Deen & dunya🌿❤️

ارتاحوا بها دقيقة من الدنيا ؛

سلام عليكم ، إن شاء الله تكونوا بخير ، منعرف علاه حبيت نكتب هذا الشيء بصح جا فلحظة منيش موجدتلو و لا علابالي وش راح نهدر ولكن مجرد فضفضات ..
الحياة لي رانا فيها هي فالحقيقة رحلة معلابالناش وقتاه تخلاص او بالأحرى وقتاه يخلاص وقتنا فيها ، صاريلنا كيما كل دقيقة راهي تجوز راهي تنقص من العداد ، مي مرات و اغلبنا واحد ماراه راضي فالدنيا هاذي ! حتى لو دينا كلش نلقاو روحنا نحوسو على شيء اخر ليمعلابالناش واشنو هو ! مي فالحقيقة الحياة وجدت لنجد الله! خلقنا لنبحث عن الله ، ايه نحوسو على ربي ! نعرفو شكون لي خلقنا ، الى اي مدى عظمتو و قدرتو كبيرة ، نامنو بيه ! نتعلمو الايمان بخالق لم نراه و لكن ترك بصمته في كل شيء خلقه ، نحاولو نوصلولو في أعمالنا في علاقاتنا في كل شيء نمارسوه في الحياة و نحاولو نخلصو النية ليه ، " قل ان صلاتي و نسكي و محياي و مماتي لله رب العالمين " ، تخيلو كل واحد فينا يولي يعبد ربي بحب ! ماشي لأنو فرض و لا بسبب الخوف إنما بحب ! تخيل انت لي راك تقرا تلحق لدرجة تشوف غير ف ربي ! في كل شيء ديرو ف كل دقيقة من حياتك تذكر الله في عقلك و قلبك و تحبو و تحس بالحب تاعو في قلبك ، تتعلق بيه ، و اي حاجة فالدنيا راهي خاصاتك راح تدعي رب الكون كلو حتى لو مكانش اسباب لانو هو رب الاسباب ، ماذا لو كان ربي هو حبيبك ؟ كل حاجة عيانة تصرا تحكيلو ليه وتشكيلو و اي حاجة تتمناها ترفع يديك و تدعيه ، و كتكون مرتاح ترفع يديك وتحمدو يارب لك الحمد على كل نعمة في حياتي ، ماذا لو صح ولات عبادة ربنا هي الهدف الحقيقي حاليا في خياة كل واحد فينا ، يا ترى كيفاه حنوليو و لا كيفاه حتولي حياتنا ؟ نظن انو الانسان لما يلحق لدرجة ايمان كبيرة و تعبد حقيقي للي خلقو و يستشعر ربي في كل لحظة في قلبو و يحكي معاه و يتوكل عليه و يوكلو امر حياتو مع السعي ف كل امر ، كنا راح نلحقو لدرجة الستراس و القلق لي رانا عايشين فيها ؟ ماءا لو نراجع علاقتنا مع ربي ؟ ماذا لو نيفقو انو الحياة قصيرة بزاف و حنا رانا مبحرينها و مبحرين طاقتنا و كل تركيزنا و مشتتينو عن الهدف الحقيقي لي وجدنا علاجالو ؟ و من رحمة الله انو حتى الانسان كي يلحق و يلقا طريقو لربي كلش فحياتو رح يتسڨم ! حتى نفسو تتزكى ! هو في حد ذاتو يتكالما ؛ حتى في وقت البلاء رح يكون المؤمن القوي لي يحس بلي هذا الشيء قدرو ربي عليه حتكون عندو قوة للصبرو الثبات ، الثقة ديالو بربي تخليه يجوز كلش ،
أعتبروني مجرد روح فيها الخير و تتمنى الخير لكل الناس ، لست انسانة كاملة و لا انسانة لا تخطئ ، انا مثلكم ، نتمنى لو مل واحد فينا يعاود يرتب أهدافو و يشوف الحياة من المنظور الحقيقي ، يحط كلش من يدو و يرخي نفسو شوية ، و يتجه و يحط طريقو للي خلقو ، يرسمها لعندو حتى يوصل ليه ، و لي يوصل ل ربي رح يوصل لكلش ! مكاش حاجة أجمل في الدنيا من أنك تعيشها مع الله و في كل تفصيل فحياتك و لو صغير تديرو لوجه الله ، ربي يحبنا هو لي خلقنا و ساترنا رغم عيوبنا و يستنانا دايمن نولو ليه ، لأنو يحبنا نكونو بقربو و نكونو دايمن معاه و نذكروه ، خلو هدف انكم تكونوا أحباب الله ، و الله أنكم تكسبوا الدنيا و الاخرة و تعيشو جنة الدنيا قبل جنة الاخرة ❤️

اليقين بالله ❤️

Channel photo updated

Channel name was changed to «Deen & dunya🌿❤️»

❤️

معلاباليش شحال من واحد راه نايض دوكا ، مي نقولو فضفضات قبل النوم ، رانا ليلة جمعة " ليلة مباركة " بعد شوي يتنزل ربي للسماء الدنيا ، ليعندو هم و غم ولي فخاطرو حاجة و لي حاب حاجة و لي مستني حاجة .. توضو توضاو زوج ركعات خلو كلش موراكم ونوضو ادعوا ، اسجدوا ، اهدروا مع المولى ، كيما راهي فقلبك و كيما راك حاب تهدرها اهدرهالو لأنو راه يشوفك و يسمعك و بيدو كلش ، متقولش مستحيل ومتقولش بعيدة و متقولش انا مذنب ربي ميسمعليش .. نحي من بالك كلش ، انت عبدو لي خلقك و خلق علاجالك كلش و لي يحبك و سخرلك كلش .. ضيقها عليكم باه تولو ليه هذا ماكان ! ارتاحوا و ريحوا ماكان ربي مقدرلو ربي راح يكون راح يكون بإذنو ، متقنطوش مي لي فخاطرو يبكي ابكي و فرغ قلبك ! كلش يفوت و يجوز .. ربي يفرحكم ان شاء الله كامل و يقر أعينكم في الدنيا و الاخرة ، صلو على نبينا و حبيبنا محمد ..
تصبحو ا بخير ❤️🥰

❤️🥰

السلاام عليكم ليكيپ ، ان شاء الله تكونو بخير ، واشرايكم بصوتيات تحكي عن المعجزات لي ذكرها ربي فالقران و لي منها نتعلمو الصبر و الأمل في الحياة مهما كانت حالتنا ؟ نتمنى تدعموني مدابيا والله نكون سبب ف جبر قلوب الناس و نكون سبب ف احياء الامل ف قلوبهم .. 🥺❤️

دائما فكروا بقوة الله ، لا تفكروا بقوة الظروف ❤️

وقوله: ﴿فإنَّ مع العُسْرِ يُسْراً. إنَّ مع العُسْرِ يُسْراً﴾: بشارةٌ عظيمةٌ أنَّه كلَّما وُجِدَ عسرٌ وصعوبةٌ؛ فإنَّ اليسر يقارنه ويصاحبه، حتى لو دخل العسر جحر ضبٍّ؛ لدخل عليه اليسر فأخرجه؛ كما قال تعالى: ﴿سيجعل اللهُ بعدَ عُسْرٍ يُسْراً﴾، وكما قال النبيُّ - صلى الله عليه وسلم -: «وإنَّ الفرج مع الكرب، وإنَّ مع العسر يسراً ».
وتعريف العسر في الآيتين يدلُّ على أنَّه واحدٌ، وتنكير اليسرِ يدلُّ على تكراره؛ فلن يغلب عسرٌ يسرين.
وفي تعريفه بالألف واللاَّم الدالِّ - على الاستغراق والعموم يدل على أنَّ كلَّ عسرٍ وإنْ بلغ من الصعوبة ما بلغ؛ فإنَّه في آخره التيسير ملازمٌ له.

- تيسير الكريم الرحمن (تفسير السعدي) 📚

كل هذا جهاد في سبيل الله،
‏ويهديك الله بعد كل هذا إلى سواء السبيل!
‏هذا وعد من الله،
‏ ولا أحد أوفى بالعهدِ من ربكَ!
‏
‏كل الناس مذنبون يا صاحبي،
‏الصالحون والطالحون على حدِّ سواء،
‏ولكن الصالحين يستترون ولا يُجاهرون،
‏يستغفرون ولا يُصرِّون،
‏ويعترفون ولا يُبررون!

"والأصل في المتكلم قصد الهداية ورحمة الناس لا الوقيعة فيهم والاستهزاء بهم والسخرية منهم، ولكن هكذا زماننا! والناس بأزمانهم أشبه منهم بآبائهم!

اللهم ارزقنا علما مقترنا برحمة، وأدبا مقترنا بحلم، ونعوذ بك من مساخطك وكل ما يُغضبك."

تصومو؟🤍

ماذا لو استشعرنا عظمة الخالق ؟ كاش نهار ريحت هكا مع روحك و قلت قداش عظمة ربي سبحانو لي خلق هاذ السماوات و الأرض ؟ المحيطات و البحار و مافيها ما نعلمه و ما لا نعلمه ! لي خلقنا بهاد الدقة و التفاصيل و و و ... ! ربي هو القادر على كل شيء " و هو على كل شيء قدير) الاية لي تكررت في اغلب السور القرانية علاه ؟ هكا برك؟ اكيد باه ربي سبحانو يفكرك بقدرتو وب لي مكاش حاجة مستحيلة عليه سبحانو و قدما بفكرنا البشري نوشفو الشيء بعيد و مستحيل هو لا مو مستحيل ! بيد ربي فقط و هي قريبة منك تلك الامنية مثل ما انو ربي قريب منك و اقرب من حبل الوريد ، امنيتك و كل ما تتمناه بيد الله اطلبوا منه سبحانو لا تعجزوا و لا تكلوا و لا تملوا! انه لا يعجزه شيء لا في الارض و لا في السماء ، خلو الامل ف قلوبكم ديما و علقو قلبكم بربي و انتظروا منه فقط ، ادعوا ادعوا ادعوا ، حتى تنالوا و حتى يرضى الله عليكم و حتى يعطيكم حتى ترضوا ، مكاش حاجة مستحيلة و كلش بيد ربي ساهل ، ان مع العسر يسرا ، ان مع العسر يسرا ، " فصبر جميل عسى الله أن يأتيني بهم جميعا " ❤️

كل واحد فينا راهو يخمم ف حاجة حابها بصح يشوفها صعيبة ، بعيدة ، مستحيلة بصح فالحقيقة ما بيننا و بين هاذ الامنية مشيئة الله فقط ، حرفين " كن" من عند الله ، مرات نتقلقو و نخافو و نحزنو و نخمو كيفاه ووقتاه و و يجيك مية عقبة ف راسك بصح عند المدبر تدبيرها سهل و قادر يعطيهالك بطريقة مجاتش فراسك كامل ، حبيت نقول انسفو الافكار السلبية لي تجي فراسكم متخلوهاش تدي من جهدككم و تفكيرهن ووظفو الطاقة هاذيك فالدعاء ، خلو ربي و قدرتو فقط ف راسكم هدامكان و نحو الباقي من تفكيركم خمو انو الله قادر على كل شيء و اذا اراد الله شيئا ان يقول له كن ف يكون ، ادعو ربي تضرعا و خفية بخشوع و بيقين في قدرتو و عطاؤو و رحمته ، هو الحي القيوم لي بيده ملكوت كل شيء ابكو و ادعوا و احكيولو كلش و لو كل دقيقة و كل ثانية ، " و هو على جمعهم اذ يشاء قدير" و هو باه يجمعكم بمافي قلوبكم جميعا قادر سبحانو ، ابتغوا الفضل من عنده و الله يسلمنا مافي قلوبنا جميعا قريبا يا رب❤️

بزاف فينا راهم يعانيو ف حياتهم ، بالاك قلة رزق بالاك هم... و الخاحة لي نغفلو عليها و لي مدهالنا ربي سبحانو هي " الاستغفار "
" و ما كان الله معذبهم و هم يستغفرون"
كل واحد فينا راه معمر بالذنوب ، رانا ملوثين جميعنا بذنوبنا و هاذ الحاحة تستحق تطهير ، انو نطهرو رواحنا من الذنوب و نحاولو نستغفرو يوميا و نلتزمو الاستغفار ، مع الوقت رح تلاحظو سكينة ف النفس و راحة ، ربي يفتح ابواب الرزق و الخير عليكم من كل حاجة و اهم شي فالاول ربي حيكون راضي عليكم ، لاي واحد مهموم و بالاك مغلوقة عليه من كل جهة التزمو الاستغفار و استغفرو الله العظيم من كل ذنب عظيم اقرفتوه ، استغفرو قدما قدرتو يوميا ، مع الوقت ان شاء الله تفرج عليكم من كل مكان . ❤️