#рәўият
Сықмар дәмегѳй
Ески заманда сақаўаты менен аты шыққан бир патша алдына келип туратуғын адамлардан бирене:
— Мен бир адамға мың тиллә бережақпан, сен не мәсләҳәт бересең?—деди.
— Бунша кѳп пулды бир адамға берип болмайды,— деп мәсләҳәт берди.
— Онда ярымын берсем бола ма?
— Ол да кѳплик қылады.
— Үштен бирин берсем бола ма?
— Ол да кѳплик қылады.
— Тѳрттен бирине не дейсең?
— Ол да кѳп.
Соннан кейин ол патшаға бир адамға жүз тилләдан кѳп берип болмайды, деп мәсләҳәт етип:
— Бир адамға жѳз тиллә бериў де кѳп, сонда да бере қойың,— деди. Патша оның гәпин еситип:
— Қандай бахытсыз адамсаң? Мен бул мың тилләны саған бережақ едим. Берген мәсләҳәтыңның саясында мың тилләдан ѳзиңди айырдың ҳәм мени де сақаўаттан тостың,— деди.
Ол киси патшаның сѳзин еситип оғада ѳкинип:
— Мен қәтелесиппен, меннен мийримиңизди аямаң,— деди. Патша оның жалынып-жалбарыныўына қарамай:
— Сен ѳзиң усыған лайықсаң, жақсылыққа жарамайтуғын ҳимметсизсең, пәс адам екенсең. Ѳзиңе де, маған да зыян жеткердиң. Маған берген зыяның – егер сол мың тилләны бергенимде, қанша саўапқа қалып кеткен болар едим. Ѳзиңе берген зыяның – сонша тилләдан айырылдың. Енди ѳзиңниң сѳзиңе кѳре саған жүз тиллә беремен, ма ал, буннан кейин мениң қасыма келме,— деди. Патша оған жүз тилләны берип, алдынан қуўдырып жиберди.
🌐🌐🌐🌐🌐🌐🌐🌐🌐🌐🌐
Биз бенен социаллық тармақларда бирге болың!
https://t.me/Toqpaq_ata_uz