القصائد المكتوبة للملا مصطفى السوداني

•{يا سلاب تاج حسين}•

يا سلاب تاج حسين...گلي وين لباسه
يگلها التاج شلچ بيه...ذاكه اعلى الرمح راسه

يا يمه...يا أبا عبد الله

١/ گالتله يا سلاب تاج اولدي عمامه
عمامة رسول الله و مفصّله اولامه
گاللها اخذت التاج من راسه گدامه
من النزف ما گام بس حرك اسهامه

شفته امن العطش ذبلان گوه يشهگ انفاسه

يا يمه...يا أبا عبد الله

٢/ وگفت جريب الراس صاحت يسلّابه
هسه انته اخذت التاج ما تترك اثيابه
خليلي ثوب احسين يعوضني بغيابه
گللها هذا الثوب و مدمّه بخضابه

شافت ثوب كلّه جروح صاحت وين عباسه

يا يمه...يا أبا عبد الله

٣/ گالتله يا سلاب دير الرمح ليّه
خليني ابرّد نار گلبي بمعانية
شافت ملامح غير و الهيئة مو هيه
دم و عطش و تراب و الشيبة مدميه

متغير عليها اهواي من حر الظهر جاسه

يا يمه...يا أبا عبد الله

٤/ گاللها درنه اعليه من أربع اكتاره
ما لحگ و يرتاح غاره بأثر غاره
حاول يريد يگوم من عاين ازغاره
و شيگوم المذبوح و مگطع اوتاره

من صد عالخيم حسيت يحچي وياهم احساسه

يا يمه...يا أبا عبد الله

٥/ شافت مره اعلى التل و تگربت ليها
عرفتها زينب هاي من "شبچت اديها"
بنت اكبر من الأم شنهو الجرى اعليها
چا هذا فگد احسين غيّر معانيها

ركضت عالرمح بس حيف ما خلوها حراسه

يا يمه...يا أبا عبد الله

٦/ تلاگن سوى بالنوح أم فاجده و بتها
أم عدها ابن مذبوح و الثانيه اخوتها
بس البنت عالأم فاقت مصيبتها
زينب وراها الشام لمتاني جيّتها

سموهم سبايا الروم شر خلگ الله و ارجاسه

يا يمه...يا أبا عبد الله


*الشاعر الموفق حسين حازم البوشي*


رابط قصيدة "يا سلاب تاج حسين":
https://youtu.be/sf_1-hxw0z4?si=GVxe29RvgFuxPLtL
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{قد دارت الدنيا}•

قد دارَتِ الدُّنيَا بِنَا
حَتَّى حُرِمْنَا بَعْضَنَا
هل أنتِ متِّي أمْ أنَا؟
ويلاه

١/ محتاج أمشي للصحراء
و ابين البشر ما رد
هناك الوادم يگولون
يبچي براحته الفاگد

هناك أصرخ يزهراء وين
و دمعي اعلى الوجه ساجب
تگليلي علي لو موت
غير الكلمة ما رايد

قُولِي عَلِي يا فَاطِمَة
فَالرُّوحُ باتَتْ غَائِمَة
و القَلبُ أنهَاهُ العَنَا
ويلاه

٢/ غمضتي و بدت دنياي
شويه شويه بالظلمه
ردت اصرخ بيا زهراء
شو طلعت الچ يمه

متي ابين اديه شلون
موت المنكسر عظمه
ارتاحي و كافي تنلچمين
من الوجنه المورمه

دَهْراً سَتَبقَى دَمعَتِي
قدْ رَحَلَت فَاطِمَتِي
حلَّ الفراقُ بينَنَا
ويلاه

٣/ شنهو الأصعب امن الموت
سألوا واجذبت حسره
گلتلهم فگد لحباب
و درت اعيوني عالزهره

متعوب و يهزني الريح
مثل ما تهتز الشجره
ما تكتلني طبرة راس
انا الكتلته العِشره

كانَت حَيَاتِي قائِمَة
الآنَ ماتَتْ فَاطِمَة
و المَوْتُ مِنِّي قدْ دَنَا
ويلاه

٤/ تتذكريني يم حسين
من نزرع قبل زهره
و اگلچ أسئلچ بالله
من هو البيكم الزهره

عصروچ و صرت هاليوم
دوه انطيچ للكسرة
و بعمامة رسول الله
أمسح ورمة السطره

حَتَّى انْتَهَى كُلُّ الدَّوَاء
تؤذيكِ شَهقَاتُ الهَوَه
أوجَاعُكِ كانَتْ هُنَا
ويلاه

٥/ تفارگنه بضلع و بشوگ
بس بكربله الملگه
تشوفيني بجهة الخيام
أطفي ايتام محترگه

و اركض بيدي ادفْعِ الخيل
كافي احسينّه تسحگه
و نمشي لزينب إيد بإيد
و نشبگها فرد شبگه

نَقولُ أي وازَيْنَبَاه
نبكِي عَليهَا في السِّبَا
وازَيْنَبَاه يا بِنْتَنَا
ويلاه


*الشاعر الموفق ميثاق الحمداني*


رابط قصيدة "قد دارت الدنيا":
https://youtu.be/x8Ns5HnnVA8?si=mWa9fvgvNLhkQ6Zu
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{دافنلي وطن}•

بعد أمي الحنينه
مو حلوه المدينه
تعبني الزمن...دافنلي وطن
عيّشني بونينه

١/ أمي بسم الله الرحمن الرحيم
أمي خبزة تصير لو شافت يتيم
أمي طيبه و الزمن كلش لئيم
بس رغم كلشي و تگول الله كريم

أمي حچايه حلوه...أمي عيوني تسوه

هاي أم الوفه
و ام العاطفه
هاي اوسع سفينه

٢/ من تدور الدنيه و تشوفك هضم
تعرف الراحه قبل معناهه أم
جروحي كثرة و يا جرح منهن أضم
كسرت الأم صعبة مو كسرت عظم

حنيت الإديها...چنت أغفى عليها

و الله أكبر جرح
من نصحه الصبح
و متصبح علينه

٣/ حگها روحي من تنوح و حايره
بيت ما بيه أمي چنه المگبره
الينهضم بس أمه تجبر خاطره
الفاگد أمه بيش گلي تجبره

الفاگدله وسيلة...يا هو اليندعيله

الحد لحد الترب
يگضيها غرب
و تهمل تبقى عينه

٤/ يمه زينب من يحل وكت الظلام
امن البچي تتعب تره الحد ما تنام
تگلي ليش اگبالي مچتوف الإمام
اتگلي خد أمنه يسطرونه حرام

ما يخلص حزنها...ما يطبگ جفنها

تعبها السهر
موتها القهر
ذبلت بين إدينه

٥/ أمي مو من الضلع ظلت تون
أمي ماتت يوم سمعتها ال—"و إن"
وسفه زوجة حيدر القالع حصن
ماتت و دم أحمر يسيل الجفن

ماتت من قهرها...مو من چف عصرها

ما دام الهضم
واصل للعظم
ما ينفع بچينه


*الشاعر الموفق عباس هابيل الزينبي*


رابط قصيدة "دافنلي وطن":
https://youtu.be/LV-oJP6t_jI?si=UnhP1CdLZOUhOasy
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{نار و حيرة}•

١/ نار و حيرة بگلبي يالزهره
نار و حيرة و فگدچ ايكسره...والله حيرة

هامت روحي و نزلت الدمعة
هامت روحي و ضاگت الوسعه...والله حيرة

يالرحتي من إيدي و كبر ونيني
بيش أرجع لبيتي و خلت يميني
و حدر الثرى عايف عطر حنيني

گاعد أهمل دمعه ليچ و اشتم بالتراب
راح اموت امن الونين من عصرة الباب
گومي عينيني أرد اگوم كاسرني المصاب
شما أريد انهض أطيح مهتوك الحجاب

ويلي يم حسن ويلي
دعيلي أصبر دعيلي
حيدر حاير بدونچ
ضايع و منهدم حيلي

يا فاطمة يم الحسن...كلّميني

٢/ ليل و غربة و حيدر لوحده
ليل و غربة و دمعته بخده...والله غربة

عايش گوه بلا ضوه عيونچ
عايش گوه دنيه من دونچ...والله غربة

لدارچ أطب و يعتلي نحيبي
ما أسمع أهلاً يا علي حبيبي
من يطفي بابچ ينطفي لهيبي

محد بحدي يِفوت يدرون الأرجاس
و عرفوا يكسروني بيچ و اهبّطِ الراس
إيدي مچتوفه و أشوف عتبتي تنداس!
و خلوا أم بيتي تنوح و تلچمها الأنفاس

نوحي ينسمع نوحي
جمرة تسعر بروحي
أوگف أصرخ ببابچ
فاطم أعظم اجروحي

يا فاطمة حيلي ركد من ونيني
يا فاطمة يم الحسن...كلّميني

٣/ صارت وحشه الدنيه وي موتچ
صارت وحشه بلا لحن صوتچ...والله وحشه

يكسر گلبي الجرح البالي
يكسر گلبي مچانچ الخالي...والله وحشه

آنا ادري كلمة أعتذر قليلة
تلگيتي من أجلي جذع نحيلة
و آنا الدفن بيده نعش خليله

آنا قاهر كل عدو خلوني مقهور
راسي أبيض كلّه صار من دمي اليفور
مرت ايدي عالضلع جسيته مكسور
و خدچ أنظرله و اموت يالزهره مسطور

طايح محسنچ طايح
خلفي أسمع الصايح
خلّوا عن إبن عمي
رايح ينذبح رايح

يا فاطمة هذا الجرى و اعذريني
يا فاطمة يم الحسن...كلّميني


*الشاعر الموفق أحمد الهلباوي*


رابط قصيدة "نار و حيرة":
https://youtu.be/Upz5Nsvz0qY?si=gG9YsvnHNKB-fBiB
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{ويلاه يا زينب}•

ويلاه ويلاه يا زينب واويلاه

ليش يا زينب دمعتچ سايله
ليش العصابة لبراسچ مايله

١/ ليش عصابتچ مايله شالسبب
و انتي بت سيد الأعاجم و العرب
خاف دولاب الدهر بيچ انگلب
و عالت اعليچ الأيام العايله

ويلاه ويلاه يا زينب واويلاه

٢/ گالت أم الخدر زينب بالجواب
شرد اگلك عن عظم هذا المصاب
اشحسبت و اشطلع بالتالي الحساب
ابگلبي خيل اهموم ضلت جايله

ويلاه ويلاه يا زينب واويلاه

٣/ بگلبي خيل اهموم فزعت بالطراد
و نزل بعيوني من ابچاي السواد
مالت العصابة من ثگل الرماد
البيهه چفي امن المخيم هايله

ويلاه ويلاه يا زينب واويلاه

٤/ و بعد يالتنشد عن العصابة هاي
البيه عزي و هيبتي و شيمة صباي
مالت بحين الوگع بالطف لواي
الچنت أباهي ابحيل اخوي الشايله

ويلاه ويلاه يا زينب واويلاه

٥/ هاي قصتي و بعد اگلك لو تريد
اجدامي لمت شوك كل هذا الصعيد
ابحبل چتفوني مثل چتف العبيد
و چتفو ابحبل الچتفني العايله

ويلاه ويلاه يا زينب واويلاه


*الشاعر المرحوم طاهر السلامي*


رابط قصيدة "ويلاه يا زينب"
https://youtu.be/X9UIIe66xpw?si=etUClBRyUxsJfkgJ
__
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__
القناة الرسمية للملا مصطفى السوداني على telegram :
https://t.me/Mustafa_Sudane
__

•{محرم الذهب}•

لنشطب...كل جمل
من الحب...والغزل
ونكتب...مستهل
ويبقى الحسين

محرم...اقترب
محرم...الذهب
محرم...عطره هب
ويبقى الحسين

١/الشهر إجه اسمعت
وصفنت ودمعت
ورحت رايه ارفعت...اعله حايط منزلي
أشم ريحة سبي
وركضت لموكبي
أحسّه صاحبي...اليحب أبو علي

أحضّر ملبس الخدمه
واتحزم لبو اليمه
واگولن يا علي الهمه
مثل كل عام عالنيه

أحس ينلچمن جروحي
امن أمسح صور مذبوحي
و اطب لكربله بروحي
امن ادخل للحسينيه

جنوني...بخدمته
عيوني...بصورته
جفوني...لدمعته
اعله طول السنين

٢/ خفگ گلبي أنه
شهر حزني دنه
الاله متاني سنه...قريبًا يبتدي
امن اروح لكربله
الحسين اتأمله
اريد اگول اله...انعم الله سيدي

يالمخليني اخدمنك
ازرعني بدرب حزنك
انه الما شابع منك
اليكتب اسمك و يشهگ

قريب وحاسبك جاري
وتمد ايدك دفو لداري
لو شفتك نهر جاري
اشگ القارب واغرگ

حبيبي...الاولي
ونحيبي...بداخلي
طبيبي...بو علي
اليسمونه حنين

٣/ بمحرم استمع
قصيده بكل فرع
ومسيرات وشمع...حزن ما اجمله
حزن طول وعرض
مشاهد تنعرض
احسّ كل الارض...صفت چن كربله

سواد يغطي الولايه
قرايه تلحگ قرايه
جو حسيني للغايه
تمنيته السنه كلها

حب حسين ابو النعمه
الينزل مطرة الرحمه
حلاة الدنيا بالخدمه
ومواكبنه ومشاعلها

المجالس...للنحر
مدارس...للبشر
تنافس...عالاثر
مع العاشقين

٤/ الاماني بهالشهر
يجينه المنتظر
بحق هوه الگمر...العليه كلشي صفن
متى نركض اله
بچفوفه نقبّله
ونروح لكربله...ونطب سوه الصحن

يا گلبي البعد يكفي
رافع بالدعا چفي
اللهم عجل في
ظهور الطوّل اعلينه

يا قيّوم يا واحد
اظهره البالحزن گاعد
موش لخاطر اي واحد
لخاطر دمعة اسكينه

لظهوره...ننتظر
نزوره...ونفتخر
شعوره...بالصبر
يشيب الجنين

٥/ بعد هذا الشهر
بحزن يقبل صفر
ونروح امن البحر...الى النحر مشي
الگرايب والغرب
گلب لازم گلب
مواكب عالدرب...الحزن بيها احلى شي

نزور حسين نتعنه
مشي امن البيت للجنه
طريقه ما نزل عنه
الغريب وما نسى احبابه

الوسيله حسين والغايه
نروح لگبره مشايه
ورايه تسلم لرايه
مشي الحد لزمة ابوابه

زياره...امن العمر
بمساره...ننتصر
غياره...وللگبر
نجي زائرين


*الشاعر الموفق ميثاق الحمداني*


رابط قصيدة "محرم الذهب":
https://youtu.be/f0Cw5CehBPU
_____
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____
القناة الرسمية للملا مصطفى السوداني على telegram :
https://t.me/Mustafa_Sudane
_____

•{خايف أموت}•

خايف اموت وتخلص سنيني
وهاي السنه ما اخدم حسيني

محرم...أحسب و تاني لجيته
محرم...أحيى و أموت بخدمته

١/ تركض سنين العمر
جدم حافي اعله الجمر
وآنه خايف عمري يخلص هالليالي

خوفي مو من الأجل
ولا أبد فرگة الأهل
خايف مچاني بمحرم يبقى خالي

الله يشهد والنبي
آنه روحي بموكبي
و آنه غير حسين أبد ما عندي غالي

شلون لو لفني الچفن
والمحرم گلبي حن
بالگبر وبلايه خدمه شلون حالي

متعود آنه بنص الولايه
واحد محرم أرفع الرايه
عزائي...شلي بحياتي بفرگته
محرم...أحيى و أموت بخدمته

٢/ كل سنه بشهر الدمع
أبچي والطم عالضلع
رايد أسعد فاطمه بكل ونة اونها

وابچي ما بطل لأن
تحب دمعتي ام الحسن
دمعتي كون الله لا يرحمني منها

والله صعبه انحرم
من البچي ومن اللطم
وما أواسي الزهره يا ناس بحزنها

شلون أعوفن فاطمه
تضل وحيده بمأتمه
وانه مواعدها أظل أبچي اعله ابنها

رايد أساعد فاطمه بهمها
أدري بضلعها هوايه يلچمها
غريبه...وتبچي اعله ابنها وغربته
محرم...أحيى و أموت بخدمته

٣/ اندعي ودمعي يهل
لمن محرم يهل
الله لا يستبدل اسمي باسم ثاني

خوفي لو ذنبي كبر
ما اخدمه هذا الشهر
ويجي خادم غيري انه وياخذ مكاني

سولفتها بدمعتي
الله يدري بنيتي
رغم تقصيري ورغم زلة لساني

أنه روحي بهالعزه
وما ردت كل جائزه
ردت بس ماتنشف دموعي ثواني

خايف أضيع وتبرد جروحي
ويوصل محرم و التهي بروحي
عذابي...لمن افارگ خيمته
محرم...أحيى و أموت بخدمته

٤/ شرف ما بعده شرف
اسمي بالخدمه نعرف
وصارت الوادم تقدرني بسببها

ابد ما مرني الندم
تعرفت بحسن خدم
خوش وادم تخدم حسين بتعبها

لو متت وانه شقي
وعنهم أصبح مفرقي
وبجهنم روحي تتچوه بلهبها

راح اصيح من احترگ
حسين احبك من صدگ
بتوبة الحر روحي اقبلها بذنبها

انه دخيلك يا أبو اليمه
ما عندي غير دموعي والخدمة
رضيعك...اقسم عليك بذبحته
محرم...أحيى و أموت بخدمته


*الشاعر الموفق ياسر المطوري*


رابط قصيدة "خايف أموت"
https://youtu.be/wPsMleDKZE4?si=YsCr9gJruT-zzDth
__
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__
القناة الرسمية للملا مصطفى السوداني على telegram :
https://t.me/Mustafa_Sudane
__

•{محرمنا العشگ}•

إلى من ينتظر بأحر من الجمر شهر يسوه العمر
محرمنه العشگ

بلطم نستقبله هله ومية هله محرم بوصلة
الى الحب الصدگ

١/ وين اليتانون
امن العام المضه من عزّلت كل المواكب
لمعه بالعيون
لمعة بعين عاشگ ينتظر هيچي نراقب
لازم تسجدون
مو سجدة شكر سجدة دمع للزهره واجب

غيرك عوفه اذا عيّد
من هسه البس الاسود
يخلص عدنه رمضان معناه عاشور

البيوت بصدق نية
تتحول حسينية
بينه لخدمة حسين بركان ويفور

مشه گوه الوكت
لمحرم نلتفت
تعال اتأخرت على الحايط ندگ

٢/ ما نلتهي دوم
تفكير الخدم كله عزه ودمعه ومجالس
وانخيط الهدوم
وبالركضه نشگهن بالعشگ علمنه عابس
ما نعرف النوم
شهرين احنه ما نغفه أبد للخدمه واهس

صح طول السنه اللطمه
بس عاشور اله طعمه
كلشي يختلف بيه و النوح و الآه

كلشي يروحله فدوه
حتى الشعر هم أقوه
شنقره فاطمه تصيح الله الله

اجه اكبر السفن
ومنبّه للحزن
يضل بينه يون الى ان نحترگ

٣/ شيخلص الأيام
أصعب شي اذا گلنه اسمنه بلايه خادم
وفرحو يخدام
عندي الكم خبر من هسّه بالأيام قادم
أكثر من العام
عدنه هالسنه أكثر تره تصير المآتم

بكل شارع أكو موكب
ما يبقه شبر يعتب
علگنه السوادات واتگول تشييع

الصعبه تصير اله سهله
فرات نوزعه وي دجله
يخلص عدنه نهرين لحسين توزيع

بعد ماكو ضمه
مطرنه وي السمه
نفرّح فاطمه بنواعي ونختنگ

٤/ عِشره اويه عاشور
العِشره ما تهون الا على الما عنده دمعه
ياربي مشكور
چي عاشور رد وبيه حيل بمجلس أنعه
ما ريد معذور
ما تعذرني اريد الزهره اذا ما بيه فزعه

مهما يحصل ويايه
لازم أرفع الرايه
لو بجنازه محمول أبچي على الحسين

طول السنه امداريني
لازم ابچي لحسيني
اسمك تاج مولاي عالراس والعين

أبو گلب الأبو
منو بگده منو
الي واگف كفو و لا عنه افترگ

٥/ نختمها بدموع
لمن نندعي للغايب الحاضر عزانه
موضوعه موضوع
الله يسهل النه طلعته ويرفع لوانه
ما يعبر اسبوع
الا و تنقري الندبه ونتانيه بزمانه

محرم أحلى بالمهدي
جنه استوه من يبدي
جدي ايصيح عطشان عريان مسلوب

وكلنه بكربله نلتم
نشوف عيونه تنزف دم
شكد باچي على الحسين مولاي متعوب

ويجي اجمل خبر
بحضور المنتظر
سنه يصير الشهر الگلب بسمه يدگ


*الشاعر الموفق حمزة السماوي*


رابط قصيدة "محرمنا العشگ"
https://youtu.be/qKANWD3A73s?si=Iq4PL-iwXdoh2tkn
__
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__
القناة الرسمية للملا مصطفى السوداني على telegram :
https://t.me/Mustafa_Sudane
__

•{يلايم يلايم}•

-أنه الغديري-

يلايم يلايم...خُف لومك عليه
أنا حبي و غرامي...للهادي و وصيه

١/ يفرحة حياتي...صارت أمنياتي
أنا كِملت صلاتي...بحب حامي الحمية

يلايم يلايم...خُف لومك عليه
أنا حبي و غرامي...للهادي و وصيه

٢/ يعيش بضميري...بس حيدر أميري
آنه الغديري...و الحد المنية

يلايم يلايم...خُف لومك عليه
أنا حبي و غرامي...للهادي و وصيه

٣/ أنا واحد كلامي...بس حيدر غرامي
يعشگي و إمامي...يا روح الزچية

يلايم يلايم...خُف لومك عليه
أنا حبي و غرامي...للهادي و وصيه

٤/ أشوفه البداية...و اشوفه النهايه
أجدد ولايه...و الرايه بِدَيّه

يلايم يلايم...خُف لومك عليه
أنا حبي و غرامي...للهادي و وصيه

٥/ أبد ماكو غيره...شيخ النه و عشيرة
وگفاته الچبيره...واگفهن إليّه

يلايم يلايم...خُف لومك عليه
أنا حبي و غرامي...للهادي و وصيه

٦/ يا أول خليفه...غصبا عالسقيفة
و النطفة الشريفة...تحب الرافضية

يلايم يلايم...خُف لومك عليه
أنا حبي و غرامي...للهادي و وصيه


*الشاعر الموفق حمزة السماوي*


رابط قصيدة "أنه الغديري":
https://youtu.be/vBeJeWeFN4I?si=WwBHiKuMSiqqh6MU
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

▪︎{إدفني بيدك يا علي}▪︎

هالليلة لو تحضر إلي
شيعني و قرة بمقتلي
و ادفني بيدك يا علي...هاي المسية

يالبيدك آثار السبي
ريتك تحقق مطلبي
أنصب عزائي زينبي...بالكاظمية

١/عافوني طايح عالسطح محد يهمه غيابي
صح غربة لكن من طحت ما سلبوها ثيابي
بمصابي ثاني كربله بس الفرق بمصابي
ما سدوا اعليه نهر سدوا اعليه بابي

ليلي مثل ليل اهدعش
ريگي يبس من العطش
بس ما شفت جسمي انفرش...بالأعوجية

ظامي بقيت اعلى السطح
بس جسمي ما بيه أي جرح
لا منسلب لا منذبح...بالكاظمية

٢/يالبيدك حسين اندفن لمن دفنته اخبرني
واگف چنت لو منتچي ظهرك عدل لو محني
أتمنى صدري منسحگ حتى امن اگول ادفني
أعضائي تبقى مطشرة و مثله بحصيرة اتلمني

صح جسمي هم مثله وگع
بس گلبي مو نحر انگطع
لا بالرمح راس انرفع...و اختي سبية

ما تلگة بچفوفي حبل
لا ركبوني اعلى الهزل
عالصدر ما ذبحوا طفل...بالكاظمية

٣/أنصب عزائي زينبي و بمقتلي من تبدي
ما تلگه خيمة تحترگ لا عالترايب خدي
ما تلگه تله لا مرى لا حيرة تلگه عندي
و ما تلگه من سوط الشمر طفلة تلوذ بسدي

تلگاني بس طف مختصر
ما عندي طفلة عالنحر
اتشمني و تموت امن القهر... آه يا رقية

ماتت على راس الأبو
و اندفنت بچف الأخو
هم تعرف الليلة شكو...بالكاظمية

٤/غسلني من ماي النهر هالليلة من تلفيني
زينب و ابو فاضل تظل قصتهم اتبچيني
جرحي تشوفه مشرعه بس من تغمض عيني
ما تلگه بعيوني سهم و مگطعه چفيني

آخر ثواني و يحتضر
ما قصر و ظل يعتذر
عذريني يا أم الخدر...گطعوا إدية

مثل اخته من راحت إله
جسمي أريدك توصله
خليني اشاهد كربله...بالكاظمية

٥/أدري اعلى حالي تنهضم عالجسد من اتصلي
تذكر علي الأكبر وگع و بدمعك اتباوعلي
وسدني مثله باللحد و بطيحته سولفلي
جسمه تطشر عالترب حيرة شتريد تگلي

دمعه عمه عيون المهر
مو للخيم رد للشمر
و براسه كل ما ينطبر...ينظر لخيه

يا ليتني وياه چنت
يا ليتني گبله متت
يا ليتني شگد رددت...بالكاظمية

٦/كل عمري من يوم الصرت حزني عليكم دايم
و هالليلة لمن نلتقي ما ندري الله شقاسم
شيعني بيدك يالوفي ماكو وفه بالوادم
و گبري أريده ينحفر يم جدي موسى الكاظم

أنفاسي ظلت تنذبح
تصعد جرح تنزل جرح
راح انشمر من السطح...لحگ عليه

أسرع عليك بفاطمه
حاير و باوع للسمه
هاي الثواني الخاتمة...بالكاظمية


*الشاعر الموفق السيد محمد المنصوري*


رابط قصيدة " إدفني بيدك يا علي " :
https://youtu.be/FakpIGoAkfE
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{علي أول بالحرب}•

١/ علي أول بالحرب يدرونه...علي علي
علي شايل خيبر عله متونه...علي علي
احنه حبينه علي و عشنه بهواه...علي علي
الله خالقنه علمود عيونه...علي علي

علي سيف الله علي
علي يا أجمل ولي
علي غيرك ما إلي
علي علي علي علي

علي بالحومه شحلاته
وعلي من الله صفاته
و لايذه الدنيا بعباته
علي أول بالعشگ

عاشگينه و ماكو غيره
الكون بس حيدر أميره
علي خيمتنا الچبيره
حب علي الحب الصدگ

يا عالي يا ولي
يا قاهر يا علي

٢/ علي فاطر كعبة الله اصياره...علي علي
علي ثار الزهره ياخذ ثاره...علي علي
علي بچفوفه مدارات الوجود...علي علي
علي محد يگدر لفقاره...علي علي

علي ادخيلك يا شهم
علي يمخوف الزلم
علي يا أحله إسم
علي علي علي علي

علي دار الكون بيده
وعلي يوم الحرب عيده
و اسمه المحلي القصيده
علي فارس بالحرب

علي قرآن الجلاله
علي يالمِرعب نزاله
علي يا هيبه وجماله
علي أول بالگلب

محلاتك بالصور
يا گمره و عالنهر

٣/ علي تاريخ المراجل زوده...علي علي
علي حلوه ابياته ما معيوده...علي علي
قيس وين و ميثم التمار وين...علي علي
هاي قصة عشگ ما موجوده...علي علي

علي كل الحب چذب
علي بس حبك عذب
علي هنياله اليحب
علي علي علي علي

علي حبك نزل آيه
وعاشگينك علي هوايه
علي من تشيل رايه
تغلب و ما تنغلب

علي سيفك بالملاحم
ما يخلي اگباله وادم
إنت هيبة آل هاشم
من تطب عله الحرب

يا هيبه و رايتك
محلاها بيمنتك

٤/ علي واجب بالولايه علينه...علي علي
علي انحبه وغيره ما حبينه...علي علي
علي بيت الله وتطوفه الانبياء...علي علي
علي سكان الفلك بيمينه...علي علي

علي موسى من عبر
علي شگاله البحر
علي نور الله وظهر
علي علي علي علي

علي يا شيخ الإمامه
علي المعبر بالقيامه
علي يالعشنه بهيامه
إحنه يم بابه خدم

علي يا رايه ومراجل
علي يرهب من يقاتل
بالحرب عنده ابو فاضل
هيبه لو شال العلم

عباسك مرجله
خالسها الكربله

٥/ علي من الذر عشگنه احروفه...علي علي
علي بالشدات دوم نشوفه...علي علي
علي يفزع باچر بيوم الحساب...علي علي
للموالي من يِشيل اچفوفه...علي علي

علي لو صحنه مدد
علي يحضر بالشدد
علي يا هيبه و أسد
علي علي علي علي

علي بالشدات حاضر
علي اليوم و علي باچر
علي من يشوف حاير
يفزع بيوم المحن

علي يا ثار الزچيه
علي الرايه الهاشميه
إحنه وادم حيدريه
عدنا بس حيدر وطن

يا حيدر بالفلك
الله خالق كلشي الك


*الشاعر الموفق السيد محمود الموسوي*


رابط قصيدة "علي أول بالحرب"
https://youtu.be/ZAwxNdD-uWQ?si=M7secKWZ0WHC-He9
__
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__
القناة الرسمية للملا مصطفى السوداني على telegram :
https://t.me/Mustafa_Sudane
__

•{رسائل إشتياق}•

رسائل إشتياق بلا نهاية
إلى من ساكن بكل الخلاية

يالتجري بشراييني
تره الفرگة تأذيني

١/ ألا يا أيها المحجوب
ترى الفرگة تعور اگلوب
و حيلي امن السهر متعوب

وراك سنيني شمعة تذوب
و لا أملك صبر أيوب
دخيلك رِد عليْ مكتوب

طغه شوگي و ما أتحمل هذا الحال
متى ساعي بريدك يرجعلي بمرسال
كل ليله عيوني تسولف بالدمعات
ترى دنيا بلا وجهك بلا راحة بال

و كالعادة إلك مكتوبي يبدي
شنو تسوى الحياة بلايه مهدي

بدونك موحشة سنيني
تره الفرگة تأذيني

٢/ إذا ما شائت الأقدار
أشوفك و اكحل الأنظار
فإن الموت أهون صار

يمهدي وداعتك محتار
منو العنك يجيب أخبار
و لا هُدهُد يمر عالدار

منو أسأل و يگلي المهدي بيا صوب
منو يلحگ روحي بطارش لو مكتوب
أنا متعلعل من جمعه لجمعه عليك
و صفه مولاي اغروب يذبني اعلى غروب

برضوى أم طوى يالمهدي ساكن
أدورك رايد بكل الأماكن

مكانك ما تدليني
تره الفرگة تأذيني

٣/ رسائل تنكتب كل يوم
من ملچوم إلى ملچوم
تكتل فرگة المعصوم

لون يتسولف المضموم
لبچيها الليالي دموم
أبد ما جاي أشوف النوم

أنا ذاك الباقي بدونك صم اتراب
على ساعه و ياخذ عمري الريح الهاب
أنا صاير ندبة و أقرى الندبة عليك
عسى چفك يالمهدي يدگ اعلى الباب

أتانيك بملامح مو ملامح
غصن يابس بدونك يا بو صالح

ذبل عودي و رياحيني
تره الفرگة تأذيني

٤/ أحبك و اعترف مولاي
ملذات الحياة اهواي
و خاف أتعثر بممشاي

أهم كل الرسائل هاي
أريدك سيدي وياي
دخيلك لا تهد يمناي

إذا كثرت زلات ابن آدم والله
منو غيرك يحتضنه و يوگف وياه
أنا وحدي بهاي الدنيا أخاف اهواي
و ترى والله يضيع العبد بلا مولاه

أخاف الدنيا تغريني بشكلها
و عوفك يا بو صالح و اخضع الها

وحدي لا تخليني
تره الفرگة تأذيني

٥/ أنا الناجي بدمع ذكراك
أنا المذنب إذا أنساك
أنا الراجي أموت وياك

آنا المفتقر بجفاك
أنا العارف ألم فرگاك
أنا الخائف و لا ألگاك

أنا رايد بالحب أجتاز المعقول
تره هذا الحب العاقل مو مقبول
مثلا على باب البيت أكتب يا ناس
منو يعرف عن المهدي اخبار يگول

وصل بيّه الجنون أبعد مراحل
صعب يترجم بكل الرسايل

يمهدي و بينك و بيني
تره الفرگة تأذيني

٦/ بعد بيه بعد بيه
رسائل كلها حنيه
ترى هذا الحچي شويه

أجي و ارد اكتب شبيّه
و تضل تتراجف إيديه
عبد يحچي وي راعيّه

و لا أعرف أعبر يمك لو حرفين
أنا شاطر بس بالدمعة و چلمة وين
يبو صالح و انته الأعلم بالمضموم
بلا ما أحچيلك تقره شتحچي العين

الرسائل تنتهي إلا من أشوفك
تجي و بالسهلة تستقبل ضيوفك

متى بعينك أحط عيني
تره الفرگة تأذيني


*الشاعر الموفق ياسر المطوري*


رابط قصيدة "رسائل إشتياق"
https://youtu.be/J5o8Ms06IUI?si=24KTtjhBPkUjWSEr
__
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__
القناة الرسمية للملا مصطفى السوداني على telegram :
https://t.me/Mustafa_Sudane
__

•{هلا يبن السادة}•

صوت زينب ناده...هلا عمه يا هلا
هلا يبن السادة...هلا عمه يا هلا

هلا يالزودك فخر كل هاشمي
عسكري و زينبي و فاطمي
و صوت زينب ناده هلا عمه يا هلا
هلا يا بن السادة هلا عمه يا هلا

١/ انهض بغيرة علي خل تشوفك ناسي
خل اگولن إبن اخوي عمه و ارفع راسي
هلا ياللي بدم وِريدك يجري دم عباسي
يلا شد اعلى النواصب يا شريك انفاسي

هلا يا بو الغيرة...هلا عمه يا هلا
الكون خله بحيره...هلا عمه يا هلا

و گوم و ارفع بالزعل فقارك
عمه وِ اخذ من النواصب ثارك

و صوت زينب ناده...هلا عمه يا هلا
هلا يبن السادة...هلا عمه يا هلا

٢/ گوم...يا مُحيي الشريعه خل يِطِخ عاليها
و حشّم العباس عمك خل يِرِدّ اعليها
الحومه مِنتظره وُجودك سيفكِ ايحليها
من تشب نيران يومك يا هو اللي يطفيها

و الهلاهل تحله...هلا عمه يا هلا
و العدونا نذله...هلا عمه يا هلا

يلا يا ضنوة علي حبل المتين
يمته تصرخ يا لثارات الحسين

و صوت زينب ناده...هلا عمه يا هلا
هلا يبن السادة...هلا عمه يا هلا

٣/ صد يبِن صگر المَنايا الكون يصبح عيدك
شد يمن سيف أبو الحمله يحلى عمه بإيدك
ذيچ راية أبو فاضل عالنهر وِ تريدك
كربلا يا كربلا هيّه ملعب صيدك

و خزرت البعيونك...هلا عمه يا هلا
بعمك يشبهونك...هلا عمه يا هلا

و گوم ردّ اعلى الزنود چفوفه
ايده بيدك من تطب للكوفه

و صوت زينب ناده...هلا عمه يا هلا
هلا يبن السادة...هلا عمه يا هلا

٤/ گوم چم عين بغيابك بالدمع سهرانه
گوم صيح الله و محمد و علي ويانه
گوم خلّي العزم سيفك ينحني العادانه
الما قبل جدك خليفة عمه گص السانه

صيح و الكل سامع...هلا عمه يا هلا
أول و مو رابع...هلا عمه يا هلا

انهض بزودك و شيل الراية
تزحف الشيعة الك مشاية

و صوت زينب ناده....هلا عمه يا هلا
هلا يبن السادة...هلا عمه يا هلا


*الشاعر الموفق السيد رضا آل بوشوكه*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
رابط قصيدة "هلا يبن السادة":
https://youtu.be/e0rpbk9J96U
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{ترضيني الزهره}•

تزعلني الدنيا و ترضيني الزهره
و أشعر تنظرلي بعين المنسطره

امن أنخاها كون..أبقى أنتظر
تمشي اعلى كيف..امن الكسر
ترضيني الزهره

١/ امن أنخه الزهراء تحضر بس محنيّه
و لو طحت ببير يوسف تفزع ليّه
كسر الضلع اتعوفه و تلزم بيّه

أنا والله لو ضيع بليل و صحراء
إلي توگع بوصله من إيد الزهراء
و على ماي أعثر بس مو عين إسماعيل
نهر الزهره و بثواب حسين الماء

عشت برحمتها و ترست إيديّه
هاي أم حسيني و ام الحنيّه

ديرة حنان..بيها اشكثر
تمشي اعلى كيف..امن الكسر
ترضيني الزهره

٢/ أطلب منها الحاجة واشعر مخنوگ
أتخيلها امن اتمد چفها المحروگ
يا باب اشلون اعليها بنارك مطبوگ

شنو إحساس التگدر تسند إنسان
و هي من توگف تتسند عالحيطان
و شنو هالزهراء اللي تفرح الخدام
و هي گضّت دنيتها ببيت الأحزان

مهظومة و ماتت يا ويلي اعليها
عكازة و سبحة چانت بيديها

بعز الشباب..تسكن گبر
تمشي اعلى كيف..امن الكسر
ترضيني الزهره

٣/ هيّه المثل الزهره يسطروها شلون
تخيل لزمت خدها و مدمعه اعيون
وگعت من السطره نحيله يگولون

منو سائل ليش الزهره معصبه الراس
لكي تغطي العين الضربوها أرجاس
و تره موت و لا عيشة مكسور ضلوع
ضلعه يبچيه كلما يشهگ بالأنفاس

شلونك گالولي المهضوم شلونه
آنه العالزهره تظل تجري اعيونه

من المصاب..ما ظل صبر
تمشي اعلى كيف..امن الكسر
ترضيني الزهره

٤/ لو ما تستر شلتك يا باب الدار
أذكر كلما شوفك بالزهره شصار
و اعتب عالنجار الناسي البسمار

إذا محروگ الباب البسمار شبيه
انغرز و راح بگلب الزهره يچويه
و هوى محسن و تخيل گلب الزهراء
لمن تشوفه معفّر و تون اعليه

زينب تندهله بدمعتها التذبح
محسن أخ ثالث أول آخ أصبح

بعده تروح..درب الأسر
تمشي اعلى كيف..امن الكسر
ترضيني الزهره

٥/ احساسي يگلي بالمقتل من أقره
بالروايه الأولى ميته الزهره
حرمه و طيحوها من أول عصره

الجره عالزهره بلحظات يريد اسنين
عصر و صفعه و ضرب اسياط بمتنين
ركض الأمه و شاف الضلع المكسور
و بده يعطش و يأذنّه اضلوع احسين

حسين الخياله من تهشم صدره
يسحگون و يندب ويلي اعلى الزهره

عالأم ينوح..ذاك الظهر
تمشي اعلى كيف..امن الكسر
ترضيني الزهره


*الشاعر الموفق ميثاق الحمداني*


رابط قصيدة "ترضيني الزهره":
https://youtu.be/qbsL-1XWoZE?si=8ItWzArExKQgLSHf
_____
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____
القناة الرسمية للملا مصطفى السوداني على telegram :
https://t.me/Mustafa_Sudane
_____

•{ضلع واحد يا علي}•

ضِلِع واحِدْ يا علي اوْ هَدْ حِيلَكْ
چا ضْلوعِ احْسين شِتسَوِّيلكْ

١/ يا علي اعْلَى الزَّهرَه گَلْبَك مِنْفِجِع
وِ الضِّلِعها دْموم هَلِّيتِ الدَمِع
شلون بيكِ وْ كَرْبلَه مو بَسْ ضِلِع
ضلوع ظَلَّت يا علي تومِيلَك

٢/ حِيلَكِ الثَّابِت تِضَعْضَعْ وِ انْهِدَمْ
و صَبركِ العَمْلَةِ البِسْمارِ انْثِلَمْ
چا بْگلبِ حسين لو شِفْتِ السَّهمْ
يا صَبُر يا حيلِ اليباريلَكْ

٣/الزَّهرَه ماتَتْ مِنْ سِمَعْتِ الكِلْ يِصِيحْ
عَلَى وَجْهَك صِرِتْ مِنْ حِزْنَك تِطيح
شِنْهو حالَك لو شِفِتْ إِبْنَك ذِبيح
و بويَه إِحْضَر زينبِ تْنَادِيلَكْ

٤/ إيدَكِ المَرَّتْ عَلَى ضِلْعِ البَتولْ
و مرَّتِ عْلَى ضلوع أَبو اليِمَّه الخُيولْ
لِيش يَمْغَسِّلِ المَظْلومَة نِگولْ
ما جِبِتْ لِحْسين مِن تَغْسيلَك

٥/ لَوَنْ گِلْنَه بْيومْ هِظْمَوا فاطِمَة
بالوِصِيَّة مچَتَّفِ و حُكمِ السِّمَه
ما موصَّه بزينَب و رادَتْ حِمَه
عَنْها شِيمِنْعَك يَحامي دْخِيلَك

٦/ عَلَى ضِلْعِ الطَّاهِرَه البابِ انْطُبَگْ
و چَم ضِلِع لِحْسينْ بالخيلِ انْسِحَگْ
و لَوَن بابِ الدَّار بِالنَّارِ احْتِرَگْ
إِگْصِدِ الطَّف وِ الخِيَمْ تِحْچيلَكْ

٧/ إٍنْتَ بيدَك چَفَّنِتْ أمِّ الحَسَنْ
و ابو اليِمَّه الذَّاري  فَصَّله الچِفَنْ
بيدَكِ الزَّهرَه جِسِم إِلها انْدِفَنْ
و ابو اليِمَّه بْلا دَفِنْ نِشكيلَكْ

٨/ إِنشالْ نَعْشُ امِّ الحَسَن بِيدَكِ بْلِيلْ
و راسْ شِبلَك شايِلَه الرُّمْحِ الطِويلْ
جِسْمَه عالغَبرَه و نِزَف دَمَّه يِسِيلْ
وِ اخْتَه تِصْرَخ خويَه مِنهو يْشيلَكْ


*الشاعر الشيخ وسام الشويلي*


رابط قصيدة " ضلع واحد يا علي " :
https://youtu.be/PRzSOTcKQA4
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane

•{عفتيني أحترگ}•

كل مغربية اعيونچ
تاخذني مدري اليا وطن
كل مغربية اعيونچ

و ادري الهجر مو لونچ
و عفتيني يا أم الحسن
و ادري الهجر مو لونچ

ليش...يا أول عشگ
ليش...عفتيني أحترگ
و ادري الهجر مو لونچ

١/ بعد الغياب...عيني عالباب
و النفس بالگوه أشهگه بذاك الغروب
دمها و النار...ظلن آثار
و ذكره عالباب لعلي من أغلى محبوب

و كلما أفك باب الهجر
ينشدني كل شامت يمر...حيدر سلامات

و آنه أسكت و يحچي الدمع
عن فاطمة و كسر الضلع...ماتت حرامات

و بالفرگه يوميه انذبح
و احتار أسولف يا جرح...كلهن عزيزات

تاخذني و ترد بيه
كلما تهب ريح الهجر
تاخذني و ترد بيه

و يتعثرن بالريه
أنفاسي كل مغرب يمر
يتعثرن بالريه

ليش...گلبي ما يدگ
ليش...عفتيني أحترگ
و ادري الهجر مو لونچ

٢/ للدمع كون...فزعت اعيون
لأن ما ظلت بعد عد حيدر اعيون
هنّه خطوات...و حگه لو مات
الشايل اجنازة عزيزة فوگ المتون

جنّاز بالزهره رحت
و كلما أريد أوگف طحت...يم عتبة الدار

شايل على اچتافي السمه
ما چني شايل فاطمة...و چان الدمع حار

مثل المضيعله ولف
بديره و شحيحه من العرف...حيره المن اندار

من الهجر و ايامه
گمت ارسم الخطوه ابدرب
من الهجر و ايامه

و طبع التموت أحلامه
ما يشفه جرحه البالگلب
طبع التموت أحلامه

ليش...تالي نفترگ
ليش...عفتيني أحترگ
و ادري الهجر مو لونچ

٣/ ابدمع العيون...صاحت أم عون
بويه من الفرگه صاير چنك اهلال
و التجاعيد...بلا مواعيد
الشيب ما خلّه اعلى حالك چلمه تنگال

مجبوره أسد باب الدمع
و ما سولف بكسر الضلع...لا زينب اتموت

أسكت و احسنه حلم
بالفرگه باچر ينرسم...بعيوني تابوت

و دمعاتي عالخد تنقره
و صرت ابطريق المگبره...يوميه زاتوت

يم اللحد و ترابه
كلما أسولف عالهجر
يم اللحد و ترابه

يوجعني حيل اعتابه
و اتبده شيب اعلى الگبر
يوجعني حيل اعتابه

ليش...نتفارگ صدگ
ليش...عفتيني أحترگ
و ادري الهجر مو لونچ

٤/ آنه ابو تراب...الجرحه ما طاب
و آنه ذاك الباگوا من عيونه الأحلام
و آنه سويت...للحزن بيت
و عايش اعلى الله كريم و تگضي الأيام

ما عدها ذرة مستحه
و دارت مثل دور الرحه...بالفرگه دنياي

خلت علي اعيونه اتهمل
و يدور ابكل دمعه خل...و ايرد بلا راي

و يوميه اخط اعلى الدرب
يا فاطمه و يدري الگلب...ما ترجع وياي

ليليه دمع اعيوني
عالباب يرسملي صور
ليليه دمع اعيوني

الله اليكون بعوني
چم ضلع للزهره انكسر
الله يكون بعوني

ليش...بابي بيه حرگ
ليش...عفتيني أحترگ
و ادري الهجر مو لونچ

٥/ بوحشة الدار...المن أندار
و آنه يامه و يامه تربي اعيوني عالباب
بلكت أحلام...بلكت أوهام
بلكت الله افراگها و لن حلم چذاب

ما مش اسوالف للهجر
و لا مات حيدر عالگبر...من بعد الوداع

و لا غابش بذاكه النعش
و لا طول فاطم تنفرش...و ملامس الگاع

و ما بين دمعات الخجل
و ما بين نظرات الزعل...حيدر علي ضاع

الشايلها دوم بروحي
ما لايگ اعليها النعش
الشايلها دوم ابروحي

الچانت دوه لجروحي
شو خدها بالگاع انفرش
الچانت دوه لجروحي

ليش...گلبي ما يطگ
ليش...عفتيني أحترگ
و ادري الهجر مو لونچ


*الشاعر الموفق علي الأكبر الغرابي*


رابط قصيدة "عفتيني أحترگ":
https://youtu.be/WtznqBcJnlc
_____
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____
القناة الرسمية للملا مصطفى السوداني على telegram :
https://t.me/Mustafa_Sudane
_____

*{من فاطمٍ للمهدي}*

تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ

١/ فَمُ الأرزاءْ ... مِنَ الزَّهراءْ
يُنادي القائِمَ المهديَّ يا إبني

أتى الكُفار ... لحرقِ الدّار
و ضربًا موجِعًا قد أشبعوا مَتني

و أشقاها ... أترضاها
بكَفٍّ صلفةٍ قد نالَ من عيني

و مُحْسِنُ غاب ... على الأعتابْ
برفسةِ ظالمٍ قد طاح من بطني

يا غيرَة الجّبارِ ذا كُلّهُ قدْ صارْ
و فوقَ حرقِ الدّارِ قد قيّدوا الكرّار

وغدٌ حقيرْ ... قادَ الأميرْ
بالأدمُعِ الحمراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


٢/ أيا أُمّاه ... غدًا والله
بثاراتِ الضّلوعِ سيعتلي صوتي

يكونُ الثّار ... على الأشْجار
سأصلبُ جُثَّةَ الطاغوتِ و الجبتِ

فقُرّي العَينْ ... إلى الضّلعينْ
سأكسِرُ ألفَ ضِلْعٍ عندما أأتي

أنا حيدَرْ ... و هُم خَيْبر
و كَفّي سوفَ تقلعُهُم إلى الموتِ

ثارُ الجنينِ المُحسِنْ ، يلوحُ في عيني
غدًا سآتي مُعلِن ، للثارِ بالحُزنِ

فوقَ العَلمْ ... خطَّ الألَم
بالأدمُعِ الحمراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


٣/ مِنَ اللحدِ ... إلى المَهدي
لقدْ قالَتْ بتولُ اللهِ بالحَسْرة

على زندي ... و في خَدِّي
علاماتٌ إلى الضربِ و للسطرَة

و هذا البابْ ... عليهِ خِضابْ
أيا إبني خِضابٌ مِنْ دمِ العصرَة

و في الأسماعْ ... مِنَ الأضلاع
يرنُّ الصوتُ وا لهفي مِنَ الكَسرَة

بُنَيَّ عَجّل عَجّل ، بالسيفِ و الصَّارمْ
بالصّوتِ قُلْ بل زلْزِل ، إنّي أنا القائم

قمْ يا إمام ... و ابنِ المقام
بالأدمُعِ الحمراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


٤/ إِليها قالْ ... أنا الزّلزالْ
و صَوْلاتي غدًا كالمُرتَضى جَدِّي

يرَاني النّاسْ ... كمَا العَبّاس
و صَوتي حينَ تكبيري كما الرَّعدِ

و هذا الثارْ ... من المِسمار
سأطلِبُهُ و أطلبُ لطمَةَ الخدِّ

أيا فاطِمْ ... أنا القائم
و وعدي قائمٌ يا سورَةَ الحمدِ

على أهالي الشرِّ ، إنّي أنا كالمَوتْ
و عن حلولِ الثّأرِ ، لا لن يفوتَ الفَوْت

لو يبقَى يوم ... حتمًا أقومْ
بالأدمُعِ الحمراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


٥/ أيا إبني ... أنا إنّي
على إبني الحُسينِ و ثارِهِ أنحبْ

و ذا هَمّي ... على غَمّي
سمعتُ بأن زينبَ مَتنها يُضرَبْ

و ما مِن حُرْ ... تُقادُ الطُّهر
بحبلٍ بينَ أرجاسٍ غَدَت تُسْحَب

و بالكفِّ ... ووا لهفي
تُسَتِّرُ وجهها بِنتُ العُلا زينبْ

أهمُّ ثارٍ عندي ، ثارُ ابنيَ العباسْ
لا تنسى ثارَ الزّنْد ، يا سيّد الإحْساسْ

همُّ الطّفوف ... حولي يطوفْ
بالأدمُعِ الحمْراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


*الشاعر الموفق محمد الصفار القطيفي*


رابط قصيدة "من فاطمٍ للمهدي" :
https://youtu.be/JnMEJuyAog8
______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______
القناة الرسمية للملا مصطفى السوداني على telegram :
https://t.me/Mustafa_Sudane
______

*{تمنيت}*

تِمَنِّيت...أزورِ اللِّيلَة سَامرَّة
وِ الأنفَاسْ...تِتنَفَّسْ هَوَى الحَضرَة

١/روحِي تِتْمَنَّة تِشِمْ رِيحَة تُرُبْهُمْ
شوگِي أوْسَع صَارْ وَ اطْوَلْ مِنْ دَرُبْهُمْ
الله يِعْلَم مِن كِثُر مَا صِرْتَ احِبْهُمْ
تِلْمَعِ ادْموعِي مِثِل لَمْعَةْ گُبَبهُمْ

وِ الفرَاگْ...مِحْبَسْ ضَيَّعِ الشَّذْرَة
وِ الأنفَاسْ...تِتنَفَّسْ هَوَى الحَضرَة

٢/لَهفِتِي لَحْبابِي مِن يُوصَف ألَمْهَا
چَنْهَا كِلْمَةْ أخْرَسِ اوْ مَحَّدْ فِهَمْهَا
بلايَه حُبْهُم هِيبِتِي يِزْغَر حَجِمْهَا
كِل مَنارَة تِفْخَرِ ابْهِيبَةْ عَلَمْهَا

بِالعْيُون...إلْهُم بَيِّنَتْ حَسْرَة
وِ الأنفَاسْ...تِتنَفَّسْ هَوَى الحَضرَة

٣/وَصِّفَوا لِبْنِ الحَسَنْ سِرْدَابَة جَنَّة
اتْمَرْكَزِ ابْأربَعْ مَرَاقِدْ يِحْتِوَنَّة
مَرْقَد أمَّه و عَمِّتَه وِ الهَادِي وِ ابْنَه
و ألِفْ هِنْيَالَه الگُصَدْ وِ اسْتَقْبِلَنَّه

وِ اليْزُور...بِيهُم يِعْتِلِي قَدْرَة
وِ الأنفَاسْ...تِتنَفَّسْ هَوَى الحَضرَة

٤/السَّيِدَة نَرْجِسْ لَوَنْ أوصَلْ لَحِدْهَا
مَا أرِد إلَّا و أشِمْ رِيحَة وَلَدْهَا
وِ الدّعَاءِ الفَرَجْ أقْرَا و مِنْ بَعَدْهَا
أگصِدِ العَمْتَه حَكِيمَة و أدْعِي عِدهَا

البُعُدْ طَالْ...يَرَبِّي عَجِّلِ بأَمْرَه
وِ الأنفَاسْ...تِتنَفَّسْ هَوَى الحَضرَة

٥/ألِف هِنيَالَه الگُصَد حضْرَة إمَامَه
فاطِمَه تجَازِيه وِ اتْرُفعَه لْمَقَامَه
مُخْتَصَر موضُوعِي عَن هَايِ الخِدَامَه
بغِير أهْلِ البِيتْ مَا عِدْنَه كَرَامَه

وَ لَيْضِيعْ...تَعَب كِلْمَنْ أخَذْ أجْرَه
وِ الأنفَاسْ...تِتنَفَّسْ هَوَى الحَضرَة


*الشاعر الموفق السيد محمد المنصوري*


رابط قصيدة "تمنيت":
https://youtu.be/IQ8fRu4cj_U
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{بويه حبيبي}•

بويه حبيبي...آنه بنيتك...اسال عنك
شيخلصهه...وللشام اوصل...حتى احضنك

انت مواعدني
ترجع تاخذني
استعجل موتني...بويه حبيبي

١/تذكر من طبيت الخيمه...وزينب كعدت وتداويك
من كلتلهه شويه واوكع...هيه شجانت شتحاجيك
من كالتلك عدنه ازغيره...واكثر وحده تموت عليك

جا هيج اتسافر
من حضني لحافر
خلاني العاشر...بس ثوب وصوت
بويه اتلاحكني
فكدك هالكني
ارجع شابكني...مو كافي تموت

انت كلتلي...انه اجيلج...وانه بمنحر
انه انتظرك...فدوه عليه...لا تتأخر
يمطيح جفني
هم تتذكرني
استعجل موتني...بويه حبيبي

٢/ما شفتك من صارت ركضه...وما كالو راسك منحور
بس هسه اتفاجئت اكبالي...راسك فوك ارماح يدور
ولحيه الجنت بأيدي الزمهه...بيهه رماد من التنور

مو بس اهدومك
مسلوبه ارسومك
يومي الوي يومك...جا يمته ايحين
بعدك اذوني
بكد ما ضربوني
مسدوده عيوني...ضليت اونين

من حركونه...ناديت شكد...يابويه اكعد
الخيمه جبيره...وانه زغيره...بالكوه اشرد
فكدك غيرني
اهواي امكبرني
استعجل موتني...بويه حبيبي

٣/من هديت ايدي لحد هسه...بس تهد دموع العين
ومن كد ما امسح بدموعي...ما ضل ردان وجفين
زينب عمتي احتارت بيه...اكبالي وتسال راحت وين

نتراكض كلنه
و كدامك طحنه
چا غير انت احنا...جوتنا النار
يا دلالي الطف
بالحال وتعرف
يا سوط الاشكف...واجفوفي ازغار

يمعودني...تنزل ليه...اتضمني لصدرك
رمحك عالي...انزل بويه...وضمني لنحرك
ردتك تحضني
حتى اترجعني
استعجل موتني... بويه حبيبي

٤/من الطف مطفيه الدنيه...وبعدك كل الوادم ليل
عشره الخيل السحكن الصدرك...اعليه ايركضن نفس الخيل
ما عنده بنيه بكد عمري...المن اوكع ويصيّح حيل

ادري اليتيم
الوادم بي ترحم
شو انه اتشتم...تسمع يحسين !
شيكضي الفركه
ويصير الملكه
كلبي ايطك حكه...اشافت هالعين

شوف الدنيه...شلون اندارت...كلمن جرحه
تقبل بويه...انته بصفحه...وانه بصفحه
احجيلك ذني
وما تسال عني
استعجل موتني...بويه حبيبي

٥/امشي بسرعه ولو مجتوفه...نتشاوف هاي الايام
كلت الشام البي النتلاكه...كون اليوم نطب الشام
مرات اصدق من الواقع...يابويه تصير الاحلام

الموعد باحلامي
ضامي ايضم ضامي
وتكعد كدامي...وتاخذهه الروح
واسال تسمعني
ياهو اليتمني
اعرف يذبحني...حضن المذبوح

ابقه بغربه...ومحد يمي...من احبابي
جا تاليهه...ميته بكبري...وينسد بابي
عطرك يوصلني
واكتبله بحزني
استعجل موتني...بويه حبيبي


*الشاعر الموفق حمزة السماوي*


رابط قصيدة "بويه حبيبي" :
https://youtu.be/XAAPCCpONKU?si=PBu1kARToKIQ5kEs
______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______
القناة الرسمية للملا مصطفى السوداني على telegram :
https://t.me/Mustafa_Sudane
______

•{حنينات}•

حنينات حنينات خواتك يا أبو فاضل حنينات
غريبات غريبات خواتك يا أبو فاضل غريبات

١/ رد يا هوه التارس الريه...آه يا عباس
رد يالتكفه الهاشميه...آه يا عباس
ضليت أتاني شلون بيه...آه يا عباس
بين التجي و ما بيك جيّه...آه يا عباس

أتنطر و دمعي اعلى خدي...آه يا عباس
اتعنيت بس گالولي ردي...آه يا عباس
گلتلهم أبقى هناك ودي...آه يا عباس
هوّه آنه چم عباس عندي...آه يا عباس

إذا مات إذا مات تظل المن بعد زينب إذا مات
حنينات حنينات خواتك يا أبو فاضل حنينات

٢/ حگهن اعيوني يعاتبنك...آه يا عباس
مو ماي ردنه اخبار عنك...آه يا عباس
راح و اجاني حسين منك...آه يا عباس
بس رايتك ما جاي چنك...آه يا عباس

ها گتله خويه و گال زينب...آه يا عباس
گولي الخدر راح و تسلّب...آه يا عباس
بس شوفي ظهري شلون حدّب...آه يا عباس
و النار البدلالي تلهب...آه يا عباس

يتيمات يتيمات بچن من سمعن بإيمه يتيمات
حنينات حنينات خواتك يا أبو فاضل حنينات

٣/ چلمة الخويه شلون چلمة...آه يا عباس
من گالها و ظليت أشمه...آه يا عباس
لو ما انتن چا ظال يمّه...آه يا عباس
بچفوفي بس رايته و دمه...آه يا عباس

رديت بس شلون ردّة...آه يا عباس
ردت الماكو اخوان عنده...آه يا عباس
من جدمي عالشامت تعده...آه يا عباس
يصيحون ضل حسين وحده...آه يا عباس

يشمات يشمات افرحوا راح أبو فاضل يشمات
حنينات حنينات خواتك يا أبو فاضل حنينات


*الشاعر الموفق أبو معصومه الفريجي*


رابط قصيدة "حنينات" :
https://youtu.be/AOTZUe_l1f8?si=J-_9TuayxyuopfES
______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______
القناة الرسمية للملا مصطفى السوداني على telegram :
https://t.me/Mustafa_Sudane
______

•{محرم الذهب}•

لنشطب...كل جمل
من الحب...والغزل
ونكتب...مستهل
ويبقى الحسين

محرم...اقترب
محرم...الذهب
محرم...عطره هب
ويبقى الحسين

١/الشهر إجه اسمعت
وصفنت ودمعت
ورحت رايه ارفعت...اعله حايط منزلي
أشم ريحة سبي
وركضت لموكبي
أحسّه صاحبي...اليحب أبو علي

أحضّر ملبس الخدمه
واتحزم لبو اليمه
واگولن يا علي الهمه
مثل كل عام عالنيه

أحس ينلچمن جروحي
امن أمسح صور مذبوحي
و اطب لكربله بروحي
امن ادخل للحسينيه

جنوني...بخدمته
عيوني...بصورته
جفوني...لدمعته
اعله طول السنين

٢/ خفگ گلبي أنه
شهر حزني دنه
الاله متاني سنه...قريبًا يبتدي
امن اروح لكربله
الحسين اتأمله
اريد اگول اله...انعم الله سيدي

يالمخليني اخدمنك
ازرعني بدرب حزنك
انه الما شابع منك
اليكتب اسمك و يشهگ

قريب وحاسبك جاري
وتمد ايدك دفو لداري
لو شفتك نهر جاري
اشگ القارب واغرگ

حبيبي...الاولي
ونحيبي...بداخلي
طبيبي...بو علي
اليسمونه حنين

٣/ بمحرم استمع
قصيده بكل فرع
ومسيرات وشمع...حزن ما اجمله
حزن طول وعرض
مشاهد تنعرض
احسّ كل الارض...صفت چن كربله

سواد يغطي الولايه
قرايه تلحگ قرايه
جو حسيني للغايه
تمنيته السنه كلها

حب حسين ابو النعمه
الينزل مطرة الرحمه
حلاة الدنيا بالخدمه
ومواكبنه ومشاعلها

المجالس...للنحر
مدارس...للبشر
تنافس...عالاثر
مع العاشقين

٤/ الاماني بهالشهر
يجينه المنتظر
بحق هوه الگمر...العليه كلشي صفن
متى نركض اله
بچفوفه نقبّله
ونروح لكربله...ونطب سوه الصحن

يا گلبي البعد يكفي
رافع بالدعا چفي
اللهم عجل في
ظهور الطوّل اعلينه

يا قيّوم يا واحد
اظهره البالحزن گاعد
موش لخاطر اي واحد
لخاطر دمعة اسكينه

لظهوره...ننتظر
نزوره...ونفتخر
شعوره...بالصبر
يشيب الجنين

٥/ بعد هذا الشهر
بحزن يقبل صفر
ونروح امن البحر...الى النحر مشي
الگرايب والغرب
گلب لازم گلب
مواكب عالدرب...الحزن بيها احلى شي

نزور حسين نتعنه
مشي امن البيت للجنه
طريقه ما نزل عنه
الغريب وما نسى احبابه

الوسيله حسين والغايه
نروح لگبره مشايه
ورايه تسلم لرايه
مشي الحد لزمة ابوابه

زياره...امن العمر
بمساره...ننتصر
غياره...وللگبر
نجي زائرين


*الشاعر الموفق ميثاق الحمداني*


رابط قصيدة "محرم الذهب":
https://youtu.be/f0Cw5CehBPU
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{تعال بروح الحسين}•

الليلة جمعة
و بحساسي دمعة
يمهدي تعبت الوين...تعال بروح الحسين

مو قصدي ازيدك
بس والله اريدك
جمعه مباركه عليك...راح اسهر و تانيك

١/ هالليلة گلبي يدگ
نتلاگه باچر صدگ
يعني اگعد وي العشگ...و ما نفترگ للأبد

الليله احط بيهن ملح
و ملهوف اجي من الصبح
نتلاگه جرح بجرح...منك أريدن وعد

يگول الصادق لو أدركته
المهدي اخدمته و ما عوفه
چا باچر من تظهر سجّل
خادم عندك بالكوفه

حاضر يمهدي
خادم و جندي
أتاني بدمعة العين...تعال بروح الحسين

٢/ يا بو الملاگه الحلو
بچفاك ألاگي منو
بالصورة و ألگه الدفو...دخيلك إذا بالصدگ

مخنوگ چي مو سوه
يا مو بشر يا هوه
مجروح أريدك دوه...ليا يوم أظل محترگ

ليلة جمعه و يم حسينك
ما ناسيك بهالليله
مذبوح و غايب متحير
أبچیلك لو أبچيله

يبچيني جدك
تبچيني وحدك
حاير بين الإثنين...تعال بروح الحسين

٣/ مكروه يوم السبت
چي بالجمع مطلعت
بالله عليك اقسمت...إرجعلي كافي بعد

أتخيلك جاي إلي
و اركض يتيم لعلي
بجيتك أعوفن هلي...و لديرتي ما أرد

يالمهدي و على طاري الفقره
حيدر ما عدهم هسه
و حتى اليذكرهم بالخبزه
يالمهدي يصور نفسه

تريد اليتامه
تعيش بسلامه
أجيبن عدلك منين...تعال بروح الحسين

٤/ يمتى تخلص السفر
گلبي المحطة انكسر
ما تاني غيرك بشر...يا موعدي و منهجي

بشعر الفراگ تعبت
شعر الملاگه شوكت
طلع البدرُ ردت...أكتبها لمن تجي

أربعطش انتم ما شفنه
منكم واحد و انشبگه
يمتى نشوفك و نسولفلك
شسوت يالمهدي الفرگه

يالمهدي إظهر
وجهك تأخر
نطلبك عشرتك دين......تعال بروح الحسين

٥/ لا تُرى صعبه تره
و وجوه كلحه نره
تساون يبن حيدرة...الجوهرة اويه الفحم

أحچيها حظ و بخت
الساحة خطره اصبحت
بالله ناس اشركت...و البعض عاش بوهم

بس عندك خدام و گدها
منبرهم محد هزه
متعلمين الخدمه الزينه
من عبود و من حمزة

و المنظور كاظم
و الناعي جاسم
نصيح بصوت ياسين...تعال بروح الحسين


*الشاعر الموفق ميثاق الحمداني*


رابط قصيدة "تعال بروح الحسين":
https://youtu.be/t3iSLHjftjI
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{من ذاك عاشور}•

مِن ذَاكَ عَاشُور أدعِي مَولَايْ
لُو بَس عِشِت لِمْحَرَّمِ الجَايْ
نَاذِر نِذُر لَبْچِيلَكِ اهْوَايْ
يَا أبَا عَبدِ الله...يَا أبَا عَبدِ الله

١/مِثِل أم ضَايِع وَلَدهَا اوْ تِنتِظُر رَجعَه
بلَهفِتِي امْتَانِي ليَالِي الحِنَّه وِ الشَّمعَه
هِيچَ ارِيدَ اجْرِي دَمِعتِي بمَجلِسَك وَ انْعَى
يِختِلِف عنِّ المَوَاسِم موسِمِ الدَّمعَه

وِ المِنكِسِر مِن أجلِي ضِلعَه
شلُون أعز اعْلِيه دَمعَه
بَلچَن دَمِعتِي اتْصِير إلَك مَايْ
يَا أبَا عَبدِ الله...يَا أبَا عَبدِ الله

٢/حَضَّرِت ثوبِي السَّوادِ اوْ هَيَّأت أمْرِي
هاللَّيالِي اسْتَقْبَلِتْهَا بدَمْعِتِي التِّجْرِي
لِيلَه لِيلَه مِن تِمُرنِي يِختِنِگ صَدرِي
و يِنْشِغِل بَالِي اعْلَى زِينَب يَا بَعَد عُمْرِي

عَيِّشنِي جَرحَك شِلِّي بِالحِيلْ
زِينَب وَرَاهَا امْرَاكَضِ الخِيلْ
باچِر تِحِيرِ اوْ مَا يِظَل رَايْ
يَا أبَا عَبدِ الله...يَا أبَا عَبدِ الله

٣/ابْعِينِي تِتزَاحَم دَمِعتِي لُو نِعَى النَّاعِي
چِلمَةِ الطَّاحِ اعْلَى وَجهَه تِلْچِمَ اسْمَاعِي
سيِّدي اوْ عِنْدَك عَلِيلَه اتْهَيِّجَ اوْجَاعِي
گاعِدَه ابْعِتبَةِ البَابِ اوْ تِنتِظُر سَاعِي

وِ اتْنَادِي بُويَه المَن عِفِتنِي
ويَّه خَواتِي مَا خَذِتنِي
ميِّت حِلِمهَا ابْرُوحِتَك هَايْ
يَا أبَا عَبدِ الله...يَا أبَا عَبدِ الله

٤/اليِحْتِرِگ گَلبَه ايْتِضَاعَف بِالحَشُر أجرَه
مِن يِموتِ اتْصِير شَمعَه دَمْعِتَه ابْگبْرَه
كِلشِي ما ريدِ ابْمُحَرَّم غِير بَس عَبرَه
بَلچَن أجبُر بِيهَا خَاطُر فَاطِمَه الزَّهرَه

يَارِيتْ دَمعَاتِي الجِرِيَّه
يِشفَن جَرِح سِكنَه اوْ رُقَيَّه
العَبْدَالله تِجرِي ادْمُوع عِينَايْ
يَا أبَا عَبدِ الله...يَا أبَا عَبدِ الله

٥/هالشَّهَر شَهرِ المُصِيبَه البَچَّتِ الدِّنيَه
ويَّه ضَعنَك يا حُسيْنِ اجْرُوحِي مسبِيَّه
سيِّدِي اعْلِيكِ العَلِيلَه التِّنْتِظُر جَيَّه
كون تِحسِب حتَّى نبضَة گلبِي لطمِيَّه

وفِّقنِي فِدوَه ابْرُوح عَابِسْ
أبچِي اعْلَى زِينَب وِ المَجَالِسْ
بلكِي انْحِسِب لِلزَّهرَه وَفَّايْ
يَا أبَا عَبدِ الله...يَا أبَا عَبدِ الله


*الشاعر الموفق السيد علي الموسوي*


رابط قصيدة "من ذاك عاشور " :
https://youtu.be/LhAeV7CK5-4
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{هالمرة سامحني}•

بغيرك يا مهدي منشغل بالي
ما همني حالك همني بس حالي
آنه اعتذر يالمدمعك غالي
سامحني سامحني هالمرة سامحني

١/ عن كلشي يالمهدي اعتذر منك
شگد أفرح و ما أحترم حزنك
أنشد على اصحابي و أدورهم
و لا دوّرت لا ناشدت عنّك

آنه اعتذر...چي نسيتك أعتبر ناسي صلاتي
آنه اعتذر...ما قبلتك صاحب تصير بحياتي

شگد خيبت ظنك
شگد زيدت حزنك
آنه اعتذر منك

صمتك يگلي اعتدل كافي
مشكلتي ما عندي گلب صافي
يالتسهر و جفني يظل غافي
أخذتني أخذتني هالدنيه أخذتني

٢/ من فضّلت حب نفسي عن حبك
زعلتك أدري و انكسر گلبك
أفعالي مو بس تجرح بروحك
حتى الهوى مانعته عن دربك

يا للأسف...من أريد أغفه و لا مرة ذكرتك
يا للأسف...لا تصدگني إذا گلت انتظرتك

يا سيدي القائم
خليني الك خادم
صح عاصي بس نادم

لو من صدگ آنه انتظر جيتك
چا ما نسيتك مرة لا عفتك
ردت الأحبهم و انته ما ردتك
عذبني عذبني تقصيري عذبني

٣/ من الخجل تتغير احوالي
لو مرة ذكروا اسمك گبالي
إيدي أخليها على راسي
و شتفيدك إيدي رايد اعمالي

كافي بعد...ما أريد الدنيه بس إنت أريدك
كافي بعد...محلفك بعمتك رقية انطيني إيدك

هارب من ذنوبي
العطفك يا محبوبي
استرهن عيوبي

تقبل أعوفك حاشى ما تقبل
لو ما تحبني مني ما تزعل
تسئل عليه و آنه ما أسئل
حاسبني حاسبني عن كلشي حاسبني

٤/ متندم اعلى الماضي يا مهدي
صفحة جديدة بعمري راح أبدي
لله أتوب و أعلن التوبه
لازم أصحح كل غلط عندي

كلشي مهم...مو مهم عندي المهم ترضى عليه
كلشي مهم...ينّسي و دعيلك بصبح و مسيه

يا صاحب الرايه
أخرتك هوايه
و جروحك بهايه

يالما صفالك بالعمر صاحب
وجهك صدگ من التعب شاحب
گلبي و لا گلبك يظل ذايب
عايفني عايفني لا تگلي عايفني


*الشاعر الموفق السيد محمد المنصوري*


رابط قصيدة "هالمرة سامحني":
https://youtu.be/zRKZ-KF4B0Y
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________