لو تدري أنْتَ شگد مهم
مثل الكرامة التنقري بدمع الزلم
و لو تدري أنْتَ شگد مهم
ليلية بين نجومنا ندورك نجم
و عيوننا تدور عليك بكل سواد الليل
ما خلت حلم ،
وين أنْتَ ملينا النشد
و الناس گامت ما ترد
و منو يدري شيسوي البعد
يهجم هجم ، ياخذ فرحنا و ينهزم
و بيت المشاعر ينهدم
و منو يدري شيسوي البُعد
و بُعدك ضما
و شفة العمر
و الشفة بثياب العطش هم تبتسم ؟
لو تدري أنْتَ شگد مهم
بعدك بقينا بلا اسم ،
و رسمونا مو نفس الرسم
عندك عِلم ؟
ناسينا لو عندك عِلم ؟
_جبار رشيد