3labalek Officiel

#علابالك_دين #علابالك_وعي

من لي كنا صغار.. نعرفو بلي 2+1‏ = 3 ياك ؟ بصح اسكو جات ف بالك بلي مام 2-1=3 ؟

راح تضحك عليا باين 😂 سي نورمال.. راني غير نخلط.. بصح قبل منكمل خلينا نمدو للمعادلتين اسم و نديرو مثال من الواقع..

اللولة هي المعادلة الرياضية و الثانية هي المعادلة الإلهية..

كي تنفق شوية م دراهمك و تطبق المعادلة الرياضية و المنطقية.. راح تلقى بلي دراهمك نقصو.. وتخسر جزء من مالك.. صح؟

بصح كي نطبقو المعادلة الثانية راح تكون مختلفة تماما.. كيفاش ؟ و علاش ؟
راها معادلة ماشي منطقية.. بصح منطقية و هذا لي يخليها interesting..

قال الله تعالى:
“لِيُنفِقْ ذُو سَعَةٍ مِّن سَعَتِهِ ۖ وَمَن قُدِرَ عَلَيْهِ رِزْقُهُ فَلْيُنفِقْ مِمَّا آتَاهُ اللَّهُ ۚ لَا يُكَلِّفُ اللَّهُ نَفْسًا إِلَّا مَا آتَاهَا ۚ سَيَجْعَلُ اللَّهُ بَعْدَ عُسْرٍ يُسْرًا”

بمعنى انفق خاطرش هذيك الصدقة مشي مجرد عمل صالح.. راها علاقة بينك وبين الله.. راك متخيل.. هي فرصة لي تزرع الثقة فيه.. و كيما قريت ف الآية الكريمة.. ربي يعلمنا بلي حتى إذا كان رزقك محدود.. و معندكش.. و كانت الظروف صعيبة عليك.. متخافش كي تنفق.. “سَيَجْعَلُ اللَّهُ بَعْدَ عُسْرٍ يُسْرًا”

يعني، كي تنفق.. حتى وتكون حاسب مالك رح ينقص.. ربي رح يرزقك ويضاعف لك البركة.. و هذا هو سر معادلة الله 2 - 1 = 3 غير المنطقية عكس الاولى اللي منطقية..

السر في هاذ الثقة تلقاه فالمثال العظيم لقصة موسى عليه السلام.. كي كانت أمو خايفة على حياتو.. حتى ربي أوحى لها باش ترميه في البحر.. كيفاش هذا الحل منطقي؟؟؟؟ كيفاش ترمي ابنك الصغير في اليم؟؟ و انت اصلا راك خايف على حياتو ؟؟؟؟ بصح هو التوكل على الله اللي كان أكبر من كل المخاوف.. لقوله تعالى:
“فَأَلْقِيهِ فِي الْيَمِّ وَلَا تَخَافِي وَلَا تَحْزَنِي إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ”

هذي القصة توريلك بلي الإيمان مهوش منطقي.. بصح يرتكز على الثقة المطلقة بالله.. هكذا الله يفتح أبواب الرزق بعد العسر ويحقق اليسر..

تسما إذا كنت خايف ولا مقلق على رزقك.. التوكل على الله هو الحل.. خلي ثقتك فيه أكبر من كل شي.. انفِق بصدق.. و كون متأكد أنو الله رح يعوضك ويرزقك ببركة ما كنتش تتوقعها..

المعادلة الإلهية بسيطة: تنفق.. خاطرش الإنفاق مراهش خسارة.. انما هو استثمار في رزقك.. و راح يعوضك الله بفضل واسع.. و تعرف بلي بعد العسر يجي اليسر..

تصبحون على خير 🤍

أيوب عليه السلام مالقاش عافيتو بعد سنين المرض غير بسبب حاجة وحدة ⬇️

{إِنَّا وَجَدۡنَـٰهُ صَابِرࣰاۚ نِّعۡمَ ٱلۡعَبۡدُ إِنَّهُۥۤ أَوَّابࣱ}

بزاف أبواب الصبر هو مفتاحها، ومعندهاش مفتاح من غير الصبر 🤍

كاين أمور حلها "اليقين بالله" .. مكانش سبب لنجاتك بصح واثق انك رح تنجو، لأن ثقتك في رب الأسباب مش الأسباب 🤍

#علابالك_دين
قداه يلزمك باش تدرك انو من أعظم الأسباب لي تخليك سعيد هي "سلامة صدرك"؟

كل يوم يغذي الواحد روحو باش يكون أفضل الناس .. نسخة أفضل من نفسه ولنفسه .. أقرب لربه وأنفع لخلق ربه .. بصح علابالكم بلي أفضلُ النّاسِ كلُّ مخمومِ القلبِ؟

مخموم القلب .. ممكن تكون سمعت هاذ الكلمة من قبل، بصح واش معناها؟

يومًا سألو النبي ﷺ: "يا رسول الله، من خير الناس؟" جاوبهم: "كل مخموم القلب، صدوق اللسان" .. الصحابة تفاجؤوا! وحالهم حالنا، صدوق اللسان عرفوها، بصح واش معناها "مخموم القلب"؟

شرحها النبي ﷺ بكل بساطة: "هو التقي النقي، لا إثم فيه، ولا بغي، ولا غل، ولا حسد" .. يعني قلب نظيف، وصدر سليم، لا كره فيه ، ولا حقد، ما فيهش نية شر!

اجتهد باش توصل لهذا السكون الجميل .. انو يحفظ الله قلبك .. فيكون هذا القلب نظيف طاهر  ..  باطنك ظريف وين تفرح لغيرك في بلاصة ما تحقد .. تحمد على وش عندك في بلاصة ما تحسد

وهل كاين شعور أفضل من انو يكون قلبك محفوظ بحفظ الله ورعايته؟ صراحة "علابالك" عجز انو يوصف هذا الشعور وخلاكم نتوم توصفولنا في التعليقات .. ولكن!

وش رايكم يعوضكم "علابالك" عن عجزو هذا بأنو يتعمقلكم في موضوع سلامة الصدر كثر ويجيبلكم كيفاش تكون مخموم القلب؟

أفضلُ النّاسِ كلُّ مخمومِ القلبِ 🤍⬇️

الحمدلله لي جعل الإنسان مفطور على البدء من جديد .. بعد انتكاسته توبة، بعد قنوطه رحمة، وبعد سقوطه وقوف 🤍

"يكفي أنك عند الله لا تهون"💛

رقدتو؟ علابالك كان رح يرقد بصح تذكركم وقال خلي يطل عليكم باش يفكركم انو "دموعك غالية عند الله"

حبْس دموعك ليس من الإيمان وبل دموعك غالية عند الله .. معلابالناش شكون فيكم راه موجوع بصح علابالنا أنو الله يعلم وجعه .. تصبحو على خير أحبابنا في الله 🤍

-انتظار الصلاة 🤍

المَلائِكَةُ تُصَلِّي عَلَى أَحَدِكُمْ مَا دَامَ فِي مُصَلاَّهُ الَّذي صَلَّى فِيهِ مَا لمْ يُحْدِثْ، تَقُولُ: اللَّهُمَّ اغْفِرْ لَهُ، اللَّهُمَّ ارْحَمْهُ

-الذِكر 🤍

'لا يَقْعُدُ قَوْمٌ يَذْكُرُونَ اللَّهَ عَزَّ وَجَلَّ إِلّا حَفَّتْهُمُ المَلائِكَةُ، وَغَشِيَتْهُمُ الرَّحْمَةُ، وَنَزَلَتْ عليهمِ السَّكِينَةُ، وَذَكَرَهُمُ اللَّهُ فِيمَن عِنْدَهُ'

-بعدما يذكر العبد الله في الأرض رح يذكرو الله في الملأ ويكون الله مع عبدو ويرفعو في السماء بين الملائكة 🤍

'يقولُ اللَّهُ تَعالى: أنا عِنْدَ ظَنِّ عَبْدِي بي، وأنا معهُ إذا ذَكَرَنِي، فإنْ ذَكَرَنِي في نَفْسِهِ ذَكَرْتُهُ في نَفْسِي، وإنْ ذَكَرَنِي في مَلَإٍ ذَكَرْتُهُ في مَلَإٍ خَيْرٍ منهمْ، وإنْ تَقَرَّبَ إلَيَّ بشِبْرٍ تَقَرَّبْتُ إلَيْهِ ذِراعًا، وإنْ تَقَرَّبَ إلَيَّ ذِراعًا تَقَرَّبْتُ إلَيْهِ باعًا، وإنْ أتانِي يَمْشِي أتَيْتُهُ هَرْوَلَةً'

-الله سبحانو وتعالى إذا أحب عبد من عباده ، يذكرو في الملأ الأعلى، وهو بمثابة تكريم واعتراف لله بحب هذا العبد الصالح 🤍

كتبانلكم من قبل مقال على "كيفاه يحبك الله وترجع محبوب الكون" 🫣

-القراءة والتدبر في القرآن خلي صوتك مألوف في الملأ الأعلى ومن يدري ربما تدنو الملائكة لصوتك 🤍

#علابالك_دين
تلك الملائكة دنت لصوتك 💛

أتخيل معايا يُذكر اسمك في الملأ الأعلى في جلسة الملائكة المحيطين بالعرش، الملائكة المقربين من الله كيما جبريل وميكائيل عليهم السلام .. ولا اتخيل معايا تكون قاعد وحدك ونتا متهيألك انك غارق في الوحدة بصح في الصح الملائكة راهم مونسينك في وحدتك

أَسَيْدُ بنُ حُضَيْرٍ رضي اللهُ عنه كان من الصحابة لي عُرفوا بصوتهم العذب في القرآن وإقامتهم العبادة في الليل .. هو الصحابي لي قبَل بطن الرسول ﷺ، واحد من النقباء لي اختارهم رسول الله ونفسو الرجل لي قال فيه ﷺ "نِعْمَ الرجلُ"

في ليلة من الليالي كان أسيد يقرا في سورة البقرة، وبينما هو يقرا بدا يحس بحركة قوية من فرسه لي كانت مربوطة في بيتو .. الفرس اضطربت بشكل مفاجئ وعنيف وكان كلما يقرا كلما يزيد اضطرابها

الصحابي قلق لأنو ولده يحيى كان قريب منها فخاف عليه .. وقف القراءة وبعد وليدو على الفرس .. وهنا كانت مفاجأة في السما تستنا فيه .. غير طلع راسو شاف حاجة "مثل الظلة"، كيما وصفها، كانت سحابة مضيئة ومملوءة نور، تضيء وكأنها مصابيح

في الصباح حدث النبي ﷺ عن النور لي شافو، فجاوبو رسول الله ﷺ: "اقْرَأْ يا ابنَ حُضَيْرٍ، اقْرَأْ يا ابنَ حُضَيْرٍ" بمعنى كان لازم يكمل القراءة لأنو الشي لي صرالو من فضل الله فـ"تلك الملائكة دَنَتْ لصوتك"، أي قربت من صوتو ولوكان كمل القراءة لكانت الملائكة لا تختفي عن الأنظار وكانو الناس رح يشوفوها

وحتى تنال هذا الجزاء لازم تدير بضعة أمور رح نخليولك شوية منهم ⬇️

#علابالك_دين
كي تسمع بلي الرسول عليه الصلاة والسلام في ليلة الإسراء والمعراج تلاقى بالأنبياء ووصفولو الجنة .. ونقراو في القرآن الكريم وصف الجنة ونعيمها و بلي المؤمنين الموعودين بيها راهم فيها .. يجي في بالك سؤال: كيفاش الأنبياء والمؤمنين راهم في الجنة ولا شافو الجنة .. رغم أنو مزال مصراتش القيامة ولا الحشر؟ وكيفاش يتفسر هاذ الشي مع العلم بلي الدخول النهائي للجنة يكون بعد الحساب؟

سؤال كيما هذا بزاف ناس تتساءلو .. وعندو علاقة كبيرة بعالم الغيب وأسرارو .. يبان الموضوع معقد شوية .. بصح بالقليل من البحث والتحري والتدبر تتوضح الصورة ان شاء الله..

بعد وفاة الأنبياء .. يعيشو حياة مميزة يسموها العلماء "حياة البرزخ" .. هاذي الحياة راهي بين الدنيا والآخرة .. وماشي كيما حياتنا .. لأنو الأنبياء عندهم مكانة خاصة عند ربي .. وسبحانو عز وجل يكرمهم ويقربهم من نعيم الجنة ويعطيهم لمحات منها ..

والشي اللي شافو النبي ﷺ في ليلة الإسراء والمعراج .. كان معجزة من عند ربي .. والأنبياء اللي شافهم ووصفولو الجنة كان عندهم جزء من هاذ التكريم .. وحتى المؤمنين بعد موتهم يبداو يشوفو نعيم الجنة في قبورهم .. و هذا جزء من رحمة الله باش يطمنهم ويثبتهم ..

إبراهيم عليه السلام وصى الرسول عليه الصلاة والسلام وقالو: "يا محمَّدُ ، أقرئ أمَّتَكَ منِّي السَّلامَ وأخبِرْهُم أنَّ الجنَّةَ طيِّبةُ التُّربةِ عذبةُ الماءِ ، وأنَّها قيعانٌ ، وأنَّ غِراسَها سُبحانَ اللَّهِ والحمدُ للَّهِ ولا إلَهَ إلَّا اللَّهُ واللَّهُ أَكْبرُ" .. يعني حتى نعيم الجنة لي غادي نشوفوه مربوط بذكر الله والعمل الصالح .. وقال الإمام ابن القيم رحمه الله في كتابه "الروح": الأرواح متفاوتة في مستقرها في البرزخ أعظم تفاوت فمنها أرواح في أعلى عليين في الملأ الأعلى وهي أرواح الأنبياء صلوات الله وسلامه عليهم وهم متفاوتون في منازلهم كما رآهم النبي ليلة الإسراء ..

بصح النعيم اللي في البرزخ ماشي هو الدخول النهائي للجنة .. لأنو الدخول الكامل يجي بعد يوم القيامة والحساب وينقسم الناس بين الجنة والنار حسب أعمالهم .. و هاذ الأمور الغيبية تبين عظمة خلق الله ورحمته الواسعة .. وخلاتنا نفهمو بلي حتى بعد الموت .. المؤمن يعيش في كرامة ونعيم حتى يجي يوم القيامة ويدخل الجنة بشكلها الكامل ..

كخلاصة لكل ماسبق .. أرواح الأنبياء (المتوفين) دون أجسادهم هي اللي راهي فالجنة .. ومعها أرواح الشهداء والصالحين المتوفين من أمتنا والأمم السابقة كذلك .. أما الأجساد فهي جميعا في الأرض بما فيها أجساد الأنبياء .. وأول من يدخل الجنة ويتنعم فيها بروحه وجسده هو نبينا محمد صلى الله عليه وسلم ..

والله أعلم ..

سبحان الله .. الإنسان مايقدرش ڤع يتوقع شاراه لاقيه وشا ممكن يصرى في أي لحظة!

هاذيك اللحظة لي تتغلق عليك فيها ڤع الابواب وتقول صايي هاذي النهاية وخلاص كلش ومكان حتى أمل، ممكن فجأة تتحول لحاجة ما توقعتهاش ويبان ضوء ماكنتش تستنى فيه!

صفحة "علابالك" هي مثال؛ قبل شهر برك ولا أقل درنا إعلان بلي صايي انتهينا وهذا حدّنا ولي قدرنا نمدوه .. وصح تغلقت في وجوهنا وانعكس هذا على الصفحة وصح كنا ناويين نغلقوها وخلاص كلشي وفقدنا شغفنا وآمالنا وأحلامنا

بصح ماعلابالناش كيفاه حتى بان ضو ورجعت .. ماعلابالناش كيفاه صرات وظهر بلي مزال الصفحة عندها لي تمدّو .. على الرغم من أنو ظروف الأدامنة مزالت نفسها! مزالت الظروف ماتساعدش لتسيير صفحة كهذه ومزال شغفنا ضعيف وطاقتنا سلبية والمورال عيان، بصح كيفاه حتى الصفحة راهي تمشي ومزالت تقدم فالمزيد ومنين راه يجي محتواها وكيفاه! الله أعلم .. كالمعجزة سبحان الله!

هذا كـان كمثال برك، كل واحد فينا عنده حلم، مشروع، نية زواج، ولا حاجة يستنى فيها تتحقق وممكن راهي تبانلو بلي مافيهاش وتغلقت الابواب .. مالا ماتقولش انتهت، ماتفقدش أملك ويقينك بالله، ماتقدرش تعرف ڤع شا ممكن يصرى وفي أي لحظة، مدام ذاك الشيء ما خلاصش ونسبة نجاحه حتى ولوكان ولات 1% مزال كاين أمل، ممكن يبان مخرج في أي لحظة!

#علابالك_دين #علابالك_شخصيات
سمعتو عن مسلم جاهد في سبيل الجنة بصح سمعتو عن المسلم لي جاهد في سبيل جهنم في المعركـ ـة؟

قال الرسول ﷺ عن هذا المسلم: "إنه من أهل النار!"، وتخيلوا، هذا الشخص قاتل أشد القتال، لدرجة أن الصحابة شكوا في كلام النبي ﷺ ..

لُقبت بمعركة الحصون، وهي من أشرس المعارك لي فاتت على المسلمين ضد اليهـ ـود، المعركة لي دمر فيها المسلمين أقوى حصون الجزيرة العربية ودمرو معاها غرور اليهـ ـود، نفسها المعركة لي قال فيها الرسول ﷺ: 'لأعطين الراية غدًا لرجل يحبه الله ورسوله'، ونفسها المعركة لي اقتلع فيها علي بن أبي طالب حصن عجز عن حمله 7 رجال ⬇️

خَيْبَر، منطقة كانو اليهود يفتخرو بيها، قلعة مُهندسة بالحصون، كل حصن يمثل قلعة مستقلة بأبواب ثقيلة يعجز عليها سبع رجال أشداء، هذا هو الشي لي خلاهم يقولو عليها: "مستحيلة الاختراق وأي جيش يوقف ضدهم رح يتكسر قبل ما يقدر يوصل للأسوار"

الذكاء الحربي هذا خلى اليهـ ـود يغرقو في غرورهم ورجعت خيبر وكر خبيث للفتن والمؤامرات ضد المسلمين .. بصح النصر راه قريب فقد نزلت آية 'وَعَدَكُمُ اللَّهُ مَغَانِمَ كَثِيرَةً تَأْخُذُونَهَا فَعَجَّلَ لَكُمْ هَذِهِ وَكَفَّ أَيْدِيَ النَّاسِ عَنْكُمْ'

بعدما آن الأوان لتصفية الحسابات مع اليهـ ود لي كانو حابين يضربو الإسلام من الداخل، خرج جـ ـيش المسلمين سنة 7 هـ لخيبر لي كانت بعيدة عن المدينة 180 كيلو، خرجو يمشيو على خطة فيها نوع من التمويه، يخرجو فليل وميهاجموش حتى يوصل الصباح وين يكونو اليهـ ـود مشغولين بأمورهم المعتادة

وصل الصباح وخرجو اليهـ ود من حصونهم مشغولين بالزراعة في يديهم الآلات الزراعية وغير شافو النبي ﷺ قالوا: "محمد والله، محمد والخميس (الجيوش) وهنا قال النبي صلى الله عليه وسلم: "الله أكبر خربت خيبر" .. يا جماعة، قُبح صباح المُنذرين وإنتهت خيبر

بداو المسلمين في اقتلاع الحصون حصن ورا خوه، لي كانت مهمة صعيبة كـ 'حصن ناعم' لي استغرق فتحه عشرة أيام كاملين واستشهد في ذلك الصحابي 'محمود بن مسلمة'

نحكيو شوية على المسلمين في الغزوة هذي .. 1600 واحد يعيطو 'الله أكبر' حتى كادت تُقتلع احبالهم الصوتية .. كانو يعيطو لدرجة انو الرسول طلب منهم يرحمو أنفسهم فقال 'أيها الناس! تدعون سميعا قريبا وهو معكم'

شجعان المسلمين لي كانو سيوفهم وسهامهم اشجع من العدو .. بصح بين هذي السهام، سهمًا قتل صاحبه المسلم ..

"الشجاع قُزمان" من بين المسلمين لي التحقو بصفوف جيش الرسول ودخلو يحاربو وماهمهمش يخرجو أحياء أو لا ..

قزمان كان ميفوتش عليه عـ ـدو إلا وقتـ لو .. اشتد سيفه على اليهـ ـود، فقتـ ل منهم ما قتـ ـل حتى تعجبو منه الصحابة .. وأثناء القتـ ـال جرحوه الكفار بسيوفهم وسهامهم حتى اشتد الوجع على جسمو

نزف وتوجع، ثم مـ ـات وجروح الحـ ـرب تغطي جسمه .. بعدها فرحو بيه الصحابة وتهيأ لهم انو مكانه في الجنة ولكن قال لهم الرسول ﷺ انه في النار

تعجب الصحابة نفس تعجبنا وربما أكثر .. كيفاش هذا لي بذل ما بذل في المعركة لجانب المسلمين، وجُرح لدرجة انو جروحه قد أقعـ ـدته يكون في النار؟!

راح واحد من الصحابة للرسول ﷺ على سبيل الاستفهام كيف يكون في جهــنم بِمِثْلِ مَنْ يُقاتِلُ في سَبيلِ اللهِ عزَّ وجلَّ وهو مُسلِمٌ أنْ يكونَ مِن أهلِ النَّارِ؟! فأكدله الرسول ﷺ انو هذا الرجل راه في النار رغم عن الشي لي بذلو في صفوف المسلمين

بعض الناس جاهم الشك في قلوبهم من قول الرسول ﷺ بصح رسول الحق لا يأتي إلا بالحق، قزمان بعدما حس بوجع الجراح مقدرش يتحمل .. مقدرش يتحمل حريق جروحه ولا نزيف دمه فقرر يوقف هذا الألم

مد يدو نحو الكِنانة وهي وعاء من الجلد كانو يخبيو فيه الأسهم .. جبد قزمان سهم من السهام بصح المرة هذي السهم مكانش موجه للعدو الكافر لالا .. السهم كان موجه لقزمان .. وقف قزمان السهم في الأرض ورقد عليه وهكذا أنهى ألمه وأنهى حيـ ـاته

قزمان كان يملك الشجاع والقوة لكنو ماملكش "صلاح القلب" .. القلب مضغة صلاحها بالاستقامة .. انك تمتثل لأوامره وتتجنب نواهيه، الاستقامة ما تتطلبش القوة في القتال وخلاص، بل يتطلب النية الصافية والإخلاص لله

والجهاد ميكونش قدام الناس بقوة السيوف وفوز بالغنائم بل نصرة لله والرسوله وإن اللَّهَ لَيُؤَيِّدُ هذا الدِّينَ بالرَّجُلِ الفاجِرِ


جهـ ـاد النفس أصعب جهـ ـاد ووعد منا لكم اننا رح نغوصو في الموضوع مع بعض 💛

مع إقتراب تنفيذ قرار الهدنة (مور يومين ولا 3) بدى الكيـ ـان بشن هجمات غادرة وجرائم مروعة راهي صارية حاليًا للأسف، وهذا معروف منهم ديما قبل تنفيذ الهدنـات!

اليهـ ـ/ود معروفين عبر التاريخ بنقض العهود والمواثيق، حتى لي عقدوها مع الله عز وجل ..

في القرآن الكريم، جا ذكر بني إسـ رائيـ ل ديما على كيفاه خالفو أوامر الله بعد أن أنعم عليهم بالنعم، نقضو عهدهم معه مرارًا وتكرارًا:

"أَوَكُلَّمَا عَاهَدُوا عَهْدًا نَبَذَهُ فَرِيقٌ مِّنْهُم بَلْ أَكْثَرُهُمْ لَا يُؤْمِنُونَ" — البقرة: 100

تاريخيًا، نلقاوهم ديما يتلاعبو بالعهود، سواء مع الأنبياء، ولا مع الأمم والشعوب. كيف لنا أن نثق بمن خان الله؟!

حتى لليوم، رانا نشوفو كيفاه يتعمدو نقض الاتفاقيات الدولية، وخرق القوانين الإنسانية، وهو ما نشهده في هذا القصـ ـف على أهلنا في فلسطين، رغم توقيع اتفاق لوقف إطلاق النـ ـار

هاذ السلوك ماهوش جديد؛ هو امتداد لتاريخ مليء بالمكر والخداع، بني إسرائيل مثال حي على الخيانة والغدر، فكيف لنا أن ننتظر منهم احترام العهود وهم الذين خانوا أعظم ميثاق مع خالقهم؟!

الأحداث لي رانا عايشينها اليوم هي جديد على قوله تعالى: "وَلاَ يَزَالُونَ يُقَاتِلُونَكُمْ حَتَّى يَرُدُّوكُمْ عَنْ دِينِكُمْ إِنِ اسْتَطَاعُوا" — البقرة: 217

بعد اكثر سنة من الحـ ـرب الطاحـ ـنة والقـ ـتل الوحشي والتدمـ ـير الهمجي..تم التفاوض بين حمـ ـاس و المتطـ رف النـ ـفاياتي بالوساطة القطرية حول وقف إطلاق النار وتم توقيع الصفقة و غدوة راح يعلنو عليها على ان يتم وقف إطلاق النار وتبادل الاسرى نهار الاحد ان شاءالله.

في الحقيقة النفـ ـايات طلبت وقف النار من قبل و هذا بضغط من ترامب.. والأمر قعد بيد حمـ ـاس لي اخذت منو فترة طويلة باش يراجعو كل تفاصيل تع تفاصيل الاتفاقية بالكلمة و الموضع تعها.. باش يضمنو بلي سيتم وقف إطلاق النار وانسحاب عسكري كلّي على غـ ـزة.. لانو معروفين النـ ـفايات بتلاعبهم وخداعهم ومكرهم و وعودهم المضللة..

لكن هل بعد اكثر من سنة من الحـ ـرب حققت النـ ـفايات الاهداف المسّطرة منذ البداية؟ النـ ـفايات فشلت في اعادة جميع الرهائن والقضاء على حمـ ـاس وتدمير انفاقهم وشبكاتهم العسكرية وتغيير استراتيجي في غـ ـزة كيما كانو ناويين في الاول.. وبالرغم من وحشيتهم وتطرفهم راح يخرجوا أذلة صاغرين من غـ ـزة.. والنصر لله وحده وللمؤمنين.

وفي الأخير التاريخ لايرحم.. لن ننسى من كان مع القضية ومن خان.. من وقف بجانب الباطل ضد الحق.. اولئك المطبّعين ولا عزاء لهم.. والحمدلله والعاقبة للتحرير من النهر الى بحر.. وعاشت فلسطيـ ـن حرّة أبية.

#علابالك_دين #علابالك_وعي
⚠️ بخصوص الحرائق الواقعة في أمريـكا حاليًا، وبخصوص فكرة أنه "عقاب" من الله سبحانه وتعالى:

الفكرة تع العقاب ممكن ماتتقبلهاش بينك وبين نفسك، ولا كشغل يجيك تخمام رافض للفكرة وتستغربها وتجيك تساؤلات بزاف من نوع:

- "كيفاه نقولو على هذا عقاب ربّاني وهي ظاهرة عادية معروفة وكان كاين قبلها تحذيرات؟"
- "واش ذنب الناس لي عايشين ثماك ومنهم المسلمين مثلاً لي ماعندهمش علاقة بالسياسات لي ترتكبها حكومتهم وجيشهم ورافضين ليها أصلا؟!"
- "علاه مانزلش العقاب على دولة العدوان مباشرةً ونزل على دولة مؤيدة؟ ولوكان جا في دولة مسلمة نقولو نفس الشي!؟"

الأسئلة هاذي طبيعية خصوصًا بكوننا أمة بعدت على الدّين وقلّ ارتباطنا بالقرآن ومواعضه، قلال لي باقيين يقراوا القرآن بفهم ويستحضرو أحاديث النبي عليه الصلاة والسلام ويتعضو منها، بصح كي نرجعو لكيفاه حكالنا ربي سبحانو في القرآن على قصص الأمم لي قبلنا، الفهم تاعنا لمثل هذه الأحداث يتبدل ..

مثلاً؛ قوم عاد في قصّتهم كي شافوا السحاب داخل عليهم مور ماحذرهم سيدنا هود، قالو: "هذا عارض ممطرنا"، يعني فرحو بالسحاب وحسبوه مطر، بصح ربي قال: "بل هو ما استعجلتم به ريح فيها عذاب أليم"، يعني ظاهرة علمية عادية، بصح كانت حاملة عقاب ..

وزيد قصة إبن سيدنا نوح عليه السلام، كي قاله أبوه: "اركب معنا"، رد عليه: "سآوي إلى جبل يعصمني من الماء" .. كان حاسبه مجرد فيضان عادي، وماخممش فيه بكونه عقوبة إلهية، النتيجة؟ "وحال بينهما الموج فكان من المغرقين" .. فيضان عادي ولا موج بصح عبارة عن عقاب ..

والقرآن مليء بهذه القصص، عقابات أغلبها عبارة عن ريح، مطر، زلزال إلخ.. يعني الظواهر الطبيعية مشي ديما "أمور عادية" ممكن تكون رسالة ولا عقوبة ولا "ابتلاء"

النبي عليه الصلاة والسلام كان كي يشوف سحابة فالسماء، كان يبقى داخل وخارج وباين في وجهه القلق والتوتر، وعائشة رضي الله عنها تسقسيه على واش بيه، ويقولها: "ما أدري لعله كما قال قوم: فلما رأوه عارضا مستقبل أوديتهم" .. وهذا شكون!؟ أنعم النبي لي قال له ربي: "وما كان الله ليعذبهم وأنت فيهم" .. حامل الرسالة ورسول العالمين ماكانش يطمئن كي يشوف حاجة عادية كيما سحاب كبير، خاطرش "الحاجة العادية" هاذي أهلكت أمّة سابقة ..

حتى الكسوف والخسوف، حاجة نشوفوها اليوم طبيعية ومتعودين عليها، بصح النبي كان يصلي صلاة طويلة عند حدوثها: "خسفت الشمس في عهد رسول الله صلى الله عليه وسلم فصلى صلاة طويلة وهي صلاة الكسوف، ثم خرج وكلم الصحابة وقال: "إن الشمس والقمر لا ينكسفان لموت أحد ولا لحياته، ولكنهما آيتان من آيات الله يخوف الله بهما عباده، فإذا رأيتم ذلك فصلوا"

أنعم، الشي العادي هذاك يبعثو ربي سبحانو لتخويفنا، لتذكيرنـا بقدرته، هي صح "ظاهرة طبيعية" بصح عندها حكمة ثابتة من الله وهي باش نخافو ونصلو ونظهر خضوعنا لله سبحانه .. وهذا كان فعل الرسول عليه الصلاة والسلام لي أصلا ذنبه غفر

صحا، نقدرو نجزمو على وجه اليقين إذا كانت ظاهرة طبيعية كيما الحرائق هي عقاب من الله!؟

مانقدروش نجزمو ونحكمو، بصح عندنا إشارات ودلالات وأمثلة في القرآن ومن السنة على العقاب كيفاه يكون وعلى شكون ينزل، والإبتلاء كيفاه يكون وعلى شكون ينزل، مثلاً النبي عليه الصلاة والسلام قال في حديث: "ما ظهر في قوم الزنـ*ى والربا إلا أحلوا بأنفسهم عذاب الله"

يعني كي تكون كاينة كارثة في مكان معروف بالذنوب والمعاصي كيما الزنـ*ى والكفر، من التدبر والاتعاظ أنك تتوقع بلي هذا راه عذاب .. أما إذا كانت الكارثة في بلاد مسلمة، غالبا تكون ابتلاء من الله، باش يكفر الذنوب ويخوف العصاة ويرجعهم للطريق .. ولا ممكن لحكمة اخرى يعلمها

أما بخصوص الناس لي ماعندهمش علاقة بالكفر بصح تأثرو بالعقاب .. السيدة عائشة رضي الله عنها سألت هاذ السؤال للرسول عليه الصلاة والسلام، وجاوبها وقال: "يخسف بأولهم وآخرهم ثم يبعثون على نياتهم" ..

أي يوقع العذاب على الجميع، بصح المؤمنين المسلمين يُبعثون حسب أعمالهم، وغالبًا يكونو قلة في مكان العقاب ..

والله تعالى أعلى وأعلم.
ربي يحفظنا ويرزقنا حسن الظن به والتدبر في حكمته.

#علابالك_دين #علابالك_حيوانات | ريـبوست
《لسان النمر يتميز بشدة خشونته لدرجة تمكنه من نزع الجلد عن فريسته، وباستطاعته إزالة الطلاء من الجدران!》

هاذ المعلومة ممكن تكون فاتت عليك من قبل وتحسها مبالغ فيها نوعًا ما، بصح واش رايك لوكان نقولك بلي فيها قدر كبير من الصحة!؟

أنعم، يقدر النمر يسلخ الجلد وينحيه بلسانه برك بلا مايستخدم أسنانه إذا بغى .. غير بالأشواك ولا الخطافات لي كاينين فاللسان (في الصور)!

اللسان تاع النمر فيه أشواك حادة من مادة الكيراتين الصلب، وكيما ڤلنا قادرة تسلخ الجلد من أي فريسة .. و قادرة تنَّجر الصبيغة من الحيط بلحسة برك!

هاذ الشي ماهوش عند النمور برك راه عند الفصيلة كاملة، حتى القطط .. مثلا اذا باغي تشوف أشواك النمر بلا ما يطير ذراعك 😅 يكفي أنك تقرب من قطة وشُوف لسانها، غادي تلاحظ الأشواك هاذي وإذا لحساتك تحس بالإنزعاج منها، والفرق هو الحجم والصلابة بينهم وبين تاع النمور

وهاذي حكمة من عند ربي سُبحانو لي عطى قُدرات التكيّف والتأقلم البيئية لكل حيوان حتى وهوما من نفس الفصيلة (السنوريات) مع اختلاف الرُتب .. وكيما قلنا؛ ڤع "السنوريات" عندها نفس الخصائص هاذي في لسانها بصح "النمر" الاشواك تاعه هي الكبيرة والطويلة

⚠️ نخلو موضوع الأشواك على جهة ونتأملو في حاجة .. علاه كاين فرُوق في نفس الفصيلة والفروق هاذي تتسبب في تغيير "الرُتبة" من كائن لخوه!؟

ربي سبحانو يقول: "مَا اتَّخَذَ اللَّهُ مِن وَلَدٍ وَمَا كَانَ مَعَهُ مِنْ إِلَهٍ إِذاً لَّذَهَبَ كُلُّ إِلَهٍ بِمَا خَلَقَ وَلَعَلا بَعْضُهُمْ عَلَى بَعْضٍ سُبْحَانَ اللَّهِ عَمَّا يَصِفُونَ" — المؤمنون: 90

هنا ربي قالنا بلي الكون عنده إله واحد برك ولوكان كانو أكثر من إله كنا غادي نشوفو اختلافات جذرية فالشكل تاع الخلق خاطرش كل إله غادي يسيي يخلق كائنات مبدلة وأفضل من غيره!

تسما وحدة من أكبر الأدلة اللي تثبت بلي الكون عنده "إله" واحد هي طريقة الخلق وتشابه المخلوقات .. يعني مثلا "السنوريات" ڤع عندها نفس اللسان، بصح كل واحد عندو المقدار لي يساعده باش يتكيف في بيئته، بصح يبقى نفس اللسان!

اللسان أصلاً مخلوق لڤع الحيوانات والبشر، وفيه تشابه رغم اختلافه، والتشابه هذا يستوعبه عقلنا ويفهمه ومام الإختلاف نفهموه .. بصح كيفية "الخلق" وحدة والنمط واحد خاطرش ڤع جايين من نفس المصدر

"قُلْ مَن رَّبُّ السَّمَاوَاتِ وَالأَرْضِ قُلِ اللّهُ قُلْ أَفَاتَّخَذْتُم مِّن دُونِهِ أَوْلِيَاء لاَ يَمْلِكُونَ لِأَنفُسِهِمْ نَفْعاً وَلاَ ضَرّاً قُلْ هَلْ يَسْتَوِي الأَعْمَى وَالْبَصِيرُ أَمْ هَلْ تَسْتَوِي الظُّلُمَاتُ وَالنُّورُ أَمْ جَعَلُواْ لِلّهِ شُرَكَاء خَلَقُواْ كَخَلْقِهِ فَتَشَابَهَ الْخَلْقُ عَلَيْهِمْ قُلِ اللّهُ خَالِقُ كُلِّ شَيْءٍ وَهُوالْوَاحِدُ الْقَهَّارُ" — الرعد: 16

ربي سبحانو قالنا بلي الكفار دارو مع الله شركاء، بصح كيفاه لوكان كاين "شركاء" يخلقوا نفس "الخلق" والمخلوقات ڤع تمشي بنفس النظام والأسلوب!؟

على هاذي كي تتأمل مليح فالكون غادي تقدر تفهم بلي ربي سبحانو هو الواحد القهار خالق كل شيء .. لوكان عندك "شك" اعرف بلي راك تخمم غالط خاطرش بالاستدلال المنطقي، الله واحد خاطرش الخلق كيفيته واحدة، كُل شيء متكرر وكل شيء اختلافه بتكرارهِ ملحُوظ سبحان الله، وأنت نفسك "دليل" على وحدانيّة الله!

"سَنُرِيهِمْ آيَاتِنَا فِي الْآفَاقِ وَفِي أَنفُسِهِمْ حَتَّى يَتَبَيَّنَ لَهُمْ أَنَّهُ الْحَقُّ أَوَلَمْ يَكْفِ بِرَبِّكَ أَنَّهُ عَلَى كُلِّ شَيْءٍ شَهِيدٌ" — فصلت: 53

#علابالك_وعي
في عز الشتاء القنافذ يلموا رواحهم باش يدفاو بصح المشكل أنو الشوك تعهم يجرح بعضاهم ويجبرهم يبعدو.. يرجعو يقربو و تعاود نفس الحكاية حتى يفهمو بلي لازم يخلو مسافة امان بيناتهم.. المسافة هادي قريبة كفاية للدفء وبعيدة كفاية لتجنب الاذى.

هادي هي معضلة القنفذ لي جا بيها احد الفلاسفة و أسقطها على حياتنا:

الانسان كائن اجتماعي بطبعو و يحب يكون علاقات اجتماعية بصح في نفس الوقت يخاف من الاذى لي يجي منها.. هنا يكون الذكاء في المسافات بحيث يقدر الانسان انو يوازن بين الرغبة تاعو و الحاجة إلى تكوين العلاقات الاجتماعية وفي نفس الوقت تجنب الاذى الناتج عن هذه الاخيرة..

وهاد النوع من الذكاء مهارة تطورها نتا كي تكون تعرف روحك كيفاش داير ودير حدود لكيفاش حاب الناس تتعامل معاك و تحترم حدود الآخرين و تلتزم بالحدود تاعك..

العلاقات ضرورة للعيش.. و وضع الحدود مايعنيش انك تتجنب الناس وإنما تخلي علاقاتك صحية وترسم خريطة واضحة لحياتك الاجتماعية.

#علابالك_تاريخ
فالعصور الوسطى؛ انتشرت في ألمانيا وإنجلترا أداة حديدية معروفة بـ: "لجام التأنيب" ولا "لجام الوقح" و "لجام الساحرة" .. كانت مصممة ومخصصة باش يسكتو بيها الناس ويقمعوهم ويمنعوهم من الكلام وخصوصًا النساء لي "لسانهم طويل" 👀

كانت الأداة تجي من قطعة وحدة تع حديد وتتحط على الرأس وتخلي الفم مغلق وتتقفل من تحت ومايقدرش لي لابسها يهدر نهائيًا حتى تتنحى! وكانت مؤلمة بزاف ووحشية

كان يقدر أي زوج يشريها ويحطها لزوجته المتذمرة ولا للكف عن إزعاجه .. وكانت السلطات تديرها للنساء لي يتدخلو في شؤون الرجال فالشارع ولا لي يسمعو صوتها ارتفع ولا لي تجي ضد نظام معيّن!

#علابالك_علوم
قرينا كلنا في التاريخ و عند أغلبنا و لو معلومات سطحية تفيد بلي أبونا آدم و بعض الرسل و الأنبياء عليهم السلام و القدماء كانت مدى أعمارهم يفوق مدى أعمارنا بأضعاف مضاعفة .. و طبعا قبل ما نتعمقوا فالموضوع يليق نأكدوا و نتفقوا أنه الأعمار بيد الله و هي بقدر منه لكن تاني كاين شيء اسمه الأسباب وفق ديننا .. اتفقنا ؟ هايا نتعمقوا شوي.

السعي وراء ينبوع الشباب كيما يسميه البعض، راه منذ القدم لكن الأبحاث حوله بدأت قبل عقدين فقط، وين قدروا الباحثين من تصنيع دواء متمثل في عقار اسمه "الراباميسين" و بلغوا بيه لتقدم ممتاز في التجارب بخصوص الفئران و الذباب.

العقار يتمد عادي بوصفة طبية، و عمله بعد تجارب سنين على فئران مسنة ظهر في أنو يقوم بزيادة العمر وإبطاء عملية الشيخوخة عبر تحسين مستوى الوظائف الحيوية تاعها اللي كانت متراجعة بحكم سنها الكبير.

كيفاش بالضبط ؟ من خلال تثبيط إنزيم يُعرف باسم mTOR، اللي مسؤول عن اتخاذ القرارات الأساسية في معظم خلايا الجسم والدماغ، فتبدا هاذ الخلايا تركز طاقتها على إعادة تدوير البروتينات التالفة، و إصلاح العضيات مثل الميتوكوندريا، و تنشيط الدفاعات الخلوية، و النتيجة خلايا وأنسجة و أعضاء أكثر صحة مما كانت عليه من قبل.

ازدادت شعبية الراباميسين بعد دراسة أظهرت أن إناث الفئران اللي عطاولها الدواء في منتصف العمر زاد من عمرها بنسبة 60%، و اللي كانت في شيخوختها عاشت 14% أطول، بينما زادت أعمار الذكور بنسبة 9%، بالإضافة لفوائد إضافية، كيما تحسين صحة الجهاز المناعي، ووظائف القلب، والخصوبة لدى الإناث، وعلاج أمراض اللثة.

لكن الحماس و الضجة حوله زادت اكثر بعد الانتقال لمرحلة التجارب البشرية، بسباب النتائج اللي حققها مع الحيوانات، بحيث كي اختابروا الراباميسين تحسنت استجابة كبار السن للقاحات الإنفلونزا بنسبة 20%، بينما أظهرت دراسة أخرى انخفاضًا في التهابات الجهاز التنفسي، لكن في علاج بعض الأمراض المرتبطة بالعمر، مثل مقاومة الأنسولين والزهايمر وأمراض اللثة، كانت النتائج متباينة، يعني الأمر مازال غير واضح و مش محسوم و راه في بداياته.

زيد تاني العلماء حذروا من أنو قد ينقلب الأمر بالعكس .. فالجرعة وطريقة الاستخدام مازلوا قيد الدراسة، و الإفراط في تثبيط mTOR قد يؤدي إلى نتائج عكسية، مثل تقصير العمر بدلاً من إطالته 😂 بسبب الاختلالات البيولوجية اللي ممكن يديريها.

أيا و في رايكم هل رح ينجحوا 100% في إطالة مدى و متوسط عمر الإنسان مثلما كان سابقا ؟؟

لا و الله أبدا و قطعا .. « إن الدين عند الله الإسلام » و هذا ورد في القرءان كلام الله مثلما ورد « أن الأرض يرثها عبادي الصالحون » .. الأرض أرض الله .. المسلمين هم خليفة الله في الأرض .. هم أحـ،ق بأرض خالقهم .. البعض يقول هذا الكلام لحد الآن من وجهة نظر أحادية و مش من كل الأطراف .. صح .. هايا نهدرو على نطاق رؤية شاملة لكل الشـ،رائع ..

باقي الشـ،رائع السماوية تؤمن بالله .. النصـ،رانية المسيـ،حية شريعة عيسى عليه السلام، "الضـ، ـالين حاليا" ورد عندهم في نسخة قديمة للإنجيـ،ل أن محمد ﷺ مذكور عندهم صح كما جاء في القرءان .. و بالنسبة لشريعة موسى عليه السلام، "المغضـ،وب عليهم" جاو لنبينا ﷺ و قالولوا نسقسوك و وفق ذلك رح نشوفوا إذا نامنوا بيك .. جاوبهم كلش صحيح لكن ما آمنوش بيه فقط بسبب أنهم عرفوا أنو الملك جبريل هو اللي ينزل ليه بالوحي و يتعامل معاه و ماشي ميكائيل اللي ينزل بالخير و الرزق ..و قالولوا لن نؤمن بك فجبريل هو من ينزل بالعذاب و عندهم معاه تاريخ سيء (في نظرهم).. يعني حتى القوم اللي ما يتسماوش و عارفين الحق.

الحق واش هو ؟؟ إن الدين عند الله الإسلام
لذا نرجع لكلامنا الأصيل الأصلي الحق

الأرض أرض الله .. الإسلام دين الله .. المسلمين هم الأحـ،ق بأرض الله.

فكر متعالي هذا بنظرة دونية ؟؟ يشبه لفكر واحد دار حالة فالعالم في وقت كانت ألمانيا في ذروة قوتها ؟؟

لا .. بصح الفرق وين ؟
الفرق يكمن في كيفية أخذ الأحـ،قية في الأرض .. مُلك المسلمين لأراضي خالقهم عبر خلافة الله في الأرض أي بالخلافات الإسلامية كان مش بنمط عسكري بحت و حڨرة من الأول أو عنـ،ف غير مبرر لكن كان بنمط نجيك بلادك ببعثات علم أو بتجار و تدخلو معانا للإسلام مرحبا.. ما صدقتش هاذي معليش .. كاين طرق أخرى نجيك بجيش لكن كيفاش ؟؟ بعنـ،ف ديركت ؟؟ لالا نجيك باستعراض قوى دون حصار و نبعث رسول برسالة تحب تدخل للإسـ،لام مرحبا رح يكون بيننا اتفاق و تولي الأرض إسـ،لامية براية إسـ،لامية و كلش تمام و تعيشو في وسطنا بنفس حقوقنا باسكو رانا إخوة في الإسلام و لا فرق بين أعجمي و عربي إلا بالتقوى .. ماتدخلش للإسـ،لام معليش صحا تسلم الأرض بعد حصار و دون حـ،رب مليح أوكي ادفع الجزية .. ما تدخلش للإسـ،لام ما تسلمش الأرض أرض الله حاب حـ،رب و مش حاب أي نوع من الاتفاقيات .. مريڨلة نتا حبيت مش حنا و نتا راك عارف بلي الدين دين حق لكن غالق راسك تنكر كيما نكروا جدودك مرحبا تدي زوج كفوف و هات أرض الله خالقك اللي ناكـ،ر دينه، و لن تُجبر على الإسلام أبدا لا إكراه في الدين لكن أرض الله ليســ،ت لك فأنت ناكـ،ر له فكيف تنعم بنعمه وأرضه !

الأندلس و كل شبر على هذه الأرض كان لمسلمين سيعـ،ود لنا و كل شبر كان لعبد الله ذو القرنين من مشرق الأرض لمغربها سيعـ،ود لعباد الله الصالحين .. و هذا وفق نبوءة رسولنا ﷺ عن أحداث آخر الزمان و قـ،ـيادة واحدة للأرض بيد المهدي ثم عيسى عليه السلام و ستكون القـ،يادة إسلامية .. نظام عالـ،مي آخر جديد .. ستعود الخـ،لافة الاسـ،لامية بإذن الله.. صادق آمين رسولنا صلى الله عليه و سلم.

عائدون أمتي لا تيأسي .. لكن وفق ما قاله تعالى: « أن الأرض يرثها عبادي الصالحون » يعني كي نسڨموا رواحنا و نتمسكوا بديننا ثما الهدرة .. مش بتهاون منا و طبعا مش بفكر المسلم الكيوت صاحب مقولة { الأندلس أرض محتلة عادت لأصحابها }.

#علابالك_تاريخ #علابالك_دين
منذ أيام كانت ذكرى سقوط الأندلس من أيادي المسلمين، لكن موضوعنا اليوم مش على عظمة الأندلس إبان العصر الإسلامي أو أسباب سقوطها مثلا.. الهدرة اليوم دينية تاريخية هامة جوهرية في عمق و صميم فكر الإنسان المسلم المعاصر لفترة آخر الزمان.

الأندلس .. جيوش طارق بن زياد .. غـ،زو من مسلمين مستعمرين محتلين وفق اعتقاد الغرب و البعض، ولا كيما في راسنا فتوحات إسلامية مباركة !!؟

نكرهوا و ما نتقبلوش غزوهم لينا باسم الـ.دين أو كما يسمى الحملات الصـ.ليبية بصح في نفس الوقت نفتاخروا و نعتزوا بغـ،زونا ليهم باسم الـ،دين تحت مسمى الفتوحات الإسلامية !؟

حلال علينا و حرام عليهم ؟؟ كيفاش ؟ ظلمناهم ؟؟
تعالي عليهم !! تناقض من طرفنا !!!

ياسمين قرات فـجامعة هواري بومدين للعلوم والتكنولوجيا .. وخذات شهادة فـالعلوم عام 1990 .. ومن بعد داىت ماستر فـالكيمياء الحيوية .. و كملت دراستها فـجامعة باريس الجنوبية وخذات شهادة الدراسات المعمّقة فـالكيمياء الحيوية عام 1995 ..

فـبداية الألفينات، راحت للولايات المتحدة الأمريكية وخدمت فـالمعهد الوطني الأمريكي للحساسية والأمراض المعدية كباحثة .. و فـ2008 .. ولات أستاذة مساعدة فـجامعة بنسلفانيا .. على خاطر الإنجازات الكبيرة تاعها .. انتخبّوها عضو مدى الحياة فـالأكاديمية الوطنية الأمريكية للعلوم عام 2017 .. وفـجانفي 2024 .. تعينت كمديرة لمعهد باستور ففرنسا .. لي هو واحد من أكبر المراكز العالمية فـدراسة الأحياء والميكروبات والأمراض واللقاحات .. مالا اتخيل معايا حجم الإنجاز .. و تعيين ياسمين بلقايد فهاد المنصب يعكس قيمتها كواحدة من أكبر العلماء فمجالها .. ويبين بلي الكفاءات الجزائرية قادرة توصل للعالمية وتفرض وجودها ..

ياسمين بلقايد تُعتبر من أبرز الباحثين فـمجال علم المناعة .. كتبت أكثر من 220 مقال علمي فـمجالات العدوى والمناعة .. الأبحاث تاعها تركزو على دور الميكروبات فـتعزيز المناعة والوقاية من الأمراض .. وتحليل الخلايا التائية التنظيمية فـالأمراض المعدية .. ودور الخلايا الشجرية .. وتأثير الميكروبيوم على استجابة السرطان للعلاج ..

آخر الانجازات جات فـديسمبر 2024 .. وين ربحت البروفيسورة بلقايد جائزة "نوابغ العرب" فـمجال الطب .. لي تُعتبر شغل "جائزة نوبل للعالم العربي" .. هاذ التكريم جا كتقدير وعرفان على الإسهامات الكبيرة تاعها فـعلم المناعة ودراساتها المرتبطة بدور الميكروبات فـتعزيز المناعة والوقاية من الأمراض ..

نهنّيو البروفيسورة ياسمين بلقايد على هاد الإنجاز العظيم لي يرفع الراية الجزائرية فـالعالم .. خدمتها وتفانيها فـمجال العلم والمناعة نموذج نفتاخرو بيه كجزائريين .. إن شاء الله يكون هاد التكريم بداية لمزيد من النجاحات لي تشرف بلادنا وتبين بلي الكفاءات الجزائرية عندها مكانتها فـالعالم .. ربي يوفقها فـمسيرتها ويزيدها نجاحات على نجاحات

مبروك عليك يا دكتورة .. وديما متألقة ان شاء الله !

#علابالك_شخصيات
البروفيسورة الجزائرية ياسمين بلقايد .. مكاش لي سمع بيها حالها حال النوابغ الجزائرية .. ربحت جائزة "نوابغ العرب" فـمجال الطب .. في ديسمبر اللي فات .. و لي تُعتبر "جائزة نوبل للعالم العربي" ..

نابغتنا زادت فـ1968 فالعاصمة .. وهي عالمة مختصة فـعلم المناعة .. كبرت فـعائلة علمية .. باباها أبو بكر بلقايد كان وزير فـالجزائر .. آخر منصب خدم فيه كان وزير الاتصال والثقافة عام 1992 .. قبل ما يتم اغتيالو عام 1995 رحمة الله عليه .. و في نوفمبر اللي فات قامت جامعة تلمسان اللي تحمل اسم والدها رحمه الله .. بدعوتها لتنظيم محاضرة احتفاءا بمرور نصف قرن على تأسيسها ..

https://youtube.com/shorts/KrW6MqK8cjE?si=m_tGITCfjLbARy1d

#علابالك_أخبار #علابالك_ترند
في الأيام اللي فاتت .. راجت أخبار على ظهور فيروس جديد في الصين .. اسمو الميتابينوموفيروس البشري (HMPV) .. هاذ الفيروس يسبب أعراض تشبه الزكام والأنفلونزا . كيما الحمى و السعال و صعوبة في التنفس .. والأخبار هذا وين وصلت للصفحات الجزائرية وراكم تعرفو حجم التهويل وكاين لي فيكم ربما تصادف مع أحد المنشورات المعنية ..

الحمد لله هاذ المرة راهم يقولو الفيروس ماشي قاتل في الغالب .. بصح يقدر يكون خطير على الناس الكبار في العمر و الصغار واللي عندهم أمراض مزمنة ولا مناعة ضعيفة .. وفي حالات نادرة يقدر يسبب مضاعفات خطيرة كيما الالتهاب الرئوي ..

وللعلم السلطات الصينية قالت بلي الفيروس هذا موسمي وماشي وباء جديد .. بصح الوقاية تبقى حاجة ضرورية باش تحمي روحك وعائلتك.

#علابالك_دين #علابالك_وعي
ونتا قاعد تقلب في مواقع التواصل الاجتماعي تلقى ناس من المشاهير بعاد على ربي بزاف و يديرو المعاصي ويجاهرو بيهم و هكاك حياتهم شابة و كلش يجيهم بالساهل و كيما نقولو "عندهم الزهر!" هنا تخمم ويجيك سؤال وتقول "كيفاش ربي موفقهم؟" "وحنا لي نصلو ونعبدو ربي وما نفوتوش فرض حياتنا صعيبة على عكسهم!" علاش؟

{“فَلَمَّا نَسُوا مَا ذُكِّرُوا بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّى إِذَا فَرِحُوا بِمَا أُوتُوا أَخَذْنَاهُم بَغْتَةً فَإِذَا هُم مُبْلِسُونَ"}.
الاية هادي فيها رعب لانو فيها وعيد كبير واستدراج..

الاستدراج بالنعم هو انو ربي سبحانو ينعم على الانسان بكل الخيرات رغم معاصيه وتقصيره.. وهادي ماشي نِعم في الحقيقة هي نوع من الابتلاء وتمهيد للعقاب.. يعني لوكان تكون مقصر مع ربي وتكون من المفسدين في الارض والطاغين.. ربي سبحانو يسهّلك امرك؟ انعم ايه الدنيا تولي ساهلة كي الما لانك طلعت من رحمة ربي سبحانو بصح مدام مزال ما قبض ربي روحك ولا عذبك تقدر ترجع وتوب..

ماتغريكمش حياة المشاهير ومهما بانولكم ناس فرحانين صدقوني هوما اكثر ناس كئيبين في هاد الدنيا..
{"فَلَا تُعْجِبْكَ أَمْوَالُهُمْ وَلَا أَوْلَادُهُمْ ۚ إِنَّمَا يُرِيدُ اللَّهُ لِيُعَذِّبَهُم بِهَا فِي الْحَيَاةِ الدُّنْيَا وَتَزْهَقَ أَنفُسُهُمْ وَهُمْ كَافِرُونَ"}.
ربي يزين لهم الدنيا باش يزيدو كفر وطغيان وظلم لأنفسهم! ربي يهديهم ويهدينا ويردنا إلى الله ردًا جميلا.

هنا جاوبنا على الشطر الاول من السؤال وبقى الشطر الثاني لي متعلق بينا.. هو حنا لي نعبدو ربي و نقومو بالفرض علاش حياتنا صعيبة؟ علاش انا برك لي راني نعاني؟
"الله يبتليك لأنه يحبك" لازم المؤمن يكون مُبتلى..
{"وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ"}.
ربي يبتليك على قدر إيمانك به.. وهو اعلى واعلم بحالك سبحانه.. كيفاش ما يبتليكش والأنبياء والرُسل بحد ذاتهم كانو مبتليين!.. تأملوا في سير الأنبياء وسيرة نبيّنا صلى الله عليه وسلم تعرفوا بلي كانو من اشّد الناس ابتلاءً.. وهم اقرب الناس لربي..

والابتلاء هو بحد ذاتو اختبار للعبد على إيمانه وعلى صدق ثباته!..
{“أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ"}. وايضاً هو وسيلة لرفع درجات المؤمن في الدنيا والآخرة..

#علابالك_لغات
كاين مشاعر تصرا لكل شخص منقدروش نوصفوهم بلغتنا بصح نحسو بيهم.. بصح كاين ثقافات حول العالم يعطو للهادوك المشاعر لي يجونا وصف دقيق وبكلمة وحدة لدرجة تقول غير هاديك الكلمة تقدر توصف واش نحس..

في الثقافة البرتغالية كاين كلمة “saudade” تقريبا تنطق "ساودادا" وهي هاداك الحنين لشيء او شخص او وقت والرغبة في انك تعاود تعيشو بصح ماتقدرش ترجع ليه.. مثلا تتوحش اليامات كي كنت تقرا و تستنى في الويكند يجي باش تخرج تلعب مع صحابك ولا تروح لدار مانك باش تتلاقى مع ولاد خالتك.. و بالخميس العشية يقولولكم ماتقراوش تخرج فرحان تلقى الوالدة دارت محاجب.. تتفرج هزيم الرعد والشتا تصب برا.. هاد الشعور هو مزيج بين الحب والألم..

في الثقافة الدينماركية كاين كلمة “hygge” (معرفتش كيفاش تنطق المهم ماشي كيما مكتوبة..)
وهو هداك الشعور لي يجيك كي تكون تجوز بحاجة وتحس بالدفء.. مثلا راك تضحك مع صحابك ولا قاعد مع عائلتك وفجأة تجيك لحظة ادراك بلي ربي رازقك بنعمة و تحس بالامتنان هداك..

وفي اللغة الأوردية وهي اللغة الرسمية في باكستان.. كلمة “goya” وهي هداك الشعور لي ما تحسش بيه بصح نتا تكون اندمجت مع الفلم ولا القصة ولا الرواية لي راك تقراها وراك حاسها جزء منك قبل ما تفطن..

بلا ما ننساو.. في لغتنا الجميلة الثرية كاين مفردات بزاف يوصفو المشاعر و بدقة دون الحاجة للاستعانة بلغة اخرى.. لهذا نحن نعتزّ بعربيّتنا وثقافتنا ونشجع على ذلك بشدة.. كما نشجع في نفس الوقت على الاطلاع على ثقافات الغير وحبّ التعلم وشغف المعرفة..

#علابالك_دين
الحب أنواع، فمنه حبٌ كحب زليخة ليوسف، ومنه حبٌ كحب محمد ﷺ لخديجة رضي الله عنها ⬇️

حكينالكم من قبل على شغاف القلب وقلنا انها حجابه وغلافه، مالا تخيلو معايا انو حب يوسف عليه السلام وصل لِشغاف زليخة فدخل تحت هذا الحجاب وغلب على قلبها .. فكان حُب زليخة الحب لي ضاع فيه العقل قبل القلب، وهذا الضياع كبر حتى وصل لدرجة "الضلال المبين"

حُب الضلال هو لي يبعد فيه الواحد عن طريق الحق، يخليه في حالة يرثى لها، وعدم استقرار عاطفي، يتحول لهوس وأذى للمُحب نفسو، وللحبيب .. كزليخة لي مهانش عليها يوسف ومترددتش في إيذائو

قاتلو اخرج عليهن، وهي العبارة لي فيها شي من الإهانة، ولو كانت تحبو الحب النقي كيما تهيألها كانت صانتو ولا اهانتو بإستعراضو على الناس

كي حست انها رح تتعرض للأذى من هذا الحب لجأت للكذب، ومهمهاش انو يوسف رح يتأذى بل تعمدت تذلو وتهينو فقط لأنو مطاوعهاش لوش راهي تدعي

ببساطة لازم الرزانة والثقل .. لازم خديجة ومحمد ⬇️

رغم فرق السن إلا أنو خديجة المرأة الحنون لي احتواتو، محتقرتوش لأنها اغنى منو، مضحكتش عليه ولا استهزات بيه يوم قال زملوني زملوني بالعكس آمنت بيه

حتى محمد ﷺ أحب خديجة حبًا عظيمًا وحزن على فراقها، كان سندها في أصعب الأوقات، الرجل لي ما خدعها في مالها، وما جاملها في مشاعرها، بل كان دايمن الصادق الأمين .. وكي توفات، بقي قلبه حزينًا، يذكرها في حديثه حتى غارت منها زوجاته، ومن وكتا يغار الحي من الميت؟

يقول عن حبها: "أحبها الله ورسوله"، يهدر عليها ويبكي، وقال "ما أبدلني الله خيرًا منها"

الحب رزق، كما رزق الله محمد ﷺ بحب خديجة لي آمنت به كي كذبوه الناس، صدقاتو كي كذبوه الناس، وصانتو بمالها كي حرموه الناس ورزقه الله منها الولد

والحب رزق، كيما رزق الله خديجة بحب محمد ﷺ، ما طمع في مالها ولا جمالها، لا نساها بعد وفاتها ولا ظلم اولادها .. كثر الحديث عليها قدام الصحابة، واظهر الحب لأولادها وما نسى خصالها

الحب الحقيقي رزق من الله كيما المال و الولد، وكيما لي قال الرسول ﷺ رُزقت حب خديجة، الحب الحقيقي هو لي يهدي من الضلال مش لي يهدي للضلال

الحب يفرق عن الشهوة .. ماشي هو لي يبعدك عن دينك ودنياك، بل هو لي يحتويك ويعطيك طاقة تخليك تعزز في علاقتك مع الله ومع الناس، يرفعك ويوجهك للطريق الصحيح، يامن بيك ويخليك تكون أفضل نسخة من نفسك 🤍

#علابالك_دين

في يوم القيامة كاين ناس راح تدخل الجنة و كاين ناس تدخل للنار و هذا هو الأمر الطبيعي…

بصح كاين ناس من أهل الجنة راح يناشدوا رب العالمين يارب راني حاب فلان معايا.. مراحش تكمل فرحتي بالجنة غير إذا كان معايا لاني نحبو بزاف.. ربي يقولو روح خرجوا من النار.. وفعلا إذا ربي كان راضي عليه راح يخرجوا من النار…

و كاين ناس من أهل النار راح يسقسوا علاش فلان خرج منها..
كان عندو أعمال صالحة شفعتلوا؟ لا..
صحا كاين واحد من الرسل شفعلوا؟ لا..
كاين واحد من اهلو شهيد شفعلوا؟ لا..
بصح عندو اصحاب من اهل الجنة يحبوه وشفعولوا عن رب العالمين…

هنا أهل النار راح يقولوا {فمَا لنا مِن شافعينَ ولا صديقٍ حميمٍ}.
ندموا كي ماعندهمش ناس تحبهم حب حقيقي.. ناس في يوم القيامة ماراحش ينساوهم وراح يقولو يارب حابينوا معانا في الجنة…

شوف الناس لي حولك حاليا.. حوس بيناتهم على صديق صالح لي إذا دخل الجنة ونتا لا راح يشفعلك باذن الله…

كأنو الأرض تضيق بوسعها كلما اشتد ألـمـهـم ..

السابع من أكتوبر "ذكرى الألم"، اليوم فاتت سنة كاملة على هجـ ـومات فلسـ ـطين .. والقاتـ ـل انك تشوف اخوانك قدامك يتجرعون ألمهم وانت العاجز لي لا حيلة له، القاتـ ـل انك تشوف جـ ثثـهم لي قتـ ـلها العدو وانت جـ ثة قتلها العجز

تراهم ينزفـ ـون، وانت المقيد بضعفك وقلة حيلتك .. لكِ الله يا غــ ــزة لكِ الله

#علابالك_تاريخ
#علابالك_شخصيات

شكون فينا لي ما جاتش على مسامعو أغنية "المقنين الزين" ؟ .. كامل سمعنا بيها من قبل وهي قصيدة تعود للشاعر والمـ.ـقاوم الجزائري الشيخ محمد الباجي .. بصح قليل لي يعرف القصة الحزينة وراء هاد القصيدة…

"بوعلام رحال" كان لاعب كرة قدم نشيط في صنف الأصاغر في نادي مولودية الجزائر العريق .. كي كان صغير انخرط في جبهة التحرير الوطني .. و كان في عمرو 19 سنة كي ولا مجند في تنفيذ العمليات السرية في القصبة…

و وحدة من العمليات لي نفذها البطل تعنا هي تفجـ.ـيرات الملعب البلدي في الأبيار العاصمة لي خلفت قتـ.ـلي وجرحى في المُستعمرين .. وحسب الأرشيف الفرنسي الشرطة الفرنسية لقات في بقايا سترة رحال تيكي فيه الرمز تع المغسلة تاعو .. لي نفس السترة كان فيها جهاز التفـ.ـجير لي خباه في المدرجات…

الشرطة راحت للقصبة باش تدي المعلومات .. ولقات عامل التنظيف لي تعرف على الرمز لي كان في التيكي و قاللهم على المكان تع رحال مباشرة (هذا مجرد واحد من الالف) .. وطبعا لقاوه واعتقـ.ـلوه هو و 40 من المجـ.ـاهدين لوخرين رجال ونسا لي شاركو في العملية .. لكن هو بذات عطاولو تسمية "الارهـ.ـابي الاول"…

رحال لصغر السن تاعو كان تحت السن القانوني "20 سنة" المسموح لتطبيق حكم الإعـ.ـدام حسب القانون الفرنسي .. بصح فرنسا مثلها مثل اي بلد المغتـ.ـصب للاراضي كي يلحق الأمر ليهم ما يعترفو لا بصغير لا بكبير لا بالقانون .. امالا الحيلة لي لجؤوا ليها هي راحو زورو شهادة ميلاد بوعلام رحال و زادولو عشرة اشهر لعمرو .. وهكذا طبقو عليه الحكم واستشـ.ـهد…

المؤلف محمد الباجي كان معتـ.ـقل مع بوعلام رحال كي كان يستنى حكم الاعـ.ـدام تاعو في سـ.ـجن "سركاجي" .. ف تأثر بزاف بيه و استلهم كلمات "المقنين الزين" منو .. و يقول محمد بلي قدموه لعنبر المحكومين بالاعـ.ـدام باش يأذن و يتلو القرآن .. ومرة كان يأذن سقساه السجان قالو واش هاد الغنية؟ قالو محمد هذا نداء للصلاة .. رد عليه السجان قالو انشد انشد يا طائرا في القفص، أنشد للموت او الغضب (أبيات فيكتور هوجو) .. رد عليه محمد بغضب و قالو لي يدافع على حقو تنعتوه بالطائر المنشد للموت .. ولتما جاتو فكرة القصيدة…

#علابالك_دين
راكم متخيلين بلي كاين ناس منا عاديين ربي راح يرزقهم في يوم القيامة بمكانة عظيمة جدًا لدرجة حتى الأنبياء والشهداء راح يغبطوهم على هاد المكانة و يتمناو يكونو في مكانهم!

وحد النهار سيدنا النبي صلى الله عليه وسلم شاف في الصحابة و قاللهم:"إنّ من عباد الله لأناسًا ما هم بأنبياء ولا شُهداء، يغبِطُهم الانبياء والشهداء بمكانهم من الله تعالى".

الصحابة استغربوا وبقى عندهم فضول يعرفوا شكون الناس هادو.. سقساو النبي صلى الله عليه وسلم:"يا رسول الله، تخبرنا من هم؟" قاللهم رسول الله عليه الصلاة والسلام:"هم قومٌ تحابُّوا بروح الله على غير أرحامٍ بينهم، ولا أموال يتعاطونها، فوالله إنَّ وجوههم لنور، وإنهم على نور، لا يخافون إذا خاف الناس، ولا يحزنون إذا حزن الناس".

ناس يحبو بعض لله في الله برك.. ماشي بسك كاين بيناتهم مصلحة ولا نسب ولا أموال ولا مشاريع… حبّ خالص لوجه الله.. بيناتهم مودة ويدعوا لبعضاهم بالخير دايما.. وجوههم راح تولي فيها النور و بسبب قربهم من ربي ما راح يخافوا ولا يحزنوا يوم القيامة..

وبعدها تلى النبي عليه الصلاة والسلام الاية القرآنية هادي:"ألا إن أولياء الله لا خوف عليهم ولا هم يحزنون".. ربي يجعلنا منهم 🤲

عائلتنا الجميلة، ليوم جبنالكم من جميل ما مر علينا في التعليقات ..

خبرنا أحد المتابعين انو "ابليس قبل المعصية يكبرلك رحمة ربي ويصغرلك الذنب، وبعد المعصية يكبرلك ذنبك ويصغرلك رحمة ربي باه تقنط" 💛

لذا عُد إلى الله وصحح علاقتك معه سبحانه، وعلى ذكر هذا .. تعرفوا كيفاه تراضيوه سبحانو بعد ذنوبكم ولا نغوصوا في الموضوع مع بعض؟

على فكرة حتى حنا نحبو نسمعو منكم ونتعلمو مع بعض لذا .. شاركونا في التعليقات عن جميل ما فات عليكم عنه سبحانو وعن عفوه ⬇️

"لا أحد في هذا العالم يحب الإنسان القبيح.. لا أحد يشفق عليه أو يثق فيه.. انه المرفوض الأول.. المكروه الأول.. المعذب الأول.. انه ضمن وخارج إطار الحياة المألوفة يعيش وحيدا ويتعذب وحيدا ويموت وحيدا"

#علابالك_وعي

في منشورنا تع البارح طرحنالكم موضوع الخرافات وتكلمنا عليه عامةً وقلنالكم إذا كنتو مهتمين نواصلوا ونتكلمو على خرافات الطاقة ونبينو حقيقتها ومكاش آن شاءالله لي يزيد يوقع في المغالطات.. اليوم رانا رجعنا باش نوفيو بوعدنا وراح نبداو في اول منشور لي راح نتكلمو فيه على اصل وحقيقة علم الطاقة…

اولاً لازم نبينو الفروقات بين الطاقة الحقيقة وعلم الطاقة الزائف.. لانو دجالو علوم الطاقة باش يروجو لافكارهم يخلطو الأمور مع بعضاهم ويدخلك هادي في هادي باش يقولك راه اينشتاين هدر عليها يعني كاينة منها.. امبعد يقولك الطاقة الكونية ترسلك الأشياء لي تجذبهم ويرسلك ذبذبات ورسائل…

المهم، بالفعل الكون عندو طاقة وفقًا للمفاهيم الفيزيائية التقليدية.. مثلا الكون مليء بالإشعاع الكهرومغناطيسي (الضوء والموجات الراديوية) والطاقة المظلمة لي تشكل 65% والطاقة الحرارية والحركية للمادة… واي مادة ايضا تحتوي على الطاقة الكامنة..

اما الطاقة لي يقصدو بيها الدجالين هي روحية ميتافيزيقية ماعندهاش اساس علمي ولا فيزيائي وإنما اصلها يرجع لفلسفات شرقية قديمة ويقصدوا بيها قوى روحية غير مرئية تتدفق في الكون وفي الكائنات الحية.. وحبيت نذكر بلي علم الطاقة ماشي مصنف ضمن العلوم لأن العلم الحقيقي يعتمد على المنهج التجريبي، الموضوعية، التكرار… وخرافة الطاقة تفتقر لهاد المقومات…

دوك نعرفو واش هو اصل خرافة الطاقة.. في الفلسفة الهندوسية والبوذية عندهم مفهوم شائع وهو "البارنا" ويعتبر جزء من العقائد الأساسية في الايورفيدا واليوغا وتعني "طاقة الحياة" وهي توجد في كل شيء حي.. وفي الفلسفة الطاوية عندهم "التشي" والطاوية هي فلسفة وديانة صينية قديمة تركز على مفهوم "التشي" (قوة الحياة الأساسية) لي تعلم بلي الحفاظ على توازن وتدفق التشي في الجسم هو اساس للصحة الجيدة والانسجام مع الكون.. على هادي العلاج بالطاقة والطب البديل امر شائع في الصين…

وفي فلسفة الشنتو والبوذية في اليابان عندهم "الريكي" وهو يركز على استخدام الطاقة الروحية لتحقيق الشفاء.. كامل هاد العقائد الوثنية تؤمن بفكرة وحدة الوجود وتناسخ الأرواح.. والطقوس الدينية لي يديروها يهدفوا بيها إلى الارتقاء بالروح باش تتصل بالقوة العظمى في الكون ولا بالإله.. وحدة الوجود عندهم تعني الإله موجود في كل الكائنات الحية وغير الحية..

بعدما عرفنا كامل هادو لازم تعرفو بلي جماعة الطاقة يستمدو الخرافات تعهم من الهندوسية ومن الكابالا.. واش هي الكبالا؟.. الكبالا تعني الصوفية اليهودية يحوسو يفهمو واش كاين ماوراء الطبيعة والميتافيزيقا للعالم وللإله وكيفاش تمشي طاقة الخلق وعلاقة الإله بالكون.. ويؤمنوا بلي داخل كل إنسان كاين اله ولازم عليه يدير صحوة روحية باش يوصل للألوهية.. استغفرالله…

وبالرغم مكاش علاقة مباشرة بين الطاقة في المفهوم الهندوسي والكابالا.. بصح يأمنو بحاجة وسمها "السيفيروت" وهي شجرة فيها نقاط كيما "التشاكارات" عند الهندوسية وهوما مراكز الطاقة يتوزعو في جسم الانسان من اسفل العمود الفقري حتى اعلى نقطة في الجبهة بين الحاجبين (فكرتكم في النقطة الحمرة تع الهنودة؟).. وكاين قنوات تربط بين هادوك المراكز لي تخليها تتشابك وتشكل شجرة "السيفيروت" وتتدفق فيها الطاقة الالوهية…

مابني على الباطل فهو باطل.. بالرغم من ان دجالو الطاقة مايذكروش في كلامهم اي حاجة تتعلق بالكابالا والممارسات الوثنية ولكن يبقى الأساس مبني على هاد المعتقدات الباطلة الشركية وكل المصطلحات لي يقولوهم كيما الجذب والكارما وعلم الأرقام كامل مرتبطين بشكل صريح بواش ذكرنا من قبل…

وغير تسمع كاش واحد بدا يهدر عليهم.. اهرب.. وإذا لقيتو بدا يجبدلك القران ويقولك الكارما مذكورة ويربطلك علم الأرقام لي مراهش علم مع الترقيم تع الاية.. اهرب تاني.. مراكش مطالب باش نتا تمد حجج ولا حتى تكون تعرف على واش راه يهدر وإنما راك مطالب باش تتعلم دينك وتقدر تميز بين الحق والباطل لان الشرك اليوم مراهش يتمثل في عبادة الأصنام كيما في الجاهلية وإنما راه يتمثل في الأمور هادو لي داو بزاف ناس إلى الهاوية…

البشر بطبعهم المتميز عن الكائنات الأخرى ماعندهمش جانب مادي محسوس فقط وهذا مهما أنكر الإنسان وألحد ومهما بلغ من التطور.. لأن الإنسان خلقو ربي من مادة ومن روح.. وعلى هادي نشوفو منذ القدم الإنسان يمارس طقوس معينة و يؤمن بوجود قوى خفية مرتبطة بالفهم الميتافيزيقي لي عندو أو الديني.. لأنو دايمن يحوس يملىء الجانب الروحي لي عندو بأي طريقة…

ولهذا بكري كانو يؤمنوا بوجود طاقات خفية.. ووجود طاقة شريرة تمنع الحظ عنهم ويصنعوا أشياء تدفع الطاقة الشريرة هادي عليهم كيما الودعة، الخامسة، العين الزرقاء… ويحاولو يجذبو طاقة الخير ليهم بالاحتفالات وتقديم القرابين وممارسة التأمل وترديد بعض الكلمات… وكل حاجة عندها خلفية وثنية بحتة…

مع التقدم.. الخرافات مثل هادي اتطورت وغلفوها للناس باش تبان حاجة معاصرة وأكثر تقبلا للعقل وحتى يخلقولها تفسيرات علمية لكن الجوهر والمضمون نفسو لا تختلف عن الخرافات القديمة في شيء.. وعلى هاد الأساس في كل مرة رانا نلاحظو انتشار خرافة جديدة في مواقع التواصل.. لي يدل الأمر على ان التطور المادي لي وصلنا ليه اليوم ما يكفيش وحدو حتى يرتقي الانسان بعقله ويبتعد عن تصديق الخرافات…

والأمر الوحيد لي يمنع الإنسان من الميل والانحراف لتصديق مثل هذه الخرافات هو ايمانو التام بالرسالة السماوية الحقّة لي ما مسهاش تحريف ولا تدخل من يد أي بشر.. لأن لي خلق روح هذا الإنسان سبحانه هو لي يعرف المدخلات العقائدية والممارسات الدينية لي تسحقها هاد الروح.. وباستقامة الجانب الجواني للانسان يستقيم الجانب الحسي له…

ونحن المسلمين بالرغم من أننا في اكبر نعمة أنعمها الله علينا.. تركنا المقصد تعنا وابتعدنا عن فهم الرسالة المحمدية وتدبر ايات الله القرآنية والكونية ورحنا اتبعنا أمور تنافي العقيدة ولي قادر تدي للشرك والخروج من الملة.. بسبب الجهل بالأصول وعدم البحث عن حقيقة الاشياء…

الأمور لي رانا نقصدوها في منشورنا هذا لاتعد ولاتحصى "علم الطاقة لي مراهش علم والعلاج به، طاقة الذكورة وطاقة الانوثة والموازنة ييناتهم، تفعيل طاقة الأسماء وأسماء الله الحسنى، طاقة الجذب وجذب الثراء…" لي ان شاءالله راح نخصصو منشور لكل موضوع ونهدرو عليه.. بينولنا فقط اهتمامكم 🫶🏻

- انك تكون من المتقين:
وكيما ذكرنا من قبل فالتقوى هي الخوف من الجليل والعمل بالتنزيل والرضا بالقليل والاستعداد ليوم الرحيل

﴿ بَلَىٰ مَنْ أَوْفَىٰ بِعَهْدِهِ وَاتَّقَىٰ فَإِنَّ اللَّهَ يُحِبُّ الْمُتَّقِينَ﴾

- انك تكون من التوابين المتطهرين:
التوبة هي طهارة من الشرك والمعاصي
والمتطهرين انك تطهر بالما من الأحداث والنجاسات

{إِنَّ ٱللَّهَ یُحِبُّ ٱلتَّوَّابِینَ وَیُحِبُّ ٱلۡمُتَطَهِّرِینَ}

- انك تكون من المتوكلين:
وهنا تثق في الله وتكتفي به فتعتمد عليه في كل امورك وتُظهر عجزك

{فَإِذَا عَزَمْتَ فَتَوَكَّلْ عَلَى اللَّهِ إِنَّ اللَّهَ يُحِبُّ الْمُتَوَكِّلِينَ}

- انك تكون من المقسطين:
وببساطة انك تكون من أهل العدل فتحكم بالعدل

{وَإِنْ حَكَمْتَ فَاحْكُمْ بَيْنَهُمْ بِالْقِسْطِ إِنَّ اللَّهَ يُحِبُّ الْمُقْسِطِينَ}

- انك تحارب في سبيل الله:
{إِنَّ اللَّهَ يُحِبُّ الَّذِينَ يُقَاتِلُونَ فِي سَبِيلِهِ صَفًّا كَأَنَّهُمْ بُنْيَانٌ مَرْصُوصٌ}

واكيد مننساوش التقرب منه سبحانو بالفرائض والنوافل🤍

#علابالك_دين
تخيل معايا انك قاعد في كوْن يحبك فيه أحدهم بالضبط كيما تحبو، شعور لطيف صح؟ ضك تخيل معايا أنك قاعد في كوْن يحبك فيه صاحبه ..

صراحة "علابالك" عجز انو يوصف شعور ان يحبك خالق الحب لذا خلاكم نتوم توصفهولنا في التعليقات .. لكنو قدر يجيبلكم الجزاء من هذا الحب فيا تُرى ما جزاء من أحبه الله؟

الله سبحانو خلق كامل عبادو لكنو لا يحب إلا فئة منهم، خلونا نقوللهم فئة الطيبين قبل ما نفصلو فيهم، ونعتبروك انت عزيزي من هؤلاء لذا:

غير يحبك الله سبحانو رح تتحول من مجرد إنسان لـ"حديث الملائكة" الحكاية كامل تبدا بحبه سبحانو لك من بين آلاف العباد لي خلقهم، ينادي الله جبريل "يا جبريل قد أحببت فلان فأحِبه" فيُحِبك جبريل وهو أفضل الملائكة

ويزيد ينادي جبريل في أهل السماء باه يحبوك فيقول "إن الله قد أحب فلان فأحِبوه" وهكذا تحبك مخلوقات النور وفوق هذا كاامل يوضع لك القبول في الأرض فتُحبك مخلوقات الطين

وبعدما كنت مجرد إنسان رجعت محبوب من سكان السماء والأرض، وشرايك ناديوك بمحبوب الكون🤍؟

اذا حسبت انو الجزاء خلاص هنا لا راك غالط⬇️

إذا حبك خالقك رح يحفظ جوارحك، فيكون الله سمعك لي تسمع بيه فتسمع غير وش تحب وما يحب سبحانو، يكون بصرك فتشوف غير وش تحب وما يُحب، يحفظ يديك فتعمل غير وش تحب وما يُحب وحتى يحفظ رجليك فلا تمشي إلا لواش تحب وما يُحب

وختام الحديث، إذا سألتو عطاك وإذا استغفرتو غفر واذا استعذت أعاذك فأي جزاء هذا

وضك لِتنال هذا الجزاء وتكون من فئة الطيبين لي يحبهم الله لازم تدير حوايج تلقا شوية منهم في التعليقات ⬇️

كامل علابالنا بلي المادة متواجدة في الطبيعة على أربع حالات ولي هوما الصلب السائل الغاز والبلازما… الصلب والسائل والغاز نعرفوهم، بصح تعرفو واش هي البلازما؟

البلازما هي عبارة عن غاز متأين تكون فيه الإلكترونات حرة منفصلة على الذرة ولا الجزيء… ومن ناحية أخرى هي عبارة عن غاز درجة الحرارة تاعو عالية بزاف… كيما الثلج يكون في حالة صلبة كي تسخنو يولي سائل وهداك السائل كي تسخنو يولي غاز وهداك الغاز كي تسخنو يولي بلازما..(مثال لتقريب الفهم)

راح تقولو واش هي الحاجة الموجودة في الطبيعة لي حالتها بلازما؟ كيما قلنا بلازما هي غاز متأين يعني عندو طاقة كبيرة بزاف وعندو أشعة قوية تاني تماما كيما البرق… إذن البرق هو عبارة عن بلازما… والبلازما كاين في النجوم والشمس تعنا تاني وصناعيا نلقاوها في هداك النيون… النيون فيه الغاز الداخل وكي يتصل بالكهرباء تتشحن ذرات الغاز وتتحرر إلكتروناتها وهذا لي ينتج طاقة حرارية تعطينا الضو… والغاز يتحول إلى بلازما.
#علابالك_فيزياء

هناك سكينـة عميقة في الأفق 🤍

السكينة هي الشرط الأساسي للخشوع فهي "َنور في القلب ينزلو الله على عبادو بعد اضطراب وقلق، فيرتاح القلب لهذا النور ولا ينزعج من بعده"
#علابالك_دين #علابالك_علم_نفس

ولأنك إنسان عزيزي الإنسان فالسكينة وحدة من أهم احتياجاتك الفطرية لكن كيفاه نقدرو نوصلو لهذي الحاجة؟

بلاك أنسب ما نبداو بيه إجابتنا هو تبسيط هذا الشعور ليسهل فهمه..

يقول رسولنا أيُّها النّاسُ، علَيْكُم بالسَّكِينَةِ وببساطة فالسكينة راحة خارجية وراحة داخلية

*خارجك هو شخصك الظاهر لغيرك، والراحة الخارجية نقطة تعكس ضبطك لنفسك وين تسيطر على إنفعالاتك وغضبك، احاسيسك وحتى جزعك

السيطرة على النفس بلاك من أصعب الأمور لي تمر عليك فشكون منا عندو هذي القدرة الخارقة في إدارة نفسه لكن بعضنا متفوق بالفعل في هذا صح؟

ببساطة لأنو بعضنا يعرف نفسو على عكس البعض الآخر، قد يقول أحدكم حياتي كامل وأنا نفسي ومع لخر منعرفهاش؟ إيه هذا أمر طبيعي فربما لم تلعب دور المراقب يومًا

لتعرف نفسك لازم عليك أن تراقبها وتفهم إنفعالاتها لكن المراقبة هذي تكون لحظة انفعالك، مش لحظتها يتغمضو عينيك وبعدها تبدا تحليلك

وهكذا يزيد وعيك وتحكمك في سلوكك، وحتى إدراكك لأسباب هذه الانفعالات قد يعالج الخلل، فربما تفهم انو ما يدفعك للغضب هو التفاؤل المبالغ فيه تجاه الأشياء وحتى الناس..

بعدما تفهم نفسك رح تنتقل لتربيتها، وقد قيل قم بتربية نفسك كما تريد تربية أطفالك، حطلها معايير توصلها للحِلم والتوازن المطلوب، عاقبها وكافئها كما لو كانت صغيرًا بين يديك

*أما الراحة الداخلية تتعلق بِـباطنك لي ميعرفوش غيرك حق معرفة، راحة داخلك هي هذاك الترتيب لي لا قلق فيه ولا اضطراب

بعضنا داخله مبعثر، بقايا أحاسيس ساحقة، خوف وقلق وربما الكثير من الفراغ .. يختلف باطن كل واحد فينا عن الآخر لكن المتفق عليه أنو ترتيب هذا الباطن يجي بِـ:

أن تكون من أهل الإيمان والتوحيد وتقرب من ربك فلا اضطراب قربه..

الصلاة فبِها قرة أعين وذكر الله فهو راحة القلب فـمَثَلُ الَّذِي يَذْكُرُ رَبَّهُ وَالَّذِي لا يَذْكُرُ رَبَّهُ مَثَلُ الحَيِّ وَالمَيِّتِ

والصِدق فهو سكون الروح.. حسن ظنك برب العالمين والرضا بما قسم الله لك (هدرنا عليهم في مقالين سابقًا)

وهكذا خلاصت رحلتنا لنهار اليوم رزقنا الله وإياكم هذه السكينة

ملاحظة: فيما يخص ضبط النفس اختصرنا الموضوع في نقاط أساسية لعمقه .. وشرايكم نغوصو في هذا العمق مع بعض؟

يتعرض المرء أحيانًا لنوبات قلق، نوبات تنسيه وش كاين اليوم من أجل ما سيكون غدًا وربما لا يكون أبدًا .. ولكن ⬇️

أحب من أحب وكره من كره كلمة "قهوي" التي اصبحت تُستعمل في كل مكان هي كلمة عنصرية ..

لا أعلم لماذا يتغاضى البعض عن أصل الكلمة التي وبكل وضوح تقوم بوصف لون الشخص بعيدا عن تصرفاته وأفعاله وحركاته الأكروباتيـة ..

قبل عامين فقط أو اكثر، لم يكن للكلمة وجود .. كان البعض يصف هؤلاء بالناس الغير محترمة أو "ناس بدون اخلاق وتربية" أما اليوم لا يخلى منشور على منصات التواصل إلا وبه تعليق من شخص يستعمل الكلمة لوصف تصرف خاطئ! .. الخطأ هو نحن، كيف نريد اصلاح مجتمع فاسد ونحن بدورنا نشارك في الفساد!؟

رجاءًا، توقف عن استعمال الكلمات والصفات التي أمرنا الله بعدم استعمالها .. لا تجعل من كلمة عنصرية رمزًا لوصف تصرف خاطئ كما فعل بعض الذين سولت لهم انفسهم بقول نحن "مؤثرون" نحاول تصحيح الأخطاء بـ"تأثيرنا".. !

﴿يَا أَيُّهَا الَّذِينَ آَمَنُوا لَا يَسْخَرْ قَومٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ وَلَا نِسَاءٌ مِنْ نِسَاءٍ عَسَى أَنْ يَكُنَّ خَيْرًا مِنْهُنَّ وَلَا تَلْمِزُوا أَنْفُسَكُمْ وَلَا تَنَابَزُوا بِالْأَلْقَابِ بِئْسَ الِاسْمُ الْفُسُوقُ بَعْدَ الْإِيمَانِ وَمَنْ لَمْ يَتُبْ فَأُولَئِكَ هُمُ الظَّالِمُونَ﴾ الحجرات – 11

قالَ رسولُ اللهِ عليه الصلاةوالسلام: «لا فرق بين عربي ولا أعجمي ولا أبيض ولا أسود إلا بالتقوى»
#علابالك_وعي