بيت شِعر

‏اكتب رسالة عتب و أرد وامسحها
‏ما ودي اضايقه لو كان … ضايقني

لـ ثامر شبيب

شابت لحانا والليالي مدابير
‏وظروفنا تطحن رحاها علينا

‏يا الله حسن الخاتمة دون تقصير
‏رضاك يا ربي .. ورضى والدينا

‏ويا الله تفتحها علينا على خير
‏ماغيرك اللي بالمصايب دعينا

‏تحدّنا الدنيا ، على حاجة الغير
‏ونفوسنا تبقى … عزيزه علينا

لـ غريب العدهان

على كثر ما شريط الذاكره يطوى
مافيه وجهٍ ثبت فالذاكره .. كثرك

إلتماس العذر للمحبوب :

‏“ ماهي بـ منها ، جروح الوقت ، واللوعه
‏من سود الأيّـام ، ولا هيّ … ما تـجرح “

تحاصرني الدنيا واموري مثل ما هيّ
‏الازعاج يملى مجرياتي .. وأنا هادي

‏" ترى بيني وبين اللي مضى بالذاكره ميلاف
‏وإلين الحين ياخذني شعورٍ من أغانينا
‏ㅤ
‏عرفت إن القدر فرصه سعيده والحياه أعراف
‏لو إن الشوق من كثر البعاد المُرّ يصلينا
‏ㅤ
‏أزورك حلم من خلف الحقيقه والشعور لحاف
‏ما دام إن الوله واقف على سكة هقاوينا "

" انا الطيّب الليّ حنّك إمن المقام الدون
‏وانت الطيّب الليّ ماعَرف قيمته وش هي "

‏"أنتَ التاريخ والتاريـخ لا يُنسى"
‏رحم الله أميـراً كـان أبـاً لشعبـه
29 سبتمبر

الليل حالك والمساري موحشة والدرب خوف
والذكريات أشياء يستعصي علي إتلافها

أثر الأماني وارفات ظلال دانية القطوف
والأمنيات أكثر ما يخشى الحالمين ! إسرافها

على رصيف الصبر ملّ المنتظر طول الوقوف
وين الحياة ؟ اللي تخيلت ! ولمحت أوصافها

رحماك يا غفار يا ملجأ عبادك يا رؤوف
يا مجري الأقدار هبنا من لدنك ألطافها

حسبي على من دمّر أمالي وأنا عيوني تشوف
كم بسمةٍ ؟ كانت طمأنية ! وصرت أخافها

أنا رواية حلم منسية على غبار الرفوف
أنا قضية تطلب من أهل العقول إنصافها

أنا قصيدة عشق ما مرت على قلب العيوف
أنا أراضي جرد ما غاث السحاب أطرافها

لي روح تبحث عن سكينتها من إرهاق الشفوف
يا مثقلين اللوم روحي فاقده ميلافها

لي قلب ما عادت تسليه إبتسامات الهنوف
ولا القدود المترفات المايسات أعطافها

ياللي تزعلك المواعيد وتراضيك الصدوف
وش يرضي اللي جاته الحاجة بعد ما عافها ؟

لا تبتئس لا خانك الواقع وعادتك الظروف
الناس من عاشر رماديها ظلم شفافها

كم زلة من صاحب طافت !!! لو إنها ما تطوف
وكم هقوة كبرتها راحت !! مراح أسلافها

شفت الحقيقة يوم حطيت النقط فوق الحروف
بعض الحقايق ! ودك إن المنصدم ؟ ما شافها

لحد يعاتبني ويا معاتبني إن عاتبت ! روف
مشاعر الجافين ما أحب أكسب أستعطافها

الصدفة اللي من بعد : فرقى
‏أقسى من الفرقى ، عشر مرات

إقتنعت إن الليالي متاحف ذكريات
‏يوم تبطي سجة البال بين أسوارها

‏اللي ظاهرها سعادة وباطنها شتات
‏وحشةٍ ما ملّت النفس من تكرارها

‏ما لفقدك غير نعمه وحيدة فالحياة
‏باحت الدنيا بعَدْك بجميع أسرارها

‏العيون تداري الدمع من كل الجهات
‏مثل الأم اللي تداري شعور صغارها

‏يانديم الذات ماكنت ذات من الذوات
‏أنت وجهة دربي اللي عرفت أختارها

‏وقفتي .. بين التماسك وبين الانفلات
‏حيرةٍ مع كل !.. لهفة شعور ، أحتارها

‏جاد بك عمرٍ مقفّي .. وحظٍ في سبات
‏وابتسمت البسمة اللي دفعت اضرارها

‏الخطاوي يوم ترفق على وجه النبات
‏لو تفج ضلوع صدري .. لقيت آثارها

‏والبيوت اللي بعضها صدور معلقات
‏كان ملهمني وجودك .. بـ كل أفكارها

‏يمكن آغيب بغيابك وآعيف الشاردات
‏وأعطي الساحة مجال تعرْف شعّارها

‏بعد كانت هقوتي واثقه فـ المقبلات
‏كني أسمع .. صفقة يمينها فـ يسارها

‏صعب نسيان الملامح ونسيان الصفات
‏أصعب من الليلة اللي خذتك أقدارها

‏مثل مالك في عيوني طيوفٍ ماتبات
‏لك ورى صدري مدينة تشع أنوارها

‏روحي اللي كانت تشوف فيك الأمنيات
‏كل ما هبّ الهوى الصلف ثار غبارها

‏لو تطيح أركانها الواقفة . . وقفة ثبات
‏ما تطيح - الصورة العالقة فـ جدارها

والله ان بعض الاماكن لها طاري عليك
كنّي أشوفك قبالي … ليّا مريتها

وإن تخيرتك دروب أعرف مشاويرك في بالي
‏أنت صوتٍ يجذب السيَّار، ويحدّ الدليلة

‏معك يا طيْب السّنين، وفيك يا حلو الليالي!
‏شاعرك وش يَقتله؟ غير المعنَّق، والجديلة

‏من مغبَّات الحياة: أشدّ رَكْبي، وارتحالي
‏وأتجمع لك صحاري، وأتفرق بك قبيلة

‏يا معاريف الدّيار إن شفت نفسك من خلالي؟
‏من خلالك كنت أشوف البرق في عِرْض المخيلة

‏وين أروح إن غيبتني شمسك وجفت ظلالي
‏الظمأ عاري، وصوتك حق، وعيونك خميلة!

‏ما يهمّ العمر .. لا منه وقف لـ عيون غالي!
‏كيف عاد أسوق لك عمري سحاب ولا تخيله؟

‏ردني... لـ أيامك الصلفات لا زاد انعزالي
‏آه «يا ذلّ السؤال» إن صار ما فـ اليد حيلة

‏خابرٍ هذا الحزن سيّال.. ما له فيك تالي
‏رغم هذا؟ كلما ضجَّت حياتي.. ألتجي له

‏ليش أميل لضحكتك، وأكسر لطارفك اعتدالي؟
‏وأتمنّى خنجرك.. وأبدأ نهارك، وأنتهي له!

‏ما لمحتك فـ«البيان» ولا بحثتك فـ«الأمالي»
‏أنت فصلٍ يُعجِز الكاتب -ولو يدفع حصيلة-

‏أتذكّر وقفتي دونك ومزحي، وارتجالي
‏وأتسامى لين أدفّ الضلع لعيونك وأشيله

‏الإجابة تحتضر لا سيَّل إحساسك سؤالي
‏والدروب مجرَّبة! إلا دروبك مستحيلة

‏هات لي كلّ الكلام وهاك شكّي، واحتمالي
‏وانتظرني بين هتّان السحاب، وبين سيله

‏وش مضى لك يا ملاذ الشعر، وإلَّا وش مضى لي؟
‏الحقايق غايبة، والغصن غرَّبني مقيله

‏اقطع الريبة يا أبو وجهٍ وراه أسوق حالي
‏والله إني مرخصٍ نفسي، وروحي في سبيله

‏المرارة في حياتي موغلة، وإلَّا أنت حالي
‏وكلّ شيءٍ منك؟ عن كثره يكفيني قليله!

‏لا تحاول تشرح أسباب الرحيل ولا تبالي
‏صدة العشّاق مثل الفارس اللي زلّ خيله
‏
‏والحياة إن غرّبت صوتي.. وخلتني لحالي؟
‏أدري إنها ما تكون بـ حضرتك إلا جميلة

- محمد السلطان

الله ليا حط الضعافا مواليف
‏حط النشاما في طريق النشاما
- ناصر مناحي

وين ايّمم شوف عيني و أنا أخيلك سراب
‏كل ما ضمّيت زولك ، تلاشى من .. يدي !