مصطفى ليث 🤍

هـنا .... https://t.me/mlloll18

معقوله ماهمك ؟
معقوله كل هذا الحجي
يطلع جذب منك ؟
معقوله تلعب عليّ
وحبك مجرد لهو
بيه تخلص وكتك؟
هواي عندي اسأله
واسالهن المن بعد
عايفني يا غالي
معقوله يطلع صدگ
وتضحك علي تالي؟
معقوله هيج انكسر
معقوله كل هالوكت
گلبك طلع خالي ؟
ياناس فكرة مسودنه
محبوبي كتالي

- مصطفى ليث

المن جاي ؟
روح وبعد لاتجي
مو اني الاقبلك عذر
مو اني ذاك العاطفي
اكطع امالك بعد
للرجعه ماضل سبب
هالمره ماضل وعد
ولو يبقى اني اخلف
عيشتني بقلق مومال ارجعك ابد
وتعرفني من احلف !
كل اختياراتي غلط
بس راح اصححهن
وخطواتي الـ بلا وعي
كلهن احسبلهن !
وهاي اني راح اعترف
عندي گلب خالي
مابقه عندي اي محب
فضلت راحة بالي

- مصطفى ليث

سوده الدنيا ماكو الوان
ومن كل مكان الوجع بيه يصدي
يطحن اعضامي القهر
معقولة ماكو مفر؟
لو بيدي اسكت گلبي

اخ يا محزن مصيري
تبجي عليه بحضن غيري؟

مجرب تنطلب دم ودين
وروحك ماتسد دينك
مجرب اهلك يطردوك
والك بس الله ليعينك
هم فكرت تنتحر بس يمنعك اسلامك
هم سولفت للخلگ ونفضحت اسرارك
هم جربت تنخذل من ناس تهواهم
هم حاولت تبتعد ويحرگك مگفاهم
جرب تعاديهم
بهاي الناس لتدور كل وفه مابيهم
عامل بالمثل لتخاف لا تهتم
وانهيها علاقاتك صدگني متتندم
اخذ النصيحه وعيش مرتاح
بينك وبين الخلگ خلي نهر
اليراقب الناس يكتله همه
واليعاشرهم يكتله القهر

- مصطفى ليث

مو بس حجي لو حبيتني تخاطر
وهذا اعتذارك ابد ميطيب الخاطر

حجيك راح اطنشه واعتبر ماسامع
وصدكني گلبي قوي وانساك من باجر

اذا جان الغلط منك لاتنتظر شي مني
انته لو رايدني ماضليتلي تكابر

موبس طاقتي وياك استنزفت روحي
وهاي العلاقه تنتهي لااصبر ولا ابادر

اسبها الصدفه ذيج وياها اسب گلبي
شتريد مني بعد تريد تشوفني بگبري !

مو انته نفسك جنت
من اكبر طموحك تلعب بشعري؟

البيني وبينك مو قصة عشگ
بيني وبينك معركة عمري !!


- مصطفى ليث

يا حسافه !
عينك بعيني تحطها بكل صلافه
جنت اشوفك ندى من كد الترافه
جنت معمي
جنت امشي ورا گلبي
يا خساره !
تنكر العشرة الطويله بكل حقاره .

- مصطفى ليث

اجيت اني وحبيبي وايدي بايده
فرحه وما راح توصفها القصيده
ومتفاجئ من الدنيا هـاي
اول مره صار اللي اريده
اجينه اني وحبيبي وايدي بيده
حققنه احلامنه الكالوا بعيده
ولان عشت هواي صدمات
جنت اخاف من النهايات السعيده
(اضحك للدنيا تضحكلك)
ضحكت هواي وبكل مره بجتني
واجاني العوض من الله
اجتني بنيه تضحكلي وتضحكني
ورغم كل الخسارات العشتها
هسه مرتاح
نسيت الامي كلها من شفتها
ومن شفتها الدنيا وگفت
وضحكتي وهيه يمي مايخلص وكتها
عارضوني الناس ومن يمهم خذتها
حضي يا وادم حلو
وردة البستان اني شلتها
اجيت احجيلكم قصتي الجديده
فرحه وماراح توصفها القصيده

- مصطفى ليث

انتي وحده بلا شرف
سمج اقوه من العكارب
انتي حيه
مو كلتلج صوني حبنه
واعذر اغلاطج واجازف
ليش هيجي
خنتي بيه ؟

- مصطفى ليث

قبلك محد كدر يوصل لگلبي
انته اول بشر ابجيله واشكيله
وعندي اسراري محفوظه
انته اول شخص بالدنيا احجيله
محد كدر يوصل للوصلته انته
مامر علي انسان من يزعل اغنيله
ولا واحد وصل عيني وسهرت ويا
بس انته هذاك الاسهرله والوليله

- مصطفى ليث

اباوع بوجهك وابتسم
واذكر تفاصيل الحلم
تملك كل تفاصيلة
فجاة وصرت شي مهم
وبناسي ابد ماقارنك
عندي صرت كلهم
ايام سوده وقهر
عايشها قبلك جنت
وبيك الله عوضهم

- مصطفى ليث

الليله اني شلون انام
الليله گلبي شلون يهده

الليله صدمة عمري صارت
الماعندي غيره غيري عنده

الليلة ابد موخوش ليلة
النوم بابه بوجهي سده

الليله محبوبي خذلني
وحبل اعدامي بايده شده

الليله احس ماعندي احد
وصرت اشوف الدنيا جرده

الليلة صار الموت فكره
ابالي يفتر روحه رده

الليله روحي تنعدم
الليله گلبي بايدي امرده

- مصطفى ليث

وحانت نهايتنه
وجان واضح من بدايتهه نهايتهه الفشل

لهنانه روحي وتنسحب
الله اليعلم شعندك ووجهك ثگل

ماجانت عشرتك صافيه وحلوه
اطلع من عشرتك واني ماليني الوحل

شفت بعيونك دغام انسان ظالم
من عدها وقررت عنك انعزل

عرفت بظلتك يمي ابادة وقررت ابتعد
مامجبور اظل احتمل

- مصطفى ليث

حرب وجان الفوز محسوم
الغلط من عندي ماعديت طلقاتي

حرب والتخطيط مضبوط
والمفروض جان تموت
بآخر طلقه بسلاحي

حرب والخطه محكومه
بيها اخر عدو تبقه
وتموت بطلقة الرامي

حرب وانه جندي وجان بيدي سلاح
مو حطاب واذب الصوج بفاسي

حرب وانه الجنت قناص
وعيونك دوخت راسي

حرب والفوز مطلوب
المفروض اكتلك واكتل احساسي

- مصطفى ليث

شسويتله ويكرهني
حبيته بطريقة اتمنيت بيها انسان حبني
هواي انطيته حب
حرامات
وحسافة شكد جنت الوم بنفسي
بشر ماهمه اني
ليش وبادرت ويا
كم مره رحتله بورد وبكسره ردني
ليش وعفت كومة ناس
يحبوني ورحت للمامقدرني

- مصطفى ليث

الصفات الناقصتج تمتلكها
تعرف عّلَتي قبل ما اني اسولفها

اجت مثل العوض صارت
نعمة من ربي وبستها

وقوتني اعلى نسيانج
ولان تستاهل صنتها

لتنكرين افعالج ولتكولين اتغير
لتزغرين بعيني بعد اكثر

حجيتي اسراري يم الناس
عندي اسرارج واني هم اكدر

بس الفرق بيناتنه هواي
مومثل السما والكاع لا اكبر

- مصطفى ليث

ومابين حب وحرب
ومابين عقل وگلب
روحتك شي محتم !

عشرتك غلطه وغلطه ماتنغفر
صدكت جذبك عيشتني بوهم

انه ماجربت الندم فد يوم
اول مره وهيج حسيت بندم

غفلة من عندي وهويتك
صحيت وراح ارجعك للعدم

طلعت بكل حرب بالدنيا فايز وربحان
مو انه الكبال عينك انهزم

وابد مو طبعي انقهر بعد انسان
لفراك مثلك ابد ما اهتم

- مصطفى ليث

ومامنتظر شي اني
حتى احلام ماعندي

وبالي منشغل عن الناس
اكعد يمهم وما احجي

وشلون اكمل الباقي من عمري
حتى بهاي ما ادري

محتلني الملل عايش حياتي غصب
واكبر فاجعه بالكون ماهزت شعر مني

مستقبل طموح اهداف
وكيان وملك واملاك
حياة لنفسي ما ابني

وما اذكر ولا تفصيله من يمها
صفنتي الخلصت وكتي

عجيبه المرحله الاني واصلها
جم صدمة الموتت گلبي

- مصطفى ليث

وشكد بيه تشمتوا
حوبة اضل الي يمكم
مثل ما اني حركتني
هاي النار تحركم
و مامجبور اتحمل
صبر ماعندي ضل الكم
من عشرتكم شحصلت وانتوا وياي
بوكت طيحتي ماشفت واحد منكم
وهاي الحزت بروحي
حيل رخاص وعاشرتكم
عيشتكم ابد ماراهمه وياي
حياة الذل تناسبكم

- مصطفى ليث