صبرا عالجرح لا تذرف دموع
لتخلي اليكرهك يملي كاسه
اذا تبجي لوحدك انته خسران
واذا تبجي يم شامت انتكاسه
الجرح مو مشكله بس اليأذيك
اليلجمك عالجرح لازم حراسه
ومو كلمن نزف يتسمه مجروح
الجرح مو بس كثر بالدم قياسه
اليلگه بجرحه دم صدگني يرتاح
والمايلگه دم جرحه بإحساسه
إقبل اي جرح بس جرح الاحساس
تضل تندغ عمر لو بشر جاسه
ميضوج الورد لو داسه فلاح
بس يضوج اذا فلاح داسه
ابني بيت عالي وساسه من طين
ولا تبني قصر والرمل ساسه
اكو واگف نعم بس منحني الراس
واكو طايح لجن مرفوع راسه
كون العين تگدر تقره الوجوه
والخد كون يعرف ياهو باسه
لتباوع بوجهك بالمرايات
الزين يشوف وجهه بعين ناسه