عائلة رابح 🤍

صباح الخيرات، أول مرة أظبط نومي من بعد رمضان 🤓

صحيت الفجر وحتى الآن خلصت مونتاج ريل "تغذية" ولعبت ماتش شطرنج وكملنا استلام معلومات المشتركين في "معسكر رابح" اللي هيبدأ ٥/٥ بعون الله.

الساعة ٧ وربع أهو يعني لسة الأغلبية ماصحيوش من النوم والحمد لله حاسس إني أنجزت شوية حلوين، ربنا يستر بس واستمر على كدا 😂

الشاهد إن الصحيان بدري مهم جدًا يا شباب ويا سلام لو بقى عادة مستمرة معاك، نفسيًا وبدنيًا وروحيًا، دا كفاية بس إنك بتصحي قبل البشر وتحس الكوكب لسة فيه أكسجين.

بفكر أخلي العادة دي من ضمن أساسيات "معسكر رابح" بعد كدا، اللي هو هنصحى في وقت معين وهتلاقوني قاعد على الجروب بتمم عليكم واحد واحد مين صحي والتزم ومين لأ.

بس هل يا ترى دي هتكون حاجة قابلة للتطبيق ولا صعبة عليكم وهتخليكم ماتشتركوش؟

شاركوني برأيكم:
في الصراحة منه ها…

فكرة كويسة ❤️
صعب تطبيقها 💔

عائلة رابح 🤍 pinned «بقالي أكتر من ٥ سنين شغال في مجال التغذية والتدريب، بفضل الله ساعدت آلاف الأشخاص للوصول لأهدافهم والتحسين من صحتهم وشكل أجسامهم. ومن خبرتي الفترة دي عرفت إن المشكلة اللي بتواجه ناس كتير كانت فقدان الحافز، حاسين إنهم لوحدهم في رحلة الدايت، معظم اللي حواليهم…»

Channel name was changed to «عائلة رابح 🤍»

أهو الصيف دخل يعني ملكش حجة!
وراكم وراكم لحد ما تاخدوا شاور بارد كل يوم الصبح 🚿🤓

الشباب مبتضيعش وقت 😂

صدقوني مش شغل ماركتينج ولا حاجة بس المعسكر المرة دي هيتحجز بدري اوي .. فـلو ناوي ماتترددش كتير.

وعلى رأي حسن دَقّة "ان خلص الفول انا مش مسئول" 🤓

هيي ماشالله .. صباح الخيرات ⛅️

باقي ٧ أماكن فقط في "معسكر رابح"
حبيت أبلغكم هنا الأول قبل ما أعلن على منصات السوشيال ميديا 🤍

بس كدا.

بقالي أكتر من ٥ سنين شغال في مجال التغذية والتدريب، بفضل الله ساعدت آلاف الأشخاص للوصول لأهدافهم والتحسين من صحتهم وشكل أجسامهم.

ومن خبرتي الفترة دي عرفت إن المشكلة اللي بتواجه ناس كتير كانت فقدان الحافز، حاسين إنهم لوحدهم في رحلة الدايت، معظم اللي حواليهم من أهل وأصدقاء بياكلوا اللي عاوزينه براحتهم ومش بيتمرنوا.

وعشان كدا قررت أعمل لكم تجربة جديدة بجهّز لها بقالي فترة كبيرة، تجربة واثق في ربنا ثم نفسي إنها هتكون نقلة كبيرة لحياة كل اللي هيشترك فيها.

"معسكر رابح المغلق"

أيووووة زي ما سمعت كدا، معسكر بمعنى الكلمة، مجتمع متكامل، أي حد نسبة دهونه فوق الـ٣٠٪؜ أو أي حد عاوز يخس عمومًا يجهزلي نفسه كدا عشان هندخل في معسكر لمدة اسبوعين فيهم تركيز عالي، ١٥ يوم هيكونوا محطة الانطلاق في رحلتك بعد كدا.

طول عمري بتابع مع المشتركين one-to-one coaching متابعة شخصية منّي للشخص فقط، والبرنامج "٩٠يوم" وماكنتش بقبل اشتراكات شهرية إطلاقًا، ودي مش كل الناس بتقدر تشترك فيها عشان التكلفة العالية فكانوا بينتظروا العروض.

لكن بما إني مش هقدر أعمل عروض حاليًا بسبب العدد الحمد لله، وفي نفس الوقت مع نهاية رمضان بتجيلي رسايل كتير أوي عن الإشتراكات والعروض.

فحسيت إنها إشارة عشان أعمل المعسكر اللي بفكر فيه من زمان 😅

هنشجع بعض وهكون معاكم يوميًا لأي استفسار .. دايت وتمارين ونصايح عامة في الرايحة والجاية.

إسبوعين مُكثّفين دسمين هيغيروا حياتك بعون الله.

البداية ٢٠ إبريل والحجز متاح حتى ١٨ إبريل .. ابعت "معسكر رابح" على فيسبوك أو انستجرام واحجز مكانك في الجروب قبل اكتمال العدد.

ولمعلوماتك يعني الاشتراك رمزي والعدد محدود، وأنا أعلنت على القناة هنا قبل صفحاتي على السوشيال ميديا عشان أوفي بوعدي معاكم إن ليكم الأولوية في كل العروض والخصومات.

فيسبوك: https://www.facebook.com/ahmedrabeh11?mibextid=LQQJ4d

انستجرام: https://www.instagram.com/coach.rabeh?igsh=Z3J0ZDFvZGczazVj

عرفتوا اللي حصل!!

دي المفروض دارسة جديدة اتنشرت من كام يوم يعني في رمضان، بتقول بالبلدي كدا إن الصيام بيزود إحتمالية أمراض القلب.

المشكلة مش في كدا .. المشكلة إن أكبر الصحف والمجلات العالمية المشهورة نشرت الدراسة دي، الشيء اللي تسبب في هرج ومرج على ساحة التغذية الدولية.

فاااا نقول بسم الله واستنوا فيديو طويل وحلقة مُفصّلة عن الموضوع دا بكل جوانبه "حصريًا" على القناة هنا النهاردة الساعة ٨ مساءً بتوقيت القاهرة يعني بعد حوالي ٣ ساعات بعون الله.

أو علم يُنتفع به .. سلام 🤍

بقولك إيه…

⁃ لو بتعاني من مشكلة في التوازن والسيطرة على جسمك.
⁃ لو عندِك إجهاض متكرر.
⁃ لو أعصابك وعضلاتك مش ولا بُد.
⁃ لو أعراض العَجَز ظهرت بدري وجلدك دبلان.
⁃ لو مش بتحس بأطرافك كويس.
⁃ لو عندك مشكلة في الرؤية وخصوصًا بالليل.

يبقى حضرتك لاااازم تهتم بـڤيتامين "E" اللي هو نفسه ڤيتامين "هـ" لأنه ناقص عندك.

هتلاقيه في المكسرات وزيت الزيتون والأوراق الخضراء.

بس كدا.

أو علم يُنتقع به .. سلام 🤍

طب بذمتكم مش مفتقدين اخوكم رابح وموضوعات التغذية 🤓

من المفارقات الجميلة 😂🤍

فيسبوك بيفكرني بالصورة اللي نزلتها من ٤ سنين لما كنت شغال في إحدى دور النشر في معرض الكتاب.

قبل يوم واحد من حفل توقيع الطبعة الرابعة من كتابي اللي حقق مركز أول في المبيعات في نفس المعرض.

للتذكير عشان ماشوفش نفسي في يوم من الأيام:
بتوفيق ربك مش بشطارتي.

مستنيكم بكرة "الجمعة" في صالة 1 جناح B56 ♥️👏🏼

ومشتركين شهر فبراير بجهزوا عشان المعرض هيخلص ٦ فبراير وهنبدأ على طول بعون الله.

هكون موجود وهستناكم بكرة "الجمعة" بعون الله في معرض القاهرة الدولي للكتاب صالة 1 جناح B56 ♥️

دا بوست دار النشر للإعلان عن الكتاب عاوزين قلباااان هنا ♥️🔥

https://www.facebook.com/100085149926132/posts/pfbid05DbXwJF5H3hYvzYXKncLr53acm8AwAdaJ3u5BiDQ9sCT2ZwfZZ7pyV6bFsGDNwjPl/?mibextid=WC7FNe

البيه اللي عامل ايموچي 🤮 عارفك وهجيبك.

تعرف إن دهن اللحمة الدسم أوي دا اللي حضرتك بترميه هو في حقيقة الأمر لا يقل أهمية عن اللحمة؟

طب تعرف إنه عبارة عن دهون "صحية" مليانة فيتامينات ومعادن؟

طب تعرف إنه بيساعد سيادتك على الشبع بنسبة كبيرة ومش بيتخن زي ما ضحكوا علينا زمان؟

طب تعرف إن نوع الدهون اللي في اللحمة هو نفس النوع الصحي اللي في الأڤوكادو وزيت الزيتون؟

طب تعرف إن دهن اللحمة بيساعدك على امتصاص الـ د٣ اللي مهم جدًا لامتصاص الكالسيوم في العظام صح عشان لو عضمك مامتصش الكالسيوم هيلف في الدم ويترسب في مناطق كتير ويعملك تكلسات وبلاوي زرقا؟ تعرف؟

وهتعرف منين يا بيه طول ما حضرتك لسة ماشترتش كتاب "لصحتك رابح"!! 🤓

Channel name was changed to «لصحتك رابح 🤍»

مسألتش نفسك قبل كدا.. هو انا ليه بقدر آكل مكرونة بشاميل بكميات كبيرة عادي لكن مقدرش اكل نفس الكمية دي لحمة بسهولة؟

بص يا صديقي.. عندنا معيار كدا من ضمن المعايير اللي احنا كأعضاء محكمة التغذية الدولية بنُخضع أي أكل للحكم بناءًا عليه، المعيار دا بيُسمّى بالـFood palatability ألا وهو قدرة الشخص على إنه "يُزلط" الأكل دا بسهولة فبالتالي ياكل منه كميات كبيرة تحت تأثير المتعة اللحظية غير آبِه برسايل عقله اللي مفادها "جسمك شبع كفاية يالمفجوووع".

الـpalatability لكل أكل بتتحدد بالأربع لقطات دول.. ركز معايا وعاوزك تلقائيًا تعقد مقارنة سريعة في دماغك بين حتة اللحمة الحمرا الغلبانة وقطعة البشاميل الشهية في العوامل الأربعة.
⁃ الطعم.
⁃ الملمس.
⁃ المظهر.
⁃ الرائحة.

المكرونة بشاميل ذات الوش المحمر والقوام اللين والمظهر الچوسي الذي يَحُفّه البخار من هنا وهناك فضلاً عن أنه حين يلتقي هذا الميكس الصايع بتجويف فمك يسافر بذهنك إلى عالم الفار الطباخ، تخيلت؟

طب إيه قولك في حتة اللحمة المفتلة اللي بتتمضغ بالعافية اللي ريحتها مش مميزة أوي يعني وشكلها مش چوسي خالص تعطيه ٦ من ١٠؟

ومن هنا بقينا نصنف الأكل ونقول دا high palatable ولا low palatable ، ومعلومة عـ السريع كدا.. الكلمة دي جاية أصلاً من الـpalate ودي منطقة سقف الفم اللي بتفصل بين تجويف الفم وتجويف الأنف واللي موجود فيها الـtaste buds أو مستشعرات الطعم اللي اتكلمنا عنها في خطة الـ١٥ يوم للتخلص من إدمان السكر، صدق اللي قال الجسم دا اوضة وصالة.

وأخيرًا يا صديقي.. خد بالك من الأكل اللي "بيتزلط" بسهولة عشان دا فخ بيخليك تاكل فوق احتياجك وبيحرمك متعة الأكل في صورته الطبيعية اللي ربنا خلقه عليها، وبمرور الوقت وسرعة جري السنين هتلاقي نفسك فجأة -بعد الشر- بقيت تلف على الدكاترة وتشيل شنطة العلاج اللي موجودة في كل بيت دلوقتي بسبب عدم توفر توعية كفاية عن التغذية للأجيال السابقة.. خد بالك من نفسك يا صاحبي عشان نفضل لحد بعد الخمسين بنقول هيي ماشالله.

ومستنيك في معرض الكتاب عشان معلومات زي دي وأكتر بنفس لهجتنا العامية موجودة في كتابنا "لصحتك رابح" اللي نازل المعرض للمرة التانية بعد تحقيقه المركز الأول في المبيعات ٢٠٢٣ الحمد لله.

أو علم يُنتفع به.. سلام 🤍