مهدي التقي

بنت الزهره فاطم هاي مرضيّه
والحاجات يم معصومة مگضيّه

ــــــــــــــــــ

بت وأم المكـــارم لازم انعــدها
سخيّه وما ترد الإيــد إلـ تمدهـا
دگ الباب وإخذ الحاجه من عـدها
تگضيها أو تِرِد ابراحه نفسيّه

ــــــــــــــــــ

ابدي منين بيهـا .. أو وين أختمها ؟
بمعصومة الجوانب صعبه أرسمها
چبيره ويا قصيدة الليله إلـ تلمها
الحچي ابمعصومه كون ايصير ليليّه

ــــــــــــــــــ

الليله الوحده وي معصومه متكفّي
أويه السلطانه كون إنكفّي ونوفّـي
كون إبصدري حيل الليله أدگ چفي
تستاهل قليــله وياهــا لطميّـه

ــــــــــــــــــ

هاي إخت الرضا السلطان . والقاسم
كريمه هواي كلّش تشـبه الكاظـم
من الزهره خذت مو بس إسم فاطم
هنيئـاً للزچيــه بهيــچ علويّه

ــــــــــــــــــ

تقره إگــلوب هــاي إبنيّة الزهره
تعرف حاجتك بس تدخل الحضره
چن عمها الحسن ما لمّت السُفَره
گبل إحچايتك تنطيـك عالنيّـه

ــــــــــــــــــ

شيل ايدك الليله وسلّــم إعليها
بسم الله گـول ونيتــك انويهـا
معصومه الدموع الليله تشريها
يا سلطانــه گِلها إتعبت ما بيّه

ــــــــــــــــــ

عمها حسين هاي وتشتري الدمعه
شكو إبگلبك كلام احچيلها اتسمعه
مِدْ چفك الخالي إتّـرْسه و ترجعه
الـ عليك هواي عد إخت الرضا إشويّه

ــــــــــــــــــ

#مهدي_التقي
#عظم_الله_أجوركم_بذكرى_شهادتها

( نعي للإمام الحسن المظلوم ع )

عاده النــاس تمشـي ويه اليشـيعون
لو شـــافوا جِنــــازه فــوگ المتــون
الحسن ميّت عليْه چا ليــش يرمون ؟!
إبحيازَتْ جــده گـــالوا ما تدفنــون
ـــــــــــــــــــــــــ
المصيبه إعله الچتاف إچبير الخوان
والجَنّـــازه چــانو ويـــن إلـ حّــنان
ليش بگــاع جــده مالَـــه إمچــــان
ولا چَــنّه الحســن مـــن آل عـدنان
ـــــــــــــــــــــــــ
وادم بــس حــقد وگلـــوبهم سُـود
وچبد حسين مثل الحسـن ممــرود
إحتار إبنعــش أخييّه إيروح ويعـود
يطلّــع بالســهام ويـدفن الجــــود
ـــــــــــــــــــــــــ
و رَدّ من دفنه محني و مَر عَلَى الدار
ولن بِمْضيــف أخيّـه ناس خطــار
گلب حســين چن موگد جمر صـار
گلهُم يا هــلا .. بـس گلـبه شب نـار
ـــــــــــــــــــــــــ

دِفَنْت هواي بس الأخو ـ دَفنَه آه
الكرَم شِلناه أو ويّه التُرُب ـ دِفناه
إكرام الواحد من إيمـوت ـ دفنـه
موش إسـهامه تصبــح واهليّه

ـــــــــــــــــــــــــ
مهدي التقي

#عظم_الله_أجوركم 🏴

https://youtu.be/2nQFAakz0ow?si=wRWy-F048gAWLEfu

| الإستفادة من عاشوراء |

إنّ المستفيدين [ من عاشوراء ] كالمستفيدين [ في يوم عاشوراء ] وحالهم كحال ذلك الذي يطمع بمُلك الريّ أو ذلك الذي سَلّب خاتم الحسين (ع) بل وصل الطمع بهم حتى في تِكّة سروال الإمام روحي فداه ..!!

فكن من المتضررين من قتل الحسين (ع) حتى تُحسَب في الصف الذي كان فيه زُهير بن القين وحبيب بن مظاهر وبرير بن خُضير , ولا تكن كالمستفيدين ( في يوم عاشوراء ) فتُحسَبُ في صفّ المعسكر المقابل .
( فحكم الأمثال فيما يجوز ولا يجوز واحد)

#لنفسي_ومن_يشبهني!!

| عاشوراء و سُنَنُ الأنبيَاء |

( بسم الله الرحمن الرحيم )
وصلّى الله على سيدنا محمد وعلى آله الطيبين الطاهرين المعصومين المظلومين ..

إلــى / المُصلِح الذي حوّل الزمن من فترات ميّتة مُهملة الى وحدات حيّة وفاعلة وشعائر نابضة بالحياة ..
إلــى /سيد الشهداء وأبيّ الضيم و وراث الأنبياء .

🔰 السُنّةُ الأولى 🔰

- في البداية نلتقي مع نبي الله نوح (ع)

🔰 عُمقُ حديث السفينة 🔰

عندما يقول من لا ينطق عن الهوى و أفضل الخلق وهو رسول الله وخاتم النبيين نبينا محمد(صلى الله عليه وآله ) :
( إن مثل أهل بيتي كمثل سفينة نوح من ركبها نجا ومن تخلف عنها هلك ) [1] .

- فإن لرسول الله (ص) غاية وحديثه يكون عميقاً بعمق شخصيته (ص) , وكما أن للقرآن ظاهر وباطن فإن لكلامهم صلوات الله عليهم ظاهرٌ وباطن أيضاً , بل لعلّ المفهوم يرتقي و يصل الى أنّ كما للقرآن سبعين باطن فإن لكلامهم سبعين باطن لأنهم عدل القرآن و بحسب قاعدة :
( حكم الأمثال في ما يجوز ولا يجوز واحد ) [2]
، وبناءاً على أنهم عِدل القرآن فيثبت لهم ما يثبت للقرآن من حيث العمق في دقة الكلام ولذلك صار كلامهم فوق مستوى الخلق و دون مستوى الخالق .
وعندما يقول الإمام الصادق (ع) كلّنا سفن النجاة إلاّ أنّ سفينة جدي الحسين أوسع والى النجاة أسرع ) فإن لحديثه ظاهرٌ وباطن فمهوم السرعة على مستوى عقولنا هي السرعة الظاهرية التي تسير فيها السفينة في لُجَج البحار وهذا بمقدار ما تتحمله عقولنا لفهم مضمون حديثهم فهم سلام الله عليهم أُمِرُوا أن يكلّموا الناس على قدر عقولهم ,

🔰الحركة الرسالية في السفينتين🔰

و لنبدأ من نبي الله (نوح) عليه السلام من حيث حركته الرسالية ومطابقتها مع ما جرى في عاشوراء الحسين (ع) فعندما يقول الله تعالى عن لسان نبي الله ( نوح ) ( وَقَالَ ٱرْكَبُواْ فِيهَا بِسْمِ ٱللَّهِ مَجْرٜاهَا وَمُرْسَهَآۚ إِنَّ رَبِّي لَغَفُورٞ رَّحِيمٞ ) [3] .
- فهذه الدعوة من قبل نوح (ع) للركوب بالسفينة لغرض النجاة .. وهذه الحقيقة هي غير غائبة عن سيد شباب أهل الجنة وسبيله سبيل الأنبياء ولأنه وريثهم وبحسب القانون الإلهي ( سُنَّةَ ٱللَّهِ فِي ٱلَّذِينَ خَلَوْاْ مِن قَبْلُۖ وَلَن تَجِدَ لِسُنَّةِ ٱللَّهِ تَبْدِيلٗا ) [4] و بحسب نص المعصوم في زيارة وارث ( السَّلامُ عـَلَيْكَ يا وارِثَ نـوُحٍ نَبــِيِ اللهِ ) [5] .

- فكما دعى نوح الناس الى ركوب السفينة فإن الحسين وبحسب الروايات أنه عقد الكثير من المؤتمرات والمحاولات بعد شهادة أخيه الإمام الحسن المجتبى ( عليه السلام ) فكان دائماً يكرر قول : ( إلا ترون إلى الحق لا يُعملُ به وإلى الباطل لا يُتَناهى عنه لَيَرْغبَ المؤمن في لقاء الله ، فإني لا أرى الموت إلا سعادة ولا الحياة مع الظالمين إلا برما) [6] .
حيث إستمرت هذه المحاولات من سنة (50هـ) الى سنة (61هـ) وهذه بمثابة الدعوة المفتوحة لركوب هذه السفينة الفريدة من نوعها فهو مصباح هدىً وسفينةُ نجاة , والمصباح وحدة قياسه هي سرعة الضوء وقياس مصباح الحسين (ع) سرعة الهداية أما وحدة قياس سفينته هي السرعة النجاتيّة وقد أشار الى هذا المفهوم الإمام الصادق (ع)"
ومن ذُكِر الحسين عنده فخرج من عينيه من الدموع مقدار جناح ذباب كان ثوابه على الله (عز وجل)، ولم يرضَ له بدون الجنة" [7]

🔰نتيجة عدم الركوب في السفينتين 🔰

- إنّ الأمة لم تعِي هذه الحقيقة .. ولذلك وكما هو الملاحَظ أن الله تعالى كما قد أمر نوح في كتابه قال: ( وَأُوحِيَ إِلَىٰ نُوحٍ أَنَّهُۥ لَن يُؤْمِنَ مِن قَوْمِكَ إِلَّا مَن قَدْ ءَامَنَ فَلَا تَبْتَئِسْ بِمَا كَانُواْ يَفْعَلُونَ )[8] فقد إصطدم نوح بجدار الزمن حيث لا يوجد أمل بهداية ولو شخص واحد بعد هذا الإخبار الإلهي وبعدها جاء الأمر بجريان السفينة .

- وكذلك الإمام الحسين عليه السلام إنتهج هذا النهج من حيث نفاذ جميع محاولات الإصلاح بالطرق السلميّة و معرفته بعدم هداية الناس والإصرار في البقاء على ضلالتهم في إتّباع الباطل !! وكان لسان حاله يقول كما قال نوح (ع) : ( رَبِّ إِنِّي دَعَوْتُ قَوْمِي لَيْلٗا وَنَهَارٗا فَلَمْ يَزِدْهُمْ دُعَآءِيٓ إِلَّا فِرَارٗا وَإِنِّي كُلَّمَا دَعَوْتُهُمْ لِتَغْفِرَ لَهُمْ جَعَلُوٓاْ أَصَٰبِعَهُمْ فِيٓ ءَاذَانِهِمْ وَٱسْتَغْشَوْاْ ثِيَابَهُمْ وَأَصَرُّواْ وَٱسْتَكْبَرُواْ ٱسْتِكْبَارٗا ثُمَّ إِنِّي دَعَوْتُهُمْ جِهَارٗا ثُمَّ إِنِّيٓ أَعْلَنتُ لَهُمْ وَأَسْرَرْتُ لَهُمْ إِسْرَارٗا ) [9]
- كتب الى أخيه محمد بن الحنفية ( " بسم الله الرحمن الرحيم من الحسين بن علي بن أبي طالب إلى بني هاشم. أما بعد فإنه من لحق بي منكم استشهد ، ومن تخلف لم يبلغ مبلغ الفتح والسلام ") [10]
- وبالفعل سارت سفينته على هيئة ضعن وبداخل تلك السفينة سُفُن صحراويّة عليها هوادج تحمل كعبة الشرف والأحزان وخيرة الأولاد من آل محمد (ص) .

🔰هلاك من تَخلّف عن السفينتين 🔰

- لقد وصل الحال بنبي الله نوح عندما يَئِس من قومه ولم يبقى مَتّسع من الوقت للصعود بسفينتة وصار الوقت ليس بصالحه فقد قضى عمراً طويلاً في تبليغ رسالة السماء و أن صرف المزيد من الوقت قد يؤدي الى التأثير على عدد المؤمنين برسالته ..
- توجّه بالدعاء على قومه ( وَقَالَ نُوحٞ رَّبِّ لَا تَذَرْ عَلَى ٱلْأَرْضِ مِنَ ٱلْكَٰفِرِينَ دَيَّارًا ) [11]

- فكذلك الإمام الحسين عليه السلام لما رأى إصرار الأمة على قتل أخوته وبني عمومته و أصحابه ولم توفّق الأمة الى معرفة سرعة هذه السفينة .. إقتفى أثر من وَرِثه وهو نوح عليه السلام وذلك من خلال الدعاء على هؤلاء القوم فقال : أللهم فامنعهم بركات الأرض ، وإن منعتهم ففرقهم تفريقا ، ومزقهم تمزيقا ، واجعلهم طرائق قددا ، ولا ترضِ الولاة عنهم أبدا، فإنهم دعونا لينصرونا، ثم عدوا علينا يقاتلونا ويقتلونا ) [12]

🔰تشابُه السفينتين من حـيث النوع و الكم🔰

- إنّ المٌلفت للنظر والعجيب أن هناك تشابه من حيث الكم والنوع بين السفينتين فقد قال الله تعالى في بيان ذلك : ( حَتَّىٰٓ إِذَا جَآءَ أَمْرُنَا وَفَارَ ٱلتَّنُّورُ قُلْنَا ٱحْمِلْ فِيهَا مِن كُلّٖ زَوْجَيْنِ ٱثْنَيْنِ وَأَهْلَكَ إِلَّا مَن سَبَقَ عَلَيْهِ ٱلْقَوْلُ وَمَنْ ءَامَنَۚ وَمَآ ءَامَنَ مَعَهُۥٓ إِلَّا قَلِيلٞ ) [13]
والقليل المذكور في السفينة الذين ركبوا مع نوح هم (80) ثمانون شخصاً فقط . [14]

- والذين ركبوا في سفينة الحسين وساروا في الركب الحسيني هم (نَيف وسعبين) والنَيف في اللغة من حيث العدد هو من ( واحد الى تسعة ) وهو عدد مقارب جداً لعدد الركاب في سفينة نوح (ع) هذا من حيث الكم .

- أما من حيث النوع كما أن نوح لم يمنع حتى جنس الحيوانات من النجاة والركوب في السفينة ..
- فإن للحيوانات حصة من ناحية النجاة مع سفينة الحسين (ع) وإن ارتفع عنها التكليف , لكنها حصلت على نوع من النجاة كما حصل مع الحيوانات التي ركبت مع نوح (ع)

- حيث ورد. أنه ( بكت الإنس والجن والطير والوحش على الحسين بن علي عليهما السلام حتى ذرفت دموعها ) [15] .

- ولقد تعدّى الأمر في البكاء على الحسين المعقول فلم يشمل فقط الإنسان والحيوان بل تعدى الى الجماد فشُمِلَت بالرحمة الموجودة في البكاء على الحسين(ع) حتى الجمادات والعجماوات وما يُرى وما لا يُرى .

- حتى ورد أنّه لمّا مضى بكت عليه السَّماوات السّبع والأرضون السَّبع وما فيهنّ وما بينهنّ ومَن ينقلب عليهنَّ ، والجنّة والنّار ، وما خلق ربّنا وما يرى وما لا يرى» [16] .

جعلنا الله وإياكم من رُكّاب هذه السفينة والمشمولين بالرحمة الواسعة
(والحمد لله رب العالمين )

مهدي التقي
12 ذي الحجة 1445 هـ

المصادر /
ـــــــــــــــــــــــ
[1] بحار الأنوار للمجلسي / ج 23 ص 124
[2] وهو قانون عقلي خاص العليّة ومبدأ العليّة .. مفاده ما يثبت للأول يثبت للآخر .
[3] سورة هود الآية (31)
[4] سورة الأحزاب الآية (62)
[5]زيارة وارث من أشهر الزيارات التي يُزار بها الإمام الحسين(ع) ، وقد وردت عن الإمام الصادق(ع) ، رواها ابن قولويه1 (ت368هـ) في كتابه (كامل الزيارات)
[6] تاريخ / ج 5 ص 403
[7] بحار الأنوار / ج 44 ص291
[8] سورة هود الآية (36)
[9] سورة نوح الآيات ( 5 _ 6 - 7 - 8 - 9 )
[10] بحار الأنوار / ج 44 ص 330
[11] سورة نوح الآية (26)
[12] موسوعة كلمات الإمام الحسين (ع) ص554
[13] سورة هود الآية (40)
[14] تفسير القمي / ج 1 ص327
[15] العوالم ـ الإمام الحسين / الشيخ عبدالله البحراني / ص 489
[16] كامل الزيارات / ص82

قالَهَا صادِقُنا .. قَولُهُ مَحـلاه
إنّما شيـعَتُنا .. مَن أطاعَ الله
يلّي إعشَگِت لقرايه .. ضيفلها لمصلايه
ــــــــــــــــــــــــ
إلحواس الخمسة تتحاسب عليهــا
حسين أعرف بالشعيره اليشتريها
هاي چفنه الـ عالخدامه إمعوديها
إيد موسى إتصير إذا نتوضـه بيها

حسين مثل الحر يريدك
على التوبه إمعـوّد إيدك
مثل ممشى الحُـر لإمامه
الطاعه خل تمشي بوريدك

كلشي ما ينضم أبد .. عالنبي وعالآل
تلطم وتذنب سوه .. تنعرض لأعمال
دامك عشگت الرايه .. ضيفلها لمصلايه
ــــــــــــــــــــــــ
واللسان البيْه ننعى إعله الغريبه
كون يتحول نبي مو ترســه غيبه
مو إحچايه التآخذه إحچايه التجيبه
وَقف خلّه إلكربلاء وكلّه طيبــه

حسين طيّــب ما يردّك
إنته بس أصدق بوعدك
تهجر القــرآن يزعــل
لا تضـيع هــذا جهدك

حسين هوه اعله الرمح .. منذبح عطشان
و بالشــفاه الذابله .. ويقـــره بالقرآن
إقره المواقف هايه .. ضيفلها لمصلايه
ــــــــــــــــــــــــ
تنسإل عن كلشــي باچــر بالقيامه
واحد من إسم الحشــر يوم النـدامه
الدنيا مثل الگنطره اعبرها بسلامه
حته إذنك كــون تنجــح بالخدامه

كون مو بس بالمجالس
بالعِبَاده اتصيـر عابس
إفتح إذنـك للنصيحـة
وإسمع الينصح إبواهس

الصاح هل من ناصرٍ .. يعني راد إمعين
حسين من صلى الظهر .. راد نصر الدين
يعني الصلاة الغايه .. ضيفلها لمصلايه
ــــــــــــــــــــــــ
والجدام التمشي بيهن للزياره
بيها كون إتقلد إجدام الأُسارى
عَوْده عالسجاده جدمك مو خساره
إلصَلّت إبليل إهدعش ما همها ناره

حسين نعمه وكله رحمه
إنطانه دمه و راد خــدمه
شِبِه زينب ياهو صلّــى ؟!
وفوگ جمره إمخلي جدمه

الراد يثبت جعفري .. وينتمني إلمولاه
عالشفاعه انحط شرط .. وافتهم معناه
من تمشي بالمشايه .. ضيفلها لمصلايه
ــــــــــــــــــــــــ
والعيون البچت دمعه إعله القداسه
هاي مرتبطه ابعيون العالــي راسه
عالمُحرَّم كــون تقلع من أســاسه
الغلط ما يحتاج شرْحْ أو لا دراســه

و أبو فاضل كون أعينه
كون أخلّي بعيني عينه
مو أزيـده إبسـهـم ثـاني
إنطانه چفه وحامى دِينَه

ليل عاشر من گضى .. تدري چان إشلون
مو گضوه مثل النحل .. عالصلا إيموتون

إبهاي الروايه إكفايه .. ضيفلها لمصلايه
ــــــــــــــــــــــــ

مهدي التقي

| رســالة مفتوحــة |

شـــيلوها المنــــابر غَـــاد
قانـــون الحَـــدَاثَه أجمَــلْ

المنبر ما يوصّـــل صُــــوت
قنــــاة إلـ يُوتْيــوب أســهَلْ

حــــلاة الجَــزَع بالتــوزيع
قصيده ويه الموسيقى أكمَلْ

إبمنصّـــات التواصُــل كـون
مــــن تنعـــاد مـــا تِنْمَـلْ

أدري إبحچيـي مـــا مقـبول
و خـــلّه ابراحــته اليزعَلْ

مــــرّات الشِـــعِر تكلــيف
بلكـــت بالـ نَقِـــد تِنْــحَلْ

إنعَمْ الله إعله چم واحد عود
جــــاي إيقــــدّم الأفضــلْ

الزَرِع عَــدّ الأصــابع صـــار
مُقابـل مِيْــتْ ألـــف مِنْجَـلْ

دِســـنَه هـواي صدر حسين
وعَشْـره إتدوســه بالمَقتَـلْ !!

مُقَدّس ماكـــو كُلنَــا إذنُــوب
خــــل نحچـــيها بالمُجـمَلْ

صِعَدنــه هـواي بِسْـم حسين
ونسـينه الصعّـدت إعله التّـلْ

إنتســـابُگ عن رِضَا المعصوم
ونبحــث كــــون عـالأمـــثَلْ

حِــطّ إگبـــالك الزهـــــراء
إبـ لَحنَــك والشِــعِر تِقــبَلُ ؟!

تره الحُـــر صُفَن بيها هـواي
وآخـــر لحظــه يالله إنْـدَلْ

وإحــنه إمضيعيّـن حســين
و نِنْــدل لو صـــدگ نِســأَلْ

سَجِّــل كلشـي بِسْم حسـين
وهــوه ابكلشـــي يتْكَــــفَّلْ

حمـزه إمسَـــجِّل أبكاسـيت
لذلك حمـــزه باقــــي أوّلْ !!

إلــى / نفسي و مَن عَلَى شاكِلَتي ..
#يا_أبا_عبد_الله 💔

[ نعي الليلة العاشرة من محرم ]
ــــــــــــــــــــ
إذا ذنــب الكبــار وكــون يگضـون
إعله أبو رُگبة الترفه شلون يرمون
رِضَع من دمّه مو مثل إلـ يرضعـون
مــا ودّاه لأمــه إنطـــاه لإم عــون
ــــــــــــــــــــ
المسافه من المَهَد للسَهَم لحظات
إليطلب ماي بالطّف ينحسِـب مات
عنده ويه السهام حسـين حسبات
هواي بيــوم عاشــر بيهـا لچمات
ــــــــــــــــــــ
وچــان بليــل عاشر آخـر أوداع
وصار بيوم عاشر كلشي عالگـاع
نامــوا عالتــرايب وين إلســباع
ولا واحد حصل لحسيــن فـزّاع
ــــــــــــــــــــ
مهدي التقي

[ نعي الليلة التاسعة من محرم ]
ــــــــــــــــــــ
على وليده الحسين دموعه نيران
عطشان ويمـوت إگبال عطشــان
ليلى إبحال أبوه إنطتنه عنــوان
إلـ علي وجهه تغيّــر صاير ألوان
ــــــــــــــــــــ
الروايه إتگول سِكنه إتسولف وياه
علـي منّانه صوتــه وــموش منّاه
فزع چالليث إجاه وتمــدد إحـذاه
أبوي أبموت أخـوي المــوت ضاگاه
ــــــــــــــــــــ
فِزعـوا بني هاشــم يمّه شـافوه
ومن جثــة علـي بالگوّه شــالوه
وِذَر صوب المخيم جسمه حملوه
إبّدال الماي بسّ أسـيوف شـبعوه
ــــــــــــــــــــ
مهدي التقي

[ نعي الليلة الثامنة من محرم ]
ــــــــــــــــــــ
إثنين إبگلب ابو السجّاد لسهام
إلـ مّثلث و الآخر مــوت جسّـام
چا مات الحســين شلون ينـلام
شاف الحسن طاح وعالترب نام
ــــــــــــــــــــ
يگلّه الموت عمي وياي شتشوف ؟
گله العسـل مُرّ وحـلوه لسـيوف
هيچ اعله الشهاده وياك ملهوف
آنه اليوم غيرك كلشي ماشوف
ــــــــــــــــــــ
إلـ شمع جسام مو ياهو اليجي وذاب
إلـ يعيش المصيبـه اللّي فگد شـاب
حسين احتار يحسب چم گمر غاب
كل ساعه و جِنازه اعله الخيم جاب
ــــــــــــــــــــ
مهدي التقي

[ نعي الليلة السابعة من محرم ]
ــــــــــــــــــــ
الما مخسوف صدره و لاهو ملچوم
خل عن الحسين إيشـيل الهمـوم
كعــد يمّ النهر ما گــادر إيگــوم
الما مكسور ظهره يكسره هاليوم
ــــــــــــــــــــ
گعد يمّه إبضماده إحتار إلحسين
يا ضيعتنه وانته إبلايه چفــين
يّضمّد راسه الأول مدري الايدين ؟
خاف يشيل سهمه وتوجعه العين
ــــــــــــــــــــ
إختصرها حسين ردّ إمشيّب الراس
مـــا گللّها زينــــب راح عبــــاس
راح إلخيمتــه وبيهـا الخَبَر جاس
عمود النــاس طــاح وما بقت ناس
ــــــــــــــــــــ
مهدي التقي

[ نعي الليلة السادسة من محرم ]
ــــــــــــــــــــ
مو بــس الـ عَمايِمكُم تِذِبّــــون
على الصحبه العظيمه ذبّو لعيون
الـ گضّوا ليـل عاشــر بس يصلّون
يحشْمهم حســين وما يجيــبون
ــــــــــــــــــــ
يحشمهم ابو الســجاد ويصــيح
ماكو اجواب صوته ايرجّعه الريح
موش أصحاب چانو چالمصــابيح
كون الليله واحـد يمهُم إيطيــح
ــــــــــــــــــــ
هَدْوا فَرِد هَدّه مـن الفجــر ذاك
ولَحَد هالليله تنزل يمهم أملاك
داروا عالمخيّــم دوْرَت أفــــلاك
نجوم وعالرمل چن طاحو اهناك
ــــــــــــــــــــ
مهدي التقي

[ نعي الليلة الخامسة من محرم ]
ــــــــــــــــــــ
إعله مسلم گلب أبو السجاد مجمور
اليطب للكوفه يدري إبدمه مهدور
لـو محراب .. لو مــن قصر مشمور
كل ساعه اعله واحد ظهره مكسور
ــــــــــــــــــــ
خبر مسلم وصلّ له وبالضعن شاع
بعــد ما بايعتـه الــناس ينبــاع !!
جيبولي حميده يصيح كــل ساع
المجالس بالضعـينه چانــت أنواع
ــــــــــــــــــــ
الليله حسين جرحه إيريدله ضماد
اعله ابن عمه حزين و همّه يزداد
مــرّه يصيح بنتــه ومــره الأولاد
مَهو مسـلم أخيّـه وظهــره بي شاد
ــــــــــــــــــــ
مهدي التقي

[ نعي الليلة الرابعة من محرم ]
ــــــــــــــــــــ
على أمّ الاربعه خل تعمى لعيون
رَبنَه وأهـل يثـرب بيها يــدرون
لو هل المحـــرّم حـــالها شلون ؟
كون إنورِّم الهــا اخدود وجـفون
ــــــــــــــــــــ
مو بالشط تسوّي و تشمُـر الـزين
چانت بس تِرَبّي وتنطي لحسين
كَضَّت لَه الدرب وتنوح شــهرين
وعليها اليوم چان إيصير سَنتِيْن
ــــــــــــــــــــ
الوَلَد لو راح لأمه إيكطِّــع إبتـوت
بس أم الوفه إتوصّــي الوَلَد (مُوت)
البيــت إبلا حسـين إتگـول تابوت
تره اليبچي البچليها الليله مبخوت
ــــــــــــــــــــ
مهدي التقي

[ نعي الليلة الثالثة من محرم ]
ــــــــــــــــــــ
مرّن عالعليله اســـوالف إثگال
ماتت يوم أبـوها حَمَّــل وشال
كون اعله العليله الدمع لو سال
مو بچفوف كون إبصاع ينچـال
ــــــــــــــــــــ
مو بــس للعليله دمعــة العــين
هالليله البچي المفروض لحسين
صعب تِفِرد إبنيّه وتاخذ إثنـين
كون اعله العليله إنـموت مرتين
ــــــــــــــــــــ
گلبــك عالعليله علِّمـه إيذوب
صبر يعگوب عدهـا وعلِّة أيوب
ياخذها الغروب يجيبها إغروب
أبوها إيموت وهيه إتّاني مكتوب
ــــــــــــــــــــ
مهدي التقي

[ نعي الليلة الثانية من محرم ]
ــــــــــــــــــــ
الميّت له عزيز وگلبــه مجـروح
خل ينسى عزيزه وللطف إيــروح
على الصاحت لَخَيها ابصوت مبحوح
وعلي كون إعله زينب تِطلَع الروح
ــــــــــــــــــــ
ما شبعت بواچي وحلّ المصــاب
واجت ويه الزچيه ولازمه الباب
محرّم شهر زينب و أم الأطـياب
لا تنلام حگها الفاگـده أحــباب
ــــــــــــــــــــ
هالليله إعلـه زينب كــون الونين
مِثْــل أوحيْد و أهله گباله مَيْتين
يَـ عَيني من البواچي كـون تعمين
دمــع هـاي الليالي ايعـادل إسنيـن
ــــــــــــــــــــ

مهدي التقي

[ نعي الليلة الأولى من محرم ]
ــــــــــــــــــــ
هالليله قمـيص حســين مرفوع
كون ويه الزچيه إنكسْــر إلضْلوع
على المسحوگ صدره أشويّه لدموع
كون الليلــه واحد نحــره مگطوع
ــــــــــــــــــــ
كون ويه الرضـا . من يِهِل عاشور
بس اعله الحسين ادموعنه إتفور
يحاچي إبنَ شَبِيْب وگلبه مكسور
الما يبچي إعله جدي ماهو معذور
ــــــــــــــــــــ
هالليله إمـامَك ينحــب إدمــوم
على الميّت ومنّ الماي محــروم
وحيد وياهو عنه إيشيل الهموم
وعلى گبر الحسين إيطيح ويگوم
ــــــــــــــــــــ
مهدي التقي