786/110
એક સાદિક નબી એક સાદિક ઇમામ, બોલવું બેઉનું એક જેવું જ છે
મુસ્તફાનું અને જાફરે આલનું, જગ મહીં આવવું એક જેવું જ છે
એક અવ્વલ મોહંમદ છે માઅસૂમમાં, એક ઔસત મોહંમદ છે તર્તીબમાં
ઊઠવું બેસવું હાલવું ચાલવું, બેઉનું આ બધું એક જેવું જ છે
આને મેઅરાજવાળા મોહંમદ કહો, એકને સાદિકે આલે અહમદ કહો
બંને જીવન તરફ એક નજર તો કરો, આગલું પાછલું એક જેવું જ છે
જ્યારે હુલિયા મુબારક પઢયું છે અમે, બેઉની હર અદા દિલમાં દેખાઈ ગઈ
બેઉના હાથ પગ આંગળી ને ખભા, આંખ મોઢું ગળું એક જેવું જ છે
એકે સંઘર્ષથી દીન સ્થાપી દીધો, એકે મહેનત કરી એની તબ્લીગમાં
વર્ષ ત્રેસઠ વિતાવ્યા છે બન્ને જણે, બેઉનું આયખું એક જેવું જ છે
એક છે મીમથી, એક છે જીમથી, બેઉના નામમાં હર્ફ છે ચાર ચાર
જાણે રજ્અત થઈ મુસ્તફાની પછી, બેઉનું જીવવું એક જેવું જ છે
એકે શરીઅત દીધી દીને ઇસ્લામની, એકે સમજાવી એને સરળ રીતથી
બેવે કાયમ કર્યું દીને ઇસ્લામમાં, ફિક્હનું માળખું એક જેવું જ છે
બંને માઅસૂમના દીકરાઓ અહીં, મોત પામી ગયા બાપના જીવતા
આઝમાઇશમાં બંને ખરા ઊતર્યા, બેઉનું કાળજું એક જેવું જ છે
એકની સેવા જિબ્રીલ કરતા હતા, એકના ગુણ ફરિશ્તાઓ ગાતા હતા
બેઉંને રબથી ખિદમતગુઝારી મહીં, મોટું ટોળું મળ્યું એક જેવું જ છે
એકનો મોઅજિઝો એનો સલમાન છે, એકનો મોઅજિઝો ઇબ્ને હૈયાન છે
બેઉના દરથી સૌ મર્તબા લઈ ગયા, બેઉનું આંગણું એક જેવું જ છે
ઇલ્મ અખ્લાક તબ્લીગે ઇસ્લામથી, દોસ્ત દુશ્મનના દિલ બેવે જીતી લીધા
થઈ ફના ફી ઇલાહી બકા લઈ ગયા, બેવે જીવન જીવ્યું એક જેવું જ છે
આ કહે, ચાંદના ભાગલા થઈ જશે, આ કહે ચૂલે હારૂન કૂદી પડે
બેઉને સઘળી ખાલિકની મખ્લૂકનું તૂટીને ચાહવું એક જેવું જ છે
એકનો દીકરો હક બચાવી ગયો, એકનો પૌત્ર એ હકને ફેલાવશે
બેઉની આલનું જગ મહીં ઝુલ્મની સામે ઊભા થવું એક જેવું જ છે
એકના માથે છાયો કરે વાદળો, એકના હુકમે વરસી જતે વાદળો
હુજ્જતે કિબ્રિયાની ઇતાઅત મહીં, રહેતું હર વાદળું એક જેવું જ છે
બેઉ આરામમાં છે મદીના મહીં, અય "અલિફ" એકસરખા છે બંને સખી
રબ શફાઅત કબૂલે છે બન્નેવની, બેઉનું ત્યાં ગજું એક જેવું જ છે
૨૧/૦૯/૨૦૨૪
શનિવાર
૦૮:૫૦ AM