مـن صـبـيـة 😂😂😂😂
- قصة رومانسية للقلوب الدافئة فقط : 👇🏻
كنا قاعدين أنا و زميلي بالبريك تاع الشغل ،
وعم ناكل سندويشات فلافل و بنشرب معها نسكافيه .. 🌯
طبعاً أول ما وصلو السندويشات ، مسك السندويشة المخزوفة ورقتها لإنو فيها شطة ، و فتحلي ياها و اعطاني ياها ، فحسيت بنوع من الإهتمام و دق قلبي دقة ( 💗 ) بس حاولت أتجاهل الموضوع !
بعدين و في عز إنغماسي مع نكهة الفلافل و الحمص و المخلل المندمجة بلقمة واحدة ! 😍
تطلع بعيوني وقلي ولك رهام ( بصير أصارحك بشغلة ؟)
بلعت اللقمة و مسحت الحمص عن زاوية شفاهي و دق قلبي دقة تانية ( 💗 ) ! و حاولت أتدارك الموضوع ! إحمرو خدودي و فكرت حالي كيوت بس أنا شبه العنكبوت 🌚
قلي( أنا معجب بوحدة ، من زمان ، و بشوفها يومياً ، بتشتغل معي بمكان شغلي ، و بتحب الفلافل بشطة ، و مش عارف كيف أصارحها بمشاعري ) !
قلبي دق تلت دقات ( 💗 ) و الطبلة دخلت لعبت جوا دماغي حاجات ! يعني واضح إنه قصده عني !! مبين متل الله واحد انو قصدو عني !! بس بلف و بدور و بستخدم أساليب الدباديب !
قلت خليني أعمل حالي عبيطة و ألف و أدرو معو أشوف لوين بدو يوصل !! 😌
طلب مني أقترحله طريقة مشان يعترفلها بحبه ، و سألني شو الطريقة التي تذيب قلب الأنثى ! 🍯
قلت بس ! هون لعبتي ! خليني أتدلل و أتمنى !! بما إنو الي رح أحكيه رح ينعمللي ! فاقترحت عليه إنو يجهز بلالين ع باب الشركة ، و ورد متناثر عالأرض ، و يافطة كبيرة مكتوب عليها (ماري مي) ، و نافورة شوكولا راقصة على شكل دب باندا ، و جيب فرقة دبكة و مطرب ، و مصورين و إفتح لايڤ ، و فزع الدنيا ! آه خش عليها بالزواج ! لإنو البنت بتحب الزلمة الدغري !
طبعاً قلبي صار يخابط مخابطة من الفرحة و قلت اليوم يومي ( 💃🏻 )
ضليت لآخر الدوام ونا حايصة لايصة و فرحانة و كل شوي أروح عالتواليت أبوس المراي و أزبط شكلي و أثبت غرتي ورا داني بالحباسات ، و أتدرب عالريآكشن الي رح أعمله بس يطلب إيدي !
فعلاً هو طلع قبل ما يخلص الدوام بساعة و كان معجوق ، و أنا بذكائي و حنكتي كنت عارفة شو قاعد بصير ، 😍💗
فعلاً ، ع موعد الصرفة ، رن تلفوني ، و طلع اسمه ، قلبي صار ينزل يخبط بمعدتي و يطلع يخبط بمخي روحة رجعة !
أخدت نفس و رديت عليه ، قلي ( بدي ياكي بموضوع ضروري ع باب الشركة بسرعة إنزلي ) 😍
صارو أذناي يرفرفو من الفرحة و قلبي سحسل جمب المثانة ، و نزلت ع يوم سعدي بنطنط متل الفراشة ! 🦋😋
لما وصلت ، فعلاً في بلالين ، في ناس ، في (ماري مي) ، في دب باندا حقيقي ! في كلشي !
فوقفت بالنص ، و حطيت إيدي ع عيوني إني متفاجئة 🙈
اجا زميلي بالشغل سحبني من بطة كتفي من وراي ، و قلي ( بس هبل طول عمرك هبلة ، احملي الكاميرا صورينا هيها جاي الي بدي اعترفلها ) طلع قصده عن زميلة تانية النا ! 🐼
المهم أنا عادي ما زعلت ولا فرقت معي ، بس كل الصور الي خلوني التقطلهم ياها ، صورتها و غطا عدسة الكاميرا محطوط
و آخر صورة صورت سطلين الزبالة الي عباب الشركة و تركتلهم ياها ذكرى .