Айгөл Бариевадан Итле "кабартма"
* 0,5 кг ит фаршы;
* 0,5 стакан карабодай ярмасы;
* 1 баш суган;
* 2 кишер;
* 3 тырнак сарымсак;
* 2 аш кашыгы томат пастасы;
* яшел тәмләткечләр;
* үсемлек мае;
* тоз-борыч;
* 0,5 стакан кайнаган су.
Карабодайны тозлы суда пешерәбез. Ул пешкән арада ит фаршына суган, тоз-борыч, бер йомырка кушып, яхшылап болгатабыз. Карабодайны да ит янына кушабыз, бергә бутап, зур булмаган «кабартма»лар әвәлибез.
Табаны кыздырып, бераз үсемлек мае салабыз һәм сыйган кадәр «кабартма»ларны тезәбез. Башта бер ягын, аннан, әйләндереп, икенче ягын да кызартып алабыз. Әзер «кабартма»ларны алып куябыз
Суганны ваклап турап, кишерне угычтан уабыз. Бушаган табага янә бераз май тамызып, яшелчәләрне кыздырабыз. Бераздан ваклап туралган сарымсак өстибез. Томат пастасын ярты стакан су белән сыеклап, кыздырма өстенә салабыз, тоз-борыч сибәбез.
«Кабартма»ларны кыздырма өстенә тезәбез һәм капкач белән каплап, сүрән ут өстендә парландырабыз. 15-20 минуттан «кабартма»ларыбыз әзер.