#صباح_الخير
من الرسايل اللى جت لى (حكيتي لنا عن وجع شديد مريتي بيه الفترة اللي فاتت، واتكلمتي إنك تعافيتي، إزاي قدرتي تعملي ده وتتجاوزي الخذلان برغم تعبيرك عن إنه كان قوي).
الحقيقة إن المرور على الخذلان والتعافي منه مش بالأمر الهين خاصة لو الشخص موجود بعمق جواك ، والحقيقة خلال العملية دي كانت نفسي بتشدني شد للإنتقام والكره ودوامة الحزن ، وسؤال كان بيموتني ويسحب روحي مضمونه (ليه؟) ، سؤال نابع من مرارة الظلم ،سؤال مالوش نهاية غير طريق ضلمة مابينتهيش غير بالقهر.
وفجاءة لقيت قدامي طريقين يا استسلم للي فرضاه عليّ الأنا وكنت بجد أقدر أخد حقي وأشفي غليلي ولكن كنت هكسب حاجة وهخسر مئة حاجة،
يا إختار القلب السليم وطاقة الحب اللي مالياه و اللي عودته إنها تفضل جواه، و قدوتي كان نبي الأمه عليه السلام في تعامله مع الإساءة.
فقررت أتبنى شوية خطوات ومشاركتي ليها معاكم نيتي فيها إنكم تستوعبوا إن كلنا بشر، و مهما بلغنا من الوعي فيه اللي أوعى مننا، وإنها تساعد كل حد مر بتجربة وجع كرهته في عيشته واللي حواليه،
الخطوات دى ابتدت بسؤال إزاي أطلع كسبانه من اللي شيفاه خسارة:
1- تربية النفس على الثقة في الله وحسن الظن فيه. والتربية بتيجي أولاً بزيادة المعرفة عن الله وصفاته الحسنى وأسمائه، عمل طاعات مش محتاجة مجهود كبير بس مستمرة،وثانياً بقراءة السيرة النبوية وقصص الأنبياء.
2- ممكن أتحسن شوية بس لازم أفهم إن هجمات الحزن والقهر جوايا هتيجي كل شوية ، ساعتها كنت بجيب ورقة وقلم وأقعد أكتب الحاجات اللي موجودة عندي وأتخيل إنها لو مش موجودة، ساعتها كنت بلاقي الظلمة اللى في نفسي دى دخلها شعاع نور ممتزج بصوت تسليم ورضا للي حصل لي.
3- حددت الهدف اللي عايزة أعيش علشانه وبدأت اسعى واتعب اشوف إنجاز حتى ولو بالنسبة لإنجازاتي اللي قبل كده قليل اوى بس المهم قررت إني مش هقف هتحرك حتى ولو خطوة, وحاولت إن الخطوة اللي أمشيها ما ارجعهاش، ولو رجعتها بشوف الأسباب واطبطب على نفسي.
4- دور ت على الناس الطيبة اللي في حياتي وحددت إحتياجي من كل شخص ، و احترمت وقتهم ، وفعلت كانوا زادي بعد ربنا في الرحلة دي, وبقيت بكلمهم و استعين بيهم لما احس بالكره ييلمس قلبي.
5- أول مابلاقي نفسي بتقولي إشمعنا أنا، بقيت برد عليها بالآية ( والله يعلم وأنتم لا تعلمون).
6- و كل ما ا فتكر اللي عملوا كده كنت بوقف دماغي تسترسل في المشهد وبكرر جملة ( منهم لله) ( وأفوض أمري إلى الله) وجوايا ثقة إن ربنا مش هيضيع حقي أبدا وهشوف كل اللي يرضيني.
8- حاولت أهتم بمظهري الخارجي بشكل مفيهوش إفراط، وده كان سبب في خلق طاقة حب ورضا عن نفسي.
9- بسأل نفسي دايما عايزه إيه من الدنيا دى؟ سؤال بيدأ يرجعني للبوصلة من تاني.
بس صدقني لو دربت نفسك على الخطوات دى وغلبتك مره وغلبتها مره المهم إنك متستسلمش للكره أبدا، هتكون إنت المنتصر ولازم تكون، لأن الكره لو إتملك منك مش هتلاقي نفسك غير في طريق الأمراض ، ودايما خليك فاكر #مش_سهلة_لكن_مستاهلة
ودايما كرر ( حسبي الله ونعم الوكيل) علشان يكون الرد عليك (فَانقَلَبُوا بِنِعْمَةٍ مِّنَ اللَّهِ وَفَضْلٍ لَّمْ يَمْسَسْهُمْ سُوءٌ وَاتَّبَعُوا رِضْوَانَ اللَّهِ ۗ وَاللَّهُ ذُو فَضْلٍ عَظِيمٍ)
#ببساطه_اووووى
#امال_عطيه
#امرأة_متميزة