات والساعات المرهقة و بس ..
هو رحلة ڪاملة من المحاولات المستمرة من الرغبة بالاستمتاع بالتعلم ..
صححوا المفاهيم واسعوا بحب اسعوا لأن الله يرى سعيڪم ويبارڪه💗.

رجعت من صلاة المغرب و لقيت ولد عمر 10 سنوات ڪدا واقف في الدڪان قالي : "ما تخلي دڪانك فاتح و تطلع هسي لو سرقو منه حاجة "
حبيت أدي درس بسيط في الإيمان بالله (طبعاً عامل درابزين في الباب و الشباك 😂)
رديت : طلعت لصلاة المغرب
هو : برضو ما تخلي فاتح 😤
أنا : طيب إنت هسي لما تطلع من بيتڪم و أبوك يڪون قاعد بتخاف علي البيت يتسرق ؟!
رد بثقه "لالا"

طيب أنا لما مشيت الصلاة و اثق أنه ربنا موجود و ححيفظ لي دڪاني 😌 ..
هو : اممممممم و مشي

"يموت البريدو ولا يموت البريدني"

لأنو البريدك بعمل أي شيء عشانك و انت قاعد عزيز مكرم ..
والبتريدو انت بتعمل أي شيء عشانو و عادي ممكن ما يعبرك زاتو ...

قصه حب ما حصلت في المسلسلات الهندية ..
قصه اغرب للخيال بين واحد بلدياتنا وملازم اول دكتورة في السلاح الطبي.

stay tuned

لا أعلم لماذا قد يَحبس الناس الكلمات الجميلة في قلوبهم ، بينما لو نطقوها لأزهرت بساتين الورد في صدورهم و صدور أحبّتهم ♥️

السر وراء صورة البروفايل شنو ؟

مجموعة من الشباب و الشابات رافعين علم السودان و متمسكين بيو بشدة ..
برغم سوء الادارة و الأوضاع الصعبة و الطاحنة في بلدنا إلا و إنو سودانا دا غالي علينا شديد ..
ونحن بإمكانا نغير السودان للأفضل لما نتكاتف مع بعض في سبيل إننا نطلع من الازمات الحاصلة دي بنفسنا دون طرف ثالث خارجي و نرضي بالواقع و أبدا ما نتسرع في إننا نلحق الدول الثانية ...
ما نبدا نقارن بلدنا بي البلدان الثاني لأنو الأوضاع مختلفة كلياً ..
ما يكون مجرد طموحنا إنو نلقي بيئة جاهزة عشان تحتضن طموحنا ، نحن البنصنع و البنخلق الجو المناسب لينا ..

و ذي ما نحن كنا دائما الاوائل و السباقين في الريادة ، مافي مانع إننا نرجع لمكانا الأول ..
كل فرد عارف مدي صعوبة البيئة هنا و إنها أبدا ما خصبة لبناء و تطوير المشاريع الشابة ، فا زي ما قلت سابقاً افكارنا هي حصاد أجيال المستقبل و بدل ما يستفيدو منها الأخرين نستفيد منها نحن بتمسكنا بيها و اخراجها لارض الواقع ..
ما تنتظر الزمن المناسب عشان تبدع ، اخلق البيئة الانت شايفها مناسبة لابداعك و أبدا من هسي و ما تنتظر باكر ...

أعظم تعويض ممكن يمنحه الله للإنسان،

أن يمدّه بالقدرة الكافية على البدء من جديد.

سلام عليڪم ورحمة الله وبرڪاته

إنا لله و إنا إلية راجعون ..
إنتقلت إلى رحمه مولاها جدتي عمه والدي أثر عله مرضية ..

نسأل الله لها الرحمه و المغفرة و إن يجعلها مع الصديقن و الشهداء
و أطلب منڪم الدعاء لها و لسائر موتي المسلمين ..