واجد منا يصيرن معاه ظرووف صعبة اثناء الدراسة سواء صحية نفسية عائلية وغيرها ماكانش متوقعهن وممكن يلخبطن الخطة الدراسية اللي هو كان راسمها في راسه
لازم يعرف ان هذه هيا طبيعة طالب الطب ..... من منا مايصيرنش معاه ظرووف ومشاكل ثق وتأكد ان الجميع هكي اللي ماصارتش معاه السنة حتصير السنة الجاية او صارت السنة اللي فاتت
باهي شنو الفرق
الفرق ان اللي فاهم الحياة يعرف ان هذينا متغيرات لازم مايتقبلهن ويكيف روحه على أثرهن عشان يقلل من الأضرار
يعني لازم تكون مرن وتقبلهن بطريقة انك تغير خطتك بسرعة بطريقة تتماشى معا الوقت وكمية الدراسة اللي عليك
مثلا كورس كنت ناوي تفصفصه وتقرى mcq امتاعه وبعدها تبي تبدا في الكورس اللي بعده بنفس الطريقة
لكن الظروف منعن
توا الخطه البديله اني نقراه بسرعة ونركز على النقاط المهمه اللي قال عليهن الدكتور وخلاص و نفوت ال mcq والأولوية اني نقرا الكورس اللي بعده بسرعه وبتركيزات الدكتور المهمه وهذه هيا الشطاره
لكن تقعد تندب في حظك او تقعد متمسك بخطتك القديمة لدرجة انك حتلقى روحك مش ملحق تقرى كورس كبير هذه الغلط
لازم ماتكون مرن وهذه هيا حياة طالب الطب انا ما انقولكش اقعد مهمل وبعدها دير هكي