Nan Dubbisa

#Yoo_Waaqayyo_Jedhe!
Gugeen wucoolii ishee waliin baaxii manaa irra jiraatti. Mijateeraaf. Galgala tokko abbaan manaa "Ijoolle bor ganama ka'een baaxii mana kanaa diigee haaressa!" otuu jedhuu dhageesse. Isheef oduu yaaddessaa ture. "Yaa Waaqayyo ilaalikaa! Namichi ganama ka'een baaxii diiga jedhaa! Anii fi wucooliin koo eessa lixna?" jettee Waaqa kadhatte. "Namichi, 'Yoo Waaqayyo jedhe!' jedheeraa?" jedhee gaafate Waaqni! "Lakki hin jenne!" jettee deebisteef. "Yoos homaa hin sodaatiin!" jedhe. Ganama obboroo hiriyyaan isaa dhufee du'a firaa itti himee boo'icha waliin deeman. Manni hin diigamiin hafe.
Ji'a tokko booda ammas namichi waanuma dura jedhe sana dubbate. Gugeenis Waaqatti iyyatte. "'Yoo Waaqayyo jedhe nan diiga!" jedheeraa?" jedhee gaafannaan, "Hin jenne!" jette. Deebiin Waaqaa isuma duraa ture. "Yoos hin sodaatiin!" Ganama barii dhimma atattamaa hojii isaan wal qabatutu isa mudate. Mana diiguuf mitii fuula dhiqachuufuu yeroo hin arganne. Ni qajeele!
Ji'a tokko booda ammas galgala lafaa, "Ijoolle yoo Waaqayyo jedhe barii ka'een baaxii mana kanaa diigee haaressa!" jedhe. Gugeen ni rifatte. Akkuma amala ishee gara Waaqaatti iyyatte. "Ammas kunoo baaxii manaa diiguuf yeroo sadaffaa dhaadataa jira. Yaa Waaqayyo maal nuuf malta?" jette. Waaqni ammas gaaffii isuma dura gaafate irra deebi'ee gaafate. Isheenis, "Miilanahoo 'Yoo Waaqayyo jedhe nan diiga!' jedhe jettee deebisteef.
Waaqayyo deebii kenneef. "Amma egaa namichi ni diiga. Baaxiin isaa dulloomee waan jiruuf diigee haareffachuu qaba. Namichi kun diiguuf erga karoorsee bubbuleera. Atuu kunoo yeroo sadaffaa na kadhataa jirta. Yeroon siif kenname ga'aa ture. Bakka biroo barbaaddattee man'ee keessa jiraattu ijaarrachuu dandeessa
turte. Garuu, dhibaa'ummaa kee irraa kan ka'e yerootti hin fayyadamne! Dhibaa'ummaa keef gatii baasuuf jirta!"
Dhibaa'ummaan gatii nama baasisa jechuufani!
#deemsiittifufa

#Sanyiin_Koo_Maali?
Viishen Laakiy’aanii kitaaba ‘The Buddha and the Badass’ jedhu keessatti waa’ee mataa isaa waan tokko dubbata. Akka armaan gadiittan dhi’eessa.
Ijoollummaa kootti yeroo boqonnaa koo Kaartumittin dabarsan ture. Kaartum magaalaa Sudaan Kaabaa, bakka itti Abbay Adii fi Gurraachi itti walitti dabalaman, magaalaa bareedduudha. Achitti mana akaakayyuu koon boqodha. Karra bakka bashannanaa mooraa isaanii keessa jiru irra muka loomii dulloomaa fi ija danuu hin godhanne tokkotu ture.
Anii fi akaakayyuun koo muka loomii sana jala teenyee cheezii taphanna turre. Akaakaan koo barsiisaa jireenya koo ture; gorsawwan baay’ee barbaachisoo na gorsa.
Gaaf tokko mukicha jala teenyee otoo cheezii taphachaa jirruu, loomii lafa bu’e tokko marga keessaa fuudhee bakka lamatti dhoose. Ija loomichaa tokko keessaa baasee harkatti qabate. Ija loomii sana natti agarsiisaa akkana naan jedhe, “Ilaa yaa ilma ilma koo! Kun ija loomiiti. Muka loomii siif kenna. Muka maangoos ta’e kan burtukaanii siif kennuu hin danda’u. Guddachuuf biyyoo mijataa, bishaan xiqqoo fi ifa aduu isa barbaachisa. Maalis ta’u maal dhuma irratti garuu kan inni siif kennuu danda’u muka loomii qofadha.
“Akkuma argitu mukti kun dulloomaa jira; ni du’as. Akkuma koo jechuudha. Anis dulloomaan jira; gaaf tokko nan du’a. Waan ani jedhu hubachaa jirtaa? Dulloomaa gaafa deemtuu fi guyyaan kee yoo dhi’u gaaffii barbaachisaa tokko of gaafachuu qabda, ‘Sanyiin koo maali?’
“Sanyiin kee kan hortu waan horuu qabdu qofadha. Waan biraa hin hortu. Hin jeeqamiin; hin yaadda’iin; namoonni maal iyyuu yoo siin jedhan sun dhimma kee hin ta’iin. Waca isaanii hin dhaga’iin; miira kee qofa dhaggeeffadhu.
“Akkana jedhii of gaafadhu, ‘Sanyiin koo maali?’ Kana yoo beekte, deebii isaa argatta.
“Deebii kee qajeelummaa fi gaarummaan barbaadi; barbaadi yoos kaayyoo jireenya kee raawwachuu dandeessaa; ijas ni godhatta!”
Seenaan kun waan tokko akkan xiinxalu na taasise. “Dhuguma iyyuu sanyiin koo maali? Ija maal jedhamun godhadha?” kan jedhu. Ibsa baay’ee itti kennuu hin fedhu. Namni barreeffama kana dubbisu kamuu gaaffii baay’ee barbaachisaa kana akka of gaafatun gaafadha. Eyyee, sanyiin kee maali?
Galgala bareedaa qabaadhaa!
#deemsiittifufa
#ananamabiyyaoromoo

#Waggaa_60_natti_fudhate!
Pablo Picasso artistii fakkiiwwanii ajaa'ibaa ture. Baroota dulluma isaa keessa gaaf tokko buna dhuguuf kaaffee Maadriid jiru tokko seene. Ajajatee taa'e. Akka tasaa waraqaa adii gabatee isa bira jiru irraa argate.
Kobbee isaa baafatee fakkii irratti kaasuu eegale. Haga bunni ajajate dhufutti jechuun yeroo daqiiqaa shan hin guunne keessatti fakkii ajaa'ibaa kaase. Gaafa keessummeessituun buna fidduuf waraqicha caccabsuu eegale. Giiphii kaa'achuuf.
Dubartiin isa bira teessee ilaalaa turte kaatee itti iyyite. "Fakkii kana fakkaatu hin irratti kaastee waraqaa kana hin caccabsiin. Maaloo natti gurguri si irraan bitadhaa!" jettee irratti qabatte.
Ija ishee keessa ilaalaa, "Tole! Sittan gurgura. Doolaara 30,000 (kuma soddoma) kaffali!" jedhe. Ni rifatte.
"Yeroo daqiiqaa 5 hin guunne keessatti kaastee doolaara kuma soddoma naan jettaa? Maal jechuu keeti?" ittiin jette. Ni seeqe. "Obboleettii koo! Daqiiqaa shanitti fakkii akkanaa dandeettiin ittiin kaasu horachuuf waggaa jaatama natti fudhate!" ittiin jedhe!
#deemsiittifufa!

Sodaa Kee Hin Sodaatiin!
Jaappaanonni qurxummii ho'aa kan dhi'oo bishaan keessaa ba'e nyaachuu jaallatu. Garuu rakkoo tokkotu ture. Bishaanonni naannoo Jaappaanitti dhihoo jiran hedduun qurxummii nyaatamu hin qaban. Warri qurxummii kiyyeessan qurxummii nyaatamu argachuuf fagoo deemuu qabu. Qurxummii qabatan sana hamma isaan gabaa fidanitti immoo foolii badaa fidanii gatiin isaanii gad bu'a.
Rakkoo kanaaf furmaata barbaaduuf kiyyeessitoonni sun yaaliiwwan adda addaa taasisan. Tokkoffaa, bidiruu isaanii irratti kottolleessaa (fridge) hidhatan. Qurxummiin achi keessa kaa'ame otoo hin manca'iin guyyootaaf turuu danda'a. Garuu dilallaan waan goggoguuf akka qurxummii ho'aa gatii gaarii hin baasu.
Lammaffaa, killa qurxummiin keessa daakuu danda'an bidiruu isaanii irra kaa'atan. Qurxummiin lakkoofsaan hedduu waan ta'aniif garuu haalaan achi keessa hin socho'an. Du'uu baatanis sochii dhabuu irraa kan ka'e hadoodanii turu. Dhuma irratti isaanis akka qurxummii ho'aa gatii gaarii hin baasan. Foon isaanii hagas mara waan hin miyoofneef rakasadha.
Dhuma irratti, kiyyeessitoonni sun yaada haaraa fidan. Shaarkii xiqqaa (kan qurxummii isaan kaan nyaachuu danda'u) fuudhanii killa sana keessa kaa'an. Qurxummiin isaan kaan baay'ee sodaatu. Isaan keessaa hamma ta'e tokko ni nyaata ta'a. Garuu hedduun isaanii hin nyaataman. Warri hin nyaatamiin hafan hunduu shaarkii sana waan sodaataniif killa keessa socho'uun isaanii dirqama. Jaallatanii otoo hin taane sodaatanii! Haala kanaan haga lafa gabaa ga'anitti sochii isaanii waan addaan hin kunneef, gabaa yoo ga'an gatii guddaatti gurguramu. Kiyyeessitoonni haala kanaan furmaata fedhan sana argatan.
Ergaan koo kunooti! Namuu sodaa qaba. Sodaan garuu kan nama sochoosu ta'uu qaba. Sodaan kee si sochoosuu danda'uu qaba. Kan si sochoosu taanaan gatii kee ol kaasa--akkuma qurxummii sanaa. Obboleesso! Sodaan kee abdii si kutachiisee of irra gad si teessisnaan sun balaa guddaa qaba. Sodaan sodaatamuu qabu kan akkanaati. Garuu sodaan kee daran si sochoosa, si hojjechiisa, si onnachiisa taanaan sodaan akkanaa sodaa eebbifamaadha. Sodaa kee hin sodaatiin! Socho'i!
Yeroo gaarii qabaadhaa!
Deemsi itti fufa!
Ana Eebbisaa Baayisaa--nama biyya Oromoo

Akkamitti Mo’ame?
“Dirree mo’icha keetiin ala baatee jennaan yoom illee hin mootu!” Ebisa Bayissa
Akkan baayyee hin beekne waanan beekuuf anaaf bakki oolmaakoo fi namoonni an wajjin oolu hundumtuu warran irraa baradhuudha. Yeroo hundumaa barsiisaan jiraannaan ani barataadha. Gorsaan jiraannaan ani gorfamaadha. Namni dubbatu jiraannaan dhaggeeffataadha. Har’a Eebboo wajjinan oole. Anaaf gochi isaas, dubbiin isaas kitaabota an irraa baradhuudha. Natti dubbachuu bataluma eegalu hima ani gubbaa irra kaa’e kanaan afaan saaqqate. “Dirree mo’icha keetiin ala baatee jennaan yoom illee hin mootu. Yeroo hundumaa kana beekuu qabda. Joobirri humna guddaa qaba. Dandeettii irraa baratamu danuus qaba. Galaana keessatti Qurxummii wajjin yoo wal lolle garuu mo’amaan isa nuti cinina isaa dubbannu kana mataa isaati. Sababni isaa humna qurxummiin osoo hin taane humna dirree sana keessa jiruun mo’ama. Carraa bishaan isheen keessa jiraattu yookaan dirree qurxummattii sanaan illee lubbuu isaa dhabuu qaba. Bishaan keessa baatee Joobiraa wajjin Qurxummiin lola yoo eegalte garuu eenyutu injifata hin jedhamu. Gaaffii kan hin qabne joobiraaf lola salphaa mo’ichi keessa argamuudha. Isaan lachuu dirree irratti mo’an ni qabuu jechuudha. Ga’umsa keessa keenyaa qofa beekuu osoo hin taane dirree keessatti mo’annu illee beekuu qabna. Sana beeknee jennaan mo’ichi yeroo hundumaa harka keenya keessa jiraa!” naan jedhe.

Eeyyeen firootako:-
Waan mo’uuf dhalanne akkuma qabnu, dirree keessatti mo’uuf dhalanne illee ni qabna. Dirree hundumaa keessatti mo’uu dhabuu malla. Dirreen keessatti nuti tasumaa hin mo’amne tokko garuu ni jira. Sun dhugaa hin haalamne namni hunduu beekuu qabuudha. Mo’icha dhabuu keenya, milkaa’insa dhabuu keenya qofa irratti xiyyeeffachuu hin qabnu. Isa dhabuu hin qabne sana dhabuu keenya keessatti gaaffiilee nuti of gaafannee deebisuu qabnu ni jira. Inni duraa dirree akkamii irratti ture morkii ani mo’ame kan jedhu yommuu ta’u; inni lammaffaan immoo injifannoo dhabne sana irraa tooftaa injifannoo isa itti aanuuf maalan baradhe kan jedhuudha. Baayyeen keenya dirree injifannoo keenyaatiin ala baanee waan jirruuf hin moone ta’a. Na amani danirree isaa jijjiirree jennaan ni moona. Sababni isaa, nuti mo’ichaaf dhalanne. Joobirri galaana keessatti qurxummii wajjin wal lole akkamittiin mo’ame? Ga’umsa waan hin qabneefi? Humna waan hin qabneefi? Dandeettiin isaa qurxummiidhaan waan caalameefi? Waawuu! Lola isaatu dirree keessatti mo’achuu isaaf kenname keessatti miti. Dubbiin kun dhuunfaa keenyattis waa nu barsiisa. Akka sabaattis barnoota guddaa akka nu baadhaastu hin shakku. Caalamnee miti! Jedhaaga nagaan bula. Erga kana immoo jaalladhaatii warra jaallataniifis qooda. Ulfaadha!

Gatiin namaa guddaadha!
Waadaa Bultii Caalii

Koloneeffattoonni Faransaay jiraattota Hanoa waan tokko waadaa seenaniif. Nama hantuuta ajjeesee du'aa ishee qabee fide akka badhaasan itti himan. Hantuunni akka malee waan baay'atteef ture. Uummanni ni gammade. Namni hantuuta qabee gara jaraa fide hunduu ni badhaafame. Carraa biizinesiitu banameef.
Garuu rakkoo guddaa tokkotu ture. Maal? Uummatichi hantuuta dhabee ofii horsiisuutti gad taa'e. Du'aa ishee gurgurachuuf!

Dilbata borii sa'a 7:30 tti Giddu Gala Aadaatti eebbisiisna. Hunduu irraa hin hafiinaa.

#Gaaffiin_Qaba!
(Ergaa kana namni hundi hiriyyoota isaaf akka qoodun barbaada. #Share it please!)
Akka lakkoofsa addunyaatti bara 1918 Fiiziksiin badhaasa Noobelii kan fudhate Max Planck jedhama. Badhaasicha akkuma fudhateen guutummaa Jarman keessa deddeemuu eegale. Bakka afeeramee deemu hundatti waanuma tokko dubbata. 'Quantum Mechanics' irratti barumsa kenna. Bakka hundatti barumsi isaa tokkuma. Itti hin dabalu. Irraa hin hir'isu.
Otuma kanaan jiruu turtii keessa konkolaachisaan isaa waan inni dubbatu hunda sammuutti qabate. Isa booda Piroofeeser Planck'f yaada tokko dhi'eesse. "Piroofeeser!" jedhe, "Yaada tokkon qaba. Bakka hundatti waanuma tokkicha dubbachuun (barsiisuun) nuffisiisaadha. Magaalaa Muunikitti ani otoon dubbadhee maal sitti fakkaata? Ammahoo anoo sirriitti beekeeraa! Ati immoo haguuggii mataa (cap) konkolaachisummaa koo uffattee fuula dura teessaa!" jedhe.
Piroofeeserichi yaadichatti gammadee itti waliif gale. Yeroo Muunik ga'an uffata wal jijjiiranii konkolaachisichi piroofeesera fakkaatee waltajjiitti ba'e; piroofeeserri immoo uffata konkolaachisaa uffatee toora fuula duraa taa'e. Namuu eenyummaa isaanii isa dhugaa hin barre.
Haala kanaan konkolaachisichi 'Quantum Mechanics' irratti ibsa bal'aa kenne. Waan sammuutti qabatee ture hunda gad dhangalaase. Hirmaattota waltajjichaas ajaa'ibsiise. Namoonni achi turan, "Ajaa'iba!" jedhan.
Maal godha garuu? Waan ergisaa yoom tolee beeka? Konkolaachisicha rakkoo hamtuutu mudate. Hirmaattota waltajjichaa keessaa piroofeeserri Fiiziksii tokko, "Gaaffiin qaba!" jedhee ka'ee dhaabate. Gaaffii konkolaachisaan dhaga'ee hin beekne gaafate. Eessa haa lixu egaa konkolaachisaan? Samiitti ol ba'a moo lafa keessa seena?
Waaqa isa hin ganne yaadni tokko dhufeef. "Jarana!" jedhe sagalee waan ofitti amanamummaa qabu fakkaatuun, "Jiraattota magaalaa guddoo akka Muunik kana taatanii gaaffii salphaa akkanaa na gaafattu jedhee tasuma hin yaadne. Maal seetan? Kana ana haa turuu konkolaachisaan koo iyyuu isiniif deebisuu danda'a!" jedhee gara namichaa ilaale. Maarree konkolaachisaan ol ka'ee deebiseef.
Hayyuun Charlie Munger jedhamu beekumsi akaakuu lama qofatu jira jedha. Tokkoffaan beekumsa dhugaa (real knowledge) jedhama. Inni kun kan namni ga'umsaan horate; kan inni haalaan beeku jechuudha. Inni lammaffaan immoo beekumsa konkolaachisaa (Chauffeur knowledge) jedhama. Kun immoo beekumsa ergisaati. Kan namni biraan beeku akka waan ofii beekaniitti fayyadamuun hawaasa afaanfajjeessuu jechuudha. Oolee bulee kan ofii akka hin taane kan baramudha. Yeroof garuu ittiin biyya gowwoomsuu dandeessa.
Maal jechuun barbaade? Beekumsa ergisaan uummata burjaajessuu dhiisnee beekumsa dhugaa horachuuf haa ifaajnu. "Horiin ergisaa bulee fokkisa!" jedhee kan mammaake Oromoodha. Itti fakkeessuun eessaanuu nu hin ga'u. Eyyee, itti fakkeessitee hamma tokko deemuu malta, na amani, garuu fagoo hin geessu. Eenyummaa kee isa dhugaan jiraadhu. Namoota duratti gatii kee dabalachuuf waan taatee hin jirre fakkaachuuf hin jooriin. Hin barbaachisu!
Na hubattee yaale? Hin hubanne taanaan itti hin dhiphatiin. Haasaan koo yeroo tokko tokko oolee bulee namaaf galaa. Amma yoo siif hin galle gaaf tokko siif galaa!
Otoo dubbannuu seenaa armaan olii kana nama Rolf Dobelli jedhamutu seenesse. Rakkoo akkanaa yeroo baay'ee taajjabee waanan jiruufan irraa baratama jedhee Afaan Oromootti hiikee, ergaa koos keessa dabarfadhe. Lafa hin buutu, lafee irra buuti jedheeni!
Jedhaa egaa!
Warri Chaanelii #Youtube koo 'subscribe' hin goone geessituu (link) kanaan deemaa 'subscribe' godhaa. Yokaan wal dhabuu keenya!
https://www.youtube.com/channel/UCMtb3NcCHKUqFUJ__mOGFog/
Halkan eebbaa qabaadhaa!
#deemsiittifufa
#ananamabiyyaoromooti

https://www.youtube.com/channel/UCMtb3NcCHKUqFUJ__mOGFog/

Na_Argaa_Na_Argaan…
Halkan halkan yeroo cabbiin bu'u hirriba irraa dammaqa. Maarree gaaf tokko halkan sa'a 9:00tti cabbiin bu'uu jalqabaan hirriba miyooftuu keessaa dammaqe. Magaalaa Niwu Yoorki jiraata ture yeroo sana. Gidduu sana kitaaba isaa kan 'The Earth Gods' jedhamu barreessaa ture.
Hirriba irraa akkuma dammaqeen dabtara yaadannoo isaa qabatee manaa ba'e. Paarkii Giddu Galaa Niwu Yoorki (New York Central Park) deeme. Kitaaba isaa barreessuu itti fufe. Otoo barreessaa jiruu poolisiin guddaan tokko dhufee isa cinaa dhaabbate.
"Asii maal hojjetta?"
"Barreessaan jirakaa."
"Ati nama lammii Ingiliziidhaa?"
"Lakki"
"Lammii Faransaayiiree?"
"Miti."
"Lammii eessaatiree ati?"
"Lammii Liibaanos."
"Liibaanosii? Ahaa! Akkana taanaan barreessaa lammii Liibaanos kan Kahliil Jibraan jedhamu sana hin wallaaltu jechuudha."
"Eyyee! Nan beeka! Maali?" jedhe ajaa'ibiifatee.
"Ajaa'iba namana! Haadha manaa bareedduu fi eebbifamtuu tokkon qaba. Garuu maal godha? Kitaabni namicha Kahliil Jibraan jedhamu sanaa erga mana koo seenee haati manaa koo nama biroo taateetti. Amalli ishee guutummaatti jijjiirameera. Yeroo hundaa xiinxala gad fagoo keessa akka galtetti. Kana hundaaf sababni kitaaba namicha Kahliil Jibraan jedhamuu sanadha!" jedhee itti himate poolisichi. Aariin ija isaa irraa mul'ata. Otoo Kahliil Jibraaniin argee maal godha laata?
Wanti nama ajaa'ibu kan poolisichi beekuu hin danda'in namichi inni Kahliil Jibraaniin itti himataa ture sun mataan isaa Kahliin Jibraan ta'uu isaa ture! Yeroo tokko na argaa na argaa dhiisanii of dhoksuun balaa irraa nama oolcha! "Na argaa na argaan na dhoksaa na dhoksaa fida!" jedha Oromoon yoo mammaaku!
#deemsiittifufa

#Otoon_Isa_Ta'ee!
Namichatu dhagaa soofa. Sun hojii isaati. Hojii isaa sana garuu hin jaallatu. Itti gammadee hin beeku.
Gaaf tokko dadhabee otoo hojiidhaa galaa jiruu mana daldalaa dureessa tokko bira ga'e. Dhaabbatee ilaale. Qabeenyawwan gati jabeeyyii fi namoota barbaachisoo hedduu arge. "Daldalaan sun nama jabaa akkamiiti? Maal ta'a otoon isa ta'ee!" jedhee hawwe. Yoon daldalaa dureessa ta'e dhagaa soofuu inni dadhabsiisaan sun ni hafa jedhee yaade.
Yeroo booda akkuma hawwe daldalaa ta'e. Itti milkaa'ees baay'ee duroome. Daldaltoonni isaan gad jiran ni jibban, itti hinaafan. Kanaan otoo jiruu guyyaa tokko aanga'aan siyaasaa aangoo guddaa qabu tokko konkolaataa baay'ee bareedaa yaabbatee, eegdotaan marfamee, otoo karaa sana darbuu, humnoonni nageenyaas namoota karaa irraa otoo ari'aniifii arge. Gurguddoonni otoo hin hafiin kabaja isaaf gad jedhu turan. "Aanga'aan sun nama jabaa akkamiiti? Namuu ni sagadaaf. Maal ta'a otoon akka isaa ta'ee!" jedhee hawwe.
Akkuma hawwe yeroo booda aanga'aa guddaa ta'e. Konkolaataa fardaa baay'ee bareedaa irra taa'ee yoo deemu, namoonni naannoo isaa akka malee isa sodaatan, ni jibbanis. Aanga'ichis konkolaataan fardaa sun isatti toluu dide. Aduutu isa gube. Ol jedhee aduu ilaale. Samii walakkaa teessee achii gad ifti. Jiraachuu isaaf dhimma hin jenne. "Aduun sun jabduu akkamiiti? Eenyuunuu otoo hin sodaatiin achii gad ifti, abbaa feete gubdi. Maal ta'a otoon ishee ta'ee!" jedhee hawwe.
Isa booda aduu ta'e. Uumama hunda irratti ifuu eegale. Dirreewwan guggube. Qonnaan bultoonnii fi hojjetoonni humnaa isa abaaran. Duumessi gurraachi isaa fi uumama gidduu yoo seenu garuu ifnii fi ho'i isaa isa keessa darbuu akka hin dandeenye arge. "Duumessi gurraachi sun jabaa akkamiiti? Humna guddaa qaba, Maal ta'a otoon isa ta'ee!" jedhee hawwe.
Itti fufuun duumessa ta'ee dirreewwanii fi gandeen hunda guute. Garuu humni guddaan tokko otoo isa dhiibuu fi bittimsuu itti dhaga'ame. Qilleensa ture. "Qilleensi sun jabaa akkamiiti? Humna guddaa qaba. Maal ta'a otoon qilleensa ta'ee!" jedhee hawwe. Qilleensa ta'uuf fedha guddaatu itti dhaga'ame.
Maarree ammas akkuma hawwe qilleensa ta'e. Bantii manneen namootaa fi biqiloota buqqisuu eegale. Namoota gajjallaa taa'anii ilaalan biratti jibbamaa ta'e. Kanaan otoo jiruu wanta humna isaa gararraa ta'e, kan tole jedhee isaaf hin sochoone tokkotti bu'e. Hammamuu dhiibu sana bakkaa kaasuu hin dandeenye. Dhagaa ture. "Dhagaan kun jabaa akkamiiti? Humni isaa ajaa'iba! Maal ta'a otoon isa ta'ee!" jedhee hawwe. Dhagaa ta'uutu itti bareede.
Hawwiin isaa milkaa'eefii dhagaa ta'e. Wantota addunyaa kana irra jiran hunda caalaa humna-qabeessa akka ta'e yaade. Garuu gaddumii guddaan humnaan otoo isa rukkutuu arge. Ofuma isaa akka waan jijjiiramaa jiruutti itti dhaga'ame. "Ana caalaa humna kan qabu eenyu? Eenyu kan rukkutee akkanatti na caccabse?" jedhee of gaafate. Gad ilaale. Nama dhagaa soofu of jalatti arge!
Seenaa kana nama Beenjaamin Hoor jedhamutu seenesse. Ana nama biyya Oromootu Afaan Oromootti hiike. Dubbiseen waa irraa baradhe. Isinis akkuma koo waa irraa barattu jedhee yaadeen isiniif hiike.
Namichi sun jalqaba nama dhagaa soofu ture. Garuu hojii isaatti hin quufne. Itti gammaduu hin dandeenye. Kanaaf wantota hedduu ta'e. Dhuma irratti dhufee humna dhagaa caalu kan qabu nama dhagaa soofu ta'uu arge. Gabaabaamatti, hojii ofiitti quufuun, waan hojjetanitti gammaduunis waan ta'uu hin qabne ta'uuf ofumaa umurii ofii qisaasessuu irraa nama oolcha. Baay'een keenya otoo nama biraa taanee jireenyatti gammadna jennee yaadna. Dhugaan isaa garuu akkana miti. Kan keetti hin gammaddu taanaan kan namaattis hin gammaddu. Of ta'uu, hojii ofii jaallachuu, kaayyoo ofiif jiraachuu, mul'ata ofii galmaan ga'uuf hojjechuutu milkaa'inatti nama geessa malee, nama biroo ta'uu yokaan akkeessuu miti.
Waan hojjettan jaalladhaan jedhe!
Halkan eebbifamaa qabaadhaa egaa!
#deemsiittifufa
#ananamabiyyaoromoo

#Ani_siif_jira!
Dandalaa magaalaa Niwoyoorki ture. Daldalli isaa kufee kasaaraa guddaan taphaa ala ta'e. Muka qabatan dhabeera. Dhiphina isaa jechoonni hin ibsan. Gabaabaamatti jiruu fi jireenya irraa abdii kuteera. Harka isaa lamaaniin mataa isaa jabeessee qabatee paarkota magaalattii keessaa tokko keessa taa'ee jira. Buusee baasee yaada. Homaa furmaanni itti hin mul'atu.
Haala kana keessa otoo jiruu jaarsa bareedaa tokko arge. Gara isaa dhufaa jiru. Itti dhi'aatan. "Maal taate mucaa koo? Maaltu akkana si gaddisiise" jedhanii gaafatan. Yoo xiqqaate nama dhiphina isaa itti himatu argachuu isaaf xiqqoo tasgabbaa'e. "Dhiphinni namaaf qoodame dachaan hir'ata, gammachuun namaaf qoodame immoo dachaan baay'ata!" jedhama mitiiree?
Hafuura dheeraa baafate. Tokko lama jedhee gaaga'ama guddaa isa mudate seenesseef. Seenaa isaa hunda itti himate. Ji'oota ja'an darban keessatti kasaaraan hammamii akka isa mudate, gatiin namaa hammamtu akka isa irra jiru, fuula duratti kufaatiin akkamii akka isa eeggatu, egereen isaa akka dukkanaa'e…itti himate. Jaarsis qalbiidhaan dhaggeeffatan.
Dhaggeeffatanii booda jaarsi bareedaan sun,"Jabaadhu ilma koo! Ani siif jiraa!" jedhan. Giiphii kootii isaanii keessaa cheekii tokko gad baasan. Itti hiixatan. Irraa fuudhee ilaale. Waan irratti barreeffamee jiru amanuu hin dandeenye. Akkamitti amana? Doolaara kuma dhibba shan ($500,000)! Cheekii sana mallattoo gajjallaa immoo maqaan barreeffame kan nama salphaa hin turre. Obboleesso! Dureessa beekamaa Joon D. Rookfeelertu itti mallatteesse! Galagalchee...gaggalagalchee ilaale. Amanuu dadhabe!
"Maal goota seete? Maallaqa guddaa ani siif arjoome kanaan daldala kee bayyaannachiifattee yoo jabaatte, waggaa har'aa sa'atiima kanatti cheekii doolaara 500,000 qabattee dhufta. Atis nama rakkate kan biroof akka arjoomtun barbaada. Jedhi egaa! Gaafa beellamaa wal agarraa!" jedhanii deeman. Itti galagalanii, "Yoo milkaa'uu baattes itti hin dhiphatiin. Ta'es ta'uu baates hin badiin. Akkuma beellamnetti wal haa agarru. Mudannoo kee hunda natti himtaa!" ittiin jedhan.
Daldalichi waan jedhu dhabe. Gammachuu irraa kan ka'e onneen isaa dha'annaa ishee dabaltee karaa afaanii waan baatu fakkaatte. Rookfeeler miti Uumaa waliin fuulaan waan wal arge fakkaatee itti dhaga'ame. Abdiin isaa jalaa du'e lubbuu horate. "Maal abbaa isheen abdii kuta?" jedhe! Amma doolaara 500,000 kanaan gatii isa irra jiru hunda kaffalachuu danda'a.
Kanaan otoo jiruu yaadni tokko dhufeef! "Anumti ofii koo itti dadhabee hojjedhee karaasaan keessa jiru keessaa ba'uu nan danda'a! Kanaaf haga waggaa har'aatti cheekii kana otoon hin calleeffatiinan tursa. Waggaa har'aas cheekiima kana qabatee dhufee jaarsichaaf kenna. Seenaa milkaa'ina isaa immoo itti himata. Kana gochuuf onnatee cheekii isaa fudhatee manatti deebi'e.
Onnatee hojii daldalaa isaa itti fufe. Jabaatee hojjete. Yoo itti cime malee cheekii sana akka hin calleessine waadaa ofiif seeneera. Haala nama ajaa'ibuun, hojii isaatti milkaa'ee walakkaa waggaa otoo hin ga'iin gatii isa irra jiru hunda kaffale. Ni bayyaannate. Gaafa waggaa tokkoo daldalli isaa haalaan guddate.
Amma guyyaan beellamaa ga'eera. Jaarsa waliin deebi'ee wal arguuf ariifateera. Sa'atiin geenyaan fuula gammachuun ifeen cheekii jaarsaa qabatee bakka jedhametti qajeele. Daqiiqaa muraasa eegee booda jaarsi fuula ifaadhaan achii as dhufaa otoo jiranii arge. Baay'ee gammade. Jaarsi yoo dhufanii isatti dhi'aatan narsiin tokko dudduubaan dhuftee harka isaanii qabde.
"Maaluma naaf wayya?" jette narsittiin, "Jaarsi kun inuma na guban. Guyyaa guyyaatti kutaa waldhaansa dhibee sammuu itti yaalamaa jiranii badanii bakka kana dhufu. As dhufuun isaanii homaa miti. 'Ani Rookfeeleri' jedhanii cheekii sobaa namaaf kennaa ooluu isaaniitu bade malee!' jette. Itti aarteetti. "Nama xiqqoo waan gadde fakkaatu yeroo argan dubbisanii cheekii sobaa Rookfeeleriin mallattaa'e fakkaatu itti kennu. Nama meeqa kiyyootti galchan seete! Jedhimee ilma koo! Siinis si argatanii oolan…Waaqatu si oolche!" jettee akkuma harka isaanii qabdetti jaarsa fuutee deemte. Namichi naasuun hollate.

Dafqatu irra cite! "Ani siif jira" kan ittiin jedhe jaarsi edaa dhukkubsataa sammuuti.
Maal jechuun barbaade seetan? Mee waana ani jechuu barbaade gol-yaada keessatti barreessaa. Seenaa ajaa'ibaa kana irraa maal baratta?
Halkan baay'ee bareedaa qabaadhaa!
Eebbisaa Baayisaati
#deemsiittifufa!

#Walaloo
Ija koo duruunfadhee nan arga yoo naan jette
Kan namatti hin mul'anne waan argitu yoo seete
Sirriidha!
Ni argita ati sirriidha
Hin argitu anis sirriidha!

Obboleessa koo, gaaf tokko siifan bita!
Yeroon isaa yeroo ayyaana Qillee ture. Yeroo itti namoonni kennaa waliif kennan. Namni Phaawuloos jedhamu obboleessa isaa irraa konkolaataa bareedaa kennaa fudhate. Jal-bultii ayyaanichaa irratti Phaawuloos waajjira isaatii yoo ba'u, gurbaan karicha irra ture tokko konkolaataa haaraa bareedduu sanatti naanna'ee otoo ajaa'ibsiifatuu arge.
"Gooftaa koo, konkolaataan kun kan keetii?" jedhee gaafate. "Eyyee, obboleessi koo kennaa ayyaanaa taasisee naaf kenne" jedhee deebiseef Phaawuloos. Gurbaan baay'ee ajaa'ibsiifate. "Ati waan tokko illee otoo hin kaffaliin obboleessi kee toluma siif kenne jechuudhaa? Ah…anis gaaf tokko…" jedhee dubbii isaa addaan kute.
Gurbaan maal akka hawwe tilmaameera Phaawuloos. "Anis otoon abboleessa akkanaa qabaadhee!" jedha jedhee eege. Garuu miti. Dogoggoreera. Waan gurbaan itti aansee dubbate akka malee Phaawuloosiin naasise. Waan inni hin eegiin waan ta'eef.
"Anis otoon obboleessa akkanaa ta'ee jedheen hawwa!" kan jedhu ture dubbiin gurbaa xiqqaa sanaa. Phaawuloos naasuun ija gurbaa keessa ilaalaa, "Konkolaataa koon bashannanuu barbaaddaa?" jedhee gaafate.
"Eyyeekaa, baay'een gammada!" jedhee deebiseef. Waliin deemsa eegalan.
Xiqqoo deemanii booda gurbaan Phaawuloosiin ilaalaa haala kadhannaa fakkaatuun, "Gooftaa koo, maaloo karaa mana keenyaa nu geessitaa?" jedhe. Phaawuloos ni seeqe. Gurbaan maaliif karaa mana isaanii deemuu akka fedhe tilmaame. Maatii fi olloonni isaa konkolaataa bareedaan bashannanuu isaa akka isaaf argan barbaadee ta'a jedhee yaade. Garuu sana hin turre. Ammas yeroo lammaffaa tilmaama dogoggoraa tilmaame. "Ilaa, gulantaawwan (stairs) sana lamaan biratti naaf dhaabda!" jedhe gurbaan. Phaawuloos konkolaaticha dhaabeef.
Gurbaan konkolaataa keessaa akkuma bu'een fiigee gulantaalee lamaan irra ba'ee manatti ol gale. Xiqqoo turee otoo deebi'ee dhufaa jiruu sagalee gurbaa dhaga'e Phaawuloos. Garuu dafee hin deemu ture. Edaa obboleessa isaa quxisuu kan miillan isaa deemuu hin dandeenye baatee jira. Kanaaf suuta deema. Obboleessa isaa fidee gulantaa sana jala kaa'ee qubaan konkolaaticha itti agarsiise.
"Ilaa, kunooti! Argitee? Mana yoo jirtu ishuman sitti hime fakkaatti mitii? Homaa horii hin kaffalle. Obboleessa isaatu kennaa ayyaanaa taasisee kenneef. Obboleessa koo, anis gaaf tokko konkolaataa akkanaan siif kenna! …Isa booda wantota mimmiidhagoo ani sitti himaa ture hunda ofii kee naannoftee ilaalta!"
Phaawuloos baay'ee gadde. Konkolaataa isaa irraa bu'ee gara gurbaa miillan isaa deemuu hin dandeenyee deeme. Haammatee baatee fidee teessoo konkolaataa isaa isa fuula duraa irra kaa'e. Obboleessi mucichaa inni hangafni ijawwan isaa gammachuun ifan. Gammachuu guddaadhaan obboleessa isaa bira taa'e. Sadan isaaniis guyyaa jal-bultii ayyaana Qillee bashannana hin irraanfatamne bashannanan!"
Seenaa kana nama Daan Kilaarki jedhamu hiriyyaa Phaawuloostu seenesse.
Dhugaa dubbachuuf taanaan, seenaa kana gaafan dubbise imimmaan koo to'achuu hin dandeenye. Obboleessa ofiif caalaa obboleessa isaaf yaadu akkanaa--sunuu umurii ijoollummaatti--arguun ajaa'iba. Obbolummaan akkana. Hundeen isaa of caalaa obboleessa ofii jaallachuudha. Nus ayyaana du'aa ka'uu Gooftaa Yesuusitti deemaa jirra mitiiree? Mee hammuma dandeenyu waan gaarii waliif haa yaadnu, wal haa jaallannu; warra gargaarsa fedhan bira haa dhaabbannu; namoota waan barbaachisaa dhaban waan dandeenyu hundaan haa gargaarru. Yeroo nuti ayyaana kabajnu kana obboloonni keenya baay'een mana hidhaa akka jiran, kaan dhukkubsatanii hospitaala akka jiran, kaan rakkatanii waan nyaatan akka dhaban…haa yaadannu; waan gochuu dandeenyu immoo haa gumaachinu.
Galgala baay'ee bareedaa qabaadhaa egaa!
#Ananamabiyyaoromoo
#Deemsiittifufa