أنا اتخرجت من الكلية بآية من آيات سورة الأنفال، وكل حاجة صعبة عديتها أو هعديها بآية من سورة الأنفال..
أوقات كتير بتكون محاولاتنا مهما كانت كبيرة مش مكفية المطلوب مننا لحد ما نوصل لشعور الآية دي بيقين وبتعدي وبنجاح!
> "وَمَا رَمَيْتَ إِذْ رَمَيْتَ وَلَٰكِنَّ اللَّهَ رَمَىٰ ۚ"
سبب نزول الآية دي إن الرسول صلَّ الله عليه وسلم في غزوة بدر أخذ بيدهِ حِفنة من التُراب وألقاها في وجه جيش المشركين، فشوية التُراب دول جُم في أعينهم جميعًا.
هو الأخذ بالأسباب سِر أي حاجة.. والتوفيق من الله، أنا عملت اللي عليا يارب.. المنهج صعب بس أنا ذاكرت، الدنيا صعبة بس أنا اشتغلت، التعب شديد بس أنا خدت الدواء.
لا المذاكرة ولا الشغل ولا الدواء هما السبب الأساسي في النجاة هما بس أسباب.
اليقين بالله بعد استشعار الآية دي في وقت انت متخيل إنها دنيويًا قافلة هتخلي كل حاجة تتفتح.
ربنا ييسر لنا كل عسير يارب ويمتعنا بالصبر على الأسباب وبعد انقطاعها ويُرزقنا من الخير كله عاجله وآجله.
- سلمى عطية.