Ijtimoiy tarmoqlarda metropolitenning Paxtakor bekatida yo‘lovchilar o‘rtasida yuzaga kelgan tirbandliklar to‘g‘risidagi foto va video materiallar keng tarqalmoqda.
Ushbu holat yuzasidan "Toshkent metropoliteni" DUK quyidagilarni ma’lum qiladi:
Ma’lumki, metropoliten tizimidan foydalanuvchi yo‘lovchilar soni kun sayin ortib bormoqda. O‘rganishlar natijasiga ko‘ra, kechki tig‘iz vaqtlarda ya’ni ko‘plab yo‘lovchilarning ishdan, o‘qishdan qaytish vaqtlari asosan, 18:00 dan 19:00 ga to‘g‘ri kelmoqda. Shu vaqtlar davomida metropoliten yo‘lovchilari soni ham ortmoqda. Ijtimoiy tarmoqlarda tarqalayotgan holatlar ham shu vatlar davomida yuzaga kelgan holatlardan biri bo‘lib, bu asosan 18:30 dan 18:40 gacha bo‘lgan vaqt oraliqlarida, ya’ni bu bekat o‘tish yo‘lida joylashganligi sababli, bir vaqtning o‘zida ikki tomondan ham poyezdlarning kelishi natijasida vujudga keladi. Shu boisdan, bu kabi holatlarni zudlik bilan bartaraf etish maqsadida Toshkent metropoliteni tomonidan barcha yo‘nalishlarda belgilangan grafikdan tashqari, mavjud ichki resusrlardan to‘liq foydalangan holda qo‘shimcha bo‘sh zahira poyezdlari harakati yo‘lga qo‘yilmoqda va video tasvirlardagi holatlar 4 daqiqacha bo‘lgan vaqt davomida to‘liqligicha bartaraf etilmoqda.