Kimyo fanidan dars beradigan domlamiz, ba'zida dangasalik qilib yoki ulgurolmay qolib, vazifalarni to'liq bajarmasdan kelganimizda doim bir gapni takrorlardilar:
"Abituriyent - hayotini o'zgartirishga chiqqan shaxs.
Agar dangasalik, tanballik qilib, hech bo'lmasa 1 marta hayotingni o'zgartirishga urinib ko'rmasang, insonlikka da'vo qilma. Xohish bo'lsa, doim vaqt topiladi, inson istasa hammasini yodda saqlaydi. Shu yo'lni tanladingmi, qaytma. Qaytsang bilki, hayotingning yetuklik ostonasiga qo'yadigan qadamingning birgina qiyinchiligini yengishni ham uddalolmabsan..."
Oradan shuncha vaqt o'tibdi hamki, hayotimning ostonasidagi qancha qadamni shu so'zlar hamda tinimsiz harakat bilan bosib kelmoqdaman.
Shu o'rinda mening ham abituriyentlarimga aytadigan bir gapim bor:
Harakatni to'xtatdingizmi, vaqtingizni havoyi hislar va o'tkinchi tuyg'ularga sarflab o'tiribsizmi, bas - muvaffaqqiyatdan ham umidingizni uzing.
Talaba va talaba bo'lolmagan abituriyentga yuboriladigan xabarning birgina farqi bor: "Siz talabalikka tavsiya etildingiz"
"Siz talabalikka tavsiya etilmadingiz"
Birgina shu xabardagi so'z sizni talaba bo'lolmagan abituriyentlardan ajratib turadi.
Besh oydan so'ng sizga qanday xabar kelishini o'zingiz tanlang.
Zero, hozir vaqtinggizni nimaga sarflayotgan bo'lsangiz - siz ayni o'shasiz.
Tanlov esa har doimgidek - o'zingizda.