بلآل آلعشمآﻭي 🖤

https://t.me/bely5_1/s/28

دول ؟ دول صحابي اللي مهما الدنيا تاخدنا بنرجع نتلم ونلم جروحنا في حواديتنا ، دول اللي مش محتاجين عزومة ، شركاء الرصيف وليالي الامتحانات البائسة ، وقعدات الضحكة والفضفضه والتريقة على الناس
دول اللي لو دنيا كلها اتغيرت مايتغيروش ، يفرحوا من قلوبهم ويعادوا اللي يعاديني ويرشوه بالنار ، اخوات مش من بطن واحده لكن من عمر واحد ، السند والتحويشة وايام الصرمحه
مفيش اسرار ما بينا ومفيش حد عرف يفرق بنا ، على قلب واحد ومفيش حد فينا بياخد خطوة الا لو كلنا موافقين عليها ، دول ؟ .. دول المكان اللي بلجاء ليه لما الدنيا تقولي امشي من هنا
المكان الوحيد اللي بيساعني ، تعيشوا ويعيش اللي بنا ونفضل نتشارك الحب والحياة والهدوم والاحلام ، وان خدتنا الدنيا في يوم ترجع لمتنا اللي بنلاقي فيها نفسنا ، سلام لصاحبي ولشلتي الجامدة اللي يعرفوني اكتر من نفسي

بلال العشماوي 🖤

عمري ما اقتنعت ان فراقنا كان خير زي ما قالوا بس بنسبالي حتى لو كنتي شر فـ حياتي ف يا اهلا بجحيم حُضنك

بلال العشماوي 🖤

لو هتنامي بعد فضفضتلك ليا ، ف احب اعتذرلك عن سكوتي وان ماردتش عليكي ولا حاولت اصبرك ، كل مره بتحكي ببقى عايز اقولك متخافيش انا جيت
انا مش عفريت هيحللك كل مشاكلك ، بس لو مكنتش الدوا اكيد هبقى الحاجة اللي بتخلقلك الامل ، ببقى عايز اطبطب عليكي واقولك اني مش بمشي وان ايديا موجوده عشان تمسح دمعتين نزلوا منك وقت فضفضه
انا اكيد مش موجود ف حياتك عشان اسمعك بس ، انا موجود عشان اغيرها ، وابدلك الوحش بالحلو وابدلك الخوف بالامل
لما تصحي من النوم عايزك تعرفي ، ان اللي جاي ربنا حطني فيه قضاء وقدر ، ربنا حطلك ف طريقك شخص متهونيش عليه ربنا بعتني ليكي الايد اللي هتسندك وتقويكي ، متخافيش انا مش مشكلة زيادة هتضاف فوق مشاكلك
انا هنا مش عشان تموتي م الخوف ، انا هنا عشان الخوف هو اللي يموت منك
تصبحي علي خير

بلال العشماوي 🖤

متحسبلهاش لان عمرها ما هتمشي بمزاجك هتمشي بكرم ربنا وتدبيره♥️.

الاهتمام مش انك تسأليني ، كلت شربت هتعمل ايه النهاردة؟ ، لكن الاهتمام لما فاجأة تُبصيلي وتقوليلي عينك تعبانه شكلك مش نايم كويس يالا أقفل الموبيل ونام، او تقولي بشغف تصدق القمصان السادة عليك اشيك ، ماتسيبش دقنك تطول كده خففها بتبقى عليك أحلى
الاهتمام يعني تسبقي المنبه بتاعي وتصحيني عشان الحق المعاد المهم ، وتعدلي ياقة القميص وتطمن انه كله برفيكت وتهاديني بساعة شايفه انها هتكمل الشياكة، وانك تقعدي تسمعيني وانا بحكي عن الحاجات اللي مش مهتمه بيها وتتفاعلي معايا بس لمجرد إني بحبها
الاهتمام بتاع كلت شربت صحيت امتى ده اهتمام عادي مش حقيقي مش إهتمام إتنين بجد بيحبوا بعض، ولو جينا فـ يوم وحد فينا سكت او كسل مثلاً ، علاقتنا هتنتهي لاننا كنا بنقضي واجب مش بنهتم بكل حب وشغف ورغبة في استكشاف الشخص الاخر والتواجد الحقيقي في يومه

بلال العشماوي 🖤

مسكت ايدك مره وانا بسلم عليكي مع اني مبسلمش بالايد ،وفجاءه المكالمه قطعت بنا عشان عدى ساعة مع اني عمري ما اتكلمت مع حد الوقت ده كله
في مره معرفتش انام طول الليل عشان قولتيلي ان درس العقل بيوجعك وسهرت كل شويه اكلمك ونمت لما مخي تعب زي القتيل
حاسس اني بقيت احفظ كلامك واركز فيه مع اني ذاكرتي ضعيفه ، وافتكرت عيد ميلادك وجبتلك "شلبي سولفان" اللي دوشتيني بيه
مشيت معاكي الشارع اللي حكيتيلي قبل كده انك بتكوني مرعوبه لما بتمشي فيه ، وطمنتك من الكلاب اللي جريت ورانا مع اني زيك بخاف منهم
شاركتك مشروبي المفضل ، وشاركتك اسراري ولقيت نفسي بتكلم كتير ، وحسيت اني مش غامض زي ما وصفوني انا كنت مش لاقي حد يسمعني
اكتشفت اني ذوقي حلو لما شاركتك اختيار الطقم اللي هتنزلي بيه اول يوم جامعه ، واكتشفت اني بغير لما لقيتك بتكلميني عن المعيد اللي عرض عليكي المساعده
ولما الصدفه جمعتني مع اهلي لقتني مبتكلمش غير عنك ، وبصيت ف المرايا لقتني احلويت ، واكتشفت اني ممكن اصحى بدري عشان متشوق اشوف ردك ع المورنينج تكست اللي بعتهالك قبل ما انام
وبقيت احس ان مش كفايه احط صورنا على كل الابلكيشن والباك جراوند بقيت حاسس اني عايز احطها على قلبي ، وبقيت شايف ان الحياه ليها معنى
وبقيت مش محتاج نضاره عشان اعرف اشوف انا نظري سته علي سته لما بقيت اشوف الدنيا والاشياء والاماكن بعينك
انا مكنتش بحس بالنقص قبلك بس لما قابلتك حسيت اني كنت ناقصك ، ومع اني متفاهم اننا صحاب ، بس قوليلي ازاي دي تبقى مشاعر صاحب دي مشاعر واحد بيحبك ومن حقه تكوني معاه ومن حقك تعيشي ف عز حبه ليكي
بقولك ايه أنا سألت وقالولي مينفعش ولد وبنت يبقوا صحاب ف انا معتش عايز يبقى عندي صحاب بنات ، تحبيني

بلال العشماوي 🖤

لقيتك اون لاين وقاعدة تشيري بوستات حزينة ومش بتردي على الرسايل ، قولت اكلمك اعرض عليكي نسهر الليلة سوا نلعب لودو نتبادل المزيكا ، لو محدش من صحابك مهتم فـ انا مهتم ممكن اساعدك فـ اختيار الاوت فت اللي هتلبسيه بكره وكمان اشاركك حيرة هتلبسي انهي طرحه عليه
ممكن اسمع ريكورداتك اللي بتغني فيها وصحابك بيتريقوا عليها بس انا هسقفلك ومش هبطل مدح فيها ، ممكن اسمع حكاياتك ومواقفك العبيطة ، وممكن اقولك نكته تموتك ضحك
الحقيقة انا بتلكك عشان اكلمك ، زي ما بتلكك عشان اشوفك ، زي مابتلكك عشان اشاركك حتى لحظاتك الحزينة ، انا لقيتك سهرانه وبتجلدي نفسك قولت لما اكلمك وماسبكيش لدماغك ولا للوحده ، ايه رآيك؟

بلال العشماوي 🖤

ايه في ايه مطلعني السطح فـ البرد ده ليه ما كُنا اتكلمنا تحت
وحشتيني
طب ما كنت قولتهالي تحت برضه
الصراحة قولت اعوضك ، كُنت عايز نقضي رأس السنة برا زي ما كُنا متعودين فـ الخطوبة ، والحقيقة كُنت عامل حسابي اقبض النهاردة بس للاسف محصلش ، وماكنش معايا الا ١٠٠جنيه
فقولت نطلع نقعد شوية على السطح مننا للسما والبرد محاوطنا عشان ابص فـ عينك واقولك شكراً انك في حياتي وشيلاني وعمرك ماشيلتيني هم ، شكراً على اصلك واخلاصك ليا
انا معملتش اي انجاز فـ حياتي غير اني لحقتك من زحمة الدنيا واختارتك تمشي معايا الطريق ، حبيت اقولك كل سنة وانتي معايا وكل اللي معايا واللي حيلتي ، سنة جديدة بتبدي فـ حياتنا بوعدك فيها اني افضل احبك واصونك واقدرك واجبر بخاطرك ،وحبيت اتمنى فـ بداية السنة الجديدة انك تكوني راضية عني
صحيح مكنش معايا الا ١٠٠ ج بس انا جبتلك بيها حاجات حلوة وشكولاتة حبيت افرحك حتى لو بشئ بسيط ، حبيت ابوس على راسك واحلفلك بان والله العظيم الحياة دي لا تتعاش لا من غيرك ولا بغيرك ، بحبك

بلال العشماوي 🖤

انا مارهنتش على حاجه قبل كده وكسبت ، عيشت منحوس لا نفعت فـ علام ولا حتى في مشروع ، وفجأة بخبط فيكي، وبقرر ادخل رهان جديد بعد ما كُنت توبت عن الرهانات
كل ما افتكر قد ايه تعبت عشان تبقي وعشان نكون هنا برجع اثق ف نفسي ، كل ما افتكر عدد المرات اللي كان ممكن ادوس فيها على زرار الفراق ورجعت بحترم نفسي اكتر ، معاكي نفسي بقى اطول وعضمي بقى انشف
فـ لو خايفه فـ اطمني مفيش اصعب م اللي عدينا بيه من كام سنة مكنتش زي الوقت وبفضلك مش بمجهودي ، قبل ما اقابلك عمري مارهنت على حاجه وكسبت لان ربنا كان محوشلي رزقي م الدنيا دي كله فيكي ، وانا رضيت وبوست عينك رمش وجفن ومابقتش عايز حاجه تانية غير انك تفضلي تفضلي بس

بلال العشماوي🖤

في لحظات ف الدنيا محوشهالك ومش هعيشها الا معاكي ، معاكي انتي وبس ، انا بحبك حتى لو بشحتك من الدنيا هفضل طول عمري امدلها ايدي عشان امسك ايدك ♥️

طب والحب
زي ملك الموت بيزورك مره واحده فـ العمر وانت وحظك لا تبقى مستعد للقاء ده او لأ ، ملك الموت بيجي ياخد روحك م الدنيا والحب بياخد روحك للدنيا

بلال العشماوي 🖤

إشتريتهالي مخصوص ولا وقعت فـ طريقك وجيبتها
يا سلام هتفرق ؟
اومال ، ازاي عايزني اساوي بين انك نزلت ودورت ع محل ووقفت تختار الوردة وبين انك كنت ماشي في امان الله وقابلك حد بيبع فـ افتكرتني !
تصدقي عندك حق ، بس أنا لا ده ولا ده
اومال ؟
أنا زرعهالك بايدي من شهر وكل يوم كنت اسقيها لحد ما فتحت النهاردة قطفتها وجيبتهالك ، يعني دي اتخلقت وطرحت فـ الدنيا عشان تبقى ليكي

بلال العشماوي 🖤

يومين لسانك ماخطبش لساني
مابقتش قادره استحمل
عاتبيني هاتي اللوم عليا بس بلاش تسكتي
حاسه اننا لازم ننفصل
لا يا مريم الفُراق عمره ماكان حل لمشاكلنا ولا الخصام ، جربتي الحُضن اللي بتنزل فيه دمعتين عتاب على زعل وبينتهى بكلمة تعرفك غلاوتك عندي ، البيوت حصاله محتاجين نحوش فيها حنيه نشتري بيها لحظه حلوة مش قسوة ومكابره تطربق حيطان البيت على دماغنا، صدقيني محدش خسران غيرنا

بلال العشماوي 🖤

كُنت مستنيكي من اول الفرح ، اتاخرتي ليه؟
انت عارف الزحمة ، الزحمة دايماً مأخراني
عندك حق الزحمة بتأخر ، عندك انا مثلاً الزحمة أخرتني اني اقابلك اني اخد بالي منك ، كان حواليا زحمة بنات بس مكنش فيهم فرح
انت بتعاكس ولا ايه
الحقيقة اه ، من يوم ما قابلتك وانتي شقلبتي حياتي ، حاولت اقرب منك واخلق 100 صدفة زي النهاردة عشان نتقابل ومع ذلك رفضتيني لما كلمت بابا عليكي ، رفضتيني ليه يا فرح
براهن على قيمتي عندك ، مش يمكن تزهق
بتلعبي بيا يا فرح
توء توء بلعب معاك ، بلاعبك بحب اشوف عيونك اللي بتلمع دي لما تشوفني وانت مستني مني كلمة موافقه
وامتى هتقوليها امتى؟
مش عارفه ، انت امتى هتزهق؟
لما العالم كله يصحى وانا مصحاش ، لما قلبي يقف عن النبض.
موافق تستنى ليه ؟
عشان انتي اخر محطة ، واخر امل ف اني اعيش راضي بعيشتي ، انتي لو حبتيني والله ما هطلب حاجه تانية م الدنيا ، هسكت خالص هكتفي اني اعيش اتمتع بيكي ، لو بس تقولي موافقة العالم كله فـ عنيا هيحلو

بلال العشماوي 🖤

هفضل شايف إن واحدة من أهم مُتع الراجل هي الانفاق على أهل بيته ، الواحد مننا بيتمرمط وبيروح ويجي ويكسب فلوس عشان لحظة هيدخل فيها على مراته وجايبلها إحتياجاتها ونوع الشكولاتة المفضل ليها ، وهو بيكرمشلها قرشين وبيقولها إنزلي روحي للكوافير وروقي على نفسك ، الإنفاق والبذخ على أهل بيتك حتى لو بأخر فلوس معاك واحده من أهم المُتع اللي بيحسها الراجل اللي بتحسسه بقيمة تعبه وأهميته ، عشان كده عمري ما كنت مع فكرة إن الست تشارك في مصروف البيت او تشتغل تحت مدير لو مزاجه وحش شوية يزعقلها او يضايقها ، لأ ده لا عاش ولا كان اللي يزعلها او يحوجها لحاجة وانا حي أرزق

بلال العشماوي 🖤

الحاجة الوحيدة اللي تستاهل محاولاتك فعلاً هي تغيير نفسك للاحسن غير كده متحاولش 😏❤️❤️❤️❤️❤️❤️❤️❤️❤️❤️❤️❤️❤️❤️❤️''

عجبك كده اهو النهار طلع علينا وهتتأخر ع الشغل
مش مهم المهم انك بقيتي أحسن ومبقتيش زعلانه
اه الصراحة الشوية اللي اتمشيناهم دول فرقوا معايا ، بس برضه كده كده كُنا هنتصالح من غير ما تنزل تمشيني
أنا عارف ان كده كده المشكلة هتتحل والخناقة هتخلص والزعل هيختفي ، بس عارفه ايه اللي هيفضل؟ اني ماسيبتكيش تنامي زعلانه ، وخاطرك مكسور منه حته ، فـ حقك عليا

بلال العشماوي 🖤

اتمنيت كتير يجمعني بيكي ترابيزة واتنين قهوة زي دول ، النهاردة مش ديت زي ما انتي فاهمة النهاردة انا جاي اقولك تحويشة كلام اتشال ليكي من شهور ..بقولك ايه
تشاركيني؟ ، عندي حياة فاضيه ومشاعر لسه بخيرها ومشاكل حلها ف وجودك ، عندي بيت بس محتاج حسك وعندي عيون مبتشوفش غيرك وعندي امل ف الجاي يكون بيكي
قالولي مبتفكرش ف الجواز ، قولتلهم لو بس تسمعني وتشوف غلاوتها ف عيني كانت حست بان في انسان ف العالم مش عايز غير طيفها ويتونس بيها ف عمره الجاي ، ويقاسمها كبايتين شاي بالنعناع ف بلكونه اتعملت على ذوقها
قالولي مبتعمرش ، قولتلهم خايفه والخايف يطمن ميتعاقبش على خوفه ، وانا جيت لها عشان تبطل تخاف ، جيتلها عشان تفتح شباكها وتطل عليا منه من تاني
قالولي مش هتتحملها ، وانا قولت كتافي اتخلقت قادره تشيلها ، قالولي الجوازه مش هتم تجاوزها وعيش حياتك وانا قولت ان شافت الحب اللي ف قلبي هتوافق ، وهتختار بكامل ارادتها تشاركني الجاي
انا جايلك بعد تالت مره يقولولي مش نافع ، وده لاني ادركت اني مش محتاج اتجاوزك انا محتاج اتجوزك
تتجوزيني؟ مستني جواب


بلال العشماوي 🖤

مش بعرف أكون تقيل وياكي برغم اني تقيل لكن معاكي عرفت ان عدم اظاهر مشاعرك لحبيبتك ده غلط وانك عايز تبان انك بتتحب طول الوقت وانك الواد التقيل اللي مفيش منه اتنين مش هيزود رجولتي، الحب يعني موده ورحمه ومسؤولية
اني اتباهى بيكي ده مش كرم مني او مجهود اضافي ، لاني لو مش عايز اعمل كده لمجرد اني هيتقال عليا مدلوق او واقع او خلافه ابقى مش بعطيكي حقك
ربنا خلقني قوي وخلقك أضعف وخلقك محتاجه انك تدللي كل شويه ، محتاجه تشوفي الوَحش القوي الصلب ده اللي مع كل الناس بيضعف ويلين قدامك
كنت فاهم الرجوله غلط، مكنتش اعرف لو ماليش خير ودلال ف مراتي عمر ما بيتي هيكون فيه حب ، ولو كانت تُهمتي اني بحبك ومدلوق وبتباهى بيكي وبجري وراكي ف انامش بريئ ،لانك انتي يتمشيلك بلاد ويتحط العالم بين كفوفك عشان ترضى

بلال العشماوي 🖤