حسینی_سعدی_زمان
بير دلبريم وار عارضی رخشنده آفتاب
يوخ يوخ اونون گل عارضينه بنده آفتاب
تطبيق ايلسم يوزونی آفتابيله
اولماز نظير اونا اولی شرمنده آفتاب
بير کهکشاندی صورتي خورشيد آفرين
گورمز اونون نظيرينی تابنده آفتاب
کيمدور بو حسن صاحبی مرآت سرمدی
نــامـوس دهــر قائـم آل مـحـمــدی
اوخشار نگاريمين يوزينه آفتاب ؟ يوخ
وجه اللهه قياس اولور ماهتاب ؟ يوخ
نور اماميدن گون ايدر نورين اقتباس
واردور بو سوزده جای سوال و جواب ؟ يوخ
گوندن هامی کرات جهان مستفيض اولار
بو استفاضيه اولی مانع سحاب ؟ يوخ
کيمدور بو حسن صاحبی مرآت سرمدی
نــامـوس دهــر قائـم آل مـحـمــدی
والشمس يعني آند اولا شمسه ديوب خدا
والشمسدن اونون يوزيدور اصل مدعا
والليل آند اولا گيجيه يعني زلفينه
محسود نافه ختن و عنبر و ختا
هيهات مشک چين و عبير تَرِ ختن
اول زلف مشکسايه جهاندا نظير اولا
کيمدور بو حسن صاحبی مرآت سرمدی
نــامـوس دهــر قائـم آل مـحـمــدی
يوز سبزه گندمی نجه يوز شرحه يوخ مجال
آيينه جمال خداوند ذوالجلال
گوزلر قرا گشاده جبين قاشلاری هلال
وار ساق يوزينده نقطه کيمی بير سياه خال
به به نه جاذبه ی اهل عشق و حال
اولماز شعاع کوکب درّی اونا مثال
کيمدور بو حسن صاحبی مرآت سرمدی
نــامـوس دهــر قائـم آل مـحـمــدی
فوق مديحه دور نمکين ماه طلعتي
مکّی نقابدور، مدنی پرده صورتی
چاتماز بو حسنه يوسف مصری وجاهتی
حيدر باخيشلی گوزلری شيرانه صولتی
آئينه دور پيمبره کليّه خلقتی
وار صورتينده احمد مرسل ملاحتی
کيمدور بو حسن صاحبی مرآت سرمدی
نــامـوس دهــر قائـم آل مـحـمــدی
جنت گوزلدی اهلی گوزل يوخ بونا کلام
غلمان گوزلدی، حور گوزل نهرلر مدام
واضحدور حسن صاحبيدور انبيا تمام
جنّتده جمع حسنی قيلوب حی لا ينام
بونّان بيله ديردی پيمبر عَلَی الدَّوام
طاووس خلد عدنيدی مهدی شه انام
کيمدور بو حسن صاحبی مرآت سرمدی
نــامـوس دهــر قائـم آل مـحـمــدی
بو حسن بو جمال حسينی بو احتشام
بو شان بو جلال و بو عزّتده بير امام
باخدوقجا ذوالفقاره توکر گوز ياشی مدام
آغلار دير کی جديمی اولدور دولر لئام
تا آلماسام بو تيغيله اعدادن انتقام
قان آغلارام بابا ديرم هر صباح و شام
کيمدور بو حسن صاحبی مرآت سرمدی
ناموس دهر قائم آل محمدی
.