📝 АЛ-ҚОБИЗ
Муножот
Ё ҚОБИЗ, руҳларни қабз қилган Сенсан,
Бу Сендан ўзгага имконсиз экан.
Ризқларни, қалбларни қабз қилиб, тутиб,
Тавба қилишимиз истайсан кутиб.
Раҳматинг кенг эрур, бизга қилма тор,
Сен тутиб турганда, қайда нажот бор?
Нажот бергувчи ҳам Ўзингсан Ё РАББ,
Фақат Сен берурсан хорлик ё шараф.
Ризқимиз қабз қилиб, тор этиб қўйма,
Қалбимиз қабз қилиб, хор этиб қўйма.
Иймон изҳор қилмай тиллар сўнгги дам,
Қабз қилиб қўймагин руҳимизни ҳам.
Баъзан юракларим сиқилиб зор-зор,
Кўзимга кенг дунё кўрингайдир тор,
Чора тополмасман югуриб зир-зир,
Барча мушкулларнинг чораси Сендир.
Ё ҚОБИЗ, торликда қолдирма асло,
Нафсимни хорликда қолдирма асло...
🕊Шаҳобиддин Одил✍
@Asmaaul_husnaa99