Heç gözləmədiyim halda, hətta ehtimal belə etmədiyim halda, Baku Revyu ətrafında skandal qopdu. Bu gün jurnalın təsisçilərindən Rəşad Səfər AYO üzvlüyündən və başqanlığından istefa verdi. Yox, bir dəqiqə, yazmışdım axı, əsl evkafdaki memuriyetden istifa ediləcək hâvâlar duyuram. Əli müəllimin proqnozu yenə düz çıxdı. Hərçənd mənim tənqidim daha çox üslub və mövzulara aid idi, məncə Baku Revyu ətrafında söhbətlər olacaqdısa, elə bu xətdə də olmalı idi. Son nəhayətdə, bizi ayıran da, birləşdirən də estetik dəyərlər olmalıdır. Fəqət amma və lakin ittihamlar havada uçuşdu, heç də xoş təəssürat buraxmadı. Bilərəkdən və ya bilməyərəkdən ara qatanları da gördük, ən azı şəxsən mən gördüm və özüm üçün protokollaşdırdım.
Keçək əsas suala, mənə görə əsas suala. Rasim bəy bəzən sərt, bəzən ütülü ifadələrlə Rəşad, Orxan və jurnalın rəhbərliyinə daxil olmayan Cavidi də nəyəsə görə onlara qatıb yazır ki, istedadsızdırlar, qorxaqdırlar və sair ifadələr. Tutaq ki, mən nə Rəşadı, nə Orxanı, nə Cavidi şəxsən tanımıram. Sıravi bir oxucu kimi girirəm kitab dükanına, görürəm ki, Rəşadı, Orxanı, Cavidi mənə və digər oxuculara və cəmiyyətə kim təqdim edir? Naşir Rasim Qaraca və onun Alatoran nəşriyyatı. Onların yazıçı olduğunu və onları oxumaq lazım olduğunu hamıdan əvvəl kim bəyan edir? Naşir Rasim Qaraca və onun Alatoran nəşriyyatı. Cəmi 15 gün əvvəl, oktyabrın 6-da Bakı Beynəlxalq Kitab Rəzalətində Sərgisində Orxan Əyyubun çıxışı var idi, təşkilatçılardan biri də naşir Rasim Qaraca idi. İndi nə dəyişdi ki, birdən-birə bu yazıçılar istedadsız, qorxaq və sair oldular? Bəs bu paradoksu necə həll edə bilərik?