قوم امشي اطبخ❤️🍴

من الهندسة للطهي : قصة نجاح شيف احمد سليمان

Live stream finished (59 minutes)

للتعليقات والاسئلة

Live stream started

من الهندسة للطهي: قصة نجاح 🔥🍽️

أحمد سليمان عثمان أحمد – شاب سوداني من مواليد التسعينات، بدأ مشواره في عالم السياحة والفنادق عام 2015. رغم دراسته لهندسة ميكانيكا التكييف والتبريد بجامعة السودان، إلا أنه اختار مسارًا مختلفًا وأبدع فيه! 🌟

من "القراند هوليدي" إلى "كورال" و"السلام روتانا"، إلى جانب "مور كلير" والعديد من المطاعم والفنادق الأخرى، أحمد أثبت أن الشغف هو المفتاح الحقيقي للنجاح. 💼🍴

وفي إنجاز كبير، أحمد فاز في مسابقة الشيف نادية السيد، وده كان تأكيد حقيقي لتميزه في مجال الطهي! 🏆👨‍🍳

تابعوا معانا على الفيسبوك الليله الساعة 8 مساءً بتوقيت السودان، واكتشفوا قصة نجاح ملهمة من الهندسة للطهي! 🔥

📅 الموعد: الليلة
🕗 الساعة: 8 مساءً في قناة قوم امشي اطبخ في الفيس كونو جاهزين🔥

#قوم_أمشي_أطبخ

هل حصل جربت تشد فول وما يسود🤔
هل ولا ما هل يا عزيزي 🧐


عموما الليلة سر شد الفول وكيف كل زول تاني ح يسألك بتعملي الفول ده كيف 😌😌


نجيب الفول ونبلو ل6 ساعات اا كم ساعة 6 يا عزيزي الطباخ 🧑🏻‍🍳


نجي بعداك نكب الفول المبلول في حلة البريستو ودي يا سيدي الطباخ حلة الضغط (عشان لو أنت جديد وكده😮‍💨)


الخطوة التانية قطعي فلفلية وجزرة وختي خبزة مبلول(طلعي قشرتها السوداء 😅)معلقة باكنج باودر ومكعب ماجي وطماطمتين و اوزني الموية 😋



ده كيف تشد فول ممتاز😌

ح نقيف هنا طبعا لا ح نديك كمان طريقة تقديم ظريفة😉



جيبي ليك صحن وكبي المقدار المناسب من فولك العظيم اللذيذ😋بعدها قطعي ليك طماطم ونص بصلة خضراء 🤤وكمان ممكن تضيفي قرن شطة لو أنت من آكلي الحار 🤯ودقي ليك ثوم وكبي ملح ونص ليمونة 😩وحبة زيت سمسم واستمتعي باللذاذة🥵🥵





انا ضقت طعمو في خشمي أنتو لسه منتظرين شنو أمشي جربي الطريقة دي ورينا في التعليقات كم زول سألك عملتي الأكل ده كيف😉

هل نفسك تعملي *رقائق البطاطا الحلوة المطبوخة*😉


ح نوريك تعملي شنو وتطلعيها بأحسن شكل كيف😌

جيبي ليك ٢حبة بطاطا حلوة ،معلقة كبيرة زيت زيتون، معلقة صغيرة ملح، معلقة صغيرة فلفل اسود (اختياري ده🌚)وتوابل إضافية حسب الرغبة😉



نقوم نقشر البطاطا ونقطعها لشرائح رقيقة ونغليها في الموية من ٥-٧ دقائق 🧐

نصفي البطاطا من الموية ونتتظرها تجف😖 اها نقوم نجيب ليك حاجة كبيرة ونخلط الشرائح دي مع معلقة زيت الزيتون والملح والفلفل الأسود والتوابل التانية 🤗

في الوقت ده فرنك شغال ع درجة حرارة ٢٠٠ ونخت الشرائح دي في صينية ونخبزها لمدة ٢٠-٣٠ دقيقة لحدي ما تكون ذهبية ومقرمشة 🤩مع التقليب يعني تطلعيها من الفرن تقلبيها كده بوشها التاني وترجعيها 😉



أتمنى أنكم تجربوها وتستمتعو بالجد لأنو طعمها حكاية تانية 😩🔥

أفتح التلاجة ما ألاقي إلا خس وليمون وحبة خيار وطماطمات، كافر، يا ربي أعمل شنو أقرقشوهم؟ ولا أعملهم عصير؟😭

اتذكرت يوم مشينا ناس خالتي وحصل لينا نفس الموقف، بس عملو سلطة خس بي ليمون🔥

مكوناتها بتذكر إنها كانت خس، طماطم، ٣ خيار، كوب عصير ليمون طازج، ملعقة كبيرة نعناع مجفف، ملعقة صغيرة ملح.


نغسل الخدار بتاعي دا ونفرمه زيين ونخلطهم سوا ونكب ليمون وملح ونعناع ونخلطها ويا جمال الطعم 😌♥️

جربتوها ولا حصلت ليكم مواقف زي دي قبل اليوم؟

#ميكس_فايتمينات.
#قوم_أمشي_أطبخ.

تفاح أناناس زنجبيل 🍹🔥

المكس العجيب في دقايق معدودة وانتعاش باقي اليوم 🤩

ارح نشوف محتاجين لشنو؟!
1.كوب أناناس مُقطع.
2. تفاحة مُقطعة شرايح.
3. قطع صغيرة من الزنجبيل.

كل المكونات في الخلاط واستمتع 🔥

#عصير_مركز_واحد_جنيه
#قوم_أمشي_أطبخ

عاوزة فكرة لحساء أو شوربة صحية؟!
بسيطة الليلة نوريك كيف تعملي شوربة خضار بالشوفان❤️💯

• المكونات :
- 1 بصلة متوسطة مفرومة
- 2 فص ثوم مفروم.
- 1 جزرة، و1 كوسة،و 1 بطاطس حجم متوسط مقطعين مكعبات.
- 1 كوب شوفان.
- 1 ملعقة كبيرة زيت زيتون.
- 4 أكواب ماء، أو مرق خضار.
- بهار وملح حسب الرغبة.
- 1 ملعقة صغيرة كمون.
- بقدونس للتزيين ( اختياري)

• نجي للطريقة🤗:
- في وعاء على النار نسخن الزيت ونضيف البصل والثوم، ونقلّب.
- نضيف الخضار ونقلبها لمدة خمسة دقائق، وبعدها نضيف الخوية ويخليها تغلي لمدة ١٠ دقائق.
- نضيف الشوفان ونقلب، ونخلي الخليط يغلي على نار هادية لمدة ١٠ دقائق إضافية.
- نضيف الملح والبهارات، نزيّن بالبقدونس وكدا خلاص جاهزة ونقدّمها ساخنة.❤️

طبق لذيذ وغني بالألياف والفايتمينات ووجبة صحية، ورائحة ولا أروع❤️🥣
بالهناء على قلوبكم😋❤️

#الطعام_غذاء_الروح
#قوم_أمشي_أطبخ

ما هو الموز؟

الموز بوتاسيوم الموز دهون صحية الموز لون حلو الموز طعم لذيذ😋🍌

لكن لو كنت متابع أناشيد طيور الجنة زمان وركزت في حقت الموزة بتقول ليك:

🙌🏽🙌🏽لكن ما تكتر منيي!! بيكفي حبة كل يومم🙅🏻‍♀️🙅🏻‍♀️

قالتها وهي تنطط عشان تحذرك منها

لأنو الكميات الكبيرة من الموز عشان تشبع ما حيساعدك أبداً بالعكس حيزيد وزنك عشان كمية السكر الكبيرة الفيهو..
حتى وهو سكر طبيعي🥶 ممكن يعمل ليك تسوّس في الأسنان ويمكن يصل لحدي الإمساك🤢..

حبة أو حبتين في اليوم بتكفي، الموز تحلية ما شبع✋🏽

موزتين وهنا😋❤️🍌

#عيش_بصحة
#قوم_امشي_أطبخ❤️

_ أمونة يا بتي، تعالي جنبي واسمعي الكلام ده مني وافهمي كويس.

= ايوة يا حبوبة، الليلة ح تقولي لي ياتو سر من اسرارك؟!

_ أبوك الله يقوي ضراعو بجيب العيش البلدي بالزيادة، ناكل ونفضل، أها ما قلتي لي الباقي بتعملي ليه شنو؟!

= بدخلو في رف التلاجة، أو كمان بختو في الباب ساي.

_ يلا يا سمحة البنات، لو دايراه يقعد معانا بالأيام، طوالي دخليه الفريزر وجمِّديه.

= كيفن اجمدو يا حبوبة؟! تاني بتاكل وهو بارد؟!

_ دفيه، جيبي أقرب حلة ودفيه بالبخار وبرجع معاك كأنو ياداب جاي من الفرن.

= ايواا، فهمت خلاص، ما نعدم حسك يا حبوبة...

#تكتكها
#قوم_أمشي_أطبخ

من كل حتة لقمة
ولا
لقمة من كل حتة؟🤔

مسابقة وحدة واختلاف مسميات، ما فرقت، فارقة معانا شنووو؟؟

إنك
📸تصوّر/ي "على فكرة النهائي حيكون بين البنات والأولاد، الموضوع شخصي" لينا أكتر طبق شعبي أو مشهور في حتتك
🖋️وتدينا نبذة عامة عن الطبق دا
🏖️أهم شي الصورة تكون واضحة وجميلة وعليها الهشتاق
#لقمة_من_كل_حتة

حنشتغل على جولتين، الأولى الشباب فيما بينهم والتانية الشابات فيما بينهم🟣🔵

الفايز من كل جولة بأكبر عدد لايكات حيتأهل وحتتأهل للنهائي💥💥


الجوائز بئىىىى🤩🤩..
أو أقول ليكم لالا مفاجأة..

Are you in? Or out?

#قوم_امشي_أطبخ😋❤️

البيض غالي شديد ياخ، ونفسنا في كيك 😔

أكيد ما حنكسر حنكو نحن عندنا بديل أرهب من رهيييب 😌

بملعقة كبيرة خل معاها ملعقة صغيرة صودا(بيكربونات ) حتطلعي بي نفس الأثر بتاع البيضة الواحدة.

ما بس كدا وحتطلع أخف وأهش كيكة فيك يا دنيا 🔥

#سر-الوصفة.
#قوم-أمشي-أطبخ.

قبل يومين تلاتة من العرس كنا لاعبين كورة مهمة شديد، وآخر كورة كانت معاي. رجعت البيت متأخر لقيت أمي نامت واختي في غرفتها. سألتها في شنو للأكل؟ قالت لي: "في سلطه طحينه وفي طعميه في الفرم، امشي أكل" 🤤.

مشيت فتحت التلاجة، لقيت علبة زي السلطه 🥗، شلتها ووحشيتها بي الطعمية وأكلت، رغم إنو طعمها كان متغير شوية 😅 لكن قلت بجاي دي أكيد بهارات جديدة.

لمن جيت طالع من المطبخ، اختي جات، قلت ليها: "اعملي لي معاك شاي ☕"، ومرقت. فجأة سمعتاها بتقول: "عباااس... انت أكلت شنو؟" قلت ليها: "نفس القلتيه ليهو، السلطه!" 😎.

قالت لي: "السلطه في مكانها... انت أكلت الماسك بتاع وجهي!!" 😳🙈

حسيت بدمي بوقف وعيوني بتلفت، السيناريو الوحيد في راسي كان عزا 😂 لمن قالت لي: "الود البهيمة دا هو عارف الجلسلويد بقا ببي كم؟" 🙊😆

يعني آكل ماسك ومرتاح! المره الجاية أتأكد من العلبة ولا أضيع لي تاني ماسك!

#حكاية_مطبخ
#قوم_أمشي_أطبخ

عارفين الحلو شنو في السودان؟

لمن تكون في بلد أقلّ ما يقال عنها واسعة جغرافيًّا وثقافيًّا، بتلقى نفس المكوّن عندنا ليهو أكتر من وصفة "creative" على حسب المنطقة الوصل ليها🤩

فمثلا، الدخن في سودان الوسط مديدة، لكن في سودان دارفور عندنا وصفة تقشّ الـ protein bar ووصفات الشوفان بعييييييد🙂‍↕

ببساطة..

بنغلي نص كباية موية مع كباية دخن وعليهم بهار مفضل - هبهان أو قرفة أو زنجبيل - ورشة ملح

بعدها نفرده على صينية لحد ما يبرد، ونقطعها ونقدمها مع بلح أو عسل، أو زبادي بالسكر

طاعم صحي خفيف وساهل❤️❤️..

واسمه؟
✅✨قوقور✨✅

حتعملوه؟🙂‍↕

#طعم_التراث_السوداني❤️
#قوم_امشي_أطبخ❤️

— سمعتوا إنو "قوم امشي اطبخ" حا يعملوا مسابقة؟
— جد؟ عن شنو يا زول؟
— تقريبًا اسمها "لقمة من كل حته"!
— والجوائز حتكون شنو؟
— والله ماعارف، لكن سمعت إنو حتكون حاجة مميزة! 🎉
— حماااس! لازم أشارك، أنا بحب ناس أطبخ! 🍽️
— وانتو، مانفسكم تعرفوا تفاصيل أكتر؟
— استنونا قريب! 🔍

#قوم_أمشي_أطبخ #لقمة_من_كل_حته

باونتي يا باونتي... شوكولاتة عشق من نوع آخرر✨✨

🚫✋🏽بس دقيقة!✋🏽🚫

كيس عبارة عن مواد حافظة ومكونات لا يعلم بها إلا ربي وفوق دا مقاطع🙅🏻‍♀️

تجوا نعمل البديل في البيت؟

🥥نجيب كبايتين جوز هند مبشور نوع ممتاز
🥛نص كوب حليب مكثف محلى
🧈اختياري ملعقتين زبدة
🍫وللطبقة الخارجية أي نوع شوكولاتة سادة بتحبوه

نقوم نخلط مكونات الحشوة - جوز الهند والحليب المكثف والزبدة -

نشكلها على شكل أصابع وندخلها الثلاجة تبرد وتتماسك

نغمسها في الشوكولاتة الاخترناها بعد ما نذوبها ونرجعها للثلاجة مرة ثانية👍🏽

وكمان قالوا لو طبقة الشوكليت مذوبة بي زيت جوز هند حيودي الطعم لحتة تاااانية✨✨

Et voilà🥳✨
حلاوة باونتي نظيفة مضمونة وقضية منصورة💪🏽

#أكلة_في_دقيقة❤️
#قوم_امشي_أطبخ❤️

ود اختي جاب شيبس فتحت ليهو الشبس بتاعو وشلت منو حبتين
هو:

#قوم_أمشي_أطبخ

كان يامكان وفي يوم من الأيام، قررنا نجهز وجبة صحية، بدأت الحكاية بصدر دجاج مقطع، رشيناه بزيت زيتون بسيط وشويناه لحد ما بقى لونه ذهبي يشهي 🍗. في نفس الوقت، البطاطس كانت في جهاز فليبس تتحمر بهدوء بلمسة خفيفة من الزيت عشان تدي قرمشة لذيذة 🥔.

بعد ما الدجاج استوى والبطاطس جهزت، ضفنا ليهم بروكلي طازج، جزر مبشور، وطماطم مقطعة مربعات 🌿🥕🍅، وخلينا المكونات تستوي مع بعض في انسجام تام. جاء وقت السحر🪄، ضفنا كريمة الطهي قليلة الدسم مع الروب، وخلطنا كل المكونات بالملح والفلفل الأسود والكركم والفلفل الأحمر والكمون 🧂، عشان الطعم يكون مليان نكهة.

كل الحكاية دي ختيناها في صينية، رشينا فوقها جبنة موزريلا ذايبة، دخلناها الفرن 10 دقايق بس عشان الجبنة تذوب وتاخد لون ذهبي 🤤. وقدمنا الطبق بكل حب وصحة.

وكدا انتهت حكاية وجبتنا اللذيذة 😍.

#وجبة_صحية
#قوم_امشي_اطبخ