اكيد كلنا لما سمعنا قصة أدم عليه السلام,جه ف بالنا السؤال المتوقع والمنطفي
- لو سيدنا أدم مكنش أكل من الشجرة, كنا هنبقى في الجنة؟
- لأ يا صديقي, افتكر إن في أول القصة أن الله سبحانه خلق أدم من أجل الأرض, لما قال للملائكة "إني جاعل في الأرض خليفة", فهو خُلق علشان يسكن الأرض من البداية
- طيب ليه ربنا خلاه يقعد في الجنة الأول؟
- علشان يعلمه خمس حاجات
1- الحلال :
ربنا سبحانه لما أمر سيدنا أدم وزوجته دخول الجنة, قال لهم "كلا منها رغدا حيث شئتما" ... يعني كل ثمار الجنة دي "حلال لكم أكلها" ... وهنا سيدنا أدم تعلم أن هناك طعام حلال يأكله
2- الحرام :
بعدها ربنا سبحانه وضع له شجرة معينة في الجنة, وقال له "ولا تقربا هذه الشجرة فتكونا من الظالمين" ... وهنا سيدنا أدم تعلم أن هناك "حرام" أشياء معينة ربنا سبحانه يريد منا الابتعاد عنها, ومنلتفتش لإغوائها
3- العدو :
ربنا سبحانه حذر سيدنا أن له عدو وهو الشيطان فقال "فقلنا ياآدم إن هذا عدو لك ولزوجك فلا يخرجنكما من الجنة فتشقى", وأمره بعدم الاستماع إليه مهما قال, لأنه يريد بنا الشر
4- عقوبة المعصية :
لما الشيطان خدع سيدنا أدم وزوجته وخلاهم يأكلوا من الشجرة, ربنا سبحانه عاقبه وزوجته بالخروج من الجنة ونزول الأرض "قلنا اهبطوا منها جميعا" ... وهنا سيدنا أدم تعلم أن معصية الله لها عقوبة وهى عدم التواجد في الجنة
5- التوبة :
لما سيدنا أدم وزوجته نزلوا الأرض, كانوا خايفين من ربنا سبحانه لأنهم عصوه, لكن ربنا سبحانه لأنه رحيم, فأوحى سيدنا أدم وعلمه كلمات يقولها " فتلقى آدم من ربه كلمات فتاب عليه إنه هو التواب الرحيم", وأول ما قالها ربنا أوحى له أنه غفر له ... وهنا تعلم إن الإنسان مهما فعل, مهما ارتكب معاصي, يقدر يتوب ويرجع ويدعو ربنا سبحانه إنه يغفر له, فربنا هيغفر له ... لأن ربنا سبحانه يريد الخير لنا
فالهدف من دخول أدم الجنة إنه يتعلم كل حاجة محتاج لها, علشان لما يسكن الأرض يبقى عارف إيه إللي يرضى ربنا وإيه يغضبه, وأن الشيطان عدو ليه وأن الله غفور رحيم, مهما كان ذنبك, هيغفر لك لو توبت وندمت وبقيت كويس
وكمان درس لينا إحنا, علشان كدة دايما بنحكيه ونعلمه لغيرنا.