پست‌های تلگرام اللؤلؤ المكنون🇵🇸.

-
كان في دكتُور أطفال -اللّٰه يرحمُه- كان وَنعم الطبيب توفىٰ بحُسن خاتمه جميله.

كُنا نعرَف عنه الصَدقه والطيبه والضمير ومُراعاة الناس وبعد وفاتُه أحد الصيادله قال ':

كان موزَع علي الصيدليّات كرُوت للعياده بتاعته عليها رمز معين للحالات الغير مقتدره.

كان الصيدلي يُعطي الكارت والأُم تروح تكشف وتاخد كمان علاج.

وبدون أي مُقابل مادي وكله علي حساب الطبيب وبدون احراج للناس المتعففه.
-
- نُقِل. |

-
مَا تيجُوا أخليكُم تقرأوا حاجات اتكشفِت بعد مُوت ناس واتحكت علىٰ لسان أهاليهُم وجيرانهُم . .

علشان نشُوف كان بينهم وبين ربنَا إيه يخلي اللي حواليهُم يحكُوا عن حُسن خاتمتهُم بالشكل الجميل دا ؟

وعلشان أسأل نفسي قبلكُم وكُل حد منكم يسأل نفسُه هو قدم إيه في حياتُه يقابل ربنا بيه !

أنا الحاجات دي بتليّن قلبي والله وكُل ما أحس إن الشيطان بيضحك عليّا بإني بعبدُه كويس اقرأ او اسمع حاجات زي كدا . .

بحس وقتها إني قلبي بيرجع يفهم - إني وَلا شيئ جمبهُم - واني لسه بدري اوي عليّا !
-

-
خالُو -اللّٰه يرحمُه- كان كل ما يروح المقابر علشان يزور تيتا وجدو كان بيلاقي كلاب كتتير جدًا !

فَـ بقي كُل مرة يروح بقي ياخدلهم أكل معاه لدرجة انه كل مرة بعد كدة لما بيروح بيلاقي الكلاب مستنياه وتفضل تجري ورا العربية لحد ميوقف ف المكان بتاعه . .

توفاهُ اللّٰه والكلاب بتفضل مستنياه عند المقابر كُل مرة؛ لحد ما اكتشفنا بعد وفاته من الناس هناك كانت بتقُولنا مكنش بيعدي مرة الا وهو جايبلهم أكل كتير وبقوا مستنيينُه طُول الوقت !
-
- نُقِل. |

-

عَمي -اللّه يرحمُه- يُوم وفاته ابنه بيطلع الكفن قام شيخ المسجد قاله بتعمل ايه يبني والدك كفنه موجود !

دا هُو اللى كان مُتكفل بأكفان كُل الاموَات اللى بتخرج مِن المسجد و محدش يعرَف.

وكان أى حد عندُه دين بيسدُه عنُه قبل الدَفن.
-
- نُقِل. |

-
أخُويا -اللّٰه يرحمُه- اكتشفنا إنه كان بيكفل أُسره يتيمه وكنا كُلنا بنتخانق معاه !

علشان عَاوزين نعرف فلُوس شغله بترُوح فين ومكنش بينطق ولا بيقُول.
-
- نُقِل. |

-
خَالى -اللّٰه يرحمُه- اكتشفنا إنه مُتكفل بأسرة وإنه كُل جمعة كان بيطلع صدقة عننا كلنا.

وإنه كُل اسبوع بيرُوح مُستشفىٰ يسأل عن حد يكُون أهله مش معاه أو محدش بيزوره . .

ويزوره ويقعُد معاه شوية من باب زيارة المَريض.
-
- نُقِل. |

-
بَعد وفاة وَالدي -اللّٰه يرحمُه- اكتشفنا إنه كان بيطلع رُبع مرتبه الشهري لجمعية خيرية.

ووصي بإخراج 25% من إجمالي الفلُوس اللي هتيجي بعد وفاته للأيتَام والأرامل؛ وكان كاتب دا بخط ايده.
-
- نُقِل. |

-
كان في راجل بَسيط مهنته الخياطة وكان فاتح دُكان خياطة قصاد جزار محله كبير.

و كان كُل جُمعه بعد الصلاه الغلابة من أهل الحته كلهم يتجمعُوا قدام مَحل الجزاره يوزعلهم كلهم لحمة.

و كانو كُل الحته يودو للخياط الي قصادُه ده هدومهم و حاجتهم لحد ما ربنا كرمه و فتح مصنع ملابس جاهزة !

بس برضه فضل قاعد في دُكانه يرفي ويخيط ويفصَل ويصلح هدوم الناس.

وفي مرة واحد عدىٰ عليه و قاله مش ناوي تطلع حاجه للّٰه بعد ما ربنا كرمك و فتح عليك زي ما الجزار بيطلع كل جُمعة لحمة للغلابة ؟

ضحك وطبطب علىٰ كتف الراجل ومردش عليه وعدت الايام والخياط مات.

وجت الناس تاخُ لحمة كل اسبوع من الجزار قالهم خلاص
الي كان بيدبحلكم ذبيحة كل اسبُوع مات !

عدت الايام والخياط الي الناس كانت فكراه بيكنز و بيطلعش ولا بيصلح حاجه للّٰه.

طلع هو الي بيطلع اللحمة للّٰه من قبل ما ربنا يرزقُه حتى بالمصنع !
-
- نُقِل. |

-
نرجع نسأل نفسنا تاني يا جماعة إحنا فين من الناس دي ! 😅

كُل ما افتكر جُملة الشيخ سمير مُصطفىٰ وهو بيقول هتُقف تتسإل عن كُل جنيه بترعب.

اللي هو قدمنا ايه علشان اقف بيه قدام ربنا يُوم القيامة !

ربنا يرحمنَا برحمتُه ويهدينا يا رب ويُحسن خاتمتنا.
-

-
بابا -اللّٰه يرحمُه- بعد وفاته بأربع سنوات اتعرفت على واحدة في المواصلات العامة.

وقُولتلها أنا من بلد كذا والمنطقة كذا فقالتلى تعرفي حد إسمه فُلان الفلاني قولتلها آه سمعت عنه.

قالتلى - اللّٰه يرحمُه ويغفرلُه- كان عاملنا شهريه قعدت أعيط جامد.

وسالتنى بتعيطى ليه قولتلها عشان يبقى والدى ومن يُومها ماما حبيبتي ربنا يخليهلنا كملت مسيره بابا بعد وفاته بأربع سنوات لحد الآن !
-
- نُقِل. |