ليه ما نكتبش في خانة الإنجازات إزاي قدرنا نسيب البيت القديم و نبدأ من جديد؟ إزاي نقلنا من مدرسة للتانية و كملنا طريقنا؟ إزاي اكتشفنا الكذب و الخداع اللي حوالينا؟ وإزاي اتحملنا مشاكلنا لوحدنا، من غير ما نحمل أهلنا الهم؟
إزاي وقفنا بثبات في أول يوم جامعة؟ وإزاي كنا أقوى لما الظروف أجبرتنا نمشي في طريق ما كناش حابينه؟ إزاي حضنا حزن صديق؟ وإزاي نطقنا أول كلمة عزاء؟ وأول كلمة “مبروك”؟
ليه ما نكتبش في خانة الخبرات إزاي قدرنا نصبر على غياب اللي بنحبهم، وعلى موت القريبين مننا؟ وإزاي قدرنا نسامح ناس خذلونا؟
ليه ما نحطش في خانة المهارات حاجات زي الصبر، التسامح، الثبات، والقوة في عز الألم واليأس؟
الشهادات والأوراق مجرد ديكور شيك على الحيطة، إنما المواقف دي هي اللي شكلت مين إحنا بجد…