طلبة أولى ثانوي لعام 2023/2024 "2008" تعالوا نحكيلكم عن مواد أولى ثانوي شوية .
نبدوا بالرياضيات :
رياضيات اولى ثانوي عبارة عن تسخين لسنة ثانية وثالثة ثانوي يعني مقدمة ، واللي لازم تركز عليه في رياضيات اولى هو باب " المجموعات " لأنه ح يصادفك في إحصاء سنة ثالثة و باب " الأسس والأعداد غير القياسية واللوغاريتمات" وهذا في غاية الأهمية لأنه برضو ح يصادفك في سنة ثالثة وثانية وفيه قوانين مهمة مبني عليها الرياضيات ، وباب "نظرية فيثاغورس وحساب المثلثات" وحتى هذا مهم جداً جداً لسنة ثانية وثالثة والقوانين الي فيه مهمات ، وباب "الهندسة الإحداثية والرسوم البيانية الخطية " هذا باب في غاية الأهمية لازم تفهمه باش تفهم رياضيات ثانية وثالثة ، بالنسبة لباب التغير هذا مش مهم هلبا ، وباب الحلول البيانية برضو فيه حاجات مهمة ، ونجو لباب "المعدلات التربيعية" الباب هذا مهم وفيه معلومات ممكن تفيدك في المستقبل ، اخر بابين مش مهمات هلبا .
نجو للفيزياء :
الفيزياء ساهلة وما تخافوذ منها عبارة عن تحويلات وهادم لازم تفهموهم كويس باش يلحقوك في سنة ثانية وثالثة ، وعبارة عن قوانين سرعة والمسافة وما فيش منها خوف ساهلة وبسيطة وممتعة ، ح تستغربوا حاجة اللي هي الرموز بيبدو بالإنجليزي ، بس هي مهمة جداً لأنه ميكانيكا متاعت ثانية وثالثة مبنيه عليها .
الكيمياء :
ساهلة ولكن تبي من يعطيها حقها في الشرح ! يعني تبي انسان كيميائي يشرحها لك هنا تفهمها ع طول !
ممتعة وحلوة ومشوقة وخاصة كان كملتوها ، تعتمد ع الحفظ والفهم في نفس الوقت بس اكيدة تبي فهم اكثر .
الأحياء :
دسسمم جداً جداً ويبي تركيز وحفظ وفهم 😂.
أحياء سنة اولى يشبه هلبا لعلوم الأعدادي بس هني اكيدة ح يتوسع وح يتعمق !
الأنجليزي :
قواعده مهمات جداً لانه تقريباً في اكثر من قاعدة مشتركة بين سنة اولى وثالثة علمي !
المهم قواعدة ساهلات لما تلقى من يشرحلك ! واغلب قواعده ازمنة .
تقنية المعلومات "الحاسوب" :
ابرد مادة ح تواجهكم في سنة اولى 😂.
لا تنحفظ لا تنفهم مهما تشرح الأبله 😂.
المهم اول بابين نظري وبعدها كله عملي .
التاريخ :
يتكلم عن تاريخ الأنسان قديماً وحلو للناس الي بتخصص أدبي ، يبي حفظ وفهم .
في بدايته يتكلم ع الانسان القديم وبعدها يبدا في القبائل في ليبيا وشمال افريقا وما ادراك ! المهم حلو .
الجغرافيا :
صعبة شوي ودسمة ! وتبي قراية اول بأول !
جغرافيا سنة اولى عبارة عن علل وعرف 😂.
الدراسات الأدبية :
الدراسات الادبية هي تعريف للبلاغة والنقد والشعر والنثر والأدب ! بعدها يبدا في النصوص الشعرية .
المهم التغير الي ح يطرأ عليكم هو بدل ماكانت اسمها قراءة ونصوص بدا دراسات ادبية راه 😂😂😂.
الدراسات اللغوية :
وهي النحو والصرف والاملاء
النحو ساهل وتافه اخرى ! حاجات عامة وساهلة وواخدينهم من الاعدادي
اما الاملاء ف برضو هي زي السنين الي فاتت
الصرف ، صرف صف تاسع نفسه.
الدين : ساهل وحلو وممتع وفي معلومات حلوة .
علم الاجتماع : برضو حتى هو تعريف لعلم المجتمع ولازم تفهمه كويس باش يلحقك في سنة ثانية وثالثة الناس اللي بتخصص أدبي ويعتمد على الابلة هل تلخص ولا لا ساهل ما تخافوش منه .
وبسس ، بالتوفيق إن شاء الله🤍 .