راشد ابن دشن .

فاهقٍ جوده وقدّامي صلاصل
كل طرقي في طريقه له طريقه
لاتناصل من لزومه من تناصل
والله مايصخي الرفاعي في عقيقه
حالف اني لاتمثنا الدرب و آصل
لين يمدي كل طرقي في طريقه
يارفيقي مالك ومال المعاصل
لاتدوّر في الخلا الخالي حديقه
فالنشيد وفالمجابه والمخاصل
بشّر المصدوع بعلاج الشقيقه
والله ان اسمي سما وان اصلي أصل
محتسي ب اللي عراويها وثيق
ادري ان البعد والتقصير حاصل
غير لاتظهد رفيقك يارفيقه
السواد اللي تحت عين المواصل
يختصر علمه قبل لاتستسيقه
اكتشفت ان التواصل في التواصل
يعمي اهل الحق من شوف الحقيقه
التواصل كان ماتاصل وانا آصل
ولاّ ياجعل التواصل في حريقه
لاتكثّر فـ النقاط وفـ الفواصل
عدّها عد الثواني في الدقيقه
من قطع حبل القطيعه ب المواصل
والله ان يلقا السعه في عطف ضيقه
اعتبرها فاصل وبعده نواصل
لاتحمّل نفسك اللي ماتطيقه
.

ياللي عليك من الظروف اظروف
خذ كلمة اللي كلمته خرصان
من يعترض تو الكلاشنكوف
سالت ادميّه لأسفل الخمصان
ماكل من عينه تشوف يشوف
وماكل من طب البحر قرصان
والمعرفه لازلّها المعروف
شاف البشوت الغاليه قمصان
منْك وورى ياجاحد المعروف
الوجه يِدرا واللسان احصان
الحقد في قلبك يلوفك لوف
لاهب سعيره يِنجح القرصان
حنا الحرار اللي تحوفك حوف
ولا انت بين البوم والصيصان
ضعيف نفس وغرّروك اضعوف
ماتدري ان الزود من نقصان
حطيت لك بين الحروف احروف
واعهودنا ب وجيهنا تنصان
لاحال من دون الصفوف اصفوف
اركب على فـرواع ياقحصان
.

ياصاحبي فيني ترديت واخطيت
ترا الكلام اللي تقوله ملامه
حسيتني والظاهر انك ماحسيت
الله يصيب اللي مايوزن كلامه

داهم الوبري رحمة الله عليه ✍️
..

مهوجس وسهران واعلومي اعلوم
من طاري اللي مادري ويش طرّاه
بيني وبين النّوم من قبل كم يوم
عذايلٍ بين العتب والتّشرّاه
لين التبسني عارضٍ كنه جاثوم
لأعتم ضلام الليل قمت اتورّاه
يانوم لاتجفل عن العين يانوم
ملّيت اصبّر خاطري واتدرّاه
ماني بـ قايل يامال القوم ياقوم
وياحر كبدي من عنا الوقت حرّاه
اما سريت الليل وابليس مرجوم
تليتها مع شرقة الشمس برّاه
ياحاكم الشعّار مانيب محكوم
انا حكيمٍ لاقراء العلم قرّاه
دام العرب مابين ظالم ومظلوم
اللي برا من تهمته ويش برّاه
‏بأحمّل المشروه في عاتق اللوم
والعمر مرّه والمواري مورّاه
.

نتقتها من ضيقتي حزت عصر
ياليتها مابين شاهد و اقبلا
تمّيت فرض العصر قبل انهج قصر
ولا نهجت الاّ من اهموم ويلا
بصيرة الرجّال اهم امن البصر
خذ كلمة اللي فالزمن شرب وكلا
ياكرهني للمخطي اليا اخطا واصر
لاطاعت(ن) له عندنا ولا ولاء
سِلمت ياراسي وتبشر بالنصر
ان ما تفاولت الوفا ... ولاّ فلا
والعالم اللي تحسب انّي بانقصر
والله وامان الله لاسمّعهم جلا
يالله طلبتك رفعه وعز ونصر
يامن تعالى ماعلى حكمك علا
شاعر وشعري شطر بيته عن قصر
حتا لو ان كل الخلايا ف الخلا
لي هاجسٍ ماهوب لردوف وخصر
قِل العرافه هو سبب قل الحلا
منهاج سِلم قال حدّث واختصر
وانب ضميرك قبل تأنيب الملا
وانا من اللي من نخاهم ينتصر
ادهات قومٍ لأحتما العلم اصملا
جمعٍ يهز الشام و يزلزل مصر
اهل ارحبو يارجال ماهم هل هلا
من سالف العصر القديم لذا العصر
من طيبنا صرنا على الطيب اوكلا
وان شلهبت الايام و الطايل قصر
هل رايتٍ بيضا واهل علمٍ علا
وانا ولد عودٍ مالافعاله حصر
بين احتزم وابشر وعدا واشهلا
.

ياللي عليكم من كبار المشاريه
‏من قدّم الحجّه - يحضّر دليله
اللي يداري واحدٍ ما يداريه
يلقى حساير غفلته في حصيله
من لاحفظ سلمه وظيّع مباديه
لعاد يرجي في حياته فضيله
وان عوّدت كلّ وله مدّت ايديه
كلٍ على مقدوره ايعن خيله
انقدّي الغاوين والكيل نوفيه
والموجبه نلحق وراها نفيله
والليل لاطرّف وطابت مساريه
نسريه مسرا اللي مفارق خليله
لاويه جورٍ يلوي اللي يلاويه
وادموع عينه واديٍ سال سيله
وانا سريت خاطري فيه مافيه
في سكّةٍ فيها يضيع الدليله
وهلّيت قافٍ يستهلْ بـ معانيه
جزايله تردف جزيله جزيله
مهو قصيد اللي قصيده يحاليه
هزايله تردف هزيله هزيله
وانا خوّي اللي عريبٍ مجانيه
ماني خوي اللي يمن بجميله
ربعي سنام المجد لاحل طاريه
قومٍْ يفضّون الجموع المهيله
لاهازنا الحف المصالي نصايله
بـ ام الزماميم وام تاج الطويله
مقلاطنا فالمجلس الشره تشريه
ومركاضنا يعدل عوج كل ميله
في دهر يوم الوقت قشرٍ ملافيه
حلنا على حدّه بـ حد الصقيله
فال النّدى تبشر بعزّك ولبّيه
وفال العدا حربه ونارٍ كليله
من قبل لاتقبل سياحه وترفيه
ومن قبل بن ريفه ومن قبل نيله
.

حنا ذخاير دهر سيسان وارسوم
‏نكسي بصطوتنا القفار آلمعرّاه
‏هيباتنا هيبات واعزومنا اعزوم
‏واللي طمع فينا اجيوبه امفرّاه
‏على قدا مذهب وعادات واسلوم
‏واضويّنا . . بين القبايل مكرّاه
‏نقّالت البلجيك ابو حلق وارقوم
‏اللي خشوبه في جنوبه امغرّاه
‏من جا يصالي حربنا راح مهزوم
‏وعوّد بـ يا وجدي وغبني وطرّاه
‏عاد الليالي خوف والامن معدوم
‏وقتٍ ةنكف سرّاه وانهل ضرّاه
‏يدري بنا كل ابلج وكل شغموم
‏ولاّ قليل المعرفه ويش درّاه؟؟
.

‏ساهرٍ ليلٍ  سريته وسيّرته وسار
ماسريت الاّ وانا طرْب والليل اسروي
راح ليلي ولعه وشلعه وجنّه ونار
اتضرّس من صعاطير واقنب واعوي
يارفاقه تمْ منع اصطحاب الأعتذار
والله انّي ما أرد الّا على عدٍ روي
شاعرٍ اسمي يقدّم مع الأسما الكبار
مابعد سقت المعاني بـ وجهٍ ملتوي
اتقدّم وانحر القوم في وضح النهار
واتجرّى والوي اذراع هاجووسي لوي
الهزيمه  طعمها ماهو بطعم انتصار
وعين زرقاء اليمامه  مهي عين اللّوي
صدّق اللي قال صكّات الايّام اختبار
وصدّق اللي شافت العين واترك ماروي
شاقني فعلٍ  يجمّل وناموس ووقار
وانا لي راسٍ يشوّش  ولي دم احموي

انا ابن عامر راعي ارحب وحيّيت
في بقيق ولّا دهر تعرف محلّي
اللي لرحّب جا لترحيبته صيت
وتخلّي اللي ما يصلّي يصلّي
ياللي بنيت البيت والقافيه ايت
تفرح بردّه واسمع اللّي على اللّي
شاعر واسوق البيت في ساقت البيت
لاصغت قافي ما يكزْ ويملّي
غنّيت قيفانك بعد ماتغانيت
فـ اقصا عروق ارماح ذودك تفلّي
كم قدلي ارقب جيتك غير ماجيت
مدري حدتك ظروف ولّا تغلّي
والله لو انك تدري بحالي ازريت
ما قلت لي يا طير ياللي وانا اللي
ما بين ماء مقري وحلّه وحلتيت
ولا على اللّي قـدّر الله تعلّي
الله ياكم ليلٍ سهرته وعانيت
اسامر الماضي وحطّي وشلّي
كن في وسط صدري وقايع دناميت
وكن في وسط راسي عروقٍ تتلي
انا تعـدّيتك محنّه . . وحنّـيت
اللي معه لـ اعقود الايام حلّي
زحلٍ مابين ال مهدي ماخذٍ صيت
بـ المرجله والمعرفه والتجلّي
طلاق مسلك واملك وكيت من كيت
اني لك اليا قلت من لي ومن لي
انت ابن عم اللي غلاته وهو ميت
كنه يقول ابغا ابن عمي محلّي
كان التهمت اسمي وفيني تعزويت
قل للهموم اللي على الصدر ولّي
.

جنبت دربٍ فيه لـ الناقد طريق
ولزمت دربٍ مايضم الا الدهات
طيش الشباب بدايته شوق وشفيق
ونهايـته . . يالله عفـوك والثبات
اذا بغى الشيطان في قلبي يويق
ماعيّـن الا حـب ربـي والصـلاة
واذا ارتخت نفسي عن الدرب العتيق
في لـذت الدنيـا وفتن المفتـنات
يطري علي ابوي والصيت العريق
واردها عن درررب كل المـغويات
انا فـي بـحر ابـوي وافعاله غريق
ياجعلني مافقد وجوده فـ الحياة
يابوي واسمك حمله اثقل من طويق
واثقل من القوقاز واجبال السرات
كبرت جاهي مع هل الجاه الطليق
اسمك يعدّي بي النجوم المرقبات
ي جعلنـي ما اجيب شيء ما يليق
بـ اسمك وصيتك يازبون الكايدات
انت ابين آمن البرق لا جاله بريق
فـي ليلـةِ فيـها الأنـاره خـافتـات
وانت الحزام اللي على الدنيا وثيق
اللي تحزّم به . . لقى فيه النّجات
انت الأبو وانت الأخو وانت الصديق
الله جعلك إنسان معدود الصّفات
.

يابني هاجر علي الحرام انكم اكبار
فعلكم يبعد خوى راس من راسه خوي
‏فيكم التاريخ ينظر بعين الاعتبار
وذكركم يعطيه هيبه ودافع معنوي
‏في الحميا والقرامه وفي حسن الجوار
الأولويه عندكم في بني وآل وذوي
‏من فزايعه الهواجر طويلين العمار
والله ان يرقا الطويلات والقلب اجروي
‏اللي عيت تستوي للعرب في كل دار
من صطاكم والله ان تنثني وان وتستوي
‏غمركم وقفته تنجي ومدقله انتحار
وعودكم يارد احياض المنايا مهتوي
‏من يعاديكم يعود ب ذلّه وانكسار
وحربكم والله ماينساه لو انْه انسوي
‏مدحة ماهيب فيكم يامسرجت المهار
مثل من جاء مجلس فيه ماهو مدعوي
‏فالكم يا جنب بيضاٰ ترف ونفح كار
ياظنا اشريف الدواهي هل الجمع القوي
‏اهل شيخة شمل قحطان من حمص لذمار
من قبل حكم ابن عايض وحكم ابن جلوي
.