Кузги ҳазонида гуллайди баҳор.
Ёмғирлар ашула айтадилару,
Раққоса мисоли жавлон урар қор.
Сен ёнимда бўлсанг капалакларнинг,
Тушина бошлайман шеваларини.
Тўймасдан тинимсиз еявераман,
Висолнинг асалдек меваларини.
Сен ёнимда бўлсанг анвойи гуллар,
Дунёни тўлдирар ифорларига.
Бирдан шифо берар Парвардигорим,
Бориким хастаю-беморларига.
Сен ёнимда бўлсанг, ажиб сир, синов,
Наҳот томирда ҳам туради тўфон.
Йўғингда шунчаки югуриб юрган,
Бирдан тўлқинланиб оқа олса қон.
Бирдан Ер ўз ўқин эта олиб тарк,
Кафтимга тўкилиб беради осмон.
Ўзини қаерга қўйишни билмай,
Танамда чарх уриб чириллайди жон.
Сен ёнимда бўлсанг доим шу ахвол,
Шоир забоним ҳам чиқар бир пулга.
Мухаббат олдида қироличалар,
Гўзал маликалар айланса қулга.
Ҳар сўзинг юракни солар ларзага,
Овозинг куй мисол этаверар ром.
Ёнимдан кетсангу, ёдимга ўтиб,
Яна ошиқлигим этади давом.
Сен...
ёнимда...
бўлсанг...
Малика Тавфиқ