زحمة إذا تتعطل أم عون
جيتك يخوية وي اليزورون
- - - - - - - - - - - - -
لازم أجيلك گلبي مشتاگ
بعيد الطريج وهزلة النياگ
جروح فكدك كلش أغماگ
ياماي عيني وشوف العيون
- - - - - - - - - - - - -
محروك جدمي وگلبي محروگ
من سوگ أطلع وأدخل بسوگ
مو بس بناتك تعبت النوگ
نريد ابونة اطفالي يبچون
- - - - - - - - - - - - -
من الطف لهسة الروس وياي
من أطلعنة خوية أجدام حفاي
تبرالي خوية تباري ممشاي
وأتوقع انت حالتي شلون
- - - - - - - - - - - - -
مستحية أجيت مدنّگة العين
رقية بضعنكم ماهي يحسين
كالت يعمة والدي وين
وطشت المنية جابة ملعون
- - - - - - - - - - - - -
حرگو خيامي بذيج الأيام
واليوم أجت بلهفة الأجدام
حسبالي أخيي باني الأخيام
گلت اليتامى بفي ينامون
- - - - - - - - - - - - -
جيتك يخوية وهمي أجبال
أفتحها گوم بچفي الأحبال
ما ضل على اختك يالشهم حال
مسبية وآني أتنطر تجون
- - - - - - - - - - - - -
أدري بهلي عرابة الخيل
اتلگو زينب يالمچاتيل
بچفوفكم نوخو المهازيل
بشيل اليتامى وگعت أمتون
- - - - - - - - - - - - -
ما بيه حيل گعود صليت
براية كفيلي آني توچيت
كتلك أجيك وعالوعد جيت
أدري من أجيكم بيه تدرون
- - - - - - - - - - - - -
أسألني خوية وأحچي الصار
من يوم عاشر وي الأزغار
لسة بعباتي ريحة النار
شلونج تگلي ما بقى لون
- - - - - - - - - - - - -
الراية ذيج البيد عباس
ما طاحت وضل بيها نوماس
بيدي ارفعتها ورافعة الراس
أهلي الهواشم ما يدنگون
- - - - - - - - - - - - -
الشاعر حسين كاين