لـِ 𝗁𝗎𝗌𝗌𝖾𝖾𝗇 𝖻𝖺𝗌𝗂𝗅 .

انقذ نفسك :

فشلك الاول هوه نجاحك الاول وطريق النجاح صعب وبيه عقبات وروحك راح تتعب وتمر بمشاعر عميقة ماراح تطلع منها اله بسعيك وطموحك
كلنا راح نحارب وماراح نستسلم تجنباً للفشل والندم
انقذ نفسك انت هسه تكدر تغير وتبني وترسم طريقك كعدتك وبقائك بنفس المكان ماراح يغير شي
التغيير هوه الحزن والبكاء والتعب وبعدها الانتصار وبعدها النجاحات
الفشل الاول يخلق الف نجاح
لاتستسلم حتى لو تحاول اكثر من ٧ مرات ، كمل مثل مابديت وكل يوم هوه يوم جديد للتغيير
صح الطريق صعب وبيه تعب بس بقائك بمكانك راح ياذيك اكثر
انقذ نفسك وتحدى الكل
كلنا شفنه مشاكل وتعب وحزن بس تخطيناه وصار مجرد كلام
رحلة التغيير صعبة بيها تناقضات واستسلام وضغط نفسي وحزن وكل المشاعر الصعبة راح تصادفك
بهيج رحلة محاولاتك مو سريعة ماراح توصل بيوم واحد ، صير لنفسك الطبيب المعالج والمستمع والمشاهد
شوف مشاكلك واسمعها وعالجها وتقبل اخطائك ، التقبل هيه اول مراحل التغيير ، اي انسان يعيش بالتقبل هوه انسان قوي محد يكدر يوكف بوجهة ، كل العظماء في العالم تقبلو منهم الي تقبل هوه يتيم ومنهم الي تقبل هوه ضعيف وتقبل اخطاء وتقبلو كل شي ، لازم نتقبل اولا كلنا نغلط منها غلط مقصود او لا هاي مو مشكله لازم نتقبل ونبدي برحلة جديده كلنا حاولنا وسعينة ووصلنا ، كلنا عدنا جانب مانحبة بس هذه يتغير بلمحاوله مو بلتذمر صح راح تواجة صعوبة بس بلاخير يتغير ، راح تشوف بداخلك شخص يريد ينجح وشخص يريد يستسلم وشخص يريد يعيش وشخص يريد يموت ، قاوم حتى اذا وصلت ممزق لان لذة الوصول راح تشفي كل شي بداخلك ، واجة لاتهرب 🤍.

الخوف :

شنو هو الخوف ؟
وليش يعني نخاف ؟
وليش نحس بهذا الشعور ؟
شعور الخوف كل انسان يمر بي ومو بس الانسان حتى الحيوانات ، الخوف شي غير ملموس ، يعني نكدر نحس بي بس ما نكدر نلمسة واحياناً الخوف يكون شي فطري بداخل الانسان ، بطبيعة الانسان لو شكد ما جان قوي راح يمر بالخوف وهواي اشياء يخاف منها مثل الظلام او الخوف من الفقدان او الخوف من حيوان معين او من كلام ، الزبدة من كل هلكلام هذا خلي اعرفلكم الخوف شنو ( الخوف هو حالة ضعف يفقد بيها الانسان السيطرة على قوتة وتوازنه ومشاعرة )

خلي نقسم الخوف الى عده اقسام
- الخوف (من شي موجود) مثلاً الخوف من الحيوانات او حيوان معين مثل القطط او الكلاب

- الخوف (من شي مجهول) يعني الخوف من شي ما موجود اساساً مثل الخوف من الفقدان كل انسان بينا يخاف يفقد شخص يحبة ، وكذلك الخوف من المرتفعات هواي ناس تخاف من الاماكن المرتفعة والسؤال هو ليش نخاف من المرتفعات؟
شوفو هي الفكرة مو بالمكان نفسه لان هو المكان موجود حالة حال اي مكان ثاني ، لكن الشخص من يكون بمكان مرتفع يفكر انو احتمال يطيح ويموت او يطيح وينكسر فـ هنا الخوف اساساً هو مو من المكان نفسة وانما من الموت ، وعدنا كذلك الخوف من الظلام عدنا هواي ناس تخاف من المكان المظلم وهنا الفكرة الاساسية هي مو الخوف من الظلام وأنما الشخص من يفقد البصر بالأشياء الفعلية راح يضل يشوف اشياء خيالية واول فكره تخطر بباله هو وجود الجن بغرفة النوم مثلاً

- الخوف ( النابع من الذات ) بهواي اوقات الشخص يخاف من نفسه ، يخاف ما يطلع بالشكل الي يريدة او يخاف ما يكون بالأمكانية المطلوبة او يخاف ما يوصل الفكرة الي بداخلة ، وهاي الحالة تصير اكثر شي ويا الناس الي عندهم رهاب اجتماعي لما يأدون اول تجربة يكون عندهم خوف مو طبيعي ، وكذلك الطلاب وهاي كلنا مارين بيها من يكون عنده امتحان صعب وندرس بكل طاقتنا ونعرف نفسنا متمكنين من المادة بس نبقة قلقين من الاسئلة نخاف تجي صعبة وما نجاوب وهذا كله سببه هو الخوف النابع من ذاتنا الخوف يخلي الشخص يفقد كل مواهبة وسيطرتة ويكون انسان ضعيف

شنو الي نحتاجة لحتى نتخلص من الخوف بشكل نهائي ؟
اكو قاعدة امشي عليها اني ( الشي الي تخاف منه أبدي بي ) يعني الشي الي تخاف منه واجهة اذا تبقة تتهرب من المواجهة راح تبقة خايف ، اعتبرها معركة بينك وبين مخاوفك وخلي ببالك انت الي راح تنتصر بهاي المعركة ، يعني اذا كعدت بـ مكان مظلم لا تتهرب اوكف وواجه خوفك لا تستسلم سيطر ع عقلك واقرة اذكار لحد ما تهدأ ويروح منك شعور الخوف ، التجارب تقتل المخاوف ، يعني الفكرة كلش بسيطة بمجرد ما تقنع عقلك وتقنع نفسك راح تبطل تخاف 🤍.

الشخصية القوية :

الشخصية هيه مجموعة من التصرفات الي يكبر عليها الانسان ويكسبها من المجتمع والمحيط العايش بيه ، الطفل اذا تربى على الفاظ تضعف الشخصية مثل : انت جبان او انت وصخ او انت غبي .. ألخ ،
هنا الطفل راح يكبر على هذه الشي وعقلة ينمو على هذه الشي ويكبر ويصير شخصية ضعيفة والعكس صحيح ،

ومن الاسباب : الي اغلبنا اذا مو كلنا نعاني منها هوه الماضي و الاحداث المرة الي تعرضنا الها وغيرت النفسية وتعبتها ، والقلق والخوف الدائم من كلشي وعدم الثقة بلنفس هاي الشغلات كلنا نمر بيها نقلق ونتعب ونفقد الثقة بلنفس بس المصيبة انو تبقى فاقد ثقتك بنفسك وتبقى قلق وهذه الشي ماياثر بس على شخصيتك لا هم ياثر على جسمك وعقلك وصحتك وضروري اذا تريد تحقق اي شي بحياتك لازم تثق بنفسك ، و المشكلة الاكبر هيه المجتمع الي احنة بيه ينتشر بيه التنمر والاستهزاء والجهل بشكل كبير ( شوف ملابسك ، شوف خشمك ، انت مو حلو ، انتي سمينة ، شوفي هاي احلى منج ، انتي غبية ) هاي الاشياء تاثيرها كلش كبير على النفسية والشخصية بهاي الحالة لازم تكون قوي وبهيج مواقف تزيد ثقتك بنفسك ماتخلي هيج كلمات تاثر عليك وتهزمك ، والتجارب الفاشلة والفشل هاي الشغلات هواية ناس تتاثر بيها وتاخذ الفشل فقط وينسون الي تعلمو من الفشل وهذه الشي يخليهم خايفين وشخصيتهم ضعيفة ، اني عن نفسي الفشل يعتبر خطوة الى الامام عندي لانه يعلمني هواية ويعلمني شلون اتخطى الفشل المرة الجاية ويسويك اقوى بهواية مثلا شخص عندة امتحان وطلع درجة 80 بوحدة من المواد ، هنا هوه امام خيارين يروح يلوم نفسة ويكول اني مو ذكي واني هذه حد فهمي ؟ (وهذه الشي الي يسوونة 99% من البشر ) وعندة خيار ثاني يفتح ورقتة ويشوف الاخطاء العندة ويتعلمها ويحفظها ويعرف طريقة الاستاذ في الاسئلة والمرة الجاية يتخطى الاخطاء العندة ويكون اقرب للقوة والنجاح ، واكو ناس دائماً تخرب مزاجها بنفسها وهذه الشي هم ياثر على الشخصية مثلا عندك الاشياء السطحية ميحتاج نخرب يوم كامل عليها ونضوج كلنا نتعرض لمشاكل بس الشاطر بينة يعرف شلون يتعامل وياها مثلا البنية من تسمع شخص يكول حاجبها مو حلو مثلا هنا تدخل بحالة اكتئاب وتضوج تخيل راح تخرب 1440 دقيقة ( يوم كامل ) علمود 1 دقيقة سمعت بيها كلام ماعجبها ، واخر شي من الاسباب هيه العزلة ابد ابد لحد يعزل نفسة عن الناس لان هذه الشي نهايتة تبقى خايف تواجة المجتمع وتخاف تواجة اي مشكلة بسيطة تصير وياك خليكم اقوى واجتماعيين وخلو كلامكم يدل على قوة شخصيتكم

واكو ناس راح تكول مااكدر اغير شخصيتي الضعيفة هاي صارت وياي من طفولتي وتربيت عليها

هنا انت كلش غلطان وهذه مجرد كلام تكولة لان شخصيتك ضعيفة وخايف تغير نفسك ، انت بين خيارين اما تحاول وتجرب وبعدها تنجح او تفشل مو مشكلة او ماتحاول وتبقى ندمان طول عمرك لان ماحاولت تغير نفسك وحبست نفسك بسلبياتك وبشخصيتك وباسلوبك الي كلهم ما تريدهم وتتمنى تغيرهم

اذا انت وصلت تقرا لهنا يعني انت مهتم بلموضوع وتريد تغير شخصيتك للاحسن اسمع مني ، اول شي تسوي تفتح مذكراتك ورقة وقلم او الملاحظات مال موبايلك وتسوي قائمة بلـ اشياء الي ماتعجبك بشخصيتك وتريد تغيرها مثلا ( راح اكون شجاع - ما راح استحي من الشي الصح - راح اكون صادق - راح اصير اجتماعي ) وهنا تبداء تشتغل عليهن وحدة وحدة و الشي اذا نريد نسوي عادة نعيدة لمدة ٩٠ يوم يصير جزء من حياتنا مثلا صير شجاع لمدة 90 يوم وراح تبقى طول عمرك شجاع او لاتستحين من شكلج وثقي بنفسج لمدة 90 يوم راح تبقين هيج طول عمرج ، ماكو بشر خالي من العيوب بس اكو بشر يثق بنفسة وعندة شجاعة تخليك تحسة مابي عيوب ابد ، ( الكمال لله فقط ) ، و الابتسامة ابسط شي ممكن تسوي ويغير نفسيتك وشخصيتك مو صعبة كلش سهلة ، خلي ابتسامتك هيه الانعكاس لشخصيتك ، والشي الاهم لازم عقلك يتعلم ويقوى ويعرف يفكر وهذه الشي تكدر تسوي بالقراءة والاطلاع على الفكر والمجتمعات المختلفة عن الي تربيت بيه واكو كتب هواية تحجي عن الشخصية والعقل وتطويرة ومن ضمن الكتب الي قاريها كتاب " قوة عقلك الباطن " الي يحب يشتري ويقراء والي يحب ينزلة من النت ويقراء والي يحب يسمعة على اليوتيوب موجود كذالك ، وبلاخير اقدم الكم نصيحة
( الناس تشوفك مثل ما انت تشوف نفسك ) اذا جنت قوي وتحترم نفسك وتحبها الناس راح تحترمك وتحبك وتحس بقوتك من اول ماتشوفك ، واذا ماقدرت نفسك وبقيت خايف الناس ماراح تقدرك وراح تعرف ضعفك وخوفك 🤍.

العادات والتقاليد :

اكو عادات وتقاليد ماشين عليها من زمان واغلب اهالينا او بالأحرى مجتمعنا ، هالعادات اغلبها دمار لأبنائهم واخوانهم ( بنات - ولد ) واغلب هالعادات سببت هواي امراض نفسية وعقلية وصحية لأبناهم واغلب عوائلنا متأقلمين ع هالعادات والبعض محبورين يسووها والبعض مرتاحين للجهل وهذا اساس تربيتهم ، خلي نبدي بأول نقطة الي هي تربية الأهل لأطفالهم بصورة بشعة مثلاً ( ضرب ورزايل واهانة مستمرة ) هلأساليب يستخدموها ضد اطفال علمود شنو ؟
يضرب ابنه ويهينه علمود يكوم يسمع كلام ويمشي عدل ، من زمان ولحد الان اغلب عوائلنا متخذين هذا الاسلوب لتربية اطفالهم اول ما يبدي يكبر يهينه ويضربه ع اساس ميعيد الغلط وهذا الشي كل احنه نعرفه غلط وراح يسبب نتائج سلبية وتنتج شخص محطم نفسياً ، وانتو تعرفون كلش زين بهذا الوقت اغلب اطفالنا ديتعرضون لتحرش جنسي اذا هو الطفل دينهان وينضرب من اهله شتتوقعون اذا تعرض لهيج حالة راح يجي ويحجي ويا اهله ؟ شي اكيد لا اذا هو وعى ع الدنيا بضرب واهانة ، سوو تفرقة بين الاخوة ، والقصد من كلامي هذا تكبر البنية ويكبر الولد كامو يفرقوهم ويمنعوهم بالاختلاط من بعض يشوهون تفكيرهم علمود شنو ؟
علمود ميصير بينكم حرام والشيطان يوزكم …. والى اخره من الافكار الوصخة ، لا تنصدمون بعض العوائل صار بيها هيج تخلف ، ابني انت كبرت وصارت عندك مسؤولية ولازم كلمتك تمشي على اختك
- اضربها حتى لا تتجاوز عليك او يطول لسانها بالمستقبل
- اكسر عينها من البداية حتى لا تاخذ عليك
- احجي وياها بخشونة حتى تكول هذا رجال شهم ( الشهامة والرجولة تبچي بزاوية )
- لا تخلي المصروف بأيدها
- راقبها دائما وافتح فونها لان بنات هلوكت مايتأمن عليهن
وهنا الابن راح يمشي ع هذا النهج والسلبية والوصخة ويطبقها ع اخته وعلى بناته بالمستقبل ، استبعاد الاهل لأطفالهم من التثقف او بناء خلفية ثقافية ، يمنع ابنه من منتديات ثقافية او علمية او قراءة كتب بحجة الخوف وهو بالعكس التقيد والاستبعاد هو الي راح يخرب اخلاقهم ويكونون ناس مو شايفين ومو واعين على الحياة ، بنتي صار عمرج 14 سنة او 15 سنة بنات عمج تزوجو ما لازم تبقين بالبيت اي شخص يتقدملج بدون مناخذ رأيج راح نوافق وهنا البنت راح تنجبر تعيش ويا شخص متخلف ومجتمع متخلف واسرة متخلفة وتبدي المشاكل وحالات الطلاق والتفكك الاسري وبالاخير تتطلك ، هواي نقاط ما راح اذكرها لان ماعندي وقت وهواي بنات تدمرت احلامهن واهدافهم بسبب الاهل ما كافي ؟
( اذا اردتم أن تحرسو بناتكم واطفالكم فـ شيدو من حولهم جدار من الثقة ) 🖤

😔😂 .

نضرة المجتمع عن البنت :

- اذا تمكيجت علمود الشباب
- اذا رفضت الزواج هاي اكيد تحب
- عدهم البنت هيَ مجرد جسَد وعورة
- اذا دافعت عن حقها يكولون هاي مامربايه
- البنت عبارة عن طبخ وخدمة
- اذا غلطت اقتلها اغسَل عارك
- زواج اجباري
- ضرب واهانة

- مسترجلة ! مو مسترجلة بس صوتها عالي وقوية
- جكمه ! مو جكمه بس جمالها يختلف
- مبهذله ! مو مبهذله بس ذوقها يختلف
- غبية ! مو غبية بس فطيرة وتحجي كلشي
- خفيفه ! مو خفيفه بس اجتماعيه
- معقده ! مو معقده بس ثكيله وتحب العزله
- ثوله ! مو ثولة بس على نياتها
- سودة ! مو سودة سمره
- احَسَنوا الكلام 🖤.

- المستقبل :
راح تسمع صوت الهورنات بالشارع وفرحة الناس بيك ، راح تسمع صوت امك وهي فرحانة بيك وتنزل دموعها ، وراح تسمع الاتصالات الي تجي لأهلك بمناسبة نجاحك ومعدلك ، وراح تشوف الالعاب النارية الي فوك بيتكم ، وبوقت اعلان النتائج راح تشوف امك وابوك مهدود حيلهم بسبب الانتظار ومن تطلع النتيجة راح يطيرون من الفرح ، بوقت كل هلاشياء راح تنزل دمعتك من الفرح هنا بجيت ؟
بوكتها راح تبجي لأجل حلمك ، تبجي لان انت انسان قوي وحققت هدفك ، بجيت لان رفعت راس اهلك ، بوكتها راح تحس نفسك فخر ليش فخر ؟
اهلك كبروك وعلموك ولبسوك وتعبو عليك يردون منك مقابل وهلمقابل لازم انت تحققه وترفع راسهم ، راح تنسى التعب الي تعبته والتوتر والحمل الي جان فوك ظهرك وراح تنسى تعب الليالي وبنفس الوقت راح تتذكر شكد صليت بالليل علمود ربنا ينجحك ويفرح اهلك ، الله بس تخيلو وياي شكد حلوه هاي اللحظات ، ما راح يصيبك الله الا حسنة ، والله ما كاتبلك بس الخير اذا مكتوبلك طب راح يجيك الطب واذا مكتوبلك هندسة راح تجيك الهندسة وين ما راح يكون مكانك ما دام الله اختارلك هذا الشي فـ هو يشوفك انو انت بالمكان المناسب ، خلو بالكم وياي هلفتره فترة تحديد مصيرك عوف الانستا وعوف النت ليش تعوفهم ؟
لأسباب هواي ومنها : اسباب تغيير مواعيد الامتحانات واسباب المرشحات فلان يكول هلمرشحات تجيب درجات ما اكلك لا تطلع ع مرشحات لا اطلع عليها بس لا تعتمد عليها وعندك بعد اسباب تسريب الاسئلة كلها كلام وهمي وماكو تسريب امشي بالطريق الصح ولا تخسر مستقبلك وبعد شغله مهمة احب احجي عنها ، لا تقارن نفسك بشخص ثاني وتكول شوف فلان خلص المادة واني بعد لحد هسه ممخلص راح تحس نفسك تسبح ببحر ووصلت للنص لا تكدر ترجع ولا عندك واهس تكمل لا تقارن نفسك بهذا الشخص وتخلي معنوياتك تروح هوه يجوز قره شلون مجان او دخل خصوصي اعتبر نفسك حالك نادرة والها مقايسها الخاصة انت كادر تسوي كل شي شنو الاثبات ؟
( ولقد خلقنا الانسان في احسن تقويم ) الي خلقك عظيم وخلقك بأحسن صورة وانطاك نعمة العقل الي يخزن عدد لا محدود من المعلومات ، شعور عظيم من توصل للتريده وتكسر عيون هواي شماته خلي هدفك معين حتى توصل وتتفو ق ، طلابنا وطلاباتنا في القلب ما راح انساكم لا بالتحفيز ولا بالدعاء 🤍 .

اقصر قصهه حزينهه :

مع ام ضد العادات والتقاليد ؟
احنه كـ مجتمع نشوف العادات غير منصفة مع البنات ودائما ضدها واني كـ شخص اشوف انو لازم نغيير العادات والتقاليد ، زين اني افكر اغير هلعادات بهواي ناس واغلبنا يطبق هلعادات ويكول ، العادات يتم توارثها من الأجداد ، يعني المسأله قديمه ومعقدة كلش يعني صعب التغيير ، زين نغيير بعض من العادات او جزء منها مثلا زواج القاصرات ! اني ضد هل عادات لكن اهلنا توارثوا هل شي من زمان اب عن جد ولازم نكون ضد هل شي حتى نمحي تماماً وبهيج حاله راح يقل الطلاق والبنات مراح تكون ضحيه الزاوج والطلاق
مع ام ضد : العادات ضد المراة .
المراة هي نصف المجتمع من حقها انو تعيش مثل متريد وتدرس وتحقق حلمها لكن للاسف اغلب البنات مكدروا يحققون هل شي الي كسرهم بسبب العادات والتقاليد ، تدرسين كذا تخصص عيب ، ترحين للجامعة ويشوفج فلان وفلان عيب ، بناتنا معدها فون ومنحط بأيدها فون لان عيب عند الاغلب طبعا مو عند الكل وجاي ألاحظ هذا الشي بالمحافظات الجنوبية العراقية بنات انسلب حقهم وانسلب صوتهم بسبب العادات التعبانة الي ورثها الجيل السابق ، جيل البنات هذا يستحق التغيير لان جيل جديد الهم صوت يكدرون يغيرون هاي العادات الي هي غلط لان كلشي تغير بس العادات مجاي تتغير للأسف

اني الي عليه اطرح هذا الموضوع وهواي بنات راح يخالفون هلكلام ليش ؟
لان ممرو بهيج عادات ، لازم يكون عندنا وعي ومو كلنا نوكف بوجه البنت الطموحه بحجت العادات والتقاليد هواي بنات تريد تأمن مستقبلها لان هذا الوقت ميرحم ، والبنت سلاحها الاول حقوقها وسلاحها الثاني شهادتها اتمنى تكونون منصفين ويبقى السؤال الكم مع ام ضد 🤍.

الصوره تقول ✅ 🤍 .

- موضوعنا اليوم ( اصبح صنف من الذكور بأستغلال الاناث تحت عنوان الحب ) ♥️.
اي حب بالضبط ؟
ولهذا الدرجة أصبحن الاناث لا عقل لديهن ويستغلن ؟
- اي حب بالضبط : حب المصلحة او الحب المستغل تحت وعود الزواج الكاذبة وكالعاده البنات راح ينخدعون تحت هلمسميات او الوعود ليش ينخدعن لان حبهن صادق وهذا مو غباء الغباء من يثق بك وتخذل ثقته وطبعا هلموضوع جاي يتكرر هواي .
خلي نركز ع هلموضوع وكل بنت تفكر بعقلانية تركو قلبكم الرقيق الحنون هو الي يقرر عنكم وفكرو بذكاء اكبر وحتى اذا جان شخص مستغلج بيوم من الايام كوني على يقين
ان الله ما يضيع حق احد ليش حقج ما يضيع عند الله ؟ لان نيتج صافيه ويا هلشخص وهوه هذا اهم شي .
وماكو شخص ما يغلط الانسان مو معصوم عودي من جديد بـ ( بكبريائج - بقوتج )
ومن بعد هلعوده لا تخلين احد يدخل بحياتج ويتكرر هذا الشيء خلي الحب أمر صعب وبمرور هلوقت حتحسين انو انتي خذلتي ثقة اهلج لا انتي مخنتي او خذلتي ثقة اهلج لا انتي انخدعتي تحت هلوعود والمسميات وانتي بنفسج يا عزيزتي تكدرين تطورين نفسج وتنتقمين منهم واذكري لهم هذا القول ( كيدنا عظيم من انت تظن ان تستغل ضعفناً ) هنا حتصيرين خيراً من الف رجل ثقي بنفسج وتركي كلام الناس لان ناسنا ومجتمعنا متخلف يسامحون الرجل ويقتلون الانثى تحت عنوان ( العيب مو من الرجال العيب من البنية ) ويفعلون ما يحلو لهم ويبعثون بشرف الفتياة أين تذهبون من الله فـ الله عادل لا يعرف هذا ذكر وهذه انثى لماذا هذا التناقظ لماذا تدفنون الفتيات بكلامهم بعاداتهم بأحلامهم البسيطة :(
كونوا قويات يا فتيات وتقربوا الى الله 🖤.

- ابتزاز .

بيوم من الايام عثرت الشرطة على بنت منتحرة ببيتها والأجهزة الامنية فتحت تحقيق بموضوع الانتحار وصلو لمعلومات أولية سبب انتحار هو ابتزاز شخص للبنت المنتحرة ابتزها بصورها او تهديد بعد شعورها بالخوف من الفضيحة وخوفها من اهلها انتحرت .
تخيل فقط ! .
هناك فتاة تنتحر بسبب ابتزازك .
هناك عائلة تفضح بسبب ابتزازك .
هناك روح تزهق بسبب ابتزازك .
هناك بشر ينتهي من الوجود بسبب مرض لديك وهو مرض الابتزاز ، شنو ذنبها من وثقت بيك وحسبتك رجالها ودزتلك صورها هوه هذا جزاء الثقة والامان ؟
عزيزي الزلمة فكر بعقل وحكمة وتذكر ابتزازك راح يقضي على روح وثقت بيك وامنت على نفسها ، النهايات اخلاق وليس ابتزاز او تهديد ، بعض الانبياء راح يكولون تستاهل ليش دزت صورها وليش تثق بهذا الشخص صوجها وتستاهل !
( الحب اعمى والثقة بمن تحب تخليك تسوي كلشي بدون تفكير ) الرجوله عمرها مجانت بالتهديد والضرب والابتزاز وحتى اذا ردت تتركها يوما ما حتى بمغادرتك كون الها رجال لا تهدد ولا تفضح 🤍.

- اغلب .

الشباب والبنات الي بالتعليقات اغلبهم ذبو الصوج ع بنت وطلع الغلط كله بالبنت كل الي كالو الصوج بالبنت ( ما حبو من صدك ) البنية كلبها صغير وتثق وتصدك بسرعهه حبها نظيف وما بي لا منا ولا منا ومن بعد هذا الحب تنصدم بالشخص المقابل ويطلع حشاكم ابن حرام وهنا تبدي مسيرة التهديد والابتزاز 🤍.

- الغلط .

احيانا لغلط يوصلك للطريق الصح و الناس الغلط تعرف قيمةة الناس الصح والاختيارات الغلط تخليك واعي أكثر من تختار بالمرة الي بعدها و ﭑلضربه ﭑلي تأذيك حتصحيك و الضعف يخليك أكثر صلابـة وقوة و التشت يخليك تتمسك بنفسك أكثر و الكسر و الشدة و الوحدة الي توكع بيها تخليك تعرف قيمة نفسك

احيانا اكثر الاشياء الي ممكن تأذينا هي الاشياء الي تنقذنا والاشياء الي نفدرها نهايتنا تڪون بالحقيقه هي البدايـة .

لما تفضفض لشخص الصح ✅ 🤍 .

- البنيه من تشتغل بمكان .

تره هيه الها ظروفها واسبابها الخاصة تلكاها كاعد تساند اهلها بمعيشتهم لأن حالتهم مساعد واگو مزوجات ويساعدون ازواجهم بالمعيشه واكو يشتغلن وزوجها كاعد بالبيت وهيه صايره
المره والرجال بنفس الوقت يعني مو معناها من تشوف بنيه تشتغل بمحل تحاول تصير شارو خان وتكوم تغمز لو تنطي تلميحات
وتكلهم لجماعتك شوفوا هاي البنيه شلون راح اطب ازحفلها وانته افرغ منك ماكو ومتكلبك لا انته ولا عشره مثلك ! هذني بنات يشتغلن بشرف من الصبح لليل علمود العيشه
مو تجي انته الى امك تصرف عليك تحاول تتحرش بيها لو شوف شتسوي من حركات اذا تدور على بنات رخيصات اکو الف مکان بي رخيصات مثلك بس هاي بنت عالم ومتربيه لان هاي البنت ممكن تكون اختي او اختك
امي او امك ابتعد عنها انته وحركاتك مال المراهقه

لان هذني السوالف مو من شيم الرجال 🖤.

- سؤال ذَكي .

اكو ثلاثة طيور على شجرة، قرر واحد منهم يطير، شكم عصفور بقى على الشجرة؟

راح يتوارد طبيعيًا بذهنك أنُ راح يبقى عصفورين، لكن منطقيًا الجواب الحقيقي هو" بقن ثلاثة على الشجرة".
لأن واحد منهم قَرر أن يطير وما طار فعلًا، بالتالي ماتغير اي شي.
وهنا اسأل نَفسك، شكم مره قررت تسوي شي وماسويته ؟
ويبقى حالك نفس الحال
ويسوء اكثر يمكن الإنسان ما راح يمتلك شي من لاشيء، ألا يسعى بالعَمل الجاد .

وتذكر دائمًا مني
"أنَهُ ليسَ كافيًا أن تَتمنى أو تَرسُم أو تَكتُب اهدافًا لنفسِكَ، إنما يَجب عَليكَ أن تَسعى"

والتوفيق للجميع 🖤.

- بعض الناس .
من تسأله شنو رأيك بالمطلقة ؟
يكون جوابه لو بيها خير مجان اطلقت لكن اذا اخته مطلقة وتسأله ليش اطلقت ؟
حيكون جوابه ( صوج الرجال ساقط ) واصلا احنا ما ادري شلون انطينا بنتنا ويطلع الف عذر وحجة لأخته كذالك من تسأله شنو رأيك بالمتعة ؟
حيجاوبك ( حلال شرعا ويحاول يدعم كلامه بعده أيات ملفقة ) ومن تجي للحقيقه وتسأله تقبلها ع اختك هذا الشي ؟
راح يعصب ويضوج منك .
ما لا ترضاه على عرضك لا ترضاه على اعراض الناس 🖤 .

- ماكو بنيه احلى من بنيه !

كل بنيه الها صفاتها الخاصه السمره ، البيضه الحنطاويه، كل وحده بيها جمالها مو بشكلها بروحها الداخليه من تتعرف عليها وتعرف شنو تحب وشنو تكره شنو تصرفاتها
راح تحبها بدون شكلها لان الروح تجذب الروح
المقابيلها بدون تصنع وهالتفاصيل الممله راح تحب عقلها الواعي والفاهم وتحب هدوئها ونزاکتها وطريقة تفكيرها الحلوه .
وشغلة انو بنيه تغار من بنيه لان احلى منها
انشالت من زمان هسه وحده تحب الثانيه
وحده تتغزل بثانيه لان كل وحده والها جمالها
وشكلها الخاص الي يمزيها عن غيرها .
والغيره تصير بس بعلاقات الحب والصداقه
وهلشي من حقها ملكها ومتحب احد
يتقرب عليه مغارت من شكلج الجميل 🖤.

ﭼـان قبل البنات بلمنطقه يجمعن ويلعبن شده يا ورد شده لو يرسمن توكي بلحجاره البيضت لو بلطباشير وجان الاهل لا يراقبون ولا يهتمون لين جانت الدنيا بامان حتلو بناتهم يلعبون وي ولد جنه قبل نلعب سوا ولد وبنات ومحد يحجي ولا احد يسوي حجايه هسه وين ايام النيه الصافيه راحت 🖤.