عناد الشيباني ،

ماكل من عدا على راس مرقاب
حول وهو من ضيقة الصدر خالي

ارقا وانا منصاب واعود منصاب
لا راحت الضيقه .. ولا ارتاح بالي

ودي لو ان الواقع .. يصير كذاب
واصدقه مثل ما اصدق خيالي

دقيت ابا اكلمك يا اعز الاصحاب
عقب تذكرت ( السنين الخوالي )

واللي مخليني لـ هالحين مرتاب
قفيت كنك مالقيت اتصالي … !

مهوب طبعك بس لـ الغايب اسباب
جعل السبب مهوب سود الليالي

والله ما قصدي لا تشره ولا عتااب
والا بعد بـ اسوي اني مثالي

انشد ومثلك ما يعوض ليا غاااب
وادعي عساني بس .. لازلت غاالي

يا معرب المنسب مابي شرح واعراب
ابيك تعرف .. بعدك اللي جرالي

انا بدونك لو معي ربع واحباب
تقول : كني يا رفيقي لحالي :(

انت السلاح اللي يجري لو اهاب
وانت السند وانت الرفيق الموالي

ولامن شلفا ذياب ضاعت من ذياب
ما عوضه عنها .. ابو زيد الهلالي

ارجيك رجوى الشيخ سعدون لعقاب
لو كان مانت بواحدٍ من عيالي !

يالصارم البتار تزهاك الالقاب
من حقي افخر بك واميل عقالي

ياما على شاني تعرضت الانشاب
وارخصت حالك دون حالي ومالي

وياما دحرت بغيبتي كل شذاب
وقصرت لي صوتٍ قبل كان عالي

وياما تقاسمنا المصايب والاتعاب
وياما تكاتفنا من اجل المعالي

وان كان صدرك فيه لـ الحق طلاب
خذ ماتبي من صدر اخوك الشمالي ..!

ميانتك تامر .. على قص الارقاب
واسمك لاحدتني ظروفي طرالي

شف ماتبيه وسو قبلة ومحراب
ما بيني وبينك .. غرور وتعالي ..!