سلام عليكم يا دكاترة يارب تكونوا بخير❤️ وتكون اجازة سعيدة كدا عليكوا مع انها خلصت بسرعة😂
والله وحشتوني جدا جدا فوق ما تتصوروا❤️ وانبسطت اوي من اللي سأل عليا في الاجازة وطلب مني نصايح يعمل اي ويستغلها ازاي وفي ناس انا شفتها بتنزل المستشفي تتدرب وعلمتها كمان وبقيت بتابعها بنفسي
انتو دفعة مميزة وربنا يعلم انا سعيد جدا اني اتعاملت معاكوا والله🥰❤️ ربنا يوفقكوا دايما يارب ويجعله عام دراسي سعيد عليكوا ان شاء الله ❤️
في كذا حاجة كدا محتاج اتناقش فيها معاكوا واوضحها
كذا حاجة تخص شغلي وكذا نصيحة ليكوا عشان انتو اخواتي الصغيرين
اول حاجة انا احتمال كبير مشتغلش معاكوا الترم دا للاسف عشان كان حد باعت علي صراحة بيسأل علي الموديولات اللي هشرحها وكدا
طب لي يا دكتر ؟
عشان انا خلاص قدامي شهرين ونص واتخرج رسمي والفترة الجاية هتبقي تقيلة جدا بالنسبالي ومحتاجة كل تركيزي وكمان حفلة التخرج وتحضيراتها عقبالكوا كدا كلكوا يارب
وتاني حاجة عشان قدر الله ما شاء فعل اتصابت وانا بلعب كورة 😂 وجالي shoulder dislocation لكن الحمدلله عدت علي خير
فانا لو قدرت اعمل حاجة الفترة الجاية هتكون اني اساعد زمايلنا واخواتنا المغتربين عشان اللي متوفقش في الدرجات وهيعيد السنة للاسف 💔 عدد كبير هيعيد اولي ابقوا ادعولهم يا شباب عشان نفسيتهم وحشة اوي والمفروض نكون حاسين بيهم
نصيحتي ليكو بقا انكوا تتعلموا من اخطاء السنة اللي عدت وتحسنوا من ادائكوا ومذاكرتكوا وتجددوا النية وتستعينوا بالله
وحاجة مهمة كمان ، احفظوا قرآن خلال فترة الكلية ، اعرف ناس من اول ما دخلت اولي لغاية ما خلصت خامسة وهي بتحفظ ما شاءالله الله دلوقت ختموا واتقنوا تجويد ودخلوا في فقه وعقيدة وعلم شرعي وبقوا حاجة جميلة ما شاء الله ، فاستغل فترة كليتك والعبها صح واعمل للآخرة واستثمر وتاجر مع ربنا ، تجارة ربنا كسبانة دايما،
وبالنسبة لكليتك اعمل اللي عليك واسعي وبس ، والباقي بتاع ربنا وكله رزق وكل واحد بياخد نصييه ❤️
ربنا يوفقكم يارب اشوفكم علي خير واللي محتاج اي حاجة مهما كانت نصيحة دراسة نصيحة في الحياة ميترددش انه يكلمني انتو اخواتي
وان شاء الله هتابع معاكوا علي مدار الترم برده ولو قدرت اساعد بحاجة هعملها باذن الله او لو جد جديد هبلغكوا
واسف كذا حد بعتلي علي صراحة بس انا مكنتش بفتح والله ف بعتذر معلش
بالتوفيق ❤️