#معلومة_وسؤال
📍رفض الطفل للطعام في السنة الاولى له أسباب كتير ومنها:
احيانا بيكون رفض الطعام في البداية أمر طبيعي جدا بسبب ان الطفل بيكون لسه مش متعود على الغذاء بشكل مختلف ومصدر الطعام الوحيد بالنسبة له هو الرضاعة سواء طبيعي او صناعي
وبياخد فترة من اسبوعين لشهر في بعض الأوقات لحد م يبدء يتقبل ملمس وطعم مصدر الأكل الجديد
📍تعبيرات وجه الطفل عند تقديم الأصناف له لأول مرة ليست مقياس على درجة حبه او كرهه للصنف ده
لأن ببساطة ده رد فعل طبيعي في استكشاف واستطعام الأكل لأول مرة في حياته سواء كان الطعم حادق, مُر مسكر
و بعد فترة بيبدء الطفل يكون رأي وشخصية خاصة به في نوع الأطعمة المفضلة بالنسباله
ودي بتختلف من طفل للتاني
في أطفال بتفضل الطعم اللاذع عن الحلو واطفال بتفضل الطعم الحلو عن اللاذع او العادم وفي كل الأحوال لازم نستمر في تقديم للطفل مختلف الاطعمة
في بعض الأوقات بيكون سبب رفض الطفل للطعام هو قوامه
احيانا بيفضل بعض الأطفال القوام الخشن نسبيا او الصلب عن القوام السائل في تقديم الطعام
وأحيانا بيحب الطفل يكون له شخصية أستقلالية بتظهر عن طريق تفضيله لإطعام نفسه و بيرفض ان حد يأكله
📍سبب كمان مهم لرفض الطفل الطعام تحسسه من صنف او نوع معين
وده في الغالب بيسببله مغص او انتفاخات وغازات وبيخليه يرفض الأكل وممكن الأم خصوصا في بداية ادخال الطعام متفهمش ان الاعراض دي سببها التحسس من نوع طعام بعينه
📍إزاي اقدر اعالج رفض رضيعي للأكل؟؟
-مدخلش الأكل إلا بعد التأكد ان الطفل مستعد للخطوة دي ويكون متفاعل وقت أكلنا ومدرك ان ده طعام
-أعرف اعراض التحسس من أصناف الطعام واتابع الطفل كويس واجرب كل صنف مدة لا تقل عن ٣ أيام متواصلين
-اكون مستعدة وامهد نفسي كأم على الخطوة الجديدة اللي انا وطفلي مقبلين عليها وأحاول معاه مرات عديدة في تقديم الأكل بأشكال مختلفة واوقات مختلفة بدون يأس
-أشارك طفلي وقت أكله ودي من اكتر النقط اللي بتدعم اكل الطفل وبتخلي شهيته للأكل افضل بكتير إننا نشاركه وقت أكله وناكل معاه ف بيتشجع انه يقلدنا وياكل بشهية أفضل
- لو الطفل حب يستكشف الطعام عن طريق اللمس اشجعه وبلاش نمنعه لان وارد تكون دي خطواته الاولى نحو تأكيله لنفسه بدون مساعدتك
- لو حسيتي ان طفلك مستعد للأكل الصلب او طعام الأصابع شجعيه وقدميله الأكل بالقوام اللي يحبه وده بيحسن شهيتهم أكتر للأكل
- طبعا تتأكدي ان مفيش امساك او انيميا لان دي من الاسباب اللي بتفقد الطفل شهيته وبتخليه يرفض الأكل
- نهتم بتقديم اصناف مناسبة في أوقات التسنين وطفرات النمو
- واهم نقطة لو حسينا ان الطفل اكتفى من الاكل نوقف فورا ومنغصبهوش على تناول كمية اكبر من شهيته