حنوش الحسيني

ها يثلثين الأحبهن
والأذمهن
والولني.
ها ولك شح شوف خلگي
وفاض صبري وهم چتلني.
علمتني اعله القصايد
چنه نقراهن سويه
وچنه نطرب
ليش هسه لوحدي اغني.
وليش ما گتلي من الأول
ليش ترسملي طريج الموش أليه
غالطت روحي بمحبتك
والوجل سلمته ذمة
وما لعب گلبي الــ لعبتك
چان كلش صافي نية.
ويافشلتي گبال المراية شكبرها
شلون احط بعيوني عيني.
شلون ادليك اعله كلهن
واخذ من الروح وانطي
وهسه من داعتني حاير
بيش اسد للروح ديني.
واني گتلك
حظي من يشدلي حيله
يجيب گرصة وويني وين الغرام.
وگتلي بس خل بيدي گلبك
ودي احبك
وارد اعوضك عن عجافك
وافرش بحضنك وانام.
وسولفتلك گبلك شصار بدليلي
وگتلي مو كلهن سوية.
وصدگيتك وامحلت بأول محطة
وخوفي رد يركض عليه.
وخل ابشرك
عضعضيت الطال بيهن
بعد ما تغلبني اديه .
.
.

#ومالها_غيرالله

مو وكت فركه بعد كلش وكت
شبيك مستعجل على فراكي شجاك
وياك احس بالدنيه اذا يمي بقيت
ومن تروح الدنيه تاخذهه معاك
وين رايح ارجع الجمني تعال
وانه الجم روحي اكللهم حشاك
بحركه اخلصنه النهار ويبدي ليل
واحرك بروحي اذا مرني هواك
النهار بحركه اخلصه وبدي ليلي
بحركه بروحي صارت وبدليلي
دليل عليك عندي وبدليلي
سهم منك يبرهن خنت بيه
وكلهم موش سهمك ونكر الناس
ولك وانه الضهر متروس طعنات
عوف الماضي لتذكرني ارجوك
مااكدر اسولف يمي شمات
تريد ابيش اذكرك بيش احاجيك
بطعناتك الجدد بالقديمات
بهجرك بالتكبر بالغرور ابيش
عشره وخلصتهه وياك مآسات
دمعي بعيني بس ماريدك تشوف
من تفوت البس عيني ضحكات
ودفتر ذكرياتي وياك مليان
خناجر من اذكرك انترس طعنات
وما فادت وياك وتالي مليت
عفتك لله هوا يعوض الفات

بيني وبين نفسي
افكر بيك
واگول اشمعنى انت.. الشاغل اضنوني

مو اول عشگ خاطر
تشل الحال
ولا اول جمال اتشوفك.. عيوني
****
شجاها الروح
يمك ذبت الاسرار
وليش ارجف عليك ..وينخطف لوني

وحتى الناس
گامت تعرف بهل الحال
وما اعرف.., شگلهم من يسألوني

يطبون بصفنتي
وعنك ايدورون
ويلگوني افكر بيك... يلگوني
****
وصاحت كلها صاحت
هذا هذا فلان
وما عندي لگوك.. وبيك تهموني
**
تهموني
بمحبتك والله لو يدرون
على ضيم العلي.. ايضل يواسوني
****
ما يدرون عايفني
بمهب الريح
وانه وياك.. عفت الما يعوفوني
****
يحبوني اشكثر
والجيتي ايتانون
واخجل من كثر ما گام... يتنوني

وانت الما تحبني
اشلون بالله وياك
امرن بيك...، ما امر باليحبوني
****
عفت الي شروني
ومن ارد اشلون
هم اسوة بعد... والنوب يشروني

حبيتك شجاني
وما حسبت احساب
خيعونك علي... مو انة خيعوني
****
متحبني.. واحبك..
والمصيبة انوب
اريدك وانهزم.. من اليريدون
****
ومن دونك صرت
ما اعيش وي الناس
وانت بكل سعاده... تعيش من دوني

باحزانك
اودي دموعي تبچي وياك
وبافراحك
ابد ماتذكر اسنوني
****
من سمعو اهلنة
العشگ دگ الباب
ما خلوك اهلك ...واهلي خلوني

ما خلوك اهلك
حگهم يخافون
بس اهلي المحبتك ..شلع باعوني

-

ناصر البدري
#محراب__القصايد




ماسامـحك . . .

معاتب الـويـنك يـغثني

عـودتني ،، أشتـم رگـبتك لآخـر ولايـات ريـتي

وعـلمتني ،، كـل وطن أشطـب عله أسـمه

بـحجـة عيونـك هويـتي

لـيش عـفت العطش يتـشلـبه أعله خصرك

وأنـه گـتلك . . .

يأمـه گـتلك . . .

يـاكـمر حضني چـبير
لا تـبات أعله الشـواطـي

الشمـع مايسترلـه شـامه آبـين سرداب الـعبي

تـيـهتني وانـه عـبدك
مـنين أدبـرلي محمد يـشـتريـني

طـفحت الـغربه أعله گلبي
ورگـض مابـين الـصور رگـضت دخـيل

يافـضيحه الـماتسدهـه عيون خير
شـايـل أهلالـي أعله مـتني
اوگـف أتـوسـل سمـاك

عازتـك خلـت سمـاري
يسـجد الـ كلشي حضن

ديـر وجهك
وسـگي ضويـاتي يـنـفـنوف الـشمس

بـغيبـة عـيونك
صدك حسيت بي هـيبه السجن

كـل الـولايـات فـرغة من مـشيت
أنتـه يا أول بـنادم چـانت عـيونـه شعب

يـاحبيبي . . .
حـزنك يـغرگ الـمناير
من يـمر مـوسـم نـشد
منين أجيـب إلـهـه رسول أمـة وحشتك

يـاحبيبي . . .
الـغنه ياخذني أعله بـابك ووگـف بهيئـة سـعف

يـاحبيبي . . .
نـامت الـناس بعـشگها
وأنـه وعيوني الـغريبه تـايـهـين بـليل حـزنك

يـاهو يـندلـني بـغربـتك
ساجن شمـوسي حـدر في الگصايب

شـاهد الله . . .
الـعشك لـو يـقره الـنوايـه
چـان شگـگ منـك أولايـة رسايـل

يـبست بـيه حلم يسـوه الـخضار

شـما أصد لـولايـتك تـعتـگ رسـومي

ولـگه عمري

رزق مگـتوب الـدگـاگـين الـندم


مـرني حنـيـني بـسمارك
الـنهر يتـحنـه بـشبابـه من تمر زفـة نوارس

فـاهيه چفوفي أمـنهد ذاك الـمگاود

أنـه و أنتـه . . .
شمعـه فـوگ الـكمر چنـه

ومـن تطـفي ضويـات الـمدينه
نشـعل الـضلمـه بعـشگنـه

ماكـو منـك . . .
ولاكـو منـك . . .

ويـن اكـو بنـادم عله زنـوده محطات الـندى

چـانت أرسومـك تـكد أعله النفـس
وچان صدري يـستراح بـضحگـه منـك

جيـسني
وشـدني بـقميصك يـاضريح الـراقصات
الـعمر لـو شـح الـيگـوده يـموت فـاهي

أخـلاف وجهـك
صبخـه صارت گـاع روحي
وشـبحـة عيـون الـسنابـل و الـگطـه

ومـارسـه للـحنطـه لـون . . .

گـافي تـنذرني متـن لـهل الـبيارغ

مـالي حيـلك . . .
لا أنتـه معـبرني من لـيل الـمحنـه
ولانـي مستـاهدلي ريـل يسافر الـباجر شـمس

ويـن ماصـح سچـه تفضـحني صـورك
مـدري يـاهو الـشمر بيـه سـر حمد

كـون ماخذ ديرتـك چـا ويـن أعيـش

الـمايشد شوفـه بگصيـبه
أتـفـحط عيـونـه الأغاني
ويگـضي عمـره بـلا هـويه ولا وطـن

يـاغريب الـگال محـراب الـقصايد مايـشور

يـاحريمـه ،،
وتـايبين ،،
وحاسبينـك ،،

ذنـي ذمـه بـكل منـاره
ذني تـاريخ بسمـاوت الـعشگ

وأنتـه أول عشگ تـارسني حزن ماسامـحك !

من اولها لو قاريني بس مشغول
ما شفت ال علسطر وال على غلافي
متغير صدك بس مو بهاليومين
خليت المعاتب والجرح خافي
من شفتك تجي بلا واهس واضطريت
اضم كل السوالف واقفل شفافي
انه اتغيرت من كمت اميل الناس
ادور شوفتك واكف علطرافي
من جانت ضحكتك كوه تطلع جان
خلكك مال واحد نيته يجافي
من صارت اسرارك يمي ما تنكال
واتدنت لصوتك وادم خلافي
من ظل موعدك ينسى وتالي تكول
اي والله نسيتك بالي مو صافي
من كتلك تره انه بخاطري وتانيت
دمعك حتىاكول مسامح وعافي
جا لو فازع لدخانة المحروك
لوما منتظر ينكالك طافي
بعدما رافكه الذاكرته تغدر بي
ولا صديتله المايعرف يوافي
منك وانتهت للكيش حد خليت
لو يغمك بعد لو يترك ضفافي
انا مدليك بيه وفاكلك بيبان
مادليت بيها البلحلم غافي
جنت ابحرلك بلا بواصلة ولا ريح
لا للموج راي ولا لمجذافي
جا ما لحت ضيي بدون ما عليك
كلب ذاك ليلك بي شرح وافي
فارشلك ورد تحتمي جدامك بي
عن لا تنجرح بخشونه جتافي
بعذر ما يشتعل ما ظل بعد بردان
خليني بجرح لكن جرح دافي
ما ريد الحروف الما بنصهن روح
اجل اليعتذر كون العذر شافي
كبل حتى الزعل وامه بذروته الكاك
تتقمص زعلتي وتاخد اوصافي
واراضيك بعذر من باب اخسرك خاف
هسه من ارد اربحك اخسر انصافي
اسمك يمكن وما قاطعك بس راح
اكو واحد بكلبي يصيحلك كافي

حنوش الحسيني pinned «مامرتاح عيوني تستحي بس الدموع اوكاح مامرتاح منٌك منٌي من الجاي من الراح مامرتاح عركه وي الزمن ورجعنه مكسورين وبعيده المسافه وينسي اللي طاح مامرتاح لأن شفت الشمس نزلت تبوس الكاع وبجف الطفل تنلاح ولأن قاضي البلابل مدد التوقيف ومفتوحه السما والفيل عنده جناح مامرتاح…»

على غصن انتظارك ريح ما هديت*
وزرعت الميل بيه وخضرت دكته*
انت العلمتني شلون افك ذرعان*
بلملكه الموادع ما تعلمته*
من يكبر فراغك صدري جان يضيك*
وانه البد بعطرك ما تنفسته*
واكدر بلضوه بس ما رهم وياك*
وعلى كد الشمس ملكاك فصلته*
وافك نشاب صدري لكل سهم بي روح*
واكفر بلحنين الما اجه بوكته*
الترس راسي بغيابك ريحت البارود*
ساتر والرصاص يخيط بكصته*
طفه وجهي بخيالك لو بعد موجود*
من نجمه على نجمه اليل ورثته*
المطر يوكع مغمض والتراب يشوف*
ما بللت وجهي وسافرت سكته*
مو ما شفت وجهك ما شفت مكفاك*
شمد ايدي وكفاف بعيني ما لحته*
ينسمه وسافرت يم ناس مخنوكين*
الهوه ضيك عليهم وانت كبرته*

صوت وحلم
غربه الوطن .. مَر بـ النواطير
ليل وگمر
برد الحزن .. غَنّه التصاوير

جسنه الليالي بغربتك گمره وعرس
ودَّينه طولك للسهر صوغه مّن أمس

نتذكّرك وكت المواويل
نشتاگلك لو جاسنه اليل

آخ العمر
ثاري العمر .. غث النواعير
چف النهر
شال النهر .. ونطه البساتين
حنّه وشمع
گبل الدمع .. ضحك الروازين

ما ندري عمرك ينطفي بثوب السفر
شفناك شهگة عافيه بروج انكسر

لو تدري بينه شگد بچيناك
يمكن ترد وتجيبنة وياك

يمكن ترد
بس الورد .. عاف السنادين
طيف الصبح
روجة حزن .. تتعده لليل
گلب الشعب
فزة خصر .. دم المچاتيل

بعيونه اتنام الرسايل عـ المطر
بعيونه يغفه التعب فوگ الصور

بلكت تمر خمره بحضن كاس
ونسولفك للعيد .. و الناس

بلكت تمر
ما ظل صبر .. ومخلّص الحيل
طول الصده
بجفن النده .. يدوّر والغياب
حزن الفجر
بچّه العمر .. والمامش احباب

هنيالنه انتانيك غبشه مّن الوطن
هنيالك اعله عيونّه المنّك بچن

شيصير لو ضحكة فلاليح
گبل الهلا اعله شفافنه اتطيح

نجمه العصر
فرحة عطر .. والواهس اعتاب
خلگ الشته
ارموش الجفه .. وتراب نهران
لاح الغنه
وطاح الغنه .. اعله الگاع بردان

من ليل اصابيعك مشه اجنازه الندم
من سفرة القداح صوتين انلچم

كون المشه ويه الروح نلكاه
ونزيحه خافن توجعه الـ آه

نبچي شكثر
وانته شكثر .. بعيونه انسان

..
..

#الشاعر_جداً..
(عزيز عسكر)💚

حبيتك وما ردت اخسرك لان ما خذ مكان بكلبي
وعيونك اني انسحب واترك حياتك لوشفت واحد يحبك كدي
جا هو مو هيج العشك
من توصل الاخر درب تنهي العلاقه وي الشخص
ماتنترك من تبدي
شنهو الجنيته من العشك غير العيون تندي
هاي النتايج من احب تاليها اضل لوحدي
فترت الساعة ولا مفر
وايام كمت اكبر واحس بالشيب يمشي بزوده
وجان ميهمه العشك من يمشي جن يمشي جبل
صارتلي تجوه العوده
وايامنه البيهن ضحك جني اعله بالي الليله
لك انته عايفلك بشر من يرجع وكله تعب
ينتظرك بكل حيله

مصطفى الخزاعي

هذاك أنتَ المشى بـ لونه سمار اوداع ..
وهذاك أنت العزيز الماي وجهه الگاع ..
وهذاك أنت عشت نبتة انقرت عاگول
ما ﭼـن منشتل نعناع ..
وكلمن سافر بـ نيته ..
واليعبر شواطي الليل ..ياخذله وجه وي طبگة عيونه يفز اشراع ..
وجه ما غِيرت ارسومه نوايا الگاع ..
وجهك منشتل بيه شتل گمرة ..
لمض عالمنجل الينطر شتا سواليفنا الخضرة ..
يا بيدر ضحك عذري تبده بشفة السمرة
يالحزنك عمر نخلة عراقية عشت فيّ ومتت جمرة ..
يواهس مستحة عيوني شربني النوم
عطش للما حضى بگدره ..
عطش يالمستحة عيونك مري احديثات
قريت الجايب سنيني ..
شما طاريك يذبل ..اشوفه يورّد بعيني ..
وشما تبرد اشفافي اعلى فيّ ضحكة ..
افز واذكر دفو ونيني ..
وأمطرلك بگايا الناس البروحي ..
عسى تجيبك بواﭼـينا ..
وعسى يلالي التعب نجمة بمحاﭼـينا ..
وتگول الناس ماله..
شما عبر گيظه تخضر ساجية بعينه ..
ما يدرون ..
ما يدرون من جان العمر لـچمة توضينا بغناوينا ..
ولا يدرون من جان الزعل نجمة ..
تسامرنا بروازينه ..
جانت تزغر الگمرة بسواجينا ..
وﭼـانت تندهّ الغبشة مساحينا ..
وﭼـان الزعل من يجزي ..
نعرف لذة بواﭼـينا ..
وگلتلي الموت مهرة .. اتفرزن الخيّال لو تاهت نياشينه ..
وگلتلي نعيش والدنيا قصيدة غيم لليغفو الصحو بعينه ..
وگلتلي الما يحب الناس بس الريح
والعاگول ينحر صحرة سنينه ..

مامرتاح
عيوني تستحي بس الدموع اوكاح
مامرتاح
منٌك
منٌي
من الجاي من الراح
مامرتاح
عركه وي الزمن ورجعنه مكسورين
وبعيده المسافه وينسي اللي طاح
مامرتاح
لأن شفت الشمس نزلت تبوس الكاع
وبجف الطفل تنلاح
ولأن قاضي البلابل مدد التوقيف
ومفتوحه السما
والفيل عنده جناح
مامرتاح
لأن قفل المحبه إنباك
وترهم عليه مفتاح
مامرتاح
متروك بجزيره وتيهت بالليل
واجو ربعي عليه بقافلة اشباح
وانت اشبيك!!
لمن دافعت عن نفسي صابك غيض
مو حتى الكنافذ من تحس بالخوف
تستخدم جلدها سلاح
مامرتاح من ربعي ولامرتاح
تمساح بنهرهم صاحوا من الخوف
وجازفت بحياتي من سمعت اصياح
صارعت المنيه وبيده هزني الموت
ومدمى اطلعت
صفكوا للتمساح
كل هذا وتريد ارتاح
مامرتاح
ولا جن الفجر مثل الفجر محبوب
لون الفجر صاير يقبض الارواح
رجعت الستاره بحركه عالشباج
ورثيت الورد وبجيت
من شفت الندى فوك المدافع طاح
قل شوف السفينة والضباب يزيد
وسيوف الملامه بجلوة الملاح
ياسن الصخر وتكسرت بالروج
مو كنت بزمانك ترهب السفان
مامرتاح من ربعي ولامرتاح
نادووني وركضت ابليل
ايد الرسن بيها وايد بيها سلاح
عثرت مهرتي وربعي قبل ما طيح
واحد كًال للثاني:
ابشرك طاح
ابشرك طاح

كالو طاح .........كتلهم فلايرتاح

وماترتاح… لأن سدَّيت اذانك من ضميرك صاح

وهي مزنه… ثجيله أو عاصفه أو حالوب

يريد لهن سكف مصبوب موش ألواح

ريح امسودنة بيهَ المعمرة أتطيح… ونته أعواد حلفه أمنيلك سباح

جان الريح شامل والغثيث أيضيع… بس من صفه الحاصل شالك المرواح

بالزرع الجثير أيشيه شوف العين… والنبته الخبيثه أتفوت عالفلاح

ما ترتاح.. من هاج البحر وابعد علينه الكَيش.....

غادرت السفينه أو خنت بالملّاح

أو حشَّمت العواصف والمطر والروج…لذكرت الربه او لاكلت بيه أرواح

صحبة عمر جانت والعمر دربين… أشو باوَّل الخطوة أو ماي وجهك طاح

بدلت الاكلوب الجانت اتهم بيك بمسامر لواكة وليل مغنه وراح

ولميت العفن والسكط والممروض وخاويت الوذر والزفر واللفاح

أو من هاجت الدنيه أوزره أوياك الحال… غطَّوا روسهم والداح منهم داح

ماترتاح ماطول الشمس كل يوم تلبس ثوب وتلاعب النسمه الرازقي الفواح

ماطول الخبز والملح بيه ناموس وارواح البشر عد البشر ترتاح

ما ترتاح… لأن ندبه أبضميرك والجبيل أبخيت والشاره التحركَك عمر ما تنزاح

ماترتاح ماترتاح

عمرك البوم وصور
صورة حلوة
وصورة مرة

الحلوة موقف
المرة موقف ..
والمواقف بالنهاية تصير ذكرى

من تگلب هذا الالبوم بضميرك
موقف تشوفه وتگلبه
وموقف يذكرك بجرحك
وجرحك يذكرك بموقف ما تذكره

وموقف ينزل دمعتك
تغمض وتعبر الصورة وما تعبره

ومن يخلّص هذا الألبوم السخيف
تحاجي روحك
تشوف اصابيعك وتحسب بيها ناسك
وين ناسك ؟
تنصدم
تبجي، تضحك ، تنهزم

ترجع تلم المواقف كلها بيدك
تحچي وي ايدك ...نسامح ؟... ننتقم ؟

ايدك تگلك عليمن هاي ناسك ناس بس..
بس بالاسم

تلم ملامح وجهك من الصورة الاولى
تنفض تراب العمر تنفخها حيل
تحطها بالصورة الاخيرة وتبتسم

تكتشف هاي المسافة البينهن جانت مواقف مو صور

تكتشف هاي المسافة البينهن جانت حلم

جانت وهم

عقيل العرد

يضل بلونه المعدل
ما تتغير الوانه

ما دام الجذر بي روح
خل تأمن اغصانه

يجي يوم وضحكتي تفوح
بوجه الزمن واحزانه

و الف حزني بكزازة خوف
واشمره بنهر مامعروف تاليته
واشخبط فوك عنوانه

واذا سود هدومي البين
اضل ابيض هذاك انه

عقيل العرد

عشت عمري نبع طيبه
ورموشي قلق ذيبة

لا ماخذ متاع العمر لسنيني
العفتهن

لا عشت مرتاح
ومسافر عفت عمري ومتاعي
وما خذت غيبة

وعشت عمري غصن والطير بأحضاني

والچيلة الخطت طير الغصن لاحت

اي والله
الغصن كلشي خطه يصيبه

وغريب احجي
وغريب ابجي

هاي الناس ما تدري الغريب شلون
ياحسبه التودي جروحه للمذبح
ويا حسبة ومصيبة بمذبح تجيبه

ونكتب من گلبنا وناسنا تفسر
هذا يكول نصاري .. وهذاك يكول تجليبة

وطاح حظ الوكت لو وكته ميجيبه

وطاح حظ الوطن لو ضاعت اولاده بمصيبة .. وعاش بمصيبة

وطاح حظ القرا جروحه
ونسى جروحي
ورجع يترس جيوبي جروح
وما ضامن وراها شينترس جيبه

وطاحظكم ...زلم عشتوا المذلة شراع
وجرفكم ممتلي من الخوف والخيبة

طاحظكم صدك
والمو صدك ينگال

بس ماگول صدگي ... الناس تتشمت

الصدگ يگتل

اگوله بگلبي واكتل گلبي واحچيله

مرات الصدك چيلة

عقيل العرد

ينشد الما يدري بيه
شبيها روحه تغيب وي المغربية

شبيها نظراته وضحكته تغيرت مو الاولية

شبيها عينه الوكت ماليها عتاب وخوف و احزان واذيه

ليش ياهو العاش عمري
وشاف چم جمرة شلتها بهاي اديه

ليش ياهو الذبح روحه
وانطه روحه
ويعرف الچتال والمچتول ما يسواش ديه

عمي بس عوفوني اعيش براحتي
وهنه البقن وياي مو مثل المضن
سنه سنتين واموت وهاي هي

تعبت كل اليحبوني وتعبت من الاحبهم
انه ما مقسوملي ارتاح واعيش

الدنيا لأهل الفرح وانه
انه خط روحه الحزن بچفوف اديه

خلصت اعذاري وطبگته الباب ذاك
و كمت اعوفه براحته اليزعل عليه

عقيل العرد

سنيني عشتها بشرف
والوكت ما يستحي

وي روحي اعيش الحزن
وللناس اعيش اريحي

افراحي ورقه بنهر
شگگها روج القهر

وحزني ختم سومري
ويه الزمن ما ينمحي

عقيل العرد

عايش عكس ما ردت
والعمر ساعة رمل
والدنيا بس مرة

تعبان چان الگلب
عطشان يركض عمر ما خلصت الصحرا

ومن وصل ماي البحر
ذب روحه كل قوته
ما يدري جوا البحر
يا موت ينتظره

وبين العطش والغرگ
صار القهر سفرة

بالحايط ارسم زعل
وي گلبك وانصدم

ومن گلبي احطلك گلب
چا گلبك شكبره ؟

نصين صرت انثلم
لا واقعي ولا حلم
ومن كلشي صرت انهزم
بس روحي منتصرة

وبنص سواد العمر
فاتح ممر للضوه
بس الشمس سمرة

من تنهي ليل القهر
دگ اعله خدك گمر
لا تطلع اسود وجه
من تخلص العشرة

عقيل العرد

اتحداك ننزل بالوحل ونشوف
ياهو اليندمر .. ياهو اليضل صافي

انا الزيبگ الغالي الما يدمره الطين
يا ناگص المعدن معدنك طافي

شلتك على چتافي من الوحل للغيم
ما حسبت باچر تلثگ چتافي

لا تفگس عيونك بيدك يذلوك
وتنگاد من اديك اردود يالهافي

نمت بفراشك وجانت الدنيا سيوف
ولگيتك من گضت ويه العهر غافي

انا لو حار واچوي لو أضل بردان
حيل اكره اصحاب الموقف الدافي

الرجل موقف .. الموقف دين يرجع كون
وانا مغرگك مواقف .. ما كلت كافي

انصحك لا تزايد بالشرف وياي
كلش توجعك رفسة المتعافي

ولا تنغر المنصب ما يكبر انسان
ترى المنصب نعال وآنه مو حافي
..............
عقيل العرد

هو ياهو اليدري بيك
صعد سعرك ..
نزل سعرك
انت محد يشتريك

تبجي .. تضحك
توگع بدربك.. تكوم
تصيح افزعوا
ياهو يفزعلك ؟
وياهو اليعتنيك ؟

انت محبس ذهب ضايع من هلك

اهلك موصين سوك الذهب كله وما لكوك

وانت ما ضايع ..
هذاك انت ذهب فوك المنارة

مبين ومحد يجيك

انت ما ضايع ابد
انت هذاك

حتى الاعمى يشوفك ويبجي عليك

وما لكوك

انت ذنبك مشتريهم كلهم .. وكلهم نسوك


عقيل العرد