Қайтиш
Яна қайтиб келдим сенга, малагим,
Яна хаёлимда ўша туманлар.
Яна ун сепмакда осмон элаги,
Кетимда қолди деб қанча чаманлар.
Ёғилар, ёғилар лайлаксимон қор....
Кўзга ҳеч илинмас само этаги.
Қайғурма, бу ёлғиз қишнинг эртаги,
Олдда минг чаманлар бордир, суманбар.
Чарх уриб келарсан рўёга ўхшаб,
Сочларинг толу тол, кўзларинг маҳзун.
Қўлларим очурман, недандир қақшаб,
Сенинг қадамингга ўқирман афсун
Ва қилурман ўшал ерни зиёрат,
О, ҳар бир қадамда тўкилур меҳрим.
Беғам хилватгоҳга боқарман, зора,
Топарман деб балки йўқолган шеърим.
Қанчалар фаромуш тилсиз хилватгоҳ,
Қанчалар бепарво алифқад терак!
Тингланг, эй, севгисин йўқлаганда гоҳ,
Ул таниш жойларни қўмсаркан юрак!
Яна қайтиб келдим сенга, малагим,
Яна хаёлимда ўша туманлар.
Яна ун сепмакда осмон элаги,
Кетимда қолди деб қанча чаманлар...
1965
✍️ Муҳаммад Али
📱 Telegram 📱 Facebook