فۆبیا - Phobia

ڕۆژێک لە ڕۆژان گەر کەسێک باسی بەدبەختی و چارەڕەشی خۆی کرد ، من بکەن بە نموونە بۆی .

ئێستەش ئەتوانم بنووسم و ناخت ئاگر بدەم ، ئێستەش ئەتوانم وەک و جاران لەبری هەمووتان بنووسم ، بەڵام هەر ئەوکاتەی بەوە گەیشتم کە نووسین و دەردەدڵ و درکاندنی شتەکان تەنها خەمەگەلێکی زیاتر بۆ خۆم و ئێوە ئەهێنن بڕیارمدا کەم بنووسم ، ئێستا لە قۆناغێکی ژیانمدام تەنها ئەمەوێ بینەر بم ، تەنها ئەمەوێ بێدەنگ بم ، ئەتوانم زۆر شت بکەم ‘ ئەتوانم هێمنیتان لێ تێک بدەم ، ئەتوانم لەبری هەمووتان باسی خۆتان بکەم ، زۆر شت ئەتوانم بکەم بەڵام بڕیاری بێدەنگیم داوە ، هیوادارم ئەم قۆناغەی ژیانم ناچارم نەکاتەوە وەک و پێشوو لە دێڕێکدا بتانکووژم ، یاخود لە پارچە نوسینێکدا ژیانی تۆ کۆ بکەمەوە و تۆش بڵیی ( ئەمە ئەڵیی بۆ من نوسراوە و باسی من ئەکات ) دەمێکە ئومید ئەبەخشمەوە بە ئومێدی ئەوەی ژیان جوانتر بێت ، بەڵام هەر دێت و دێت ژیان زیاتر دەمگوشێت و بێ ئومێدم ئەکات ، لەغەوغای ژیان بەتاڵم بە ئەشقی خوداوە سەرقاڵم ، خودا مەهێڵە بگەڕێمەوە دۆخێک دەست بکەمەوە بە نووسین و بێ ئومێدی ، ئومێدم پێتە بێ هیوام ناکەیت ، نزا ئەکەم سەلامەت و ساغ و تەندروست باش بن هەموو لایەکتان ، ئەوەی لێرەیە گەر من نەبێت نیوەی من یان زیاتر تەنگ و چەڵەمەی بینیووە ، ئومێدم باشی هەمووتانە ، پێبکەنن ، بگەڕێن گەشت بکەن ، ژیانتان جوان بکەن ، ڕۆژەکان دەڕۆن ، مەهێڵن زەردەخەنە لەسەر لێوەکانتان بتۆرێن ، دروود بۆ هاوڕیکانم چەند ساڵە لەم چەناڵە بێزارکەرەی مندا بەرگەی پرتە و بۆڵەی منیان گردووە ، خۆشمەوێن .

ساڵێک دەڕوات و ساڵێک دێت ، هەموو شتێک لە تۆدا خراپتر دەبێت ئەی نیشتیمان
..

بێ جورئەت بۆ نەتبینی لەبەر تۆ من چۆن جەنگابووم

شەوێک پێم وت «ئەگۆڕێیت و ئەڕۆیت»
ئینکاری ئەکرد

-

چیرۆکی ئەم وێنەیە...
ئەم وێنەیەم لە ڕۆژی مەولوودی ساڵی ٢٠١٧ گرتووە. ئەم منداڵە بۆیاخچییە، بێدەنگ دانیشتبوو و دەیڕوانییە جووڵە و پێڵاوەکانی خەڵکەکە. چاوەڕێی ئەوە بوو کەسێک قاچی بخاتە سەر سەندووقە تەختەکەی بەردەمی. کەس نەبوو. هیچ پێڵاوێکیش نەبوو.
پێ نەدەچوو هیچ پارەی پێ بێت نیوەڕۆ شتێک بخوا. وا دەردەکەوت.
تا نیوەڕۆ لەوێ بووم، ئەوەی کە دەبەخشرا، چکلێت و شەربەت بوون.
ئەوانەی نەدەخوارد. پێ دەچوو برسییەتییەکەی لەوانە زیاتر بووبێت.
پیاوێکی کەتە و خڕەی قژپڕ، لە سەیارەیەک بە چەندین عەلاگەوە دابەزی. ئەوانەی لێی نزیک بوون، سەرە و دانەیەکی پێیان دا. ئەو منداڵەش لێی نزیک بووە و دانەیەکی لێ وەرگرت. هەڵیپچڕی و دەستی بە خواردنی دوو شیش کەبابەکە کرد.
کە تەواو بوو، دارێکی لەگیرفانی دەرهێنا و ددانەکانی پاک کردنەوە.
من نانم نەخواردبوو، بەڵام بە دیتنی ئەو تێر بووم.

ئاگاتان لەوانەی سەر زەوی بێ ، ئەوەی لە ئاسمانە ئاگای لێتانە .

- Omer Karim

وەسیەتی کچێکی مناڵ پێش شەهید بوونی.

سڵاو من ناوم هایا و ئێستا وەسیەتنامەکەم دەنووسم

1- پارەکەم: 45 دینار بۆ دایکم، 5 بۆ زینە، 5 بۆ هاشم، 5 بۆ داپیرەم، 5 بۆ پۆرە هیبە و 5 بۆ پورە مەریەم، 5 بۆ مامە عەبدۆ و پورە سارا.

2- یاری و هەموو شتەکانم: بۆ هاورێکانم، زینە، ڕیمە، منە و ئەمەل.

3- جلەکانم: بۆ کچەکانی مامم و ئەگەر شتێک مایەوە ئەوە بە خەلکی تر ببەخشن.

4- پێڵاوەکانم: ببەخشین بە هەژاران و لێقەوماوان، بێگومان دوای شۆردنییان.

گابریل گارسیا مارکز، دەیگێڕێتەوە، لە گوندێک پیاوێک لە خۆڕا لە بەردەم دو منداڵ و ژنێک گوتی، "ھەستدەکەم شتێک دەقەومێ"، لەوکاتە ژنەکە رۆشتە قەسابخانە بەو نیەتەی یەک کیلۆ گۆشت بکڕێ، بەڵام بە قەسابەکەی گوت دو کیلۆ گۆشتم دەوێ، چونکە دەڵێن "شتێک دەقەومێ".

دواتر کەسێک ھات قەسابەکە پێیگوت دەڵێن، شتێک دەقەومێ، کابرا سێ کیلۆ گۆشتی کڕی، تا وای لێھات خەڵک گشتی دەستیان کرد بە گۆشت و، ئازوقە کڕین و ھەمویان کۆبونەوە و دەیانگوت، شتێک دەقەومێ.

وای لێھات چۆلەکە بھاتبا سەردارێک دەیانگوت، ئەمە سەعاتی قەومانە نزیکەو ھەرگیز چۆلەکە لەم کاتە بەم شێوەیە نەھاتوە مەگەر ھەواڵی قەومانەکە نەبێ، کاتێ کۆببونەوە لە دەوری یەکتر، لە دوای نیوەڕۆ کە وەرزی ھاوین بو گەرما بوو، دەیانگوت ھەرگیز گەرمای وا نەبوە لەم گوندە، ئیتر بەبێ ئەوەی ھیچ بقەومێ، خەڵک ئەم گوندەیان چۆڵ کرد و خۆیان روداوەکەیان قەوماند.

“ لەگەڵ بڵاو بونەوەی ناشرینیدا ئەدەب بووە بە شتێکی گاڵتەئامێز “

گەشتی هەسارەی مەریخ.

کات : ٣:٢٨ خولەک بە کاتی زەوی ، شوێن : هەسارەی مەریخ بەروار : ١٨/٤/٣٧٨٥ی زاینی بە ڕۆژ ژمێری زەوی
نزیکی ١١ کاتژمێرە ئێمەی گەلی کورد و هەرێمی کوردستان وەک و هەموو گەلانی دونیا زەویمان بە جێهێشتوە ، بە ١٢ هەزار کەشتی ئاسمانی کە هەر کەشتیەک ٥٠ هەزار مرۆڤ دەگرێت ، گواستراینەوە لە زەویەوە بۆ هەسارەی مەریخ ، بۆ ئەوەی ئاشنای ژیان کردن بین لەوێ ، هەر لەگەڵ دابەزین لە وێستگەی بۆشای ئاسمان بە سێ زمان ، ئینگلیزی و عەرەبی و فەڕەنسی نوسرابوو بەخێر بێن بۆ هەسارە تازەکەمان ، بە کوردی قسەمان کرد و هیچ کەس تێنەگەشت لێمان و پێمان وترا بە عەرەبی قسەبکەن ئێوە هاوڵاتی عێڕاقین ، دوای ئەوەی لە وێستگەکە کاروبارمان تەواو کرد و گوازراینەوە بۆ ماڵە تازەکانمان ، هەر کە چوینە ماڵە تازەکانمانەوە ، کاک ئەحمەدی دراوسێمان کردی بە دەنگە دەنگ و وتی من دوو خێزانم هەیە و نابێت یەک ماڵم پێبدرێت ، ئەبێت دوو یەکەی نیشتەجێ بونم پێبدرێت ، کاک عوسمانیش دەیوت خانوەکەی من دوو قات و ژێرزەمینیشی هەبووە ڕازی نیم بەم خانووە ، کاک جەمالیش ئەیوت من لەسەر زەوی خانوەکەم ڕوو لە خۆر بوە ئەمەی ئێستا پشتی لێیەتی من بەمە ڕازی نیم ،سەرۆکەکانیشمان بەدوای شوێنێک ئەگەڕان بیکەن بە ( دێگەڵە ) نە سەوز قبوڵی بوو لە شوێنێک بژیەت زەردی تێدابێت ، نە زەردیش قبوڵی بوو لە شوێنێک بژیەت سەوزی تێدابێت ، هەر زوو کوردێکی باکور داوای ئەوەی ئەکرد ببرێتە ئەو شوێنەی میلەتی تورکی تێدایە ، لە کوردێکی ڕۆژهەڵاتیشم بیست ئەیوت بمبەنەوە لای ئاغاکانم ، دوای ٤ کاتژمێر بەرەیەک دەستی گرت بەسەر وێستگەی کارەبای ناوچەکە ، فەرمانگەی ئاویش دەستی بەسەردا گیرا ، لە فەرمانگەکاندا وەرگرتنی کارمەند بوو بە واستە کردن دامەزراندن کرا بە خزمایەتی هەموو خزمەت گوزاریەکان باجی خرایە سەر و قۆڕخ کرا بۆ بنەماڵەی جیا جیا ، خەڵەکەکەش لە جیاتی ئەوەی بێلایەنی خۆیان بسەلمێنن و یەک بگرن و هاواربکەن بڵێن ئەوە مافی گشتیە و ئەبێت بە خۆڕای بێت و لە خزمەتی ئێمەیا بێت ، پۆل پۆل هەر خێزانە و لایەنێ بەرەیەکی ئەگرد و چاویان لەوانی تر سور ئەکردەوە ، لەسەر شوێنی مزگەوت بوو بە شەڕ ، کۆمەڵێک ئەیانوت ئەیکەین بە کڵێسا ، کۆمەڵێکی تر ئەیانوت ئەیکەین بە حوسەینیە ، جادەکان بە ناوی سەرکردەکانی زەویەوە ناونران ، جادەی شێخ فڵان ، ناوچەی فڵان بەگی کوڕی فڵان ، جوت سایدی شیخ فڵانی کوڕی فڵان ، هەر زوو لایەنێک پەیمان نامەی لەگەڵ وڵاتێکی تردا بەست ، ڕازی بوو بەوەی هەموو داهاتی خەڵکەکەی بۆ ئەو وڵاتە بێت تەنها ئەو وڵاتە پارێزگاری لەم بەرەیە بکات و لەکاتی شەڕدا هانای بۆ بەرێت ، لایەنەکەی تریش لەگەڵ وڵاتێکی تردا پەیمان نامەی بەست و ئەویش بە هەمان شێوە داهاتی وڵاتەکەی ڕادەست کرد ، هیچ کەسێک نەبوو هەوڵی ئەوەبدات دەنگمان یەک بخات و بمانکات بەیەک ، هەمووان لەهەوڵی ئەوەدا بوون بیسەلمێنن لە براکەی بە هێزترە ، بێکاری ڕوی لێکردین ، نەهامەتی ، بایکۆت ، موچەی بڕدراوە ، سامانی میلەت قۆڕخکرا ، وردە وردە لە ناوچەکەی خۆمانەوە گەنجەکانمان بە قاچاخ دەڕۆشتنە ئەو ناوچانەی هی نەتەوەی تر بوون ، ئیتر بۆم دەرکەوت تاکە کێشەی ئەم خەڵکە خۆیەتی ، هیچکەسێکمان ئەوی ترمان قبوڵ نیە ، هەر یەکێکمان سیخوڕین بەسەر ئەوی ترمانەوە ، ئێمە نەک هەرێمێک بەڵکووو ئۆقیانووسێک بەشمان ناکات و هیچکات لە ئاغایەتی و دەرەبەگایەتی ناکەوین ، هیچ کەسێک هەوڵنادات بیرۆکەی خۆی بگۆڕێت ، هەمووان لە هەوڵی ئەوەداین بیرۆکەی بەرامبەرمان بگۆڕین گەر ئەم هەسارەیەش جێ بهێڵین ، هەرگیز کەسمان ئاسوودە نابین ، ناتوانین پێکەوە خۆشبەخت بژین ، هەر یەکێکمان خۆی لە ئەوەی تر پێباشترە ئێمەی گەلی کورد ، هەڵگری پاسپۆرتی عێڕاقین ، کە لە ڕیزبەندی پاسپۆرتەکانی جیهاندا لە سێیەم خراپترین پاسپۆرتەکانی جیهانە ، ئەو فلیپینەی تۆ بە تەنزەوە باسی دەکەیت ، ئەو پاکستان و هندەی تۆ پێیان ڕادەبوێری ، ئەو مالیزیا و عەرەبەی تۆ گاڵتەیان پێدەکەی ، ١٠٠ هێندەی تۆ لە وڵاتەکاندا ڕێزی لێدەگیرێت و خاوەنی قورسای و سەنگی خۆیەتی ، دەی لە کۆتایدا ، کەس نەڵێ کورد مردووە هههه.

گەر مرۆڤ یەکەمین خۆشەویستی خۆی دۆڕاند، ئیدی تا مردن بونەوەرێکی دۆڕاوە.

...

پرسیارت لێ کردم ئاخۆ مانای چیە ئەگەر شێت بیت ؟ "
شێتی بریتییە لەوەی نەتوانیت بیرۆکەکانی خۆت بگەیەنیت وەک ئەوە وایە لە وڵاتێکی غەریبە بیت دەتوانی گشت ئەو شتانە ببینی کە ڕوودەدەن لە چواردەورەت و لێیان تێبگەی ، بەڵام بێ توانایت لەوەی ڕونیبکەیتەوە لەوەی چیت پێویستە بیزانیت یاخود یارمەتی بدرێیت ، چونکە تۆ لەو زمانە تێناگەی کە لەو وڵاتە قسەی پێ دەکەن .
«ئێمە هەموومان هەستمان بەوە کردوە »
«ئێمە هەموومان بە هەر رێگەیەک بێت شێتین »

لە کتێبی: ڤیرۆنیکا بڕیار دەدات بمرێت.

Art work by - Unknown

بە قاقا پێکەنی و هەموو ئەوانەی ژورەکەش لەگەڵیدا پێکەنین ، تەنها هاوڕێ نزیکەکەی نەبێت زانی حاڵی ئەو باش نیە.

Artwork by : mrgryphon

سەری ڕێگا ئەگرینە بەر ، لەم وێستگە جودایەمان یان بەیەک دەگەین ، یان بەبێ یەک ناگەین بە هیچ.

- Art work by : päivi hintsanen.

ئازیزێک بە خۆڕایی بەجێناهێڵین، کاتێک ئازارمان پێدەگات دەڕۆین.

کاری هونەری: Hong Kong

"هیوادارم ڕێگای نێوانمان هەرگیز کۆتایی نەیەت."

کاری هونەری: ‏ Devin Leonardi

"کەمێک لێیان دوور بکەوەرەوە، بە ڕوونی و بەو شێوەیەی کە هەن دەیانبینیت."

کاری هونەری: Unknown

"ئاساییە، شەوانی خەمناکترم لەم شەو بەسەر بردووە."

کاری هونەری : ‏ Alisa

- لە نێو هاوڕێکانمدا تۆ ئەو کەسەی کە زۆرم خۆشدەوێت، هەر بۆیەش هەمیشە دەوێرم بە کێشە گەمژانەیەکانم ئیزعاجت بکەم .

-لە فریدا کاهلۆوە بۆ لیۆ | کاری هونەری : Malcolm Liepke