JIZZAX SHAHRIDAGI QOZON FEDERAL UNIVERSITETI FILIALI IJROCHI DIREKTORI OZOD JURAYEVICH BOBOMURODOVNING "O‘ZBEK TILI BAYRAMI" MUNOSABATI BILAN BAYRAM TABRIGI
Assalomu alaykum, aziz vatandoshlar!
Hurmatli filial jamoasi, bilimga chanqoq talabalar!
1989-yil 21-oktabr — “Davlat tili haqida”gi Qonun qabul qilingan kun sifatida O‘zbekiston Respublikasi tarixida muhim sana.
Negaki, ona Vatanimiz mustaqilligining qo‘lga kiritilishida ushbu huquqiy hujjatning ahamiyat beqiyos. Zero, o‘zbek tiliga davlat maqomining berilishi xalqimizning o‘z huquq va manfaatlarini himoya qilishdagi muhim odim bo‘lganini katta avlod yaxshi eslaydi.
Bugungi kunda yangilanishlar shiddati va ulug‘ maqsadlarga shaylanish jarayonlari aro ma’naviyatimizning, ma’rifatimizning qoni-joni bo‘lmish ona tilimizni e’zozlab “O‘zbek tili bayrami kuni” e’lon qilinishining o‘ziyoq katta bir bayramdir.
Muhtaram yurtboshimiz taʼbiri bilan aytganda, har birimiz davlat tiliga boʻlgan eʼtiborni mustaqillikka boʻlgan eʼtibor deb, davlat tiliga ehtirom va sadoqatni ona Vatanga ehtirom va sadoqat deb bilishimiz, shunday qarashni hayotimiz qoidasiga aylantirishimiz lozimdir.
Zero, Ona tilimiz – millatimizning ruhi, tariximizning koʻzgusi, milliy maʼnaviyatimizning asosidir. Shunday ekan, ona tilimizni eʼzozlash, munosib hurmat hamda ehtirom koʻrsatish barchamizning muqaddas burchimiz va majburiyatimizdir!
Aziz vatandoshlar!
Fursatdan foydalanib, yana bir bor barchangizni ulug‘ bayram bilan samimiy tabriklayman!
Jizzax shahridagi Qozon federal universiteti filiali ijrochi direktori, texnika fanlari doktori, professor Bobomurodov Ozod Jurayevich