التحليل الماضي تحقق بالملي، ذكرنا ان اخر منطقة بزورها السعر هي 38 وبالضبط صار هالشي، وذكرنا ان السعر بيمشي عرضي وبعدها ايجابية بشكل قوي وحددنا هدف 52..
الآن توقعي للحركة هي زيارة منطقة 48900 وبعدها صعود للآعلي يستهدف 55-60 وممكن حتى قمة جديدة (لكن هذا الموضوع بنتاكد منه اكثر بعد منطقة 60K
نصيحة لك من شخص استغل كثير من وقته باسواق المال! اذا تحب تستفيد اقرآ لاخر سطر
قبل ماتيآس من السوق بسبب خسارتك اكثر من ربحك اجلس مع نفسك وفكر ايش سبب خسارتك!
اتوقع سبب خسارة الاغلبية عدم الانضباط والتحكم النفسي، ممكن تتوقع انك انسان منضبط لكن بالحقيقة الانضباط يحتوى على كثير اشياء بداخله.. هل انت بالاصل انسان منضبط بباقي امور حياتك! تسجل ملاحظات بعملك مثلاً! تكون دايماً على الموعد! ادارتك المالية كيف! تصرف فلوسك على ايش وغيره! اذا لاء كيف تتوقع انك تكون منضبط بالسوق!
اي رجل اعمال او انسان ناجح مالياً خسارته بالسوق لن تقارن بخسارة موظف وهالشي بسبب اختلاف طريقة التفكير، وممكن يحقق ارباح فقط بسبب طريقة تفكيره مع انه خبرته قليلة لكن ادارته المالية ممتازة 👌
لذلك نصيحتي لك، - جهز معك ورقة وقلم، واكتب خطتك بالتداول واهدافك ودون كل تداولاتك وارجع لها، هل كنت انسان منضبط واللي كتبته سويته! او حاولت انك تسويه لكن الوضع كان مختلف عن ماتوقعت!! سجل كل شيء حتى تعرف الايجابيات والسلبيات وتعرف مكانك وين بالسوق بالضبط! كرر الايجابيات ابعد عن السلبيات..
-اذا انت ما تدخل صفقات من نفسك! سجل عندك اسماء الحسابات اللي يعجبك طريقتهم بالتداول، وادخل معهم صفقات وسجل مع مين استفدت اكثر شي. وابدآ اتبعه اكثر والغي البقية لانه بكون مجرد تشتيت لك.. وبنفس الوقت استمر بالتعلم بشكل يومي عن السوق(مشاهدة فيديوهات، مقالات وكتب لان التويتر مابعلمك). بتوصل ليوم تقدر تعتمد فيه على نفسك.. ولا تنسى تشوف تشارت العملة اللي بتدخلها او دخلتها، هالشي مع الوقت بيعطيك تنبؤالايجابية من السلبية، السوق يكرر نفسه👍
الورقة والقلم لا تفارقك بالسوق..
اما موضوع انك ترسل فلوس للمنصة وتتمنى تجيك ضربة الحظ وتصير غني بفترة قصيرة وبدون جهد ف انسى هذا الموضوع، واذا ما تبي تغير طريقة تفكيرك هذه انصحك تخرج من السوق لانه بكون خسارة لفلوسك ولنفسيتك.
خذ الموضوع بجدبة ولا تتساهل فيه
معلومة عني: عندي ملف فيه صور تشارتات جميع صفقاتي الرابحة والخاسرة، وكاتب فيه سبب دخولي بالعملة،وعند نجاح الصفقة اكتب سبب نجاحها وسبب الفشل وايش كان لازم افكر وقت شفت التشارت!
لو تسوي هالطريقة انت بعد بتكون سويت لنفسك كتاب بيفيدك جداً بعد سنوات..