Bac with Kheireddine 📖

يادراا، فرحوني شحال ديتو ؟

السلام عليكم ان شاء الله كامل راكم بخير، حبيت نوصّيكم صحاب الباك, النتائج رح تكون على 16:00، وقت الظهر احسنوا الوضوء وصلوا الظهر في المسجد (الذكور)، بعدها احكم كتاب الله واقرا سورة البقرة، بعد ما تكملها احسن النية وصلّي ركعتين ومتطلعش راسك من السجود إلا ونتا قلت كلش لربي، إلا ونتا شكيت لربي وبكيتلو وفرغتله قلبك، قلو ربي ماتخلينيش وماتبتلينيش فيما احب، ممبعد قول اللهم اني وكلتك امري وانت خير وكيل، يعني درت كامل لي عليك ظرك لي بقات بيد الله، وامرك راك وكلته وخليتو لربي، وتنعّم بقدر الله حتى وان لم يكن مثل ما ابتغيت، الله بعد عليك حاجة تحبها علاه يعني ؟ يكرهك ؟ اكيد ووراها عوض وفرحة انت تجهلها لضعف نفسك، رح ندعيلكم ونتفكركم بإذن اللّه، رزقكم الله فرحة تبكي اعينكم وترضيكم، احبكم في الله، ان شاء اللّه تسمعوا عنّي بحاجة مليحة مستقبلاً 🫶🤲

ملخصي اطلعوا لفوق برك تلقاوه جماعة، وتلقاو مام نتاع باقي المواد ⬆️

راجعوا من ملخصي فالعربية او مليح بزاف والله، كاين عفايس ادو عليها نظرة عامة برك كيما في الاعراب الثوابت الاضافية واعراب الضمائر وكامل بسك نادرا وين يطيحوا، ملخصي شامل وكافي جدا جدا جدا بالنسبة للعلميين مكان حتى نقص فحتى درس ولا حتى معلومة

غدوة فيما يخص الوقت لي بين العربية والشريعة، متروحش تراجع الشريعة من الاول للخر بالاكم بسك مكاش الوقت بزاف، راجع العفايس لي تتنسى ليه ليه، التعريفات، الايات،...الخ، والله نشفى اية راجعتها قبل ما نروح للشريعة كي رحت لقيتها قدامي، راجعوهم باه ماتنساوهمش، ونظموا اوراقكم بزاف خلو المصحح يدي نظرة مليحة عليكم بلي نتوما خباشين حتى ومكنتش خباش 😂، والمسودة بالاكم تتحسموا وتكتبوا كلش فيها، جاوب ديراكت برك كاين عفايس لي مش متأكد منها اكتبها فالمسودة، ثاني بالنسبة للعربية بالاكم بالاكم بالاكم تتحسموا وتتسرعوا فإعراب الجمل، نتا تشوفها هاك تقول اااا هذه باينة طول محل نصب انّ ولا ممبعد تخرجلك حاجة اخرى، تأكدوا بزاااف من اعراب الجمل او ساهل مي اذا تسرعت ومركزتش او يروحلك هكاك، بالنسبة لأسئلة البناء الفكري، راكم عارفين كيفاه، الحكم التمثيل والتعليل هكا المنهجية كيفاه تجاوبو، وتفصلو واكتبو بزاااف بالاك تكتبلو الاجابة فسطر ولا زوج، او مايمدلكش مليح، اطلق العنان للفيلسوف لي بداخلك 😂 وعندك برك تخرج على المضمون توسع فالمضمون اا صاحبي
هذا مكاان غدوة اذا كنتوا حاضرين نزيدلكم شويا نصائح فيمت يخص الرياضيات والانجليزية

صحاب الباك ربي معاكم غدوة، قلوبنا معكم، ماتتقلقو ماوالو، نتوما سعيتو وكملوها بهذه السمانة والباقي على ربي، مهما خربتها فكاش مادة، اخرج وقول الحمدلله وارضى والله ربي يرزقك اكثر من واش كنت حاب، اهم الشئ الرضى، متنساوش ترقدو مليح، والاذكار والادعية قبل كل امتحان، وبعدو بزااف على مواقع التواصل الاجتماعي بسك رح تأثر بزاف عليكم، انا عطيت تلفون للام نتاعي، وكي كملنا باه عطاتولي، وكنت نقرا بالبيسي برك، بالتوفيق للجميع احبّتي ❤️

Heyy
للجماعة لي خايفة من غدوة، معاكم بنادم كاين مواد ماراحش اصلا جوزها فالباك بلون وكاين حتى لي ديت فيها نقاط كارثية، دونك ماتفشلوش مهما كانت النتيجة، بسك لي بروف رح يجيبو دي سوجي من المريخ، يسما كونوا واجدين للصدمة وخلوكم اذكياء، متخلوش بروف يزكّر في تلاميذه بسك محضرتولوش عام كامل يأثر عليكم، الصح في الباك..
موفقين بإذن الله ❤️🤲

وهذه كي بدلتها علاه خرجت هنا 🥲
الله يفضحك يا تلغرام كيما فضحتني

Hii 🙂 توحشتكم
ما بقالكمش بزاف على الباك ياااك، ماتخافوا ما والوو بإذن الله كامل ناجحين خاصة لي راهم يعاودوا فيه متخافوش ربي ماراحش يضيعلكم تعبكم، وكيما قتلتلكم من قبل اذا كان مكتوبلك معدل معين ولا متخدمش مليح فالباك وكامل بإمكان "الدعاء" تغيير ذلك، استغلوا الدعاء بزااااف هو كلشي والله، لبّ العبادة الدعاء.
كيفاه نقدر نعاونكم فهاد الفترة قولولي ! وفيما يخص الدروس والملخصات والافكار وكامل كلشي اني حاطوا لفوق.. موفقين احبّتي ❤️

الحمدلله حمداً كثيراً طيباً مباركاً فيه، نسيت لم ابشركم اعذروني والله 🥹 ومباركا لكل من نال مبتغاه وحظ اوفرا للباقين، سيجبركم الله عن قريب بإذنه تعالى

ثقوا بالله عزّوجل وخلو يقينكم كبير، تعبكم بإذنه تعالى رح يتجلّى فنجاحكم، نوصّيكم ونعاود كيما موالف الدعاء، تمعّنوا في هذه الاية، ربي سبحانه وتعالى عظيم جدًّا ودعوتك البسيطة هذيك نتاع ياربي نجيب 17 ياربي ندخل طب ياربي….، لاشئ امام قدرة الله عزّوجل فاحسنوا الظن به وادعوه كثيرا، وحاشى ان يخيب الله عبدا التجأ له كملجأ وحيد ليس له غيره، ادعووووووا في كل صلاة واكثروا من الصلوات (غير الفرائض) كالرواتب وغيرها فهي تقرّبكم من الله، واخيرا صلّوا كل صلواتكم في وقتها والحّوا في الدعاء خاصة وقت صلاة الفجر، وصلوّا على الحبيب المصطفى، موفّقين وناجحين بإذن الله، انتظر نجاحكم 🤍

وش حطيت هذا وين لافكار حطتها استاذة ادب، قالولي البعض انه كاين بعض الاخطاء على حساب اساتذتهم وش قالولهم فأي واحد دا وش حطيت هذا وين متقراش منها سقسي عليها قبل، شكرا لي نبهوني على الاخطاء لي كانت كاينة

هلوو 🙂 ني فرحان فبلاصتكم قريب تتهناو وتعيشوا فرحة لا توصف، حاولوا تنوضوا تصلوا الفجر في وقته واكثروا الدعاء في هذاك الوقت بسك افضل وقت للدعاء يقال ان الله ينتظر عبده ليدعيه في ذلك الوقت فيستجيب له، بالنسبة للذراري روحوا صلو في المسجد الفجر وخلو كل صلواتكم فيه وادعووووا والله غير الدعاء حاجة عظيمة اذا كان مكتوبلك وش ماراكش حاب بالدعاء ممكن يتغير القدر وتدي وش راك حاب اقصدوا ربي وماراحش يخيبكم، رح نحطلكم مجموعة من الادعية مليحة بزاااف داوموا عليها وان شاء الله فيها خير، وفقكم الله ورزقكم بما تبتغي قلوبكم، تهلاو في رواحكم هاد الفترة 🤍🙏🏻 (لا تنسونا من صالح دعائكم)

هلوو 🙂، ان شاء الله تكونوا بخير وراكم تحبدوا مليح فهاد السمانة التالية مبقاش وتريحوا بإذن الله، جيت نعطيكم فكرة الادب، كاين سؤالين عادة يطيحوا هوما الاوائل في البناء اللغوي، الاول يقول صنف الكلمات ضمن حقلين، والثاني يقلك بما توحي الالفاظ وبزاف تتخلطلهم بيناتهم ويحسبوهم كيف كيف وهي لالا، الاول كالعادة صنفوا الكلمات لحقلين عادي، والثاني كل كلمة عطاهالك اعطيه المعنى نتاعها وبما توحي : مثلا الاسد يوحي بالشجاعة والقمر يوحي بالجمال….. هاد الرموز اطلعوا لفوق تلقاوهم فملخص الادب لي راني حاطه.
وثان بالنسبة للاجتماعيات ان شاء الله تكونوا حفظتوها كامل ولا راكم ناويين تحفظوها بإذن الله، برك كي تعودوا رح تراجعوا خلّو تركيزكم بالنسبة للحرب الباردة على النظام الدولي الجديد وعوامل تفكك الكتلة الشرقية ومعايير تشكل العالم والثورة استعادة السيادة الوطنية (العلميين)، والجغرافيا ركزوا على دور العنصر البشري في اقتصاد منطقة شرق وجنوب شرق اسيا واقتصاد الاتحاد الاوربي والمعيقات لي تعترضهم.
بالتوفيق للجميع

لي مزال مبداش مصطلحات الثورة ولا تالفتلو، شوف هذا الفيديو لبورنان زوج مرات (فيه 30 دقيقة) ومبروك عليك، بالتوفيق لكم جميعا لم يبقى الكثير، لا تنسونا من صالح دعائكم 🙏🏻

https://youtu.be/c1eHPU58row

كل الشّكر للأستاذ الفاضل، 10 افكار مهمّة خاصة الخامسة كونوا على دراية بهم، وفّقكم الله