#Bayram_tabrigi
Assalomu alaykum, qadrli ustozlar, aziz hamkasblar, hurmatli talabalar! Barchangizni 21-oktabr – Oʻzbek tiliga davlat tili maqomi berilganining 35 yilligi ayyomi bilan tabriklayman.
Qadimiy boy tarixga ega bo’lgan goʻzal va betakror ona tilimiz ota-bobolarimizning oʻz tiliga boʻlgan mehr-u muhabbati, e’tibori va ijodkorligi bilan asrlar davomida sayqallanib, chiroy ochib, goʻzal ibora va tashbehlar, hikmatli soʻz va naqllar bilan boyidi. Quvonarlisi, ona tilimiz bizgacha ana shu javohir-u goʻzalliklari bilan yetib keldi.
Bugun bizning vazifamiz ajdodlarimiz mehri va ijodkorligi bilan dunyoga tengsiz boʻlgan ona tilimizning umriga umr, boyligiga boylik, goʻzalligiga go’zallik qo’shishdan iboratdir. Mana shu ezgu maqsad yoʻlida olib borayotgan ishlaringiz maqtovga arzirli, e’tirofga sazovor, desak mubolagʻa boʻlmaydi.
Qadrli hamkasblar!
Buyuk ajdodlarimiz oʻz ona tilini sevish, uni qadrlash bilan birga, boshqa tillarni ham oʻrganishi natijasida ilm-fan olamida buyuk kashfiyotlar qilishgan. Har ikkala Uygʻonish davriga asos solishgan. Bugun bizdan davr talab qiladigani – yoshlarimizni ana shu ajdodlarimizga izdosh qilib tarbiyalash, ularning ishlariga davomchilarni yetishtirish, qalbida ona tiliga mehri ummon bo‘lgan avlodni kamolga yetkazishdir.
Hurmatli jamoadoshlar!
Barchangizni ona tilimizning bugungi ayyomi bilan qutlayman. Oʻzligimizning asosi boʻlgan ona tilimizning umri boqiy bo’lsin! Barchangizga sihat-salomatlik buyuk va ezgu maqsad yo’lidagi ilmiy-pedagogik faoliyatingizga omad, xonadoningizga totuvlik tilayman.
Hurmat bilan B.Xoliqov,
Samarqand davlat chet tillar instituti rektori
